جلا جلا


قاعدة بالليل بتفرج على قناة كوميدى المهم قولت اغير يمكن الاقى الست هيفا ولا الحاجه إيلسه
المهم وانا بقلب فى الريموت والاقى الحاج بتاع تفسير الأحلام قاعد مفشوخ وفرحاااااان بالستات اللى بيتصلوا بيه وانا قاعدة اضحك على العبط والردود المنيلة بتاعته اللى بيرد بيها ..و ابص على فجعه والاقى ايه بقى خير الله ما اجعله خير فى شريط الاعلانات البروفسيور ابو جلمبو بيعالج بالقرآن
بيعالج ايه بقى ابو جلمبو ده بالقرآن يا جرعان ؟
بيعالج البواسير - وبيعالج الصدفيه .. وسرطان الرحم وتاخر الجواز وتاخر الحمل والقلب والضغط والسكر .. والله الراجل ده بركه

بقى بيعالج كل ده بالقرآن ومفيش تدخل جراحه ولا حقن ولا برشام ولا اى نقطة دم حتنزل من جرح ولا اى حاجه خالص كدا ؟
وبعدين ايه بقى اللى عايز يتصل بيه رقم التيفون للجادين فقط
فكرنى باعلانات مطلوب عروسه هيفاء فيحاء والاتصال للجادين فقط
شوية تانية ونيجى للطامة الكبرى
الشيخ حلمبوحة .. اللى لسه راجع حالاً من المانيا
بيعمل ايه بقى الشيخ البركة ده ؟
بيفك السحر والربط والحل والعقد .. والله هو اللى بيقول كدا .. وبيعمل عمل لجلب الرزق ولسرعه الزواج
قولت هى المانيا قلبت المونيا ولا ايه ؟؟
الراجل ده كان هناك بيعمل ايه ؟؟ بيفك لهم السحر وبيعمل عمل
ده ايه الاعلانات العرة دى ؟
دا ايه الانحطاط العقلى اللى العرب بقو فيه ده ؟
معقول التهييس والاستهبال والاستنطاع وصل للدرجة دى ؟
يعنى فى داهيه العلم وفى داهيه الابحاث اللى الناس المحترمة اللى عندهم عقل بجد بيسهروا ويبتعبوا ويخترعوا علاج واجهزة تقنية حديثة
ويجو شوية جرابيع وعالم جاهله متخلفة يقولوا بنعالج بالقرآن ؟
هو القرآن بقى لعبة ؟
هو القرآن بقى سلعه نتاجر بيه
والناس اللى بتصدق وبتصرف فلوس على الشيخ بتاع العمولات ده عقلها فين ؟
والراجل ده ازاى يرضى على نفسه فلوس حرام
والقنوات اللى من العينة دى ازاى دينية وازاى بتاجر بكلام ربنا وبتعمل اعلانات على العبط والتخلف العقلى ده ؟
محتاجين وقفه بجد ومحتاجين نشغل عقلنا مفيش كهنوت فى الإسلام .. مفيش وسيط بين العبد وربه
يا امه ضحكت من جهلها الأمم

Comments

Sharm said…
الاعلام العربي من مظاهر الانحطاط الفكري المتخلف للعرب
malika said…
جلا جلا الحق يا ولا لا سحر و لا شعوذة
بعد 10 سنوات من بدية القرن الواحد و العشرين و احنا في تخلف مستمر و العالم الاخر في تقد مستمر
انتبه السارة ترجع الى الخلف :(((
صباحك زي العسل يا قطة
شوطة تاخد الجهله و المتخلفين و الى جايبنا ورا
karim said…
احنا اللى دهنا الهوا دوكو, دة اللى بنعملة فى اى حاجة وفهلوة ويتلم فلوس و بس, و القانون لا يحمى المغفلين واللى يصدق يستاهل اللى هايحصلوا, تحياتى سيدتى
مفكر said…
لاجديد حدانا
مش هى دى نفس نظرية شربة الحاج محمود فى الموالد التى تعالج جميع الأمراض وتحل كل المشاكل
الفرق ان الحاج محمود كان يقف على كرسى ويصيح
الآن هو يجلس امام الكاميرات والميكرفونات
والغيبوبه شامله ماحقه
الا يردد تجار آخرون بالدين ان لديهم الحل لكل المشاكل مثل الحاج محمود تمام فى المولد
والواقع ان مواجهة هذه الغيبوبه ليست سهله فهى بنت ربع قرن او يزيد من الهطل وخملات الأستهبال المنظم باسم الدين
وفى عذا المناخ المسمم يمكن ان تترعرع كل الشرور والجرائم التى نلخصها تحت مسمى الأرهاب
انه اعلان مدوى بالفشل فى التاقلم مع عصر لا مكان فيه لتجار الدين
والسؤال
متى نتخلص من عقلية الموالد هذه
Mai Zamalkweya said…
انا خلاص استسلمت للامر الواقع ومش هتكلم ولا هفكر في الموضوع ده ويمكن استسلم كمان للقنوات دي حاولت كتير وتعبت و الناس بقت بتعبد القنوات و الشيوخ وهما فاكرين كده بيعبدوا ربنا تعبت لدرجه اني سألت نفسي مايمكن يكون اللي بيقوله في القنوات دي هو اللي صح ماهو مش معقول انا الصح و اللي حواليا كلهم غلط
نونا مجدى said…
الناس خيبتها السبت والحد واحنا خيبتنا مش على حد
Kontiki said…
مفيش فايدة يا بنتى
احنا عرب
عرب
عرب
وصمة يعنى
كل واحد عاوز عصاية سحرية دينية تحل له مشاكلة
اللعب على وتر الدين اكبر مكسب
اللى مش محجبة يقال عليها ******
اللى يربى دقنة واخلاقة **** يبقى شيخ
وكل واحد عاوزله شيخ يفتيلة و يحل مشاكلة
دة استغلال لجهل الناس و بساطة عقولهم و انعدام ثقافتهم ..
دة بيزنس
بيزنس بيجيب فلوس كتيرة جدا جدا جداااااااااااااا
و كله اكل عيش
:)
ماتضايقيش نفسك انتي بس
و بلاش اغاني بلا وجع دماغ
ابقي شوفيلك فيلم اجنبي
:)
مش هتكتبي عن الشهيد احمد شعبان و احداث نجع حمادي
للاسف الجهل والخرافة صوتهم اعلى من الصوت العلم ... في زمن العلم
السؤال هو ..... لو السحر والاعمال والحاجات دي لها تاثير مادي ملموس
وان المشابك ... قصدي المشايخ الي بيدعوا انهم متخصصين في الجن والبعابيع
السؤال جاي
لية احنا مازلنا غرقانين في المشاكل؟
لية القدس مجتلة ؟
لية؟
ولية؟
وكمان لية ؟؟؟
şoмa said…
والله بقت حاجة تنرفز
بقوا يعملوا هبل كتير
ويدخلوا ويقولوا بالقراءن
ربنا يحفظنا
تحياتى ومودتى تقبلى زيارتى المتواضعه لمونتك اجميلة

Popular posts from this blog

قميص دهشور

كل تحرش وانتوا طيبين