Desert Cat Search
قطه الصحراء: وهكذا اصبحت المخدرات دليل البراءة

Wednesday, March 17, 2010

وهكذا اصبحت المخدرات دليل البراءة

فوجئت بل فوجعت مثلما فوجئ الملايين من اهل مصر الحروسة بخبر الغاء حكم الاعدام عن الـ10 أفراد الذين قاموا بخطف سيدة كفر الشيخ من منزلها وتناوبوا اغتصابها فى الزراعات ومش بس كدا دول كانوا كمان بيعزموا اصحابهم عليها على اساس انهم بيوجبوا معاهم بكوباية شاى مثلا او كوز درة مشوى .. وبعد ان جاء حكم محكمة الجنايات رادع وهو الإعدام شنقاً وبالرغم من الحكم ألا انه لا يزال مسلسل التحرشات والاغتصابات شغال ومش هنوصل للحلقة الاخيرة الا بخصى كل واحد فاكر رجولته تكمن بين رجلية .. إلا ان الجماعة الرجالة اللى اتحكم عليهم بالاعدام بعد عملتهم المهببة تقدموا بنقض الحكم والغريب والعجيب والمذهل قبول النقض وهو ما يعنى التعامى العمد والمتعمد عن بشاعة الجريمة ... المشكلة بالنسبة لى لا تكمن فى قبول النقض من عدمه .. لكن المشكلة فى الاسباب اللى على اساسها تم قبول النقض وهى القصور فى التسبيب والفساد فى الاستدلال الجملة اللى اصبحت موضة الايام دى فى محكمة النقض ونشوف بقى النكتة الجامدة اوى من دفاع المتهمين ؟

وقال دفاعهم إن المتهمين كانوا تحت تأثير المواد المخدرة وقت ارتكاب الجريمة، كما أن الضحية هى التى دفعتهم لارتكاب الواقعة لما كانت ترتديه من ملابس. وأضافوا أن الجنايات تأثرت بالرأى العام ووسائل الإعلام فى تلك القضية فشددت العقوبة عليهم.

طيب يا حضرة القاضى المحترم يا اللى قبلت النقض نظراً لهذه الأسباب المنطقية والموضوعية جداً
هى المخدرات دلوقتى بقت دليل براءة ؟؟
الست اتخطفت من بيتها تحت تهديد السلاح .. هو الواحد مش المفروض انه بيته ده المكان اللى بيحميه ؟ يعنى يلبس فيه اللى هو عايزة ؟ ازاى الست اغرتهم ؟ بملابسها ؟ ولا بعتت لهم هاتف يوصف لهم ملابسها وهى فى البيت ؟
لو الجريمة دى حصلت لزوجة المحامى ياترى كان اترافع وطلع الاسباب الواهية دى ؟
لو حصلت لزوجة القاضى كان قبل النقض بناء على الاسباب الزبالة دى ؟
وبعد ان اصبحت المخدرات مبرر لانقاذ المجرمين من العقاب يبقى على كل المجرمين والحرامية والبلطجية وقتالين القتلة يتقدموا بجواب شكر لتجار المخدرات لأنهم هيكونوا فيما بعد المنقذ ليهم من حبل المشنقة .. وعلى كل انثى ان ترتدى كامل زيها وهى فى بيتها ولو حد خبط على الباب قبل ما تفتح تعمله تحليل دم علشان تعرف اذا كان تحت تاثير المخدر من عدمه لانه لو تم اختطافها تحت تهديد السلاح وتناوب 10 فحول عليها الاغتصاب برضه هى الغلطانة علشان تقعد براحتها فى بيتها ازاى .. هى يعنى مش كفاية انثى كمان تلبس اللى هى عايزاه فى بيتها ده ايه الستات الطماعة دى ده ايع الستات اللى تستاهل الخطف والاغتصاب دى

26 comments:

متابع said...

فساد الدوله الدينيه للمتوهمين
يستنتج الشيخ بديهية اقرب الي الفكاهة السوداء ـ كلما كان الحاكم اقرب الي الحكم بما انزل الله كان حكمه اقرب الي النزاهة والاستقامة ـ لان خشيته من الله تحول بينه وبين اي لون من الوان الطغيان ( ص 219 ) .

فساد في الأرض

وهنا اقول لك ايها الشيخ للآن كل من حكموا باسم الدين في تاريخنا الاسلامي حكمهم مرصع ببصمات الاستبداد ولم يجدوا من يحاسبهم فعاثوا في الارض فسادا وانت سيد من يعرف نظم الحكم التي استخدمت الاسلام سلاحا لحماية فسادها ولن نذهب بعيدا فالخليفة خليفة الله في ارضه وارث النبوة فمن يمكن ان يعارضه ـ ولن تنسي من سمي نفسه بالحاكم بامر الله ـ والمعز لدين الله حيث كان الخليفة يجلس وهو صاحب الرأي الذي لارأي غيره والسياف الي جواره حيث تجتمع سلطة الحكم والدين في شخص واحد فتكون كل الرقاب مهددة بالسيف بحجة تطبيق الشريعة بالامر الالهي ـ فتحسس راسك ايها الشيخ في دولة الخلافة ـ ولا تنس في عصر الامويين قال معاوية بن ابي سفيان ـ الارض لله ـ وانا خليفة الله ـ فما اخذت فلي وما تركته للناس فبفضل مني . وفي عصر العباسيين قال ابو جعفر المنصور مخاطبا الرعية ايها الناس لقد اصبحنا لكم قادة وعنكم زاده . نحكمكم بحق الله الذي اولانا سلطانه فأنا خليفته في ارضه وحارسه علي ماله . والامثلة لاباطرة سفك الدماء باسم الاسلام لاتحصي ـ ما راي الشيخ في منصب انسان ( الحاكم ) بموجب الحق الإلهي يصبح تجسيدا لله علي الارض او انه الملك الاله . الرأي واضح والامر لا يحتاج الي تعليق وهذه هي ماساة الاسلام السياسي في عصرنا .

malika said...

بجد مش لاقيه كلام أقوله غير اننا في زمن الحقائق المقلوبة ده ان صح استخدام حقائق
احنا دولة بجد منهاره تماما

misha و lado said...

اصبحت الوحشية تغلف حياتنا
بينما اللامبالاة تغلف النصف الاخر

Ms Venus said...

آه يا بلد

AHMED SAMIR said...

مبدئيا....المحامي وظيفته انه يكون محامي
يعني ما ينفعش نلومه انه بيدافع عن اي حد لأن دي وظيفته...شغلته...و اي حد حتى لو كان سفاح من حقه ان يكون له محامي...دة حق من حقوق الإنسان
ثانيا:
احنا مش عارفين ملابسات القضية...و دة مش معناه اني ابرىء الناس دي...انا مش عارف...و انتي عارفة كويس قوي الشرطة المصرية لما بتحب تقفل قضية و خاصة لو قضية كبيرة زي دي...بتلبسها لأي حد بلا ادلة او مستندات
لماذا لا نعطي لهؤلاء الاشخاص الحق في النقض فأذا ثبتت التهمة فلابد من شنقهم بميدان عام
واذا ثبتت براءتهم فهنيئا لهم نجاتهم من حبل المشنقة

Mai Zamalkweya said...

القضاء بقي مخترق بالثقافه الوهابية
الحادثه علي ما اتذكر انها كانت واقفه في البلكونه و هما شافوها طلعوا اخدوها من بيتها
فطبعا لما المحامي يقول كانت لابسه ملابس دفعتهم لارتكاب الجريمة فلازم يبقي اللوم عليها لانها واقفه في البلكونة بملابس مثيره لازم كل واحده وهي واقفه في البلكونه تبقي متكفنه بالخيمه السودا علشان محدش يبص من الشارع علي بلكونتها ويشوفها وتثيره
بشاعه الحكم ده في ان دلوقتي مش هتبقي في واحده مأمنه علي نفسها في اي مكان حتي وهي قاعده في بيتها هتبقي خايفه ومرعوبة لان لو اي حد طلعلها و خطفها و اغتصبها هتبقي هي الغلطانه

Mai Zamalkweya said...

فعلا زي ما كنت متذكره الاحداث كان في فرق و هي كانت واقفه في البلكونة

ترجع وقائع القضية إلى سنة 2006 حيث كان 4 من المتهمين مدعوين على حفل زفاف بقرية الحمراوي بكفر الشيخ وشاهدوا فتاة تقف في شرفة المنزل المقابل لحفل الزفاف.

فأشار المتهمون إلى المجني عليها للنزول إلى أسفل المنزل وعندما تأخرت قام المتهمين بالصعود إلى منزلها وإقتادوا الفتاة تحت تهديد السلاح وأخذوها في ميكروباص إلى منطقة زراعية وتنابوا الاعتداء عليها.

شاهد الفيديو
وعندما قام بعض الأهالي بمحاولة إنقاذ المجني عليها أطلق المتهمون النار عليهم .
وقام المتهمون الأربعة بعد ذلك بالاتصال بـ 6 من أصدقائهم وحضروا للإعتداء على المجني عليها تحت تهديد السلاح،


تقريبا القاضي اخد بكلامهم اللي مسمعش بيه قاضي المحاكمه الاولي كانوا بيقولوا "احنا ميهمناش الاعدام بس علشان واحده تموتوا عشره " طبعا العشره دول احسن مليون مره من واحده مكنتش لابسه الخيمه بتاعتها

Migo Mishmish said...

عارفه يا قطة زمان كنت مضايقه من كلمه ان المرأة عاطفيه علشان كدة مش عايزنها تبقى قاضيه
انما لما لاقيت ان القضاه عندنا بيفكروا باللي بين رجليهم قلت احسن الف مرة ان الستات ما اتوسخش بالعمل في القضاء
Love,
MishMish

Kontiki said...

بصى يا قطة خدينى على قد عقلى للاخر لا انا ولا انتى كنا موجودين عشان نصدر احكام مشوفناش حاجة بعنينا انما الست واقفة فى البلوكونة يمكن يتغمز و تشاور و تتمايص و تتمرقع وبتقول انها عاوزة كدا ولما منزلتش طلعولها هم ! مثلا يعنى
وهنا بقى النقطة المسألة حقوق وحريات وقانون وسخ و عرة ومينفعش ولازم يتغير كله ازاى بفرض انها عاهرة وفاتحة بيتها للدعارة مش من حق اى ابن و*** انه يطلع يجرجرها و ينزلها تحت تهديد السلاح
عاهرة و شغالة بالفلوس مش من حق حد انه يغتصبها عنوة وتحت التهديد
دة مثلا يعنى على فرض انها واحدة دى مهنتها
نيجى بقى انها مش كدا وانها واقفة فى بيتها انشاء الله لابسة ايا كان ولقت شوية شبان ادلعت حبتين والمخدرات على الصياعه على غياب القانون قاموا طالعين جروها من بيتها يبقى دى جريمة فى حد ذاتها
ونلاحظ ان دفاع الاهالى عنها بيقول انها غير معتادة البغاء ومع ذلك ضربوا عليهم نار يبقى دى جريمة تانية
اخدوها واداروا وعملوا اللى عملوة يبقى فاقوا بقى من المخدر وبيتصلوا بصحابهم يعزموهم على الوليمة يبقى خلاص كدا ثبتت عليهم
كذا جريمة و يتحاسبوا عليهم
مش يعدموا عشرة عشان واحدة لا
يعدموا عشرة عشان الجرم ميتكررش ان شاء الله مع واحدة مهنتها ممارسة البغاء
المشكلة لا مؤاخذة قانون وحقوق وحريات فى بلدنا المنقبة بيقولوا عليها خضرا الشريفة وساعات بيقولوا عليها ش***** و بتتدارى و المحجبات كلهم دلوقت لابسينة عشان هو دة اللى طلع فى المقدر و عشان يجوزوا و عشان فى ناس وسخة بقت بتحكم على البنت من الطرحة يبقى باختصار مش مسالة لبسها هى اللى خلتهم يعملوا كدا دلوقت مقاييس الشرف انهارت وبقى مجتمع فية وحوش عشان مفيش قانون حتى لو كانت عاهرة مش من حق حد يغتصبها تحت تهديد السلاح و يقول اصلها كانت لابسة دلوقت فى محاكمات وقضاه اسفة جدا على اللفظ معر***.

عواصف رملية said...

لاء طبعا ميصحش يعدمو عشرة علشان وحدة واكيد لازم كل مرة يعدمو وحدة علشان عشرة

طيب فين الدين؟ فين الاخلاق؟ فين مخافة ربنا؟

طيب بلاش بس فين الاية اللي بتقول ولا تدخلو البيوت من غير ما تستاذنو وياذن لكم؟

طيب كمان مرة نقول بلاشـ. وبكدة الدين اعلن الافلاسـ

عوف الأصيل said...

يا قطة الصحراء خلي بالك

عقوبة الإعدام ليست شئ سهل ، ونحن ننادي بإلغاء عقوبة الإعدام .

و كيف يزهقون أرواح عشرة بسبب واحدة ؟ونحن لا نعرف حيثيات الحكم و لسنا قضاة
ممكن يخصوهم أفضل

Desert cat said...

متابع
للأسف غباء الناس هو اللى وصلهم للى احنا فيه ده عدة الوعى بالحقوق وكل واحد عين من نفسه خليفه لله يقدسوه حتى لو داس على رقابهم لازم تكون دى النتيجة

Desert cat said...

malika
تصديقا على كلامك هستعير جملة عادل امام واقولك احنا فى زمن المسخ

Desert cat said...

misha و lado
طيب والنص اللى بيعانى من الاتنين يروح فين او يعمل ايه ؟

Desert cat said...

Ms Venus
كلنا مجوعين من البلد دى لكن مفيش حل غير فى التغيير والتغيير مش سهل يا فينوس لازم نستحمل

Desert cat said...

AHMED SAMIR
يعنى يا دكتور لو انت دكتور شريف وجت لك فتاة ليل قالت لك عايزة اعمل اجهاض علشان الفلوس هتبيع نفسك ؟
ملابسات قضية ايه اللى بتتكلم عنها حضرتك ؟
يعنى تحريات المباحث ادانتهم ؟ وجميع الجيران اللى كانوا شهود على الواقعة ولما اتدخلوا لانقاذها ضربوا عليهم نار ادانتهم ؟ واللى بلغ عنهم صديقهم اللى كانوا بيعزموه عليها واللى يبقى الضحية جارته ادانهم ؟ وفى الاخر تقولى ملابسات ؟؟؟

Desert cat said...

Mai Zamalkweya
ايوا طبعا يا مى هى غلطانة لانها واقفة فى بلكونة بيتها .. تقف ليه ؟ مش كفاة انثى كمان تقف فى البلكونة ؟

Desert cat said...

Mai Zamalkweya
علشان واحدة يعدموا عشرين مش عشرة ده لو احنا فعلا فى بلد محترم مش بلد يحكمها قانون سكسونيا والجماعة كانوا شاربين والمخدرات يا حرام لعبت بعقولهم وكمان هى واقفة فى بلكونة بيتها حتى لو فى اوضة نومها برضه غلطانة تعيش فى بيت المفروض انه امانها

Desert cat said...

Migo Mishmish
لما بسمع حد بيقول المراة عاطفية قولت الحمد لله انها مش مزورة ولا مرتشية ولا بنشوف فاضيح لستات زى اللى بنشوفها لقضاه المفروض انهم محترمين كل يوم والتانى فى الجرايد

Desert cat said...

Kontiki

اولا كلامك كله منطقى جدا وانا متفقة معاه
لكن مصر خلاص مبقاض فيها قضاء
افتكرى معايا حادثة هبه ونادين واول كلام اتقال فى الجرايد انهم منحلين وانهم بيشربوا مخدرات وانهم بيجيبوا ولاد يسهروا معاهم واللى عمل فيهم كدا احد العشاق .. يعنى بدال ما يواسوا الناس فى مصيبتهم اغتابوا بناتهم وضربوا بسمعتهم وشرفهم عرض الحائط .. كل ده ليه علشان اسمهم بنات .. سيدة كفر الشيخ بقى مش اتقلت زى هبه ونادين ومش ينفع يقولوا عشيقها اللى عمل فيها كدا .. وبالتالى السبب اللى ممكن يخرج المجرمين او يخفف عنهم الحكم ايه ؟ هو انها اغرتهم بملابسها .. ده رد الفعل الطبيعى طالما المجنى عليها ست يبقى لازم تتحول لجانى فى لمح البصر .. فى الدول المحترمة اللى بتشتغل فى الدعارة لو اشتكت ان حد حاول يتحرش بيها بيتم معاقبته علشان كدا متلاقيش الانحطاط اللى موجود هنا ده .. لكن فى مصر ام الدنيا الست يتم اغتصابها ويعزموا بعض عليها وفى الاخر يولوا لك اصل لبسها .. مش قادرة اقول غير ان يارب اللى يبرر الجريمة يشوفها فى اقرب الناس ليه علشان يحس بالوجع

Desert cat said...

عواصف رملية
هما كانوا شاربين علشان كدا نسيوا الاخلاق والدين وعلشان برضه كانوا شاربين يبقى هى اللى المفروض تتعدم كان لازم تقعد فى بيتها والناس شاربه مخدرات ماشية فى الشارع

Desert cat said...

عواصف رملية
فى ظل قانون ساكسونيا اعتبرها اتلغت

متابع said...

المستشار عادل فرغلى نائب رئيسش مجلس الدوله
النقاب هو السبب فى منع المراه من الأشتغال بالقضاء
كشف فرغلى أن أحد الأسباب الرئيسية لرفضه تعيين المرأة فى الوقت الحالى هو زيادة عدد المنتقبات بين الشابات المصريات، مما قد يسمح بالتحاق منتقبات بالسلك القضائى ويسمح أيضا بارتداء القاضيات النقاب بعد سنوات من التحاقهن بالوظيفة، وهو ما لا يمكن قبوله على قاضية يتوجب عليها الجلوس على المنصة وتداول القضايا مع زملائها الرجال لساعات طويلة.

وأردف: «لا يجرى القضاة المداولة فى قاعات المجلس بل فى أماكن مختلفة وأحيانا تمتد المداولة فى قضية واحدة لأكثر من 10 ساعات، ومن المستحيل أن تقبل سيدة مصرية متزوجة العمل فى مثل هذه الظروف، خاصة إذا كانت مغتربة أو مقيمة فى محافظة غير التى تعمل بها، فهى بذلك ستكون أمام خيارين أحلاهما مر.. أن تهتم بعملها وتخلص له وتهمل أسرتها، أو العكس فلا تتطور مهنيا ولا تكتسب الخبرة القضائية، علما بأن رعاية الأسرة لا تقل قداسة عن القضاء.

عواصف رملية said...

من بعد اذنك يا قطة الصحراء

الى عوف الاصيل: معاك حق, احنا مش عارقين حيثيات القضية بس وحياتك لما عشر فحول يخطفو امك من البيت ويتناوبو على اغتصاب اختك متنساش تيجي تقول لينا على حيثيات القضية

Anonymous said...

اعدام مقدم برامج
حاجه ةمذهله
مقدم برامج فى لبنان هو الحسين سيبات قدم برنامجا عن التنبؤ بالمستقبل
وذهب للعمره فى مملكة التخلف والعار الحضارى فقبض عليه المطوعون او البوليس الدينى وقدم للمحاكمه بتهمة الشعوذه وممارسة السحر فحكمت عليه محكمة المدينه بالأعدام بضرب عنقه طبعا فاستانف الحكم فى محكمة الأستئناف فى مكه فامرت محكمة المدينه باعادة النظر فى حكمها المتسرع ولكنها اى مجكمة المدينه ركبت دماغها وايدت الحكم
حاجه غريبه مالهم ومال مايحدث فى دوله اخرى

Anonymous said...

Any body knows what happened to Hassan El Helali's (higab niqab) blog??? I can't find it. Also, I can't find it on facebook.

Marika