ايها القضاة أفيقوا يرحمكم الله !!

فى خبر كالصاعقة شهدت الجمعية العمومية الطارئة لقضاة مجلس الدولة، أمس، التى دعا إليها المستشار محمد الحسينى، رئيس المجلس، لمناقشة أمر تعيين المرأة قاضية بمجلس الدولة، أجواء ساخنة.
رفض أكثر من ٨٠٪ من إجمالى من لهم حق التصويت دخول المرأة مجلس الدولة، بواقع ٣٣٤ صوتاً مقابل ٤٢ صوتاً وافقوا على دخولها. ... ولا أعلم إلى أى قانون وأى دستور وأى شريعة استندوا السادة القضاه فى إجماعهم على رفض دخول المرأة مجلس الدولة ... فالدستور المصرى ساوى بين الرجل والمرأة فى الحقوق والواجبات ولا فرق بينهم .. والقانون ساوى بين الرجل والمرأة فى العقاب ولا فرق بينهم .. والله سبحاته وتعالى قال فى كتابه الكريم " او ليس الذكر كالأنثى " ومفرقش بينهم ..
يبقى على أى اساس حدد حضرات السادة القضاة رأيهم ؟؟ وهل يمكننى بعد هذا الإجماع ضد المرأة أن اثق فى حكم قاضى بعد اليوم وهو الذى يتمتع بنظرة ذكورية حادة ؟؟
واين هو من الآية القرآنية التى تعلو قامته فى كل قاعة محكمة
" وإذا حكمتم بين الناس ان تحكموا بالعدل " ولكنهم تناسوا كلمة الناس ونظروا لمجلس الدولة نظرة ذكورية بحته فحددوا بالاجماع رفض دخول المرأة متناسين أن المرأة اليوم هى رب أسرة ..

وأنه بناء على دراسة أعدت كان نتاجها 40%من السيدات العائل للأسرة
السادة القضاة تناسوا ان كليات الحقوق لم تقتصر على الذكور بل درست معه وفهمت مواد الدستور ايضا معه الأنثى ..

السادة القضاة تناسوا أن سميرة موسى اول عالمة ذرة مصرية أنثى
وتناسوا ان بونظير بوتو قادئة باكستان كانت انثى
وتناسوا ان سارة بالين التى خاضت الانتخابات الامريكية بكل قوة انثى
وقديما شجرة الدر كانت أنثى

السادة القضاة اللى المفروض ان الدستور والقانون هو فكرهم والعدل هو ضميرهم افيقوا يرحمكم الله

=============================================
بيان هام
ليس من أجل النساء فقط بل من أجل مستقبل هذا الوطن

لقراءة البيان
http://www.nwrcegypt.org/CampContent.php?campid=62&Show=62&ID=0&show2=1


للتوقيع على البيان

http://www.ipetitions.com/petition/not4womenonly/


Comments

Tears said…
و تناسوا ايضا ان الوحيدة التى استطاعت قول الحق و اعلان تزوير الانتخابات هى المستشارة نهي الزينى

القضاه جزء من المجتمع و المجتمع متعفن و سوس نخر جسده

لا تصدقى من يقول ان القضاء بخير و ان الحكم بالقانون فلا قانون يحكم على مغتصب طفل باربع سنوات و يحكم على كاتب مقال بخمس سنوات الا اذا كان قانون*******
أحمد.خ said…
أستاذتى الفاضله من حقك الآن النواح على نصف المجتمع الذى ضاع هباء ومرحبا بك فى غياهب ماقبل القرن الهجرى الأول وأيام الجاهليه السوداء وعليك الآن الإمتثال وإغلاق مدونتك والجلوس بالمنزل فى إنتظار إبن الحلال إن لم تكونى متزوجه وتغيير حفاضات الأولاد إن كنت متزوجه ولانى غير متزوج فأعتقد إن فرصتى زادت فى العثور على بنت الحلال حيث لن تجد البنت غير الزواج مأوى ولكن الله يابنات مصر
فرعون said…
ياحلاوه ياولاد الدنيا كلها ماشيه لقدام ماعدا مصر الوحيده اللى ماشيه لوحدها ومحدش قادر يحصلها بس ماشيه لورا
malika said…
بهذه الواقعة تأكدت العبارة أحترس مصر ترجع الى الخلف
متى يفيقوا هؤلاء المغيبين يحتاجون الى صفعات على وجوههم حتى يفيقوا
Sahran said…
قطتي الحبيبة

فاقد الشيء لا يعطيه , وفاقد العقل لن يعطي الآخرين إلا جهلاً وتخلفاً
طبعا هم مرجعهم القول بأن المرأة عورة وناقصة عقل , ومن ضلع أعوج , وأن لعن الله قوما حكمتهم امراة
هم بيقولوا أن المرأة تفكر بعاطفتها ,, يعني بدل ما تحكم عالمجرم بالإعدام راح تصير تصوت وتلطم وتندبه

لا يزالوا عزيزتي ينظروا للمرأة كمتاع رخيص , وغير قابل إلا لهذه الوظيفة الجنسية الرخيصة فقط


تحياااااااااااااااتي لك


ودمت سالمة
Mai Zamalkweya said…
المشكله بقت مشكله المجتمع كله و القضاه في الاول وفي الاخر جزء من المجتمع ومش غريبه انهم يتأثروا بنفس الفكر
انا من ساعه ما قرأت الخبر وانا هتجنن 90%
من جمعيه العموميه لجملس الدولة برفضوا ان يكون معاهم سيدات يعني اعتراف بان المرأه في المجتمع مواطن درجه تانيه او ممكن كمان مرتتقيش لدرجه مواطن
و الاعجب اكثر التلعيقات اللي موافقه و الاعجب اكتر ان في تعليقات بنات وسيدات كتير بيأيدوا القرار و الاعجب اكتر واكتر في ناس كتير بتطالب باستفتاء مماثل في كل الهيئات الحكوميه واللي خلاني اشد في شعري ناس بتقول الرجاله اولي بالتعين في اي عمل من المرأه
طيب اللي بتصرف علي اهلها و اللي بتصرف علي بيتها و اولادها واوقات جوزها بروحوا يشتغلوا بنات ليل علشان الاولويه ليهم هما
مصر راجعه بصرعه الصاروخ لعصر الجواري و الحريم وده بموافقه الستات نفسهم
امبارح بناقش مقاله فاطمه خيرعلي الفيس بوك واحد داخل يقولي الله يرحم ايام ماكان الستات بيقعدوا علي الطشط و لما تترقي شويه كانت تقعد تعمل فطير
وواحده راحت داخله كتباله كلامك صح جدا فعلا في اشغال احنا مخلوقين علشان نعملها وحاجات مينفعش نعملها
واللي موافقه علي حوار الطشط دي المفروض انها دكتورة وتقولي المفروض الست في بيتها علشان متبقاش في الششارع باترينه اللي رايح واللي جاي يتفرج عليها
Mai Zamalkweya said…
بمناسبه الموضوع
امبارح كنت بتفرج علي مباراه في كاس افريقيا لكره اليد بين ليبيا و الكاميرون
والمعروف ان اللي بيحكموا مباريات الرجال سيدات - مفيش حكمات من مصر علي ما اعتقد لاني لحد دلوقتي مشفتش -المهم حصلت خناقه بين لاعب من ليبيا ولاعب من الكاميرون و امتدت الخناقه للاعيبه الفريقين و الجهازيين الاداريين يقوم المعلق الغير محترم بتاع النيل للرياضه يقول ايه ما اصل الحكم اللي غلطانه هي اللي مقدرتش تسيطر علي المباراه !!!!! خناقه بين لاعيبه بتحصل في كل اللعبات وبيبقي الحكام رجاله ومبيتقالش كده لكن مع الحكم امرأه يبقي هي اللي خلتهم يتخانقوا

وبخصوص البطولة بردو مصر مكنش عندها منتخب للسيدات اتلغي من 6 سنوات !!!!! وتم تجميعه بشكل فجائي علشان من شروط تنظيم البطولة ان البلد المنظمه يكون عندها فريق سيدات شفتي وصلنا لحد ايه حتي الرياضه بقينا فيها مجرد سد خانه

وبردو بخصوص فريق السيدات اللي بينافس دلوقتي علي المركز السادس في وجهه نظر الجمهور افضل من منتخبات تونس و الجزائر اللي هيلعبوا النهارده في الدور قبل النهائي و احنا بنلعب علي السادس
و السبب ان بنات منتخب مصر كلهم مـــــحــــجـــبات

تفتكري شعب و مسؤليين رياضيين بيبصوا علي المرأه حتي اللي بتمارس الرياضه علي انها شئ تحصيل حاصل و انها تبقي محجبه وتخسر احسن من كاشفه شعرها وبتكسب يقبل ان اللي يحكم بيهم تبقي واحده مش واحده ويقبلوا بيها قاضيه
Mai Zamalkweya said…
اسفه ياحنان رغيت كتير ووجعت ليكي دماغك بس اوعدك اخر حاجه هقولهالك بعيده شويه عن الموضوع ومرتبطه بيه في نفس الوقت

شوفي الصوره دي

http://zamalekmedia.com/tebo/tebo/nadwa/126/zamalek%20(41).jpg

http://zamalekmedia.com/tebo/tebo/nadwa/126/zamalek%20(62).jpg


شوفي لاعب المقاولين (التيشرت الاصفر و الاسود)
لابس بنطلون تحت الشورت لان الشورت حرام علشان بيكشف العوره

تفتكري الزي ده هيتعمم في ملاعب الكره المصريه
تفتكري ده بقي تفكير الشعب في الرياضه اللي المفروض اللي بيتفرج عليها هيبقي مركز في اللعب و الاداء مش في الرجلين ولا ده لابس ايه وده لابس ايه هيبقي تفكيره في باقي امور الحياه ازاي
الوقفة الإحتجاجية النهادرة الساعة 12 الضهر قدام مجلس الدولة
يا بنتي المجتمع منحط
و اهبل و حقير .. و متخلف كمان
انا رافضة المجتمع اصلا
و يطلع يقولك : الشباب بيهاجر ليه؟
الشباب بيهاجر من جهلكم و قرفكم ..
Migo Mishmish said…
قطه
اقعدى انتى انفخى وولعى فى النار لحد ماتخرب
لعلمك انا كنت من مؤيدى حقوق المرأه لحد ماتجوزت ..حقوق ايه يام حقوق ؟ داحنا خلاص استوينا انتو واكلين تلات ارباع البلد ..واحنا زى الحمير بنشتغل وانتو الى واخدين كل حاجه وشافطينها
1- جميع المناصب دلوقتى بتتجه نحو المرأه والرجاله بخ
2- البنات هما الى بيشتغلو والشباب مرمى عالقهوة
3- بنجيب شقه وبتاخدوها عالجاهز ولو الست خلفت خلاص تبقى بتاعتها عشان حاضنه
4- بنغسل المواعين وبنساعد فى ترتيب البيت وبنرمى الشراب فى مكانه
5- الست بتلهف شبكه ومهر وخلافه مع انكو بتطالبو بالمساواة يبقى ليه الراجل يجيب شبكه؟ ليه الست مش بتجيب للراجل شبكه؟
6- فى عيد الام الواحد لازم يجيب هديه لامه ومراته وحماته واى واحده ست معديه فى الشارع مع ان محدش بيفتكر الراجل ..فين المساواة بقى؟
7- الرجل يفقد حريته فى الزواج ورايح فين وجاى منين ..فين بقى المساواة
8- الستات ليهم عربيتين فى المترو والرجاله بيتفعصو فى الباقى مع ان الرجاله بتبقى نازله رايحه شغلها ورايحه تفيد البلد ومعظم الستات بيبقو رايحين زيارات نميمه او زيارات عائليه الكوافير او او
9-فى الشغل تلاقيهم بيقبضو اد كدا ومبيشتغلوش وبيمشو بدرى وكل شويه اعذار ..اصل مش عارف ايه ..الواد عيان ..رضاعه ..رعايه طفل مينفعش اتاخر فى الشغل اصل جوزى حالف عليا بالطلاق
10- فى الحقوق يقولك احنا ستات انما فى الواجبات يقولك انتو رجاله ولازم تشيلو الجنس اللطيف
بذمتك فيه استكراد اكتر من كدا ؟؟؟
انا عارف ان طلاقى هايكون على ايدك ياحوريه والنبى ماتفتحينيش لحسن نغلط اكتر من كدا ..وبعدين مشمش من اهم الزوار عندك وهاتقرا الكلام ده ..طبعا مانتو اتلميتو على بعض عشان اذيه الرجاله الغلبانه للى زى حالاتى
ميجوووووووووووو
متابع said…
امام مسجد متهم بالتحرش
القت الشرطة الإسبانية القبض على إمام مسلم بشبهة الاعتداء جنسيا على فتيات كن يحضرن دروسه الدينية، حسبما أعلنت شرطة مقاطعة كرتاخينا التابعة لإقليم مرسية جنوب شرقي إسبانيا
وقد حاول الإمام الذي وصل من المغرب في شهر سبتمبر/ أيلول الماضي، الفرار قبل أسبوع "لأنه علم بأنه متابع"، حسبما نقلت وسائل الإعلام الإسبانية المحلية عن محمد رضا القاضي أمين سر اتحاد الجماعات الإسلامية في إسبانيا..
عصام said…
مشوار الألف ميل يبدأبخطوه فلتكافح نساء مص ومن يدرى ربما نعيش لنراها وقد حصلت على كل حقوقها
Anonymous said…
أخبار التاســعـة





نشرة اخبار التاسعة مساءاً ليوم الأثنين الحادي عشر من فبرايرعام 2300



1. اعرب الرئيس ميدو ياسر هيثم جمال محمد حسني مبارك عن سعادته بثقة الشعب وانتخابة لفترة رئاسية خامسة على التوالى
كما اعرب عن اسفة لوفاة جميع منافسيه قضائا وقدرا قبل الانتخابات بعدة ايام والبقاء لله

2. قرر سيادة الرئيس البقاء على الحكومة الحالية والتي رافقته منذ توليه الحكم دون تغيير وذلك لأدائها المشرف فى الفترة السابقة وللحفاظ على الإستقرار فى البلاد.

3. تلقى سيادته اتصالا هاتفيا من بينج بونج يع رئيس جمهورية الصين الشعبية العظمى.. و قد تباحثا خلاله فى القضايا الهامة فى المنطقة، وتلقى وعدا من بينج بمحاولة

الضغط على اسرائيل للعودة لحدود عام 2040.. و من ناحيته وعد الرئيس ببذل جهود اكبر لمنع تهريب الحجارة للفلسطينين عبر الحدود المصرية

4. الرئيس حافظ رشيد عدنان بشار الأسد يطالب بعودة الجولان الى السياده السورية

5. الجمهورية الليبيه العربية تقرر الأنجليزية لغة البلاد الرسمية

6. (المملكه العربية السعودية سابقا) تخفض سعر البترول بعد اشتداد المنافسه مع البترول الصناعى الذى تصدره الهند.



*******

فاصل قصير نستمع خلاله لأغنية العنب العنب

من الزمن الجميل

لفنان التراث الراحل سعد الصغير

**** ***
عــــدنا اليكـــــــــم

*******



7. أعرب سيادة الرئيس ميدو ياسر هيثم جمال محمد حسني مبارك عن أسفة لغرق العبارة السلام 10098 وأبلغ الجهات المختصة عن قلقة لتزايد اعداد العبارات الغارقة
وأمر سيادته بتشكيل لجنة أساسية تنبثق منها لجان فرعية تتشكل من كافة الجهات المعنيه للبحث عن السر الغامض فى كثرة هذه الحوادث وامر بصرف ربع دولار تعويضا لاسرة كل متوفى بعد ان تدفع كل اسرة الرسوم المطلوبة منها و تقدر بحوالي 113 دولارمصري فقط لا غير

8. ألقت مباحث القاهرة القبض على طفل فى المناطق الشعبية وبحوذته قطعة شوكولاته وتطبيقا لقانون من أين لك هذا.. وبعد البحث والتحري واستجواب جميع افراد العائلة والجيران تبين ان الطفل قد تسلل ليلا عبر الاسلاك الشائكة الى احدى المناطق الراقية ووجد القطعة ملقاة على الارض.. وقد قامت النيابة بحجز الطفل والاب 45 شهر على ذمة التحقيق وذلك لمعرفه كيف تمكن الطفل من اجتياز جميع الحواجز الفاصلة بين المناطق الشعبية والراقية
وقد اعربت جمعية حقوق الاثرياء عن قلقها من هذا الحادث وطالبت وزير الداخلية بالتحقيق فى هذا الاهمال الذى يمكن ان يعرض امنهم للخطر

9. أعرب وزير الصحة عن تفائله لانخفاض حالات الانتحار هذا الشهر الى تسعة الاف حالة يوميا بعد ان بلغت الشهر الماضي عشرة الاف حاله يوميا.. ومازالت أسباب الانتحار غامضة

10.. قررت لجنة مختصة بإستمرار الحفر في قناة توشكى

11. الرئيس يعلن عن وضع خطة خمسية للقضاء علي البطالة إستكمالا لمجهودات الرئيس الجد مبارك التي بدأها في مطلع القرن

12. افتتح اليوم وزير الصحه المستشفى رقم 100251 للامراض النفسية العصبية بطاقة استيعابيه تقدر بـ 10000 مريض واعرب عن امله في جمع المزيد من التبرعات لبناء المزيد من المستشفيات من هذا النوع لاستيعاب الاعداد المتزايده من المرضى..
و ما زالت الأسباب مجهولة لانتشار الأمراض النفسية والعصبية مثلها مثل حالات الانتحار

13. من الاخبار الرياضية :فاز منتخبنا القومي على نظيره الجزائري ليتأهل الي تصفيات كأس العالم لعام 2304 بعد ان ابتعد عن بطولة كأس العالم منذ 1990
نتمني التوفيق للمنتخب القومي

14. من الاخبار الفنية : صرحت الفنانة صباح بأنها اوشكت على الانتهاء من ترتيبات زواجها من الفنان المصرى الشاب كوكو هيثم تامر حسنى الذى ينتمى الى اسرة فنية عريقة يذكر ان هذه هى المرة السادسة والاربعين التى تخوض فيها الفنانة الكبيرة تجربة الزواج
Anonymous said…
ازاى احبك يابلد وانتى مش حبانى
إزاي أعيش وأموت وأندفن في أرض رفضاني
بنام وأحلم ببكرة الأقي بكرة زود أحزاني
أه يا بلد لو بإيدي كنت أهدك وابنيكى من تانى

بيقولك تعديل دستوري إحنا عايزين تعديل إنساني
كل إنجازات البلد أنفاق وكباري


بلد بتموت وشعب فى حالة سكوت وكانها لعبة اتارى
من كتر الظلم والضلمة بقول ياريت ايام الملك والانجليز ترجع تانى

أه يا بلد مليت بحبك الدفاتر مع العلم أنك قتلاني
مين اللي قال أن عبارة السلام غرقت

ومين اللي قال أن ممدوح إسماعيل قاتل وجاني
اللي غرقت مصر واللي غرق ما بيطلعش حى تانى

هو يطلع من صالة كبار الزوار وأنا اتحبس في سجن المطار
واتعرض أنا علي البحث الجنائي

انا اللي من صغري أخترتك سكتي أتريها سكة أحزاني
أنا اللي من صغري أخترتك كلمتي ألاقيكي مقيداني


أه يا بلد نفسي قبل ما أموت الاقي زمانك وزمانى
إتغربت أكتر من سبع سنين ورجعت لاقيت الغربة هنا شكل تانى

بلد بتعاني بكل المعاني بكياني وانا املى احس بكيانى
عشرين سنة مخلص محبوس بين جدران دكاني

نفسي أعيش من غير ما أنافق السلطان والسلطاني

نفسي أعيش من غير ما أنافق ولا حتي أبويا اللي رباني

بكرة نتحاسبوه علي السكوت وعلي العيشة العميانى
إبني مكملش سنتين نايم جنب مني بيشد في شعري
ويحط صبعة في وداني

ويضربني بالقلم ولسان حالة بيقول لية يابا خلفت تاني
وأنا في سري بأقول ياريتك يا أحمد يابني ياباني إبن ياباني



مع إن وجودك في الدنيا عمل فيا وخلاني
أحب البلد أكتر وأهد جدران دكاني

شيخ الازهر بيقول المعارضة حرام
وانا نفسى اعرف اية الحلال فى بلد الميت مليون حرامى



أحمد فؤاد نجم
نحن في حاجه الي رايك في مشاكل القراء علي مدونة"دقات قلب فوق الخمسين"
متابع said…
الى اين نحن متجهون؟
مهازل هيئة الأمر بالمعروف
او البوليس الدينى
تتوالى
منذ فنره منعوا تلميذات مدرسه تحترق من الهروب لأنهم لا يرتدون زيا ممايفرضوه على النساء وتركوا البنات لمصيرهم
واليوم تحكم محكمه على احدهم بعد ان ظبط متزوجا لست زوجات فى نفس الوقت
وعندنا من يريدون لمجتمعنا نفس المصير الأسود
Hossam said…
heyyyyyyyy
وشحتنيى جدا بجد
على فكرة طول مفى ناس لسة تفكرها رجعى
السيدات مش هيخدوا حقهم
عمرهم مبصوا للصين اللى اعضاء نظير مجلس الشعب عندنا بيكونوا 25 و 30 سنة
وكل القادة فى نفس السن
والسيدات جزء كبير منهم
الموضوع عادى لانى عارف ان ده حيحصل
تحياتى صديقتى
لو ست (قاضية) دخل راجل السجن تبقى اهانة للمجتمع الرجولي

مجتمع شرقي محافظ اكيد كل حاجة فيها تغيير هيعملو مشكلة وهنا واضح ان القضاة نفسهم غير عادلين
Anonymous said…
مسائلة – قصيدة لأحمد مطر قلت للحاكم: هل أنت الذي أنجبتنا ؟ قال: لا… لست أنا. قلت: هل صيّرك الله إلهاً فوقنا ؟ قال: حاشا ربنا. قلت: هل نحن طلبنا منك أن تحكمنا ؟ قال: كلا. قلت: هل كان لنا عشرة أوطان و فيها وطنٌ مستعمل زاد عن حاجتنا فوهبنا لك هذا الوطنا ؟ قال: لم يحدث… و لا أظن هذا ممكنا. قلت: هل أقرضتنا شيئاً على أن تخسف الأرض بنا إن لم نسدد ديْننا… إقرأ المزيد .. ؟ قال: كلا. قلت: مادمت، إذن، لست إلهاً أو أباً أو حاكماً منتخباً أو مالكاً أو دائنا فلماذا لم تزل، يا ابن الكذا، تركبنا ؟ … و انتهى الحلم هنا. أيقظتني طرقاتٌ فوق بابي: افتح الباب لنا يا ابن الزنى. افتح الباب لنا. إن في بيتك حلماً خائنا ! [^]
Anonymous said…
يلعن أبو دين التخلف و العنصرية
أنا مهاجر لإسرائيل
و ندمان أوي أنو سبت بنتي تتولد في البلد الوسخة دي

أبو ريشة
متابع said…
غريبه ان يتخلص اهل الصحراء من تخلفهم ونقلدهم نحن بغباء شديد
وزير العدل السعودي، محمد العيسى، يقول إن حكومة بلاده تخطط لإصدار قانون جديد خلال الأيام القليلة المقبلة يسمح للمحاميات بالمرافعة أمام المحاكم للمرة الأولى في المملكة.
متابع said…
عاجل
تم التراجع اليوم عن القرار
Desert cat said…
Tears
ده لازم يتناسوا لان المرأة اللى رافضينها كانت اشجع منهم واتكلمت بكل امانة ومن غير خوف فما بالنا بقى لو فى 10 بس نهى الزينى هيبقى منظرهم فى المجتمعايه طبعا تفوق المرأة عليهم جعلهم مرعوبين منها

تحياتى
Desert cat said…
أحمد.خ
انا مستحيل كون النموذج الخاضع لانى صدق من قال المرأة المتمردة وبالتالى من المستحيل اكون اللى قاعدة تستنى ابن الحلال ولا تغير بامبرز
Desert cat said…
فرعون
ولا حد هيقدر يحصلها اصلنا طمعنا فى سباق الرجوع للخلف علشان كدا محدش هيقدر يحصلنا
Desert cat said…
malika
دول محتجين لصدمة كهربية عنيفة
تحياتى يا جميل
Desert cat said…
Sahran
انا بجد اقتنعت جدا بالراى القائل العقل مالوش اى علاقة بالعلم
لما يكوندى قرارات ناس المفروض ان العدل هو اساس حياتهم يبقى نستنى ايه من ناس ملهاش علاقة باى حقوق
Desert cat said…
Mai Zamalkweya
اه يا مى على التعليقات اللى موافقة دى تلاقيهم بيقولوا لك وقرن فى بيوتكن وممكن تلاقى اللى بيكتب كدا مامته هى الى بتشتغل وتصرف عليه
Desert cat said…
Mai Zamalkweya
هو مش فى ست فى الموضوع لازم يعلقوا عليها فشلهم واى حاجه تحصل لهم يقولوا الست هى السبب
Desert cat said…
Mai Zamalkweya
انتى تشرفى المدونة فى اى وقت وتكتبى اللى تحبيه برضه فى اى وقت
يا حبيبتىالانحطاط الفكرى خلاص ساد فى البلد ولو فى جهاز ادارى محترم كان طرده بره مهما كان مستواه فى اللعب
لكن هنعمل ايه العقول تم اختراقها من اكبر حد فى البلد حتى الاطفال بيسمموا عقولهم دلوقتى بالمخلفات دى
Desert cat said…
على باب الله
وكسبنا ولله لحمد
:))
Desert cat said…
قهوة بالفانيليا - شيماء علي

واضح ان كلنا رافضين المجتمع بانحطاطه وقرفه
مش عندى اى امل فى اى تغيير خصوا والبلد منهارة بالشكل القمئ ده
Desert cat said…
Migo Mishmish
ردى على كل اللستة اللى كتبتها دى يا ميجو كلمتين جرب بس تتنكر فى هيئة انثى وشوف هتقدر تتعايش فى المجتمع الزبالة ده كام يوم ان مش كانوا كام ساعه يعنى
Desert cat said…
متابع
امال هما قاعدين يرجعوا على عقول النا المرأة عورةولازم تتغطى ليه ؟؟ ماهو لانهم مرضى وخايفين يتفضحوا
Desert cat said…
عمو عصام
مش عندى اى امل فى التغيير
Desert cat said…
Anonymous
ربنا يبشرك بالخير
Desert cat said…
Anonymous
ابو النجوم قعد يقول واحنا قاعدين نموت من القهر
Desert cat said…
قيس بن الملووووح
يشرفنى زيارة المدونة
وبجد اسفه جدا على التاخير
Desert cat said…
متابع
ياريت اللى عايز يقلدهم يروح يعيش عندهم لكن تهاون الدولة السبب
Desert cat said…
Hossam
يااه فينك من زمان حسام
ليك وحشة بجد
احنا مش حنبص لحد حنا بص بنبص للى عايزين يكفنوا المراة وبنقلدهم لحد ما تفوقنا عليهم
Desert cat said…
عواصف رملية
ولما راجل يقتل ست يعملوا منه بطل قومى
Desert cat said…
Anonymous
طب ايه رايك فى قصيدة يا مهشكنا ومبشتكنا يا ريس ده انت رئيس والنعمة كويس ؟
اهم مش بيسمعوا غيرها علشان كدا مدلعين النا اخر دلع
Desert cat said…
ابو ريشه
مهما تروح هيلزقوا فيك تهم اى حاجه هيقولوا انت اللى عملتها يبقى استحمل العيشة هنا معانا هتسيبنا على مين
:))
Desert cat said…
متابع
قريت الخبر وكان هيجرى لى حاجه بجد فى السعودية بيتقدموا باى شكل واحنا بنرجع ورا باى شكل
Desert cat said…
متابع
القرار جاله من فوق اصله صرح بان دخولها القضاء على جثته
الربان said…
تحياتي

معذرة...فقد اتيت متأخرا و لكن احببت ان اوضح شيء قد نكون نحن غير منتبهين اليه...

مجلس الدولة لم يرفض تعيين المرأة لسبب
من الاسباب التي وردت في اذهان الاخوة و الاخوات الذين علقوا...
ولا انتقاصا من قدرها او مكانتها...
و لكن اشفاقا عليها من كم وحجم العمل
التي ستقوم به اضافة الي انها زوجه وام
القضاه بمجلس الدولة يعملون 12 ساعة تقريبا...وهذا بالقطع سيؤثر علي المرأة اما في بيتها وواجباتها العائلية
او في عملها بالمجلس....
هذه وجهة نظر....و يجب ان نحترم الاخرين
و وجهات نظرهم وافكارهم....لا ان نسفه
منها.

اسأل الله ان يهيء لنا من امرنا رشدا.

تحياتي و تقديري

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز