Merry Christmas

أولاًُ وقبل أى حاجه أنا بعتذر جداً لكل من كتب تعليق على آخر بوست وأتحذف التعليق بالطبع مع البوست ... مش هقدر أسهب فى كلامى وأقول أنا حذفته ليه لكن يكفى أنى أقول حذفته لأسباب شخصية .. عارفه أن منكو أصدقاء قريبين منى وهتقدروا وعارفه ان فى ناس متابعة البلوج حتى لو مش بيكتبوا تعليق وعارفين ان دى أول مرة تحصل لأنى بحترم أى حرف حد يكتبه على البلوج ده حتى لو كان نقد .. طبعا ما عدا بعض الاشخاص اللى عقولهم اتبدلت بنخاعات مسلوقة دول مش بلتفت لتعليقاتهم خالص ومن اول ما اشوف الاسم برمى فى الزبالة اصلى مش بحب اوجع دماغى كتير .. الاعتذار والتوضيح ده لاصدقائى وللناس اللى بينا احترام متبادل وبس

********
كنت بتكلم عن سانتا كلوزا من شوية فى الفيسبوك وببعبر وأوصف أد ايه انا مشتاقة لرؤية سانتا كلوزا النهاردة يمد لنا إيده المملوءة بالفرح والسعادة فسألنى مادو اشمعنا يعنى النهاردة ؟ قولت له علشان النهاردة الكريسماس قالى انتى فى غيبوبة يا بنتى ده النهاردة لسه 25الكريسماس 31قولت له يا حاج مادو عجبته اوى كلمة حاج دى بصراحة مع انه علمانى كافر 25ده الكريسماس لكن 31ده راس السنة . سألتنى راندا ليه عايزة تشوفى سانتا كلوزا ؟ قولت لها يمكن يستلب من دواخلنا المشحونة بالهموم وبعد رحيله يسيب لنا زهوره مع أحلام وأحلى أمنيات ورحت مقلبة صورة من عند صديق عزيز ونزلتها وقولت لهم النهارده ده سانتا كلوزا كل واحد يكتب أمنيته




راح شريف قايلى ده سانتا كلوزا ولا موزة كلوزا يا حنان ؟
قولت له وده سؤال يا بنى ما انت عارف الإجابة مسبقاً وبعدين المفروض كل واحد يكتب امنيته ويشوف عايز ايه ومقدرش أنكر إنى كنت اول واحدة كتبت أومنيتى ومحدش يسأل هى أيه اصلى كتبتها بالحبر السرى

وبما إن النهاردة يوم الأمانى ويمكن تتحقق أو مش تتحقق فى حد انا مدينة ليه باعتذار وأعتراف هو إحساسى إنك لسه بتابعنى وساعات بقرا تعليق من مجهول بحس إنه أنت أصلك بتتكشف بسرعه أوى حتى لو مش كتبت لى فى آخر التعليق إنى بنتك اللى كنت بتتمناها بس ده كويس جدا اصلك كنت هتندم هههههههههههه
فى حوار ماسنجر
ى مع مشمش ومع بداية مجلس النميمة عن ميجو وساندو كان لازم يتخلل الحوار عمو عصام ؟
قولت لها تصدقى لما اتقابلنا فى الأوبرا وشوفت طريقة الحوار كنت حاسة إنى جوا كتاب عن حياة يوسف النجار


بنوتة : بحس بجد إن الدنيا لسه بخير وإن فى ناس بيحبونا ويهتموا بينا حتى لو مش اتقابلنا معاهم قبل كدا كفاية أقولك إنى فعلاً بدور على تعليقاتك ومش قادرة اقولك بتكسف من نفسى أد أيه كل لما ألاقي لك تعليق بتسألى فيه عنى وبتطمنى عن أخبارى شكيت فى مرة إنك نرمين اللى لما مش بتشوفنى يوم فى الفيسبوك من سؤالها الكتير والرسايل اللى بتسيبها لى بحس إنى لو أتأخرت يوم تانى ممكن تحجز على أول طيارة من كندا وتيجى تدور عليا وقعدت فى يوم أحلفها إن مش أنتى بنوته وهى تضحك وتقولى أحلف لك بإيه طيب إنه مش أنا بجد سؤالكو بيفرق معايا أوى ودايماً تلاقينى بسأل هو ليه مش كلنا نفس الحب اللى بنكنه لبعض ده ؟ هو مش المفروض إن بتضمنا سما واحدة وأرض واحدة مع إختلاف الأماكن ؟ ليه الناس بشوفها بتاكل فى بعضها مع إن فى براح فى الكون يقضى أضعاف أضعافنا

أسعى إلى الصفاء الخالد
كل لما أحس إنى قربت أوى ألاقينى كنت جوا وهم كبير أوى وأرجع تانى من البداية .. فى يوم سألت فى ستيتوس إمتا يتحقق السلام على الأرض .. كانت الإجابات محبطة للغاية ولاقيت عبدالرحمن راح جاب لى صورة لمنفذ الهجوم الانتحاري في ستوكهولم....و زوجته و ابنته وبيقولى سلام على الأرض إزاى وفين وفى ناس بينا فاهمه الدين غلط وتفسير الآيات غلط


فكرنى بمقال قريته للأستاذ سامى بحيرى عن جاره فى الطيارة اللى رايح بعثه ياخد فيها الدكتوراه من بلاد الفرنجة وهدفه الأول هو الجهاد ولما سأله ايه مفهوم الجهاد عندك قاله أدعوهم للإسلام وإن مش اسلموا اما الجزية او الحرب.. طيب ناس مش دفعتك فلوس وهتديلك شهادة متحلمش بيها دى شهادة الطب عندك فى مصر مش معترف بيها فى أى دولة محترمة ورايح تعتدى عليهم فى بلادهم ؟؟؟ مين الحمار اللى فهمك إن ده دين ؟ ولا أنت كالثور الذى لا يعرف قانيه ؟

وبما إن لسه الأمانى ممكنة

Lets talk about love - it's all were needin'
Lets talk about us - it's the air we're breathin'
Lets talk about life - I wanna know you
Lets talk about trust - and I wanna show you
Lets talk about love


تعليقات

‏قال عمو عصام…
كل سنه وانتى طيبه ياقطه..وكل سنه وأمانيك كلها محققه حتى لو مكتوبه بالحبر السرى..وكل سنه وانتى فاكرانى وبتنمى على مع مشمش وبالمناسبه هى كان لازم تدعوكى للعمليه207 ولو محصاش تبقى أنانيه منها..طبعا هى هتقوللك يعنى إيه 207..أنا بقالى مده مش بعلق غير على الفيسبوك ومدخلتش اى مدونه وبأمانه مش فاهم السبب..لكن هرجع لمدونتك تانى بعد الكلام الجميل ده...وبإذن الله نتقابل قريب مع ميجو ومشمش
‏قال Desert cat
بأمانة كلنا مش فاهمين السبب
حتى انا برضه وجودى بقى على الفيسبوك بعد ما كانت المدونة بالنسبة لى حاجه أساسية
كل سنة وأنت طيب يا عمو عصام وأكيد لو مشمش شافتنى أون لاين هتبلغنى بالعملية 207 وربنا يستر اصل انا عارفه عمليات مشمش
‏قال Ms Venus
قطة


كل سنة وانتى طيبة وجميلة وراقية الفكر والاخلاق


صدقينى بتمنى يبقى فى ناس كتير زيك يا قطة فى مصر

كان الحال اتغيررررررررررر كتير


يارب سنة سعيدة عليكى تحققى فيها كل اللى بتتمنيه


وردة جميلة لعيونك
‏قال Boneta
قبل اي شيء انا كنت عاوزه اقولك خير مافعلتي انك كنسلتي البوست الاخير لاني كنت عايزه اطلب منك تحذفيه ولكن خفت اضايقك وخصوصا اني حد جديدومش عندي رصيد كفايه عندك اني اطلب منك طلب زي ده
المهم الحمد لله انك بخير يا قطه وإنك طمنتينا عليكي
‏قال Boneta
قطه انا قريت البوست اول مره وعدت عليا كلمه "بنوته"
بس لما ركزت افتكرت انك كتبتيهالي قبل كده في كومنت وفهمت انك تقصديني انا!!بجد بتحرجيني يا قطه انا مااستحقش الكلام الجميل ده كل الموضوع انه يشرفني يكون لي اخت روحها جميله وضميرها لسه عايش زيك وعلشان كده بتابعك دايما ولما بتغيبي بقلق عليكي جدا وببقي عايزه اطمئن عليكي. صحيح احنا ما اتقابلناش ومفيش سابق معرفه بيننا لكن ده مش مانع بالنسبه لي اني أحبك كأختي فعلا واقلق عليكي لما تغيبي وهاضحكك لو قولتلك اني بمشي أدور عليكي ونفسي كل مصر تبقي قطه الصحراء أنا مش عارفه مين نرمين اللي بتتكلمي عليها لكن انا مش هيً .ابقي صدقيها بعد كده (:
تقبلي تحياتي واسفه للرغي الكتير اللي فوق
بونيتا
MERRY XMAAAS TO ALL
‏قال Migo Mishmish
وانت طيبه يا قطة
وبتمنى ان سانتا السنه ديه يجبلك كل الهدايا الحلوة واللعب الجميله وكل الشكولاته اللي تقدري تاكليها
وبالنسبه للعمليه 207 فهمي عمليه ملوحة ورنجه وفسيخ بتتعمل للكبار فقط
لانها بيقى فيها بتاع 5 او 6 كيلو ملوحه على رنجه على فسيخ وبتاع بـ 10 جنيه عيش من ابو شلن بتاع الحكومة
وبصل اخضر اكتر من انه يتعد
ومشنه لمون
وعادتاً بتم مرة كل تلات او اربع شهور علشان الاثر بتاعها يروح
وبرضه بنبقى ناس كتير قوي
ومتقسمين تبع الاختصاص
يعني ترابيزة المختصصين عليها عيش قليل بصل كتير ولمون كتير وطبعاً ملوووووووووحه وفسيخ كتير. علشان بناكلها حاف
وبقيه الترابيزات اللي عليها بيختلف بحسب
Rank
اللي هياكل
لغايه لما بنوصل لترابيزة المبتدئين والاطفال وديه عليها رنجه بس
وبعدين بنبقى موصين ناس اننا لو لغايه الساعه 12 بالليل محدش فينا ظهر يتصلوا بالاسعاف ويبلغلوا البوليس ويكسروا الشقه ويطلعونا
فالدعوة عامه عند عمو عصام للعمليه 207
والتي بها سنودع عام 2010 ونستقبل عام 2011
ده لو عشنا بعدها
Love
MishMish
‏قال normary
ya hanoon ay 7abibi ana ba7ebk gdan we yarb ahlamek kolha tekon waki3 abl santa kloza ma yousl kman
I love you ya gmil
‏قال Desert cat
Ms Venus

ميرسى يا فينوسة
كل سنة وانتى احلى وردة
‏قال Desert cat
Boneta

أكيد كنتى هتقولى مع ابداء الاسباب فالطبيعى كنت هحذفه برضه
‏قال Desert cat
Boneta

هو بما إن الحروف عندى متكسرة والعربى والإنجليزى وكل اللغات عندى فى الضياع فبتلاقينى بالغى حروف أو أضيف حروف بس فعلاً إنتى المقصودة
أولاًوقبل أى أى حاجه أنا بجد يشرفنى إنك بتعبرينى زى اختك
مش لازم نتقابل يا جميل علشان نحب بعض المهم الأفكار بتتقابل وأنا صدقينى بحبك جداً ويمكن سبب سؤالى إنك ممكن تلاقى ناس بتتعامل معاكى لأغراض مش تفهميها وممكن يكون فى ناس قريبة منك لكن فى نفس الوقت مش قادرين يفهموكى وناس تانية كل وظيفتها فى الحياة انها تعيشك جوا دايرة من المشاكل وخلاص وفى نفس الوقت ممكن تلاقى ناس بعيد ومش اتقابلتو قبل كدا لكن بتقلقوا على بعض وبتحبوا بعض
بجد انا مبسوطة بيكى اوى
وبعدين انا مش كان قدامى غير انى اصدق نرمين
:))

Merry Christmas
‏قال Desert cat
Migo Mishmish

اه وحياتك يا مشمش توصى سانتا كلوزا على الشكولاتات دى أهم حاجه
العملية 207 دى اتعزمت عليها قبل كدا من سنة تقريباً وبعدها بلغت فرار
انا لسه الحياة قدامى
وحياتك يا مشمش بلاش ترابيزة الاطفال اصل انا بحب ساندو موووت
‏قال Desert cat
normary

ده ايه الانجليزى اللى دايس عليه قطر ده وانا بقول لبونيا الحروف واللغات عندى ضايعه اتاريكى عايزة المجمع اللغوى يصحح لك
:))
انا كمان بحبك جداً
وبتمنى لك يتحقق كل حاجات جميلة فى حياتك
‏قال ELVIRA
كل سنة يا قطة و يا فينوس و مشمش
كل سنة و أنتو طيبين
متحررين مرحين من غير عكننة
أو نكد

كان نفسى اوريكوا الشجرة بتاعت الكريسماس عندنا تعبتنى فى زينتها لكن تستاهل
و المهم أنى مكسرتش أى كورة من كور الزينة المرة دى
‏قال غير معرف…
الكرسمس هو 24 و 25
كل عام والجميع بخير
تحياتي
‏قال غير معرف…
انتى اللى قولتى يا قطة النهاردة اعترافات ويوم الامانى الممكنة انا كمان جاية اعترف لك إنى بحبك جدا
وبتعجبنى طريقة تناولك للمواضيع
فيها خفة دم وجمال روح غريب وكتير بتمنى نكون اصدقاء
على فكرة انا متابعة ليكى من زمان من ايام ما كنتى بتكبتى فى مجلة على صوتك
موش بونيته ونرمين بس اللى بيقلقوا عليكى لما بتغيبى انتى الاول كنتى نشيطة جدا وعودتينا على مواضيع كتير انا عارفه ظروف الحياة بتختلف واكيد لما بتغيبى مبيكونشى مقصود

ليا طلب عندك كنت قريت لك تعليق فى مدونة لحد من اصدقائك بصراحة تعليقك عجبنى اكتر من الموضوع علشان كدا كنت عايزاكى تكتبى عنه
هبعت لك كومنت غير قابل للنشر يا قطة
خليكى فاكرة غير قابل
‏قال Desert cat
ELVIRA

كل سنة وانتى وكل الناس الجميلة بخير

انتى ممكن تورينا الشجرة صوريها ونزليها عندك على البلوج
واحنا ندخل نشوفها ونحسدها لك قصدى نتعلم ازاى مكسرتيش كور الزينة


Merry Christmas
‏قال Desert cat
نزار النهري

كل عام وكل يوم وكلكوا بالف خير
‏قال Desert cat
Anonymous

احم احم
اخجلتم تواضعنا
بس انتى مين ؟ ممكن تكتبي لى فى التعليق
اللى مش هنشره

نبتدى جد شوية بقى
انا بجد محرجة منكو كلكو
ومش كنت عارفه بجد انكو مهتمين بمتابعتى للدرجة دى
انا معترفة فعلا انى كسولة جدا من فترة فى التدوين وفى متابعة البلوج
لكن إذا عرف السبب

اروح بقى اشوف التعليق التانى
‏قال Boneta
السبب طبعا كنت هاقولك عليه بيني وبينك من متابعتي لمدونتك بشوف اشكال غريبه بيعلقوا عندك وبيكونوا متعمدين يضايقوكي وبحس فعلا انهم مش بشر ولا عندهم اي نوع من الاحساس وعلشان كده ماكنتش احب انهم يقروا حاجه زي كده تقول انك موجوعه من موقف معين خصوصا انهم بيتلذذوا في استغلال ضعفاتنااو بمعني اصح خصوصياتنا علشان يعايرونا بيها لانهم وللاسف مرضي نفسيين ومحتاجيين مصحات تلمهم
وانا ما احبش اشوف حد منهم بيستغل كلامك علشان يجرحك بيه
ربنا يرحمنا من الناس دي ويحميكي يا حبيبتي من امثالهم
احلي تحيه لاحلي قطقوطه في الدنيا :)
‏قال Desert cat
Boneta

تصدقى يا بونيتا إن الأشكال اللى بتتكلمى عليها دى وصلتنى لمرحلة التبلد
حتى البوستات اللى مش فيها كلام يخصنى او مواقف شخصية تلاقيهم بيحوروها بناء على المرض اللى فى عقولهم لخصوصيات متفهميش إزاى

والله انتى حد جميل أوى وأنا بعتز بيكى وسعيدة بيكى جدا
‏قال واحد حقانى
هو انا داخل مدونة غلط
مستغرب يعنى لا بتهزأى المنقبات ولا بتقطعى فى فروة الإخوان
وقاعدين فاتحينها جلسة حب
واللى تقولك يا قطتى ويا حبيبتى
واللى كانت متبعاكى من ايام على صوتك طيب ما انا كمان كنت متابعك فى على صوتك ووسط البلد كمان ده انا سجدت لله شكر ان على صوتك وقعت
‏قال Desert cat
واحد حقانى

مش عارفه ليه بشبه عليك
المهم انت ايه تاعبك انهم بيقولوا لى يا قطتى ويا حبيبتى متغاظ علشان محدش بيعبرك ؟
اوعى تقلق هرجع تانى اهزء المنقبات واقطع فى فروة الاخوان ده بس كان ريست
‏قال Kontiki
كل سنة واحنا ممممم ان شاء الله طيبين يعنى
merry xmas :)
‏قال Elmasryeffendi
هو فعلا الكريسماس يوم 25 ديسمبر لكن لاننا دولة رائدة فى كل شئ عملوه 31 لان مصر ام التعصب و التخلف فى كل شئ ، الاسلام وهابى و المسيحية ارثوذكسية و ما فيش يهود خلاص، على العموم كل سنة و انتى طيبة و ربنا يحقق كل امانيك و امانيينا جميعا بالسلام و الحرية و العدل و النظافة و المساواة و كل الحاجات اللى بتمناها لينا و لبلدنا
‏قال Desert cat
Kontiki

يا كوكو يا متفائل
قولتى لى بقى احنا توأم فى كل حاجه علشان ايه ؟؟
ايوووووون بالظبط كدا
‏قال Desert cat
elmasryeffendi
تصدق كل لما بقرأ لك حاجه او اشوف لك اى تعليق بيكون نفسى أعمل كوبى وبيست منك فى مصر كلها علشان أكيد وقتها كنا هنبقى أحسن بلد فى العالم
كل سنة وانت راقى الفكر
‏قال غير معرف…
هو فيه إيه؟ حاموت وأعرف إيه اللي كان في البوست المحذوف. شوقتيني جدا. يلا بقى ماعلينا. كل سنة وانتي طيبة وكل سنة وكل الناس طيبين. أتمنى لكي وللكل كل الحب والجمال والامان. سنة سعيدة.

مصرية من كندا.
‏قال Desert cat
Anonymous

معلشى بقى تتعوض فى مرة تانية
:))
كل سنة وانتى طيبة وجميلة
‏قال غير معرف…
I'd like to thank you for the efforts you've put in penning this site.
I really hope to see the same high-grade blog posts from you in the future as well.
In truth, your creative writing abilities has inspired
me to get my own website now ;)

Feel free to visit my web site ... orquesta atraccion

المشاركات الشائعة