Desert Cat Search
قطه الصحراء: 7/1/09 - 8/1/09

Tuesday, July 28, 2009

غرامة 100جنيه


مش عليا غرامات ده المبلغ المذكور وهو مائة جنيه مصرى فقط لا غير غرامة حددتها وزارة المالية لكل من يمتنع عن التعامل بالجنية المصرى المعدنى .. انا قريت الخبر ده من يومين تقريبا النهاردة كنت فى البنك وواقفه فى طابور طول بعرض ما شاء الله لما الناس دى كلها جاية تودع فلوس امال الناس قاعدة تعيط ويقولوا مش لاقيين فلوس ليه .. طلع نصهم رايح يقبض مرتباته والنص التانى هو اللى رايح يعمل ايداع .. المهم واقف قصادى راجل مش كبير اوى ولا صغير اوى ومش طويل اوى ولا قصير اوى وماسك فى ايده لفه ورق افتكرتها فى البداية كيس لب جايبة يتسلى فيه لحد ما دورة يجى اه والله ده اللى جه فى بالى لما شوفه بيطلع اللفة الورق دى من جيبه ... وفى ايده التانية ماسك شوية فلوس ورق فئة الخمسون جنيه ... وجه دور الراجل ويروح مطلع اللفه الورق ويديها لموظف البنك قاله ايه ده ؟؟؟ انا مش باخد العملة المعدنية مع انه هو كان لسه مدى واحد جنيه معدنى قبلها بدقيقة واحدة .. ولما الراجل قاله دى عمله بلد يا بيه ازاى مش تتعامل بيها قاله انا ماليش دعوة
الراجل : يعنى لما البنك مش يتعامل بعملة البلد مين اللى يتعامل بيها هى مش طالعه من عندكو برضه
الموظف : دى تعليمات انا مباخدش الفلوس دى وخلصنا بقى
الراجل : يا بيه دى فلوس مدرسة يعنى انا اشرب 150 جنيه عملة معدنية اعمل بيها ايه ؟؟
الموظف : اللى عليه الدور
الراجل يعنى ايه اللى عليه الدور انت مش محترمنى .. انا بقولك ان انا راجل بشتغل فى مدرسة ودى مصاريف مدرسية العيال بيجو يدفعوا الفلوس وبيجيبوا فها جنيهات معدنية اقولهم لاء ؟؟
زميل موظف البنك اللى جنبه يرفع النضارة من على منخايره ويجعر بعلو صوته والمصحف الشريف دى فلوس مكافأة بطلوا كدب بقى
هى فلوس المكفأة بيبقى بيجى فيها جنيهات معدنية .
راجل كوبارة واقف ورا الراجل بتاع العملة المعدنية : انا عايز افهم لما انتوا مش بتاخدوا الفلوس دى مصنعينها ليه ؟؟ هو الشعب ناقص توهان وبؤس مصنعين فلوس ورافضين تتعاملوا بيها الناس لغلابة ذنبها ايه ؟؟
تشجعت انا بقى : بقولك ايه يا عمو انت تلف الفلوس دى وتاخد بعضك وتطلع على امن الدولة وزارة المالية ناشرة بتقول اللى يرفض التعامل بالجنية المعدنى هيدفع غرامة 100جنيه شوف انت بقى معاك كام جنيه وهتدفع الموظف ده كام 100جنيه عليهم .. ده ممكن يبيع بيته
الموظف : ما تخلصونا يا اخوانا الست اللى قبلى اديت له الدفتر وهو انشغل فى عمل الايداع ليها
الراجل وقف يترجى فيه شوية يا بيه انا اعمل ايه فى المبلغ ده كله والتانى مديله الطرشة فى الآخر راح واخد بعضه ورايح لمدير البنك
رجع قاله مدير البنك بيقولك خد منهم 50جنيه والباقى ربنا يعوض عليا فيه
انا : ياعم الحاج ما قولت لك تاخد بعضك وتطلع على امن الدولة والله انا لو مكانك اعمل كدا انت عايز تمشى وفى جيبك 100جنيه معدن ولما ابنك يطلب منك فلوس يركب مواصلات تعطيه صره من الدنانير
الموظف ساب اللى فى ايده وبص لى شذراً : مش احسن ما يديله جنيه مرسوم عليه قلب وسهمين ومكتوب عليه حب فور ايفر
الناس انفجرت ضاحة وانا طبعا تنحت لانى حسيت بالاهانة
وراح باصص للراجل قاله بص انا مش ها اخد منك غير 20جنيه
الراجل وقف يتحايل ويقوله يابيه المدير يقول 50 وانت تقولى 20 وانا اصلا معايا 150 حسبى الله ونعم الوكيل
انا : يا سيدى ما اان قولت لك الحل انت تروح تبلغ والله ما جايبنا لورا غير التخاذل بتاع الناس ده
واحد واقف فى اخر الصف : يا ابلة الله لا يسيئك ده مش بعيد لو راح هناك يتعلق .. يا ستى انا كنت بشترى الجرنان والراجل بديله جنيه من الملعون ده مش رضى ياخده ولما قولت له هعملك محضر وتدفع غرامة 100 جنيه شتمنى
جه دورى ودخلت اعمل الايداع الموظف بص لى بصة عمرى ما هسامحه عليها ابدا فين الدفتر بتاعك يا شاطرة ؟؟ شاطرة اخصص انا خلصت مدرسة من زمان .. ما علينا انا مش معايا دفتر ... امال جاية تعملى ايه ؟؟ جاية تقوى الناس على بعضها وتقولى لهم روحوا امن الدولة ؟؟ مش علموكى لما تكونى فى مكان وفى ناس كبيرة بتتكلم تسكتى انتى خالص ؟؟ ناس كبيرة وشاطرة ؟؟ والله انا كبيرة يا سيدى مش صغيرة بس اعمل ايه انا بفعل الطبيعة ؟؟ خد يا سيدى الفيزا كارت ؟؟ انا مش عايزة فيزا كارت انا عايز رقم الحساب ولو مش حافظاه تعالى بكرة ... لالالالالالالالا ازاى حافظاه واوعى تقولى الفلوس دى مش تنفع وغيريها ... قالى ازاى ؟؟ علشان تطلعى على امن الدولة .. الله لما انتوا قلقانين من امن الدولة مش بتمشوا الراجل ليه
اللى انا عايزة افهمه بقى .. لما هو فى قانون لتغريم اللى بيعترض يتعامل بالعملة المعدنية الناس ليه بتتخاذل ومش بتروح تشتكى وبيفترضوا انهم لو اشتكو مش حد هيعمل لهم حاجه ؟؟ امال هو القانون نازل ليه ؟؟
مدونتى بقى محجوبة فى الامارات ليه ؟؟
امبارح ساره بتقولى انا مش لاقيه مدونتك شكلها اتسرقت .. يابنتى مش اتسرقت ماهى مفتوحة قدامى اهيه .. وبعدين من قلة المدونات هيسرقوا مدونتى .. قالت والله مش بتفتح عندى اعمل انا ايه بقى ؟؟ قولت لها يبقى النت بتاعك فكسان .. الا اتفاجأ بكومنت الصبح من انجل بتقولى فيه ان مدونتى محجوبة فى الامارات وانها دخلت ببروكسى ... يبقى تتحجب فى الامارات ليه ؟؟ وايه المغزى من حجبها بعد بوست انقلاب عبدالناصر وعصابته ده ايه البركة اللى حلت على البلوج دى ؟

Wednesday, July 22, 2009

فى ذكرى الانقلاب

فى ذكرى انقلاب البكباشى جمال عبدالناصر وبمرافقة كام واحد من اصحابه العسكر اللى وزعوا على بعض بعد كدا ما شاء الله المناصب والرتب كل واحد حسب مزاجه واختياره من لوا لعميد لعقيد والذى دأب فى تصفيتهم بعد اعتلاء الكرسى اللى يكح تتحدد اقامته لحد ما ينتهى اجله او حتى يروح ينتحر مش فارقه كتير .. وبمناسبة هذه النكبة التى تحيا فيها مصر من يوليو 52 حتى يوليو 2009 قررت الست الوزيرة عائشة عبدالهادى اعطاء الموظفين فى الدولة اجازة والاجر محسوب .. من ضرايب وتامينات وخصومات وغرامات كل الشعب المصرى اللى بيشتغل وحتى اللى واقف فى الشارع بيقول هات .. وكل ده ليه يا ولاد بمناسبة النكبة اللى قام بيها المقبور ناصر واخوانه واللى قالوا بعدها الشعب المصرى هيتنغنغ فى العز نغانيغ واهدافها اللى هتخلى الجنين يتعين وزير وهو لسه فى رحم الست الوالدة .. وندور على اهداف الثورة واللى اولها كان القضاء على الفساد .. وبعد ما كان فساد عائلة واحدة بقى فساد عوائل وعائلات وعيالهم كمان وان كان عاجب .. ومن اكبر انجازات المقبور ناصر تبديد اموال مصر فى الحروب من 48 لليمن لوكسة 67 ، بعد ما كان الجنية المصرى يساوى 4 دولار اصبح الجنيه المصرى اقل من الجنية السودانى .. ومن القطن المصرى طويل التيلة للقطن اللى اكله الدود لحد لا بقى فى قطن ولا حتى تيله .. وطبعا مقدرش انكر اعظم انجاز تغيير العلم من اللون الاخضر للثلاث الوان اللى تفتح النفس .. وهنيئاً لمصر باللون الاحمر بس ياريت حد يتكرم ويشيل النسر من فوق العلم اصل اللى حطه السادات وسيادته كان فى السينما وقت الانقلاب

Saturday, July 18, 2009

مرحبا بالارهاب فى مصر ستان

من المستفيد من طمس الهوية المصرية وإقتلاع المصريين من جذورهم .. هل يعقل ان يسعى احفاد الفراعنة بنفسهم لطمس هويتهم وجلب عادات الصحراء البالية .. أى دين هذا الذى دعا لنبذ الآخر وإرهابه إذا لم يتبع اهواء واغراض شخصية ؟ فالديانات الثلاث تدعو إلى التسامح ومحبة الآخرين لا إلى العنف ونبذ الآخر بل وجلده وإرهابه وتكفيرة وإراقة دمه إن حكمت .. الأهم أن مصدر الرزق لا ينقطع طالما هناك تمويل لطمس الهوية المصرية بحجة الدين والدين من هذه الهراءات بريئ .. أيعقل ان تجلد صحفية لأنها تعبر عن رأيها فى الحقيقة لكن ظاهر الاسلاميين الذين يتشدقون بالديموقراطية هو ارتدائها البنطال ؟؟
أيعقل أن يصل هؤلاء البلطجية إلى العشوائيات بمصر ليرهبوا من لم تتبع أهوائهم وتتكفن بقطعة من القماش ؟ هل صاموا ؟ هل اتموا صلواتهم على اتم وجه ؟ هل وصلوا الرحم ؟ حتى لا يكون لهم هم ولا شاغل سوى قطعة القماش ؟
يحضرنى سؤال لما بدئوا فى مصر بالمناطق الشعبية والعشوائيات .. ليس لشدة ايمانهم حاشا وكلا وإنما لأن مخططهم دائما يبدء من العامة والذين لا يقرئون ولا يكتبون ولا يفقهون .. فإن أعطى هذا الارهابى حفنة من ريالات الجاز التى اتى بها لنشر سموهم لانسان لا يرجو من الحياة سوى وجبة تسد رمقه يكون على اتم استعداد لذبح عيل من عياله لا يلبس جلابية مينى ولا يطلق لحية ولا يرهب ويتوعد من لا تضع قطعة القماش فوق موضع اثارتهم فقط .. اين الدولة من هؤلاء المرضى المصابين بالفتيشية ؟؟ وإلى متى السكوت على الإرهاب وتغلغلهم داخل الطبقات الدنيا من الناس ؟؟ هل سنسمع قريبا عن من قتل امرءة لانها لم تضع قطعة قماش على راسها وان تم سؤاله اثناء المحاكمة لما قتلتها يجيبهم لانها كافرة وان ساله القاضى هل تدخلت فى العبادة بينها وبين ربها .. يجيبه انه جاهل لكن هما اللى قالوا له ؟؟ الناس المحترمة طلعت القمر والارهابيين لسه بيدوروا على قطعة من القماش بدلاً من إعمال العقل فى التفكير ذهبوا الى العشوائيات لسد فم مسجلين الخطر ببعض ريالات الجاز حتى يرهبوا النساء فى ارتداء قطعة القماش واستخدامهم فى قتل المختلف معهم ايدولوجيا وقت اللزوم فالجميع يعلم ان الوصول الى قلب العامة هو القيام بزرع اكبر قدر من الكراهية فى نفوسهم ليسهل قيادتهم ومن الواضح انهم بدئوا .

Monday, July 13, 2009

والتهمة لابسة بنطلون


وتم توقيف لبنى أحمد الحسين التي تكتب في صحيفة "الصحافة" اليسارية وتعمل أيضاً مع بعثة الامم المتحدة في السودان، الأسبوع الماضي في الخرطوم. واتهمت بأن طريقة لباسها تتنافى مع قواعد النظام العام في البلاد

والتى تفاجأت في الثالث من يوليو/تموز كنت في مطعم حين دخل شرطيون وطلبوا من الفتيات اللواتي ترتدين سراويل مرافقتهم" الى مفوضية الشرطة وأضافت الشابة التي ترتدي غطاء رأس "لقد اصطحبوني و12 فتاة أخرى بينهن (جنوبيات).. وبعد يومين تمت دعوة 10 منهن الى مفوضة وسط الخرطوم لتتلقى كل منهن 10 جلدات".

هل اصبح لبس البنطلون جريمة يعاقب عليها القانون السودانى ؟؟
حتى يتخلوا عن انسانيتهم ويقوموا بجلد النساء بحجة اللباس الغير لائق ؟؟
الى اى قانون يحتكمون ؟؟ والى أى شرع ينفذون حدود الجلد ؟؟
هل القرآن ذكر الجلد سوى فى الزنا .. وهل تتساوى من يريدون اسكات صوتها عن الحق بالزانى والزانية ؟؟
اصحاب الابواق العالية من لا يحترمون قوانين البلاد التى يفدون اليها وقاموا بالتنديد من حادث من الممكن ان يحدث فى اى وقت ولاى مكان لمجرد ان الحدث وقع فى دولة اوربية هم انفسهم من ينتهكون حقوق النساء فى بلادهم واجحافهم حقوقهم بل ويتخلون عن آدميتهم إنسانيتهم ويقوموا بجلدهم تحت تهم وهمية لا تخرجها الا من وحش مفترس ولكنه مفترس فقط للنساء اما فى الحروب فهو نعامة .. حيوان يثار لمجرد رؤية صوباع رجل انثى لذلك لا يقوى على نفسه الا بجلد المرأة والبحث عن تكفينها .. بالامس افغانستان واليوم السودان ومرحبا برياح الجهل والظلام

Friday, July 10, 2009

شعللها شعللها ولعها ولعها

اخوان الشوم اللى سايبين الدنيا تضرب تقلب وناس تتخطف فى الصومال ولا يجيبوا سيرتهم وعمال تعمل اضرابات ولا بيتحركو
القبض على 25 ارهابى بيخططوا لتفجير قناة السويس اخرس هوس .. سيسو قضية مروة الشربينى اللى اتقلت فى ألمانيا بسبب قضية شخصية بحته .. يعنى لو كانت مروة قبضت التعويض ومش اتقلت كان زمان لا حس ولا خبر ومر موضوع المرجيحة مرور الكرام .. لكن ازاى لازم الموضوع يتولع ويتحول لسياسة ويتقلب لعنصرية ضد الدين فى حين ان قتل السياح من 2006 حتى 5 شهور مضت ده شيئ حلو خالص وعادى جدا ؟؟ كام المانى اتقتل فى تفجيرات الاقصر ؟؟ وخليج نعمه ؟؟ وفى عبدالمنعم رياض ؟؟
والفاعل الإرهاب وليست خناقة على مرجيحة ؟؟ لكن فى الحقيقة والدها الدكتور على الشربينى طلع راجل محترم جدا ويستحق كل تقدير طلع فى العربيه واعلن رفضه لتدخل المتألسمين وتسيس القضية ورفض المحامى اللى باعتينه ليه علشان يترافع فى قضية بنته فى المانيا .. حقيقى يا دكتور ارفع لك القبعة
طبعا لعبة تسيس قضية مروة مش نفعت مع اهلها قالوا اوبس الدور على الدكتور سيد القمنى ازاى الراجل العسل ده ياخد جايزة واحنا كل اللى شاطرين فيه نقعد نعيط على غزة ونرفع الجزم على اللى يخالفنا الرأى تحت قبة البرلمان لأننا للأسف لا نملك اصلا رأى مجرد قشة فى مهب الريح
قاموا رايحين يطالبوا بسحب جايزة الدولة التقديرية من الدكتور سيد القمنى قال ايه اصله ملحد .. عندهم كل من ينادى باعمال العقل ملحد .. أمال اللى بينادى بالرجوع الف سنة ورا ده يبقى ايه ؟؟ وكل لما حد يختلف معاه يقلع له الجزمة ده يبقى ايه ؟؟ رجعى وجاهل ومتخلف صح ؟؟
كان الاولى بيكو بدال ما تشعللوا قضية مرة وابوها يحرجكوا بالشكل ده كنتوا فهمتوا العالم الاسلام الصحيح .. مش اسلام بن لادن والظواهرى وارهابيين طالبان .. كان الاجدر بدال ما تطالبوا بسحب جايزة الدولة من الدكتور سيد القمنى كنتوا قدمتوا الجديد والمفيد للعقل والبشرية يمكن كنتوا اخدتوا جايزة بدال الغل والحقد ده
ثم ايه نبيه الوحش اللى داير يرفع قضايا عمال على بطال ده كمان ؟؟
لو حد كح فى عقر داره يروح يرفع عليه قضيه انه كح .. هو اللى مش لاقى حاجه تشغله يجى فى الهايفة ويتصدر ؟؟

Thursday, July 9, 2009

لا منهم ولا كفاية شرهم

رفض علماء دين ما توصل إليه العلماء في جامعة نيوكاسل من إنتاج حيوانات منوية في معاملهم من خلال خلايا جذعية جنينية لمساعدة الرجال الذين يعانون مشكلات في الإنجاب محذرين من أن يؤدي ذلك إلى نتائج غير أخلاقية في ضوء التلاعب المحتمل فيها، وذلك وفقا لما ورد في تقرير نشرته جريدة "الخليج" الإماراتية.

لما اللى قاعدين يحرموا العلم ويرجعوا فى طبق فتة كبير دول اسمهم علماء ؟؟ امال اللى قاعدين يعملوا الابحاث ويخترعوا علاج للبشرية اسمهم ايه ؟؟ واللى بيبتكروا التكنولوجيا الحديثة دول اسمهم ايه ؟؟
يعنى لا منهم ولا كفاية شرهم .. يعنى ايه اختلاط انساب ايها الجهلاء والخلايا الجزعية تستخدم فى شفاء اكثر من مرض ؟؟
طيب ياريت تدولنا البديل طالما حرمتوا على اللى المحروم من طفل الإنجاب .. ولو واحد فيكو مصاب بالعقم هيكون هو اول واحد يجرى يعملها فى بلاد الفرنجة
يكفى قاعدين تحرموا وتزرعوا الكراهيه فى قلوب الناس تجاه الغرب اللى قاعد يخترع ويبتكر وانتوا اكبر انجازتكو عمل قنابل بدائية الصنع لتفجير السياح .. او تجمعوا بعض اذنباكم من بتوع حماس وتعملوا خلية ارهابية زى اللى اتقبض عليها النهارده .. وتجيبوا واحد وتحفظوه ايه وحديث ويقعد يألف فتاوى على مزاجكو و يصرخ ويرهب فى الناس طول النهار على الفضائيات .. إنما قرص اسبرين تنتجوه فهيهات ده من بلاد الكفر ويكونوا اول ناس يجروا على بلاد الكفر للاستفادة من اختراعاتهم .. بلا نيله

Wednesday, July 8, 2009

تعذيب صحفي مصري على يد شرطة الكويت

تفاصيل هذه الواقعة المؤلمة التي شهدتها منطقة الفروانية بدأت حينما توجه محرر "السياسة" الزميل عبدالله عثمان الى منطقة الفروانية لتغطية حادثة اندلاع حريق حيث تعمد وكيل عريف فهد العتيبي من دورية نجدة الفروانية مضايقة المحرر قبل ان يستكمل الملازم أول فلاح المطيري والرقيب عبدالله المطيري تعسف وغطرسة زميلهما الوكيل العريف بقيامهم بالتهجم والتعدي على محرر "السياسة" وعلى مرأى حشد من سكان البناية الذين اخلوا مساكنهم وتجمعوا في الشارع ريتما يثم اخماد الحريق.
ولم ينته الامر عند هذا الحد بل عمد الوكيل عريف فهد العتيبي الى العمل وفق مبدئه "ضربني وبكى وسبقني واشتكى" فسارع الى التحدث عبر اللاسلكي مع مسؤوليه واتهم المحرر بالتهجم والتعدي عليه مطالبا بتسجيل قضية لحفظ حقه حسب ادعائه.
وقام العريف بسحب الصحفي واقتياده الى قسم شرطة الفروانية وهناك تعمد مسئولي القسم تأخير تسجيل القضية حتى الساعة الثالثة فجرا بهدف ارضاء العريف وعدم تمكين محامي الجريدة من اخلاء سبيل المحرر الموقوف.
وفي قسم الشرطة تلقى الصحفي المصري سيلا من الاهانات اذ قام بعض امنيي مخفر الفروانية باستخدام كل ما زفرت به السنتهم من كلام بذيء وشتائم ضد المحرر من قبيل "يا مصري يا خايس... وخلافه" بالاضافة الى ازدراء الاعلام والصحافة!
ولم تنته وقائع القضية الامنية عند هذا الحد بل تعرض
للتعذيب داخل القسم اذ امره ملازم بالوقوف والجلوس مرات عدة ومنعه من الجلوس لفترات طويلة فضلا عن عدم السماح لاقاربه بزيارته او تقديم اي طعام او مشروبات له وحجز هاتفه النقال ومنعه من استخدامه.
كما تبارى شرطيو القسم في توجيه الشتائم الجارحة الى الصحفي المصري والسخرية منه ومن مصر ومن مهنة الصحافة والصحفيين".

انتهى الخبر
====================
الصحفى عبدالله عثمان مصرى واتهان فى الكويت واتشتم واتقاله يا مصرى يا خايس يبقى دى عنصرية ولا لاء ؟؟
ياترى هنلاقى الاسلاميين طالعين بمظاهرات ويقولوا لا اله الا الله المصرى مش خايس ومش رخيص ؟؟
هنلاقى الناس اللى بيقولوا على نفسهم مثقفين بينظموا لاعتصام مفتوح قدام سفارة الكويت لحد ما الكويت تتعتذر على اللى حصل للصحفى ؟؟
هنلاقى اليوم السابع كل دقيقة منزل مانشيت طول بعرض فى الصفحة الاولى ويقولوا شهيد الصحافة ؟؟
الا الدكتور رؤوف العربى وزميله المسجونين فى السعودية اتنسوا ولا ايه ؟؟
مش الاولى بالمظاهرات دى الناس اللى بتتعذب وبتتهان كل يوم والتانى والمسجونيين واللى بيتجلدوا واللى لسه وزيرة القوى العاملة بتتعاقد على دفع جديدة من الاطباء علشان يروحوا يتجلدوا برضه فى السعودية .... الناس دى كمان مش سايبه وراها عائلات واطفال ؟؟؟
يمكن المظاهرات دى تنقذ ارواح ناس كل ذنبها انها سافرت من اجل لقمة العيش مش راحت ترفع قضايا على عاطل اتخانقت معاه ورايحه تقبض منه تعويض
هو ده بقى حال المصريين شوية عيال سافلة يعتدوا على استاذتهم ؟؟
وصحفى يتهان فى الكويت .. بس العيب مش علي الناس دى العيب على اللى عمل ليهم قيمة وبدل ما يحتفظ بجذورة ويفتخر بيها نسى انه حفيد الفراعنة اللى لو شافوا حال المصريين دلوقتى والاهانة اللى بيتعرضوا لها على ايد رعاة الابل لكان زمانهم اتبروا من مصريتهم وشافوا بلد تانية وناس تانية اعطوا لهم حضارتهم مش شوية متكلين يسافروا يومين يرجعوا بثقافة شبه الجزيرة لحد ما المصرى بقى ملطشة

Tuesday, July 7, 2009

اكاديمية السادات يبلطجو بفلسوهم وسفارتهم هتساعدهم


اعتداء3طلاب سعوديين على هيئة التدريس باكاديمية السادات .. هما هيئة التدريس دول جنسيتهم ايه ؟؟ مصريين ؟؟ طيب وأيه المشكلة ما يعتدوا عليهم ماهو الدكتور رؤوف العربى وزميله اتحكم عليهم فى السعودية ب1000جلدة و15 سنة حبس ولما استأنفوا الحكم حصلت نكتة جامدة طحن الحقيقة الا وقالوا لهم ماشى يا مصرطالما مش عاجبكو الحكم يبقى خدوا بقى 1500 جلدة و20 سنة سجن هو يعنى حد هيقولنا انتوا بتعملوا ايه ؟؟
والشعب هاج وماج والصحف كتبت ونشرت وباعت وعملت شغل جامد والموضوع اتنسى بعد اسبوع بالظبط .. فلما يطلع ولد سعودى قليل الادب من ال3اللى اعتدوا على استاذه هيئة التدريس واللى كسروا البنشات كمان اثناء الاعتداء يقول لهم
سأقتلك، سأقتلك، أنا هاحبسك فى بلدك يا مصرى، سأجعل السفارة.....»
وبعد قلة الادب والانحطاط الأخلاقى ده والتعدى البين والواضح وبدل من اخذ موقف حازم وصارم كان أقله إلغاء إمتحانهم إلا أنه تم تغيير هيئة التدريس وتم احتواء الموقف والعيال رجعوا يكملوا امتحانهم عادى ولا كأن حاجه حصلت ده كمان تقريبا العيال اعصابهم كانت لسه متنتورة شوية هنا وشوية هناك يعنى شافهم العميد مش مركزين راح متدخل بنفسه لتهدئتهم حنوين اوى الدكتور علاء الغزالى وفى الحقيقة الدكتور علاء ده بالاضافة لحنيته الواضحة والبارزة كبروز السيلكون المنتشر الأيام دى إلا إنه برضه دبلوماسى خطير شنيع مريع اصله قال برضه ان
الواقعة «عادية»، وتحدث نتيجة للتوتر الناتج عن الامتحانات، ولا نريد تضخيمها حرصا على العلاقات السعودية - المصرية، وسيتم التعاطى مع الواقعة داخليا للبت فيها
بت يا دكتور براحتك ولا مش تبت هو حد هيقولك كرامتى بتنقح عليا وعايز اردها يا راجل ولا يهمك دول مصريين برضه والمصريين دول حمالين اسية جت على دى
بس فى حاجه غريبة انا ملاحظها فى الموضوع ده بالرغم من ان الولد قال لأحد اعضاء هيئة التدريس هحبسك فى بلدك يا مصرى بما يسمى بالعنصرية وفرد القوة كمان الا إن المصريين اللى قاعدين يلطموا الخدود ويقولوا الغرب دول عنصريين وبيكرهوا المصريين و المسلمين تحديداً مش حد سمع لهم صوت على عنصرية العيال دى مع استاذة هيئة التدريس ؟؟
وبما إن كل واحد يتأذى بسبب العنصرية يبقى المفروض بقى ان المعيد محمد سامح والمعيد رامى إبراهيم والاستاذه لبنى عبدالكريم اللى تم الاعتداء عليهم شهداء اختبارات الاكاديمية وانا من كيبوردى هذا اطالب بالقصاص من العيال العنصريين دول ... وكمان بفتوى لوذعية من شيوخ الفضائيات بدل قتل ميكى ماوس والنقاب ابو عين واحدة تقول ان العيال دى مفسدون فى الأرض

Sunday, July 5, 2009

احذروا الضحك تهمة يحاسب عليها القانون


اكيد اللى متابع البوست السابق هيشوف بين التعليقات ذكر اسماء الغول .. الصحفية الفلسطينية التى تعرضت للإعتقال وتم سحب جواز سفرها واللاب توب بتاعها بتهمة ياااااى شنيعه مريعة فزيعة فزعنة محصلتش الحقيقة تستاهل عليها الاعتقال وسحب هويتها وجهازها المحمول .. تهمة أسماء تتلخص فى إنها كانت فى البحر وضحكت مع صديقتها بصوت عالى .. طالبان اخرى فى غزة على يد حماس ستان

وقالت أسماء الغول، لـ"العربية.نت"، تعليقا على تقرير نشره مركز "سكايز" للحريات الإعلامية والثقافية، "نعم هذا صحيح. سحبوا جواز سفري أثناء وجودي في بيت إحدى الأسر الصديقة، وأعادوه لي بعد فترة عقب مكالمة جاءتهم، لكنني لم أخرج من البيت منذ هذا اليوم، خوفا من تهديدات غير رسمية بقتلي".وأضافت أنهم وجهوا لها تهمة "الضحك بصوت عال"، أثناء السباحة مع صديقتها، وعدم ارتداء الزي الشرعي (يقصدون الحجاب)، ووجهوا لها سؤالا عمن حضر معها من أسرتها إلى الشاطئ، وهو ما استنكرته أسماء واعتبرته سؤالا عن عدم وجود محرم معها.

و القادم أسوء طالما هناك من يهلل لعصابة حماس وأزلامها كالسلفيه اللى دخلت تعلق على الخبر وتقول لاسماء توبى وارجعى لربك اصل انتى سبب البلاء اللى بلدك فيه .. اى خراء مشوى وعهر فكرى اللى فى عقول الناس دى ؟؟ عصابة حماس بعد ما جت لهم مكالمة تليفونية يسيبوها ويعطوا لها جواز السفر بتاعها هددوها وهما ماشيين بان دى مش النهاية ..معلشى يا اسماء انتى غلطانة اصل ليه تضحكى يا بنتى وتخرجى وتروحى بحر والست السلفيه تقولك انتى سبب بلاء بلدك .. انتى المفروض تلبسى النقاب وتلبسى لك حزام ناسف وتروحى تفجرى نفسك فى وسط كام يهودى اصل حماس مش فاضيين هما قاعدين على البحر علشان يعتقلوا اللى تضحك ويفتشوا بيوت اهاليهم واسرائيل اهلا وسهلا بيهم

Friday, July 3, 2009

هو ايه موضوع شهيدة الحجاب ؟؟

السيدة مروة الشربينى 32 عام زوجة لمبعوث مصرى يقيم بألمانيا حدثت مشادة منذ عام بينها وبين عاطل يسمى أليكس يبغ من العمر 28 عام اثناء توجهها له للابتعاد عن لعبه كان يلعب بها طفل من احد اقربائه حتى يلعب بها طفلها واثناء المشادة وصفها اليكس بانها ارهابيه .. يعنى اللعب مش خلصت علشان تروح تاخد اللعبة دى تحديدا لابنها .. الاخت مروة توجهت للمحكمة ورفعت عليه قضية سب علشان قالها انتى ارهابيه ومش بس كدا دى المحكمة كمان حكمت لها بتعويض قدره 28ألف دولار .. وبعد الحكم حدثت مشادة فى قاعة المحكمة قام على اثرها المتهم العاطل بطعنها عدة طعنات اودت بحياتها .. كدا وعليه قامت الدنيا ومش قعدت واليوم السابع طول النهار مش وراه غير نشر اخبار عن مروة عذراً الاخت شهيدة الحجاب ونقيب المحامين الهمام ربنا يعطيه طول العمر وينصره على من يعاديه هاى هيئ بيقول انه هيبعت وفد للدفاع عن مروة شهيدة الحجاب طيب يا استاذ ما تشوف كام محامى كدا حلوين وشاطرين من عندك فى النقابة لحل مشاكلك انت وسامح عاشور بدل الفضايح اللى كل يوم والتانى فى الجرايد دى ؟؟
ولا اعمل معاهم اجتماع لحل مشاكل المصريين اللى نايمين فى الشوارع واللى بيموتوا من الجوع بسبب الفساد اللى منتشر فى البلد ؟؟
الغريب رد واحد بيقول الحمد لله ده اول انتصار للإسلام .. إنتصار لمين يا حبيبى ؟؟ الا هو الانتصار ده مش بيكون بين فرقتين متحاربتين واللى بيكسب فيهم بيكون منتصر ؟؟ هى مروة كانت بتحارب علشان الاسلام ولا علشان حقها واللى لانها فى بلد ديموقراطى اخدته تالت ومتلت كمان ؟؟ يا راجل دى فى مصر بتكون ماشيه فى الشارع وتسمع كلام يشيب له الولدان وان تجرأت وهزأته يتقال شوفوا قليلة الادب واقفه تشتم ولد ازاى فى الشارع اصلها مش محترمة البنت المحترمة بتسمع شتيمتها وتمشى على طول مش تعرف ان صوتها عورة كمان تيجى لها الجرأة ترد
وكل اللى فات ده حاجه و قصة شعار شهيدة الحجاب اللى رايحين جايين رافعينه ده حاجه تانية خالص ... الا هى الشهادة تطلق على اى حد كدا جزافاً ؟؟
الجميل فى الأمر ان المصريين فى المانيا راحوا عملوا مظاهره قدام السفارة علشان شهيدة الحجاب طيب مش عملتوا مظاهره ليه علشان اخواتكو اللى اتكتم نفسهم تحت التراب فى رمضان ولا حد قالهم السلام عليكم اهل الدار .. انا مش بدافع عن قاتل مروة لسبب بسيط انى معرفوش مين الحقيقة ولا يبقى ايه ..انما مستغربة ومتعجبة لكم التفاهه اللى بقينا فيها مش قبل ما نحاسب الناس .. نحاسب نفسنا الأول ؟؟ وهو مين اللى خلا الغرب ياخد فكرة عن العرب انهم إرهابيين مش رجال الدين الجهابذة اللى قاعدين يصرخوا طول النهار فى الفضائيات ويدعوا على الغرب الكافر ويشتموهم وهما صوتهم طالع اصلا بتكنولوجيا الغرب الكافر ده ؟؟ ورجال طالبان العظماء اللى شغالين قتل فى النساء ؟؟

Wednesday, July 1, 2009

التحرش برخصة شرعية

فى الوقت الذى لا يزال حاضر فى الأذهان مدرس علم النفس الذى قام باغتصاب 14طالبة قبل امتحان الثانوية العامة بيومين فقط تطالعنا فيه وزارة الأوقاف المصرية بكتاب عن التحرش الجنسى و اسبابه وعلاجه
كنت قريت إعلان عن صدور هذا الكتاب فى إحدى المواقع الإخبارية ظننت بعد توزيعه على أئمة المساجد هلاقى كل الشباب ماشى وجهه فى الأرض واللى يشوف واحدة بتتعاكس هينط من مكانه لكرش الشخص اللى بيعاكس .. لذلك لم اعتنى كثيراً .. إلا أن نوه عن هذا الكتاب تعليق من أنونيمس فى البوست السابق فعادت الذاكرة سريعا ولاقيتنى رايحه اعمل سيرش على محتوى الكتاب ويارتنى ما عملت
الكتاب اللى طالع من وزارة الأوقاف المصرية المثقفين المتعلمين بتوع المدارس مش جايبين سيرة للذكور من قريب او من بعيد بالعكس ده الذكر ده حامل فى الوديع .. قصدى حمل وديع .. وبيتم إغوائه من السافلة قليلة الأدب اللى بتلبس الجينز ومن الكليبات الخادشة للحياء والبرامج الإعلامية هو يعنى الذكر الغلبان ده مش كفاية انه بيشرب مخدرات وعنده قلة وازع دينى وفراغ عقلى .. والله هما اللى بيقولوا كدا برضه مش انا ... يعنى الولد دى مبرراته هنيئاً لكل المتحرشين فوزارة الأوقاف اوجدت لهم المبررات اللازمة للتحرش وهنيئاً لدفاع المدرس الذى قام بتصوير طالباته فى أواضع مخلة بالآداب المحامى بتاعه لا هيتعب فى كتابة عرائض ولا مذكرات وعلى أى مدرس أو دكتور أو أى متحرش عايز يصور مريضاته او طالباته ويتاجر فى الاسطوانات نظرا لظروفه المادية التى لم تساعده على الزواج زى ما قال المدرس فى اعترافه مش يتردد يعمل سيديهات ويوزع على طول ماهى البنت السبب بتلبس جينز ليه والتلفزيون ابن اللذينا اللى عنده فى البيت ده الريموت هو اللى بيوجههم للكليبات الخادشة للحياء يتفرجوا عليها وليس العكس
ده الشباب غلبان هيلاقيها منين ولا منين