اليوم العالمى للمرأة == اليوم العالمى للنكبة


اى امرأة هذه التى حدد لها مؤتمر باريس النسائى الأول 8 مارس عام 1945 ليكون يومها العالمى ؟؟

اصدقهم القول بأن هذا الشعار صح 100% فى تلك الفترة الزمنية لأن المرأة كانت فى ذلك الوقت تحتل مكانه مرموقة فى جميع المجالات حتى وان كانت من لم تتعلم فى حياتها أ ب .. ولكن فى يومنا هذا أرى ان هذا الشعار فقد مصداقيته ووجب ان يقتصر على اليوم العالمى للمرأة الغربية التى يعاملها مجتمعها على انها كائن كامل متكامل وليست على أنها عورة .. المرأة الغربية التى عملت رئيسة وزراء ، ووزيرة دفاع ، وترشحت للرئاسة بكل قوة وديموقراطية ..

لا المرأة التى اقنعوها واقتنعت هى بدورها أنها عورة .. بل وتدافع باستماته على هذا الهراء .. ولا تترك فى حالها التى تعرف قدرها وتسرع فى الخطوات من اجل تحقيق طموحها والحفاظ على كرامتها ..

لا المرأة التى يعاملها مجتمعها على أنها مجرد فرج لإفراغ شهوات الذكر مهما كانت مؤهلاتها العلمية وحتى وان كان هو مجرد عواطلى لا يعلم من الحياة سوى ارتكاب الموبقات ما ظهر منها وما بطن ..

لا المرأة التى يعاملها مجتمعها على انها مجرد غواية وفتنة للذكر المغلوب على أمره الذى لا يستطيع ان يتحكم فى غريزته فبمجرد رؤية خصلة شعر منها يثار على نفسه .. وإن صمتت على افعاله التى لا يمكن اغفالها يقولوا بصوا اصل عاجبها .. وان اتكلمت ودافعت عن نفسها وعن كرامتها تلوكها الالسن ويكون اول كلمة يتلفظ لسانهم بها عاملة لها هوليلة ليه دى مش متربية ليصبح شرفها مضغة بين انيابهم وكأنهم يخافون الله فقط من المرأة ولكن التحرش بها والاعتداء عليها وشرفها الذى تلوكه الالسن حلال لهم ... ذلك الشرف الذى تأخذ منه شعوب مريضة ذريعة لوأد المرأة دون احترام لذاتها او عقلها او انسانيتها التى ميزها الله بها تلك الشعوب التى لا يأتى ذكر امراة فلا يترددوا لحظة فى اسالة سم زلق مريض من ألسنة عكرة تتدرب كل يوم على الركاكة والانحطاط فى الادب والاخلاق خوفا من ظهور عجزهم وتفوقها عليهم ويحتموا بعبائه الدين ، والدين من أفعالهم بريئ ...

اليوم العالمى للمرأة التى عملت نهضت بذاتها ومجتمعها حتى وصلت لعالم الفضاء ...

لا المرأة التى يضعون أمامها العراقيل تارة باسم الدين وتارة اصلها عاطفية اوى ومش تقدر تحكم بالعدل لانها بتيجى لها الدورة الشهرية وفى الوقت ده بيكون مزاجها مش ولابد يعنى ولا تتردد اقلام لابد من سحب الرخصة الشرعية لحاملها فى كتابة كلمات مغلفة بورق المحنة ساخنة بدم الجرح مفرغة من عمق التأمل الذى لا يأتى بعد مرور الحدث وبرود الجسد وشروع الجرح فى الإندمال والالتئام على قرحه وجروحه .. وكأنهم ليسوا ببشر

هنيئاً لكل امرأة فى مجتمع محترم بيوم المرأة العالمى .. وكل عزائى لنساء دول العالم الثالث بأيام النكبات المتوالية

Comments

عندك حق دة يوم نكبة في الشرق كله علشان لما توصل النظريات من الغرب الى الشرق بالنسبة لحقوق المراة بتبوظ معانيها لانها اتكتبت علشان تتلائم مع عقول متفتحة ومثقفة تقدر قيمة الانسان وتقدر قيمة المراة كانسان متساوي في الحقوق والواجبات

للاسف النساء الشرقيات "المثقفات" لسن نفس لنساء ولسن نفس لمثقفات الغربيات وعلشان كدة بتبوظ كل حاجة من البدية لم توصل للشرق لان لست "سيمون دي بوفوار" لما كتبت نظرياتها وفلسفاتها عن المرة ومسواتها في الحقوق مع الرجل نسيت تالف كمان كتاب يتلائم مع معتقدات وعادات وتقاليد الشرق واعتقد ان كل حاجة تستند على اراء دي بوفوار لا تنفع الا اذا جاءت بوفوار شرقية والفت وكتبت اراء بصبغة معتقدات شرقية مع اقتباسات الحديث والسنة ويوقع عليها مجتمع ذكوري

وبعدين يلفو بكتابها لب عند البقال
Sahran said…
يا قطة خليني بس أستفسر منك يمكن تلاقيلها جواب ,,,

يعني إذا كانت المرأة ناقصة عقل , والرجل اسم الله عليه كامل الأوصاف ,,, طيب مش المفروض يعني بناء على هذا الكلام إنو الراجل هو اللي يتغطى مش الست ؟؟؟ّّ!!!
يعني المرأة تفكر بعاطفتها , ويفترض إنها أول ما تشوف الرجل تنزل فيه وهاتك يا أحضان , لأنها مسكينة وعقلها على قدها !!!!

بينما الرجل اللي خلقه الله وكسر القالب يفترض إنو ما يتأثر أبداً لما يشوف الأنثى , وكأن شيئاً لم يكن !!!

أعتقد يا قطة بناءً على هذه الفرضية فالأولى أن يتحجب الرجال خوفاً من أن يؤثروا على عقول النساء الضعيفة , لأنهم يا ولداه بيفكروا بعاطفتهم وعقلهم ناقص !!

ولاّ أنا غلطان


تحيااااااااااااااااااتي لك


ودمت سالمة
أحمد.خ said…
أستاذتى الفاضله أن عائد لتوى من رحلة عمل بالخارج وكالعاده أعود مصابا بحاله غريبه مؤداها عدم الرغبه فى الكلام عن الأوضاع هناك ومنها وضع المرأه وذلك للفروق الرهيبه والشاسعه بين مانراه هناك وما يصدمنا هنا حتى أننى بدأت أشك فى تكوين المرأه العربيه والمصريه جسديا وهل هومختلف عن الأجانب الذين لاتصاب نساؤهم بلعنة الدوره الشهريه ولا تصاب بالعصبيه كما أنها جامده وليست عاطفيه؟وهل سنظل فى هذا التخلف كثيرا من الوقت؟وكم من الزمن سنستغرق حتى نخطو خارجين من هذه الغفله؟ياإلهى إرحمنا بالعلم أو بالموت فتراب الأرض أولى بنا
Ms Venus said…
الله عليكى


بجد الله عليكى وعلى قلمك الراقى الجرىء
elmasryeffendi said…
عزيزتى قطة الصحراء
كلامك صح، هذ الكلام لا يصلح اليوم فبفعل الدعاة الجدد و التغيرات المجتمعية اصبح كل شئ من تحت لتحت فالمرأة مقهورة و تاخذ حقها من الرجل بقهره ايضا و التعامل بحدة و هذا لم يكن من قبل بل كان هناك حب و تفاهم و نكران للذات من الطرفين اما الان فقل علينا جميعاً رجالاً و نساءً السلام و البركة فيمن يسمون انفسهم الدعاة او الشيوخ مع ان هذه المصطلحات و الشخصيات الطفيلية المستحدثة لم نكن بحاجة اليها، بصراحة كده البركة فى المملكة العربية الظلامية

تحياتى
karim said…
سيدتى اللى انتى بتقولية دة و بنشوفة كتير بيفكرنى بقاسم امين و هو كان يطالب بحرية المراءة وحقوقها وكنت قد قراءت عن معاناتو مع المجتمع حينها, هنا فى العالم الثالث كل الناس تعانى حتى المفكرين يعانون لكى يرسو قيم جديدة ولكن مع الاسف, انسسى و خد البنسة, احنا عالم بيقلب عيشة فى اليوم و بس انسسى اى تقدم او فكر يكون موجوود. اسف على الاحباط و لكنة واقعى, تحياتى
أحمد said…
مش دول العالم التالت ، و انما المنطقة المنكوبة دى بس
فيه رئيسات سيدات لكثير من دول العالم التالت زى الأرجنتين و شيلى و حتى دول ذات أغلبية مسلمة زى بنجلاديش
http://www.filibustercartoons.com/charts_rest_female-leaders.php
http://www.guide2womenleaders.com/Presidents.htm
العالم كله فى ناحية و العرب فى الناحية التانية
Gurren Lagann said…
انت تستاهلي حضن كبييييير

معلش, متزعليش, مسير الحي يتلاقا, و الأعمي يشوف, و اللي ساجن نفسه يحرر نفسه, و اللي ساجن حد يعقل و يفوق او ربنا يحرقه بجاز

عزيزتي حواء,
انت منّي
و أنا بك
و كلانا لالله, و ذلك الأخير يحرر كلانا من بلانا
فرعون said…
حدانا فى الصعيد الجوانى المراه لا تورث ولا يطلع لها حس وكنت فاكر البندر احسن منينا لكن طلعنا كلنا فى الهوا سوا
Kontiki said…
نشاطركم الاحزان
ونعانى مثلكم نفس المصاب الاليم
:)
Mai Zamalkweya said…
مش كل العالم التالت و م كل المنطقه العربية
في المناطق بس اللي شايفين الفضيلة و الادب في انهم يبقوا مواطنين درجه تانية و انهم يبقوا عوره
عندك في المنطقه العربية
تونس و المغرب و لبنان و الجزائر اكثر بلاد عربية فيها المرأه بتاخد حقوقها وفيها احترام متبادل بين الرجل و المرأه
للاسف مفيش اي امل و انا يأست و عايزه اسيب البلد دي ياما هتبقي نهايتي الجنان او الانتحار
Tarkieb said…
وحياتك ياقطة مش مودي المراة العربية في داهية الا هي نفسها ...ياستي انت نقطة في بحر وحواليكي نساء عايزيين يتجوزو ويستتو ...بلا خيبة ....كل سنة وانت طيبة ....ولا مليون سنة وحلنى بقى
Desert cat said…
عواصف رملية
حتى اللى بتطالب باعلى صوتها فى الشرق صوتها بيروح وبتموت وهى لسه بتصرخ يمكن حد يسمعها وفى النهاية برضه ولا حياة لمن ينادى واضح ان الظلام دائم فى الشرق
Desert cat said…
Sahran
انا متفقة جدا مع وجهة نظرك يا سهران
بس تيجى تقول الكلام ده يقولوا لك ماهو الرجال قوامون على النساء يا حلولى ما فى نساء هى القوامة والراجل نايم طول النهار على ضهره مستنيها لما ترجع اخر اليوم علشان ياخد فولسها وينزل يشترى بيها مخدر ات
تلاقيهم بيزهوا راسهم ويقولوا لك بس الراجل راجل وكانه اله ممنوع تجيب سيرته
Desert cat said…
أحمد.خ
تعبنا من كتر المقارنة لكن يقولوك الاسلام كرم المراة والمراة عايزة تهين نفسها وبامانة مش شايفة اى تكريم فى الجواز اربعه وفى وأدها وهى حية
Desert cat said…
Ms Venus said...
ميرسى ليكى يا فينوسه يا قمر
Desert cat said…
elmasryeffendi said...
اهو محدش بوز الدنيا غير البهايم اللى مسمين نفسهم دعاة دول
Desert cat said…
karim
مش احباط يا كريم ده الواقع بالفعل زى ما قولت لكن لو المراة عايزة حقها فعلا هى اللى هتحرر نفسها مش حد تانى اللى هيحررها
Desert cat said…
أحمد
العرب يثبتوا على مدار التاريخ مدى غبائهم السياسى والدينى وجهلهم بكل مجالات الحياة والغريب انهم فاكرين نفسهم منزهين عن باقى العالم اصلهم مؤمنين وهما بس اللى هيدخلوا الجنة
Desert cat said…
Gurren Lagann
مش عارفه وانا بشوف الكومنت ده حسيت انى عايزة اعيط بجد
مش ممكن يكون حد حاسس اوى بالمرأة الشرقية اللى بتعانى فى مجتمع زبالة زى ده لكن لما شوفت الكومنت حسيت فعلا ان فى امل فى التغيير
Desert cat said…
فرعون
ما يدفونها اول ما تتولد احسن اصلها عار
Desert cat said…
Kontiki
ااااااااااه يا وجع قلبى من المصايب والمعاناه اللى مش حتنتهى دى
Desert cat said…
Mai Zamalkweya
كلنا بنفكر نسيبها يا مى وبعدين ؟؟ معقول نسيبها كدا للجهل يتفشى فيها
حزينة اوى على مصر
Desert cat said…
Tarkieb
فى كتير غيرى بجد
لكن فعلا الغالب دلوقتى اللى عايز تتجوز والمهم عندها ضل الحيطة حتى لو فعلا هو حيطة
انا تعبت بجد وزهقت

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز