رجم جوزة الطيب


كنت بعمل سيرش على النباتات العشبية والعشبية دى اللى هى ممكن تستخدم كأشعاب وعلى حين فجعة ألاقى خير اللهم اجعله خير فتوى بتحريم جوزة الطيب ... انا بامانة حسيت بازبهلال شديد وقولت اشوف جوزة الطيب الست الكومل دى محرمينها ليه ؟ دى حتى بتخلى للأكل مذاق خاص ولا هى علشان أنثى وجوزها اسمه الطيب يستهتروا فيها كدا ويحرموها على الخلق ؟؟ انا لازم اشوف جوزة الطيب دى عبارة عن ايه .. ودى المعلومات اللى طلعت عنها


جوزة الطيب هى النواة الجافة لشجرة دائمة الخضرة ولها رائحة قوية نفاذة ومذاق لاذع جدا. .
تنمو شجرة جوزة الطيب فى مناطق قليلة من العالم مثل أندونيسيا وماليزيا وسيريلانكا وغرب الهند، فوائد جوزة الطيب
استخدمت جوزة الطيب فى تحضير عدد كبير من الأدوية منذ مئات السنين ومازالت تستخدم الان على نطاق واسع فى تحضير العقاقير . .. الزيت الذى يتم استخلاصه من العشب يستخدم كمركب ضمن لوسيونات الشعر والمراهم ويستخدم كمضاد للتشنجات ومهدأ للمعدة فى حالة ,, الانتفاخ.
من بين اهم استخدامات جوزة الطيب المعروفة ما يلي:
اضطرابات الهضم. .. الأرق: .. الجفاف: .. الذى ينتج عن القىء والإسهال وخاصة فى حالة الكوليرا. اضطرابات الجلد ... علاج أمراض الجلد مثل الإكزيما والقوباء الحلقية
نشوف بقى الفتوى اللوزعية اللولبية المهلبية اللى طالعين لينا بيها بتوع حرام يا اخى
ووجب رجم وقتل كل من احل الكفر والعصيان يا كفرة


فتوى الدكتور أحمد الحجي الكردي - في هذا الخصوص
السلام عليكم
هل صحيح أن جوزة الطيب تسكر؟


بسم الله الرحمن الرحيم
الحمد لله رب العالمين، والصلاة والسلام على سيدنا محمد خاتم الأنبياء والمرسلين، وعلى آله وأصحابه أجمعين، والتابعين، ومن تبع هداهم بإحسان إلى يوم الدين، وبعد:
فجوزة الطيب من المسكرات، ولهذا فإن أكلها محرم لدى أكثر الفقهاء، لحديث النبي صلى الله تعالى عليه وسلم: (كل مسكر خمر وكل مسكر حرام) رواه مسلم،

نسيت يا شيخ يا عبقرى تقولنا حكم الشجرة دى ايه ؟ هتدخل الجنة ولا يهتولع فى السلالة بتاعتها يوم القيامة ؟
و لما هى من المسكرات بقى الدولة مش بتجرمها زى الحشيش والبانجو وما شابه ليه ؟؟ وياترى اصحاب محلات العطارة دول نسميهم عطارين ولا تجار مخدرات يا شيخ ؟؟

Comments

Tears said…
لو فضلتى ماشية تدورى على الفتاوي مش ح تخلصى و ح تلاقى كوميديا حقيقة..ده فيه فتوى بتحرم النسكافية؟؟ و فتوى حرمت ارتداء العدسات حتى لو شفافه و هناك ضرورة طبيه و التفسير كان لانها بدعه من الكفار
!

اصلا اى واحد لابس عمه و لا حافظ و مش فاهم يجى يقولك انه ح يفتى

طيب ادخلى على اليوتيوب و اكتبى قناة الناس و اتفرجى على العجب

تحياتى
الحقيقة احترنا حناكل ايه ولا نلبس ايه وكل حاجة عايزين يحرموها يقولو "الرسول" وفالاخر ييجي حد يخترع منها علاج

--

عالم مصري يكتشف علاجاً جديداً للسرطان من الخميرة

http://satire-channel.blogspot.com/2010/02/blog-post_957.html
Desert cat said…
Tears
ربنا يستر ومش يحرموا الشاى والقهوة
دى الناس دى بجد محتاجه ابادة جماعية
يخربيت الغباء بتاعهم
Desert cat said…
عواصف رملية
للاسف من كتر ما حرمنا على نفسنا الهواء اللى بنتنفسه
الكفاءات بقت بتهرب من مصر
لان الى بيفكر فى مصر اما يرموا البحث بتاعه فى الزبالة او يطلعوا فتوى يهدروا فيها دمه
Sahran said…
قطتي العزيزة مرحباً

أنا سمعت من زمان فتوى مشابهة , وبيقولوا جوزة الطيب تسكر ,,,,

أنا بصراحة لا أعلم إن كانت تسكر أم لا , ولكن أعرف أن الناس يستعملونها وبشكل كبير ,

عندنا في غزة ورغم الحومة المتدينة فلا زلت أرى هذا المنكر يباع علانية , ولا أعرف إن كانت حماس سوف تمنعه أم لا , ولكن كثيراً ما كنت أرى شيوخ الواحد فيهم دقنه قد المكنسة وبيشتريها !!!!


انتظري يا قطة لحد ما يحرموا على الناس يشموا الهوا ولا أستبعد منهم أي شيء


تحيااااااااااااااااتي لك


ودمت سالمة
أحمد.خ said…
أستاذتى الفاضله نبات جوزة الطيب غير مسكر ولكنه يتسبب فى دوخه وتجعل من يأكلها شبه مسطول لو أضاف إليها أشياء لاداعى لذكرها حتى لانتسبب فى نشرها وهى رخيصه وغير ضاره مطلقا بل أنها مفيده جدا وفى أحد الأبحاث عن المخدرات قال أحدهم أنه يتناول جوزة الطيب عند ممارسة العلاقه الزوجيه لأن زوجته (وحشه جدا)وجوزة الطيب تجعله لايراها وتعطيه الفرصه لأن يتخيل نفسه مع سعاد حسنى إلى أن يفيق من الوهم بعد زوال أثرها وأترك لك حرية نشر هذه المعلومه مع خالص تقديرى و إعتذارى
أحمد said…
1- الاله خلق جوزة الطيب
2- "فجوزة الطيب من المسكرات"
3- (كل مسكر خمر وكل مسكر حرام)

من 1 و 2 و 3 يتضح أن الإله يخلق الحرام

لو سمحت يا مولانا ، ماحدش قالك قبل كده انك حمار؟!!ـ
karim said…
سيدتى الفاضلة, ممكن يكون كلامة صح ويبقى لية حق, بس الفكرة اننا بقيبنا بنفكر فى حتجات غريبة ومش فى وقتها خاللص , انا حاسيس ان كل مشاكلنا اتحلت و مش لاقيين حاجة نعملها يعنى نيجى على .... ونشمها, اسف بس بجد حاجة تطهق, بس بينى و بينك ان لم تستحى فافعل ماشئت, المصيبة ان معظم الناس هنا مش بيفكروا ولا يعرفوا يفرقوا صح , يارب خرجنا من الظلمات اللى بقينا فيها, تحياتى
strategicalone said…
بطلى يا قطة تبصى على التفاهات دى وركزى على المشاكل الحياتية
علشان اللى يفتش فى صندوق الزبالة موش ها يلاقى غير الزبالات (على راى الهلالى) وكمان احنا مالنا ومال الهمج وتقاليدهم الخربانة اى نعم هم عندهم فلوس اكثر واقتصادهم اكبر لكن دة نتيجة الحج والمليارت اللى بتتحول ليهم من الغلابة ومن خزينة مصر فى موسم الحج + شوية الجاز اللى عايزينة الخواجات على ما يخترعوا بديل .يعنى بعدها لو اتعالجنا من التخلف وبطلنا نعمل سياحة دينيةعندهم والخواجات استغنوا عنهم ها يرجعوا حفيانين يرعوا معيز
Mai Zamalkweya said…
الفتاوي بقت حاجه محزنه ومضحكه في نفس الوقت
بعد فتاوي دخول الحمام و نزول من علي السرير باي رجل وبعد فتاوي تحريم الفيديو جيم و بعد فتاوي التدخل في اخص خصوصيات الازواج دلوقتي و تحريم الفيس بوك و البوكيمون فتاوي الطبخ وكل شيخ هيملي علينا التوابل و البهارات اللي نستخدمها ومنستخدمهاش وهيعملوا برنامج فتاوي المطبخ للطبيخ الاسلامي
بدأوها بالزلابيه و دلوقتي التوابل و الاعشاب بس يارب مايجوا ناحيه الاكلات اللي بحبها
تحياتي
Kontiki said…
ههههههههههههه
جامدة جدا نسمى العطارين تجار مخدرات
يا بنتى كبرى دماغك مش حتخلصى والله لو قعدتى تدورى على الفتاوى و تكتبى و تحرقى فى اعصابك مش حتخلصى
لو كان الاسلام فى صورتة فى 2010 فى صورة المشايخ و الفتاوى وقنوات الدش هو سبيل تطورنا كنا اتطورنا وجينا لقدام خطوة وكانت الامم احترمتنا مش اتوصمنا بالارهاب و اتوصفنا بالتخلف عشان مسلمين مكنش دة بقى حال بلدنا مكنش دة بقى حال الناس اللى دايرة تظلم فى بعض مكناش اتملينا امراض اجتماعية
علية العوض
ELVIRA said…
يا سلام
متستعجبيش دول هم برضه نفس المشايخ اللى حللوا أكل الجراد بعد ان تم رشه بمبيدات يامة
جاتهم الهم
Anonymous said…
الغاز الغاز الغاز
لماذا لا يقولون شيئا عن مهزلة بيع الغاز لأسرائيل بعشر تمنه فى اربع اتفاقيات عجيبه لسنوات طويله بنفس السعر
لتوليد الكهرباء او اعادة بيعه وتحقيق مكاسب بينما لا تجد شركات الكهرباء فى مصر ما تحتاجه من الغاز
وكذلك شركات السمنت بل هناك تفكير فى استيراده بالسعر العالمى طبعا
هل يعرف احد حل هذه الفزوره التى تصيب بالجنون من يفكر فيها؟
متابع said…
ذبح الأطفال فى العراق
لماذا لا يتحدث هؤلاء الشيوخ المرتزقه عن ذبح اطفال ابرياء بوحشيه يندى لها جبين الأنسانيه لعائلات مسيحيه بالكامل فى الموصل
ولا يملك الأنسان سوى الدمع
عندما يقرا وصف البى بى سى
لطفلة التاسعه بقميص نومها الأرجوانى وقد حز عنقها وهى فى سريرها
Ehab Fayez said…
المشايخ من النوعية دى بيحرموا كل شئ فى الدنيا
ماعدا الاعتداء على حريات الناس واباحة دمهم لو لزم الأمر وأختلفوا معاهم
ده بس اللى ممكن يحللوه
تحياتى
انا و انتى فى نفس الخبر على السي انا ان

http://arabic.cnn.com/2010/entertainment/2/28/blogs.28feb2010/index.html

:)
Desert cat said…
Sahran
طيب لما هى بتسكر ليه مش بنستخدمها مكان الخمرة على الاقل ارخص ومتوفرة عن اى عطار
Desert cat said…
أحمد . خ
ما العنب لو ضيفنا ليه حاجات تانية بيسكر وكمان التفاح لو ضفنا ليه حاجات تانية يسكر معنى كدا اننا نحرمهم ؟
وبعدين الناس بتستخدم جوزة الطيب فى الاكل كبهارات مش كمسكرات

ميرسى على المعلومة وطبعا لازم يتم نشرها
:D
Desert cat said…
أحمد
الناس بتقدس الايام دى الحمير اللى زى الشيخ ده وبيبعدوا عن الشبهات والمسكرات
وعلشان كدا بيسالوا يحطوا جوزة الطيب فى الاكل ولا يشربوها كخمر
هههههههههههه
Desert cat said…
karim
كلامه صح وعنده حق يا كريم فى حاه مشورعة ؟؟ وفوائدها متعددة ؟
Desert cat said…
strategicalone
ماهو للاسف اللى بيروحوا لهم بيجوا لنا بعاداتهم وتخاريفهم ويقرفونا فى مصر ويقعد يقولك ده حرام وده حلال على اساس انه مش بيعمل حاجه حرام مش ناقص غير جوزة الطيب
Desert cat said…
Mai Zamalkweya
هما بعد ما حجبوا باربى وحرموا توم وجيرى مش مستنية منهم اى حاجه بصراحة غير كل عبط كل يومين تلاته يطلعوا لنا بيه
:))
Desert cat said…
Kontiki
نطور ايه وجوزة الطيب حرام ؟؟
احنا وبفضل الله تفوقنا على الجهل نفسه
Desert cat said…
ELVIRA
يعععععع
على الناس المقرفة دى
فاكر ايام حرب الكويت والعراق كان فى مصريين فى حفر الباطن وافتوا لهم لما يجوعوا ياكلوا التعابين يعنى بدل ما ياكلهم قالوا لهم كلوا التعابين يا حلوين تبقى صحتكو زى الفل
Desert cat said…
Anonymous
ميقدروش يتلبوا على طول
هما بيشتغلوا على اللى يجيب فلوس ومش ياذى المرأأأأأأأأأأأأة
Desert cat said…
متابع
الجبن سيد الأخلاق مش يقدرووووا
Desert cat said…
Ehab Fayez
احنا دلوقتى اسهل حاجه اباحة الدم ورفع قضايا الحسبة
Desert cat said…
مهيج الجماهير
طيب ما تقولى نص الخبر كدا
فعلى مدونة "قطة الصحراء" برزت شكوى من تعدد الفتاوى وتكاثرها في كل مجال من مجالات الحياة، فتطرقت المدونة إلى القضية تحت عنوان "رجم جوزة الطيب" داعية إلى وضع "علاج سريع لمرضى إسهال الفتاوى."

وقالت المدونة : "كنت أبحث (على الانترنت) عن النباتات العشبية، وعلى حين فجعة ألاقي فتوى بتحريم جوزة الطيب.. جوزة الطيب هي النواة الجافة لشجرة دائمة الخضرة، ولها رائحة قوية نفاذة ومذاق لاذع جدا.. واستخدمت في تحضير عدد كبير من الأدوية منذ مئات السنين، ومازالت تستخدم في تحضير العقاقير."

وأشارت المدونة إلى "فتوى الدكتور أحمد الحجي الكردي - في هذا الخصوص، والتي تشير إلى أن جوزة الطيب من المسكرات، ولهذا فإن أكلها محرم لدى أكثر الفقهاء."

وختمت المدونة بالقول: "نسيت يا شيخ يا عبقري أن تقول لنا ما حكم الشجرة؟ ستدخل الجنة ولا يتولع في السلالة بتاعتها يوم القيامة؟ ولما هي من المسكرات، لماذا لا تجرمها الدولة مثل الحشيش والبانجو وما شابه؟"

انتى خايفة تفتحى اللينك ولا انا اللى مش فاهم ولا ايه ؟؟
:D
Anonymous said…
البستكنو
البستكنو
الليله
الليله هنكل الجو
البستكنو
البستكنو وووووووو

كل حالة في حياتنا بقيت مشيه على ريتم البستكنو من المعاملات اليومية إلى الفتاوي ... حياتنا كلها بستكنو
Desert cat said…
مهيج الجماهير
عيب عليك خايفة افتح اللنك ليه بس
انا كل الموضوع جيت افتحه عندى لاقيته مش اشتغل
فقولت لك انقى الخبر
ميرسى بجد ليك
Desert cat said…
Anonymous
حالة من المهلبية الفتوية الاخوانجية السلفية الوهابية

Popular posts from this blog

قميص دهشور

كل تحرش وانتوا طيبين