أصله معداش على مصر .. يا بخته

فى الوقت اللى التلفزيون المصرى يستعد فيه لعرض كافة الأغانى الوطنية اللى معندناش غيرها من ايام نكسات ناصر المتوالية وصولاً إلى عبور اكتوبر 73اللهم الا اغنية العظيمة الوطنية جدا الباشمهندسة شيرين ما شربتش من نيلها ولأنها كانت عارفه انها بتكدب على نفسها قبل ما تكدب على الشعب المصرى لان النيل بقى كله بكابورتات وحيوانات ميتة راحت وضعت بنتها فى امريكا للحصول على الجنسية اصل ليه تشرب من نيلها و تعيش نفس البؤس والشقاء اللى كل المصريين عايشينه ؟! فى الوقت اللى مدرسين التاريخ فى المدارس قاعدين يحضروا درس عن السادس من اكتوبر وازاى المصريين وقفوا وقفة رجالة وهزموا العدو وعدو خط برليف المنيع علشان كانوا رجالة ووقفوا وقفة رجالة .. وازاى رفعوا علم مصر فوق ارض سيناء الحبيبة علشان كانوا رجالة ووقفوا وقفة رجالة
تطالعنا جريدة الدستور بخبر واحد فقط وهو إقالة إبراهيم عيسى من جريدة الدستور
لكن بامانة مقدرش اقول على السيد البدوى وباقى افراد العصابة انهم رجالة ووقفوا وقفة رجالة


فى الوقت اللى شادية تصدح فيه بصوتها الرنان
ماشافش
الرجال
الشداد
فوق
كل المحن

اتوقف الدكتور علاء صادق من الفضائيات مش لانه قال البلد مش وسية ولا احنا لسنا عبيد لنورث لا سمح الله .. ولكنه طالب وزير الداخلية بالاعتذار للمجند اللى اعتدى عليه جماهير الترجى بعد مباراة الاهلى .. وياريت كان مجند وبس دول اتنين مجندين و7 ظباط .. هو الوزير ازاى حبيب وعادلى ؟؟
ومعرفش ازاى شادية
هان عليها بنات جنسها المصريين علشان تقول
ولاشاف العناد في عيون الولاد وتحدي الزمن


هو ده بقى ا
لتحدى اللى علشانه ابطال اكتوبر ضحو بنفسهم ؟
هو ده بقى التحدى اللى علشانه بنزور التاريخ وبنضحك على عقول الاطفال فى ابتدائى زى ما ضحكوا علينا زمان وقالوا ان المصريين خير اجناد الارض ؟
هو ده بقى التحدى اللى علشانه كاتبين فى المطارات ادخلوا مصر آمنين ؟
طيب منين وإزاى واحنا بره وجوا متهانين ؟
طيب منين وإزاى واحنا شعب بيتفنن فى ضرب الاسافين فى بعض حتى بقينا فى كل بقاع الارض مكروهين ؟
وعلشان التحدى اللى فى عيون الولاد محتلين المركز الاول فى السفالة والتحرش والتدنى الاخلاقى لدرجة ان شركات السياحة بتحذر الوافدات من الدول الاوربية لمصر من الرجالة المصريين وبيعرفوهم فى نشرات يتصرفوا ازاى لو حد اتحرش بيهم ؟ حلوين اوى رجالتنا فاضحينا بره وجوا .. حايحين على روحهم حتى لو راحوا يشتغلوا فى اى بلد مصايبهم اغتصاب وقلة ادب ... يا جماعة يا ما قولت الاخصاء هو الحل
يعنى ايه شادية تقول
ما شافش الأمل في عيون الولاد وصبايا البلد

امل ايه يا ست الكل والعيال بيتخرجوا ويشتغلوا سواقين تكاتك او يروحوا يشوفوا حد يهربهم على ايطاليا حتى لو ماتوا فى البحر مش مهم ماهم كدا كدا ميتين ؟
امل ايه حتى اللى عنده طموح بيقتلوه جواه اصل هو يعنى كان ابن مين ؟؟
عبيط ده علشان يحلم ؟ ازاى يفكر ويخطط لمستقبله ويبقى عايز منصب وهو اصلا مش ابن وزير ؟
امل ايه ولا امل مين والدين بقى تجارة والنصب والرشوة والاحتيال بقى شطارة ؟
مش عارفه بعد ما قريت خبر اقالة ابراهيم عيسى من الدستور وقبلها من الفضائيات ومن قبله عمرو اديب ومن بعدهم علاء صادق حاسة بعجز ومرارة مش قادرة استحملها ؟
مش عارفه باى بجاحة نظيف بيقول على مصراوى من يومين الاعلاميين فى مصر بيتمتعوا بازهى عصور الديموقراطية .. حتى شوفوا المدونين بيشتموا فى النظام ازاى وساكتين .. معلشى يا جماعه حد يفكرنى تانى كدا هو كريم عامر فين ؟


Comments

Kontiki said…
مش لطيف اننا نشوه ذكرى اكتوبر ونربطها بسلبيات المجتمع الوسخ جيل اكتوبر طفح الدم فى 56 و 67 ,وقبلها الحروب دى وظروف المجتمع هى اللى بنت جواهم قيمة الانتماء عشان كدا كانوا رجالة فى 73 بفضلهم هم خلونا مش زى الفلسطنينين دلوقت بنجرى ورا العساكر الاسرائليين بالطوب
بعد اكتوبر احنا فقدنا القيمة فى التربية و فى المجتمع واتمسخنا عشان كدة بقولك هى حرب اهلية او فتنة او الحكومة تستمر فى تعذيبنا و تقوم ثورة شعبية دموية وبعدها ميزان القيم يتعدل عموما اكتوبر كان اشرف يوم فى التاريخ الحديث .
ELVIRA said…
أى أمة تكسب حرب زى دى المفروض على الأقل يكون عندها أمل و تفاؤل ببكرة لكن اللى حصل العكس تماما كل حاجة فى النازل
طب دة حتى فى أيام عبد الناصر و الدولة البوليسية كانت الناس متفائلة حبتين أيه اللى حصل
علشان حرب زى دى ميبقاش ليها تأثير
المقال الذى اقيل بسببه ابراهيم عيسى said…
للأسف الشديد و بعد مرور 37 عامًا على هذا الانتصار فإننا لم نستلهم قيم أكتوبر في " معركة السلام" ولم نتقدم اقتصاديا ولا سياسيا، وتعمقت مشاكلنا الاجتماعية والثقافية بل والأكثر أسفًا أن العديد من قيم أكتوبر مثل: المواطنة، والعمل الجماعي، والتفكير العقلاني، والتخطيط المدروس، والانضباط، والوفاء، والصدق، والشفافية، والتواضع، وإنكار الذات، وغيرها من القيم التي تشكل البنية الأساسية لتقدم المجتمعات لم يعد لها مكان يذكر في مجتمعنا.
Anonymous said…
قطه
مصر تستطيع ان تنهض فى سنوات قليله
لو تولى امورها المخلصون الأكفاء وهم كثيرون جدا ولكن لأننا عكس كل الدنيا البقاءعندنا للأسوا
فهم منزوون
او مهمشون
وهذا هو درس اكتوبر يصرخ باعلى الصوت لشعب غير مبالى
عار مابعده عار ياوطن said…
عار مابعده عار ياوطن
قرر النائب العام فتح باب التحقيق في واقعه اعتداء الأمن علي معلمي كفر الشيخ، بسبب اعتصامهم أمام وزاره التربية والتعليم أمس الاثنين، وذلك بعد تقديم بلاغ رقم 17459 عرائض النائب العام بعد تحويلها لنيابة جنوب القاهره.

وجاء في البلاغ المقدم أن الأمن استأجر بلطجية، وقاموا بالاعتداء علي المتظاهرين لمطالبتهم بالعقد المميز وأصيبت الفتيات بحاله من الفزع نتيجة ما شهدوه من وحشيه الأمن، كما تقدم معلمي كفر الشيخ بشكوى لنيابة السيدة زينب بعد رفض قسم السيدة زينب فتح وتحرير محضر بالواقعة.
الأفراج عن الأخوان بثمن said…
الأفراج هن الأخوان بثمن
الإفراج عن اإخوان مقابل إشتراكهم في الإنتخابات .. لتغطية عورات الحزن الوطني ..!!
BenBaz said…
هههههههههههههههه .. تحفة
Anonymous said…
مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us
الشهيد لواء شفيق مترى سدراك said…
تعليق اعجبنى
فى ذكرى استشهاد بطل مصرى هو اللواء اركان حرب
شفيق مترى سدراك
فى حرب اكتوبر
هذا رجل من مصر .... لم يتخرج من مدرسة الفتنة الطائفية ، للتمييز بين أقلية و أغلبية ... رجل لم يتم شحن عقله و قلبه بأمراض التعصب الدينى ... أصله مـصــرى ٠، دينه فى قلبه من أجل بلده و عرضه و أهله ، من أسلم و من تنصر
مصر سممها بعض ابناءها said…
قطه
مصر مريضه ...ولكنها قابله للشفاء
سممها بعض ابنائها
ولكنها لا تموت
Desert cat said…
Kontiki

ولو رجالة اكتوبر كانوا موجودين دلوقتى وعايشين فى السواد اللى المصريين عايشينه ده تفتكرى كانوا عملوا ايه
Desert cat said…
ELVIRA

كلامك صح
بس المصريين مش عايزين يفتخروا بروح اكتوبر ولا يبقى عندهم ربعها
ده احنا قاعدين نكفر بعض وكل واحد يروح يومين الخليج يرجع لنا بعاداتهم وكمان تلاقيه بيتكلم بطريقتهم
Desert cat said…
Anonymous
اذا كان المخلصون قاعدين ننحيهم ونقيلهم ونلفق لهم اتهامات وبلاوى زرقة
يبقى نهوض ايه اللى بندور عليه
Desert cat said…
عار مابعده عار ياوطن

ولو انى حاسة بالقرف من الخبر ده بس الامن غالبا بيبقوا مغلوبين على امرهم وبيكون فى استفزازات تجبرهم على كدا
Desert cat said…
الأفراج عن الأخوان بثمن

والصفقة الجديدة اقتراب خروج الشاطر
Desert cat said…
BenBaz

ثانكس
:))
سواح said…
المجاعه بدات
سيبكو من كل شىء
مصر فى خطر حقيقى كما يقول تعليق من المصرى اليوم
....
اناشد الشرفاء دون غرض غير حب هذا الوطن المسكين هناك الاف التعديات في قرية واحدة تسمي كفر يوسف سلامة مركز الزقازيق محافظة الشرقية والعزب التابعة لها اسئل اي مسئول عار عليكم ان تتركوا الوطن يخرب بهذه الطريقة فانتم لاتعلمون قيمة الارض الزراعية التي تتحول الي خراب بفعل فاعل دون تنفيذ ازالة واحدة نعم ولا واحدة فعلية اما علي الاوراق فهناك الاف الازالات وهنا اهدار رهيب لمقدرات البلاد وكذلك للمال العام صدقوني مصر تحتاج لرقابة علي الطبيعة بعدما جامل كل الموظفين بعضهم لبعض صدقوني الارض الزراعية تحتضر بفعل منظومة فساد متكاملة ومتشعبة لها مصالح خاصة صدقوني مصر في خطر
karim said…
كل اللى بقولية صح و عداكى العيب و اززح, بس بردوا دة انتصار لازم نكررة لغاية يوم الدين لازم كلة يعرف الناس اللى عاشت سواء حاربوا ولا لا كلة كان بيعانى, بس مع الاسف الحاضر و الماضى القريب ناسانا كل حاجة حلوة بجد, وسلميلى على العروبة والمصريين اهمةة.... تحياتى
elmasryeffendi said…
كل ده ناتج الانقلاب الوسخ اللى دمر مصر من جميع الوجوه و قعد يتغنى بشوية اغانى هبلة عن ولاد البلد و الشعب و هى اساسا تاسيس للفوضى و الجوع و الهزيمة يسموها نكسة و الانقلاب يسموه ثورة و الركود يسموه استقرار، و فى الاخر سابوا الشارع للبلطجية و العقول للوهابيين و السلفيين فبقى الشعب مسخ و مرض اجتماعى تصرفاته وسخة و حقيرة و قبيحة و دماغه قال ايه فى الدين حتى العيال الزبالة اللى بتتحرش بالبنات لو اتمسكوا تلاقى كل عيلتهم قال ايه محجبات و منقبات و شراشيح ، قمة التناقض و الفوضى و التخلف
حكاية مرتزق said…
تعليق اعجبنى فى الشروق
بداية اقسم بالله اننى كنت من اشد المعجبيين بالشيخ حسان بل وكنت اسجل له جميع خطبه وندواته فى قناة الرحمه بل اكثر من ذللك كنت اتابعه فى كل مكان يظهر فيه على وسائل الاعلام الى ان ظهر على قناة السعوديه فى موسم الحج الماضى واخذ يمجد فى العائله المالكه واقصد هنا آل سعود وأخذ يزيد ويفيض جعلنى اشك بعض الشئ فى مصداقيته الى ان جاء اليوم الم… إقرأ المزيد ..وعود والذى كنت اخشاه قد حصل وهذا اليوم هو بعد عودته مباشرة من الحج وكانت اول اوتانى حلقه له فى قناة الرحمه بعد عودته من الحج وقد هالنى ماسمعته فى هذه الحلقه وكان موضوع الحلقه بالكامل عن المسلمين الشيعه وقد فزعت منه لتغيير منهجه180درجه لانه كان يهاجم الشيعه بطريقه جعلتنى اتأكد بانه قد قبض البترودولار من آل سعود ومن لايصدقنى يرجع الى حلقاته بعد موسم الحج الماضى ليتأكد من صدق كلامى [^]
Desert cat said…
سواح

حتى لو عملوا للشعب كله محاكمة دنشواى ولا حد هيقولهم بتعملوا ايه
ده احنا شعب اتعود على الاهانة خلاص
Desert cat said…
karim

انا مش بنكر مجهود الناس الى حاربت وعدت بينا بعيد عن الدمار يا كريم لكن فى نفس الوقت مستخسراه فى شعب سادى يتلذذ بحياة الذل والاهانة
Desert cat said…
elmasryeffendi

انا بقيت بسبب الانقلاب الوسخ بكره كل اللى اسمهم ناصر
الله يجحمه مطرح ما راح
Desert cat said…
حكاية مرتزق

ويتوالى سقوط الاقنعة
حتى قنواتهم غير مرخصة
ونصابين مش كفاية مرتزقة ودجالين

Popular posts from this blog

قميص دهشور

كل تحرش وانتوا طيبين