جريمتى


جلست اتابع فى صمت ما يحدث حول مشروع مدينتى ... ذلك المشروع الفضيحة بكل المقاييس واخترت المتابعة فى صمت لأنى بصراحة شطورة وبسمع الكلام اصلهم اثناء نظر الدعوى قالوا لا توجد صفة لاى مصرى لإقامة دعوى ببطلان العقد ولكن كان هناك صوت اقوى واعلى ومعرفش بامانة ايه مصلحة رئيس هيئة المجتمعات اللواء عادل نجيب ووزير الإسكان أحمد المغربي في الطعن على الحكم ببطلان عقد فاسد يضيع على هذا البلد ومواطنيه حوالي 300 مليار جنيه؟ و هل يعقل أن يعيد القضاء لجهة ما 300 مليار ضائعة وترفضهم هذه الجهة؟ ما مصلحة رئيس الهيئة ووزير الإسكان (لا مؤاخذة المصريان) في عدم تصحيح أوضاع خاطئة ربما حدثت قبل مجيئهم ولم يشاركوا في صنعها- فإذا بهم يتمسكون بالخطيئة وليس الخطأ بل و يصمتون على تهديدنا وإرهابنا بطلب التعويضات وبإقامة دعاوى قضائية جنائية بدعوى تأثيرنا سلبا على البورصة! إذا فلتقاضوا من أصدر الحكم بالبطلان وليس نحن! خيبة وفجور وانعدام للحياء exclusiveفيمن يدعون (مسئولي مصر).يجيلك 300 مليار ياللي عمال تعيط علشان مش عارف تدبر موارد للناس المعتصمة والمحتجة, وحيرانين تزودوا البنزين ولا الأسمنت ولا الحديد ولا الخشب ولا الزيت ولا السكر ولا الرز ولا تحطوا ضريبة عقارية ولا رسوم قضائية ولا ولا ولا...وترفضهم! يخرب بيوتكم.. واستمراراً في عرض الهرتلات التي أفحمونا بها (يا مامي) قالوا "ما فيش شركة وطنية كان عندها القدرة على تنفيذ مشروع بهذا الحجم" قلة الحياء تعمل كده وزيادة... لما يعترفوا بأن إمكانيات فرد أكبر من إمكانيات دولة كبرى زي مصر... خربوها وقعدوا على تلها فعلاً، ونبحث عن اجابة في أي آية في القرآن الكريم أو أي سفر من الإنجيل أو التوراة أمر الله أن تباع ال 33مليون و600 ألف متر مربع على بعضها لشخص واحد؟ هاه؟ وأين ومتى بالضبط حرم الله تقسيمها على عدة أفراد لإنجاز المشروع في وقت أقصر (من ال30 سنة اللي فرحانين بها) وما دليلهم بالضبط على حرمة وجود أكثر من مستثمر ومستفيد ومفيد من تقسيم الأرض على أكثر من شركة؟ والسؤال الأهم كما فعلت هيئة المحكمة الموقرة التي أصدرت حكمها ببطلان هذه الفضيحة- هو (أين دليلهم - هم - على أن هذه ال 7% من ربح المشروع كانت أفضل عرض ممكن الحصول عليه؟

تعليقات

اقسم اني لا اكاد اصدق كل هذه الهوائل
لا ادري هل لهؤلاء المسؤلين عقول مثل باقي العقول و نفوس بها حس كباقي النفوس
شيء فعلا عجيب
ناس و الله محتاجه دراسه من علماء زي علماء الحيوان
و يجيبوهم في برنامج نظير لبرنامج علام الحيوان
‏قال Desert cat
ذو النون المصرى

وانا اقسم اننا لو فى بلد محترمة كان زمان الحكومة كلها اتقدمت للمحاكمة بسبب بشاعة الفساد وانحطاط الضمائر اللى كشف عنها المشروع الفاسد ده
‏قال إيمان قنديل
ياقطتي الحلوه
أنا موش عارفه أقرا بسبب اللون البنفسجي مع الأسود،وكبرت الصفحه والخط وبرضه مافيش فايده
‏قال غير معرف…
أصبح اللعب علي المكشوف بلألتفاف الفاضح علي القانون و الدستور فالكلام لا يقدم و لا يؤخر و المخطئ لا يحاسب علي خطأة و فسادة فسيادة القانون أصبحت لا وجود لها لأن من يفترض أن يحافظ علي القانون و الدستور لا يعترف بهم و يقوم بتشكيل ما يسمي لجنة محايدة لحماية منظومة فساد هو نفسة يرأسها
‏قال غير معرف…
أصبح اللعب علي المكشوف بلألتفاف الفاضح علي القانون و الدستور فالكلام لا يقدم و لا يؤخر و المخطئ لا يحاسب علي خطأة و فسادة فسيادة القانون أصبحت لا وجود لها لأن من يفترض أن يحافظ علي القانون و الدستور لا يعترف بهم و يقوم بتشكيل ما يسمي لجنة محايدة لحماية منظومة فساد هو نفسة يرأسها
‏قال Elmasryeffendi
المشكلة عزيزتى فى اختراع اسمه الامر المباشر ، كل حاجة بتدور فى فلك شخص واحد هو اللى بيحل و يربط و يمنح و يمنع لكن ما فيش حد يقدر يقول انه هو المسئول لكن احنا الشعب المصرى الشقيق لازم ندوخ السبع دوخات عشان نلاقى شقة و ما شاء الله بالسعر الحالى بعد ما المزايدات ولعت الاسعار و لا عزاء فى الشعب المصرى الشقيق اللى انا منه
‏قال Ameerov
مصر !!
انا سمعت الاسم ده فين قبل كده؟؟!!
بلد دى يا قطة؟

ما تفكرينى كده ينوبك دعوة (ع العشا)
‏قال اختلف الدعاه المرتزقه فبانت حقيقتهم البشعه…
عايزين تعرفواليه الدعاه المرتزقه بيركزوا على المراه وكل الدين عندهم شعر وكعوب النسوان
كما يكشف عن حقيقتهم خلافاتهم كع بعض شوفوا هذا الفيديو
http://www.youtube.com/watch?v=aV0bGjt40EA
‏قال توزيع غنائم…
الحكايه هى توزيع غنائم على المليشيات المواليه والمحاسيب من اراضى لمناصب لا يستحقونها لسفريات وعطايا لمقاعد بالتزوير فى المجلس الموقر تفتح لهم ابواب الهنا لرؤساء تحرير يقبضون مليون شهريا من مستوى سرايا وسذاجته وضحالته عندما حاول الدفاع عن الصوره المزيفه
وهو مالا يفعله رئيس تحرير صحيفة حائط مدرسيه
ولكنه معذور لأن كل شىء فى مصر اصبح مزيفا وغير حقيقى
‏قال شمس العصارى
عن نفسى لا استغرب افعالهم
فقد فهمناهم من زمن
ولكن الداعى للغرابة حجم المستخبى من اراضى واموال وفساد فى الموضوع
لقد تحول النظام الحاكم - من حاكم فقط - الى حاكم ومالك
هذا ما يفسر كل افاعيلهم الضالة والفاسدة
كله لمصلحة الكبير والكل شغال لحسابه ... ده واضح وبشدة
والا ما تفسير استمرار نفس الاشخاص بنفس الفساد بل وزيادة
ازيدك : ان النظام لا يأبه للمعتصمين والمحتجين
لانه حط معادلة لمصر وماشى على تنفيذها
شعب مصر - نص شعب مصر الفقير = الطبقة المستفيدة والتى تدير الشغل والاعمال لحساب صاحب العزبة
بس بكل بساطة واتحدى من يثبت عكس كلامى ... اتحدى من وضع المعادلة ومن ينفذها لا من تطبق عليه المعادلة
ثم مفيش حد يكبر ويبرطع كده الا اذا كان نال الرضا ودفع المعلوم
يبقى بلاش نحير نفسنا كتير
اه نسيت اقول ان الوزير والحكومة عملوا طعن علشان الباقى المستور مينكشفش
اصله بيقلك ان الحكم ده ينسف كل قرارات التخصيص الكتير الى عملوها
‏قال غير معرف…
والله بجد كويس انك فتحت الموضوع ده وياريت يكون عندك من سعه الأفق ما يجعلك تتفهمى وجهة نظرى . أناياستى من سكان الرحاب وعلى فكره انا انسانه بسيطه جداوكنت فى السعوديه لما أشتريت شقه الرحاب كاستسمار نحط فيه كل اللى بنقدر نحوشه أول بأول ,وكل الناس قالوا علينا مجانين وكان المتر أيامها ب850 جنيه وبالتقسيط المريح ! المهم رجعنا من الغربه على شقه الرحاب أنا وولادى وأستمر زوجى فى العمل
هناك واحنا مرعوبين من كل حاجه
أولا هنسكن فى الصحرا
ثانيا لما يرجع جوزى هيقدر يوفرلنا المعيشه الكريمه هنا فى مص ؟
المهم أول حاجه أتفاجئت بيها أن فيه أتوبيسات بتطلع من الرحاب كل ساعه ومجانيه ولسراىا القبه ومدينه نصر !
ثانيا : التليفون الفورى
ثالثا : كل الخدمات الأساسيه لدرجه أنهم أجروا المحلات بالمجان لمن يريد أن يفتح أى نشاط تجارى ولمده سنه
و
رابعا : مركز طبى للطوارئ
المهم أنه فى سنتين مش بس الرحاب أنتعشت لآ ده كمان كل الأراضى اللى جنب الرحاب أو أمام الرحاب والناس بنت وسكنت على حس الرحاب والتجمع الأول كان مدينه أشباح دلوقتى عمران بالناس ومعظمهم ليه مصالح فى الرحاب وما يقدرشى على أسعارها
ما فيش حد جه يزورنى ألا ووقع فى غرام الرحاب وحاول يمتلك ولو شقه ستىن متر فيها. الرحاب مافيهاش تحرشا,الرحاب أمان
النادى جنب المدرسه, جنب السوق,
جنب البيت
الستات والبنات ممكن يسهروا فى النادى او يصلوا الفجر لوحدهم ويرجعوا مطمئنين
اما أنا وزوجى فاجرنا عياده فى المركز الطبى بنسبه معقوله و أقل من أى مكان بره الرحاب,والى الآن لم يذودوا هذه النسبه لكل العاملين الأوائل تقديرا لهم !!!
بجد فيه قصص نجاح كتير بسبب الرحاب
ولو عددتهالك مش هاخلص
ودلوقتى ياريت بنظره موضوعيه تشوفى الفرق بين مدينه الشروق زمان وبينها بعد ما أعلنوا عن مشروع مدينتى
قوليلى مين قدر يعمل نهضه عمرانيه كده فى صحراء وفى زمن قياسى ولم ينهض بالرحاب فقط بل أمتدت للقاهره الجديده كلها.
‏قال انتهازية الأخوان على كل لسان…
انتهازية الأخوان فى النيوزويك
يقول خالد فهمي، أستاذ تاريخ الشرق الأوسط بالجامعة الأمريكية بالقاهرة: إن الإخوان ربما يخاطرون بما لديهم، وهم يعرفون أنهم سيخسرون على المدى القريب، وبالتالي سيكون تأثيرهم على انتخابات الرئاسة 2011 أقل بكثير. لكن من ناحية أخرى، الإخوان يقومون بتهدئة الأوضاع مع النظام الحاكم، ويوافقون على المشاركة في الانتخابات بدلا من مقاطعتها لكي يمنحهم النظام مزيدا من الحرية في نشر أفكارهم الدينية وشبكة الخدمات الاجتماعية التي يكسبون بها الناس.


من جانبه يرى محمد نصير، المسؤول البارز في حزب الجبهة الديمقراطي المصري، أن الإخوان يحاولون بناء قاعدة لهم، لأنهم ليسوا أقوياء الآن بما فيه الكفاية لتحدي خليفة مبارك المختار، نجله جمال مبارك. ويبدو أن الجماعة تنتظر الوقت المناسب للمواجهة الحقيقية.
‏قال Kontiki
فساد ! الاسوأ يا قطة ان الحكومة بتحاول تلاقى مخرج من حكم القضاء ! يعنى الحكومة فوق القانون ! على فكرة مش عيب تكون امكانيات فرد او شركة اكبر من امكانيات دولة لان دة بيحصل فى امريكا نفسها المشكلة فى عدم تنفيذ القانون يعنى مفيش الية واضحة و نزيهه عشان نضمن ان افراد الحكومة ماخدوش رشوات و اكراميات عشان يمشوا امور هذا الفرد او الشركة وان هذا الفرد او الشركة مش بيمص دم الناس ومعروف طبعا سلسلة فساد الجميع
‏قال هم مالهم ومال النساء…
ممنوع صور النساء
بفرمان وهابى صحراوى لسه سخن
السلام عليكم ورحمة الله وبركاته

الأخوات و الأخوة الكرام / أعضاء خط الطيران

نرجو منكم الالتزام بعدم إدراج أي صورة نسائية مهما كانت الصورة صغيرة أو رمزية

نتمنى منكم الالتزام بذلك.

وننبهـه بأنه سوف تحذف أي صورة رمزية أو أي صورة من ضمن المواضيع تكون بها صور نساء

إدارة منتديات خط الطيران
‏قال غير معرف…
جريمه في حق الشعب كله .. هذه الملايين المهدره .. اللعنه على دي حكومه ودا ريس ..
‏قال Desert cat
MAKSOFA

حبيبتى مكسوفة
انا اسفه بجد غيرت نوع الخط ولونه
مش عارفه ظروفه ايه دلوقتى عندك
‏قال Desert cat
Anonymous

دلوقتى السيادة للمال ولا صوت اعلى من صوت المال
‏قال Desert cat
elmasryeffendi

انت خد بعضك وروح اقرب مجلس مدينة واطلب انك تشترى متر واحد وترخصه وشوف ايه اللى هيحصل السبع دوخات يبقوا كدا ناس محترمين دول مش بعيد يخلوك تعمل عجين الفلاحة
‏قال Desert cat
Ameerov

مصر كان فعل ماضى مش قدامنا غير اننا نسيبه فى حاله
‏قال Desert cat
اختلف الدعاه المرتزقه فبانت حقيقتهم البشعه

الدعاة المرتزقة مش قادرين يروحوا يتعالجو من مرض الهوس الجنسى اللى عندهم فالحل فى النسوان وبرضه حاجه سهله طالما بعيد عن الحكم والحكومة ولا يعاقب عليها القانون
‏قال Desert cat
توزيع غنائم

لا وبمنتهى البجاحة بيقولك الى بيتكلموا عن الصورة دول ناس حقوديين
‏قال Desert cat
شمس العصارى

تعرف ان رئيس الوزراء بذات نفسه يسعى لابطال الحكم ؟
تعرف ان رئيس الوزراء بذات نفسه رجع فعلا الارض لهشام طلعت النهارده
واتفضل اللنك

http://www.almasry-alyoum.com/article2.aspx?ArticleID=271245
‏قال Desert cat
Anonymous

انا متفهمة وجهة نظر حضرتك وفى ليا اصدقاء فى الرحاب وفعلاكلام حضرتك كله صحيح لكن مشكلة مدينتى ان ده حق دولة
وان فى ناس بتدفع ضرايب وهى بتنام من غير عشا فى سبيل ناس تانية بتشترى ملايين الافدنة بملاليم من الاخر مصر مفيهاش سياسة التوزيع العادل
‏قال Desert cat
انتهازية الأخوان على كل لسان

الاخوان المنتفعون كل ما يهمهم هو مصالحهم الشخصية حتى وان كان فى المقابل اهاليهم
‏قال Desert cat
Kontiki

ماهى لقيت يا كونتا الحكومة المخرج
دى مصر يا قلبى بلد اللى ليه ضهر ما ينضربش على صوباع رجله الصغير
‏قال Desert cat
هم مالهم ومال النساء

اصل النساء بيكشفوا عن امراضهم المتعددة
‏قال Desert cat
BenBaz

اللعنة كمان على الشعب اللى سايب حقوقه مهدرة لانه شعب جبان
‏قال emy
ماهو السبب في كل المشكلة دي, هو سيادة الريس, لما راح إفتتح الرحاب وعجبته, أمر وزير الإسكان بمنح طلعت مصطفى قطعة أرض ببلاش تقريبا عشان يقيم مشروع مماثل, وعليه قامت مدينتي, عشان كده سيادته أمر بتشكيل لجنة محايدة للخروج من الأزمة إللي تسبب فيها, وواضح إنها مطلعتش محايدة, لكن أنا شايفه إنهم خرجوا بحل معقول على أساس إن الأرض دي, وهي صحراء ماكانش ليها سعر وماكانش حد يرضى ياخدها حتى ولو بأرخص الأسعار. منقدرش ننكر برضة إن المدن الجديدة دي هي إللي عملت سعر, لأرض المدينة وحتى للأراضي المحيطة بيها..لكن السؤال دلوقت ليه هشام طلعت مصطفى بالذات؟؟ انا بصراحة شايفه كل إللي بيحصل ده عملية منظمة. من أول قضية قتل سوزان تميم إلى تقديم الفخراني طعن للعقد, لفتح ملف مدينتي.. بصراحة مش مقتنعة إن هشام يبعت واحد محترف يقتل سوزان بفتاحة البيبسي دي إل قتلها بيها,وكمان في شقتها, وكإنه ميعرفش إن في كل دور ف العمارة كاميرا مراقبة.. وليه أصلا يقتلها في دبي مع إنها كانت بتتردد كتير على مصر. وبالعكس كانت سلطة هشام كافية إنه يخفي جريمته ويطلع منها زي الشعرة من العجينة... وبعد ماتقرر إعادة محاكمته طلعله المحامي ده, قال إيه هوا إللي قلب الدنيا كده وطعن في عقد مدينتي.. مش داخله دماغي القصة كلها. عشان كده بقول إن الموضوع كله منظم.. يمكن لو شوفنا مشروعات دبي السكنية في مصر نقدر نحلل شوية إللي بيحصل, يعني شركات زي إعمار وغيرها مش عارفه تسوق زي مدينتي.وإحساسي بس (إللي تكون عبر سنين, بشوف وأحلل فيها نظام بلدي) أقدر أقول إن دبي وراء كل إللي بيحصل ده,والموضوع أكبر من هشام ومن عقد مدينتي, والعلم عند الله. وآسفه ع الإطالة

المشاركات الشائعة