لما تعرفوا حقوقكو طالبوا بيها

حضرت بصفتى الأمين الإعلامى المساعد لحزب مصر الفتاة مؤتمر ضم جميع الفئات من المهتمين بالشأن العام وتطرق الحديث لقرار مجلس الدولة منع شغل المرأة منصب قاضية الحوار كان يتسم بالموضوعية وهذا لا يمنع ان هناك من كان متفق قلباً وقالباً مع القرار ولكن حتى هذا الاختلاف ايضاً بموضوعية وحتى الآن كل شئ كان على ما يرام .. إلا أن قامت منتفضة من مكانها وانطلقت كالرصاص العشوائى .. يعنى ايه الست تشتغل قاضى ؟؟ انتوا ازاى دخلتوا مدارس واتعلمتوا ووصلتوا اللى بقى دكتور واللى بقى محامى واللى مهندسة وقاعدين تقولوا الست تشتغل قاضى واللى تستشهد لى بنساء يهوديات كافرات وتقول هما دول عندهم عقل والمصريات لاء ؟ لاء طبعا نساء مصر مش زيهم ولا عمرهم هيكونوا زيهم لان نساء مصر طاهرات عفيفات شريفات وازاى تقارنوا بين يهودية وبين مسلمة ؟ قاطعتها محامية مرشحة لعضوية مجلس الشعب عن مقعد المرأة .. حضرتك مش واخدة بالك انك بترمى الناس بالباطل ؟؟ ردت بعد ان اطلقت ضحكة سخرية يا ست المحامية اليهود دول انجاااااااس يبقى لما تقارنى قارنى بين مصرية ومصرية او اخت ليكى مسلمة من دولة عربية تانية لكن يهودية ده اللى مش هسمح بيه ابدا والساكت عن الحق شيطان اخرس وانا لا يمكن اسمع عن مقارنة مشركة نجسة باخت مسلمة عفيفة ابدا .. ثم ان رب العزة قال وقرن فى بيوتكن ... هنا والتقطت انا اطراف الحديث مع ان مش كان المفروض اتكلم ... انا مش هعلق على كلمة مشركة نجسة مع اننا فى القرن الواحد وعشرين ومفيش حاجة مشرك ونجس بس حضرتك لما تستشهدى بآية قرانية مش تقوليها كاملة اولاً الآية الكريمة تخاطب نساء النبى ؟؟ يا نساء النبى وقرن فى بيوتكن .. وطبعاً حضرتك لا زى نساء النبى ولا هما زيك علشان تقتصى من الآية الكريمة وتدى تعليمات بيها لان ربنا برضه هو اللى خاطبهم بقوله " يا نساء النبى لستن كأحد من النساء " نساء النبى محرم عليهم الزواج بعد وفاة الرسول لكن سائر النساء بتطلق اوا جوزها يموت وتروح تتجوز واحد تانى ونساء النبى الثواب ليهم مضاعف والعقاب ليهم مضاعف ... وكان عندى كلام تانى عايزة اكمله لكن تفضل دكتور محترم وقال لما الست تحترم عقلها وتعرف قدرها يبقى وقتها بس تطالب بحقها ده لو عرفته اصلا
بأمانة عنده كل الحق اذا كان فى العقول دى لسه موجودة بينا وبتدافع عن الغباء والجهل بكل ما أوتيت من طاقة
الست بتاعة وقرن فى بيوتكن مربية أجيال إذ أنها تعمل مدرسة بمدرسة إبتدائية

تعليقات

‏قال عوف الأصيل…
نداء أخير إلى النساء المسلمات ، اللاتي يرغبن في الإرتباط بشاب مسلم مصلي مجاهد ، و ملتزم إسلاميا .أو اللاتي إرتبطن فعلا بهذا الشاب ذو الجبهة المتورمة .

أو النساء اللاتي يردن الإنتقام من زوجهم المرتد أو الغير مصلي أو المتطاول على الذات العلية .
.

يا أيها النساء المسلمات ماذا أعد الله لكن في جنة الذكور ؟

يا أيها النساء المسلمات ما وضع أزواجكن مع الحور العين و أين أنت ستكونون في هذه الحفلة الربانية ؟

لم يذكر القرآن أن لكن رجال حور مفتوليين العضلات لنكاحكن .

هل العيشة السواد مفروضة عليكن في الدنيا و الآخرة ؟
‏قال Ms Venus
انا مسيحية

انا كده مشركة نجسة فى نظرها


طب تقدرى تقوليلى انا ممكن اتعامل ازاى مع واحدة زى دى بتفكيرها ده فى المجتمع ؟


عزيزتى تيرز


صدقينى ما عارفة اقولك ايه

وبالتفكير ده والطريقة دى فاضل لنا 1000 سنة


على ما نقول احنا اهو
‏قال Ms Venus
اسفة يا قطة


غلطت فى اسمك وقولت تيرز لانى لسه كنت عندها فى مدونتها


ههههههههههههه سامحينى


اكرر اعتذارى عزيزتى
‏قال Tears
أزال المؤلف هذا التعليق.
‏قال عواصف رملية…
طيب لما هي عارفة ان "ثم ان رب العزة قال وقرن فى بيوتكن" هي مش بتقر في بيتها ليه؟ وليه جاية تقر في الاجتماع؟

ثم القاضية "اليهودية" بصفتها انثى تنافست امام كفائات الرجال وحصلت على مركزها كقاضية لان كفائتها تفوقت على كفائات ذكور؟

انا معرفش وحدة زي دي ازاي هتفضل تربي وتنتج اجيال فاشلة؟
‏قال Tears
تلك ثقافة القطيع

ده لينك احسن لمقال من اربع سنين بس ياريت تقريه عشان ح تلاقى فيه اللى بتقوليه بالضبط

www.ahewar.org/debat/show.art.asp?aid=81432
‏قال rony
اوك اليهود اسمهم مشركين
بس بعد اذنك يا قطه كنت عايزه اقول للمربيه الفاضله حاجه بس محشوره فى زورى
رغم انهم بيعبدوا ربنا برضه
وكل واحد يصلى ويصوم ويتعبد بالطريقه اللى تناسبه وتناسب عادات
وتقاليداسرته وعائلته
اما بالنسبه للمقارنه باليهود
انا عايزه اقولك انهم من اوائل المخترعين فى العالم لاختراعات افادت العالم كله
حتى مصر والعالم العربى
وللا احنا هنعرف انه اختراع يهودى نروح نلغيه او نستغنى عنه
يا سلاااااااااااام
انا مش مع اليهود فى اللى بيعملوه فى فلسطين وغيرها
لكن نسبة الاميه عندهم على حد سمعى اقل من
3 فى المائه
قوليلى انتى بقى نسبة المتعلمين كام فى مصر
الست اللى بتتكلم دى بنقابل زيها كتييييييييييير فى المواصلات وفى الشغل
ونظرتها لغير المسلمات وكأنهم كائن حقير
ربنا يهديهم يا قطه ويقدرنا على معرفة التعامل معاهم
تحياتى لبوستاتك الشجاعه
‏قال AHMED SAMIR
طبعا كل فرد و له قناعاته و معتقداته حتى لو كانت غريبة و عجيبة
بس رأي الست دي اكيد مش رأي الأغلبية
تحياتي
‏قال Kontiki
من اول كلمة " منع " اتحرق دمى منع المرأة تمييز عنصرى على اساس الجنس تولى المناصب فى الغرب على اساس المؤهل و الكفاءة والنزاهة وغيرة وهنا على اساس راجل وست
اللى بعد كدة عادى اما الشخصية بتاعه وقرن مش قاعدة هى فى بيتها لية ونزلت تشتغل عشان الماهية والمصيبة الاكبر مدرسة وكمان ابتدائى
علية العوض ومنه العوض مش غريب ان بنات زى الورد فى الابتدائى لابسين الحجاب و النقاب
علية العوض
‏قال ELVIRA
Ms Venus
انت مش مشركة و لا نجسة
اما نوعيتها فلا تتعاملى معها أصلا فالمفترض لكى يتم حوار او تعامل ان الطرفين يملكان العقل اما هى فتعترف بانها من حزب ناقصات عقل و دين

انا مسلمة وصدقينى لما اقول ان أقاربى من المسيحيين أقرب كثيرا من بعض المسلمين فى العائلة خاصة الحزب السلفى
فميهمكيش كلنا نعانى
‏قال عصام…
لما الست تحترم عقلها وتعرف قدرها يبقى وقتها بس تطالب بحقها ده لو عرفته اصلا...موت ياحماااااااااارأرجو أن يكون واضحا من هو الحمار
‏قال احمد خليل
على موضوع عدم حروج المراة للعمل
85فى الماءة من اليشرتعمل بالزراعة لو فعدوا فى البيت والرحال هم اللى يروحوا الترعة يملوا مياة ويشبلوا البلاص على دماغهم ويعسلوا الندوم على الترعة ويتموا الجلة علشان الفرن والستات قاعدة فى البيت من غير شغت
العمت فى الزراعة متقسم بين الرجل والمراءة والمراءة فى الريف واجبتها اكثر من الرجل دى عالم التخلف معشش فى دماعهم
‏قال Mai Zamalkweya
فعلا لما يعرفوا حقوقهم الاول ياطالبوا بيها
النساء في مصر بيحاربوا اكتر من الرجل للرجوع لعصر الحريم وقربوا يرجعوله
شوفي نسبه البنات اللي مبتفكرش الا في الجواز و اول ما يجيلها عدلها تسيب التعليم و تروح لسي السيد وهي فرحانه ومبسوطه
شوفي نسبه تزايد العورات في الشارع المصري متمثلين في خيم سوده و اللي مش لابسين الخيم السودة نفسهم يوصلوا لمرحله التخييم دي
اذا كانت المرأه في مصر مؤمنه ايمان كامل انها عوره وانها مجرد جسد لاشباع رغبات سي اليد هيبقوا عايزين حقوق اكتر من اللي علي السرير
شئ بيحزنني لما اشوف بلاد حوالينا كانوا نفسهم زمان يوصلوا لنص اللي احنا فيه دلوقتي انا اللي اتمني اننا نوصل لربع اللي هما بقوا فيه و مستمرين في مسيرتهم
والسبب الاول و الاخير في اللي احنا فيه ده مستوي التعليم اللي فيه مدرسات بالعقليه دي
‏قال Desert cat
عوف الاصيل
معلشى فى نساء مسلمات عارفين ان الالام دين الوسطية
وبالتالى ياريت لما توجه نداء يبقى نداءك محايد
علشان صوتك مش يتعبك
‏قال Desert cat
Ms Venus
انتى مش مشركة انتى ضفرك برقبتها لانك بتتعاملى مع الناس باخلاق وتعامليهم بانسانية
لكن اللى زى دى مكانها الطبيعى الصحراء او اقرب جنينة حيوانات تلمها
‏قال Desert cat
Ms Venus
ولا يهمك يا جميل
انا وتيرز واحد
:))
اغلطى براحتك المهم انك منورانى
‏قال Desert cat
عواصف رملية
هى واللى زى مش بيقروا فى بيوتهم لان شغلهم يلفوا فى اى مكان فيه تجمعات علشان يقرفوا الناس فى عبشتهم ويقولوا لك بنهديهم لطريق الهداية والبعد عن الضلال
‏قال Desert cat
Tears
ثقافة البهايم اللى لازم ليهم ابادة
هشوف اللنك حالا يا جميل
‏قال Desert cat
rony
هى لما عملوا لها غسيل مخ فهموها ان اى حد مش مسلم يبقى مشرك وان قتلته يبقى بتجاهد فى سبيل الله وهتدخل الجنة
لكن العلم حرام
والعمل حرام
واى حاجه حرام
تعيش عالة على غيرها ده اللى حلال
‏قال Desert cat
AHMED SAMIR
لا مش راى الاغلبية
هى رايها واللى فهموها كدا ودول نهايتهم مش بعيدة
‏قال Desert cat
Kontiki
فى مصر اى انثى تسير على الارض مهما كانت مؤهلاتها ومهما كانت خبرتها مجرد مشروع سرير فقط لا غير
وعلشان كدا يحيا التخلف والغباء
‏قال Desert cat
ELVIRA
كلامك صح ومتفقه معاه جدا
‏قال Desert cat
عمو عصام
واضح جدا جدا
:))
‏قال Desert cat
khalil
كان زمان فى كتاب القراءة بتاع الصف الاول الابتدائى بيجبوا صورة فلاح ومراته وهما بيشتغلوا فى الحقل وبتعمله الاكل
دلوقتى بيجبوا صور ارهابيين فالطبيعى يطلع اجيال متعفنة فكريا
‏قال Desert cat
Mai Zamalkweya
فعلا يا مى التعليم هو العامل الاساسى الاول لنهاية المهزلة دى
لو صلح التعليم لصلحت العقول

المشاركات الشائعة