اهلاً أهلاً بالعيد


فات رمضان بكل احداثه وبدرجة الحرارة العالية وبكل تفاصيله الكبيرة منها و الدقيقة وبعد ساعات سيؤدى المسلمين صلاة العيد .. العيد يعنى الفرحة والبهجة للجميع من الصغير للكبير .. بس تحديداً من 2006اصبح العيد مرتبط بكلمة التحرش الجنسى الجماعى إرتباط غير شرعى لينتج مكان البهجة وفرحة العيد الغضب والسفالة والانحطاط
المفروض ان رمضان شهر العبادة شهر الروحانيات لكن حتى ده مكانش ليه احترامه اصل من اول الشهر بدات حوادث القتل فى تزايد والخناقات فى تزايد اكتر والسفالة وقلة الادب توغلت وانتشرت بشكل مبالغ فيه وبعد صلاة العيد ينطلق الشيطان اللى هو اصلا كان مطلوق من البداية وينطلق معه السفلة والمنحطين والعشوائيين والزبالين للتحرش باى انثى ساقتها اقدارها اللى مش حلوة خالص للنزول من بيتها .. هما الولاد اخدوا البلد حكر ليهم ولا ايه ؟ محدش عارف يمشى ولا يروح ولا يجى من سفالتهم وقلة ادبهم .. هو ليه الولاد اللى متربيين عددهم قليل جدا والسفلة فى ازدياد ؟
فضحتونا وعريتونا فى العالم كله مصر واخدة المركز الاول فى التحرشات الجنسية على مستوى العالم يليها افغانستان وايران يالهوى على الغباء وقلة الادب
هما دول اللى قاعدين يتشدقوا باسم الاسلام ليل نهار
هما دول اللى كل لما حد يفتخ بؤه يقولوا له شوف المادة التانية من الدستور .. طيب ما تحترموا انتوا المادة التانية من الدستور وتسيبوا الناس فى حالها شركات السياحة فى دول اوربا بتوزع على السياح الوافدين لمصر نشرات توعية من المتحرشين يتصرفوا ازاى لو عيل سافل قل ادبه عليهم او سواق تاكسى منحط .. بكرة العيد مش قادرة اقول عيد سعيد اصلى قلقانة اوى ومش قادرة اقول للبنات مش تنزلوا من بيوتكوا علشان الكلاب المسعورة اللى هتبقى مالية الشوارع لان ده حقنا الطبيعى حقنا نمشى فى بلدنا فى امان حقنا ننزل ونفرح بالعيد وبغير العيد حقنا نتحرك براحتنا فى البلد اللى كان اسمها بلد الامن والامان
بس كل واحدة بقى تاخد بالها من نفسها وياريت يبقى فى شنطتها اى وسيلة حماية
وكل سنة والجميع فى شتى بقاع الارض من اى جنس واى دين وحتى اللى مالوش دين بالف خير وسلام وسعادة وربنا يبعد عن الجميع اذية الكلاب المسعورة

Comments

Ms Venus said…
يا احلى قطة


كل سنة وانتى طيبة دايما ياارب وبخير وسلام


احلى وارق ورداية لعيونك
ELVIRA said…
بصراحة ممكن لو حد قرب من اى واحدة فممكن تستخدم السبراى بتاعها فى وشه على طول

دى حاجة ممكن تنفع
كل سنة و انت طيبة يا قطة
Desert cat said…
كل سنة وانتى طيبة ورقيقة وجميلة يا احلى فينوسه
تحياتى ومحبتى ليكى يا قمراية
Desert cat said…
ELVIRA

ياريت البنت يكون عندها سرعة بداهه فى التصرف
كل سنة وحضرتك بالف خير
Anonymous said…
كل سنة وانت طيبة ومصر طيبة والناس كلهم طيبين. شدوا حيلكم يا بنات وخدوا بالكم إن النوع ده من الناس بيكون جبان يعني لما يحس إنك مش خايفة ممكن يتلم.

ماتتصوريش الكسوف اللي بأبقى فيه لما حد من الكنديين يحكي لي عن زيارته لمصر وإزاي هي جميلة وبعدين يسألني عن الظاهرة الغريبة دي وإيه سببها. حاجة تكسف.

المهم كل سنة وانتم طيبين ومن التحرش محميين.

مصرية من كندا.
Kontiki said…
كل سنة وانتى طيبة يا قطة
انا منزلتش فى العيد
Desert cat said…
مصرية من كندا
يا حبيبتى انا بقيت بتكسف اقول انى مصرية بسبب شوية الرعاع دول

كل سنة وانتى طيبة وبالف خير
ويارب كل ايامك حب وسعادة
Desert cat said…
Kontiki

ولا انا بنزل فى العيد انا بتابع الاخبار من على النت
كل سنة وانتى جميلة بقلقبك الجميل وعقلك الرائع يا كونتا يا قمر

Popular posts from this blog

قميص دهشور

كل تحرش وانتوا طيبين