ولسه ايه مش صادروه

فى طلب غريب عجيب من نوعه تقدم مجموعة عواطلية يطلقوا على نفسهم محامين بلا قيود خطأ ببلاغ إلى النائب العام لمصادرة كتاب ألف ليلة وليلة .. وعايزين يصادروه ليه بقى اصلهم بيقولوا الكتاب يحتوى على عبارات جنسية صريحة تحض على "الفجور"
وواضح اوى ان الجماعة شايفين شغلهم تمام وبيشتغلوا بكل ما اوتو من قوة لطمس التراث المصرى علشان اسيادهم اللى بيبعتوا لهم التمويل يزودوا شوية المرة الجاية
بدأوا بان الاثار عبارة عن أصنام وان الفراعنة كانوا عبدة أوثان علشان كدا لازم يتم هدمها وبعدها المرأة العورة ولازم تتكفن علشان الراجل الغلبان مش يدخل النار بسببها ودلوقتى عايزين يصادروا كتاب ألف ليلة وليلة لاحتوائه على عبارات جنسية ؟؟ بدل ما يروحوا لدكتور يعالجهم من مرض الهوس الجنسى عايزين يصادروا الكتاب ؟؟
التراث المصرى باقى يا عباد البتروريالات ومهما يقولوا لكو اسيادكو اللى بيمولكو هتفضل مصر باقية وتراثها الى اخر العمر
لو مش قادرين تتحكموا فى نفسكو روحوا اعملوا خيمة فى الصحرا وعيشوا عندهم هناك فى شبه الجزيرة

Comments

Tears said…
المفترض ان يسن تشريع يمنع كل من هب و دب ان يرفع قضية فى شىء تافهة حتى لا نعطل مصالح المواطنين الحقيقية و لكن الحكومة تعتمد على سياسة الهاء الناس بالخناق مع بعض
مطلع said…
الديماجوجيه الدينيه
قصة داعيه بترولى
هو شخصيه مصريه تتمتع بقدر كبير من الفهلوه
تزغلل عينيه
الريالات والدنانير
وهو فى مصر كاتب حسابات
اذا ذهب لدول الجاز
لن يحصل من عمله الا على الفتات
ولذلك دفعته فهلوته الى المتاجره بالبضاعه الوحيده المطلوبه هناك
وهى هدم كل اثر للتطور والحداثه التى قطعت فيه مصر شوطا فريدا بين الدول العربيه
فن وادب وموسيقى ومسرح وفكر وعلم
وسينما...
وبفهلوته عرف المطلوب فانبرى يهاجم حتى الأغانى والأفلام التى مضى عليها 70 سنه او اكثر
اغانى خفيفه مثل اغنيات فيلم سلامه
ويرفع صوته الجهورى بالويل والثبور وبجهنم تنتظر من يغنى او يدعو للأختلاط
وسجل عشرات الحلقات وتقاضى آلاف الدولارات
وهاجم الديمقراطيه ارضاء لأستبداد الحكام فى بلاد الجاز
ولما انتهى دوره مثل اى بهلوان فى سيرك طردوه
فلجا لبلاد الكفار ...ذهب الى اميركا
فغير لهجته واشاد بهم فى محاولة لكسب عطفهم
ولكنه طرد من هناك ايضا فذهب الى لندن
وفى برنامج تيلفزيونى يروى قصته ومن اجاباتاه عن اسئلة المذيع فضح نفسه وظهر على حقيقته مرتزق يقول ما يريد اسياده ان يقول
Charafantah said…
ناس متخلفة....عايشين في الجهل
زي الناس اللي عايزة تحبس يوسف زيدان عشان رواية عزازيل
ولا المتخلف التاني اللي عايز يمنع Elton John إنه ييجي مصر عشان ميوله الجنسية!
غباء.....عمر المانع والمصادرة والحبس ما حيغيروا رأي حد
عصام said…
عندهم حق لأن العيال لسه قطط مغمضه مش بيقعدوا على النت يعيشوامع الجنس ومش بينزلوا الشارع يتحرشوا بالبنات ومش بيتجوزوا عرفى فى الثانوى وفى الجامعه والإعدادى كمان خليهم قطط مغمضه
dr.lecter said…
رجعنا العصور الوسطي مره تانيه

باختصار شديد محدش يقرا الكتاب لو شايف انه كده
Ms Venus said…
بكرة يقولوا ان الاكل حرام والشرب حرام والنفس حرام


يارب ارحمنا
ماثيو said…
هو ايه اللي حصل للفيسبوك بتاعك، كل تعليقاتك اتلغيت و البروفايل اختفي؟
Desert cat said…
Tears
دى بقت حاجه مقرفة
كل واحد مش لاقى له شغلانة يروح يرفع قضية على كاتب ولا فنان ولا اى بتنجان المهم يعمل لنفسه قيمة على حساب الناس واصحاب المشاكل الحقيقة عاملين اعتصامات فى الشوارع ولاحد معبرهم
Desert cat said…
مطلع
دائما هذه الشخصيات مفضوحة حتى من غير برامج لو كان ظل فى مصر كان زمانه لسه كاتب حسابات ومش كان بقى من اغنى اغنياء العالم ده حتى حساباته بملايين الدولارات فى البنك
هو فى كاتب حسابات بيكسب كل ده ؟؟
ثم هو اول من اخترع كلمة داعية اسلامى على اساس اننا فى عصر ابو لهب وهو نازل يدعو الناس للاسلام
والمجانين بيصدقوه ويصقفوا له
Desert cat said…
Charafantah
اللى انا نفسى اعرفه هو احنا بنتعامل مع الناس على اساس ميولها الجنسية ولا على اى اساس هى العالم دى امتا تفهم ؟
Desert cat said…
عصام
ايوا يا عمو عصام العيال يا حرام مش تعرف اى حاجه خالص لدرجة انك مش تلاقى طفل عمره مش جايب عشر سنوات وبيقول الفاظ مش يقولها واحد سكران لاى واحدة ماشية قدامه .. فعلا الجهل نورن واحنا فى بدلنا المتنورين كتير اوى لدرجة انهم بينبشوا فى التراث وعايزين يلغوه
Desert cat said…
dr.lecter
وهو لسه فى حد اصلا فى مصر بيقرا الناس لو بتقرا كانت فهمت ومكانش ده بقى حالنا
Desert cat said…
Ms Venus
ايوا الماكولات والمشروبات اللى من عند الكفرة حرام
والتيك اواى حتى من اسمه حرام
هههههههههههه
ماهو مش ناقص غير كدا فعلا
Desert cat said…
ماثيو
الاكونت اتقفل
البهايم بعتوا فيا ريبورتات لحد ما الادارة الذكية قفلت الاكونت
متابع said…
ماساه من تحت النقاب
اثار حادث سطو مسلح يقال ان رجلا يرتدي النقاب قام به نقاشا في استراليا حول حظر غطاء وجه المرأة الاسلامي.

وقال المعارض الليبرالي سن كوري برناردي ان حادث السطو يوضح ان النقاب "اصبح زي التخفي المفضل للمجرمين واصحاب السوابق".
Anonymous said…
كتب روبرت فيسك فى صحيفة الأندبندنت
يسأل فيسك "من من قراء الاندبندنت يستطيع تسمية سجن واحد في العالم الاسلامي؟ ومن منهم يعرف ان في سجن طرة في مصر يجبر السجناء على اغتصاب بعضهم البعض؟".
Kontiki said…
ما هو المصادرة على اساس ان فى كل بيت مكتبة مثلا
بصى الجهل المطلق وعشوائية القرار بقت سمة فى الكوكب المصرى المتفرد فى كل اشكال الفساد والغباء وانهيار الحضارة
منعوا التون جون على اساس حاجة شخصية مالهاش علاقة بفنة
وعاوزين يصادروا كتب
وبيصادروا كتب
ويرفعوا قضايا
ويحاولوا يقتلوا نجيب محوظ الله يرحمة و يهدروا دم مش عارف مين
عشان جمل تحض على الفساد والفجور
ثقافة المصادرة و المنع والتعسف و الكبت و الكلفتة بتزيد الفجور
وبتزيد الامراض النفسية
صدقينى فرويد لو كان عايش فى زماننا كان زمانه عاوز محلل نفسى
احنا واللى شبهنا علينا العوض بنعوم ضد التيار
الرعاع والجهلة كتيررر قوى
قوى قوى ولهم صوت
شوفى عندك وعندى وعند تيرز مثلا وعند كل الناس وخصوصا اللى بيتكلم فى الحريات و الفنون و الموضوعات الانسانية اقل تعليق بيتبعت لنا اننا مثلا ش***** واو****** وغيرة
هنا مفيش حريات مفيش كتب مفيش ثقافة مفيش فن
هنا مستنقع الهوس الجنسى
مستنقع الحجاب و النقاب
مستنقع الجهل والامراض الاجتماعية
مش حيرتاحوا الا لما نقلب افغانستان
وعلية العوض ومنه العوض
Desert cat said…
متابع
وبيعملوا مظاهرات ويقرفوا الدنيا صراخ لما بلد تسن قوانين لحماية موطانيها من الملثمين ؟ المفروض البلاد المحترمة تطرد الاشكال دى من عندها
Desert cat said…
Kontiki
انا استغربت اوى من المرضى اللى منعوا التون جون فى مصر لميولة الجنسية بجد احنا مرضى ومكبوتين
والناس المقرفة دى حسسونى انهم بيتعاملوا مع الناس على حسب ميولهم الجنسية وده معناه انهم بدل ما يتعالجو عندهم الحل الامثل هو المصادرة وعن المصادرة بقى مصادرة اكونتى انا شخصيا من الفسبوك بسبب الريبورتات بتاعتهم المقرفة

Popular posts from this blog

قميص دهشور

كل تحرش وانتوا طيبين