Desert Cat Search
قطه الصحراء: اجدع وزير فى وزارة نظيف

Thursday, April 1, 2010

اجدع وزير فى وزارة نظيف

تربية الاجيال تبدأ من الصغر وبما ان الاهل مش فاضيين يربوا الاب مطحون شغل علشان يوفر الفلوس والام اما مقتنعة انها عورة وبالتالى بتخرج جيل فاشل كل همه انه يتحرش باللى مش محجبة او مش لابسه نقاب علشان يبقى اسمه بيجاهد او سايبة مهمة التربية للحضانة والمدرسة اللى كل هم المدرسين هو الدروس الخصوصية واللى مش ياخد درس يبقى هياخد فى اعمال السنة صفر وفى نهاية السنة صفر اكبر منه شوية والنتيجة عيال بطلت تروح المدارس وفاضية للصياعة فى الشوارع علشان برضه نفس النيجة يقلوا ادبهم على اى حد بقى ماهو هيجيب منين تربية علشان يعرف يعنى ايه احترام وفى اخر الشهر بيروح يدى المدرس فلوس الدرس اللى طبيعى بيروحه بمزاجه ماهو المدرس مش يهمه غير الفلوس اخر الشهر وده كان سبب وجيه طبعا اننا نسمع عن مدرس اتضرب او اتشتم ماهو على راى مبروك ابو العلمين حمودة طالما المدرس اتحط قدامه الشاى والجاتوه يبقى عليه العوض .. وبما اننا شعب يحب السهل جدا فمش مستغربة من كمية التعقليات اللى على الخبر اللى بيقولوا ان الوزير مزودها مع ان ياريت كل الوزراء يحذو حذوه علشان البلد تنضف ونخلص من المهازل والفساد والانحطاط السائد ده بقى
وزير التربية والتعليم زكى بدر عمل زيارة مفاجئة لمدرسة بحلوان طبعا السيد مدير المدرسة القدوة جاى متاخر والمدرسين اغلبهم غايبين .. والعيال رايحين المدرسة من غير ادوات والمدرسة نفسها مليانة زبالة كحال اغلب مدارس الجمهورية طبعا فما كان منه الا انه نقل ادارة المدرسة كلها .. طبعا المدير الهمام بدل ما يعترف بخطأه دعى جريدة الدستور اللى المفروض انها معارضة بس انها جريدة معارضة على واحدة ونص .. وخلى العيال يعملوا مظاهرة الصبح فى طابور المدرسة قال ايه رافضين التغيير .. عيال فى اعدادى وجايين قدام الكاميرا بيضحكوا وهما بيهتفوا فكرونى باعلان زمان اوى كان بيجى صعيدى جنب تلفزيون ويقول اتصور جنبه والنبى يابا وقال ايه بيهتفوا رافضين التغيير .. ده غير ان حضرة مدير المدرسة بكل بساطة بيقول انه مريض ومش يقدر يجى المدرسة فى معاده والمدرسين اللى غايبين كلهم مرضى بامراض مزمنة .. كان ناقص يقول الطلبة كمان مرضى .. طيب لما انت مريض مش بتسيب مكانك لواحد صحته حلوة ليه يدير المدرسة وتقعد فى البيت تستريح ؟ يا مدير يا ملتحى يا اللى عارف ربنا كويس ؟؟ لما المدرسين مرضى بامراض مزمنة مش بيسيبوا مكانهم لحد يعلم العيال اللى فى المدرسة ليه ؟ البلد مليانة كفاءات قاعدين على القهاوى وعندهم صحة يدرسوا المرضى اللى فى مدرستك يستريحوا خالص علشان الكفاءات دى تشتغل ؟؟ ولا هى فاكرها شئون اجتماعية مش مدرسة ومستقبل بلد ؟؟ ده كلام واحد عارف ربنا ملتحى ودقنه مترين قدامه والمفروض انه بيقبض مرتب مقابل شغل بيعمله مش مقابل مرض مزمن يعانى منه



فيديو زيارة الوزير

39 comments:

أسماء علي said...

لأ بجد وزير نشيط
بس على الله يفضل كده
:)

Desert cat said...

@ أسماء علي

انا بدعى زيك يا سمسم بقول يارب برضه يفضل كدا

أحمد.خ said...

أستاذتى الفاضله أؤيدك تماما فى كل ماذكرتيه فيما عدا إحتجاج الأولاد فليتهم يستمرون فى التعبير عن وجهة نظرهم وعلينا الجلوس معهم والإستماع إليهم وإفهامهم خطأوجهة نظرهم لوكانت خطأ بدلا من السخريه منهم لأنهم (شوية عيال فى إعدادى)فليس هكذا نربى أجيالا تفهم ماهى الديمقراطيه

قلــ"بـــلال"ــــــب فارس said...

يارب يظل على هذا الحال ويكون نشيط وتبقى الوزراء كلهم هكذا
............
سيدى مابكى
لماذا تكرهين الحجاب
ولماذا قلتى ان ابناء المنقبات او المحجبات بيظلوا يتحرشوا بالبنات الائى لم يتنقبن او يتحجبن
هذا خطا
مع ان اختى محجبة وامى محجبة ايضا بس عمرهم ماقالوا على واحده مش منقبه كلام خطاء مثل ما تقولين
بل اختى مصاحبه على بنات مش محجبين فى الجامعه
هذا الكلام اللى بتقوليه
لا يقوله الا شخص لا يعرف ما معنى الحجاب او النقاب
__________
وكلامك خطاء ان المنقبات او المحجبات بيقعدوا فى الدار لا
يوجد دكاترة عندى فى الجامعه منقبات
مارئيك
_____________________
ياليتك تسمعين من المنقبات او المحجبات كما تسمعين عنهم
___________________
وكلامك هذا لا يقوله المثقفين

karim said...

انا اول ما اتعيين قلت الراجل دة هايكون مختلف طالع زى ابوة, علشان هو متربى على كدة بس هايصلح اية ولا اية, عقبال مايحاول يكون جيةغيرة, الناس الكويسة مش بتمشى مع البلد دية, تحياتى

Mai Zamalkweya said...

يارب بجد يفضل كده
انا كنت بسمع انه ممشي جامعه عين شمس زي الالف
بس ياريت ميلتفتش للمقالات الناس بتاعه اللي يقول يمين يقولوا شمال زي مقاله ابراهيم عيسي

Anonymous said...

عزيزتى قطه
اين الوزير والوزاره من غزو الوهابيين لأجيالنا الصغيره ومستقبل البلد فيما يسمى بالمدارس الأزهريه الذكيه
وهى مشروعات تجاريه للربح الوفير بالضحك على الذقون فرغم الدعايه الواسعه عن احدث المعامل والأشراف التربوى اذا دققتى تجدين مشروعا تجاريا يقوم على الفهلوه مثل الأفراح الأسلاميه
التى تمنع الأختلاط استغلالا للعاطفه الدينيه ومتاجرة بها
يكفى اغتيال براءة الأطفال بفصل الجنسين وفرض الحجاب على الأطفال الصغار انها جريمه لا ادرى اين الدوله من هذا

Anonymous said...

تابع
لماذا كل هذه الفتونه على موظفين حكوميين غلابه
ربما لم يتناولوا طعاما او وجدوا وسيلة مواصلات ىدميه بينما الوزير يصل بوكب سياراته الفارهه ليستعرض عضلاته على الغلابه وهل الناظر يدفع من جيبه لصلاح دورات المياه الخربانه؟
ولماذا يترك الوزير اصحاب رؤوس الأموال والأموال المتدفقه فى المشروعات الخاصه لنشر الوهابيه فى مدارس خاصه
تتقاضى الآلاف
من كل طفل ليجرى غسيل مخه
فى عملية اغتيال بشعه لبراءة الطفوله حيث يجرى فصل الجنسين وفرض التحجب على اطفال ابرياء ضد كل مبادىء التربيه السويه رغم الأعلان عن اتباع احدث النظم التربويه
هل لرؤوس الأموال الوافده باكثر الأفكار رجعيه وتخلفا حرية عمل ما يشاؤون
حتى لو كان
لتخريج متشنجين متطرفين ارهابيين
ونساء وهبيات وتنشئتهم على ذلك منذ نعومة اظفارهم
هذا هو الخطر الداهم الذى يتسلل الى بلادنا ليقضى على الأخضر واليابس
لماذا لا يستعرض الوزير عضلاته على هؤلاء؟

Ms Venus said...

شوفت الفيديو يا قطة

وبصراحة فرحت وقولت معقولة الاقى حد فى الحكومة كده ؟


بس بردو قلقت وقولت مادام عنده ضمير وناوى يشتغل صح ويراعى ربنا مش هيستمر


ربنا يستر بقى


وياريت الكل زيه ادينا بنتمنى

بس تفتكرى هيحصل ؟


تحية ليكى يا قطة

Anonymous said...

بلد الوهابيه باى حق تفرض وصايتها على المنطقه
مقدم برامج فى التيلفزيون اللبانى هو على سباط يقدم برنامجا خفيفا عن الطالع
ويذهب للعمره فتقبض عليه مايسمى بهيئة الأمر بالمعروف ويحكم عليه بالعدام بتهمة ممارسة الشعوذه
طبعا فى لبنان وليس فى السعوديه يذاع البرنامج
ولا اعرف مال اهلهم فى السعوديه

AHMED SAMIR said...

ياريت يفضل على كدة

Tamer Nabil said...

ازيك ياقطة اخبارك اية معلشى غبت عنك الفترة اللى فاتت اكمنى كنت وخد اجازة من النت من 12 الشهر اللى فات ولسة راجع امنبارح


-
الرجل دة هيقول اية غير كدة حتى لو عارف من جواة انة غلط بس مفيش حد غلطان هيقول على نفسة غلطان


وانا معاكى ياريت كل مسئول ينزل ويشوف بنفسة الحال ازى ماشى

مع خالص تحياتى

ELVIRA said...

المهم يشوف المدارس اللى فى الأرياف هى دى اللى فيها بلاوى كتير من كتر الإهمال

Anonymous said...

تابع
ياقطه الم تلاحظى انه مصطحب معه اعلاميين...بغرض الفرقعه الأعلاميه وممارسة التجريس
المجرم القاتل فى دوله محترمه تحفظ كرامته عند التعامل معه بعد القبض عليه وليس كما عامل الوزير ناظر مدرسه ربما كان اكبر منه سنا مهما كان مقصرا
هذه بلطجه واساءة استخدام للسلطه
اعتقد ان من سموه وزير التعليم والداخليه لم يخطأ

Anonymous said...

تابع
نقطه اخرى تغيب عن اذهان الكثيرين
هل يحتاج الأمر لأن يمر الوزير شخصيا على كل مدرسه لضبط الأهمال؟
اين كل مستويات الوزاره والمفتشين و....و....و...الخ
اذا كان قد اصابهم خلل فالأولى اصلاح الدار من الداخل
ثم ان هذا الخلل مسؤول عنه الوزير الذى هو منصب سياسى لرسم السياسات وليس التفتيش على دورات المياه
التى لها ولغيرها موظفون
انا اتعجب من الذين يعجبون من هذا الخلل الفاضح الذى تبرزه هذه الزياره

ايـــويـة said...

ايوة كدة بوست جامد

انا عايزة اقتبس جملة واحط علساها بالبونط العريض

والام اما مقتنعة انها عورة وبالتالى بتخرج جيل فاشل

elmasryeffendi said...

عزيزتى قطة الصحراء
هو فعلا وزير جدع و هايعمل حاجة لانه مش هايخاف من الظلاميين و جعجعتهم مش عشان هو ابن زكى بدر اللى اتظلم كتير بتشويه سمعته مع انه افضل من تعامل مع هؤلاء الظلاميين و لكن ما ادهشنى هو كيف تكون الزيارة مفاجئة مع وجود الكاميرات و هل لم يصل الخبر لادارة المدرسة ؟ المهزلة بقى فى السيد المدير اللى فاكرها هيصة و جعجعه كعادة اصحابنا بتوع الذقون و الاخوان بس مع مين يا بابا، و الغريب المظاهرة الممولة من الاخوان لان اكيد ادوا العيال دى 20 جنيه لكل واحد عشان يهيص شوية ، حاجة اخر مسخرة و مهزلة حقيقية منه لله عتريس مدمر مصر الحديئة اللى امم القصور و المدارس لتنتج هذا المسخ من التعليم

تحياتى

Kontiki said...

قطة
مش حكاية وزير لسة ماسك يمر ويدى جزاءات لان دة مش حيمنع تكرار الخطأ
حكاية منظومة قانون و التزام كاملة غايبة غياب ضمير المدرس واهمال كل المسئولين حالة غياب ضمير كاملة و انعدام ولاء للبلد وكل واحد بيدور على كام مليم حيدخل جيبة اخر النهار من الدروس وطلبة متعجرفين ونموذج لاهمال اسرهم الثرية و سوء تربيتهم ... الخ
صدقينى مرور الوزير وجزاءاته غير كافية لصحوة ضمير ميت.

Tears said...

التعليم عايز معجزة عشان يتصلح

شوفتى المدرسة اللى فى الاسماعيلية اللى قامت فيها حريقة و اكتشفوا ان السبب ان اربع اولاد سن
16-18

كانوا بيحضروا مولوتوف للخناقة فالبنزين ولع فيهم؟

طيب طلبة من عينه اللمبى كده متوقعه يعلموهم ايه و ازاى؟

ايـــويــة said...

معلش انا اسفة على الاخطاء الاملائية في الكومنت السابق بس انا هاكتبه كمان مرة من بعد اذنك

بوست جامد

انا عايزة اقتبس جملة واحطها في البنط العريض

والام اما مقتنعة انها عورة وبالتالى بتخرج جيل فاشل

-----------

يعني لو كانت المواجهة مع بس مع الذكور هتبقة سهلة ولكن وللاسف بيلاقو مساندة من الاناث اللي هم بنفسهم ربو اجيال ذكورية من النوع دة واي نقد للذكور هتلاقي اناث بوققو بموقف ذكوري دفاعا عن التربية بتاعتهم

---------

حضرة الوزير النشيط ربنا يكون في عونه بس لو يلاقي مساندة من الحكومة

Desert cat said...

أحمد.خ
امال نربيهم على المؤامرات ؟ واللى رافض العقاب يروح للعيال يحتجوا له

Desert cat said...

قلــ"بـــلال"ــــــب فارس
هو فى حد بيحترم نفسه ويتخفى على خيئة قطاعين الطرق ؟ واللى محكتقرة نفسها دى بتخرج اجيال عاملة ازاى غير اجيال فاشلة ومنحطة ؟ انا علاقتى ايه بامك واختك المحجبات ؟؟
ده مش كلام ناس عاقلين

Desert cat said...

karim
يمكن يبقى قدوة لغيرة من الفاسدين او اللى بينلوا الصبح فى مواكب علشان يلزقوا فى الكراسى من غير اى متابعة ولا معرفة باللى بيحصل فى الادارات اللى مسؤلين عنها

Desert cat said...

Mai Zamalkweya
ولو انه نقطة فى بحر بس بصبر نفسى واقول مشوار الالف ميل بيبدأ بخطوة

Desert cat said...

Anonymous
الدولة اكبر مستفيد
ولك بفتوى من ينتخب البرادعى فهو كافر بعبرة

Desert cat said...

Anonymous
وهو فى مدير مدرسة بيروح مع بداية الحصة الاولى ؟؟ وهو فى مدرس العاب بيشتغل 3 ×1 ؟ وهو فى مدرسين بياخدوا مرتبات وهما نايمين فى البيت ولما يتعاقبوا يقولوا مرضى بامراض مزمنة ؟
محدش قال المدير يصلح دورات المياه من جيبة بس فى مذكرات بتترفع بالاعطال .. المدير مش فاضى هيرفع مذكرات لمين اصله بيخلص مشاويره قبل ما يروح المدرسة

Desert cat said...

Ms Venus
خلينا متفائلين شوية يا فينوسة
ده انا من الفساد اللى مالى البلد كنت نسيت كلمة مسئول صاحب ضمير

Desert cat said...

Ms Venus
خلينا متفائلين شوية يا فينوسة
ده انا من الفساد اللى مالى البلد كنت نسيت كلمة مسئول صاحب ضمير

Desert cat said...

Anonymous
ولبنان فين من الانحطاط اللى بيحصل عند الوهابيين ده ؟
ماهو السكوت ليهم اللى خلاهم يستفحلوا فى المنطقة وهما الاجرام اللى بيعملوه تحت مسمى الدين مش يستحقوا عليه لما يزوروا اى بلد الاعدام ؟

Desert cat said...

AHMED SAMIR
بتمنى زيك والله يا دكتور

Desert cat said...

Tamer Nabil
حمد الله على سلامتك وسلامة النت

Desert cat said...

ELVIRA
المفروض يشغل الناس اللى عنده فى الوزارة الا اذا كان عاجبه يقضيها كعب داير

Desert cat said...

Anonymous
وليه نسميه تجريس
هو فى وزير بيستقبل هو مدير المدرسة

Desert cat said...

ايـــويـة
اقتبسى اللى انتى عايزاه يا قمر

Desert cat said...

elmasryeffendi
بس ياريت يفضل على الحادل ده
العيال شكلهم فاكرين نفسهم فى رحلة بيضحكة ويهتفوا عموما المسلسل واضح وياريت الوزير يكون قدوة للباقى اللى مستريحين فى التكييف

Desert cat said...

Kontiki
ماهو كل الانحطاط ده حصل ان مفيش من البداية رقابة ولا حد بيسال المدرسين اللى ضميرهم غاب ولا المديرين اللى مش مهم مين يجى ومين مش يجى انت فين وبتعمل ايه بس اتمنى لو الموضوع ده يستمر

Desert cat said...

Tears
ههههههههههههههههه
حلوة اوى طلبة من عينة اللمبى دى
المدارس كلها قلبت لمبى

Desert cat said...

ايـــويــة
ماهى الىل اتربت على انها حقيرة الطبيعى انها تطلع جيل يحتقرها للاسف دول بقوا غالبية فى ظل انتشار قنوات الارهاب الفكرى

malika said...

و كأنا عبيد نساق بالكرباج و لا يصلح لنا غير ذلك و زير سليط اللسان لا يمت بصلة الى التربية و التعليم و بعدين الناس تسقف له ياريت تفكروا بموضوعيه شويه مش كده نحارب الفساد و التسيب
بالبحث عن جذور المشكله و محاولة حلها يكون بداية التغيير مش بالشتيمة و الاهانات