اوعوا تاكلوا عندهم

من اول يوم فى اعدادى لحد اخر يوم فى ثانوى كانت شريكتى فى الديسك اسمها مريان كنا غالبا طول الوقت مع بعض حتى الدروس الخصوصية بتاعتنا كنا برضه مع بعض لو انا قريبة من بيتها بطلع معاها واكل فى بيتها ولو هى قريبة من بيتى بتطلع معايا وتاكل فى بيتنا لو اتاخرت ماما تتصل بمامتها تسال عليا والعكس ماما عمرها ما قالت متروحيش بيتها ومش تشربى ولا تاكلى عندهم ماماتها عمرها ما قالت لها متروحيش بيت مسلمين ولا تاكلى فى بيتهم .. ماما كانت بتحب مريان جدا لاخلاقها العالية وذوقها وتربيتها الراقية ماما ماريان مش كان يحصل مناسبة او عيد غير لما تتصل بماما تهنيها او تقولها كل سنة وانتى طيبة حتى بعد التنسيق ما حدف كل واحدة فينا فى جامعة مختلفة و محافظة مختلفه كنا على اتصال باستمرار ببعض .. بحكى القصة دى كلها ليه ؟ مش ذكريات ولا أيام قاعدة أترحم عليها .. لكن لأنى سمعت إمام مسجد من اللى أخرهم إبتدائية قديمة ويقتص من القرآن آية يستشهد بيها وقت اللزوم .. فى خطبة الجمعه اللى كانت من يومين قاعد هاتك يا تقطيع فى فروة المسيحيين اللى هما اصلا ربنا مش راضى عنهم واللى هما أصلاً هيدخلوا النار لأنهم اختاروا دين الضلال .. ولو عندك زميل مسيحى فى الشغل يبقى مش تقوله غير صباح الخير حتى يهتدى الى الرشد ولا توده حتى يفوق من غيه واحيانا الموظفين بيبقى يجيبوا سندوتشات ويعزموا على زمايلهم اوعى يا أخى المؤمن تأكل من أكله لو مشتريه من المطعم اللى جنب الشغل برضه اوعى تاكل منه حاجه .. توقعت فى البداية ان الراجل ده مختل عقلياً اعتلى المنبر وبعد لما قال كام اوعى ورا بعض قولت الراجل ده بركة وشكله معاه توكيل من ربنا يحرم ويحلل ويدخل اللى على مزاجه النار واللى على مزاجه الجنة .. هو ليه الأوقاف مش بتختار الحمير اللى بتعتلى المنبر ؟؟ هو ليه الناس مش بترد عليه وتقوله عيب تكرهنا فى بعض ؟؟ هو ليه مش ليهم شغلانة غير المرأة و المسيحيين مع ان اخر كلمة للرسول كانت استوصوا بالنساء خيراً والقرآن قال

لَتَجِدَنَّ أَشَدَّ النَّاسِ عَدَاوَةً لِلَّذِينَ آَمَنُوا الْيَهُودَ وَالَّذِينَ أَشْرَكُوا وَلَتَجِدَنَّ أَقْرَبَهُمْ مَوَدَّةً لِلَّذِينَ آَمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لَا يَسْتَكْبِرُونَ وَإِذَا سَمِعُوا مَا أُنْزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُوا مِنَ الْحَقِّ يَقُولُونَ رَبَّنَا آَمَنَّا فَاكْتُبْنَا مَعَ الشَّاهِدِينَ"


يبقى الناس دى بتتكلم على أى دين بالظبط ؟؟ وطالما هما حمير إعتلوا المنابر ليييه ؟؟ هل من وقفة يا وزير الأوقاف ؟؟

تعليقات

‏قال Tears
ده فى كل حته و لعلمك مش بس ضد المسيحيين ده حتى لو مسلمين و مش موافقين على كل حاجة بيقولوها المتخلفين دول برضة يعاملوهم كده

ده مرض اسمه التسلط و جنون العظمة و الاهم انهم فاهمين انهم ربنا و هم اكبر اساءه له...تصدقى انا كتبت تدوينه بعنوان يا دى الخيبه و تقريبا بتصب فى نفس الاتجاه بس ح انشرها لما الماتش يخلص

تحياتى ليكى يا اجمل قطه
‏قال مفكر…
اعتقد ان الأمر يحتاج الى تشريع حاسم يعاقب بحسم الأساءه للأديان
لأن على بال ما تفوق الأوقاف تكون الفاس وقعت فى الراس
‏قال مفكر…
ملحق
انا اعلم ان هناك قانون يعاقب اذدراء الأديان
فلما لا يطبق على امثال هؤلاء بل لماذا لا تطبق عليهم تهمة الشروع فى القتل
لأن الجهاد فى مفهومهم الأجرامى هو تفجير وقتل الأبرياء
بصورة عشوائيه
ارضاء لنزهة دمويه وحشيه ننلفح بافكار تكتسى زورا مسحه تبريريه من المقدس
عزيزتى
هذه دعوه صريحه للقتل وسفك دماء الأبرياء
‏قال مواطن مصري
أزال المؤلف هذا التعليق.
‏قال مواطن مصري
ولكن بغض النظر عن دينو فانا بحترمة كانسان المهم استفاد منو كانسان و ربنا بيحاسب في الاخرة مش احنا
‏قال احمد .خ…
السؤال المحير ياسيدتى هو ماذا يريدون ولماذالا يحترمون الإنسان بصرف النظر عن دينه وأنا مثلا لاأميل للتدين مطلقا ولكن اتعامل مع كل الناس واصدقائى منهم المسيحيين والمسلمين واللادينيين ولم اخسر شيئا بل ربحت الجميع
‏قال مفكر…
والآن
ما الهدف
من اشعال الحرائق الطائفيه
من جانب هؤلاء المتاسلمين
الآن ؟ليس الرد على زكريا بطرس لآنه يمارس نشاطه البغيض من سنوات وسنوات
دون ان يكون له اى تاثير يذكر
ولم يحقق غرضه فى الوقيعة بين عنصرى الأمه
ولكن المتاسلمين اهتدوا الى انهم يمكن ان يوظفوامايقوم به لأشعال الفتنه الطائفيه التى يتمنون ان تؤدى الى الأضطرابات والفوضى فى البلاد فيقفزوا الى السلطه
وهكذا يلتقون فى الهدف مع من يدعون انهم
اعداء الله
هل ننتبه الى هذا المخطط الشيطانى؟
‏قال karim
انا لو منك كان لازم ابلغ عنة اللى زى دووول لازم يتكتموا علشان بيبوظوا عقول الناس اللى مش فاهمة واللى مش بيعرفوا يقروا و لا يكتبوا دييية ناس عايزة الحرق, الللة يخرب بيوتهم
‏قال Mai Zamalkweya…
الكلام ده بردو بيتقال علي مسلمين انا عن نفسي اتكلمت مع بعض الناس اني ضد شيوخ الفضائيات لاقيت بعدها بكام يوم واحده صاحبتي جايه تقولي انهم بيقولوا لكل اللي حواليهم ميتكلموش وميتعاملوش معايا لاني كافره و خطر عليهم وعلي اولادهم
انا فاكره ان صاحبتي الوحيده القريبه مني في ابتدائي كانت بنت اسمها اوليفيا كنت بحبها اوي وهي بتحبني اوي لكن افترقنا بعد ما سيبنا المدرسه وللاسف معنديش اصدقاء مسيحيين بس مامتيصديقتها الوحيده من زمااان اوي من قبل ما تفكر اصلا انها تجيبي (لول)مسيحيه
بخصوص وزاره الاوقاف ايه عرفك ان ميكونش الناس المسؤله عن تعيين اامه المساجد بيوافقوا علي نفس الافكار اصل الفكر ده انتشر وغطي مصر كلها
‏قال Sahran
قطتي العزيزة

بغض النظر عن تقييمنا للدين , ولكن أعتقد بأنه حتى المسلم يجب عليه ألا يقيد نفسه بنصوص قيلت في زمان ومكان مختلفين عن الحاضر الذي نعيش فيه.

طالما بقيت الأدلة الدينية هي التي تحركنا فلا أعتقد أن أي نوع من أنواع الود سوف تسود بيننا
................................
على فكرة

مبروك الفوز والكاس


تحياااااااااااااااااتي لك


ودمت سالمة
‏قال Migo Mishmish
قطوطة الجميله
طب على الاقل المسيحين عدد برضه مش مهم احنا كام المهم اننا معدين كذا مليون. والناس بتتكلم لينا او ضددنا
لكن اللي بقاله فترة معلق في دماغي "البهائيين" يا ترى دول ظروفهم ايه. انا عمري ما شوفت واحد بهائي وحتى قعدت ادور على مدونات ليهم ماوصلتش لحاجة قوي
الناس دول بيتبهدلوا رسمى وكل ذنبهم انهم بيخالفوا دين الدولة. لكن الارهابين امثال الشيخ اللي انتي بتتكلمي عنه ما حدش يقدر يقوله انت بتقول ايه لسبب واحد بسيط لانه من دين الدولة

يعني ارهابي يدين بدين الاغلبيه افضل من دكتور او فنان او حتى مواطن صالح بهائي
لقد اصبحت بلدي، بلداً للبهائم
Love,
MishMish
‏قال لاديني
الأديان عنصرية أصلاً
إذا أردتِ أن تلتزمي بأحكام الدين فيجب أن تكوني عنصرية حتى يدخلك إلهك الذي تؤمنين به إلى الجنة بصفته الإله الصحيح أما إله الدين الآخر فمجرد وهم سيدخل متبعوه النار

هناك تراث إسلامي كبير يمكن تكديسه تحت عنوان كبير إسمه
الولاء والبراء
وخلاصته أن على المسلم أن يوالي المسلمين ويتبرأ من غيرهم
والتبرؤ يبدأ من أوعى تاكل...وينتهي إلى وجوب بغضه ومعاداته وربما قتله باسم الله نفسه

وزير الأوقاف يستطيع أن يتجاوز هذه الأحكام المتبلدة المغبرة بتراب سنين من التخلف والغباء والعنصرية وذلك لأسباب سياسية وإجتماعية يفترض أن تراعى
لكنه حينها لن يكون ملتزماً بأحكام الدين بشكلها الحرفي المطلوب


تحياتي لك
‏قال Kontiki
صباح الخير
كفاية تقليب فى المواجع يا قطة
الاغلبية العظمى على كدة من اول شيوخ الجوامع لحد كل من سكر وشرب مخدرات ونام مع ستات وبعدين ربى شعريتين على دقنة وعمل فيها المهدى
حاجة قذرة
تجربتك مع زميلتك معظمنا عدى بيها فى جيل اتربى على اخلاق ومثل عليا لا التفرقة و لا كان الدين مجال للمزايدة و العنصرية ولا كانت العنصرية والفراغ الفكرى هى محور خطبة الجمعه
القلب شايل منهم كتير الظلمة مدعى التدين الافاقين
ودوا المجتمع والبلد فى داهية
حسبى الله ونعم الوكيل
‏قال عمو عصام…
على فكره ولا مليون منهم ممكن يؤثر فينا وكفايه علينا الناس العاقله مهما كانوا قله وبنوته واحده زىك تساوى عندنا الدنيا كلها وتطمنا ان الدنيا بخير مهما كتروا تجار الدين وكلمه واحده فى مدونتك بمليون برنامج وكتاب من اياهم وربنا يزيد ويبارك فى العاقلين امثالك..وانا اتعمدت اكتب بالعاميه مش بالفصحى لانى حاسس انى بتكلم من قلبى مع انسانه زى بنتى بصرف النظر عن الدين أليس كذلك ياسيدتى أرجو ألا أكون مخطئا(معلش حته فصحى كده عشان بحبها)
‏قال Desert cat
مفكر
تشريع ازاى والاعضاء الموقرين مش فاضيين غير لرفع الجزم وسب الدين
‏قال Desert cat
مفكر
علشان لو حد فكر يرفع عليهم قضية ازدراء اديان هيكفروه ويكفروا المحامى ويكفروا القاضى ويكفروا المحكمه كلها ومش بعيد القاضى يحكم على اللى رافع الدعوى اصل القضاء كمان تم اختراقه

لكن اى كاتب محترم يدعو لاعمال العقل يجروا يرفعوا عليه قضية واما يبتزوه او يطفشوه من مصر
العيب مش عليهم العيب على اللى سايبهم مطلوقين
‏قال Desert cat
مواطن مصرى
تناقض رهيب بشوفه فى الناس
لو حد قال على المسيحى كافر اقوله انت مؤمن ان عيسى نبى ولا لاء يقولى طبعا عيسى نبى امال بتكفر اتباعه ليه ؟ يقولك هما كفره وخلاص
‏قال Desert cat
احمد .خ
انت يا احمد عقل محترم وتربية محترمة لكن فى ناس عندها شعور بالدونية فالطبيعى انه يكون رد فعله دايما الحقد والكره لمجرد ان فى شخص مختلف معاه عقائديا او حتى فكريا دون ادنى مبرر واضح

تحياتى
‏قال Desert cat
مفكر
مرض الغيبوبة اللى اصاب الغالبية العظمى من الشعب اللى معندوش وقت يقرا او يفكر ومعندوش وقت غير الجرى ورا لقمة العيش خلى الناس تصدق اى كلام وهلوسة ومجرد ما يسمعوا كلمة الشيخ قال يبقى كلامه قرآن كريم لازم يتصدق حتى لو كان سمك لبن تمر هندى لدرجة ان الناس بقت بتقدس الاسماء

تحياتى
‏قال Desert cat
مواطن مصرى
مبروك لينا كلنا
‏قال Desert cat
karim
يا كريم ابلغ عن مين ده امن الدولة لما بتقبض على ارهابى بيدمر البلد بيتقال عليهم كفرة
وانا لما ابلغ بقى هيرجمونى وانا واقفه فى بلكونة بيتنا
الله يخربيوتهم وبيت اى كلب بيصدقهم عالم زبالة قرفوا البلد وبهدلوها
‏قال Desert cat
Tears
سورى تيرز تبدلت الردود مش عارفه ازاى
المهم يا قلبى العالم اللى زى دى محتاجه مصحة نفسية وان ربنا مش عفا عنهم وشفاهم يبقى مفيش بديل عن ابادتهم خلى البلد تنضف

تحياتى
‏قال Desert cat
Mai Zamalkweya
ماهو يا مى يا فرحتى كل يوم وزير الاوقاف يطلع لنا بكتاب يحث على المحبة والاخاء والرئيس يقولك غيروا جددو الدينى ونبذ العنف
وشيوخ الفضائيات قاعدين شحن فى الناس
وحمير المنابر قاعدين يدعوا على المختلف معاهم فكريا وعقائديا وتحسى ان البلد سلطة

تحياتى
‏قال Desert cat
Sahran
يا سهران لو ربنا كان عايزنا نفهم تفسير القرآن بطريقة واحدة كان عمل كدا ومش كان على ابن ابى طالب قال القرآن حمال اوجه
لكن نعمل ايه فى الجهلاء والدهماء

الله يبارك فيك يا عزيزى

تحياتى
‏قال Desert cat
Migo Mishmish
يا حبيبتى ونروح للبهائيين ليه
تعالى نقول الشيعة واهم اسمهم برضه مسلمين .. ده اللى عايز ينتقم من حد دلقوتى بقى بيتقال عليه شيعى ووقتها يبقى نهار اللى جابوه اسود من قرن الخروب

تحياتى
‏قال Desert cat
لاديني
وليه لا ندين بدين المحبة ؟؟
الناس هتخسر ايه لو حبت بعضها واللى مش قابل التانى يخليه فى حاله ومش يشتمه اهى الولاء والبراء دى كل واحد اهبل تلاقيه بيقولك الدين فيه ولاء وبراء واننا نتبرى من المختلف معانا عقول وسخة مش ينفع معها حل غير النسف
‏قال Desert cat
Kontiki
انتى عارفه حاجة غريبة اوى لاحظتها فى اللى ربوا شعرتين فى دقنهم وعملوا فيها شيوخ فعلا
كل واحد تلاقيه كاتب فى مذكراته او اثناء اى حديث بيقول انه كان شاب روش طحن وبيلبس بديهات وسلسله وبياكل لبان وبيعاكس البنات ومش بعيد يكون اغتصب كمان بس ربنا تاب عليه وهداااه للى فيه الخير
واثناء الحوار طبعا لو قاعده قدامه مذيعه مينساش يبحلق فيها من اول صوباع رجلها الصغير لحد شعرها
ويقولك ربنا هداه
الناس دى عايزة الحرق والله
‏قال Desert cat
بابى عصام
اكتب براحتك عامية فصحة فوضحى ولا يهمك
:))
تحياتى يا عزيزى
‏قال احمد.خ…
اخجلتم تواضعنا وعموما كنت سعيد بمدونتك والان سعيد بيكى كشخصيه مهذبه ناضجه ومتقبله لفكرة ان يكون الانسان غير مؤمن بالدين وعلى فكره انا متابعك على الفيسبوك وسعيد بمجهودك
‏قال Desert cat
احمد.خ
يا فندم انت منور هنا والفيسبوك واى مكان يتشرف بعقلية ناضجة زيك
تحياتى يا احمد

المشاركات الشائعة