طوارئ كمان وكمان


لقد تفضل ومنّ علينا السيد رئيس الجمهورية
لالالالا مش بتخفيض الاسعار
ولا بتشغيل الشباب العاطلين
ولا بشقق لسكان العشوائيات
ولا بتوفير الرعاية الكاملة لاطفال الشوارع
ولا تلبية احتياجات المعاقين
ولا بتلبيه مطالب كل العمال المعتصمين
ولا بصيانة القطارات وترميم العبارات
ولا برصف طرق وعمل كبارى جديدة
ولا بتوفير حياة كريمة آدمية للمواطنين كل دى حاجات هايفة وتافهه رئيس الجمهورية مهامة اكبر من كدا بكتيييييييير ولما نقول قرار جمهورى يبقى اكيد هو مد قانون الطوارئ لمدة عامين
سامعة حد بيقولى ليه عامين ؟؟
طبعا الاجابة جاية من الكنترول حالاً
وهى الانتخابات الرئاسية يا حلوين وطالما فى طوارئ يبقى التوقعات معروفة رئيسنا القادم مين

Comments

Tears said…
بالعكس ده كده رائع

خليه يدق مسامير اكتر فى النعش بالذات ان ده اعتراف صريح بالفشل و عدم الشرعية لان كده ده واحد بيقول انه مش قادر يحكم من يوم ما تولى غير فى ظل قوانين استثنائية
Desert cat said…
Tears
ماهو احنا خانعين وخاضعين من 30 سنة يا تيرز ايه اللى حصل النعش ماشى فى طريقه
karim said…
ربنا يستر على البلد دية من كل شىء, وسلميلى على التغييير, تحياتى
متابع said…
من مالى تعرفوا هى فين
شهد مالي جدلا هذه الأيام بسبب قانون جديد للأسرة لا ينص على إجبار النساء على طاعة ازواجهن
ويعيش أحد رجال الدين الماليين في حالة من الخوف بسبب مساندته للقانون
وقد تلقى الرجل تهديدات عبر الهاتف، بينما يحاول بعض قادة المسلمين عزله من منصبه الديني
وتثير بعض المواد حفيظة المعترضين على القانون، حيث تشير واحدة منها إلى أن الازواج والزوجات يدينون لبعضهم البعض بالولاء بدلا من الطاعة.

كما يمنح القانون النساء حقوقا أكبر في الميراث ويرفع السن الأدنى لزواج الفتيات إلى 18 عاما.
Anonymous said…
حاجه فى منتهى الغرابه
منعوا الشهر العقارى من تسجيل توكيلات من الناس للبرادعى
عار...عار...عار
لن ينساه التاريخ
dr.lecter said…
يوم اسود ومنيل
قمه الاستعباط وقمه الهبل


ورحمه البنكرياس اللي شاله في العمليه مايهعمر معانا خالص
أبو لهب شعلل ناره على الآخر

وما بقاش غير إنه يتشعلعل بيها هو كمان وإللي يتصدره
elmasryeffendi said…
يا جماعة دول ما بيعرفوش من اصله و كمان ما عندهمش دم، و بعدين اعداء الوطن متربصين فى كل مكان فكان التمديد حماية للوطن قصدى لمولانا اطال الله عمره

تحياتى
الثورة قادمة
الشعب فاضله تكة
و انا بصراحة مستنى التكة دة
Anonymous said…
موسوعة جينز لسماكة الجلد
رئيس فرنسا ديجول استقال لما الشعب نجحه بنسبة 60 فى الميه فقط فمخلصهوش واستقال
وعندنا الأستمرار بالتزوير عينى عينك
يعنى ايه الغاء الأشراف القضائى على الأنتخابات الا اذا كنت خايف
وهو اللى بينجح ب90 فى الميه يخاف ليه من البرادعى او غيره؟
وليه محتاج قانون الطوارىء الذى يسمح بالتحكم فى البشر بدون مساءله؟
طبعا اللعب دلوقتى ع المكشوف كل الفرقه عارفه انهم مرفوضين بس ولو قاعدين قاعدين
بالذوق بالعافيه قاعدين
ده حت كل الحجج بقت باليه ولا تقنع طفل وهم نفسهم عارفين
الغريب والمخجل ناس كبار فى السن ومعاهم دكتوراهات فى القانون
وعارفين كل حاجه وقربوا على ال80 من عمرهم ولسه بيدجلوا
كيف يواجهون احفادهم \
مندهش said…
اود ان يتبنى الناس دعوه لتوفير اموال الشعب بدلا من التفكير فى زيادة السعار زياده ماهى مولعه والغاء الدعم وزيادة الضرائب....الخ
اليس السهل والأجدى توفير الملايين التى تنفق على انتخابات معروف نتيجتها مقدما؟
اليس من الأجدى توفير ميزانية مايسمى بمجلس الشورى وايضا مجلس الشعب اذا لم يكن دورهما يتعدى البصمه على كل ماتريده الحكومه؟
Anonymous said…
لولا اسرائيل لأمكن تغيير حسنى مبارك لان الموساد بيزوده على اى معلومات تصل اليه
اصبح مبارك صهيونى عربى هو وعبدالله السعودى وعبدالله ابن حسين
ولحمايتهم اطلق عليهم المعتدلين العرب ولكنهم معتدلون جدا امام امريكا واسرائيل
وطبعا الطوارئ هو السبيل الوحيد لقمع المصريين
لكن الفجر جاى....جاى....جاى.
Anonymous said…
لماذا انتخابات وملايين تهدر اذا كانت النتيجه معروفه سلفا
هذه
ميزانية اغلى مسلسل
تمثيلى فى بلد الفقراءالذين نسوا طعم اللحمه
عصام said…
اقترح يخلوها 8سنين عشان الانتخابات اللى بعدها
Ms Venus said…
مش عارفة يا قطة

بس زى ما قالت تيرز


بيفضح نفسه
رشدي بيفكر said…
شوفي يا قطة

انا باشم ريحة السلفيين متحمسين بالاجبات هنا

المشكلة ان السلفيين هم المبادرين في فكرة تغيير الحكم وهم اللي هيستلمو الحكم بالتاكيد وهيلبسو البلد نقاب اسود باسود

ليه محدش متحمس لنقاط البوست اللي كتبتيه ولا من المرشحين نفسهم للانتخابات ولا من المعلقين؟

صعب اجتمع مع السلفيين على نفس الفكرة
Mathew said…
وطالما فى طوارئ يبقى التوقعات معروفة رئيسنا القادم مين

معلش سامحيني هو احنا عندنا كان في رئيس جيه و مشي؟ غير علي قبره بالطبع
Kontiki said…
هو مفيش حد فى الحكومة حاسس بحاجة !! يا عذاب الوطنى يا جهنم الاخوان والجماعات مفيش حلول وسط ولو فى حلول وسط بدل ما نساندها عشان نكتب تاريخنا الحديث ونعدل الحال المايل نعرقلها ونمد قانون الطوارىء هى البلد دى بقت عاهرة رخيصة الكل عاوز ينهشها ويسرقها ويلزق فى الكرسى كمان تمانين سنة محدش ابدا بيحبها ولا بيخاف عليها ولا عاوز مصلحتها :(
Desert cat said…
karim
تغيير مين بقى كل سنة وانت طيب
Desert cat said…
متابع
ومصر ممكن تعمل كدا ؟؟ ولا احنا عندنا الفضائحيات للسوقة والمرتزقين يخوفوا الخلق ويرهبوهم
Desert cat said…
Anonymous
فاكرين انهم كدا هيخرسوا الناس
Desert cat said…
dr.lecter
ياريت يا دكتور بس شكله قاعد على نفسنا لحد لما نشيل احنا القلب
Desert cat said…
دندنة قيثارة الوجد
مش حاسة ان فى حاجه هتحصل الجميع محلك سر وابو لهب بيتفرج علينا من فوق وبيضحك على الناس وهى زى الفرخة الدايخة
Desert cat said…
elmasryeffendi
على اساس ان الوطن متقدم ومش فقير ولا فى بطالة ولا الناس بتشحت حقوقها قدام مجلس الشعب علشان كدا اعدائنا على قفا من يشيل
Desert cat said…
مهيج الجماهير
ومين فى البلد مش مستنيها
بس مشكلتنا اننا محتاجين قائد وصلاح الدين خلاص مات من زمان
Desert cat said…
Anonymous
بيواجهوهم بالكذب والتزوير البلد دى خلاص ماتت
Desert cat said…
مندهش
فى ناس صرفت على الانتخابات مائات الالاف من الجنهيات وفى الآخر سقطوا وتقول لهم مش خصارة الفلوس دى يقولوا لك وانت دافع لى حاجه من جيبك ربنا بيسلط ناس على ناس
Desert cat said…
Ms Venus
ماهو مفضوح من زمان يا فينوسه
Desert cat said…
عصام
ماهم هيجددوا للانتخابات اللى بعدها
Desert cat said…
رشدى بيفكر
البلد كلها بتغلى
؟؟؟؟ said…
قلت لك قبل كده بيتلخلخ وهيتخلع هيتخلع وبكره تشوفى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز