خالـــف تعــــرف


محجبة متزوجة من 3 سنوات بدأت قصتها بشكوى من إهمال زوجها اللى أخدتها دوامة الحياة من أول أسبوع فى الزواج ومش بيخرجها زى ايام الخطوبة ولا بيسأل فيها حتى أصابها الملل وبعد 3سنوات افتكرها تقريبا واتصل بيها من الشغل وقالها انه عازمها على خروجة وعليه قامت لبست فستان مركون جنب اخواته اللى اكلهم خشب الدولاب من قلة اللبس وخرجت مع جوزها رايحين فين بقى علشان يسهروا ؟؟ رايحين يسهروا فى ملهى ليلى على النيل ... قابلهم الويتر على المدخل وقالها عفواً ممنوع دخول المحجبات لان المكان لا يقدم فيه سوى كحوليات.. هنا وبدأت فى الصراخ والشكوى لكل عباد الله الغائدين والعائدين وبعتت استغاثتها للجرايد القومية والمعارضة على مستوى العالم للى بيفهموا عربى واللى بيفهموا إغريقى وتايوانى بأنها مضطهدة فى بلدها وممنوع دخولها ملهى ليلى علشان هى محجبة ومؤمنة وموحدة وملتزمة ولابسة الحجاب علشان الرجالة الحيوانات بيثاروا على روحهم من نعومة ورقة وجمال شعرها ... طيب معلشى يا اخت هو برضه الملتزمات والمؤمنات اوى خالص كدا بيروحوا يسهروا فى ملهى ليلى ؟؟
بيدخلوا قاعات ديسكو ؟؟ ويروحوا يشربوا منكر ؟؟ ايه اللى موديكى هناك يا شابه ما تروحى عند الحاجه حنان ترك ماهى عامله صبايا كافيه للمحجبات فقط .. وليه لما فتيات من غير حجاب راحوا يدخلوا عندها رفضوا يدخلوهم مش قعدوا يولولوا ويصرخوا ويعيطوا ويشتكوا للبشرية كلها انهم محرومين من دخول جنة المحجبات .. راحت أخت راكبة نفس الموجه وراده عليها بشكوى ألذ ألذ بطعم المانجة بأنها فى إحدى الفنادق منعوها من نزول حمام السباحة بالبوركينى .. وانه لوائح الفندق بتقول ممنوع نزول حمام السباحة الا بالمايوه .. طيب يا حاجه يا بتاعة البوركينى انتى كمان شايفه اللوائح
قدامك ما تروحى شابة تنزلى بالبوريكنى فاسو بتاعك ده فى شواطئ فى مصر كتير جدا ممكن تسمح لك تنزلى بالملاية اللف غريب أمر البشر


النهاردة أعلن زعيم الإرهابيين وعميل السوفييت وتربية الأمريكيين بن لادن مسؤليته عن محاولة الهجوم على طائرة أمريكية بواسطة اتنين ستات مجاهدات انتحاريات ما شاء الله دربهم على اعلى مستوى ولا حول ولا قوة الا بالله .. طب الرجالة لما بتفجر نفسها بيطمعهم بالحور العين اللى مستنيهم بالقبلات والاحضان والانتحاريات بقى ؟؟ طمعهم بايه ؟؟ ب72شاب فى الجنة مستنى كل واحدة فيهم برضه لنفس ذات السبب ؟؟
امريكا اخدت احتياطتها ووضعت
أربع عشرة دولة، منها السعودية وأفغانستان والجزائر العراق لبنان ليبيا نيجيريا اليمن الصومال وباكستان وإيران والسودان وكوبا وسوريا، وهي الدول التي صنفتها واشنطن بأنها راعية أو متورطة أو تعاني من الإرهاب.
وبموجب الإجراءات الجديدة يمنع مسافرو هذه الدول من دخول دورات المياه قبل ساعة من وصول الرحلة كما يمنعوا ايضا قبل ساعة من تغطية انفسهم بالبطانيات بشكل لا يعيق مراقبتهم. وإذا هبطت الطائرة في أي محطة مؤقتة لا يسمح لهم بفتح غرفة الأمتعة المختومة من محطة الانطلاق الأصلية، ويعاد تفتيشهم والطائرة في المحطة المؤقتة، كما لا يسمح لهم بالغياب عن أعين عناصر الامن لاي سبب كان.

اتفرجوا بقى بنفسكو على الصراخ والعويل اللى جاى على الخبر وامريكا معروف انها دولة عنصرية وازاى تأمن نفسها بنت الكلاب دى .. طب بتروحوا عندهم ليه لما هما عنصريين وولاد ستين فى سبعين ؟؟وطالما معروفين انهم عنصريين وبيعاملوكو بقذارة جذمكم دابت على سفاراتهم ليييييييييه ؟؟

تعليقات

‏قال نونا مجدى…
عزيزتى القطه سمعتى المثل اللى بيقول لابحبه ولا قادر على بعده؟
‏قال Desert cat
نونا مجدى
يا عزيزتى ياريتهم مش قادرين على البعد بادب
دول لازقين بطريقة مقززة وكمان حاسين انهم فوق البشر
ومش عاجبهم الناس نقولهم عيشوا لوحدكو وسيبوا البشر الطبيعيين يعشوا براحتهم
‏قال karim
انا عايز اسال سوال, كلة حاليا بيتكلم و يقول و يعيد, ايية الحل؟ ولا هى ساقية نفضل ندور ونلف و نعيد و نزيد, لازم حل بقى مش كدة تعبنا من الكلام والاتهامات, بجد حاجة تقرف
‏قال Desert cat
karim
الحل يا كريم فى توعية الناس وقفل قنوات الارهاب الكبرى اللى على عرب سات ونايل سات
الحل الناس تعرف ان الدين المعاملة
الدين محبة
لدين تسامح
مش البس نقاب واحتقر اللى ماشية بشعرها واقول عليها منحلة مع انها ممكن تكون عامل منتج فى المجتمع اما المنقبة عامل متنج فى الديسكهوات
‏قال على باب الله
عارفه اللي عايز ياخد حقه و حق غيره ، ميزان العدل عندهم بايظ تماماً .. عايزين يضطهدوا الأقليات في بلدهم لكن الغرب يعاملهم زي الفل
فعلاً .. خالف تعرف
‏قال Tears
شاطرة جدا جدا و ملاحظاتك فى محلها

هنا فيه كلام عن نفس الموضوع تقريبا
http://www.ahewar.org/debat/show.art.asp?aid=52951

الحل ان كل واحد يعمل اللى يعجبه بس من غير ما يضايق حد او يفرض عليه سلوكه او يدعى انه افضل منه
‏قال إيمان قنديل
ياسلام ياقطة بجد بأستمتع بكتاباتك جدا،،،لسان حالنا واحد

تحياتي ياقمر
‏قال كافى خيرى شرى…
حاجه تقرف بجد أشعر أنى بلا كرامه لإنتماء هؤلاء الأوباش لبلدى التى مرمطواسمعتها فى الأرض ووصموها بالإرهاب وجلبوا عليها العار وأتمنى أن يخرج علينا (راجل)منهم يطالب برفض المعونه الأمريكيه أو تسول المنح ممن يصفونهم بالكفار والإنسان يتعجب مما يرى ويسمع فأحدهم كان يظهر فى التليفزيون وهو إختراع أوروبى ويمسك بسبحه صناعه صينيه ليهاجم هؤلاء الذين منحوه هذه الوسائل ويعلن بوقاحه أن الله سخرهم لخدمتنا صحيح الخيبه ليها ناس
‏قال Kontiki
ضحكتينى
صحيح لية اخدها نايت كلوب مخدهاش لية مثلا حلقة اناشيد ولا تحفيظ
in Rome do as Romans do
ترحم نفسها هى و المحروس جوزها عاوزة تتدلع و تشرب وترقص وتعيش حياتها ساعتين من نفسها تشيل الايشارب الليلة دى يعنى مش شرط تحط رمز دينى على دماغها وهى داخلة مرقص وبئس المصير هههه
اما بالنسبة للجزم الدائبة على بوابات السفارات فدة ضمن مناخ التناقض العام اللى احنا عايشين فية يعنى الواحد من دول يخطب محجبة و مكلفتة وتبقى هى الجوهرة المكنونة وخلفية موبايلة صورة بنت ار بى جى بالبيكينى وبدون
:D
تقبلى مرورى
‏قال Sahran
قطتي العزيزة

أختنا المحجبة تعتقد أنها عندما تلبس حجابها فقد عصمت نفسها من الشرور والمهالك . أنا شخصيا لا أعتقد أن دخول الملهى هو أمر سيء فالإنسان يحب الترفيه عن نفسه , وهذا حق بشري لا يجب أن نتنكر له , ولكن الحجاب يعني وبكل بساطة أن نزهد في حياتنا , ونمضي العمر كله في خوف ورعب من الفتنة فلا داعي حينها للذهاب إلى الملاهي والبارات .
أما المعتوه بن لادن فقد أصبحت لعبته قذرة بشكل لا يخفى على العقلاء , ولن يصدقه إلا البلهاء والحمقى ممن يعتقدون أنهم عندما يفجرون أجسادهم بين الأبرياء فسوف يلقون نعيما واجرا كثيرا ,
ولكن كما تفضلتي فأنا أتمنة أن أعرف بماذا يغري شيوخنا الفتيات لتفجير أنفسهن !!!!
أتمنى لو أعرف


تحياااااااااااااااتي لك


ودمت سالمة
‏قال Desert cat
على باب الله
المشكلة يا صديقى انهم عندهم الاحتلال على حقوق الناس واجب بحماية عقولهم القذرة ولما حد يقولهم اقفوا عند حدكو تلاقى الصوات ونظام خدوهم بالصوت
وده حرية شخصية بقى
‏قال Desert cat
Tears
اولا ميرسى جدا لحسن ثنائك يا جميلتى
ثانيا انا بقابل وجوه من البشر بجد الواحد بيكون نفسه يحرقها مديه لنفسها الحق فى كل حاجه وفى نفس الوقت بحجر على حقك فى الحياة

تحياتى تيرز
‏قال Desert cat
GHARAM
وانا بتشرف بزيارتك جدا يا غرام
ربنا يتمم شفائك على خير يا روح قلبى
‏قال Desert cat
كافى خيرى شرى
هما مش فيهم راجل يا عزيزى
لان كلهم بتحصل لهم اثارة من مجرد خصلة شعر باينة
وبدل ما يتعالج بيكفن المرأة ويقتل العزل علشان يفوز ب72حورية فى الاخر
عالم مقرفة
‏قال Desert cat
Kontiki
يا حبيبتى يعنى هى قاعدة فى بيتها 3 سنين مش خرجت يوم ما تخرج ترجع بمشاكل ومصايب ده انا لو جوزها كنت طلقتها
‏قال Desert cat
Sahran
العزيز سهران
انا مش قولت ان دخول الملهى اليلى امر سيئ بس زى ما تفلضت العزيزة كونتاكى وقالت عايزة تعيش ساعتين تخلع الهباب ده وانت كمان قولت ملحوظة كويسة اوى انها اختارت لنفسها زى معين يبقى تزهد او تروح مكان يناسب ليها
تحياتى
‏قال ELVIRA
بصراحة أنا من أنصار الحرية للأحرار
اللى عاملين فيها زهاد و متدينين و اشتروا الأخرة بالدنيا
المفروض يفضلوا زى ما هم
اللى يخليهم يروحو ملهى ليلى
و لما يمنعوا دخول غير المتهببات للكافيهات بتاعتهم عايزين يدخلوا هم ليه
‏قال Desert cat
ELVIRA
هما مديين نفسهم الحق اى حاجه فى البلد بتاعتهم ومن حقهم يمنعوا اللى مش على مزاجهم من المكان اللى يحبوه لكن حد يقولهم ستوب سيبوا لنا حتة نتنفس فيها هيكون الناتج فضيحة وصويت وعويل
‏قال غير معرف…
lol tany!
begadd ba2a saba7 el foll :D

المشاركات الشائعة