شم النسيم والبيض الملون .. كفاية بضنتونا


تعمل ايه لو راكب مواصلات ولاقيت حد جاى يديلك كتيب غصباً واقتداراً مكتوب عليه شم النسيم للشيخ العرورى ابن مورستان .. طبعا ده مش اسم الشيخ بس لما قريت الكتيب الذى لا تتعدى عدد صفحاته العشر ورقات حسيت فعلا ان الراجل ده كاتبة خلف اسوار مستشفى المجانين ... الكتيب يحمل ما هو ارهاب فكرى بمعنى الكلمة ومستشهد بآيات تم اقتصاصها بما يناسب هوى الناشر الشخصى اللى مش مكتوب له اسم على غلاف ولا معروف هو مين اصلا ولا دار نشر ايه مجهولة الهوية دليل على ان الكتاب مطبوع تحت السلم ، والآيات اللى مستشهد بيها مش فيها حرف واحد يحرم شم النسيم .. الناشر العبقرى بادئ الكتاب بسؤال :
يحتفل المصريون بعيد شم النسيم فما هو أصل هذا الاحتفال ، وما رأى الدين فيه ؟
وبالطبع كاتب الجواب الذى يحمل بين طياته الجهل المدقع والحقد الدفين
فالجواب يا حضرات هو أن الرياح الطيبة ليس لها موسم معين وشم النسيم كان عيد فرعونى ومستشهد بربع آية من سورة النمل وهى ( فى تسع آيات إلى فرعون وقومه إنهم كانوا قوماً فاسقين ) واكمل جوابه كالتالى ثم حدث فى التاريخ المصرى حادثان اولهم يرتبط باليهود والآخر بالأقباط ، ومش جايب سيرة اليهود فى حاجه من قريب او بعيد بل دخل مباشرة على الاقباط .. ومعرفهم ازاى الاقباط هما المصريين الذين اعتنقوا المسيحية يا حلولى زيدنا يا ناشر من علمك الفذ .. الاقباط جعلوا اليوم ده دينيا لانه اليوم الذى بشر فيه جبريل مريم العذراء بحملها المسيح .. يعنى هو يوم البشارة وبقى كدا اسمه عيد البشارة .. المسلمين يحتفلوا بيه ليه بقى ؟؟ ويلونوا البيض ليه بقى اذا كان المسيحيين بيلونوا البيض باللون الاحمر اشارة الى دم المسيح ومستشهد بكلمتين من سورة النساء ( وما قتلوه وما صلبوه ) وراح مكمل باقى الصفحات تهديد ووعيد للى يحتفل بشم النسيم

وما للجهلة من وسيلة للإحساس بالإبداع

واضح ان الناشر حب يعرف الوهابيين انه قايم بشغله فى البلد على اكمل وجه .. كتب الكلمتين واستشهد برضه بكلمتين من القرآن ووزع زى ما انت عايز .. من غير ما يكلف نفسه عناء المعرفة ليعرف ان كلمة قبطى مشتقة مباشرة من الكلمة العربية " قبط " ، وهذه بدورها مشتقة من الكلمة اليونانية " أجيبتوس " ، بمعنى مصري ايه اللى دخل الجنسية كمان فى الاديان ؟؟ حد يعرف الاجابة ؟
اما بقى شم النسيم .. يعود الاحتفال به إلى ما يقرب من خمسة آلاف سنة و سمي بهذا الاسم نسبة للكلمة الفرعونية "شمو" وهي كلمة أصلها هيروغليفي قديم ويرمز شم النسيم إلي بعث الحياة كما اعتقد لمصريون القدماء أن يوم شم النسيم هو بداية خلق العالم ، ولأن الحياة في اعتقادهم بدأت في الماء قدسوا أكل الأسماك في يوم إشراق الحياة "شم النسيم" ، وكذلك البصل الذي ارتبط في أساطيرهم القديمة بقدرته علي طرد الأرواح الشريرة ..
يبقى ايه اللى جاب القلعة جنب البحر ؟ لما هما مستخسرين فى نفسهم البحث والقراءة والمعرفة بيرجعوا على اللى العقول طراشهم الخبيث ده ليه ؟؟
والهدف من من تعقيد الناس فى عيشتها وارهابهم بالآخرة ايه ؟؟
هو ربنا مش واحد أحد ؟
عينوا نفسهم وكلاء ليه فى الارض ليه ؟
هو ربنا بيحتاج واسطة بينه وبين اللى خالقه علشان الارهابيين اللى مسميين تفسهم رجال دين يكرهوا الناس فى الحياة بالشكل المقزز ده ؟؟ هى شغلة رجل الدين دى اسمها شغلانة فعلا ؟
هو التربح بكلام الله مش حرام ؟؟
والافتراء على الله بما لا يقول مش حرام ؟
والفتنة بين الناس وزرع الحقد فى قلوبهم على بعض مش حرام ؟
هما الانبياء والرسل مش كان اسمهم رجال دين ليه ؟؟
طيب رغما عن انف الوهابيين والسلفيين وللى للحياة واللى فيها كارهين
كل سنة والمسيحيين وكل المصريين بالف خير
عيد سعيد على الجميع


تعليقات

‏قال غير معرف…
الغريب السماع لمثل هذه الخزعبلات بالنشر بحريه بينما يعتقل ناشر كتاب عن البرادعى
ومايريده المصريين
وبعدين تستعجبوا من التخلف الذى يقود مصر الى الهاويه
‏قال غير معرف…
فضيحه
اعترفت شركة دايملر منتجة سيارات المرسيدس بدفع رشاوى لحكام روسيا والعراق ومصر
وذلك عند تحويلها للمحاكمه فى اميركا
‏قال AHMED SAMIR
يعني هي دي اول مرة؟
و تفتكري هتكون الاخيرة؟
شوية شوية هيلغوا عيد الفطر و الأضحى
‏قال غير معرف…
فضيحه
شركة دايلمر منتجة عربات المرسيدس خاصة المصفحه للحكام تعترف بدفع رشاوى للمسؤولين فى روسيا والعراق ومصر....!!!!!!
‏قال Tamer Nabil Moussa
الفكر يحارب بالفكر لكن هم لايسمعون الا الى انفسهم وغيرهم حاقدين وكافرين

ربنا يصح الحال

مع خالص تحياتى
‏قال Tears
البلد كلها فوضى و اللى عايز يلصق حاجات فى الشوارع و يعمل من الجدران مجلة حائط براحته و فيه لوحات مكتوب عليها كلام مغلوط لدرجة ان الدكتور محمد سليم العوا
الأمين العام للأتحاد العالمي لعلماء المسلمين
طلع و قال فى برنامج القاهرة اليوم..عمرو اديب...ان لافتات الحجاب فريضة مخالفه لانه مش فرض و قال انه فضل لكن من يقول انه فرض يفترى على الله.....و تسجيلات الحلقة موجودة و الاطلاع عليها سهل

اللى حصل انهم بيروجوا تخاريف باسم الدين و مع الوقت بيصدقوها و يضموها للثوابت لما بقوا عاملين دين على كيفيهم عشان كده مصر زمان مختلفه تماما عن مصر دلوقتى فى الاخلاق و السلوك و المظهر
‏قال غير معرف…
شىء مذهل
الا يشعر هؤلاء الذين اصدروا الأمر بالعار ام الى هذه الدرجه جلودهم سميكه فقدوا الأحساس ولم يعد لديهم اى دم
القت الشرطة المصرية السبت القبض على احمد مهنى صاحب دار "دوّن" للنشر لاصداره كتابا سياسيا عن محمد البرادعي بعنوان "البرادعي وحلم الثورة الخضراء".

كما صادرت قوات الامن نسخ الكتاب كما ذكرت الشبكة العربية لمعلومات حقوق الانسان وهي منظمة غير حكومية تعني بالدفاع عن حقوق الانسان.

وقال نشطاء في مجال حقوق الانسان ان الكتاب وهو من تأليف كمال غبريال يؤيد البرادعي الرئيس السابق للوكالة الدولية للطاقة الذرية في حملته لاحداث اصلاحات ديمقراطية في مصر.

واوضحت الشبكة في بيان ان قوة من "مباحث امن الدولة اقتحمت منزل احمد مهنى فجر السبت وقاموا بتفتيش المنزل وقلبوه رأساً علي عقب للبحث عن نسخ الكتاب الموجودة لمصادرتها وذلك بالرغم من ان الكتاب مطروح بالأسواق فعليا منذ أسبوع".

ونقلت وكالة فرانس برس عن جمال عيد رئيس الشبكة قوله إن مهنى محتجز حاليا في سجن امن الدولة ولم يوجه له اي اتهام".

وقال عيد إن "الشرطة صادرت 16 نسخة من الكتاب وجهاز الكمبيوتر" الذي يملكه مهنى.

ولم يصدر تعليق من الشرطة حول هذا الموضوع حتى الان.

ومنذ عودته الى مصر بعد انتهاء عمله في الوكالة الدولية منذ نحو شهرين اشهر يطالب البرادعي باصلاحات سياسية في البلاد، وقام بتشكيل الجمعية الوطنية للتغيير التي تضع على رأس اولوياتها تغيير الدستور.

وقال البرادعي انه سيفكر في الترشح في انتخابات رئاسة الجمهورية العام القادم إذا تمت تلبية شروط محددة منها تعديلات دستورية والاشراف القضائي على الانتخابات وضمان حصول المرشحين على تغطيات اعلامية متساوية.
‏قال Ms Venus
وانتى دايما بخير يا احلى قطة


مش بقولك ياريت الناس كلها زيك فى عقلك وضميرك واحساسك


بتحسسينى ان لسه فى امل
‏قال karim
الحقيقة الموضوع زاد قوى و مش كتب و بس فى كلة واللة من اعلام و نت وكل الوسائل المتاحة,كل دة راجع جهل الناس بالدين والاخلاق, انا ساعات بسمع اسئلة فى برامج دينية واللة تضحك حاجات عارفاها وانا فى ابتدائى و الناس مش عارفاها وهى كبيرة, نحن فى زمن الجهل سيدتى, وربنا يستر بجد,تحياتى
‏قال غير معرف…
ياخساره
وعدنا الى زوار الفجر
الذين يحاولون اطفاء نور الشمس
انها بداية النهايه
‏قال سمراء
كل سنة وانت طيبة يا مصرية يا جميلة
ودايما بحياة متجددة مع كل اعتقادات القدماء الرائعة

عجبني قوي استخدامك لجملة من فيلم لمحمد سعد واللي كنت دايما مش فهمة هو لية بيعمل الأفلام دي
لكن دلوقت فهمت لما لقيت الحوار اصبح اقوال مأثورة مناسبة لمثل تلك المواقف


تحياتي
سمراء
‏قال Kontiki
عادى دى حفلة كل سنة بتاعه شمو
:)
هو بس لو كل واحد حط لسانه فى بقة و بعد كدة يعبد ربنا بينه و بين ربنا من غير ما يتحفونا بفتاوى او كتيبات او اراء او فضائيات العنصرية حتختفى من كوكب مصر
يالا علية العوض
كل سنة وكل ربيع وانتوا طيبين
‏قال Mai Zamalkweya
عايزه ايه من ناس مبقتش شايفه الا التعصب
عايزه ايه من ناس شايفه طالبان و اسامه بن لادن مثل اعلي وقدوه وحامي حمي الاسلام
عايزه ايه من ناس عدد لابأس به منهم بيعلقوا علي خبر زياره اوباما السرية لافغانسان انها نصر للاسلام و للمقاومة الاسلامية طالبان و فرحانين
القادم اسوأ بكثير السنه دي التحريم بالكتيبات اللي بتتوزع في المواصلات السنه الجايه هيخبطوا علي شقه شقه ويفتشوها وياويله اللي هيلاقوا عنده فسيخ او رنجه او ملوحه او حتي بصل ولمون وبيض
‏قال متابع…
من مقال ممتاز لغاده عبد العال
لك النعرة التى تظهر فى كل الأعياد من تحذير من التشبه باليهود أو بالمسيحيين تترك أثرا خفيا فى النفوس.. تختفى روح التسامح وتقبل الآخر وتنتشر تلك الأقاويل التى يمكن أن نتفهمها إن هى قيلت عن ديانات غير سماوية.. إلا أننا ورغم افتخارنا بأننا كمسلمين نؤمن بكل الرسل وبكل الديانات السماوية التى أنزلها الله (مع اختلافنا مع المؤمنين بها فى بعض التفاصيل).. لكن تلك الدعاوى من صاحبنا وأمثاله تثبت أنهم يقولون باللسان ما لا يؤمن به القلب على الإطلاق. ومع أن ظاهر تلك الدعاوى هو التشدد أو التزمت لكن لا أرى أن كل المعترضين على الاحتفالات اعتراضهم جاء من منطلق خوفهم على دينهم.. ما هم كمان معترضين على الاحتفال بعيد الطفولة وعيد الأم والمولد النبوى والعيد الصغير والعيد الكبير وعيد تحرير سينا و6 أكتوبر وعيد وفاء النيل وفوانيس رمضان..

صاحبنا وكتير زيه باختصار ما بيحبوش يشوفوا مظاهر الفرح والسعادة على وشوش الناس.. الناس طالع عينها طول السنة ويادوب بيتنشقوا على يومين أجازة يقعدوا فيهم فى جنينة أو يركبوا مركب فى النيل.. لكن إزاى؟.. الفرح ده مسخرة وإحنا لازم نفضل دايما ناس محترمين وكل ما نبقى مكفهرين ومكلضمين كل ما يبقى طريقنا أسهل للجنة..

عزيزى المعترض.. عزيزى القارئ.. هل تعلم أن «عمرو بن العاص» حين دخل إلى مصر ورأى أهلها يحتفلون بهذا العيد الذى أسموه بـ«عيد الربيع» بعث لأمير المؤمنين «عمر بن الخطاب» رضى الله عنه ليسأله.. فرد عليه الخليفة أنه لا مانع من الاحتفال بالعيد مع أهل البلد.. فاحتفل به مبعوث الأمير مع الرعية.. وطوال فترة حكم «عمرو بن العاص» لمصر لم يسمع أحد أنه اعترض على عيد إسلامى أو مسيحى أو يهودى.. ولم يهدم معبدا أو كنيسة أو أثرا من آثار الفراعنة القدماء.. لم يفعلها «عمرو بن العاص» ولم يفعلها «عمر بن الخطاب».. وهل أنت أعلم من أمير المؤمنين؟..
‏قال أحمد.خ…
ما هذه المهازل؟ ولماذا الكتابه عنها؟خلاااااااااااص زهقنا من الجهل والتخلف الناس فى الخارج يتحدثون فى البحث عن كواكب أخرى وكيفية تطوير الحاسب الآلى الذى يعتبرونه متخلفاونحن نتحدث هل النقاب زيا دينيا أم لاوهل نحتفل بشم النسيم أم لا ولاعلم ولاثقافه لدينا حتى فى المعلومات البسيطه يخطئون ويخلطون بين المسيحيين والفرعنه وفى النهايه كل سنه ومصر كلها بخير وسعاده ومحبه وليذهب المتطرفون للجحيم
‏قال hellmr
اشتري عربيه وارحمي نفسك من الموصلات و كل انواع النقاش مع التكسجية LOL!
‏قال أحمد.خ…
بالمناسبه ياقطه ماذا تعنى كلمة بضنتونا فى العنوان؟
شم نسيم سعيد
----------

نحن في حاجه الي ارائكم في رسائل القراء بعد ان دخلت المنطقه الملغومه
‏قال راجل أديم
كل عيد وانتى أجمل وأجمل
ومصر
والمصريين
كل المصرين
وكل انسان ع الأرض شايل ف ألبه المحبه
بألف ألف خير
وتحضر
وتآخى
وسلام
كل عيد يا أطه وانتى أأوى
وأعلى
‏قال غير معرف…
صفقه اخرى بين الأخوان والحكومه
وصف مراقبون قرار السلطات الأمنية بالإفراج عن المجموعة فى هذا التوقيت بأنه صفقة بين الأجهزة الأمنية والجماعة، على غرار الصفقة الشهيرة التى عقدتها الجماعة عام ٢٠٠٥ قبيل الانتخابات البرلمانية، والتى اعترف بها المرشد العام السابق للجماعة.

وقال عبدالرحيم على، الباحث فى شؤون الحركات الإسلامية، إن ما حدث صفقة واضحة بين الأمن والإخوان، وإن الجماعة ضليعة فى عقد هذه الصفقات، هو ما أكده الدكتور عمار على حسن، الباحث فى شؤون الحركات الإسلامية، الذى قال إن خروج الإخوان فى هذا التوقيت صفقة من جانب الدولة مع الجماعة لضرب الاتصال السياسى الذى تقوم به قياداتها مع الأحزاب والقوى السياسية الأخرى، والذى بدأ بحزبى الوفد والناصرى، وأن الدكتور محمود عزت النائب الأول لمرشد الجماعة، لا يرغب فى زيادة اتساع هوة التواصل بين الجماعة وباقى القوى السياسية.
‏قال غير معرف…
الوقت لا يسمح بترف التحليل والتنظير فالأمور واضحة والبرادعي ليس مجرد شخص نتفق أو نختلف معه البرادعي أصبح فكره يجب أن يتحلق حولها جميع الشرفاء ولاشرف لمن هم خارج الحلقة - أخيرا وبعد طول انتظار خرج من مصر رجل يقول كلمة حق في وجه سلطان جائر انه ينادي ال فرعون ( ياقومي مالي أدعوكم الى النجاة وتدعونني… إقرأ المزيد .. الى النار )للذلك أقولها بملئ فمي من ليس مع البرادعي فهو مع الاستبداد
تعليق موجه لفهمى هويدى فى جريدة الشروق من قارىء
‏قال غير معرف…
مثال حى على اللعب بالدين
من قناة الناس الأرهابيه
شنت قناة الناس الفضائية هجوما حادا ضد الدكتور محمد البرادعى، المدير السابق للوكالة الدولية للطاقة الذرية، بسبب مطالبته بإلغاء المادة الثانية من الدستور، التى تنص على أن الإسلام دين الدولة، واللغة العربية لغتها الرسمية، ومبادئ الشريعة الإسلامية المصدر الرئيسى للتشريع.

وجاء فى حلقة برنامج «سهرة خاصة»، الذى يقدمه الداعية خالد عبدالله، أسبوعيا، على لسان أحد الضيوف قوله: إن هذا الرجل - فى إشارة إلى الدكتور محمد البرادعى- يحارب الله ورسوله، وإن كل من ينتخبه من المواطنين يحارب الله ورسوله أيضا.
‏قال غير معرف…
سبق ان ذكرت هذه الخبر
كشفت عريضة اتهام تقدمت بها هيئة سوق المال والتبادل الأمريكية، تفاصيل جديدة فى واقعة تقديم شركة «ديملر مرسيدس بنز» للسيارات، رشوة لمسؤول حكومى مصرى كبير، لتسهيل شراء الحكومة سيارات ومعدات من الشركة.حصلت «المصرى اليوم» ووكالة «أمريكا إن أرابيك» على نص الاتهام الواقع فى ٢٧ صفحة، ويشير إلى أن الشركة قدمت رشوتين بين عامى ١٩٩٨ و٢٠٠٤ الأولى بمبلغ ١.١ مليون مارك ألمانى، ثم رشوة أخرى بمقدار ٣٢٢ ألف يورو «حوالى ٢.٥ مليون جنيه» للمسؤول المصرى - الذى لم تسمه العريضة - بغرض تسهيل أعمال ومبيعات الشركة فى مصر.وقالت العريضة إن الدفع تم عن طريق شركة تسمى نفسها «كونسالتنج إيجيبت» أو «مصر للاستشارات» عمل فيها هذا المسؤول كغطاء لعملية الرشوة، وأضافت العريضة أن المبالغ دفعت «لتأمين شراء شاسيهات سيارات علاوة على عربات
‏قال غير معرف…
متى تفتح ملفات العمولات والرشاوى فى مصر؟؟؟
‏قال غير معرف…
الشيطان يعظ
اضحك من قلبك
عضو مجلس الشعب الكبير المشهور بصداقته القويه جدا جدا بممدوح اسماعيل صاحب العباره
يطالب بمحاسبة الحراميه فى شركات القطاع العام ههههههههه
الى هذا الحد بلغ الستخفاف بعقول الناس؟؟
‏قال Tarkieb
طول عمرها الكتب دي موجودة بس انت اللي باينك اول مرة تركبي مواصلات.....وحياتك بدون الكتب دي الناس تفكيرها كدة وحفتضل كدة وحتموت كدة ...المشكلة ان كان زمان بتبص للعالم دي باحتقار دلوقتي محدش عاد بيبص لدول فساقو فيها....القوالب نامت والانصاص قامت...العيب مش الكتب العيب في الناس
كل عام و الجميع في مصر المحروسة بخير
‏قال عواصف رملية
قبل كام يوم كان منشور في الصحافة خبر عن اغتصاب طفلة 12سنة من قبل تلات شبان وفيه مواطن استنجد بالشرطة والطابط خاد الطفلة على المعبد اليهودي واغتصبها هناك وبعدين حبسها واطلق سراح الشبان

معرفش اذا كان مناسب احط مقال زي دة بمدونة بس احتفظت فيه عندي

هو الاغتصاب في المعبد اليهودي مش عبادة؟ اكيد عبادة الا اذا جيه مفتي واعترض على ان العمل دة مش عبادة. بس بردو هيقول ان اعتصاب الطفلة عبادة

الظابط طلع مجدع وخصوصا انه بيحمي الناس
‏قال غير معرف…
كل سته و انتى طيبه يا قطه و كل سنه و جميع الاخوة المسيحيين بخير و سعادة. الاحتفال بشم النسيم شأن مصرى تماما و لم نطلب من الوهابيين رأيهم فيه
مصر ذات طبيعة خاصة لن يفهمها غير المصرى، لو كان فيه حد يفهم المصرى كانت حرب اكتوبر تم التنبؤ بها.
ياريت يسيبونا فى حالنا و يبصوا لمشاكلهم التى لن تنتهى.
.
بابا شريف
‏قال غير معرف…
ولا مؤاخذه مال اهلهم
اعتقلت السلطات الكويتية 11 مصريا خلال تجمعهم في احد المطاعم بالكويت للتباحث في سبل دعم محمد البرادعي، المدير السابق للوكالة الدولية للطاقة الذرية، في مساعيه للاصلاح السياسي والترشح للرئاسة في مصر.

وكانت السلطات الكويتية قد اعتقلت في وقت سابق اربعة مصريين آخرين على خلفية مشاركتهم باجتماع عقد تحت شعار "مصريون بالكويت لدعم الدكتور البرادعي".
‏قال غير معرف…
وميعتبرش ده تدخل فى الشؤون الداخليه لمصر زى ما حذق المتحدث باسم الخارجيه وانتقد اعتاض اميركا على اعتقال شباب 6 ابريل
‏قال غير معرف…
مره اخرى ومال اهلهم المتخلفين دول
آخر الأخبار
ترحيل 5 مصريين من الكويت من انصار البرادعى
‏قال غير معرف…
هل هؤلاء الناس من جنس البشر؟
وماذا لو تناقش المصريون فى بيوتهم هل سيتجسسون عليهم ويرحلونهم
مره اخرى ومال اهلهم
‏قال Desert cat
Anonymous
حينما يعجز النظام عن حل اى مشكلة فتجده يضرب فئات الشعب المتخاصمة ببعضها البعض والناتج واضح السماح بنشر خزعبلات وسجن العقلاء
‏قال Desert cat
Anonymous
وهما دى دول حكامها يخافوا من الفضايح برضه
‏قال Desert cat
AHMED SAMIR
هما خلاص على طريق الغائهم علشان الفرح حرام والناس بتكون فرحانه فى الاعياد
‏قال Desert cat
Tamer Nabil
ايوا غيرهم حاقدين على اساس ان الكلام اللى بيرجعوه فى الفضائيات ده درر واختراعات واكتشافات مش يعرفوا الغير يوصلوا لها
دول مجانين
‏قال Desert cat
Tears
وفين الدولة من كل اللى بيحصل ده ؟
الحاكم يغازل السلفيين والاخوان مش فاضيين غير لرفع الجزم والمواطن الغلبان اهو ماشى ورا القطيع
‏قال Desert cat
Anonymous
وفين اللى قاعدين يجعروا طول النهار ان كل حاجه حرام مش المفروض يكون ليهم دور فى المهزلة دى
‏قال Desert cat
Ms Venus
ميرسى ليكى يا فينوسه
كل سنة وانتى فى حب وفرح وسعادة رغم عن انف الحاقدين
‏قال Desert cat
karim
الاسئلة الدينية دى لوحدها مسخرة
اللى مش عارفه تدخل الحمام بالشمال ولا اليمين واللى زميلها قالها صباح الخير فى الشغل
ده هبل
‏قال Desert cat
سمراء
احيانا الكوميديا السوداء بتكون معبرة جدا
كل سنة وانتى فى كل خير وسعادة
‏قال Desert cat
سمراء
احيانا الكوميديا السوداء بتكون معبرة جدا
كل سنة وانتى فى كل خير وسعادة
‏قال Desert cat
Kontiki
انا اول مرة اشوف بجاحة زى بتاعة الشيوخ العباقرة اللى المفروض عارفين ان مفيش وسيط بين الانسان وربه
معرفش مين ادلهم توكيل يحرموا ويحللوا براحتهم
‏قال Desert cat
Mai Zamalkweya
اى مصيبة تحصل لهم يقولوا لك ده ابتلاء من الله واى مصيبة تحصل لدول اوربا يقولوا لك ده نصر للاسلام
طيب زيارة اوباما السرية دى مش فيها اى ضرر يعنى الاسلام انتصر ازاى ؟؟ وهو اصلا كان مهزوم ؟
‏قال Desert cat
متابع
بجد مقال رائع
تحياتى
‏قال Desert cat
أحمد.خ
هو انت متعرفش ان الناس اللى فى الغرب الكافر دول ربنا سخرهم لنا علشان يخترعوا لنا
واحنا نقعد هنا نشوف الحلال والحرام
وقطعة القماش حكمها الشرعى ايه
واللى هتلبسها هتدخل الجنة ولا النار ولا تروح مارينا
‏قال Desert cat
hellmr
انا من زمان مبطلة حوارات المواصلات دى بس الظروف القصوى اللى اضطرتنى ليها فى اليوم المهبب ده
‏قال Desert cat
أحمد.خ
تحميل اكتر من معنى
‏قال Desert cat
قيس بن الملووووح
وهى ايه المنطقة الملغومة دى
‏قال Desert cat
أنتخ
ميرسى ليك يا انتخ وتحياتى لقلبك الجميل الرائع ده
‏قال Desert cat
Anonymous
صفقات الاخوان مبتخلصش عندهم استعداد يتحالفوا مع العفريت الازرق المهم المصالح الشخصية
دول غيروا اسمهم من الاخوان المسلمين للاخوان المنتفعين
‏قال Desert cat
Tarkieb
لا صدقنى بدون الكتب دى الناس مش هتفكر الا فى الساقية اللى دايرة فيها ولقمة العيش تجيبها ازاى
لكن الكتب دى بتقولهم ارضوا بالمقسوم واسمعوا كلام اولى الامر
‏قال Desert cat
ذو النون المصري
كل سنة وانت طيب وبالف خير
‏قال Desert cat
عواصف رملية
هو اى حاجه فى الكنيسة او المعبد اليهودى يبقى اسمها جهاد
لكن اوعى تيجى جنب مسجد تبقى بتعتدى على الاسلام وتشوف ضرب نار للصباح الباكر
ممكن حضرتك تضيف المقال او تيجب لنك وانا انشره معنديش مانع
‏قال Desert cat
Anonymous
كل سنة وحضرتك طيب وبالف خير
عيد سعيد على كل المصريين واللى بيقلدوا العراعير يروحوا عندهم ويريحونا
‏قال Desert cat
Anonymous
همجية وقلة ادب
طيب خلى كويتى يشتكى فى مصر من اى حاجه وشوف المصرى هو اللى هيحصل فيه ايه
ناس بيأيدوا شخص يحكم بلدهم البهايم التانيين مالهم
حاجة مقرفة بجد

المشاركات الشائعة