Desert Cat Search
قطه الصحراء: علشان راجل

Sunday, March 28, 2010

علشان راجل

كلمتين ينطبقوا على اشخاص نادرين جداً فى مجتمع زى المجتمع المصرى تحديداً لكن بسمعهم كتير على لسان كل من هب ودب .. يبرر اى عمل قبيح أو فعل قذر لأى ذكر وكأنها الكلمة السحرية فى الهروب من اللوم أو العتاب ومش هقول العقاب .. لأن كلمة عقاب فى مجتمع يجعل من الذكر نصف إله ليس لها وجود
الرجولة من وجهة نظرى يعنى الشهامة ، يعنى إنسان عنده القدرة على العطاء ، عنده القدرة على إحتواء أى موقف مهما كانت صعوبته ، يعنى إنسان عنده إحساس وذوق كلمته سلاحه والاعتماد على الذات هو منهجة

من يناقش الطغاه فى عدلهم أو ظلمهم ؟

أن يتفق مجتمع بأكمله يفعل جميع الموبقات فى الخفاء .. يدور داخل دائرة مغلقة تغلفها المشاكل من جميع الاتجاهات على أن الأنثى فى جميع الأحوال وكل الظروف مخطئة .. لأنها كائن درجة ثانية
ليه خرجت تشتغل ماتسيب مكانها فى الشغل للشباب اللى قاعد على القهوة
مع ان الشباب اللى قاعد على القهوة اصلا مش عايز يشتغل غير وزير هو مش عنده وقت يبدء السلم من أوله ويقبض مرتب مش يكفى مصروف الكيف بتاعه ايا كان بقى

اذا كان القلب نظيفاً لا يمكن ان تلوث الشفاة

يعنى كل اللى بيعاكسو بالفاظ زبالة دول قلوبهم وسخة ؟
يعنى كل اللى بيتحرش فى المواصلات انسان منحط وقذر
لاء يا ستى البنت هى اللى بتستفزه طبعاً
بتستفزه ازاى حضرتك
يعنى واحدة ماشية بميوعة او لابسه عريان
هو فى حد بيمشى عريان ؟
اه البنات اللى ماليه الشوارع
معقول انا بشوف الشوارع مليانة منقبات الايام دى
يييييييه دول اسخم من اللى عريانين
طيب معلشى سؤال
هو انت لو شوفت واحد بيتحرش بواحدة فى مواصلات مثلا هتعمل ايه ؟
واعمل ليه مش يمكن عاجبها ؟
طيب افرض شتمته ومسحت بكرامته الارض ؟
واتدخل ليه لواحدة قليلة الادب البنت المحترمة مش بتعلى صوتها
يعنى لو سكتت يبقى عاجبها ولو اتكلمت تبقى قليلة الادب
طيب واللى قل ادبه عليها ده نسيبه كدا ؟
ايوا تسيبيه علشان هو راجل
عفواً مش هقدر اكتب ردى لانه كلام يعاقب عليه القانون خصوصاً وانا أنثى فى مجتمع جعل من الذكر نصف إله

25 comments:

قلــ"بـــلال"ــــــب فارس said...

السلام عليكم اختى الفاضله
نعم يوجد تخلف كثير عند الناس لانهم يعطون الرجال حريتهم الكامله
ويقبلون من الرجال الخطاء ومن النساء لا
انا معك
واقول هذا عيب كبير على الناس المتعلمين المثقفين
وانا لا اجعل الرجل نصف اله والاسلام لا يجعله نصف اله
بل المراءه نصف المجتمع
. اذا انجبت ولد فقد علمت فرا واذا انجب انثى فقد علمت امه
نعم ان النساء هما نصف المجتمع
واشكر النساء
الذين حاربوا الزمن وخرج منهم مهندسين ودكاترة وخرج منهم علماء اكثر من الرجال والاسلام مع ذلك
ولكن لهم الوقت الكافى فى تربية الابناء
لانه يوجد وظائف للرجال ووظائف للنساء
يعنى مش ينفع للنساء ان تكون قاضى فى المحكمة
كيف تخرج الساعه اثنين بالليل لوحدها ان كان فى قضيه فى المجتمع هذا شئ
وطبعا لا يخفى عليكى
مسلسل قضية راى عاااااااام
ولا ينفع للرجل تربية الابناء
هذا شئ
الشئ الثانى والانا عايز اتكلم فيه
حكايه النقاب
انا لا اقول اليك ان انا ضده او لا فى هذا الوقت
ولكن سااقول ولن اخاف
فاانا ضده هذه الايام ولكن ليس افتخار او اعلن هذا الامر او امسك ميكرفون واقول انا ضده او اكتب موضوع على المدونة واقول انا ضده
ان ارتداء النقاب
سنه عن نساء رسول الله صلى الله عليه وسلم
ولو احد خالف هذا فقد اخفى سنه عن امهات الموننات
هذا الشئ
الشئ الاخير
لا يحق لكى ان تتكلمى على النقاب او على الاسلام او على الدين
او على الاخوان لان الاخوان اصحاب فكر وسطى وعلماء فى كل نواحى الحياه
اما السلفين او الوهابين اذا كنت مختلف معهم فى بعض المواقف التى لا تذكر ولكنى احترمهم احترام كثيرا لا يوجد احترام مثله
فاارجوكى ان تزيلى هذه الصور ارجوكى
حتى نكون مدونين يفتخر بنا الامه العربية والاسلامه
ومدونون ضد الشتائم
لا يلفظ من قول الا لديه رقيب
ياسيدى اشكرك واليك احترامى وتقدير

Tears said...

المرأه ضحية في المقام الأول لغياب القانون و تخلف المجتمع أما الرجل فهو ليس فقط ضحية للأحباط المسيطر على الشارع و تراجع التعليم و الثقافة و انهيار المنظومة الأخلاقية و إحساسه بالعجز و القهر نتيجة عدم وجود عدالة اجتماعية و غياب الديمقراطية, و تفشى الفساد و لكنه أيضا ضحية للأستبداد السياسي المتحالف مع القوى الظلامية

ذلك الاستبداد الذي عمل على الهاء الشعب و تغييب الوعي بترك الساحة لمدعي دين الذين دأبوا على زرع هاجس المرأه و حقروا من شانها و حصروها في وعاء جنسي مثير للغرائز فلم يعد يتعامل معها الرجل على أنها إنسان مثله لها الحق في الحرية و التمتع بالأمان

و لكنه تحول إلى حيوان عشوائي يتربص بالمرأة و لا يرى فيها غير الأنثى المثيرة حتى و إن كانت خيال متشح بالسواد بعد أن حرموا عليها عيشتها فشعرها و وجهها و عطرها و وصوتها و خروجها حرام...أنها ثقافة الكبت و الترويع التي نتج عنها هذا الهياج الذي لا يفرق معه سن المرأة أو ما ترتديه المرأه في عصر ازدهر فيه التدين المظهري فانحطت فيه الأخلاق!

strategicalone said...

اهلا يا قطة
اولا احب الفت نظرك لحاجة وهى ان ليس المجتمع هو الذى حول الرجل الى ما هو علية بل الدين هو من فعل ذلك على اعتبار ان الرسل والانبياء رجال بل ان الله نفسة يعتقد انة ذكر .
وكلما ارتفعت نسبة تدين المجتمع كلما ارتفعت معة فى علاقة طردية نسبة الظلم والفساد الاخلاقى واضطهاد الجنس الاخر
بدليل ان المجتمع قبل ان يدخل فى نفق التدين كان افضل اخلاقياً من هذة الايام السودة
تحياتى

ELVIRA said...

المرأة هى الضحية و لكن صوتها لن يسمع أبدا فأحدى صديقاتى وقريبتى تمت معاكستها و عندما تشتكى لوالدها ( المفترض أنه متفهم وعارف أخلاق بنته) قالها ليه و هو أنتى مش عاجبك ان الناس تبصلك و انك تبقى محط أنظارهم
!!!!!!

أحمد.خ said...

أستاذتى الفاضله إذا كان المجتمع قد جعل من الرجل نصف إله فنفس هذا المجتمع قد جعل من المرأه إلها كاملا للجنس

Ms Venus said...

صدقينى يا قطة الموضوع ده كتير اوى فكرت فيه

كلمة علشان راجل دى كانت بتنرفزنى اوى


لكن تخيلى بقى ان فى بنات وسيدات هما نفسهم راضيين وقانعين للوضع ده ؟


ولما تيجى تكلميهم وتقوليلهم طب انتى فين ؟ ليه ساكتة

تقولى ما هو راجل


شىء محزن

عواصف رملية said...

معلهش انا هاشتم مكانك

دة نفسيته معقدة قوي ونفسه يلبس حجاب علشان يواري بشاعة تربيته

بالاخر يلاقو الدين شماعة سهلة يعلقو عليها تفكير حيواني ناتج عن تربية ام زي الجاموسة واب وي تور الساقية

متابع said...

خلط الدين بالسياسهعقبه فى طريق تطور مصر
من الجارديان البريطانيه
انتشار النزعة الدينية في مصر ترافق مع العولمة مع ما تحمله هذه العملية من انتشار قيم كونية حقوق الانسان التي بات العديد من المصريين يؤمنون بها وهذا بحد ذاته يمثل تناقضا وخلافا كبيرا بين القوى السياسية الليبرالية من جهة والدينية من جهة اخرى على الساحة المصرية ويمنعها من ايجاد ارضية مشتركة.

ويلفت دياب الى ان اغلبية المصريين العاديين المتدينين لديهم نظرة سلبية نحو العلمانية والمصري العادي يعتقد ان العلمانية تتجسد بما قام به مصطفى كمال اتاتورك عند اقامة الجهورية التركية وموقفه المعادي للدين وبل هناك من يعتقد انها تعني الالحاد ولا يعلمون انها تعني فصل الدين عن الدولة وهو ما يطالب به العديد من المتدينين في مصر.

ويرى الكاتب ان هذا الفهم الخاطىء للعلمانية في مصر يمثل عائقا امام اقامة مجتمع ديمقراطي في مصر.
جمال مبارك

تسعى المعارضة الى منع جمال من وراثة ابيه

ويلفت الى ان هناك شرائح واسعة من المجتمع المصري رغم تدينها ترفض وصول الاخوان المسلمين الى الحكم حتى عبر وسائل ديمقراطية بسبب خوفها من امكانية سيطرة حكم ديني شمولي متطرف على مصر.

ويدعو الكاتب القوى العل

karim said...

قطنى العزيزة كل ماتقولينة صحيح, زلكن لا تستطيعى ان تنكرى ان هناك فعلا بنات و ستات بيستهبلوا فى لبسهم والا يام اللى جاية علشان الحر هاتثبيتلك اكتلر مع انى عارف انك عارفة, ومش لازم يكون عريان يعنى لو لازق عليها و ماسك فيها لدرجة انك تسالى نفسك ازاى بترتدية دة شىء عادى , فى مجتمع يعانى حرمان و كبت فى اشياء كثيرة و خصوصا الجنسية من اللى بيشوفة من النت و الفضائيات الخ.
يبقى لازم الناس نفسهم يكونوا فاهمين كدة و يحافظوا على نفسهم على الاقل و يلموا نفسهم, اديكى داخلى على شم النسيم انزلى الشوارع و عند النوادى و الحفلات اللى بتتعمل و الرحلانت وشوفى اللهدوم بتكون ازاى دة لو عرفتى تفرقى بين الهدوم و الجسم من بعض, انا مش بقول ان البنات و المراءة هى السبب فى كل شىء طبعا لا, لكن تتحمل جزء كبير نتيجة الثقافات المكتسبة من الخارج اللى مطلعة دينا, كل شىء فى بلدنا ما هو الا انحراف فى السلوك ايا كان نوعة,تحياتى

elmasryeffendi said...

عزيزتى قطة الصحراء
معك كل الحق فنحن مجتمع ذكورى بحت و لكن ما يضاقنى هذه الايام هو ان معظم هذا الكلام ايضا يرد على لسان سيدات و ظهر ذلك حتى من خلال استطلاعات تليفزيونية بالشارع تجدى السيدات هن من يتهمن البنات للاسف المجتمع انكفئ على نفسه و السيدة الوهابية الجديدة اصبحت اخطر من الرجال لان بداخلها كم هائل من القذارة و النفسنة و الحقد على كل ما هى انثى مثلها

تحياتى واشكرك على تعليقك و زيارة مدونتى المتواضعة

متابع said...

اعادة النظر فى النصوص الموروثه بدا
علن علماء فقه ملسمون أن فتوى أصدرها ابن تيمية قبل أكثر من سبعة قرون والتي اعتمدتها بعض الحركات المسلحة لتعليل العمليات الجهادية "لا يمكن استخدامها في زمن العولمة الذي تحترم فيه حرية العقيدة وحقوق الإنسان."
وجاء في البيان كذلك أن مع قيام دول بأنظمة مدنية تحافظ على الحقوق الدينية والعرقية والقومية، ينبغي أن يُعلن العالم برمته "دار سلام وتسامح وتعايش".

متابع said...

اعتقد ان تعليق المصرى افندى يبستحق التامل
نعم الأنثى الوهابيه الجديده التى ظهرت بيننا فجاهتكره نفسها نتيجه لما استقر فى وجدانها من الشيوخ اياهم عن دونيتها واسقطت هذا على بقية بنات جنسها
ونتج عن ذلك هذا التركيز على جسد المراه مما تحول فى خيال المراهقين من اى سن الى لعبه جنسيه
والغريب ان تظهر المراه الوهابيه بيننا بينما تجاهد اختها فى الخليج من اجل كرامتها كانسان وتتلقى تهديدات بالقتل
فكما ترين الموضوع مركب وليس بسيطا

Desert cat said...

قلــ"بـــلال"ــــــب فارس
ما تخرج الساعه 2 لوحدها والساعه 3 كمان هو الخروج حلال عليك وحرام عليها ؟؟ لو ابنك بيموت او والدتك واقرب حد ممكن ينقذه هى دكتورة هتسيبهم يموتوا علشان الدكتورة مش تخرج لوحدها الساعه 2 بالليل ؟ ..

Desert cat said...

ثانياً بقى والاهم ان دى مدونتى وانا حرة فيها .. احط صور للسلفيين اتف على السفيين والمنقبات بيتى وانا حرة فيه اعمل فيه اللى يعجبنى مش اللى يعجبك انت

Desert cat said...

Tears
وما هو الحال لو كل الاناث اختفت من المجتمع ومش لقيوا حد يتحرشوا بيه ويقلوا ادبهم عليه ؟؟
اعتقد ان السفالة لا تتجزأ وبالتالى مش بعيد يتحرشوا ببعض

Desert cat said...

strategicalone
بالظبط لو رجعنا لمصر الليبرالية الجميلة مش كان موجود القذراة اللى موجودة دلوقتى بعد انتشار موجة التدين الظاهرى

Desert cat said...

ELVIRA
انا شايفة ان سكوت البنات هو السبب فى اللىب يحصل ده يعنى لو واحد حاول يقل ادبه المفروض انها تلتفت له باللى فى رجلها بدل ما تسمع رد زى اللى اتقالها مش عايزة الناس تبص لك وتبقى محط انظار يبقى ما يتكلمش لو لاقدر اله رجعت له فى يوم مغتصبة ماهو سلبى من البداية

Desert cat said...

أحمد.خ
بس فى فرق بين انك تبقى نصف اله مميز وبين انك تبقى الها كاملا وتتعامل على انك كائن درجة تانية

Desert cat said...

Ms Venus
ماهو انا غالبا يا فينوس لما بلاقى حد منحط برجع اللوم على امه اللى علمته انها عورة وحقيرة ومواطنة درجة تانية علشان كدا خارج من البيت يعامل اى انثى على الاساس ده صدقينى المجتمع ده مش هينضف غير لما الستات اللى مريضة فى عقلها دى تختفى

Desert cat said...

عواصف رملية
فعلا البيت هو الاساس لانه معرفش يربى ولان الام ربته على احتقارها

Desert cat said...

متابع
المصريين يعتقدوا ان العلمانية هى الكفر شعب بلا ثقافة مستنين منه يتقدم ويتطور ازاى ؟؟

Desert cat said...

karim
والرجالة بقى مين بيختار لهم لبسهم علشان تختاروا البنت تلبس ايه ومش تلبس ايه ؟؟
وعلى اى اساس تقدر تحدد ان اللبس ده محتشم من عدمه ؟؟ طب ايه رايك فى المنقبة اللى بتلبس عباية مقسمة وظاهره كل مفاتنها ؟؟
وازاى راجل طول بعرض مش قادر يحكم نفسه لمجرد انه شايف واحدة لابسه لبس من وجهة نظرة غير محتشم حتى لو عريانة ؟
يعنى اعتبر ده اعتراف ضمنى بانه حيوان ماشى ورا غريزته وان الست اقوى منه وبتقدر تتحكم فى نفسها ؟؟
ماهى برضه بشر وممكن تشوف واحد وتفتن بيه وبالرغم من كدا مش بتعاكس ولا بتتحرش ولا عمرنا سمعنا ان واحدة اغتصبت واحد .. اذن طالما ده باعترافكو يبقى من حق الست تحكم البلد دى طالما رجالتها عبيد لشهواتهم

Desert cat said...

elmasryeffendi
ماهى السيدات دى شايفة نفسها حقيرة
علشان كدا بتطلع للمجتمع شخصيات وسخة تقرف الناس فى عيشتها

Desert cat said...

متابع
للاسف احنا بنرجع لورا بسرعة الصاروخ وبنحاول بكل ما اوتى من قوة نثبت جهلنا بالاستشهاد بقوانين من ايام الجاهلية مش ابن تيمية بس

Desert cat said...

متابع
اعتقد ان اللى اتربت على انها حقيرة مش هتطلع للمجتمع شخص محترم مشكلتنا التقليد بغباء دون فهم لذلك موجود بينا النماذج المغيبة دى ولا اعلم من ترى فى نفسها عورة وانها اتخلقت علشان تبقى خدامة للراجل بتخرج من بيتها تعمل ايه