دقت الأجراس

دقت الأجراس للإعلان أنه لم يتبقى من الزمن سوى دقائق معدودة لتنبأنا برحيل ضيف ظل بيننا لمدة 365 يوم شهد بيننا آلام وأحزان لا تعد أما الأفراح فحروف كيبوردى اراها تنظر إلىّ ومتصدراها علامة التعجب ويليها الإستفهام ؟
دقعت الأجراس لأعود لبداية العام الذى أتى إلينا شاهد على مجزرة غزة التى حدثت بفعل قيادة غبية بيهيمة لا يهمها إلا مصالح شخصية فقامت بنقض وعود وعهود لتضرب صواريخ لهى أشبه ببمب العيد الذى يستحى الأطفال اليوم من حمله فى ظل التطور التكنولوجى الهائل حتى يأتوا بالدمار والويلات على شعب أعزل وبدل من الجهاد الذى لا يعلمون منه غير الاسم فقط هرول هنيه الله لا يهنيه واعوانه الى الجحور ومشعل راح يستجم فى فنادق سوريا ... وما زال الجميع يتابع وكسة قواد حماس ..
دقت الأجراس واثناء ذلك الغزو الغاشم على فلسطين .. ظهرت النوايا والأبواق التى تحمل كل حقد وكره لكل ماهو مصرى لتنطلق إلينا قناة لقيطة من بلد تحتضن ثلاث قواعد أمريكية ليكون كل وظيفتها الردح والشرشحه لمصر والمصريين .. ومع هذه المزايدات الرخيصة لم يترك حسن نصر الله الفرصه لظهوره بدور المجاهد ايضا بعد ان خرب لبنان ودمرها وبدل من حرب العدو كانت الحرب الاهليه .. ولم يكتفى بعاره بل ظهر ليحرض الشباب المصرى والمصريين بخطاب تحريضى لهو اقرب إلى الدمار بعينه .. ولم اعلم لماذا لم يرسل شباب لبنان إلى فلسطين بدلاً من تحريضه لشباب مصر ؟ بل خيبته التقيله ظهرت بعد اطلاق صاروخ من لبنان وسارع بكل قوته يعلن ان هذا الصاروخ لم ينطلق من لينان وانه غير مسئول عنه .. الخوف حلو برضه والجبن سيد الأخلاق خصوصا مع اشباه الرجال
ولم تنسى إيران زيادة البنزين على النار وكأنهم جميعا اتفقوا على التضحية ولو باخر جندى مصرى ايران التى اعادت مجموعة شباب من المطار وقدمتهم لمحاكمة لانهم فكروا مجرد التفكير يروحوا فلسطين ...
دقت الأجراس لتعلن نهاية 2009 الذى شهد تفجير الحسين ؟؟ ولماذا ؟ اسألوا اللى بيصوتوا على بناء الجدار
دقت الأجراس لتذكرنا بحكم الإعدام الصادر فى قضية العشق والدم كما تطلق عليها الصحافة على رجل الأعمال الشهير هشام طلعت مصطفى ومحسن السكرى فى قضية مقتل الفنانة سوزان تميم
دقت الأجراس لتذكرنا ان هذا العام شهد عودة المرأة الحديدية هدى عبدالمنعم التى أثارت الرأى العام والتى كانت مادة ثرية جداً للمسلسلات والافلام منذ هروبها
دقت الأجراس لتذكرنا بخلية حزب الله والتى تسللت إلى مصر عبر الأنفاق التى يصرخ الأرزاقية والمهللتية اليوم من أجل ان تفتح مصر على البحرى للإرهابيين والمهربين .. اكل العيش برضه يحب الخفية
دقت الأجراس ولازالت المرارة فى حلوقنا مما حدث وما زال يحدث من تطاول البربر الجزائريين على المصريين
دقت الأجراس لتذكرنا بعصابة طالبان التى تتاجر فى الحشيش على مرأى ومسمع وتهدم المدارس وتحرق وجوه الفتيات الراغبات فى العلم من أجل عدم خروج المرأة للحياة لتعود للوأد وحرق اى محلات خلاف التى تبيع المسواك والاشرطة الدينية باسم الإسلام والإسلام من إجرامهم وبلطجتهم بريئ ؟
دقت الأجراس مع نهايات العام والفتنة الطائفية مشتعلة فى صعيد مصر من قتل راجل واخيه كل ذنبهم انه ابو ولد على علاقة ببنت مسلمة .. ثم فى اليوم التالى قتل قبطى فى بيت دعارة مسلم .. ونعم بالجهاد والله
دقت الأجراس لتعلن لنا عن بداية عام جديد ولا زال اطفال الشوارع اسفل الكبارى عراه والبطالة فى ازدياد والتحرش وقلة الادب ايضا فى ازدياد
دقت الأجراس بقدوم عام جديد ينبأنا بحراك المياة السياسية الراكدة منذ سنين حتى ذكمت رائحتها الأنوف تنبانا بترشح البرادعى للرئاسة
دقت الاجراس بقدوم عام جديد لتبدأ المرأة السعودية فى المطالبة بحقها .. طيب والمصرية مش ناوية ؟؟
كلى أمل ولكنى أحتاج إلى التفائل ليكون العام الجديد عام سعيد

ويارب 2010عام جديد سعيد على الجميع

بلدنا وإحنا حرين فيها

مصر عملت جدار فولاذى لحماية حدودها من المتسللين والإرهابيين والمهربين .. مش مهم اللى حماس عملته من مظاهرات لانها حقها تعمل كدا ومش حقها لأنهم شركاء لينا فى الوطن لا سمح الله ولا لاننا خلفناهم ونسيناهم وعلشان كدا كان المفروض ناخد رأيهم قبل ما نفكر نأمن بلدنا ونحميها إنما لأن حماس بتسترزق من الأنفاق دى وتجارتها كدا هتبور وتبوظ وعض كلبى ولا تعض رغيفى .. وزى ما أرزاقية فلسطين اللى هما الحماسوية اللى زى مقالها مهدى عاكف طز فى مصر وابو مصر قالتها حماس لن نتنازل عن الكرسى حتى لو ابيدت غزة عن بكرة ابيها يعنى برضه طز فى غزة وابو غزة وبالفعل نفذوا كلمتهم واستخبوا فى الجحور مع الفيران ومش خرجوا غير بعد ابادة غزة وقتل العزل من الشيوخ والنساء والاطفال وبعد ما كانت القضية الفلسطينية اختزلت فى غزة فقط وضاع اسم فلس طين فالطبيعى انهم يجعجعو ويثوروا زى التيران على اكل عيشهم والسبوبة بتاعتهم .. لاقينا ارزاقية مصر بيدعو لوقفه احتجاجية لوقف بناء الجدار الفولاذى .. وواضح ان اليومين دول الجهل و الزعيق و الشعارات صوتوهم عالي يعنى شوية الارزاقية بتوع الوقفه اللى وقفوا رفعوا شعارات وجعروا شوية كل هدفهم الاعلام يصور ويبقى اسمهم مناضلين مجاهدين .. واذا سمعت الصوت العالى فاسال عن الهدف .. يعنى قنديل النظام اداله قبل كدا باقدم شوز وشوية العيال الارزاقية دول كل واحد عايز يبان فى الكادر حتى لو بيلطم على وشه وبيشق هدومه زى المجنون المهم يكون له مكان وخلاص .. اصل فى ناس كل لما بيحسوا بانهم لا قيمة ليهم بيعملوا اى حاجه علشان الناس تنشاور عليهم حتى لو فى شكل العفريته المحروقه فى الصورة المهم انه يبان وخلاص .. يعنى ايه بلد لها حدود ولها سيادة تبقى لكل من هب ودب ؟
يعنى ايه اسيب ناس تدخل بيتى زى الحرامية من خلال انفاق تحت الأرض ؟
يعنى ايه جماعه الجهاد اللى اتقبض عليها فى مصر وفيها مصريين وفلسطينين ولبنانيين كانوا مقضينها سهراية عبر الانفاق يدخلوا ويخرجو من والى مصر رايحين جايين ؟؟
يعنى ايه شباب مصرى يتسلل لليبيا عبر الأنفاق ؟
يعنى ايه سلاح داخل وخارج من البلد من خلال أنفاق ؟
يعنى ايه ضبط صيع من طالبان باحزمة ناسفه فى مصر متسللين عبر الأنفاق ؟
هو تدمير البلد مش زى ماهو هيقضى على المصريين هيقضى برضه على ارزقية الوقفات الإحتاجيجة
ولا المهم انهم يبانوا فى الكادر وخلاص

شوفى والنبى ماشية ازاى ؟؟

كلمات انطلقت من سائق التاكسى أثناء توجهى لإحدى المصالح الحكومية وبالرغم من انى كنت رايحة متاخرة وكل شوية استعجله علشان يوصلنى بسرعه قبل ما المصلحة تقفل ويبقى ضاع يوم باكمله .. إلا أنه كان ماشى يبص على اللى ماشية ازاى واللى مش ماشية ازاى ؟ قولت له هو احنا فى ايه ولا ايه يا اسطى ؟ احنا عايزة اخلص انا بقولك مستعجلة ومش باقى غير نص ساعه قدامى وانت ماشى تبص على البنات .. قالى لالالا انتى فهتى غلط يا اؤستاذه دى هى اللى شكلها ملفت اوى للنظر .. بالمناسبة البنت اللى كان شكلها ملفت اوى للنظر اعتقد انها كانت لا تتجاوز 16 سنة نحيلة جدا لابسه جيب جينز طويلة وتشيرت ومحجبة .. ولما سالته ايه اعتراضك عليها قالى ماشية تتكلم فى الموبايل وتضحك .. يعنى اعتراضك على انها بتتكلم فى الموبايل ؟ ولا بتضحك ؟ قالى اعتراضى على الاتنين وكمان شايفه لابسه ايه ؟ ماله كمان لبسها ؟ قالى لبسها ضيق يا اوستاااذه بصوت متحشرج وكأنه هيرجع فى وشى وهو بيقولها .. قولت له انت مش شايف البنت كانت ازاى ؟ دى هيكل عظمى متحرك .. قالى برضه البنت المحترمة تلبس واسع وتمشى فى الشارع بثبات مش ماشية تتكلم فى موبايل وتضحك دى اسمها مياعه وقلة ادب وبعدين الواحد بيتعب يعنى ؟ يبقى مشكلتك يا اسطى لانك بتتعب تبقى تروح لدكتور مش تمنع البنات من المشى والكلام وبعدين معلشى سؤال بس انت حد بيختار لك تلبس ايه قبل ما تخرج من بيتك ؟ قالى لاء طبعا قولت له حد اتصل عليك وانت ماشى فى الشارع مش بترد على الموبايل علشان مش تمشى تتمايص فى الشارع ولو قال كلمة او حكى موقف طريف مش تضحك ؟ قالى لاء برد .. قولت له طيب حد بيرقابك فى الشارع ويراقب حركاتك ويشوفك بتضحك او بتعيط او بتصوت حتى ويعلق عليها ؟ قالى يمكن حد بيكون واخد باله من حركاتى لكن مش يقدر يعلق عليها .. قولت له ليه ؟ قالى اصل لو عمل كدا يبقى هقطع له لسانه على طول .. سالته حسابك كام يا اسطى ودفعت له الحساب وانا رجل جوا التاكسى ورجل بره قولت انت تستاهل قطع لسانك وقلع عينك .. علشان مش حد معينك تراقب الناس وتعلق على تصرفاتهم .. ومشيت بسرعه لانى بامانة كنت خايفه ينزل من التاكسى يجرى ورايا .. الى كل ليلى امشى براحتك والبسى اللى انتى عايزاه ولو حد علق علي تصرفاتك طالما تصرفات غير مخجلة ومش خايفها منها اوعى تسيبى حقك .. انتى مش نصف كائن فى المجتمع ليكى ما للذكر من حقوق وعليكى ما عليه من واجبات .. يبقى حقك تمشى وتلبسى وتتكلمى براحتك وعملا بمبدأ سواق التاكسى لو حد علق عليكى يبقى اقطعى لسانه .. طبعا انا قصدى من قطع لسانه بالرد عليه وتعرفيه قيمته كويس ... هو ممكن يكون انسان فاشل وشايفك ناجحة او حاسس بنقص قدامك .. وبما اننا فى مجتمع ذكورى بحت لازم انه يقلل من قيمتك لتفوقك عليه .. وكل يوم وكل الليلات متفوقات وناجحات ومشرقات فى المجتمع

( مشاركة كلنا ليلى )

ومن بعدها مش بدخل عندها

كنا قاعدين فى قعدة دردشة عادية جدا وفجأة لاقينا فى وشنا خبر الحكم لفتاة منقبة بدخول المدينة الجامعية .. قولت يادى الارف احنا مش هنخلص بقى من اكياس الزبالة دى .. ضحكت ضحكة مكتومة وقالت لى تصدقى لو كنت سمعتك من شهر بالظبط بتتكلمى عليهم بالطريقة دى انا كان ممكن اقاطعك لاخر العمر .. قولت لها بصى أكياس الزبالة دى مش واخدة أهتمامى يعنى علشان تقاطعينى ولا تواصلينى بس اعمل ايه كل لما افتح المواقع الاخبارية الاقى خبرعليهم .. كل لما اقعد مع حد مش عارفة بتيجى سيرتهم ازاى .. كل لما امشى الاقيهم بيتكعبلوا تحت كعب جزمتى بس وحياتك بدوس عليهم وامشى ولا بيهمنى

قالت لى حقك والله تعملى اكتر من كدا .. ده واضح انك كاتمة فى قلبك اوى منهم ؟ قالت هى واحدة بس اللى واجهتها من الناس دى وكرهتنى فيهم كلهم .. ليه عملت ايه البت دى ؟

قالت لى دى ست جارتنا اتجوزت وبعد اول طفل جابته جوزها مات على فكرة هى لسه صغيرة يعنى تقدر تتجوز وحلوة كمان .. الحلاوة مش كل حاجه يا دودو بس ايه اللى حصل منها ؟

قالت لى ساعات كنت لما احس زهقانة وانتى عارفه انى مش بشتغل كنت بروح اقعد معاها او هى تيجى تقعد معايا المهم كنا بنتبادل الزيارات ما احنا الاتنين فاضيين بقى .. وكان اهلى على فكرة مبسوطين بيها اوى لانها منقبة يبقى من وجهة نظرهم الادب كله والاخلاق كلها .. ومرة ورا التانية بدات تتكلم فى التيلفون قدامى تصدقى انها بتخلى الرجالة يحولوا لها رصيد ؟

لو جت على الرصيد بس يبقى كويس يا دودو .. قالت لى الراجل من دول تمسكه كلام ناعم وحوارات مش اقدر احكى لك عليها وترقعه الضحكة السخنة من هنا وفى اخر المكالمة تقوله حولى رصيد مع انها بترن عليهم بس وهما اللى بيتصلوا .. قولت لها وبيحول قالت لى طبعا هو يقدر يقولها لاء .. ليه يا دودو مش يقدر يقولها لاء هى ماسكة عليه ذله ولا حاجه ؟ قالت لى يا بنتى هيتحرم من المكالمات النار بتاعتها .. طيب وانتى يا دودو موقعك من الاعراب هنا ايه ؟ انا بدأت اقصر معاها بالتدريج وتيجى عندى البيت اعمل نفسى مشغولة بتجهيز الاكل او تنضيف الشقة واسيبها قاعدة لوحدها لحد ما تزهق وتقوم تروح .. ولو قالت لى تعالى اشربى معايا الشاى اعتذر لها باى حجة علشان مش احسسها انى قرفانة منها مع انى بقيت لما بسمع صوتها بس من غير ما اشوفها ابقى عايزة ارجع اللى فى معدتى .. طيب يا دودو انتى دى بتقولى كل اللى بتعمله مكالمات سخنة امال اللى بتلبسه علشان تصادق الطلبة وتروح وتيجى من غير ما حد يعرفها ؟ واللى بتلبسه علشان تنصب على حد .. ده اخر اختراعاتهم واحدة تيجى تقولك ممكن موبايلك بس احط فيه الشريحة بتاعتى اعمل منه مكالمة اصل تليفونى ضايع ومحتاجه اعمل مكالمة ضرورى ولو حد طلع اهبل واداها الموبايل بتاعه تحط منه الشريحه يبقى يستعوض ربه فيه اصله هيجيبها منين وازاى ما هى متخفية زى قطاعين الطرق .. لاقيت دودو كملت لى هما مش مسكو ولد رايح لعشيقته وهو لابس النقاب وكمان منعوه فى المدينة الجامعية علشان مسكو ولاد داخلين لبنات وهما لابسين النقاب .. قولت لها هايل انك متابعه قالت لى ومين فى المجتمع مش تايه عن بلاويهم .. قولت مش حد تايه بس ده اكل عيشهم قالت لى يعنى ايه قولت لها يعنى واحد قاعد يجعر فى التى فى على النقاب والاغبياء يصدقوه مش يعرف ان ده اكل عيشه وفى نفس الوقت مش يقدر يتكلم ولا يجى ناحية اى قضية تهم الوطن والمواطنين والا هيتعلق من لباليبو .. والمنتفعين من وراه بيدافعوا باستماته اصل بمنعه هيتقطع عيشهم .. اه لو تعرفى انا بقيت بقرف منهم ازاى مش هتصدقينى .. قولت لها لاء مصدقاكى وهذا هو المطلوب اثباته .. كل البشرية تقرف منهم لانهم بالفعل مقرفين

هو القرضاوى بقى نبى ومحدش عارف ؟

مقال قريته فى موقع اليوم السابع بعنوان
فتوى الكريسماس للقرضاوى .. تتهم عمرو خالد " بالشهادة الزور "
طبعا القرضاوى العالم العلامة بالقوى يقتى فتوى صريحة مانعه باتة بعدم تهنئة الإخوة المسيحيين فى أعيادهم والإحتفال بالعام الميلادى الجديد وخد بالك انت وهو وهى لو قولت لواحد زميلك مسيحى فى الشغل كل سنة وانت طيب فى العيد بتاعه يبقى انت كدا بتساعده على الكفر .. ولو انت يا مسلم اشتريت شجرة الكريسماس فى ليلة راس السنة وفرحت انت واهل بيتك بسنة ميلادية جديدة تبقى انت كمان كافر وعلى العرب المسلمين المقيمين فى بلاد الكفر والفسوق لا يحتفلوا معاهم باعياد الميلاد ولا يشتروا الشجرة ولا يهنوهم هما يروحوا يعيشوا عالة عليهم .. ياخدوا منهم معونة بطالة ويستفيدوا بعلمهم ويشتموا فيهم .. وعلى اللى يشوف مسيحى يوم العيد بتاعه يتف فى وشه على طول علشان يعرفه انه كافر وانه مش من مستوانا نقوله كل سنة وانت طيب .. وكل ده ليه رداً على منع سويسرا بناء المآذن بناء على قرار ديموقراطى جداً .. الديموقراطية اللى القرضاوى واخوانه بيعتبروها كفر .. اى إنحطاط ده وقلة قيمة واى عار يلحقه القرضاوى بالإسلام والمسلمين ؟ يا شيخ وانت واضح فعلا شخت وخرفت .. الإسلام غير كدا تماماً .. النبى محمد كان جاره اليهودى بيأذيه ويرمى له الزبالة فى طريقة وهو رايح يصلى الفجر .. ولما فى يوم مش لقى زبالة سال عليه لاقاه مريض راح زاره .. يا شيخ إذا كنت تعرف ابسط حقوق دينك عليك .. كنت عرفت ان الرسول الكريم مات ودرعه مرهون لدى يهودى يبتاع منه الطعام لأهل بيته ؟
يا شيخ .. مين اللى قالك ان المسيحيين كفار ؟ هو القرآن الكريم مش خص السيدة مريم العذراء بسورة باسمها كمان واسمها سورة مريم ولا انت مش بتقرا قرآن ؟ انت تعرف ان مريم تبقى ام السيد المسيح اللى انت بتقول على اهله كفار ؟ ومين اللى قالك يا قرضاوى انك هتدخل الجنة وانت المسلم والمؤمن اللى قاعد ينشر الكره بين الناس وبعضها ؟
المشكلة الأكبر بقى فى التعليقات اللى فى المقال الذى تم ذكر نص الفتوى فيه .. وكأن الناس اصبحت حفنة من الثعابين السوداء تغرس انيابها فى المجتمع وكأنهم اصبحوا جميعاً اتباع الديانة الفتشيشة وهى الديانة التى تقدس الاشياء المادية للأعتقاد بوجود قوى سحرية بداخلها أو لأنها قادمة من عالم الآلهة فى السماء
قاعدين يقدسوا فى القرضاوى وكأنه نبى مش بشر يخطئ ويصيب
ولسه بتقولوا اشمعنا احنا اللى عايشين فى الضنك ده وبناكل اكل مسرطن وبنشرب مية مجارى وماشيشين فوق اكوام زبالة .. ماهى من عقولكوا اللى صدت من عدم التفكير .. ورميتوا بمفتحاها فى اقرب مرحاض صادفكو
الله محبة
وكل الاديان دعت للحب والتسامح ونبذ العنف
ومن النهارده لحد آخر العمر يا كل إخواتى المسيحيين فى العالم كله صلوا وتعبدوا ومارسو طقوسكو واللى مش عاجبه يشرب من البحر الميت .. كل سنة وأنتوا فى حب وخير وسعادة
كل سنة والدنيا منورة بيكو ... كل سنة وكل العالم من شرقه لغربه لا يهم اسمه لا يهم دينه لا يهم جنسه فى حب وتسامح ووئام .. اما اللئام فإلى الجحيم جميعاً والهى لا تشوفوا يوم سعيد دنيا ولا آخرة قادر يا كريم يا بتوع الفتن يا كلاب

على طول ضاربة بوووز

بدأت كلماته بالشكوى من الحياة ومن الدنيا كلها .. كل الناس ضده حتى أمه وأبوه .. بيته بيهرب منه علشان مش يشوف مراته اللى بوزها يقطع الخير من البيت .. يا ساتر يارب ليه كدا .. يحلف بكل ايمانات المسلمين والكفار بالمرة انه ما يعرف .. اصله بنى آدم طيب اوى خالص ودايما اللى فى ايده مش ليه .. تقريباً الشكاوى دى بدأت من اول خمس دقايق اتكلمنا فيهم وكأننا أصدقاء من رابعه إبتدائى وانا مش كنت واخدة بالى .. تابع الحكاية وانه كل يوم يتخانق معاها وش النحس اللى بتستناه كل يوم ومش بتنام غير لما يرجع لها البيت فى الفجر .. طيب مش يمكن بتكون قلقانة عليك .. لا مش قلق هى عايزة تعرف انا بروح فين وبعمل ايه .. يا سلام ودى حاجه تضايقك ؟

ده انت المفروض تفرح ان فى حد مهتم بيك

وبعدين بترجع لها البيت الفجر كل يوم ؟ هو انت بتشتغل ايه اصلا ؟

انا مش بشتغل ... انا مستنى فرصه علشان اسافر بره .. نعم ؟ امال بتصرفوا منين ؟

هى عندها شقة عايشين فيها .. وامى بتجيب لنا الأكل

فى سرى ومش مكسوف على دمك ؟ وبعدين هى مستحملة واحد جبلة بالشكل ده وبالرغم من كدا قاعد تشتم فيها ؟

انا كنت مسافر قبل كدا وكان معايا فلوس .. ولما رجعت من السفر هى اللى رمت الهلب حوليا لحد ما وقعتنى وكانت حلوة ورقيقة وطيبة .. وبعد الجواز ظهرت على حقيقتها دى بنى ادمة مش تتعاشر .. كل شوية رايح فين وجاى منين ومشاكل فى الفاضى والمليان .. لحد ما زهقت منها ..

بالرغم من حالة الارف اللى اصابتنى من اللى خلفوه بعد الكلام ده الا انى جيت على نفسى وغيرت نبرتى وعملت نفسى متفقه معاه ..

بصراحة هى مش عندها حق المفروض تسيبك براحتك وتنام هى بدرى وانت حتى تبيت بره البيت ولا الله لا يجعلك ترجع تانى يعنى انت هترجع وفى ايدك الديب من ديله .. ده انت حتى امك بتصرف عليك

نعم ؟

لا ابدا ده انا بهزر معاك .. طيب مراتك دى عندها شقة وانتوا عايشين فيها .. لو قدامك واحدة تانية ومعاها فلوس ولا سفر ولا بتاع بقى ماهى حتصرف عليك هتعمل ايه ؟

هى فين دى بس ده انا اعيشها فى حياة كلها عسل .. طيب لو قدامك شغل بس بطريقة غير مشروعه ومريح جدا وهتعمل منه فلوس كتير ..

بصى من الاخر انا عندى استعداد اعمل اى حاجه .. البلد دى مش عايزة غير كدا كله قاعد يقلب فى كله انا يعنى اللى هعيش بمبادئ ..

ما انا متمسك بمبادئي اهو ومش لاقى اشترى علبه سجاير

ايه ده انت طلعت بتعرف تنطق كلمة اسمها مبادئ اهو .. وكمان بتقول متمسك بيها .. هى فين المبادئ اللى عندك دى ؟

يعنى متجوز واحدة وعايش فى شقتها

امك بتصرف عليك

عندك استعداد تجرى على اى واحدة معاها فلوس فى سبيل انها تصرف عليك

عندك استعداد تشتغل فى اى حاجه وكل حاجه حتى لو غير شرعية المهم انك مش هتتعب وهتلاقى فلوس

وجاى تقولى عندك مبادئ .. حقيقى اللى اختشوا ماتو ..جتك الارف

انا شوفت قبل كدا اللى بياخد من بنت فلوس ومش يرجعها

واللى بيضحك على بنت علشان تجيب له هدايا ولما يشوف واحدة تجيب هدايا اغلى بيروح لها

لكن تناحة وسخافة واستنطاع وقلة ادب كدا فى الحقيقة عمرى ما شوفت ولا قابلت

وطبعا بعد الكلمتين دول كان لازم اجرى قبل ما كانت تصعد روحى لبارئها

للأسف نجح الغرب الكافر

للأسف نجح الغرب الكافر ده كان تعليق لشخص وزيه تعلقيات متشابهة كتير على قرار رئيس جامعة القاهرة الدكتور حسام كامل

منع المنقبات من التدريس

وبالرغم من إن القرار جاى متأخر ومتأخر جدا كمان إلا إنه قرار صائب وبرضه صائب جدا وعقبال باقى مؤسسات الدولة حتى يعود لمصر الأمن والأمان

ايه بقى سر نجاح الغرب الكافر فى قرار زى ده على اساس ان الغرب الكافر ابن الكلب ده سايبين كل اللى وراهم واللى قدامهم وشاغلين نفسهم بس بوجه المرأة ازاى يتغطى .. ده على أساس انهم مفضيين نفسهم للتقئ من خلال قنوات متطرفة وفازوا بكل جدارة بجميع جوائز العالم على جواز كشف وجه المرأة من عدمه ومحرمين على نفسهم يتكلموا عن الفساد وعن الإنحلال الأخلاقى .. وإحنا اللى قاعدين نبتكر وشاغلين نفسنا بالأوزون و معالجة الانحباس الحرارى والإنتاج النووى هالكين نفسنا فى المعامل لاختراع ادوية تفيد البشرية دول حتى مش فى حد خالص من عندهم فاز بجايزة نوبل واحنا فاز من عندنا خمسة وخميسه فى عينهم نفر نفر .. ياااى الناس دول بجد حقوديين ووحشين وعايزنا نسيب اختراعتنا وابتكارتنا وابحاثنا ونعمل زيهم ندور على قطعة القماش اللى بيستخبى وراها كل منحرف علشان يطلع يقابل صحبته فى وجود اهلها او زوجها .. او كل عواطلى عايز يسرق ولا حدش يحس بيه .. او كل قاتل يدخل يرتكب جريمته ويدبح ويشفى ويخرج ولاحس ولا خبر هيجيبوه منين وياسلام بقى على اللى عايز يفجر نفسه ممكن يعمل زى الاخ بتاع الصومال اللى لبس النقاب وارتدى الحزام الناسف وراح فجر نفسه فى الفندق اللى كان فيه الوزراء اعداء الله والوطن .. الأخوات المنقبات الفاتنات المقتنعات انهن عار وعورة والنبى اعدوا جنب الحيط بقى

ذات مطــر

الشتاء معشوقى الأول الذى طالما حاول على مدار سنين ان ينافسه ولكنه لم يستطيع حتى استسلم للأمر الواقع .. ذات مطر كنا نخطو على ذلك الكورنيش القريب البعيد ايدينا داخل جيوب معاطفنا الجميع من حولنا يهرول للإختباء ونحن نسير بتأنى كالطفل الذى يحبو ولا نريد للكورنيش ان ينتهى ولا للسماء أن تكف عن البكاء .

ذات مطر .. سألنى عندما وصلت إليه دقات قلبى التى يسمعها المارة من جوارنا وكلانا يحتضن فنجان قهوته بين يديه .. بينما أرى قطرات المطر مع الأشجار وحركة السيارات والمارة من خلال زجاج الكافية ترسم لوحة لم يستطيع تجسيدها أعظم فنان وكأنهم إجتمعوا جميعاً فى هذا اليوم لعقد إتفاق ضدى حتى يفاجئونى جميعهم فى وقت واحد .. لما كل هذا العشق لهذا الفصل تحديداً حيث بروته وقسوته ؟

أجبته .. اعشقه لأن فى قسوته حنانه وفى جنونه هدوئه .. اعشقه بكل غموضه .. وكأننى اعطيته إشارة البدء حتى يكون الغموض هو سرنا المقدس وطقس نمارسه كلما فرقتنا الظروف التى هى نفسها تعيدنا بنفس الغموض

بتوقيت غيمة شتوية خرجت إلى شرفتى حيث كان كل الكون نيام وصوت المؤذن فى الفجر الله اكبر يملأ كل مكان .. قطعت عواطفى كل المسافات وذهبت حيث أنت خانت عقلى رغم كل وعودها بحفظ اسراره ولم تملك نفسها الا وهى تبلغك عن مدى إحتياجها لوجودك من أجل قلب لم ينبض يوماً من أجل أحد سواك .. تخبرك بأن القلب لا ينبض إلا باسمك ويعاهدك أن يظل ملك لك إلى آخر الحياة .. وقبل ان تنتهى من اعترافها على ورقة بين يدى قاطعها هاتفك ذاك الغامض الذى يأتى فجأة دون موعد مسبق ليكون اول كلماتى لك كيف اتفق توقيت هاتفك مع توقيت عواطفى لاقتحام طرقات قلبى سراً .. دون جدوى أجبت بكل غموض هاتفتك لاذكرك فقط أنه حان الآن وقت المطر .. لامد يدى خارج شرفتى ليفاجئنى التوقيت بالفعل انه كان ذات مطر

لما كل هذا النواح ؟؟

حظرت سويسرا بناء المآذن نتيجة لتصويت الأغلبية .. طيب وايه المشكلة ؟؟ وايه الداعى اصلاً للنواح والتباكى والغضب المزيف اللى فى المواقع الاخبارية ده ؟ وطلعت من جديد نظرية المؤامرة ضد العرب والمسلمين والحقد على الإسلام مع ان سويسرا فيها اكتر

من 30000 مسلم مش عارفه هيحقدوا ازاى على الاسلام والمسلمين وسيابين العدد الهائل ده عندهم بيشتغل حتى لو مش بيشتغل بياخد بدل بطالة وبياكل وبيشرب وعايش حياته عادى يعنى .. طيب ايه الضير فى حظر بناء المآذن اذا كان ربنا جعل الأرض مسجدا وطهورا ؟

ايه الضير فى حظر بناء المآذن اذا كانت المآذنة مجرد شكل معمارى ويوجد فى مصر مئات المساجد دون مآذن ؟

ايه الضير فى عدم بناء المآذن اذا كان فى ميكرفون فى وقت الصلاة بيخرم ودن الجميع يعنى مفيش مؤذن بيطلع فوق المآذنة ويرفع الصلاة ولا حاجه ؟

ايه الضير فى حظر بناء المآذن والقانون مش قال نهدم المآذن القديمة مثلاً ولا عدم بناء مساجد جديدة ؟

وبعدين حظر المآذن ده جه فين فى سويسرا ؟ طيب دى بلد وليها قوانينها وهى حرة تبنى مآذن تهدم مآذن كل واحد حر فى قوانين بلده .. ولا تكونوش فاكرينهم زينا بالرغم من وجود قانون يجرم السرقة وبالرغم من كدا البلد مليانة حرامية ده انت بتبقى راكب مواصلة ومحفتك تتسرق ولا الست ماشية فى الشارع وشنطتها تتشد منها .. حتى الأطفال مش سايبينهم بيسرقوا موبيالاتهم بعد ما يثبتوهم طفل وفى عينه مطوة هيعمل ايه يعنى الطبيعى انه يسلم الموبايل للكابتن الحرامى والاتنين جنيه اللى واخدهم مصروف وان كان فى شنطته كمان سندوتش مربى مفيش مانع البلطجى اللى ثبته ياخده بالمرة يمكن جعان .. بالرغم من ان القاتل بياخد اعدام برضه جرائم القتل فى زيادة مطردة واحكام الاعدام شغالة وبالرغم من كدا مفيش حاجه اسمها التزام بقانون .. اللى قاعد فى اى بلد اوربى وحاسس باضطهاد ومش عجباه قوانينها بدل يتعامل بهمجية ويلم له خمسة ستة من اصحابه ويعملوا مظاهرة وعايز البلد تطبق القانون اللى على مزاجه يرجع لاحضان بلده اللى برضه مش بتعمل حاجه على مزاجه .. واللى فى بلد عربى وقاعد يتباكى ما يطبق الاسلام العملى يعنى لا يكدب ولا يغش يصل الرحم يبطل يتحرش بالبنات والستات ويتقى ربنا فى افعاله ووقتها هيثبت للعالم كله ان ده الاسلام الصحيح مش الهمجية والارهاب وتفجير المدارس وجلد البنات على لبسهم والتحرش بالبنات بحجة ان لبسها مش عاجبة ولو لبسها كويس يقولك اصل طريقة مشيتها على اساس انه موكل بمحاسبة الناس فى الارض