Desert Cat Search
قطه الصحراء: الشعب لازم يضحى علشان الوزراء يعيشوا

Tuesday, February 16, 2010

الشعب لازم يضحى علشان الوزراء يعيشوا


بامر رئيس الوزراء علاج غالى على نفقة الدولة وبما ان السيد الوزير غالى اسماً وفعلاً طبعاً على الوزراء زمايله وحبايبه فقد تم تخصيص مليون جنيه من جيوب الموظفين والفلاحين والعمال المطحونين لعلاج سيادته


وقفة احتجاجية للمعاقين امام مجلس الشعب للحصول على كشك وشقة


كشف النقاب والنقاب ياما بيخبى بلاوى عن وزير الإسكان السابق محمد إبراهيم سليمان الموجه إليه 20تهمة فساد حتى الآن من بينهم التربح الغير مشروع وإستغلال نفوذ ده غير اعتراف زوجته أولاده امام النيابة بالأراضى بعشرات الأفدنة اللى باسمهم طبعا الراجل لازم يضمن مستقبل افضل لاوده واحفاد احفاد احفاده هو مش وزير ولا اييييه ؟


مواطن عادى إن رجع بيته فى إيدة عشا لولاده بينام يبوس ايده وش وضهر على النعمة اللى هو فيها ويسأل الله انه يحفظها من الزوال
وان كان مفيش يبقى مش مشكلة اهو بكرة جاى برزقه ... ضاقت بيه الحياة عمل كشك صغير فى جنب من الشارع الحى زاله غير الغرامة اللى دفعها له اهل الخير .. اجر مكان يكاد يرى بالعين المجردة وقال يلم حاجته فيه ويوزع على العمال اللى فى المنطقة الشاى والقهوة لكن كانت فوق دماغه اكتر من 3جهات حكومية بالمرصاد من تانى يوم بدأ يمارس نشاطه فيه ومفيش حد يدخل الا وهو طالع مديله محضر غرامة ايشى امن غذائى على امن صناعى على بلطجية الحى كان منه انه قفلها وربنا يتولاه فى الغرامات اللى وقعت فوق دماغه
المسؤلين اللى فى البلد دول بقى مسؤلين عن مين ؟؟؟ اذا كان كل يوم اضراب او اعتصام ده غير الشباب اللى بيهرب من البطالة للموت فى المحيطات ده غير الأطفال العرايا فى برد الشتا وحر الصيف وسريرهم اى كوبرى يلمهم او مقلب زبالة جنب الكلاب الضالة .. عشرات من المواطنين الغلابة رايحين جايين على مكتب السيد وزير الصحة يمكن يحن عليهم بتأشيرة تنقذ حياة طفل ولا رب اسرة للعلاج على نفقة الدولة الميزة اللى سيادته بيتمتع بيها مع انه وزير ومش ناقصه ... المواطنين اللى بيناموا بمرضاهم فى طرقات المستشفيات العامة واللى باعوا اراضيهم ورهنوا بيوتهم لان المستشفى العام رغم قذارته الا انهم برضه خصخصوه ولحد شريط الشاش بيشتروه .. هو مين اللى بقى يستحق ومين اللى بقى مسؤول عن مين بالظبط ؟؟؟

22 comments:

Tears said...

اولا دماغك بتعجبني

ثانيا الشعب ده يستاهل كل اللى يجراله لانه بيستعذب الذل و ساكت عليه و مستحمل الاهانة

تقدرى تقوليلى همه مستنين يحصل ايه كمان عشان مليون واحد فيهم ينزل الشارع و يسقط النظام المتعفن ده؟

ايام انتخابات الرئاسة الهزلية انا كنت بنزل فى المظاهرات و الوقفات و كنت بساهم فى نشر الوعى بس بالرغم انى لا انتمى لطبقة تاثرت بما يحدث و لا اعانى من النظام فى شىء لكن لم اجد حولى غير اليساريين و المثقفين و كان معظمنا ينتمى للطبقة فوق المتوسطة و التى حقا لا تعانى كما يعانى غالبية الشعب

و لكن اين الشعب ؟ ليه ساكت و مش بينزل؟ خايف من ايه؟ ح يحصله ايه اكتر من كده؟

فيه ايه اكتر من قعدته على القهاوى و حرمانة من الشغل و الجواز..ده غير الامراض اللى راكباه من الميه و المبيدات

فيه ايه يخافوا عليه؟

صدقينى فقدت تعاطفى و لا يمكن اساهم فى اى مظاهرة و لا اى شىء من اجل البلد لان اهلها من المتضررين الحقيقين لا يريدوا

انا استطيع ان ابقى خارجها و استطيع ان احصل على جنسية اخرى و اكف عن ارهاق اعصابى و اضاعة وقتى من اجل شعب يستعذب الذل من ايام الفراعنة

اسفة على الاطالة و الحدة و لكن لو شاهدتى ما شاهدت كنتى قرفتى من الناس و قلتى تستاهلوا اكتر من كده

أحمد said...

أستاذتى الفاضله إسمحى لى بتقديم التهنئه على هذا البوست ويبدو أنها ستظل تهنئه متكرره فى كل مره أقرألك فيها ولكن دعينى من باب المحبه والإحترام لك أن أضيف لمن ذكرتيهم من الوزراءفئة الفنانين فهم يا سيدتى من أكثر الفئات إستفزازا للمواطنين البسطاءفهل تصدقين أن يتم تسفير الفنان محمود يس لأمريكا لعلاجه بعملية قلب مفتوح كان من الممكن إجراؤها فى قصر العينى وكذلك الراحل فريد شوقى وغيرهم فى الوقت الذى يعلم فيه كل مصرى أن هؤلاء الناس لايقدمون لمجتمعهم أى واجب مستحق عليهم وأبسطها تقديم التبرعات بل قيادة الجمعيات الأهليه لعمل الخير بل أنهم غير ملتزمين بسدادما عليهم من ضرائب نتيجة التلاعب فى قيمة عقودهم المقدمه للدوله وتستطيعين ببساطه إضافة فئة لاعبى الكره الذين يحصلون على أموال ضخمه نهنئهم عليهاكما نهنئهم على نتائجهم المبهره ولكن البلد الذى يعانى من هذا المستوى من الفقروإرتفاع نسبة الطلاق وزيادة عدد أطفال الشوارع وإرتفاع نسبة العنوسه وغيرها الكثير من المشكلات الإجتماعيه والمجتمعيه يجب ان يتحفظ فى التعامل مع الفئات الأقدر والأغنى حتى لايثير حفيظة الفقراء ويدفعهم دفعا لثوره لن تترك أخضرا ولا يابسا وأخيرا أجدنى مطالبا بإعتذار ثلاثى أولا لهذه الإضافه لو رأيت أنها فى غير محلها وثانيا لإطاله قد تكون بلا داع وثالثالتطفلى على مدونتك بآراء قد لاتكون مستساغه من البعض شاكرا لك حسن إستقبالها

أحمد.خ said...

أستاذتى الفاضله بعد كتابتى لتعليقى قرأت تعليق العزيز أوالعزيزه تيرز برجاء إعتبارها نموذج للمتلقى الذى يفقد الثقه بل والإنتماء أحيانا ويكتفى بالسلبيه وينتظر غيره أن يقوم بالثوره ويستثنى نفسه منها ولك وله كل التحيه

Mano said...

الشعب نايم في العسل من زمان
وبجد لازم وقفة من اللي هي دي
عارفاها بتاعة عوكل
وهانفضل كده نعاني لحد مانموت
هي دي مصر ياقطة
تحياتي عالبوست
بس مع احترامي ولا كأنك قولتي حاجه

rony said...

وبعدهالك يا بلد
على فين رايحه وواخدانا لفين؟؟
ربنا يرحمنا

لاسع افندى said...

المشكله اننا لانثق فى البديل او لانرى بديل


تحياتى

karim said...

لو تفتكرى كان فى مقطع من مسرحية الزعيم بين عادل امام و محمد متولى لما كان بيقولة احنا ولاد الكلب احنا خانقين الزعيم هى دى مصر والعرب,تحياتى

ELVIRA said...

المصرى دائما لا يتحرك الا لثلاثة أشياء
تهديد الحد الأدنى للقمة العيش
اهانةمعتقداته الدينية أو رموزها
اهانة كرامته بشكل جارح

غير كدة كله يهون

Kontiki said...

دى حكومة و*** وخونة والى مزبلة التاريخ والمقصلة ان شاء الله كما حدث فى الثورة الفرنسية سرقونا وطلعوا دين ابونا بالضرايب والاسعار وقضوا على التعليم و الصحة والحرية و اللى بيتكلم بيتجرجر
يعالجوا وزير وفى الالاف من المصريين عندهم كل الامراض ومعهمش قوت يومهم التامين الصحى علية العوض من زمان واللى شغالين قطاع خاص ممصوص دمهم
البلد دى مفيهاش قانون فيها حكومة خونة وعبيد للسلطة
20 تهمة فساد لوزير سابق طب فين الرقابة علية من الاول
المصريين فقدوا القيمة البلد بقت لا تعنى شىء لاى مسئول كله بيدور على مصلحتة وازاى يلزق فى المنصب لاطول مدة ممكنة ويحقق اكبر مكاسب ممكنة لشخصة فقط
انما مصر و المصريين تولع مش مهم
اما الثورة هم قدروا يهيجوا الشعب عشان ماتش كورة انما حد يقدر يفتح بقة عشان الاسعار ولا رغيف العيش ولا الوظايف المنعدمة و لا التعليم البايظ ولا الضرايب ! الناس اتربت على الخوف وعايشة به وبتقدس السلطة مع ان الحكومة كلها لخدمة مصر والمصريين مش مناصب عشان يعملوا باشوات على قفانا ويلزقوا على الكرسى بالعشرين سنة
الله يلعنهم كلهم
والى المقصلة كلهم الخونة الحرامية عبيد المناصب
واما التغير معرفش حيحصل امتى
تيرز ردا عن سؤالها اة اللى بينزل الشارع و يتظاهر ويطلع عينة هو اللى مستواة مرتفع فى مؤرخ امريكى قال ان النظم غير الديموقراطية تسعى ان الشعب يفضل يائس ومريض وفقير عشان يفضل غير قادر على مواجهه النظام باختصار يبقى المواطن مش فايق لهم ولا عندة صحة ولا مال ولا سلطة ولا حاسس ان له قيمة عشان يغير اى شىء .

AHMED SAMIR said...

الغريب و العجيب و المستفز بقى جدا ان تلاقي بعد كدة اللي بيطلع يحلف بحياة السيد رئيس الجمهورية و يطالبه بالتدخل لأنقاذ المواطنين الغلابة من الفساد و السرقة
على الرغم من انه هو المسئول الأول على اختيار امثال هؤلاء
شعب عنده انفصام في الشخصية
ملحوظة:
اراهنك ان مرشحي الحزب الوطني في الانتخابات القادمة هينجحوا

عمو عصام said...

قطتى العزيزه...إبعدى عن الوزير بتاعنا أحسن لك

Desert cat said...

Tears
اولا اتمنى اكون عند حسن ظنك دايما
ثانياً انا بستغرب فعلا على الناس اللى تقولك من رضى بقليله عاش وان قولتى لهم الله الغنى عن العيشة اللى بطعم الذل يقولوا لك هو انا اللى هغير الكون انا عندى عيال عايز اربيهم واللى بيمشى جنب الحيط يعيش لحد ما بقوا زى الحشرات بيمشوا جوا الحيط
مش عارفه اقولك ايه بس حالة الاحباط دى مش اصابتك لوحدك

تحياتى تيرز

Desert cat said...

أحمد
لك ان تتخيل لاعب كرة قدم يتقاضى فى الموسم الواحد 12الف جنيه والدولة تديله شقة والريس يقابلهم مقابلة المنتصرين فى معكرة القادسية وعامل غلبان كل همه من الدنيا فى اليوم 12 جنيه والدولة تخنق عليه ولا عزاء للقفراء
اضافتك للبوست قيمة للعادة انت اللى تستحق التهنئة يا عزيزى

تحياتى

Desert cat said...

أحمد . خ
للاسف يا احمد كل ما يحيط بينا من فساد للظالم وخضوع للمظلوم يدعونا للإحباط

Desert cat said...

Mano
طيب الحل ايه ؟؟ هنفضل موجعين كدا وساكتين لحد امتا ؟؟
بجد فى طبقات من الشعب تستاهل اللى بيجرى لها وفى ناس ملهاش صوت واختارت نواب علشان يكونوا صوتهم لكن للاسف السادة النواب بعد ما ما وصلوا تناسوهم وكمان داسوا عليهم بكل جبروت

Desert cat said...

rony
واخدنا على المجهول

Desert cat said...

لاسع افندى
ماهم مش مديين حد فرصه علشان يكون بديل
حتى القادم من الخارج طلعوا فيه القطط الفطسانة قبل ما يجى ولا حتى يقول كلمته النهائية

Desert cat said...

karim
اه يا كريم المفروض ان الشعب ينتحر انتحار جماعى علشان الزعيم يعيش براحته وفى هدوء بلا شعب بلا وجع قلب

Desert cat said...

ELVIRA
وهو دلوقتى لاقى رغيف العيش ولا اصلا باقى له فتات من كرامة ؟؟
هو فى ذل اكتر من الاكل والشرب من مياه المجارى
وبالرغم من كدا بيقولك رضا ربنا يديمها نعمه

Desert cat said...

Kontiki
النظام فاسد
والشعب ساكت
الموظفين اغلبهم مرتشين
والناس بتدفع
القضاة بقوا مرتشين
والكبار بيخرجوا من اى جريمة زى الشعر من العجين والغلبان بيتقدم كبش فداء لحبل المنشفة ؟
ازمة بوتاجز وازمة عيش وازمة سكن
وكل ده واكتر وبرضه مخروسين
ننزل الشوارع بقى علشان مين ؟؟

Desert cat said...

AHMED SAMIR
ماهو ده بقى يا احمد اللى معصبنى تلاقى واحد مش لاقى ياكل وعامل يافطة نؤيد السيد الرئيس
تؤيده على ايه حلو فى حياتك
يرد عليك يقولك ده راجل السلام
من غير ما تراهنى طبعا كسبان وبالثلث

تحياتى

Desert cat said...

عمو عصام

ده الوزير بتاعكو ده لازم الشعب كله يشحت علشان يتعالج ده صحته بالدنيا امال هيطلع لنا قرارات وضاريب تطلع دين ابونا ازاى يعنى