Desert Cat Search
قطه الصحراء: 8/1/09 - 9/1/09

Sunday, August 30, 2009

تفخيخ المؤخرات

كنا منذ عهد مضى نسمع عن القنابل الموقوتة والتى تنفجر بعد مدة معينة فى المكان المراد تفجيره وكانت تستخدم فى محاربة الاعداء حكرب 73 لكن البعض استخدمها فى محاربة ابناء وطنه كتفجيرات الحسين ثم تطورت القنبلة الى حزام ناسف وده طبعا عبارة عن متفجرات يلفها المنتحر حول وسطه ويروح يقف فى مكان فيه بشر ايا كانو نوعهم سواء اعداء او احباب مش مهم الاهم انه لغى عقله وحط مكانه نخاعات مسلوقة اصله فاكر لما يفجر نفسه بالحزام الناسف ده يبقى كدا مجاهد و رايح الجنة من اوسع ابوابها ودى انتشرت اوى فى اخر عهد احمد ياسين مؤسس حماس اى فتيت اللى تقيئ وتف فى طبق فتة وقال ان اللى يفجر نفسه يبقى مجاهد ؟؟ هو المجاهد مش بيكون فى ساحة المعركة ويقابل الرصاص بالرصاص وان مات فى المعركة يبقى شهيد وان مش مات يبقى بطل ؟؟ اما اللى ماشى وسط ناس آمنة ده وعارف هينفجر امتا والساعه كام فين جهاده ودفاعه ؟؟ نرجع لموضوعنا وهو اخر اختراعات تنظيم القاعدة حيث ذهب اخ مجاهد جدااااااااااااا من بتوع القاعدة مساء الخميس لمقابلة مساعد وزير الداخلية السعودى للشئون الأمية الأمير محمد بن نايف وقال ايه رايح يتوب من قتل النساء والاطفال والشيوخ ومن تجارة الحشيش مر مرور الكرام بعد التفتيش الأمير قابله بكل ترحاب لكنه انشغل فى مكالمة هاتفية واثناء المكالمة انفجرت المتفجرات اللى كان حاططها فى اللمؤاخذه بتاعته .. يعنى وصل العهر الفكرى لارهابيين القاعدة مواراة المتفجرات فى مكان حساس بجسم بنى آدم ده إن كان يصح أن يطلق عليه أصلا بنى آدم ؟؟ أى قذارة وإنحلال اللى تخلى واحد يفكر فى وضع شيئ فى فتحة شرجه إلا إذا كان فعلا متعود دايمااااااااااااااااااا وطالما متعود مش فارقه معاه متفجرات من غيره ولا عجب فى حالة الشذوذ اللى عايشينها عواهر القاعدة .. وللأسف هذا الفعل القميئ لن يمر مرور الكرام وعلى كل من يفكر فى السفر إلى دول أوربا أول نزولهم للمطار ينزلوا البنطلون ويرفعوا ايديهم فوووووووق للتفتيش ومش حد يخاف او يتضايق او يقول الغرب مضطهدنا دى احتياطات أمن يا جماعه وإحنا اللى بنجيبه لنفسنا وحمد الله على سلامة الأمير نايف

Thursday, August 27, 2009

اوعدك مش هتقدر تغمض عنيك

بس بليز شوف الفديو للآخر حتى نشعر جميعاً بمدى التعب والإرهاق الذى عاناة حسين يعقوب فى الابحاث والنظريات حتى وصل إلى هذا الإكتشاف المذهل الذى حتماً ولابد سيغير حياة البشرية جمعااااااااااااااااء



وبعد الانتهاء من مشاهدة هذا الاختراع الهائل الرائع اللى محصلش جدا اوى خااااااالص

اترككم مع هذه الاغنية الرائعة

http://www.4shared.com/file/35134416/79a2a8bb/___online.html
انا اسمى توتو وعايز احارب والنبى
ادونى مطوة
ادونى مطوة اغز بيها المعتدى
ادوله بومبه
ادونى بومبه افرقع بيها المعتدى
ادوله لبانه
ادونى لبانه انفخ بيها المعتدى
وبلاش قنبله
وبلاش قنبله احسن اسورق والنبي
مصر
مصر
مصر.....
مصر الجديدة هى ارضى وملعبى
خدو سيناء
خدو طابابس سيبولنا نادى الشمس والنبيييي

Wednesday, August 26, 2009

ممنوع دخول الرجال

ورقة مكتوبة بالخط العريض وملزوقة على باب زجاجى بداية شكيت انى اتلخبطت وبدل ما ادخل محل هدايا دخلت تواليت للسيدات رجعت دققت النظر تانى فى الورقة والباب اللى ملزوقة عليه .. الباب كله طبعا عليه عروض من انواع الهدايا اللى بالداخل طبعا خطر فى بالى وانا واقفه اتفرج على الورقة مش على الهدايا المعروضة انى ممكن الاقى جوا انجلينا جولى ولا بريتنى سبيرز او اضعف الايمان جينفر لوبيز

واستعنت على الشقا بالله ودفعت الباب للداخل ودخلت وراه المحل والاقى واحدة قاعدة على الكرسى تزن من الحجم 300كيلو متشحة بالسواد ومبينه الوجه والكفين .. وقتها حسيت انى مش داخله محل هدايا فى مصر تقريبا حصلت لى معجزة فى الشهر الكريم وانتقلت السعودية ولا افغانستان ... وبدل ماساأل على الهدية اللى انا داخله علشانها ابتسمت لها وسالتها على الورقة .. هو انا مثلا لو جاى معايا جوزى دلوقتى اوقفه فى الشارع علشان ادخل اشترى انا هدية طبعا انفرجت اساريرها عن ضحكة على اثرها لفيت وجهى فى اتجاه تانى خالص .. وقالت لى معلشى اصل انا لسه جاية مصر من سنة بس ومش متعودة اتعامل مع رجالة .. هو حضرتك كنتى عايشة فين ؟؟ لاقيتها بتقولى كنت فى البحرين وكنت بشتغل فى مدرسة بنات لمدة 7 سنين يعنى مش بتعامل مع رجال خالص .. قولت لها ماهو بيجوا صدقينى من اى دولة عربية وبيتعاملوا عادى خالص مع الرجال هو اينعم الذكور المصريين وليس الرجال يستحقوا ضرب النار لكن معلشى ده محل مفتوح ومن حق اى حد يدخله والا لو كل واحدة كانت مسافرة ورجعت استقرت وعملت محل وكتبت عليه ممنوع دخول الرجال فالافضل نبنى لنا مدينة مستقلة نعيش فيها بعيد عن الرجالة ونريح ونستريح .. طبعا هى حبت تقطع الكلام وبدل ما تقولى وانتى مالك يا حشرية جاية تشاركينى ولا ايه .. راحت سالتنى بطريقة مقتضبة حضرتك محددة هدية معينة ولا تحبى تتفرجى ؟؟ جاوبتها انا هتفرج يمكن الاقى حاجه احسن من اللى انا محدداها .. قالت لى خلاص تحت امرك .. واثناء الف وادور ببصرى على الهدايا يلح عليا سؤال عايزة اسأله بس الحقيقة مقلقة تقولى اطلعى بره انا هقفل المحل خلاص مش هفتحه تانى .. بس مش ينفع ممكن يجرى لى حاجه لو مش سالته المهم اخدت نفس عمييييق .. هو ليه حضرتك مش لبستى النقاب وسبتى المحل مفتوح عادى لكل الرواد ؟؟ طبعا خيبت ظنى وضحكت بغيظ وقالت لى جوزى رافض ؟؟ .. قولت لها جوزك ده عسل قالت لى نعمممممممم .. ها لا مفيش .. سالتنى بطرقة رخمة طبعا هو انتى بتعملى دراسة ولا حاجه على الستات اللى رافضين الاختلاط ؟؟ جوابتها طبعا بالنفى .. ولانى شوفتها جابت اخرها منى قولت لها ميرسى اوى مش فى حاجه عجبتنى وقبل ما تخبطنى باقرب حاجه تقع ايديها عليها كنت بره باب المحل .... طبعا واضح ان البعض من اللى بياسفروا بلاد
عربية ويرجعوا مش بيتاثروا بس بطريقة اللبس لاء ده كمان بيتاثروا بنظام الحياة عامة .. ازاى بقى بمنتهى السهولة انسلاخ المصريين من هويتهم ؟؟ ليه بنقلع نفسنا من جذورنا وبكامل ارادتنا الست فى محور حديثها بتقولى انها خايفة ان راجل يفتتن بيها وانها هتشيل ذنبه وانا بمنتهى السخافة بقولها هى فين الفتنة دى ؟؟ ولو افتتن انتى تشيلى ذنبه ليه ما يغض بصره ..قالت لى اسمعى محمد حسان يمكن ربنا يهديكى .. قولت لها اقرى انتى الدين الصحيح والسيرة النبوية الشيخ محمد حسان واخوانه قاعدين يقولوا كلام على حسب هوى الزبون المهم المكسب .. قالت لى انا عندى خبرة كافيه .. خبرررررره ايه علاقة الخبرة بالقراءة والمعرفة ؟؟ لو فضلنا على الحال ده مش بعيد نلاقى كام خيمة وشوية غنم فى ميدان التحرير على رمضان اللى جاى

Tuesday, August 25, 2009

مستنى ايه ياوزير الداخلية ؟؟؟

منذ يومين طالعتنا الصحف بمقتل الدكتورة ايمان حمزة طبيبة نساء وتوليد بمحافظة سوهاج بمستشفى طهطا العام تسلل الى عيادتها الخاصة رجل يرتدى النقاب وقام بتسديد طعنات لها وقام بتقطيع جسدها الى اشلاء ويخرج بطريقة طبيبعة .. طبعا ماهو متخفى جوا كيس الزبالة ده هو ايه اللى يمنعه من الخروج بطريقة طبيعية ؟؟
وقبلها القاء ماء نار على وجه طبيبة بمستشفى العريش اثناء خروجها على يد رجل يرتدى النقاب ؟؟؟
وأخيراً وليس آخراً لطالما تنتشر هذه الأكياس السوداء من الزبالة بالتجول فى شوارع مصر بكل راحة بال وطمأنينة
اختطاف الطفل يحيى محمد ابراهيم 12 سنة من المطرية والداه يعيشان فى الكويت وهو يعيش مع خاله قام باختطافه رجلان وسيدة ترتدى النقاب واتضح بعد خطف الطفل ان السيدة التى ترتدى النقاب ما هى الا شاب قام بتوجيه السباب للطفل بعد اختطافه
وزير الداخلية مستنى ايه بعد كم البلاوى دى اللى كل يوم تطالعنا بيها الصحف من بداية ظهور هذا الشيئ القميئ بمصر ؟؟
بعد سوء الاوضاع باستغلال قطعة القماش الكئيبة اصبح منعها فرض أمنى وعلى كل من ترى فى نفسها عورة تخليها بين 4 حيطان

Saturday, August 22, 2009

انا عايزة رمضان زمان


بالرغم من النهاردة اول ايام رمضان .. لكن مفيش روحنيات زمان .. مفيش عبق رمضان اللى الواحد كان يحسه من اول ما يبدأ شعبان .. من بداية اليوم مستنية اشوف جديد حاجه مختلفة احس اننا فعلا فى رمضان .. مفيش غير قنوات التى فى بتعرض كووووم المسلسلات اللى هيعمل تخمة عند المشاهدين من اول يوم .. ونزول جاراتى العزيزات علشان يقولوا لى كل سنة وانتى طيبة .. وبالرغم من كدا مش حسيت بود اوى من ناحيتهم يمكن علشان لسه جديدة فى وسطهم او انا نفسى رافضه الاختلاط ... ولما سالت ماما هو ليه رمضان كل سنة بتختفى بهجته عن السنة اللى قبلها قعدت تشرح لى الفرق بين ايام رمضان والايام التانية وفوايد رمضان والصيام برضه مش الاجابة اللى انا مستنياها يا مامى ...راحت منفضه لى بطريقة لذيذه مسكت الموبايل وقعدت تاكد على اخواتى انهم معزومين عندنا على الفطار اول يوم مع انهم عارفين يعنى .. نزلت الشارع قولت يمكن احس ان فيه جديد .. الشوارع فاضية نسبيا وبين كل اربع شوارع مثلا ناس عاملين شريط زينه موصلينه من بلكونة لبلكونة على استحياء وكانهم عاملين حاجه مش كويسه لدرجة ان الزينة مش باينة اذا كانت دى زينة ولا حبل غسل اتقطع بفعل الهواء فى حر اغسطس ... فين ايام زمان اللى كان الواحد يمشى فى الشارع يلاقى طبقة من شرايط الزينة والفوانيس تحس انها سقف معلق من ابداع سكان المنطقة .. بكار انتهى بانتهاء دكتورة منى ابو النصر .. وعمو فؤاد كان حلم وجدو عبده الله يرحمه ... دلوقتى فى مسلسلات + مسلسلات × مسلسلات ÷ مسلسلات = مسلسلات
فين روحانيات زمان وايام زمان ورمضان زمان ؟؟؟

Tuesday, August 18, 2009

شهر الملايين مرحب

شهر ملايين الصائمين والمصلين طبعا شهر رمضان بس برضه فى الشهر ده فى ناس تانية الملايين تمثل لها عدد الجنيهات اللى بتقبضها وهم اصحاب اختراع احدث واسهل حرفه والتى لم يكن لها وجود فى الحياة قبل 10 سنوات تقريبا وهى مهنة الدعاة .. فكان زمان لا يحتاج الشخص وسيط بينه وبين خالقه لان من المعروف ان الدين هو العلاقة الوحيدة الروحانية بين الانسان وربه اما الوسطاء الالهيون اللى عينوا نفسهم حديثا تحت مسمى داعى اسلامى وكل سندهم او واسطتهم هى عمة وجلابية وزبيبة واتقان رسم التكشيرة كويس لكن برضه فى دعاة مودرن بيلبسوا افخم البدل المستودرة وقاعدين يصرخوا زى العرسة على الفضائيات ولما يلاقى الاضواء خفتت من عليه شوية واخدها منه زميل ارزقى جديد يقعد يطلع يقول انطردت من مصر ويرجع يقول لاء مش انطردت نظام هعلب لاء مش لاعب وفى برضه الداعية الكاجوال اللى بيلبس قميص نص كوم وبنطلونات جينز والموضوع مش محتاج غير شوية تمثيل على كام شعراية خفاف فى وجهه ويحط عينه فى الارض واهو كله بيقلب رزقه حسب ما يحب الزبون وان لقى ان الزبون مش هيدخل عقله الكلام الا بفديو كليب مفيهاش حاجه يعمله فديو كليب احنا لينا غير رضا الزبون اللى دايما على حق .. يعنى الجامعات بتخرج كل سنة آلاف الطلبة يسرقوا مثلاً ولا يشحتوا ؟؟ لاء فى ناس بتفكر فى الربح السريع وعدة الشغل جاهزة ومش مكلفة خالص بالعكس مع اول ظهور ليه على اى فضائية من الفضائيات اللى فى بدايتها كانت فديو كليب .. ولما لاقت ان القنوات الدينية بتكسب اكتر واسرع كمان قلبت وبقت دينية اوى خالص هيكسب احلى فلوس ولو فضل يشتغل عمره كله مش هيعمل نصها ... طالما الفضائيات بقى بتعمل عقود بالملايين دى
توقيع الداعية الشهير سلمان العودة عقدًا خياليًا
مع مجموعة mbc بمبلغ 12 مليونًا لمدة عام واحد فقط، فإن هذه الأيام .. التي تسبق شهر رمضان لن تخلو ككل عام من كذا خبر عن توقيع عقود من دعاة مشهورين – وإن لم تعلن - لصالح قنوات فضائية تسعى للحصول على حضورهم لجمهورهم الكبير، وخصوصًا الدعاة المشهورين بالوسطية والاعتدال من أمثال العودة والقرني والعريفي وغيرهم
وللست اللى كانت بتقولى الشيخ اللى فى القناة الفضائية بيقول ان الاختلاط حرام .. قولت لها ياريت توضحى لى معنى الاختلاط .. قالت لى انك تروحى لبياع يقولك الحاجة بعشرة تقولى له لاء بخمسة .. قولت لها ده انا متفقة معاكى فيه انه حرام بس مش علشان اختلاط .. لاء لانك كدا تبخثية حق السلعة المعروضة .. قالت لالالالا فى ستات بتتدلل وبتتمايع علشان يخفض لها .. قولت لها فى الحالة دى لو خفض لها يبقى هو اللى غلطان والمفروض يروح يتعالج من داء النسوان اللى بيعانى منه .. قالت وزميلها فى الشغل اسمه اختلاط قولت لها حلو انتى بتقولى زميلها فى الشغل صح ؟؟ يعنى المكان اسمه شغل وهما قاعدين بيخلصوا مصالح للناس مقابل مرتب شهرى بياخدوه من الضرايب اللى بتدفعها برضه الناس .. يعنى مش عازماه على بيبسى وحطاه له فيه حاجه اصفره فى مكان خاص ... لاء ماهى لما تكلمه صوتها عورة حتى لو بتساله على حاجه فى الشغل الست دورها الاساسى هو الاسرة وتخريج اسرة صالحة للمجتمع .. مين اللى قالك الكلام ده يا ستى .. الله يبارك له الشيخ محمد حسان .. روحى يا شيخة الله لا يبارك لك ولا يبارك له ... الراجل بيحلل القرشين اللى بيقبضهم من صاحب القناة اللى بيقعد يرجع فيها على العقول التلفانة اللى زيكو .. قالت لى على فكرة هما بيطلعوا فى الفضائيات لوجه الله لارشاد المؤمنين الصالحين اما انتى واللى زيك نهايتكو قريبة .. وراحت على ما اعتقد عامله لى بلوك وديليت
* أجور وعقود الدعاة
ووفقًا للعديد من المصادر والمتناقل في بعض وسائل الإعلام فإن أجور الدعاة عن الحلقات في حالة عدم وجود عقد يتراوح مابين 2000ريال - 5000 ريال، ومؤخراً أصبح العديد من الدعاة يرفض الظهور في القنوات التي لا تمنح مقابلاً . ولم تجد هذه القنوات بداً من الرضوخ لشروط أكثر المشائخ بحكم حاجتها لهم في المواسم الدينية على وجه الخصوص فبدأ يظهر ما يشبه بورصة أو قائمة أسعار غير معلنة بحسب شهرة الشيوخ،في ظل وجود أكثر من ثلاثين داعية في درجة تعتبر على مستوى عال من العلم والحضور لدى الجماهير .وغالباً ما تعرض برامجهم في أوقات مهمة جداً بعد الإفطار أو قبل السحور أو بعد صلاة العصر
.

Saturday, August 15, 2009

احتلال غزة


عارفه ان فى حد ذكى اوى هيقولى ما هى غزة محتلة طبيعى .. بس معلشى ممكن استذكى انا عليه واقوله غزة كانت محتلاها اسرائيل وبقالنا كام شهر مش فى اخبار ولا حتى اهرام بتقول ان حصل مصادمات بين جيش الاحتلال وبين الجيش الفلسطينى .. الا كل الاخبار والاهرام وحتى الجمهورية وكمان الجرايد والمجلات المستقلة والمعارضه واللى لسه اصلا مش صدرت بتقول ان المصدامات اللى بتحصل بين فتح وحماس .. بين حماس وسكان غزة علشان بيصيفوا مرة وعلشان ناس اصحابهم زاروهم قاموا هجموا عليهم فى بيوتهم واعتقولهم بحجة انهم مش قرايب مرة وعلشان ستات بتلبس بنطلون وبتضحك بصوت عالى مرة والجديد والغريب والمريب بقى على الساحة هو الامارة الاسلامية اللى جاية جماعة سلفية تعملها فى غزة .. ما يعرفوش ان هنيه هيقف بالمرصاد لكل من يفكر فى تهديد ولا يته ده ساب الاسرائليين يفجروا ويستخدموا اسلحة محرمة دوليا وعملوا ما بدالهم فى نساء وشيوخ واطفال غزة وهو بنفسه قال لن اتنازل حتى لو ابيدت غزة عن بكرة ابيها وطبعا الراجل وعد فصدق فلم يخرج من جحرة اللى كان بيصرح منه الا لما اتساوت المدارس والمنازل والمستشفيات كمان بالارض ومش كان فى حد فى غزة غير بعض الطيور ومخلفات الحيوانات .. ولما خرجوا من الجحور حفظا لماء الوجه اللى هو مبقاش موجود قالوا انتصرنا الله اكبر والمهبلتيه بتوعهم قالوا هو ده الجهاد والا فلا فعلا حكومة حماس دى حكومة مجاهدين بجد والف مبروك الانتصار العظيم اللى طبعا كلنا شفناه وعرفناه وهو ابادة غزة عن بكرة ابيها ... والنهاردة بقى هنية بعد انتصاره فى ابادة غزة يواجه العدو اللى عايز يعمل امارة اسلامية فى دولة فلسطين اللى هى ملكية خاصة طبعا من حق اى حد يقول انا جاى اعمل امارة هنا باسم الله انا واخد التوكيل من ربنا انى اعلم الناس الاسلام واحتلهم واحكمهم باسم الاسلام اشمعنا حماس يعنى هما اسمهم حماس واحنا جند انصار الله يبقى احنا اللى اسمنا رنان اكتر وسلفيين كمان متشددين اوى خالص يبقى من حقنا اقامة الامارة هنا فى غزة
ودلوقتى بقى مع فزوة غزة
حماس وفتح حاربو بعض حماس مش سابت ولا اسرة فى غزة غير لما اعتقلت من ابنائها حتى النساء تم اعتقالهم وحماس وجند انصار الله حاربو بعض وراح قتلى ما راح مش مهم الاهم اين اختفت كلمة اليهود او ابناء صهيون من حروب حماس ؟؟ اللى يعرف الاجابة يتصل على 0900

Thursday, August 13, 2009

أحلى من الشرف مفيش


عمّان- ا ف ب
وجهت محكمة الجنايات الكبرى تهمة القتل العمد لأردني قتل ابنة شقيقه القاصر بداعي "الدفاع عن الشرف" اثر علمه بأنها تعرضت للاغتصاب قبل عام وانجبت طفلا غير شرعي، على ما افاد مصدر قضائي، الأربعاء 12-8-2009.
وأوضح أن "المتهم اعترف بجريمته فورا مدعيا انه ارتكبها لتطهير شرف عائلته لعلمه بأن ابنة شقيقه اغتصبت العام الماضي وانجبت طفلا قبل نحو شهرين واحتفظت اسرتها به".
فى اى شرع وفى أى قانون بنت قاصر تتقتل مرتين مرة باغتصابها ومرة بسبب جهل عمها ؟؟
يعنى مكافأة المغتصب قتل الضحية ؟؟ يعنى بدلاً من قتل الجانى نقتل المجنى عليه ؟؟
اى قوانين دى ومين اللى وضعها ؟؟
ربنا فى شرعه قال نقتل اللى تم الاعتداء عليها واغتصابها ؟؟ ده حتى الزانية والزانى ربنا قال اجلدوهم مش اقتلوهم لان هو وحده اللى يملك الحياة والموت .. يبقى باى حق هؤلاء الجهلاء من البدو يفصلوا قانون على مزاجهم لقتل الفتيات .. دى مش اول جريمة قتل تحصل ويتم لزقها بالشرف .. اصل للأسف اللى بيتقل وبيزلق كلمة شرف فى الجريمة بيتم تخفيف العقوبة عنه .. وده مش فى الأردن بس يعنى بدلا من تقويم الضحية واعادة تأهيليها بالتوكيل اللى مدينه الجهلاء لنفسهم من الله يروحوا يقتلوا المجنى عليها .. دى الحيوانات مش بتعمل كدا ؟؟ الوحوش بتحمى بعضها
أتعجب على ذئب لا يأكل لحم ذئب وبشر يأكلوا بعضهم بعض

Monday, August 10, 2009

العصفورة طااااارت


نزلت مع اختى الكبيرة وطفليها نشترى بعض احتياجتها وبالمرة فوانيس رمضان طبعا كان شرطى قبل الخروج فانوس ويكون كرموبو قالت لى موافقة يا اكبر طفلة توجهنا الى مكاننا المنشود باركنت فى اقرب مكان ينفع ونزلنا نشوف احتياجتها وفوانسينا قربت جولتنا على الانتهاء بعد عشرتاشر ساعة من اللف كعب داير وبعد خبط ورزع مش عارفه الناس بتمشى تخبط فى بعضها ليه تقريبا البشرية كلها نازلة فى نفس اليوم بتاعنا.. اشتريت فانوس على شكل الحاج كرومبو وباسنت اخترتها جى جى بنت اختى الذيذة كل حاجتها لازم تبقى انوثه طبعا وبما ان هدفى المنشود اللى انا خارجة اصلا علشانه اتحقق وكرومبو فى شنطة بين ايديا يلا نمشى بقى علشان انا تعبت قالت لى خلاص خدى آثل ومفتاح العربية واستنوا ربع ساعة بالظبط هكون اشتريت اخر حاجه وجاية لكو .. قولت ومالو تيجى بالسلامة .. اخدت ابنها ولازم اكون الخالة الحونينة اشتريت له ايس كريم وليا طبعا ورحنا ننتظر فى العربية واثناء احنا قاعدين ناكل الايس كريم وقاعد يسمعنى اغنية نانو القطة نطت نطة للمرة السبعتلاف وواحد عدى من جنبنا 4 ولاد وماشيين يشاوروا لحد وراهم وانا بقيت مشتته النظر قاعدة ابص على الاشارات شوية عدت عربية اوبيل سريعه .. انا قولت بس هيحصل عملية خطف هنا واتصل بالبوليس وابقى كدا عملت واجب وطنى .. شوية فى موتسيكل عليه 3 شباب رايحين جايين وفاتحين اغنية انا شارب سيجارة بنى بصوت يصحى اللى نايمين فى القبر .. قولت اشطة فاتت بنت سمبتيك خالص بتتكلم فى الموبايل بصوت عالى وقاعدة تقول خلص بقى تعالى بسرعه انا مش عارفه امشى خالص ... الشارع واسع شوية وعلى اليمين حديقة للطفل وحديقة تانية للكبار يفصل بينهم شارع جانبى ... شوية العيال بتوع الموتسيكل رايحين جايين يلفوا حواليها ودى وقفت عمال تتلفت يمين وشمال ومش عارفه تتحرك من مكانها سمعت صوت اختى الكبيرة جاية وبنتها من الاتجاه التانى وبتبص على البنت اللى الولاد بيلفوا حواليها وبتقولهم عيب انتوا مش عندكو اخوات بنااااات راجل كبير تقريبا فى اواخر الاربعين ولا همه دخل جرى ناحية البنت وهو بيزعق يلا يا ولاد الكلب يا صيع من هنا وفى نفس الوقت بيطمن البنت وبيقولها متخافيش طبعا العيال لما شافوه داخل بالطريقة دى جريو زى الكلاب وراح للبنت وقالها رايحة فين يا بنتى قالت له رايحة بيتنا هو مش بعيد بس مش عارفه امشى من الشباب دول ماشيين يلموا بعض وجايين ورايا من اول الشارع قالها طيب مش تخافى راح مشاور لتوكتوك معدى وقاله وصلها زى ماهى عايزة بس معلشى انا مضطر اخد رقمك .. طبعا شكله طلع ابن حلال وقاله لو عايز كمان رقم البطاقة انا معنديش مانع قاله لاء كتر خيرك انا اخدت خلاص رقم التوكتوك الـ4 شباب اللى عدوا فى الاول واقفين قدام حوالى 100 متر واللى راكبين الموتسيكل جريوا من شارع جانبى والعربية الاوبيل رايحة جاية ... الولاد اللى واقفين قدام بصوا لبعض وضحكو بصوت عالى خلالالالاص العصفورة طااااارت وراحو راكبين زى التيران الهايجة مع صحابهم فى العربية ومشيو .... انا قاعدة واخده آثل فى حضنى وحاسه جسمة كله بيتنفض .. اختى جت وعلى وجهها كمية علامات تعجب غير طبيعية .. سالتها مالك ؟؟ قالت لى ايه اللى بقى بيحصل فى مصر ده ؟؟
ده جزء من كل يا حبيبة قلبى حكيت لها اللى حصل لنهى رشدى قالت لى كنت متابعة على النت بس مش كنت متوقعه ان الموضوع بقى ظاهره كنت فاكرة حاجه وانتهت حكيت لها الحادث اللى اتعرضت له آسر ياسر .. حسيتها شردت فى عالم غير العالم
من شوية كنتى بتقولى لى زهقتوا غربة وناويين تستقروا ؟؟
كان ردها انها مش شافت الغربة الحقيقية غير لما ولاد البلد الواحدة بيطاردوا بعض واستباحوا عرض بنات الناس لبعضهم البعض حبيت اغير الجو شوية قولت لها بس على فكرة عجبنى اوى موقف الراجل .. البنات بتتعاكس فى الشارع وبتتبهدل والناس بتقول هى السبب خارجة ليه .. الراجل ده طلع جدع اوى وكويس اوى وموقفه عجبنى اوى .. وده معناه انه لسه فى خير .. وقعدت اقول ياااارب كتر من امثاله واحرمنا من السلبية ومن مجعراتية الفضائية اللى مش ليهم شغل غير انهم يلبسو الجلابية المينى ويطولوا الدقن مترين ويلبسوا الطرحة فوق راسهم ويقعدوا يعلنوا عن اثارتهم وافتتانهم بشعر المرأة وجسم المرأة العورة بدل ما يوجهوا جهودهم للعواطلية اللى ماليين الشوارع

Friday, August 7, 2009

مسلمو المهجر والمطالبة بتطبيق الشريعة فى الغرب

مقال كتبه الأستاذ حامد عبدالصمد والمقيم بإحدى دول أوربا

ناقش فى مقاله ما يريدونه مسلمو المهجر وهو تطبيق الشريعة فى بلاد الغرب الكافر ألا هما لما عايزين يطبقوا الشريعه سابو ليه بلاد الإسلام الحق واللى كل يوم بيزيد فيها التدين الظاهرى من لحية ونقاب لكن حدث ولا حرج عن السرقة والنصب والإحتيال والقتل والاغتصاب والتحرش بالاطفال قبل الكبار ؟؟

ولد الإسلام غريبا وسيعود غريبا"، مقولة منسوبة للرسول يفسرها المهاجرون المسلمون فى الغرب على هواهم. أنصار الفكر السلفى والإخوانى يرون فيها نبوءة أن أسلمة أوروبا قادمة لا محالة وأن شرارة الثورة الإسلامية ستندلع من بلاد الفرنجة قبل أن تعود نارها المتأججة إلى البلاد الإسلامية.

ايشى خيال يا ناس يعنى الاخوة المتأسلمين بتوع المهجر رايحين يأججوا نار الإسلام فى بلاد الفرنجة وسايبينها هادية خالص رماد فى بلاد الاسلام ؟؟ طيب نظرة سريعه كدا على طالبان واللى بيحصل فيها من تشويه وجوه لقتل للى بتفكر فى ابسط حقوقها وهى الخروج للتعليم حتى هدموا المدارس ؟؟ هو ده برضه من تعاليم الاسلام ومن الشريعة ؟؟ دى اول آية نزلت على الرسول كانت إقرأ ؟؟ وصلت بيهم الدرجة لتحطيم المحلات التى لم تبيع السواك وحبة البركة اصل معجون الاسنان حرام ؟؟ والصيدليات من عمل الشيطان

عايزين تطبقوا الشريعة فى اوربا علشان يزحفوا بسرعه البرق نحو التخلف وحياة الصحراء .. عايزينهم فى اوربا يقطعوا ايد اللى بيسرق ما هى بتتقطع فى السعودية وبالرغم من كدا برضه لازال فى ايادى كل يوم جمعه بتتقطع وده معناه ان فى ناس لسه بتسرق

بنظرة سريعه على دول اوربا الكافرة اللى مسلمين المهجر رايحين يطبقوا الشريعه عندهم وبنظرة لبلاد العرب الجميلة الوديعة اللى مش فيها اى حوادث ولا اى مصايب والناس عايشه حياتها كلها فى ترف وسعادة اما دول اوربا ياى على اللى بيحصل فيها من اشياء مقززة الشوارع فيها حدث ولا حرج اللى بياكل بيرمى تحت رجله واللى فى ايده منديل بيرميه فى الشارع مع ان النظافة من الايمان .. الستات فى الشارع تزعق فى اطفالها وممكن يضربوهم فى الشارع برضه مش فارقه مع انه انكر الاصوات لصوت الحمير وبلاش اتكلم عن الشياكة والاناقة اللى بيتمتعوا بيها فعلا لازم اوربا تمشى على العجين مش تلخبطة وحكومات دول اوربا فعلا حكومات ساذجة هتنفذ لهم كل اللى يطلبوه ويقولوا لهم سمعا وطاعه .. سيبوا اوربا فى حالها

Tuesday, August 4, 2009

أخوات الباسيج


مين بقى اخوات الباسيج دول .. ده جيش نسائى إيرانى أسسته حارسة الخمينى .. وظيفتهم ايه بقى ؟؟ وده هنشوفه من الخبر بذات نفسه
بعد بداية الحرب مع العراق أسست الحكومة الايرانية معسكراً تدريبياً خاصاً للنساء، ضم آلافاً منهن، وأُرسلن للجبهة، والكثير منهن على صلة قرابة بمقاتلين كانوا على الجبهة، وعملن بالتمريض والطبخ ورفع معنويات المقاتلين ومساعدة عائلات الجنود.
طيب التمريض والطبخ معروفة .. لكن ياترى كانوا بيرفعوا معنويات المقاتلين إزاااااااااى ؟؟ ياريت حد مقاتلين يحضرنا

أن انضمام الايرانيات إلى "الباسيج" ليس من أجل التخلص من الفقر والحصول على المال، رغم أنه فعلياً يحظى كل عضو في هذه الحركة براتب وعناية صحية جيدة ومنزل. وتوضح "السبب تاريخي وهو رغبة الفتيات الايرانيات في الهروب من سلطة الاب والانضمام لهذه المنظمات، حيث يمكنها الخروج من المنزل وتلقي التعليم، فلذلك الانضمام إلى الباسيج كان فرصة للتمرد على سلطة الأب والعائلة".

هما دول بنات العائلات المحافظين وإلا كل واحدة فيهم بيتها لازق جنب المحافظة مباشرة اى محافظة بقى حتى لو محافظة بولاق
وتضيف أفاري لـ"العربية.نت" أن انضمام المرأة للباسيج "يمكّنها من لقاء الرجال من نفس الحركة، ويعطيها حرية الاختيار في الزواج، مع ذلك لا تتخلى عن لباسها المعروف في إيران وتضع الحجاب".
والله ما قصروااااا ناس محافظة محافظة اخر حاجه يعنى
وتقول الناشطة الايرانية "إن حركة أخوات الباسيج حوّلت المرأة الايرانية إلى عضو فاعل في المجتمع، لكنها في نفس الوقت تقمع وتعتقل أخريات من التيار العلماني أو الاصلاحي مثلاً".
وهى اللى بتروح تنضم لتنظيم علشان تهرب من سلطة الأب دى وفى نفس الوقت تقمع وتعتقل ناس اصحاب رأى وفكر حر دى تبقى بنى أدمة سوية ؟؟ ولا واحدة رايحة تطلع الكلاكيع وعقد النقص اللى عندها على اللى شيفاهم احسن منها ؟؟
رأى احد المعلقين اللى الشهامة والحمية أخدته على الخبر بيقول
الذي اعرفه ان النساء في البسيج هن من الطبقة المتدينة جدا في ايران وهي ما تعرف باسم "حزب الله" وهذه الفئة من الشعب الايراني تريد تطبيق الاسلام بحذافيره. وحتى الهدف من تجنيد الايرانيات في النساء هو لمواجهة النساء الخارجات على القانون ولمنع احتكاك الرجال , في الاجهزة الامنية, بالنساء

واضح خالص انه مش اخد باله انهم بيمرضوا ويطبخوا ويرفعوا معنويات المقاتلين
مش اخد باله انهم بيتعاملوا حلو اوى خالص بس الشهادة لله انهم لابسين حجاب
مش اخد باله انهم بينضموا للباسيج للهروب من سلطة الأب وكمان يمكن تقابل المقاتل الشجاع اللى تتجوزه

Saturday, August 1, 2009

معظم الشعب المصرى فاسق وفاجر

جملة قالها يوسف البدرى فى حوارة لجريدة اليوم السابع من بين عشرات الجمل اللى كلها تخريف وقلة قيمة ... يوسف البدرى فى حوارة لجريدة اليوم السابع بيقول طاعة الحاكم واجبة حتى لو ظالم .. امال فين يا شيخنا الجهاد فى قول الحق فى وجه سلطان جائر ولا دى لسه مش اخدتها فى كى جى تو ؟؟ الغريب والعجيب المنطق اللى بيتكلم بيه فى كل جملة مكرر انا باتكلم باسم الله .. طيب يا شيخوخ فين التوكيل الرسمى اللى معاك من الله علشان تتكلم باسمه ؟؟
العيال بتوع 6 ابريل دول عيال فاسقه وفاسدة وخارجه على الدين والشرع علشان القرآن والسنة مش فيهم حاجه اسمها اضرابات ولا حتى كلمة اضراب سلمى .. يبقى احنا المفروض عملا بقول الشيخوخ يوسف الفقرى نروح نقبل ايدين الريس وعيلة الريس صبح ومسا على النعمة والعز اللى احنا فيها ماهو احنا اللى شعب فاسق وفاجر ونستاهل كل حاجه بتجرى لنا والعيال بتوع 6 ابريل دول ندور عليهم نشوفهم فين ونعدمهم فى ميدان عام علشان بيدعو لاضرابات والاضراب ده ضد مبادئ الشرع والشريعة الاسلامية الغراء اللى قالت على حد قوله وهو المتحدث باسم الله ان طاعة الحاكم الظالم واجبة ... بس ياترى الرقية الشرعية ام 400 جنيه وقابلة للفصال يعنى اللى معاك ممكن تدفعه دلوقتى والباقى على اقساط كانك رايح تحجز عربية دى تندرج تحت اى بند .. هل من الناس الفاسقة الفاجرة ولا اللى يجيب لك زباين يعملوا رقية شرعية يبقى مؤمن ورع وهتديله صك غفران يدخل بيه الجنة .. وقضايا الحسبة اللى داير يرفعها على كل واحد صاحب رأى وفكر ورصيدة قاعد يورم فى البنوك دى برضه معاه توكيل بيها من الله اللى هو بيتكلم باسمه .. وهيئة جهلاء الازهر اللى مطلعه بيان النهارده بتكفر فيه حسن حنفى وبيقولوا هو بيقول ان الجايزة اتاخرت على دكتور سيد القمنى كان المفروض ياخدها من بدرى كدا هو ملحد وزنديق وبيقول الكلام ده علشان الجايزة تكون من نصيبه السنة الجاية .. حد يقولهم صح النوم يا جماعه اصل حسن حنفى برضه فاز بيها السنة دى