هو الحفاظ على الأمانة برضه مش عبادة ؟



منذ ما يقرب من العام كانت فاجعة تصادم قطارى العياط الذى راح ضحايها طلاب عائدين من جامعتهم ومدارسهم واولياء امور رجال ونساء عائدين من اعمالهم بعد يوم شاق يسارعون القدر للذهاب الى زويهم او مجرد رؤيتهم ولكن الشيخ حسن كان ليه وجهة نظر تانية خالص وهى عنهم ما روحوا الله لا يجعل اولادهم ولا اهاليهم ينعموا بالحياة فى وسطهم بلا قطارات تدخل فى بعضها بلا ارف البلد فيها فوق التمانين مليون اللى فى القطرين اياك يتحرقوا ويحصلوا بتوع قطر الصعيد فى بداية الالفية التانية المهم هو انه يلحق صلاة العشاء حاضر واهو لما القطارات تدخل فى بعضها ويروح النيابة هيقول قدام البيه وكيل النيابة كنت بلحق العشا حاضر ياباشا وطبعا الصلاة عماد الدين ولو وكيل النيابة حبسه حتقوم الدنيا ومش حتقد وممكن يتقال عليه كافر ماهو مش تنسوا المادة التانية من الدستور بتقول ايه .. وبدل ما الشيخ حسن ورفاقه ياخدوا حكم يشفى صدور اهالى الضحايا كان الحكم3سنوات ايشى خيال يا ناس
وبما ان الاحكام فى مصر بقت ماشية بنظرية اصلى كنت بلحق صلاة الجماعة ياباشا
فكان نفس التطبيق العملى للنظرية مع سرقة لوحة الخشخاش للفنان فان جوخ بدار الاوبرا المصرية افراد الامن الحلوين المسلمين المؤمنين
كانوا بيصلوا الضهر فى جماعة
عايزين انحدار ايه اكتر من اللى وصلنا ليه ؟
عايزين تخلف ايه اكتر من اللى عايشين فيه ؟
يعنى حياة الناس فى ستين داهيه المهم يروح يحضر صلاة الجماعة .. ومال مصر العام فى تسعين داهيه المهم يرح يحضر صلاة الجماعة .. هما الاخوان المسلمين احتلوا هيئات ومصالح مصر ؟
هى وزارة الداخلية بقت وهابية ؟ علشان يسيبوا ارواح الناس وحمايتهم ويروحوا يطاردوا المجاهرين بالافطار ؟
لاء ومش بس كدا دول عاملين ليهم اكمنة .. قاموا نبهوا على اصحاب المطاعم وضع خيم على الابواب وبهوات الداخلية هيدخلوا بمنتهى الهدوء يسحبوا اللى بياكل جوه من قفاه .. هى الحفاظ على ارواح الناس مش مذكور فى الدين ؟

حماية الأملاك العامة للدولة مش مذكورة فى الدين ؟
بتطاردوا اللى الدين اصلا مش جاب سيرتهم من قريب او بعيد
ليهم حق البلطجية والحرامية والقتالين القتلة ينشطوا وينتشروا فى نهار رمضان ماهو كل ده مش مهم الاهم تشوفوا مين بياكل وفين

تعليقات

‏قال Kontiki
:(:(
سرقة اللوحة وتحطم تمثال كيوبيد محزن جدا جدا جدا بالنسبة لى خيانة الامانة على كل المستويات باسم مظاهر التدين بجد لا تعليق
خلاص انا حاسة فعلا اننا كأمة ملناش مستقبل وملناش بكرة :(
‏قال Desert cat
Kontiki

يا كونتا مش مهم الجوهر المهم الناس تشوفه وهو رايح يصلى
هى دى بقى الامانة بالنسبة لهم
‏قال Elmasryeffendi
الحفاظ على الامن مش من اختصاصهم خالص ، هما اصحاب رسالة و هى العكننة على خلق الله باللجان اللى منصوبة فى كل حتة و الاكمنة الثابتة انما تامين الناس و الممتلكات شكله ما بقاش من اختصاصهم ، هو فى ابجح من تغيير الشعار المتعارف عليه ان الشرطة فى خدمة الشعب للشرطة و الشعب فى خدمة الوطن و لا القانون؟ اصلهم مستكبرين يخدموا الشعب اللى هما منه، يلا يعوض علينا ربنا فى كل اللى بيضيع و يتسرق

المشاركات الشائعة