الإرهاب ليس له دين


فى بيان لتنظيم القاعدة تبنى فيه هجوما داميا على كنيسة سيدة النجاة التابعة للسريان الكاثوليك ببغداد مساء أمس الأول حاول التنظيم تبرير الهجوم بالقول إنه نفذه نصرة لأخواتنا المسلمات المستضعفات الأسيرات فى أرض مصر المسلمة وطالب إطلاق سراح كاميليا ووفاء وجميع الأسيرات المسلمات .. أولاً مين دول ؟ ومين اللى عينهم أوصياء على دول العالم وحماة للدين ؟ ومين اللى قالهم إن مصر ليها ديانة ؟ مصر مصرية رغم أنف الجميع

مين اللى قالهم إن قتل الآمنين وترويعهم هيدخلهم الجنة ؟ ومين اللى شجعهم على التعدى على سيادة وأمن دولة بحجم مصر ؟ من خلال متابعتى للتعليقات على المواقع الالكترونية شوفت اتحاد مش كنت متخيلاه خصوصاً بعد كلام العوا ومظاهرات السلفيين والإخوان .. وعند آخر ثلاثة اسمحوا لى بوقفة العوا والسلفيين والإخوان .. من يسعون للحكم لفتح مصر على مصراعيها لايران وحماس واخواتهم فالحدود بين الدول حرام شرعاً اصل الاسلام مش كان فيه كدا كمان جدار عازل ايه ده اللى يتبنى البلد لازم تبقى سداح مداح لكل من هب ودب .. وإن أمنا نفسنا وقفلنا الأنفاق اللى بيهربوا منها المخدرات والأسلحة ويدخل من خلالها الارهاب لمصر يبقى نظام كافر بيساعد القتلة وسفاكين الدماء .. إذن مين اللى سمح لمصر بالتهديد نعم فالتهديد للكنيسة المصرية هو تهديد للمصريين جميعاً .. مين اللى كان صاحب اليد العليا فى تهديد الأمن داخلياً حتى يتجرأ الإرهابيين بالتهديد خارجياً ؟؟

أنا لا اقصد من كلامى التحريض ولكن لا يمكن لكل صاحب بصر وبصيرة إنكار ضوء النهار

إذا كان أياً من الديانات الإبراهيمية الثلاث أمر بالقتل وسفك الدماء حتى يرضى عنك الرب ويرزقكك ب72 فيرجن فى الحياة الأخرى فأتوا ببرهانكم إن كنتم صادقين .

يا من تتشقدون بأن الإسلام دين السماحة فأى سماحة فى حروب داخليه خبيثة يشنها من يملكون ماء السماء الطهور الذى سيطهر الشعب المصرى على أساس ان الشعب ده نجس .

ألم تعرفوا من الدين أن الانسان لا يقدر إلا بالعمل والمعاملة والتقوى اما الأديان فهى لتنظيم العلاقات الإجتماعية وإحترام الإنسانية ؟ فأى تنظيم واى إحترام لجماعة طز الشهيرة وإنجازتهم التى لا تخفى عن أحد تحت قبة البرلمان من رفع جزم على المعارضين وسرقة أدوية العلاج على نفقة الدولة ؟ وإن نظرنا للسلفيين فلن نجد إلا كل خراب ودمار وتكفير وإنحطاط فكرى وأخلاقى ويكفينا ما يفعلونه من أجل طمس الهوية المصرية وسعيهم للعودة بمصر آلاف السنين ولكن أخاف الظلم حقاً فمن إنجازتهم إغلاق المساجد والشوارع بالمظاهرات من أجل كاميليا .

فإذا كان الداخل يعج بمثل هؤلاء ؟ لماذا نلوم إرهابيين الخارج ؟ أنا لا أوجد لهم المبررات فأنا أثق تمام الثقة فى الأمن المصرى وفى جميع المصريين الشرفاء المسلمين قبل المسيحيين فى حماية الكنائس المصرية فوحدة الدم واخوة الوطن فوق الجميع .. ولن يسمح مصرى شريف بالتدخل السافل والتهديدات الحمقاء من أمثال هؤلاء السفاحين .

ولردع المجرمين حتى لا تعاد الكرة مرة أخرى وجب بيان مشترك من رجال الدين مسلمين ومسيحيين وكتم أفواه من يسعون للفتنة والمهللين .. أعتقد ده وقت المصريين اللى بجد بصرف النظر عن الإعتقاد والدين أن الجميع يبقى إيد واحدة ليعلموا هؤلاء القتلة أن جميع المواطنين بجميع الديانات بمختلف الأطياف = مصر


تعليقات

‏قال Ms Venus
فى ايه فى الكتاب بتقول


سيأتى ساعة يظن فيها من يقتلكم بانه يقدم خدمة لله



ده تعليقى
‏قال ELVIRA
حاجة تطهق الواحد يعنى حد يصدق ان المسلم الماليزى أقرب لى من المسيحى المصرى
دة انا لو قلت نكتة مش هيفهمها غير المصرى اللى زى انا
و حكاية التدخل فى شئون مصر دى القرف الحقيقى
احنا مش عايزين منهم حاجة عايزنهم يحلوا عن سمانا و يطلعونا من دماغهم بس
فيها حاجة دى
‏قال Elmasryeffendi
و هما اساسا ما اهلهم بمصر ، مش فاهم ازاى شوية بقر يروحوا يعملوا انفجار فى البورصة و يفشلوا فتيجى فى الكنيسة و بعدين ياخدوا مصر فى السكة ، مين اشتكى لهم و طلب منهم ينصروا المصريات ، ما اللى يسلم يسلم و اللى يدخل المسيحية يدخلها ، ما اهلهم هما، البلد بقت مستباحة و بتجرجر لاى حاجة و المفروض بقى الجهات لا مؤاخذة السيادية و منها لا مؤاخذة المخابرات للقضاء على هذا التدنى و الانهيار الذى وصلنا له لانها كده زادت قوى و تنذر بعواقب منيلة بستين نيلة
‏قال *****…
ايوة مظبوط: التدخل بشئون مصر باي شكل واشاعة الفوضى فيها علشان يسهل احتلالها على يد الاخوان وحماس وايران
‏قال strategicalone
انا قلت من الاول ان فية ناس كتير ها تتظلم بسبب الستات دى
دلوقت لو هى لسة مسيحية يا ريت الكنيسة تظهرها فى برنامج مشهور فى التليفزيون وبلاش شغل اليو تيوب دة علشان بيثير الريبة
ولو هى اسلمت يسلموها للازهر او للشخص اللى اسلمت علشانة
ولو اتقتلت يطلعوا ويحكوا ظروف موتها
ومحدش يقول دى حاجة شخصية لان لما جوزها عمل مظاهرات وادعى انها اتخطفت ما كانش موضوع شخصى
على فكرة تنظيم القاعدة لية شعبية كبيرة فى اوساط المصريين وفى الداخلية كمان
سلام
‏قال إنسان || Human
الصراحة انا حاسس ان فيه ناس بتحاول تولع فيها أكتر ما هيا والعه, أولا قاعدة ايه وبدنجان ايه اللي هما اصلا منفوخين في العراق ونازلين تقطيع في بعض , وعايزنا نقطع في بعض احنا كمان , المفروض اصلا ان احنا لا نعيرهم اي اهتمام من اساسه ولانعطي لكلامهم وزناً
........
ثانياً : بعد ما اتفقنا ان ده شأن داخلي , المفروض الدولة يكون ليها دور اكبر من كده للسيطرة على الوضع
.......
ثالثا
لمعلوماتك السلفيين مالهومش في السياسه أصلاً وممكن تبحثي في الموضوع ده , الاخوان اه ليهم في السياسة , بس مش عارف ايه علاقة الناس دي بحماس وايران , السلفيين دول سنه يعني بيكرهوا الشيعة موت , والاخوان ليهم علاقة بحماس أه , بس مش معنا كده ان الاسلام ما فيهوش حدود , لا طبعا الكلام ده غلط , لان الإسلام بيتماشى مع أي نظام , والدليل ان كان في أكثر من دوله زي العباسية وكان جواها أكثر من دوله مختلفة ليه حدودها ..وليه نبص لزمان ما السعوديه ليها حدود
‏قال emy
معاكي في كل حاجه ياقطة ماعدا جملة هيرجعونا لورا آلاف السنين. وكأن مصر من آلاف السنين كانت ضلمه زي بلدانهم. بالنسبة لمصر الضلمه في إللي جاي مش في إلي فات. ياريتنا نرجع آلاف السنين, ولا حتى عشرات السنين, برضه كان حالنا أفضل
‏قال هل هؤلاء السفاحين القتله ينتمون لأى دين…
اى كلام يمكن ان يصف مجزرة المسجد فى باكستان التى سقط قتلى فيها العشرات وكذلك عشرات الجرحى بعد ادائهم لصلاة الجمعه عندما فجر مجرم سفاح يعتقد فى نفسه الحقيره انه مجاهد-فجر نفسه وسط المصلين عند خروجهم بعد اداء صلاة الجمعه
‏قال غير معرف…
حسنى مبارك يقدم غاز مصر هدية لدعم إسرائيل و مصر تخسر حوالى 100 مليار دولار فى 20 سنة لأسرائيل!!!

التقت شبكة الإعلام العربية "محيط " مع السفير إبراهيم يسري مساعد وزير الخارجية ومدير إدارة القانون الدولى والمعاهدات الدولية الأسبق بوازرة الخارجية وكان هذا الحوار

...ولعل أزمة الأنابيب الموجودة حاليا حيث يتعذر علي المواطنين الحصول علي احتياجاتهم اليومية من الغاز تثبت بالدليل القاطع لكل الناس فشل سياسة الحكومة بتصدير ثروتنا الطبيعية من الغاز لإسرائيل بأسعار فكاهية دولار وربع للطن المتري في حين أن السعر العالمي اثني عشر دولارا ونصف. وهذا معناه إننا نحرم المصريين مع صباح كل يوم من مبلغ 13 مليون دولار أمريكي يمثل فرق السعر في الوقت الذي يتزايد فيه أعداد العاطلين والفقراء وهو ما يمثل حرمانا للمواطن المصري الفقير والمحتاج من ثروة بلده من الغاز ....

باقى الحوار تحت عنوان ( جدارغزة وتصديرالغاز لإسرائيل إهدار للمصالح المصرية ) فى صفحة الحوادث بالرابط التالى
www.ouregypt.us
‏قال Desert cat
Ms Venus

مش هيحصل حاجه يا فينوس
وقتل لما يفكر اى همجى يعتدى على الكنيسة هتشوفى المصريين اللى بجد
‏قال Desert cat
ELVIRA

هى مفيهاش حاجه للناس المحترمة
لكن بالنسبة لهم عايزين يرجعوا دولة الخلافة ويرجع المسيحيين يدفعوا الجزية
:))
‏قال Desert cat
elmasryeffendi

هما فجروا العراق علشان يهددوا مصر
مش بعيد بكره تلاقيهم عاملين انفجار فى الاردن ويقولوا هاا مصر حتسلم كامليا ولا لاء ؟
طب لو مش سلمتوها حنفجر باكستان باللى فيها
‏قال Desert cat
*****

وهذا هو المطلوب إثباته
‏قال Desert cat
strategicalone

لو مراتك سابت لك البيت ومشيت وطلعت قالت مش ليكو دعوة سيبونى فى حالى والناس عملت مظاهرات علشان تخرجها لهم هتعمل ايه ؟
‏قال Desert cat
Hu-man

لا السلفيين ليهم فى السياسة ونص حتى اسأل الحوينى ومحمد حسان
الاخوان عايزين يفتحوا الحدود على بعضها وده كلام مهدى عاكف ومن بعده دكتور الحمير قصدى بديع مش جاية حاجه من بيتنا
هما مش ليهم دعوة بالدولة العباسية ولا الدولة البتنجانية هما ليهم دعوة بمصالحهم الشخصية
تابع كلامهم علشان تبقى تفكر قبل ما تتكلم
‏قال Desert cat
emy
عندك حق
ده حتى عصر المعادن كان انضف من القرن 21
‏قال Desert cat
هل هؤلاء السفاحين القتله ينتمون لأى دين

ينتموا لدين التوحش
‏قال Desert cat
Anonymous

مش كل واحد بيقولك امشى جنب الحيط علشان اربى العيال ؟
مش يديلهم الغاز ببلاش ليه ؟
‏قال strategicalone
معليهشى يا قطة انا وجهة نظرى ان اللى ابتدا بالمظاهرات وتعميم ونشر القضية هو زوجها واتباعة
يعنى موش بعد ما عمل قضية مراتة شان عام يرجع تانى ويقول دة شان خاص ويسيب البلد تولع لان المناخ العام فاسد ومتدين تدين قبلى وانا احب اسمي الدين دة مافيا
‏قال Desert cat
strategicalone
ما تنساش ان اول لما كاميليا اختفت طلع زميل ليها فى المدرسة يقول انها كانت بتخطط من زمان وانها اعطته كل الاوراق الخاصة بيها وسحبت فلوسها من البنك وانه اخدها الالازهر اشهرت اسلامها هناك
الطبيعى كان جوزها يعمل ايه ؟؟
اختك اتخطفت وواحد بيقولك هى عندى
هيكون رد فعلك ايه ؟
‏قال strategicalone
لو كانت اتخطفت اروح اقتلة واحررها
لكن لو بمزاجها وحسب رغبتها حتى لو مراتى يبقى ما اعرفهاش وانساها.....
تحياتى
‏قال Desert cat
strategicalone

ومين اللى قالك انها مش اتخطفت ؟
ولو مراتك رايحه لواحد بمزاجها حتنساها
لاء بجد الكلام ده ؟
ههههههههههههههههههه
‏قال Boneta…
Ms Venos
فعلا فينوس هذه الايه تحقق حرفيا فهم يقتلون الابرياء حسب اعتقادهم بانهم يقدمون خدمه لإلههم.!!!
‏قال Boneta…
ELVIRA
ده نتيجه ثقافه عدم قبول الاخر وتحقيره بمنطق انهم هم الاعلون
وتناسوا ان اجداهم في الاساس كانوا من المسيحيين الذين ارتدوا تحت حد السيف او تحت وطأه دفع الجزيه عن يد وهم صاغرون .
‏قال Boneta…
strategicalone
متفقه معاك علي حق حريه الاعتقاد لاي شخص سواء مسيحي عاوز يعتنق الاسلام او في المقابل مسلم عاوز يعتنق المسيحيه او حتي يلحد .ولكن مختلفه معاك في موضوع كاميليا وظهورها فحتي ولو ان ظهورها حصل بطريقه غير رسميه يعني مش علي قنوات تلفزيونيه رسميه لكن ما ينفعش نتجاهل ان قناه النيل الاخباريه((المصريه)) أقرت بصحه التسجيل وكمان شيخ الازهر ((المسلم))نفي حكايه اسلامها وسليم العوا نفسه قال ان كاميليا ما اسلمتش وهي خرجت وقالت انها هاتعيش مسيحيه وهاتموت مسيحيه مش عاوزه حد يتدخل في حياتها الشخصيه يبقي الناس عاوزين ايه تاني علشان كل واحد يخليه في نفسه ويسيبها في حالها؟ثم ايه الفرق بين ظهورها علي يوتيوب او ظهورها في قناه تليفزيونيه؟مش مهم هي ظهرت ازاي المهم انها قالت ايه وبعدين هل اسلام مسيحيه معناه انتصار للاسلام او هدم للمسيحيه؟ او العكس صحيح؟ .ماعتقدش ان فيه ديانه متوقفه علي ايمان احد الاشخاص بها
‏قال Boneta…
هل هؤلاء السفاحين القتله ينتمون لأى دين
نعم فهؤلاء القتله يعبدون الشيطان نفسه
ويقول السيد المسيح عن الشيطان أنه كان قتالا للناس
قل لي من تعبد اقول لك من أنت
‏قال Boneta…
Desert cat
المصريين اللي بجد يا قطه قربوا ينقرضوا واغلب اللي بنقابلهم من مصر لكن مش مصريين بجد .انا حزينه علي بلدي وحاسه انها بتحتضر ولما بيملاني اليأس بدخل عندك واقرأ مقالاتك اللي كل حرف فيها بيأكد علي انك مصريه وبتحبي مصر بجد وانا بحب مصر وبحب اللي يحبها كمان
‏قال Boneta…
تعرفوا ايه سبب الكوارث ؟ ان عندنا شيزوفرينا وازدواجيه في المعايير بمعني ان حلال لناس يعملوا مظاهرات ويسبوا ويتلفظوا ببذاءات علشان واحده هي طلعت بنفسها وقالت ياعالم انا ماعرفكمش ومش عاوزه اعرفكم و يا ناس انتوا مالكم اخرجوا من حياتي نهائي لاني قرفانه من تدخلكم في اموري الشخصيه ولكن هما زي الجراد اللي ماصدق لقي حاجه وشبك فيها وبيتبجحـوا بحريه الاعتقاد !!!
لكن لما الايه تتعكس وتبقي الست دي منهم وعاوزه تغير معتقدهم حريه الاعتقاد بتاعتهم تتبخر ويطالبوا باقامه الحد عليها وعندك علي سبيل المثال ماهر الجوهري وبنته ومحاولات قتلهم الفاشله وعلي فكره المجموعه اللي بيخرجوا في المظاهرات لنصره الاخت كاميليا هما نفسهم اللي بيطاردوا المتنصرين او الخارجين عن فكرهم وبيحاولوا تصفيتهم كمان تلاقيهم بيصرخوا بسبب مقتل مروه الشربيني وعاملينها شهيده الحجاب لان القاتل كافر في حين ينخرسوا ويبلعوا لسانهم لما يقوم الامن المصري بقتل شاب زي خالد سعيد فا ليه اللي بنحلله لنفسنا بنحرمه علي غيرنا؟وليه الازدواجيه دي؟ لاننا وبصراحه محتاجين علاج نفسي
‏قال Kontiki
ارهاب دموى وجرائم ونفوس مريضة الحق مش على الارهابيين بس الحق على الحكومة المصرية اللى تاجرت بقضايا حساسة و سابت المجتمع للعنصرية وسابت قتلة المسيحيين فى عيدهم بدون رادع وكأنه شىء عادى !
‏قال Desert cat
Boneta

تحياتى بنوته
‏قال Desert cat
Kontiki

علشان كدا لو حصلت حريقة فى البلد من الصبح لازم نعتبرها شيئ عادى طالما الحكومة شايفة وساكته وراضية
‏قال غير معرف…
To determine whether your text is at HTML format, take your cursor and then try to highlight a thing or two.
In fact search results optimization is pretty easy.
Link building services will create a far
better traffic rate to your website.

Review my site - http://proimblogger.com/wicked-article-creator-review/

المشاركات الشائعة