نفسك فى أيه ؟



مقدرش انكر انى كنت مأجلة البوست ده لكام يوم جايين .. لكن بما أن الجميع عارف إن الإنتظار وحش خصوصاً لو ناس بتحب بتشوفهم وتتكلم معاهم يبقى مضطرة اتكلم فيه لحد ما أصحابى يوصلوا


طبعاً عنوان البوست مالوش علاقة خالص بأغنية كماننا .. لكن أنا حبيت أتكلم عن اللى فى نفسى
واللى شوفته وحصل فى 2010ومتنماش إنى اشوفه ولو حتى صدفة ولو مجرد شريط ذكرى فى 2011مع إنى برضه مش متفائلة أوى بس متمناش إنها تكون زى اللى فاتت ولو بحاجه قليلة أوى
يعنى مثلاً نفسى إن
2011مش يكون فيها
أى أزمات من أى شكل وأى نوع
يعنى سنة جديدة سعيدة على العالم كله بصرف النظر عن الجنس او اللون أو النوع
سنة جديدة على المصريين من غير بطالة
سنة جديدة على المصريين من غير اعتصامات او اضرابات
سنة جديدة على المصريين من غير صخور دويقة او اى تصريحات تحرق الدم ملهاش اى علاقة بالمواطن المصرى من قريب او بعيد
سنة جديدة على المصريين من غير نجع حمادى ولا عمرانية ولا اى فتن طائفية
سنة جديدة من غير خطب وهابية ولا سلفية ولا تحريض على المختلفين معنا ولا عنصرية
سنة جديدة سعيدة على الجميع من غير اشباه البشر اللى مفرغين حياتهم لأذيتنا والنميمة والكلام فى حقنا والخوض فى حياتنا الشخصية بسبب وبدون
سنة جديدة سعيدة على المصريين اللى بجد اللى دينهم هو الانسانية ونوعهم هو الرحمة ولونهم هو المحبة
سنة جديدة سعيدة من غير ارتفاع اسعار ومرتبات متدنية
سنة جديدة سعيدة من غير فقدان ناس غالية فى حياتنا
دلوقتى كل الى بتمناه بجد هو ازاى نقدر نحب بعض ونحافظ على بعض ونحتفظ ببعض

سنة جديدة سعيد على الجميع


Comments

Boneta said…
انا عاوزه بابا نويل اللي بره ده يا نونو شكله أمور قوووي
نتكلم جد؛؛ انا كمان نفسي كل الامنيات دي تتحقق ولو بنسبه صغيره
تعرفي اوقات كتيره بتمني يجيلي فقدان ذاكره .ايوه ماتستغربيش
من كتر الحاجات الغريبه اللي بتحصل في بلادنا الجميله مصر بحزن وبوصل لحد الاكتئاب كمان وبتمني لو مخي يوقف علشان كده كتير قوي عليه؛؛ ربنا يسامحني لكن غصب عني مش قادره اتحمل اللي بيحصل المهم مش هانكد عليكي انا بس حبيت افضفض معاكي شويه معلش
امنيتي الخاصه جدا ليكي هي ان ربنا يحميكي ويحقق لك كل امنياتك وسنه جديده جميله عليكي وعلي كل حبايبك
اجمل تحيه لاجمل قطه
elmasryeffendi said…
سنة جديدة سعيدة عليكى و على مصر و كل الاحباب ، بس انا نفسى فى حاجة من رابع المستحيلات ، نفسى السنة الجديدة تبقى بدون اخوان و بدون و هابيين و بدون حزب وطنى
Ms Venus said…
امين يارب


بتمنى معاكى يا قطة كل اللى بتقوليه


كل سنة وانتى بكل خير وفرح وسلام وراحة بال
سمراء said…
كل سنة وانت طيبة
كل سنة وانت سعيدة

تعرفي نفسي في ايه ؟


نفسي ربنا يحقق لك كل اللي اتمنيتيه


سمراء
Desert cat said…
Boneta

يا سلام بابا نويل اللى بره واللى جوا وكل بابا نويل اللى فى الدنيا كلها علشانك

تعالى بقى قولى لى فقدان ذاكرة ايه بقى اللى بتتمنيه ... اذا كنت انا ساعات لما الدنيا بتقفل ابوابها قدامى والاقينى لا طايقة اللى حواليا ولا اى حد قدامى بقعد اقول بس مش مهم ان فى حوالينا ناس زبالة وفى ناس م تستاهل اى حاجه فى ناس برضه كويسه بنحبهم ويحبونا ومش بيعملوا اى حاجه غير انهم عايزين الناس الزبالة دى تنضف او تختفى من الوجود فى ناس كتير زيك وزى اوليفرا و كونتا ونرمين ولو بجد قعدت اكتب لبكرة مش هيكفينى البلوج وده معناه ان مش انتى وانا وبس اللى بندورعلى تغيير وفى نفس الوقت مقدرش انكر عليكى حقك فى اوقات الكآبة اللى بتحل علينا اصل ممن تلاقى عشرة كويسين بينهم واحد يكرهك فى الحياة باللى فيها
بس اللى بتمناه ان الاشكال دى خلاص بقى تختفى من حياتنا كل

سنة سعيدة عليكى وعلى كل أحبائك
Desert cat said…
elmasryeffendi

تصدق اتمنيت نفس الامنية وكنت هكتبها لاكن رجعت قولت الناس دى طول ماهى زلاقو لنا فى كل حاجه كدا وفى وراهم اللى بيخطط لهموهما ماشيين على خطاه يبقى انا كدا بدور على العنقاء والخل الوفى

يارب كل امنياتك تتحقق
وسنة سعيدة عليك
Desert cat said…
Ms Venus

انا كمان بتمنى لك نفس امنياتك ليا يا فينوسة
انتى المرة دى نسيتى الوردة الحمرا بتاعتى بس انا بهديهالك خليها مرة عليا بقى
كل سنة وانتى ارق بنوتة
Desert cat said…
ذو النون المصرى

كل سنة وانت بتحقق امنياتك
Desert cat said…
سمراء

كل سنة وانتى جميلة ورقيقة يا سمراء
انا كمان بتمنى ربنا يحقق لى وليكى ولكل اصحابنا كل اللى يتمنوه
Boneta said…
ايه رايك يا قطه مش معايا حق اتمني يجيلي فقدان ذاكره شوفتي ازاي الهمج ضيعوا فرحتنا ليله راس السنه والناس كانت فرحانه بالسنه الجديده وكل املهم ان السلام يعم علي بلادنا
تفتكري اللي حصل امبارح ده حصل ليه؟
دا عباد البقر والبهايم لا مؤاخذه مش بيعملوا كده في الناس تفتكري الهتهم اللي هي "البقره" احن و اطيب من اله الارهابيين
علي البشر!؟
Desert cat said…
Boneta

انتى عارفه اللى يحرق الدم اكتر من الحدث الارهابى نفسه التصريحات اللى دايرة توزعها الحكومة هنا وهناك وكأن اللى ماتوا دول شوية ممثلين
وهيفوقوا تانى

انا مش بتمنى افقد الذاكرة بس بتمنى يشوفوا اللى بيحصل فى الناس ومش يحصلهم لكن يحصل لحد غالى على قلوبهم علشان عايزة اشوف احساسهم هيكون ايه
Boneta said…
حتي ولو حد قريب منهم مات فا الاشكال دي مش بتحس اساسا ولا عندها عزيز ولا غالي
بدليل اللي ربنا عاقبه اشد عقاب في حفيده ولا كأن فيه حاجه حصلت
انا كنت متخيله انه هايتقهر ويفارقنا بقي من الحزن علي الولد لكن زوغ من عزرائيل يا اوختي
ياريته كان هو اللي انقشح ولا الطفل البريء.يلا هانعمل ايه ربنا موجود وانا واثقه انه هاينتقم لنا بطريقته وقريب كمان
تحياتي لك

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز