Desert Cat Search
قطه الصحراء: 5/1/09 - 6/1/09

Sunday, May 31, 2009

ياجهابذة علماء الأزهر مالكم ومال هيفاء



من الواضح وضوح الشمس إننا نعود للعصور الوسطى بسرعة البرق
حيث الحجر على الثقافة والفن والإبداع
حيث حرق وقتل كل من تسول له نفسه إعمال عقله أو إخراج فنه وإبدعه إلى النور أو حتى مجرد التعبير عن رايه
لقد تغاضيت جبهة علماء الأزهر عن الفساد والرشوة والمحسوبية وعن السعار الجنسى المنتشر فى الشوارع والمواصلات العامة كل هذا لم يحرك لها ساكن ولم تخرج ببيان تتحفنا بيه أو لم يهتز جفن لاصحاب الحناجر العالية اللى قارفينا فى الفضائيات ليل نهار كلام عن المرأة العورة الناقصة عقل ودين .. ولكن السادة الشيوووووخ ازعجهم جدا فيلم " دكان شحاته " لذلك توجهوا مباشرة للسيد رئيس الجمهورية للتدخل فى منع عرض دكان شحاته بحجة إنه يسيئ للمقدسات الإسلامية .. ويا سلام على الإساءة اللى ارتكبتها هيفاء وهبى وخالد يوسف يا ناس .. دخلوا مسجد الحسين يا حلولى يعنى لو كانوا دخلوه من غير تصوير فيلم رايحين كزيارة يعنى زى آلاف السياح كنتوا هتقدموا نفس البيان برضه .. ثم إن الهيئة الموقرة سابت شغلها المخولة بيه وراحت تقوم بدور الرقابة على الافلام وازاى الرقابة هتسمح بعرض فيلم فيه اساءة للمقدسات اذا كانت رفضت عرض فيلم تحت النقاب الذى يناقش الحوادث والبلاوى التى تحدث من خلف قطعة القماش كالسرقة والقتل وارتكاب الفواحش ماظهر منها وما بطن بس الرقابة الشجاعة خافت من الموافقة على عرض الفيلم مش علشان مشاهد الفيلم لاسمح الله انما علشان الشعب المصرى اللى اثبتت الدراسات انه اكثر شعوب العالم تدينا وانه برضه اكثر شعوب العالم تحرشاً ولا عزاء للأخلاق ، مخرج فيلم تحت النقاب اصر على عرض الفيلم على نفقته الخاصة وفى مكان غير مصر وانا الحقيقة ارفع له القبعة احترما لرغبته فى عرض بلاوى متخفيه تحت هذه القطعة الكئيبة من القماش واللى متخذها كل صاحب مصيبة للتخفى خلفها
يا ريت الهيئة تخليها فى عملها وتترك الفن والإبداع لأهله وقبل ما يسمعوا كلام الجماعه إياهم ويروحوا للرئيس علشان يتدخل ويمنع الفيلم يخسروا تمن تذكرة سينما ويشوفوه

Friday, May 29, 2009

نار الغيرة واشياء أخرى


على الرغم من كل الوعود والعهود التى تجمعهم سوياً .. على الرغم من أنها تركت من أجله الدنيا وما فيها .. على الرغم من حبها له وإشتياقها الدائم له .. وعلى الرغم من صدق إحساسه بها ومشاعره التى وهبها لها .. إلا أن عند إشتعال أول فتيل من نار الغيرة يشهر سيفه فى وجهها ويحاوطها بكم من الأسئلة المكررة والتى لا تنتهى .. تشعر من بين كلامه برسالة موجهه تحميل بين طياتها
قديسك قد سقط الآن .. قد فقد وقار القديس
يتلون كل الالوان .. يتراقص والقلب تعيس
قطرات الخمر تعريه .. تتساقط كرهاً من فيه
وتسيل عليها أشعاراً أخفاها إذ لا تخفيه
ما كنتى ابداً لعبته بل كنتى درعاً يحميه من سطوة قهر الأزمان
قديسك قد سقط الآن
تشعر بالويلات مجتمعة تشعلها من رأسها حتى إخمص قدميها .. تحاول مراراً وتكراراً إثنائه عن هذه التكهنات التى لا وجود لها سوى فى خياله فقط .. عندما يهدأ بركانه يتحسس مواطن ضعفها .. يقدم لها إعتذاره ولكنه الحب .. فكيف يمكنه أن يرى غيره يكلمها ، يصافحها ، يسترسل فى الكلام معها .. فمعكى ومعكى فقط أشعر بأنى على قيد الحياة .. يتفهم كل منهما موقف الآخر ويعودا للتوقيع على إتفاقية حب مشتركة . ولكن مع أول عابر سبيل ينظر مجرد نظرة عابرة لا معنى لها .. يعاود بركانه الثائر الإنفجار

مؤمنة جدا ان الغيرة شعور طبيعى أحياناً تكون كالبهارات التى تجعل للعلاقة بين إثنين مذاق خاص جداً ولكن فى حالة إذا كانت بالقدر الكافى من وجهة نظرى الشخصية أن الغيرة دليل على اهتمام اي الطرفين بالآخر بمعنى إنها زيادة حب ولكن إن ذادت عن حدها فإنها بذلك تكون شك والشك نهايتة غير مأمونة العواقب يعنى المشاكل المستمرة يعقبها الخراب بعينه
لما حبيت اعرف رأى بعض أصدقائى المقربين جداً
فكان رأى الدكتورة الجميلة اسماء على
لوة بس ماتبقاش شك .. يعني حلوة يغير و يتنطط شوية و وشه يقلب لكن يبقى واثق
اما خالوا أحمد الصباغ فكان رأيه
الغيرة لو شعور تلقائى فهى صفة محببة وجميلة
يعنى لو دافعها الحب الحقيقى والاشتياق واللهفة
تبقى صفة نبيلة جداً
لكن لو شعور مصطنع
دافعة ان دى مراتى ولازم اغير عليها واشكمها
او ده جوزى ولحسن واحدة تخطفه منى
تبقى صفة سيئة جداً

مش عارفه حد ليه رأى تانى ولا ايه ؟؟

Wednesday, May 27, 2009

ويتوالى الجهل مراراً .. هلموا الى ختان الإناث


أضاف رئيس الإدارة المركزية للرعاية المتكاملة فى بيان لوزارة الصحة أن المستشفى قد إستقبلت طفلتين وهما يعانيان من نزيف حاد إثر إجراء عملية ختان ، وتم تقديم العلاج اللازم لهما لوقف النزيف .
وأشار الى أن مديرية الشئون الصحية بمحافظة قنا تقوم بعمل التقصى عن الحالات ومعرفة القائم بعملية الختان لإتخاذ كافة الإجراءات تجاههم
.

مش معقول الجهل المتفشى ده .. مش معقول بالرغم من كل التحذيرات وكذا حالات الوفاة اللى حصلت بسبب عملية بتر الأعضاء التناسلية إنتقاماً من الأنثى دون أى سبب إقترفته لكن إرادة الله ان تكون أنثى ليتم بتر عضوها التناسلى بحجة الحفاظ على العفة التى لا علاقه لها ببتر البظر من عدمه ولازال الناس فى غياهب الجهل يعمهون
يا ايها الحمقى أفيقو مركز الإحساس ليس فى البظر وإنما فى المخ
ايها الحمقى يا من تنادون بأنه من الدين هذا الفعل القميئ بريئ منه الله ورسوله فمنهج الرسول واضح وصريح ولا يحتاج تأويل
اتركو أعضاء الفتيات وشأنها ونفذوا تعاليم الدين الصحيحة وأهمها المعاملات
ياريت المسؤلين يزودوا الوعى شوية فى قرى ونجوع الصعيد لأنها لازالت حتى الآن متخلفة عن الركب فأغلب حالات الوفيات التى تحدث بسبب هذه العادة القميئة تتمركز فى صعيد مصر
وياريت اى طبيب يتعرف انه قام بالعملية القذرة دى يتسجن مع إعافائه من ممارسة مهنة الطب
لان اللى بيعمل كدا حيوان مش انسان

Sunday, May 24, 2009

حينما تتبدل الاسماء .. يتحول القلب لاشلاء


لم تكن تتمنى سواه فلطالما حلمت به دون أن تراه وحينما لعبت الظروف دورها ليتقابلا دون سابق انذار لم تصدق أن حلمها تمت ترجمته إلى واقع .. تبادلا الحب إختلسا من الزمن أجمل الأوقات وحينما داعب أحشائها جنين تكون منه بداخلها كادت تطير فرحاً وطرباً فسوف يأتى من يكلل تلك السعادة ويربط بينهما برباط ابدى .. شعوره كان لا يقل عنها فكم أنفقا من الوقت فى مناقشات حول اسم من سيحمل اسميهما معاً فهو يريد انثى تحمل ملامحها وهى تريد ذكر يشبهه تماماً بل وستطلق عليه نفس الاسم كى يظل اسمه يتردد دائما على لسانها حتى فى اوقات عمله ... حاولت بكل ما تملك من أنوثة أن تكون هى حواء الأولى والأخيرة فى حياته فتلونت من أجله جميع الالوان .. أيضاً هو كان يتفنن كيف يسيقيها الحب ألواناً ويطربها بأجمل العبارات .. رأت نفسها بين أحضانه ابنته وزوجته وحبيبته وعشيقته .. وفى وقت غير مناسب تماماً شعرت بالصرح العظيم الذى أقاماه سوياً من شرايين قلبيهما بدأ عليه الوهن أصابه شرخ فى أسفل الجدار .. لم تعد تشعر بأنفاسه تحتويها بات فراشها بدونه كالثلج فى ليل الشتاء القارس .. أملها متعلق بمن فى أحشائها تنتظر قدومه كل ساعة .. لم تعد تقوى على مقاومته من داخلها احتياجها له يقتلها كل ما فيها يناديه فقد جفت منابعها بل أوشكت على التشقق .. إستخدمت ذكاء الأنثى بكل ما تملك من رقة ودلال .. وحينما هم بروى ظمأها بدل الأسماء ليناديها باسم اخرى غيرها .. حتى تتأكد الهواجس التى طالما رفضتها ولم تسمح لها بأخذ جزء ولو يسير منها .. حاول إيجاد مبرر مراراً وتكرراً .. لكن نزيفها بدأ يجرى بداخلها كالنهر .. حبها يحتضر .. اعترف بأنها كانت مجرد نزوة أما أنتى من ملكتى القلب والروح فيكفى بأنك أم ابنى .. وكأنه يمن عليها بهذا الكرم العظيم .. أجابته بدموعها .. الخيانة أتحملها من الدنيا وما فيها إلا أنت .. الآن تحطم قلبى بعد أن وضعته رهينة بين يديك بعد أن سجنت مشاعرى كلها لأجلك أنت .. بعد أن لويت عنان نفسى أستيقظت على طعنة غادرة بعد أن آمنت بك بعد أن أدخلتك محرابى بعد أن صليت من أجلك ظننت أنك ملاك فوق أخطاء البشر ظننت أنك جزء منى ملكتك وملكتنى ولكن واسفاه على يديك عرف قلبى طعم الشقاء بعد الهناء ولكن قسماً بحبى لك ساجتثك من اوردتى وشرايينى فانا من زرعتك فى ذاتى وتكوينى لانك لم تشعر بى او تحس ساغير بيدى كل شيئ وبعد الان ساطرد من داخلى هواك كل شيئ سيتغير بل من الآن قل مات .. ظل ذلك الكلام يتردد بداخلها وهو ينظر إليها موجهاً سهامه الى عينيها التى تحولت الى سيل منهمر .. ينتظر منها كلمة اشارة ان ترد عليه ان تصفح عنه .. امسك بكتاب الله يحلف لها انه لمثل هذا ابدا لن يعود فلتغفر له وسيبقى وفى الا بد لكل العهود .. ولكنها قررت أن تحرمه من سماع صوتها فقط خطت له .. يادمعة لن أحتمل وقصيدة لم تكتمل وحدائق راعيتها فرايتها الآن صارت تشتعل


سؤال بيتردد جوايا ليه البعض ومش هقول كل الرجالة علشان مش اكون ظالمة او قاسية فى حكمى ممكن تكون زوجته تتمتع بجمال ونقاء قلب يعطيها الحب فتبادله بالعشق وبالرغم من كدا يضعف قدام اول واحدة تقابله عند أول مفرق طرق

Saturday, May 23, 2009

خلية ارهابية اسلامية وامام مسجد بقرن غزال .. اشطة خالص

القت أجهزة الأمن القبض على سبعة أفراد أعضاء فى خلية إرهابية مرتبطة بالعملية الارهابية التى تم تنفيذها بميدان المشهد الحسينى فى 22 فبراير 2009.
وقال مصدر أمنى إنه فى إطار مواجهة وزارة الداخلية لنشاط التنظيمات الإرهابية تمكن جهاز مباحث أمن الدولة من خلال المعلومات والرصد الأمنى من تحديد مجموعة من العناصر المصرية وأخرى أجنبية من المرتبطين بتنظيم "القاعدة" وما يسمى ب"جيش الإسلام الفلسطينى" ، تتحرك لتنفيذ عمليات إرهابية بالبلاد وأخرى بالخارج، حيث تم ضبط 7 منهم وبحوزتهم عبوات متفجرة وذخائر

يعنى هما مش مكسوفين وهما بيلزقوا ارهابهم فى الإسلام ؟؟ هو كل واحد عنده عقدة ولا عواطلى مش لاقى له شغلانة يروح يلم شوية من اللى يشبهوا له ويفجروا ويخربوا فى البلد ويسموا نفسهم اسلاميين ؟؟ هو الإسلام قال الناس تفجر الأبرياء الآمنيين ؟؟ الرسول نفسه قال من آذى ذمياً فقد آذانى وشوية جهلاء متخلفين مش يعرفوا يعنى ايه كلمة اسلام تم تغييبهم سواء بانبهارهم بحسن اللات اللى قاعد يهوهو من جوا جحر و باعت لنا شوية جرابيع من عنده او اللى بيطلقوا على نفسهم جيش الاسلام الفلسطينى .. وسواء خلية حسن زعبولة او بتوع القاعدة يقولوا بنجاهد فى سبيل الله ومن اجل فلسطين ايه علاقة فلسطين بمصر يا عراعير يا متخلفين اللى عايز يحارب ما يروح يتنيل على فلسطين مباشرة ولا خايفين من اسرائيل جايين تستهدفوا مصر ومن كدبهم لما اتقبض عليهم طبعا وضحت اجندتهم ومخططهم وهو استهداف تفجير شبة جزيرة سيناء وبعض المنتجعات السياحية فى مصر .. السياحة اللى عامله لهم كالوا فى دماغهم ..
وبمناسبة الإرهاب والإسلاميين
نشوف إمام المسجد أبو قرن غزال ده
مزق إمام مسجد قرية عرب الغديرى بمدينة طوخ جسد مدرس وعامل ومحامى بالمطواة وسط ذهول المارة بالشارع، وتركهم غارقين فى دمائهم، وفر هاربا، وذلك بسبب إقامة عمود خرسانى لتوسعة المسجد.تم نقل المصابين إلى مستشفى طوخ العام بين الحياة والموت، وألقى القبض على المتهم وأحيل للنيابة، فتولت التحقيق وأمرت بحبس المتهم 4 أيام على ذمة التحقيق
طيب يا شيخنا يا اللى دارس دين المفروض وتحض الناس على التسامح وعدم الإيذاء فى خطبك الرنانة مش تعرف ان رفع الأذى عن الطريق صدقة ؟؟؟ وانت جاى تقفله بعمود خرسانى علشان توسع المسجد ؟؟ وبعدين هى المطوة القرن الغزال دلوقتى بقت من الاحتياجات الاساسية لأئمة المساجد طيب مبروك علي الاسلاميين تغيير السواك بمطوة قرن غزال واهى الرسالة وصلت اى متشدق بالدين اما ارهابى او شايل مطوة قرن غزال يعنى الحرص واجب برضه مش بعيد حسان ولا يعقوب ولا الحوينى يطلع لنا بعد كدا شاهر سيفه ويقول اللى مش هتتنقب حل عليها الذبح الله اكبر

Friday, May 22, 2009

هشام طلعت مصطفى فى مستشفى السجن


قريت خبر حالاً بيقول إن هشام طلعت مصطفى اصيب بوعكة صحية شديدة اثناء نقله للسجن فى سيارة الترحيلات بعد الحكم عليه بالاعدام وبعد عمل الاسعافات الاولية لازال هشام بيك مذهول ومذبهل ازبلال لاحصل ولا هيحصل بعد كدا لانه والله اعلم شكله مش حيزبهل تانى لان الوعكة الصحية دى ممكن تطول ده حكم اعدام يا بشر يعنى مش حاجه سهله وطبعا مش ينفع يتعدم والوعكة الصحية دى بتطارده فالطبيعى انه يسافر يتعالج فى لندن يمكن يقابل ممدوح اسماعيل ويسلم لنا عليه ويقوله اهالى الف واحد بيسلموا عليك وبيبوسوا ايدك على الاقل مش اتسجنت ولا ساعه لكن انا اتسجنت 9شهور انت يا دوحه محكوم عليك ب7سنين وانا اعدام فقولت اوصل السلام علشان لما ترجع مصر مرفوع الراس بعد سبع سنين تبقى تسلم على الحبايب اصلى مش راجع لحد ما اموت واندفن هنا وربنا يسترها مع محسن السكرى ومش تصيبه هو كمان نفس الوعكة انا مقدرة ظروفهم والله وفعلا ممكن يكون فى وعكة صحية وجامدة جدا لان الحكم كان غير متخيل بالمرة لكن ربنا يستر اكتر ومش يسافروا البهوات يتعالجوا بره مصر وده كان قضاء وقدر سوزى بقى الله يرحمها

Thursday, May 21, 2009

الحكم بالاعدام على هشام طلعت مصطفى ومحسن السكرى

طوال نظر قضية هشام طلعت مصطفى ومحسن السكرى وانا اتابع ردود افعال الناس على اى خبر متعلق بالموضوع وكله مش كان يتخير عن بعضه فى الآراء ان الجلسات اتعملت سرية علشان تتطبخ القضية ويبقى فيها اى ثغرة لخروج هشام ومحسن براءة
لكن للأسف الحكم جه النهاردة عكس توقعات الجميع وهو إحالة اوراق المتهمين لفضيلة مفتى الجمهورية .. وبعد النطق بالحكم سادت حالة من الهرج والمرج داخل قاعة المحكمة بسبب صراخ الجميع غير مصدقين من عائلات محسن وهشام والعاملين فى مجموعة طلعت مصطفى بينما هشام ومحسن انتابتهم حالة صمت تااااااامة انا نفسى مش كنت مصدقة لأن جريمة هشام هى التحريض على القتل بينما محسن اللى نفذ ازاى يكون الحكم متساوى مش عارفه ليه برضه مش عايزة اسبق الأحداث اصل لسه فى نقض والحالة الصحية برضه ليها عامل ماهو كل اللى يتزنق بقى يقول الحالة الصحية لما بقت عدوى

Wednesday, May 20, 2009

وتـــر وقــــدر .. بمناسبة يوم الكذب العالمى

لما شوفت كذب وتدليس الست الشيخة بين الناس وقلبها للحقائق وشغل جلا جلا وحىىىى انا بدافع عن رسولى وعلمائىىىى .. أفتكرت زمان اوى فى 2005 قبل المدونات كنت عضوة فى إحدى المجموعات البريدية على الياهو كان اسمها إنت عمرى كنت دائما بانشر فيها خواطر من الخواطر اللى نشرتها فى مجموعة أنت عمرى ونجحت وكان زوار المجموعة فى زيادة كانو خاطرتين واحدة أسمها وتر وقدر وخاطرة تانية كانت اسمها أماه تبتدى برغم تداخل الايام جئت اليكى أبكى .. بعد يومين بالظبط من نشرهم لاقيتهم مغرقين اغلب المنتديات العربية كان فى ناس محترمة بتبعت تستأذنى فى النشر ومش كنت برفض وكان فى ناس محترمة أكتر من اللى نشروها كتبوا تحتها منقول وذكروا اسم المجموعة لكن فى منتدى غريب الاطوار نشرها والاخ كاتب فى النهاية تحياتى لكم وكأن الخاطرة بتاعة اهله .. دخلت المنتدى اشتركت فيه وقولت لهم الخاطرة دى بتاعتى وذوقياً بلاش أدبياً كان ممكن اللى نشرها ينوه انه ناقلها من مجموعة أنت عمرى البريدية او يكتب تحتها منقول للعلم بالشيئ .. لقيت الاخ داخل يقولى دى حاجه اتنشرت على النت ومالك سلطة على النت ولطالما نزلت على النت ما من حقكك تقولى املكها او ما املكها انتى نشرتيها بكيفك انقلها انا بكيفى لان النت ملك للجميع وتوالت الردود بين انى عايزاه يكتب تحتها منقول وبين هو يقولى انتى نزلتيها على النت بكيفك اذن رواد النت ينقلوا وينوهو او ما ينهو بكيفهم .. إشطة كدا دخلنا فى سكة ردح وانا مش هضيع وقتى فى الردح مع المهافيف فى مخهم بعت رساله لادمن المنتدى وحكيت له فيه اللى حصل وقولت له هو لو مش كان كتب منقول وكان اعتذر بطريقة ظريفه انا مش كنت هتكلم لكن بالشكل ده انا اسفه اقولك بما انك المسئول عايزة حقى فى الخاطرة بتاعتى وتقدر تعرف كذب العضو اللى عندك من اللهجة الخاطرة مكتوبة بلهجة مصرية وطبعا اللى نقلها واضحة لهجته المطحنة والفرق واضح كمان اللى منزلها ولد والخاطرة مكتوبة باحساس بنت .. كان رد ادمن المنتدى اسخف من العضو نفسه وقالى خيتى انتى ما مألفه كتاب بطالبينا بحقوقك اعتبريها ذكاة عن مالك .. قعدت متغاظة شوية وكان كل لما عضو يرد على الخاطرة اعرفه انها مش مجهود العضو اللى نقلها طبعا كانت الردود بتتحذف وفى النهاية اتحذفت عضويتى انا كمان ... القصة دى كلها لييييه بقى علشان اقول ان الكداب دايما انسان بجح وتندب فى عينه وعين اللى خلفوه رصاصه لانهم فى الحقيقة مش عرفوا يربوه وغالباً بيعلى صوته على اد ما يقدر علشان يغطى على كدبه لكن برضه مهما على صوته حتى لو حنجرته حط فيها ميكرفون برضه بيبان كدبه فى اى وقت بين الناس وده مش كفاية كداب لاء وكمان حرامى وبرضه بيقاوح نظام اكذب ولا اتجمل


وتـــــر وقـــــدر
أخبرتك كثيراً أن الوتر أضعف من أن تعزف عليه لحناً جميلاً فمن كثرة ما عرف الوتر من حزن وبرغم ما عاناه من الأقدار ألا أنه لم يخفى عليك شئ من الأسرار
لم يعرف هذا الوتر سوى أن يقول لك لا تحاول العزف عليه فالعزف مستحيل لكنك مثل الأقدار
فيأتى القدر يسأل ذاك الوتر ما يبكيك ؟؟
فيجيب أضعتنى وظلمتنى وذللتنى فلم أعد للعزف أجيد والآن تأتى لى بقلب من جديد يشعرنى بالحب وأعود للعبة الأقدار !! أيها القدر أنا لست من أخفى أسرار أنا كالبحر أو قل كالنهر وصافية كما السماء وواضحة وضوح النهار أنا لست كالشمس فيها النور وفيها النار أنا لست الأمس ولست الماضى ومن يعرفنى يا سيدى قد يحتار من منا فى دنياه يستطيع الأختيار ومن منا فى دنياه يخفى عن كل الأنظار وتر يعزف لحنا رغماً عنه ليسعد تلك الأقدار
ولكن ماذا يفيد ؟هل عرفت يوماً أقدارى أنى إنسان هل جاءت أقدارى تفرحنى يوماً أم يوم الفرح دوماً تنسى العنوان ؟
والآن أشعر أن القلب ولهان آه يا قلبى هل تشعر بالنبض دوماً فى الوجدان ؟
من قال أنى أحبك ؟ من قال أنى أريدك ؟ من قال أنى أهواك ؟
يكذب يا سيدى كل من قال بل إن هواك يملأنى يأسرنى فأعترف بأنى أعشق فوق الحب العشق ولتسأل عنى الأقدار... كنت أبيحك بعض الأسرار لم أعرف يوماً طعم الحب إلا وأنا أنظر لعيناك ففقت الحب بدرجات يا عمرى فرحماك
أه لولاك ما وقفت أمام الدنيا لولاك ما كنت أواجه كل ما أنا فيه بقوة وثبات اعذرنى
فقد أستخدمت أنفاسك طاقة تجعلنى أقهر أقدارى وأعيد النبض لأوتارى
أهواك ولا أريد من الدنيا سواك
فرحماك

ست مش بس كدابة لا دى منافقة كمان

ياما الشبكة العنكوبتية دى بتلم وياما خلف الشاشات عقارب مش عقارب الساعه انما العقارب القارصه .. كتير واحنا قاعدين فى بيوتنا بنتواصل من خلال الافكار مع ناس محترمه فعلاً وقولاً وأخرين مدعين بما ليس فيهم فوجدنا الحاقدين ووجدنا المنافقين والمههلين وكذابين الزفة والأفاقين .. كل هذا مفهوم جداً الغرض فدائما من يفعل ذلك إما مراهقون يريدون الوصول لمبتاغهم الذى من أجله اخذوا المصروف من المام فى البيت او البوب او من على راسها بطحة فتريد ان يداريها بشتى الطرق فتزيد من سوءة هذه البطحة اكثر واكثر بردود افعال فاضحة امام الجميع وهذه ربنا يشفيها فى عقلها لأنها بتفضح نفسها بنفسها بالبطحة اللى كل شوية تحسس عليها وتكشفها اكتر والرقاصة اللى بتخاف من الأداب يبقى ترقص فى السر اما الجديد والحديث ان نجد من بلغت من العمر ارذله وتعدت الخمسين عاما وبدلاً من أن تعمل لأخرتها قولاً وفعلاً تجرى هنا وهناك لإرتكاب أفعال صبيانية يترفع عنها المراهقين والذين لم يبلغوا الحلم وحينما تجد نفسها دخلت خانة اليك وبدأ ينفضح أمرها يرتفع صوتها بدافع عن رسولى يا نااس وافعالها يتبرى منها الرسول وهو من أدبه ربه فأحسن تأديبه فحاشا لله أن يكون المدافعين عنه مثل هذه الكذابة الأفاقة التى تدعى ماليس بها وحينما تقف عاجزة أمام مناقشة الآخرين تلهث كالكلب الظمآن وتذكر انها مريضة بالسكر يمكن للتعاطف معها والله اعلم فاذا كنتى انتى لا تتعاطفين مع نفسك ايتها الكاذبة المدعية العلم والمعرفة ألم تعلمى قول الله " المنافقين في الدرك الأسفل من النار ولن تجد لهم نصيرا " فماذا ننتظر من انسانة عديمة الاخلاق لم تحترم سنها شيئ سوى الادعاء الباطل
لاول مرة اخصص مساحة من مدونتى ولاخر مرة لكشف كذب وادعاء من تجلس للنميمة على الاخرين وفى نفس الوقت تأتى إلى المدونة وتقول جايه لك وشايلة كفنى على ايدى وياترحبى بيا يا ترجعينى
ولما قولت لها غورى فى ستين فى داهيه مش عايزة اشوف خلقتك هنا دارت هنا وهناك كقراقصات الموالد
بل احط منهم سبيلا

Tuesday, May 19, 2009

فيديو تشييع جثمان حفيد الرئيس مبارك

فقد طفل حاجه صعبة اوى الموقف صعب جدا اى حد يتخيله
حاسه اوى بعلاء مبارك وهو شايل نعش ابنه
الله يرحمه ويصبرهم
الله يصبرهم



فعلاً المصريين الطيبيين بيبانوا وقت الشدائد الشعب الساخط كله حزين وزعلان على فقد حفيد الرئيس مش فى موقع اخبارى او غير اخبارى دخلته الا ما لاقيت الناس زعلانه وبتواسى الرئيس وابنه لدرجة انى حسيت ان البلد كلها فى حاله حزن تام حتى اللى مقيمين خارج مصر زعلانين اصحابى اللى مش مصريين لاقيتهم بيعزونى حتى سابى اللى مش بتعرف تتكلم عربى فهمت من المواقع الاجنبيه
ولاقيتها باعته لى اس ام اس بتقولى
alla yrhm hafeed re2eeees
اليوم السابع مخصص دفتر عزاء اللى عايز يعزى الرئيس وابنه
http://www.youm7.com/News.asp?NewsID=100597

وفاة حفيد الرئيس مبارك


أعلنت رئاسة الجمهورية صباح الثلاثاء وفاة محمد علاء مبارك الحفيد الأكبر للرئيس حسني مبارك مساء الاثنين عن عمر يناهز (13 عاما).
ونقلت وكالة انباء الشرق الاوسط الرسمية الثلاثاء بيانا مقتضبا عن رئاسة الجمهورية نصه كالتالي:
"يحتسب الرئيس حسنى مبارك عند الله حفيده محمد علاء حسنى مبارك الذى وافته المنية مساء الاثنين على أثر الأزمة الصحية التى تعرض لها خلال اليومين الماضيين، وسوف تشيع الجنازة الثلاثاء بعد صلاة العصر من مسجد "آل رشدان"
و قطع التلفزيون المصري ارساله صباح الثلاثاء لعلن نبأ الوفاة كما ألغت جميع القنوات التابعة للتلفزيون الرسمي المصري برامجها المعتادة وبدأت في اذاعة أغان دينية وأدعية.
وكان محمد قد تعرض لأزمة صحية حادة منذ يومين تم نقله على إثرها إلى مستشفى بالقاهرة، ثم استكمل علاجه فى باريس التي توفي بها
.
يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَّرْضِيَّةً فَادْخُلِي فِي عِبَادِي وَادْخُلِي جَنَّتِي ) ان لله وان اليه راجعون" خالص العزاء للسيد الرئيس محمد حسنى مبارك فى وفاة حفيده محمد علاء مبارك اللهم اسكنه فسيح جناتك والهم اسرته الصبر والسلوان واحر التعازى لعلاء مبارك وزوجته وللسيدة الفاضلة سوزان مبارك راجيين الله سبحانه وتعالى ان يتغمد الفقيد برحمته

Monday, May 18, 2009

أنا المديـــــر

لفظة قالها فؤاد المهندس فى احدى مسرحياته وهو يتراقص على نغماتها وفى ذهنه انه هكذا اصبح يملك الدنيا بيديه فلم يكن يعلم انه بهذا شرب اكبر مقلب فى حياته انه صورة ماهو الا صورة فقط ........... ويبدوا انه كان معقدا فقد ظل طوال عمره مرؤوس ولم ينجح فى عمل حتى يصبح رئيس فيه وحين واتته الفرصه فى غفله الزمن لم ينظر الى ساعتها الى لماذا اختاروه مديرا ؟لقد اختاروه لتفاهته وجهله بالامور التى يقوم بها من ارادوه مديرا فلم يجدوا اكثر منه غباءا حتى يختاروه وهو لايهمه علام يوقع من اوراق كل مايهمه هو انه المدير وبعد خراب مالطة تذكر وعلم لماذا كان هو المدير ان الجهل يرفع عند الجهلاء مراتب الاشياء فمثلا حينما تأتى لجاهل وتقول له سأعطيك الف جنيه شريطة ان توقع على هذا العقد فلا يسألك عن مابداخل العقد انما يسألك أين النقود؟ الاخطر من هذا كله حينما تمنح الجاهل سلطة فتجد نبرة صوته قد علت وارتفعت وراح يرمى مرؤوسيه بالجزاءات بسبب او بدون باعتبار انه هكذا يرسى القواعد والاسس وينهى حالات التسيب الموجودة وهو لايعلم ان العقلاء لن ينتظروه رئيسا بل انهم يضحكون ويسخرون من افعاله فمن يثنى على افعاله تراه يريد منه المزيد كى يضحك اكثر ليس الا ولاتجد معارضه لافعاله لان المعارضة اما تصمت لانها عاقلة لترى نهايته التى رسمها لنفسه فنهايته قريبة جدا او تتضاحك فيما بينها البعض على افعاله فيكون هو مضحكة الجلسة ونوادره وافعاله هم حفلة اسمارهم اما هو فتراه يغط فى ثبات لايرى الا انه المدير اذا اردت ان تقضى على عدو لك ادعو الله ان يجعل اصدقائه من الجهلاء فهم اقرب من يقضى عليه ستجد دائما الجاهل والضعيف حينما يكونان فى موقع ادارى ما فانهم لايختارون الا من هم اجهل او اضعف منهم كمساعدين لهم وتستمر من اضعف الى اضعف حتى يتحول المكان ككل الى قلة من الضعفاء وينهار المكان تماما ويصبح كالرماد او بالاحرى ليس له وجود

Sunday, May 17, 2009

مليون مبروك للمرأة الكويتيه .. والى المراحيض كل الاسلاميين

في وقت سجلت فيه المرأة الكويتية انتصارا تاريخيا بفوزها بأربعة مقاعد، تراجع الاسلاميون السنة بشكل ملحوظ بحسب نتائج الانتخابات التشريعية الكويتية التي اظهرت ايضا تحقيق الشيعة تقدما لافتا
ألف مليون مبروك للمرأة الكويتية .. إنتصار 4سيدات فى الانتخابات التشريعية الكويتية النهاردة يعد إنتصاراً لكل إمرأة عربية .. تراجع الإسلاميين بهذا الشكل الهائل يدل على صحوة وأن العالم العربى فعلاً بدأ يفوق من غيبوبة مرتدى عباءات الدين للوصول لأهداف سياسية وأغراض شخصية ... وكم وضحت دنائتهم على مر التاريخ واخرها تشهيرهم بالدكتورة أسيل العوضى فى الإنتخابات التشريعية الكويتية ولكن كان الله لهم بالمرصاد وذهبوا يحملون خيبتهم بين أذرعهم وفازت الدكتورة أسيل رغم التشهير والتنكيل بها .. فوز اسيل العوضي ورولا دشتي وسلوى الجسار و معصومة المبارك .. وخيبة الاسلاميين اليوم لهى صفعة قوية لكل من ليس له هم سوى أن المرأة مجرد شيئ للمتعة وفرج لافراغ شهوات هذا الثور الهائج والذى يثار على نفسه من مجرد خصلة شعر يراها من أنثى .. مبروك مليون مبروك للمرأة الكويتية خاصة والعربية عامة وعقبال المرأة السعودية لما يتم تحريرها من العادات القبلية البالية ..
مش قادرة أوصف سعادتى بفوز دكتورة أسيل لو انا اللى كنت مكانها مش كنت هكون بالسعادة دى كلها .. إنسانة مثقفة وعاقلة وواعية اتمنى لو ربع سكان الأرض بثقافتها وعقلها

Friday, May 15, 2009

خلية حزب الله فى مصر تلقت أموالا ضخمة لتنفيذ عمليات إرهابية

المقال هنقله كامل ليوضح كذب وتدليس حزب اللات وكل عميل او مرتزق على شاكلتهم
القاهرة - محرر مصراوى - كشفت مجلة "المصور" ، فى عددها الأسبوعى ، تفاصيل جديدة عن اعترافات المتهمين فى خلية حزب الله اللبنانى فى مصر، الذى ضبطته الأجهزة الأمنية بالكامل مؤخرا ، مشيرة إلى أن التنظيم عمل على الأراضى المصرية منذ عام 2003.
ووفقا لتقرير مجلة المصور، فإن المتهم الرئيسى فى القضية هو محمد يوسف منصور (لبنانى الجنسية) والمعروف باسمه الحركى "سامى شهاب" أوفد من الوحدة (1800) التابعة لحزب الله والمتخصصة فى عمليات ما يسميه الحزب (بدول الطوق) لكى يؤسس ويدعم ويتابع التنظيم الذى يضم بين أعضائه اثنين من سكان مدينة العريش يحملان الهوية المصرية .
وبحسب التقرير ، فإن التنظيم تلقى أموالا ضخمة من الحزب اللبنانى لعمل سواتر فى صورة مشروعات يتم من خلالها تنفيذ عمليات إرهاب وترويع للسائحين فى سيناء وللسفن المارة فى قناة السويس ، ومجموعة أخرى مختارة من العمليات الإرهابية .
وأشار التقرير إلى أن المتهم الرئيسى محمد يوسف منصور (شيعى المذهب) يحمل عدة أسماء حركية داخل لبنان وخارجه، وهو من مواليد بيت جبيل بلبنان فى 14 سبتمبر من عام 1970، وحصل على الشهادة الابتدائية، وامتهن حرفة الحداد الإفرنجى (باب وشباك)، وهو من سكان الضاحية الجنوبية.
وأضاف أن يوسف منصور انضم لحزب الله فى عام 1986 ، حيث التحق "بفصائل التعبئة" التابعة للحزب ، وتلقى تدريبا متخصصا على استعمال الأسلحة والمهارات القتالية، وشارك فى عمليات عسكرية ضد قوات الاحتلال الإسرائيلى فى جنوب لبنان، لافتا إلى أنه بعد ست سنوات انتقل إلى فصائل "الرصد والاستطلاع"، وتلقى دورة تدريبية على الاستطلاع والاستخبارات وقام بالفعل بجمع معلومات عسكرية عن القوات الإسرائيلية فى إقليم التفاح.
وذكر التقرير أن المتهم محمد يوسف منصور استمر فى فصائل الاستطلاع التابعة لحزب الله اللبنانى لمدة 12 عاما ، وارتقى داخل الهيكل الأمنى والاستخباراتى للحزب ،وتم ضمه للوحدة (1800) المتخصصة فى القضية الفلسطينية فى دول الطوق (يقصد بها مصر وسوريا والأردن ولبنان) .
وأضاف أن محمد منصور تلقى دورة فى الأمن والمراقبة والتعقب وكتابة التقارير وتجنيد المصادر، ومن هنا ربطته صلات وطيدة باللبنانى محمد قبلان (مسئول ما يسمى بوحدة دول الطوق) ، حيث كلفه الأخير بمساعدة العناصر الفلسطينية التى تتسلل للبلاد ودعمهم بالسلاح والتدريب ، فضلا عن تجنيد فلسطينيين مقيمين بالبلاد ولا سيما من الطلبة.
وتابع:"أن محمد يوسف أو
سامى شهاب تمكن من تشكيل مجموعة تنظيمية تعمل تحت إشرافه فى لبنان ، ودخل مصر ، بتكليف من قبلان ، مستخدما جواز سفر مزور باسم "جمال هانى المحلاوى" لكى يدرب العناصر التى يتم تجنيدها ومتابعة نشاطهم ، ثم يعود إلى لبنان ، على أن يستمر تواصله مع هذه العناصر المجندة".
وأوضح التقرير أن محمد يوسف استخدم بعد ذلك جوازا مزورا آخر يحمل اسمه الحركى سامى شهاب بدلا من جمال المحلاوى ، وأشار إلى أن المتهم محمد منصور أبدى دهشته وأسفه ليس من كفاءة أجهزة الأمن المصرية فى إسقاط التنظيم وإنما على مستوى الجناح الاستخباراتى لحزب الله الذى لم يعد على الكفاءة القديمة ، حيث تساءل: كيف يكون هذا الجناح مخفقا إلى درجة أن ينكشف أمره للمصريين من الوهلة الأولى؟!.
وذكر التقرير أن من أبرز أعضاء تنظيم حزب الله فى مصر هو "ناصر خليل معمر أبو عمرة"، وهو من مواليد سيناء (العريش) فى 15 يناير 1976، ويقيم بها، وهو من حملة الدبلومات الزراعية ، واشتغل كأجير زراعى، ويحمل وثيقة سفر لاجىء فلسطينى يتم تجديدها سنويا.
أضاف أن أبو عمرة ، كما ثبت من التحقيقات ، عضو بجماعة الإخوان وانضم إليها فى عام 2002 ، حيث شارك فى أنشطتها، حتى التقى باللبنانى "حماد مسلم" ، وهو من عناصر حزب الله النشطة ، والذى جنده لصالح التنظيم الإرهابى فى مصر ، طالبا منه إيواء بعض عناصر الحزب اللبنانى الذين يترددون سرا على مصر .
أما العنصر الثالث فى التنظيم ، هو "نمر فهمى محمد نمر الطويل" ، من مواليد العريش فى عام 1976 وحاصل على دبلوم زراعة ويحمل وثيقة سفر لاجىء فلسطينى (مثل أبو عمرة تماما الذى قام بتجنيده)، لكن الفارق أن نمر انضم لجماعة الإخوان فى عام 2000، وشارك فى أنشطتها، ثم انضم لتنظيم حزب الله اللبنانى فى مصر عام 2004.
وأشار التقرير إلى أن هناك مجموعة من المتهمين بالانتماء للتنظيم وهم مصريون وسورى الجنسية يطلق عليهم معا اسم "المجموعة البورسعيدية"، وهى تتألف من خمسة أفراد هم: إبراهيم عصام وإيهاب أحمد وأيمن مصطفى (سورى) ومحمد عبدالفتاح وإيهاب السيد.
وأوضح التقرير أن هذه المجموعة تعرفت على صورة محمد قبلان - الرأس المدبر ورئيس وحدة دول الطوق وهو هارب حاليا - وأكدوا جميعا بلا استثناء أنهم التقوا به كثيرا من المرات، وكان يغير أسماءه الحركية من وقت إلى آخر، فتارة يقول إن اسمه "أبو أدهم" وتارة أخرى يصبح اسمه "محمود" وثالثة يصير اسمه "أسعد".
وأظهرت التحقيقات أن سامى شهاب كلف هذه المجموعة على وجه التحديد بشراء محمل أسماك بهدف الاستفادة من دخل المحل فى الإنفاق على المجموعة البورسعيدية وكغطاء أو ساتر لأعمالها التخريبية فى مصر.
أما المتهم السورى أيمن مصطفى فكان له أهمية خاصة فى هذا التنظيم الإرهابى إذ إنه متخصص فى الإعداد للعبوات الناسفة وأساليب إخفائها والأمن الذاتى والتأمين الشخصى للافراد وقد تم تجنيده بواسطة محمد قبلان الذى أعطاه دورات تدريبية متخصصة فى هذه المجالات بنفسه فى معسكر تدريبى تابع لحزب الله فى جنوب لبنان.
وخلال التحقيقات جرت مواجهة بين سامى شهاب (رأس التنظيم فى مصر) وبين نصار عبد اللطيف جبريل (من أهالى سيناء ومن أصل فلسطينى، ويعمل عاملا فى مصنع طوب بالعريش)، واعترف جبريل بأنه تعرف على سامى شهاب من خلال نمر فهمى الطويل، كما اعترف بأنه ينتمى لجماعة الإخوان (المحظورة) مثل نمر الطويل تماما.
وأكد جبريل - بحسب تقرير رئيس تحرير مجلة "المصور" - أن محمد قبلان التقى به عدة مرات فى أماكن مختلفة من القاهرة (مطاعم ومقاه ومرة أمام جامعة القاهرة)، وكان ذلك فى حضور سامى شهاب وأنه كلف من قبلان وشهاب مع متهمين آخرين برصد وتتبع أماكن السائحين الإسرائيليين فى القاهرة وفى جنوب سيناء وأماكن السياحة والمنتجعات المختلفة فى مصر التى يتردد عليها إسرائيليون.
وأشار التقرير إلى أن أقوال جبريل تطابقت وأقوال إيهاب عبدالهادى محمد القليوبى من أهالى العريش (30 عاما) - عامل بناء - والمتهم هانى سيد مطلق (من العريش 29 عاما) - عامل بناء - وهما بدورهما تعرفا على سامى شهاب مثلما تعرف عليه جبريل .
أما المتهم الفلسطينى محمد رمضان عبدالفتاح بركة (18 عاما) - طالب بالمرحلة الثانوية ومقيم بغزة - فتعرف على سامى شهاب - حسبما ورد بالتحقيقات - تحت اسم أبو يوسف ، وقال إنه كانت لديه رغبة قوية فى عمل استشهادى ضد إسرائيل حتى ولو بتفجير ذاته فى إسرائيليين، فقال له سامى شهاب إنه بإمكانه أن يحقق أمنيته الاستشهادية وقام بتهريبه عن طريق (أنفاق) فى سيناء لرفح حيث قابله هناك ودبر له أماكن إقامة متعددة فى سيناء مع توفير وسائل انتقال وجوازات سفر مزورة له بهدف تهريبه إلى لبنان للتدرب على العمليات الإستشهادية ، فقبض عليه فى ذات اليوم الذى كان سيتسلم فيه البطاقة وجواز السفر المزورين من سامى شهاب.
وذكر التقرير أن الفلسطينى الآخر فى التنظيم عادل موسى سلمان (32 عاما) ، من رفح، (مبلط سيراميك) قبض عليه قبل الدخول فى مرحلة تدريبه فى جنوب لبنان.
وأكد التقرير أنه من خلال التحقيقات مع عناصر تنظيم حزب الله السرى فى مصر ثبت أن له نشاطا إرهابيا وأهدافا تخريبية شديدة الوضوح ، ففى التحقيقات اعترفت هذه العناصر بأن نشاط الشبكة الإرهابية التى انخرطوا فيها بدأ فى مصر منذ عام 2003 عقب تردد اللبنانى "محمد قبلان" مسئول وحدة دول الطوق مكلفا من الوحدة 1800 التابعة لحزب الله اللبنانى وعاونه فى هذه المهمة محمد يوسف منصور الذى كان يستخدم الاسم الحركى "سامى شهاب".
وذكر التقرير أنه فى هذه الفترة من 2003 وحتى سقوط التنظيم بالكامل فى أيدى الأمن المصرى تم تدريب العناصر التى تم استقطابها على دورات فى مجالات كشف المراقبة وجمع المعلومات والاتصالات المشفرة والأمن ومقاومة الاستجواب وأساليب الاستقطاب وكيفية الاقتراب من العناصر التى يتم استهداف تجنيدها .
وأشار تقرير رئيس تحرير مجلة "المصور" إلى اختيار ثلاثة عناصر من التنظيم لبرامج شفرة الاتصال بقيادات حزب الله فى لبنان ، وكذلك استقدام خبير متفجرات من لبنان تابع للحزب لممارسة عملياتهم الإرهابية فى مصر، منها تصنيع عبوات ناسفة للأعمال الانتحارية، والاحتفاظ بها لدى مهرب من مهربى شمال سيناء، وأنه تم ضبط هذه العبوات والمواد التى تستخدم فى إعدادها.
وأوضح أنه كساتر لوجود المجموعة داخل مصر، جرى افتتاح مشروعات تجارية تغطى نشاطهم التخريبى ، منها شركة تسفير للعمالة للخارج، وبازارات سياحية ومركب صيد وسيارة أجرة، وتم اقتناء هذه المشروعات (السواتر) بأسماء العناصر المستقطبة فى مصر.
وفى سيناء قام أعضاء التنظيم بمجموعة من الأنشطة السرية التخريبية، أول هذه الأنشطة أنهم قاموا بحصر ومسح للمدن والقرى والطرق ونقاط التفتيش والأكمنة الشرطية فى سيناء، وقاموا كذلك بتحديد أعداد الأفواج السياحية المترددة على نويبع وطابا وما حولهما وأماكن إعاشتهم، وأيضا قاموا بالبحث عن مكان مناسب يطل مباشرة على المجرى الملاحى لقناة السويس فى مدينة فايد بالإسماعيلية يمكن من خلاله بسهولة رصد السفن العابرة للقناة والتعرض المباشر لها.
وقال إن الهدف الذى كان وراء أنشطة التنظيم التخريبى التابع لحزب الله اللبنانى فى سيناء هو ضرب السياحة فى هذه المنطقة، من خلال القيام بأعمال عدائية إرهابية ضد السياح فيها، وأيضا القيام بأعمال عدائية ضد السفن المارة فى المجرى الملاحى لقناة السويس.وأوضح التقرير أنه ثبت من التحقيقات مع هذه العناصر واعترافاتهم، أنهم جميعا
دون استثناء قد تلقوا مبالغ مالية ومخصصات من حزب الله فى بلبنان، لكى يقيموا بها مشروعات تجارية فى مصر، يتخذون منها سواتر لتنفيذ عملياتهم الإرهابية بها، وفق تعليمات الحزب فى لبنان لهم.
واختتم التقرير بأن هذه الاعترافات جاءت مطابقة لما وجدته نيابة أمن الدولة العليا على "الهارد ديسك" الخاص بكمبيوتر سامى شهاب، الذى أكدت محتوياته الاعترافات.
المصدر: وكالة انباء الشرق الاوسط

ولسه بعد كل ده هيلاقى متخلفين يسقفوا له ويقولوا برافو يا حسن زعبولة ؟؟ دمر كمان فى بلدنا واحنا راضين ومبسوطين وفاتحين بؤنا من الودن للودن ؟؟

Wednesday, May 13, 2009

فضحونا فى هولندا

قرأت مقال للكاتب / محمد حمدى مش صاحب مدونة دماغى منعاً لخلط الأوراق فى جريدة اليوم السابع يتحدث فيه عن محامى يدعى محمد عنايت رفض الوقوف للقاضى بحجة ان الدين الاسلامى يرفض الوقوف لغير المسلم
لكن مجلس تأديب المحامين هناك اعتبر تصرف عنايات ازدراء للمحكمة ووجه له توبيخا، وهدد بتعليق عضويته إذا لم يغير سلوكه
انا شايفه بصراحة إن مجلس التأديب ده مش بيقوم بعمله على أكمل وجه
يعنى المفروض بعد تصرف زى ده المحامى ده يطلع بييع بطاطا
هو فى اى موضع الدين الإسلامى قال مش نقف لغير المسلم .. ولا دى اخرة فتة الكام مرتزق اللى بيعقدوا يصرخوا فى الفضائيات .. معقول العقول انحدرت بالشكل ده واصبح من يقرأ ويكتب يساق كالبعير فى القطيع امال كان بيعمل ايه فى المدارس كان بيحفظ علشان يروح اخر السنة الامتحان يتقيئ الكام كلمة اللى حفظهم ؟؟ على كدا بقى مش نلوم على الجهله اللى بيفجروا ويروعوا الآمنين .. كان زمان كل واحد عايز يعمل مصيبة او ينتقم من واحد تانى يروح لواحد جاهل مش عارف فى الحياة ابعد من تحت رجليه ويقوله ان الشخص ده فاسق ويستحق القتل والدين بيقول كدا والتانى يفرح ويجرى يتقل ويدبح علشان يدخل الجنة .. دلوقتى الجهل بقى اعم واشمل ودخل لطبقة يقال انهم متعلمين لكن الواضح جدا ان الجهل مش ليه علاقة بالتعليم اساسا
وده رأى الدين
وقال الشيخ محمد التمامى إمام وخطيب مسجد، إن الوقوف للقاضى لا يتعارض مع العقيدة الإسلامية، ويضيف: "وجهة نظر المحامى عنايت أنه يتصرف من منطلق أن الناس سواسية، ولكن للأسف هناك سوء فهم لديه، ونسى أن القرآن والأحاديث شددت على أن هناك أشخاصا لهم مكانة عالية، وهناك درجات فى تلك المكانة. فى نفس الوقت يشدد الإسلام على ضرورة احترام الآخرين".
والمحامى بدل ما يحترم قانون البلد اللى بتأكله ولاماه رايح يرفع قضية ويقول تمييز دينى
ده محامى ايه السكاند هاند ده .. هو التمييز الدينى اصبح العلقة التى يتشدق بيها كل متخلف عايز يمشى مع القطيع والجميع يقوله آمين
نهاية المقال كانت اشمل واعم لانها خير دليل على مدى التخلف اللى بيعانى منه معتنقى العادات البدوية وربنا يجحمهم مع من أتبعوهم
وبينما يتقدم العالم سريعا فى شتى العلوم والفروع، وتتغير طبائع الحياة كل ساعة، ننشغل نحن بالبحث عن الزى الشرعى للمسلم، وشكل اللحية وهل هى طويلة أم محفوفة، ونوع النقاب، وطريقة ارتداء الحجاب، فحولنا الدين إلى مظاهر وملابس وفتاوى غريبة.. وتصرفات مثيرة مثل أن وقوف المحامى لدى دخول القاضى قاعة المحكمة حرام.. حرام عليكم!

Monday, May 11, 2009

اغتصاب البراءه

لأى مدى وصل بينا الإنحلال الاخلاقى
من يومين إغتصاب عجوز فى المقابر والنهاردة اغتصاب طفلة لم يتجاوز عمرها العشر سنوات
للدرجة دى إغتصاب البراءة فى وضح النهار أصبح شيئ عادى ؟؟
الفيديو ده إهداء لكل واحد بيحاول يبرر جريمة لمتحرش قذر ويقول اصل البنت هى اللى أثارته سواء بلبسها أو طريقه مشيها
اصل البنت فى كل الأحوال هى السبب اصلها بتخرج من بيتها

البنت العورة هى السبب فى انحدار المجتمع والمفروض انها تتكفن ومش تخرج من الـ4 حيطان اللى اتولدت فيهم
مع الاستشهاد بكل الاحاديث اللى ضد المرأة مع إن مش فيهم ولا حديث صحيح
الفيديو ده يا حضرات يعرض واقعة اغتصاب لطفلة عمرها 9 سنوات
كل ما تحمله من إغراء هى براءه الأطفال التى وإن رأها حيوان ضال لأفترس من يفكر فى الإقتراب منها

فين دعاة الفضيلة من هؤلاء الحيوانات ؟؟
فين اللى مش ليهم شغلانة طول الليل والنهار غير افراغ سمومهم فى العقول ولم يشغلهم فى الحياة غير ان المرأة مجرد وعاء لافراغ شهوات الرجل .. ممكن بضه اللى موافقهم على الكلام ده يتفرج على الفيديو فلقد نجحوا فعلا نجاح منقطع النظير فى ايصال رسالتهم المقززة
بلد مقرفة وناس متخلفة وحسبنا الله ونعم الوكيل

Saturday, May 9, 2009

عاكف .. اعتكف يرحمك الله

ونقلت صحيفة الشرق الاوسط عن عاكف، في مؤتمر عقدته الكتلة النيابية للإخوان المسلمين تحت عنوان "القدس والأقصى ومخاطر التهويد"، "كان الواجب علي مصر أن تشكر حزب الله بدلا من أن تحقق مع الخلية، التي لم يقصد السيد حسن نصر الله من إرسالها التخريب أو الاعتداء وإنما دعم المقاومة الفلسطينية، وما يقوم به حسن نصر الله من مقاومة لا تستطيع مصر فعله، وقد قصرنا نحن في القيام به".
ومين يشهد يا عاكف وانت مش فالح انت وجماعتك غير فى اللطم والصويت حسن زفت ده ما كان يساعد من بلده لو هدفه المساعدة ولا هو يستخبى زى الفار ويبعت شوية لانتهاك السيادة المصرية .. والتحريض على قلب نظام وعمل فوضى اصل صعبان عليه يشوف بلد مش فيها حرب وطالما عارف ان فى اتفاقية سلام والنظام مش هيحارب يبقى يلعب بالورقة الرابحة واكيد الورقة دى اصحاب المصالح بتوع طز فى مصر ومش فى مانع طبعا انهم يخونوا السادات مش هو برضه اللى وقع على الاتفاقية لولاه الخاين ده كان زمان مش فى حاجه اسمها مصر دلوقتى
وطال عاكف في هجومه الرئيس المصري الراحل أنور السادات، الذي وصفه بالخيانة بحسب الصحيفة، وقال "لقد خان السادات شعبه عندما عقد اتفاقية كامب ديفيد دون أن يستشيره، لذلك فقد تخلي عنه الشعب كما تخلي عنه أقرب الناس له
هو بالرغم من اختلافى مع السادات لأنه سبب البلاوى اللى اسمهم الاخوان الا ان لولا المعاهدة دى كان زمان الحرب والدمار فى مصر من شرقها لغربها
وبعدين بلاش جماعة الاخوان المنتفعين تتكلم عن الخيانة اصل السجل بتاعهم حافل وشامل وكامل ولازال التاريخ يدون
وياريت كفاية تصريحات هوجاء وخربطة فى الكلام الناس ممكن تقدر الحالة اللى عندك واحترم شيخوختك مش لما تتنزنق تقول سامحونى مش كان قصدى وتانى يوم تطلع ببيان يلغى اللى قبله كالعادة ... ومين اساسا اللى وكلك تتكلم نيابة عن شعب مصر .. مين اللى عينك متحدث رسمى علشان يطلع يتكلم فى الصحف والتلفزيون باسم مصر ويتشدق باسم الوطنية ويرمى اى حد يخطر فى باله بالخيانة .. الخاين والعميل اللى بيرمى نفسه فى احضان اللى ليه عنده مصلحة
الغريب انى قريت حوار امبارح لجيهان السادات معجبة فيه اوى بالاخوان المنتفعين وبتقول ان السادات كان اخوانجى وانها بتدعمهم مالياً حتى وهى صغيرة كانت بتحوش مصروفها وتروح تديه فى ظرف للهضيبى .. ياترى بقى ايه موقفها بعد ما عاكف خون السادات لسه عاجبها دورهم الوهابى وحركاتهم التمثيليه فى احداث الفوضى فى البلاد

Thursday, May 7, 2009

فضفضات مع نفسى

نسيت انساك اسم اغنية لفضل شاكر كلمات الأغنية مع إحساسه شكلت أعذب سيمفونية لا تمل الأذن من سماعها مهما تكررت

أكثر أشياء تشعرنى بالملل الروتين والإنتظار ...

فى دوامة الحياة اشعر بتقاذف الأمواج اغمض عينى واعيدها مرة اخرى على أرى حولى من يستحق ولكنى فى كل مرة كنت أجد علامات مختلفة ( رفض - استنكار - تعجب - استفهام ) ..ايه العلامات دى كلها انا مش هغمض عنيا تانى

مش ينفع فى حاجات ساعات لازم نغمض عينيا فيها علشان نستريح

ليه يعنى هو فى احسن من ان الواحد يحس انه شايف كل حاجه قدامه

اه فى لانك لو شوفتى كل حاجه قدامك فى حاجات كتير اوى هتضايقك

مش مشكلة المهم اعرف ايه اللى بيحصل .. فجأة يشدو كاظم .. إبتسم هدى أعصابك خلى راسك بين إيديا

ياااااه كاظم ده حبيب قلبى

أه ما أنا عارف علشان كدا مش بقبله

هههههههههه بس ده حاجة بعيدة يعنى تكرهه ليه

ماهو ده اللى انا بتكلم فيه ان الواحد لازم يغمض عينه على حاجات علشان مش يحس انها بتضايقه

سبحان الله اول مرة اشوف واحد بيكره حد ومحتفظ بالسيدهات بتاعته فى عربيته

الغريب اكتر انى محتفظ بيها علشانك بس برضه بكرهه

تعرف أنا قريت مقولة حلوة أوى النهاردة .. من وقت ما قريتها وهى بتردد جوايا

طيب شاركينى معاكى

لا تعطى للغير زمامك فيصبح من كان ورائك أمامك مثل هذا الحقيد لا يكفيه دمارك بل يبنى نفسه من حطامك

امممم كلام صح جداً بس هى ليها مناسبة يعنى ولا حاجه ؟؟

لاء ابداً انا قريتها بالصدفة لما كنت بقرأ كتاب عاشق الحى وعجبتنى

مش عارفه ليه لما خرجت مع نهى مع اننا خرجنا فى مكان مختلف الا انى شوفت نفس الواد اللى كان قاعد يبرق فينا انا وايمو لما كان فى الاسماعيلية هو ياربى نفس السحنة ونفس العمر تقريباً هو الواد عامل منه كوبى فى كل مكان ولا ايه ؟؟

نهى :واد مين ؟؟

بصى كدا قدامنا .. اهو نفس الاسطمبا كدا شوفتها من كام يوم

يا بنتى الاشباه كلها كتير اوى الايام دى

عارفه يا نهى أنا نفسى أروح أعيش فى جزيرة مش فيها غير بحر وسما وانا ومش فيها بشرغيرى

طيب لما تلاقيها ابعتى لى العنوان علشان احصلك

مش عارفه ليه لما ببص فى المراية بحس انى شايفه صورتك لما بكون ماشية لوحدى بحس انى بكلمك

وفجأة رقصت وأخذت أدور وأدور .. تناثرت عيناى فى أنحاء الغرفة

لم يكن الرقص فناً .. ولم يكن جنوناً بل كان غضباً

فقد مللت صمت الجدران

Wednesday, May 6, 2009

غزوة المتأسلمين فى الكويت

هكذا فى كل مكان أينما وجد متأسلمين وجدت المشاكل التى لم تنتهى ودائماً حروبهم الضروس التى يخوضونها لا تنم الا عن حقد دفين ضد المرأة .. فالحرب الآن مشتعلة على اشدها فى الكويت
حيث أن المتأسلمين رأوا أن الدكتورة أسيل العوضى شخصية مؤثرة وتحمل فى رأسها عقل يعمل لا نخاعات مسلوقة مثلهم فلم يجدوا طريقة للهجوم عليها سوى الحجاب .. تلك القطعة من القماش التى من كثرة ما استخدمها الإسلاميين والوهابييون فى حروبهم ضد النساء أهترأت .. الدكتورة أسيل العوضى أستاذة الفلسفة بجامعة الكويت ومرشحة برلمانية لمجلس الأمة .. تم تسجيل مقطع صوتى لها أثناء القائها محاضرة أمام طالبتها .. ذكرت فيه أن آيات الحجاب نزلت فى زوجات النبي (صلى الله عليه وسلم) وليس جميع المسلمات .. وردت العوضي بأن "الشريط اقتطع" من محاضرة لها أمام طالباتها في كلية الطب بجامعة الكويت، وأنها بصدد تقديم شكوى لإدارة الجامعة حول تسريب المقطع"، معتبرة أن تسجيله في قاعة المحاضرات بمثابة تجسس ... ولكن لأن يجعل الله كيدهم فى نحورهم فشرحها للمحاضرة كان يخص مادة (التفكير النقدي) التي تدرسها باللغة الإنجليزية والتي يعتمد منهجها على قيام المدرس بتحفيز الطلبة للتفكير خارج الآراء السائدة ويكون ذلك عبر تقديم مدرس المادة لآراء مخالفة بشراسة لآراء الطلبة في كل الأمور المطروحة في المحاضرة وذلك لإيصال الفكرة من المادة"
وحتى وإن كان الأمر ليس كذلك فقطعة القماش ليست الحرب التى ستكسبون بها المعركة الإنتخابية وتنسحب على إثرها الدكتورة أسيل فصاحب كل ذو عقل يميز فكلامها ليس بخطأ ولا هو خروج عن الإسلام وإنما صحيح فالله سبحانه وتعالى ذكر فى آياته
" يا نساء النبى لستن كأحد من النساء "
فإن أخطأت إحداهن فالعقاب لها مضاعف ولا يمكن ان تتزوج إحداهن بعد وفاة الرسول
اما باقى النساء فبعد طلاقها او وفاة زوجها أو حتى خلعه تتزوج وتواصل حياتها كان لم يكن بها شيئ مضى ... ليس من المستغرب ان تكون الحرب ضد الدكتورة اسيل بسبب الحجاب تلك الكلمة التى لا دلاللاله لها على الزى سواء من قريب او بعيد فالحجاب بمعناه اللغوى ويعنى الساتر او الحاجز كالحجاب الحاجز بين البطن والصدر وكالجدار فمن ارادت الاحتجاب فلتسير خلف حائط او الاولى الا تخرج من بيتها حتى تترك مكانها فى الشوارع والمواصلات والعمل لمن تملك الطموح وتفيد مجتمعها ... ليصبح مجتمع حضارى متكامل حتى وان كان هناك انتخابات اخرى قادمة يركز فيها المرشحون المحترمون على تطوير البلاد ونهضتها وليس اصحاب المصالح الشخصية الذين لا يعرفون معنى شرف المنافسه فاذا كانت المنافس لهم فى انتخابات او عمل او مشابه إمرأة فالرد جاهو عادة وهو إما الخوض فى شرفها او قطعة القماش التى جعلوها الركن السادس من الاسلام فمن سجلت محاضرة الدكتورة اسيل واقطعت منها ما يناسب هوى من اعطوها التعليمات من المتأسلمين فتاة محجبة ونعم الشرف والأخلاق والعفة .. ولن اذكركم بانتخابات مجلس الشعب بمصر 2005حينما شهر المتأسلمون سيوفهم بجوار شعاراتهم وكانت نسائهم يخلعن عنهم اغطية رؤسهم لاعطاء الاصوات اكثر من مرة فهؤلاء اصحاب الحيل الماكرة للوصول لاهداف ومصالح شخصية ولعل ما حدث فى الكويت لهو درس وعبرة لانتخابات 2010القادمة بمصر

Tuesday, May 5, 2009

قطة الصحراء وبدرية طه على قناة الانسانية

بناء على طلب الجماهير وعلى رأسهم سارة ( صفا ) وخادم المسيح
لقائى انا وبدرية طه على قناة الانسانية
طبعا القناة دينية بحته وده اللى أتفاجأت بيه لما دخلت الأستوديو
واللى أتفاجأت بيه أكتر اسلوب المذيعه ما شاء الله شاطرة جدا فى قطع الكلام
عموما هاذوه هو الفيديو ومشاهدة ممتعه يا بلوجرية بس مش عايزة حدف طوب لو سمحتوا كفاية عليا الكابتن بتاع الفيس بوك

Monday, May 4, 2009

اذا كانت البنت حيطة تطيق الفحل وهى سن 9 سنين زوجوها

ده مش كلامى ده كلام الشيخ المنجى مع احمد عبدون اللى بجد حس ان الكلام همجى ولا يرقى لكلام العقل والمنطق وقال انا مش فى المود النهارده علشان اناقش الكلام ده .. بنت 9 سنين وتتجوز ده صعب اوى .. الراجل ده مش ينفع يتعامل بالادب ده يا استاذ احمد
الشيخ المهلك وليس المنجى موافق جدا على زواج البنت وهى سن 9 سنين ومن فرط ثقافته وعلمه بالدين قال ان الشرع مش حدد سن زواج معين للبنت الراجل ده شيخ ؟؟ بجد يعنى فاهم فى الدين ؟؟ اذا كان الاسلام حدد اقامة الحدود من سن 15 سنة ازاى بقى غاب عن الشرع يحدد سن للزواج الناس دى مين اللى بيطلعها تعمل الائح ده فى دماغ الناس على الفضائيات
الشيخ المحترم بيقول ان الطفلة اللى عمرها 9 سنين و زى الحيطة وتطيق الفحل اللى هو الراجل يبقى على البركة يتجوزوا .. بناء على ايه الراجل ده يصف البنت بالحيطة والراجل بالفحل ؟؟؟
بناء على ايه الراجل ده يبيح باغتصاب الاطفال
ايوا اغتصاب مهما كانت الورقة المكتوبة باسم زواج مغلفة برداء الشرع
ده الفيديو المسخرة بتاع الشيخ المهلك وليس المنجى الراجل ده فعلا لو فى دولة محترمة كان اتقدم لمحاكمة عاجلة



وبعد الشيخ المهلك الفتوى اللى اشد اهلاكا وتجيز اغتصاب الاطفال لاء وبتشرح الطريقة اللى الراجل ينزل بيها اذا كان بايد الطفلة اللى عمرها 9 سنين او بين فخذيها .. مش عارفه انا ايه العالم الوسخة اللى هايجة باستمرار ومش ليها شغلانة ولا اى مصيبة تعملها غير الجنس ومعاشرة الاطفال
ذكرتم أن للزوج أن يباشرها، ويضمها ويقبلها، وينزل بين فخذيها، لكن الإنزال بين الفخذين ينافي القاعدة "لا ضرر ولا ضرار" أليس كذلك، كما أني بحثت ولم أر أيا من العلماء السابقين رحمهم الله يجوز الإنزال بين الفخذين بل اقتصروا على الضم والتقبيل، فأرجو إن أمكن توجيهي لبعض المصادر التي ذكرت ذلك؟ وشكر الله سعيكم.

فإنه لا ضرر في الإنزال بين فخذي الصغيرة التي لا تطيق الجماع، وتتضرر به إذا كان ذلك الإنزال بدون إيلاج، وقد بين العلماء رحمهم الله تعالى أن الأصل هو جواز استمتاع الرجل بزوجته كيف شاء إذا لم يكن ضرر، وذكروا من ذلك استمناءه بيدها ومداعبتها وتقبيلها على أن يتقي الحيض والدبر
.

الناس دى ممكن تعمل كدا فى اطفالها ؟؟ اكيد مش بنى ادمين
ياريت كل الاعلاميين المحترمين يكونوا زى احمد عبدون ومش يسمحوا للناس دى بالتمادى فى هذا الجهل والغباء

Friday, May 1, 2009

ابتلاء الوباء

انفلونزا الخنازير دى ابتلاء من ربنا توبوا وعودوا الى الله يا عالم يا كافرة حتى يرفع عن البلاء والبلا
ده مش كلامى ده كلام ائمة المساجد فى مصر ما شاء الله تفتقت قريحتهم الفذة فجأة ان انفلونزا الخنازير ابتلاء من الله اصل الناس قليلى الدين وبعدوا عن ربنا كل البعد فربنا قالهم خدوا عندكو بقى انفلونزا طيور محوئتش ولا جابت نتيجةفى جتتكو يعنى مجرد 26حالة بس يبقى لاء الاخطر انفلونزا الخنازير .. ولاء والشيوخ الافاضل المناضلين المجاهدين الموحدين بالله اللى عمرهم ما اتكلموا مثلا عن غلاء الأسعار ولا عن البطالة ولا عن الفساد والقرف المنتشر فى البلد إلا كل كلامهم عن النسوان وازاى تغطى المرأة وإزاى تضاجعها وإن رفضت يا سبع الرجال مهما كان السبب حتى لو بتموت اهجرها فى الفراش وبعد الهجر ان مش جت لك ذليله وتابت وأنابت عن فعلتها أضربها .. يخى جه قطع ايده قل ما تتمد عليها .. دلوقتى بقى قالوا نجدد سابوا كل البلاوى اللى فى البلد واتنقلوا لانفلونزا الخنازير دى ابتلاء من ربنا اصل مصر بلد إسلامى ومش يصح يتربى فها خنازير ... يختشى كميلة .. أمال الناس اللى مشاركينا الوطن دول يبقوا مين ولا ايه ؟؟ انا مش ضد ذبح الخنازير وتخزينها لكن ضد ان كل واحد فارغ العقل يستغل مشكلة ستعم العالم كله وبدلاً من البحث فى حل للوباء نقعد نصرخ ونولول ونقول ده غضب وابتلاء من ربنا .. ربنا لو عايز يرسل بلائه هيرسله فى القوم الفاسدين مش يبقى بلاء عالمى .. الطغاة عارفين ازاى هيتم حمايتهم لكن الغلابة برضه هما اللى هيتم انقراضهم فى هذا الوباء وربنا يسترها مع الجميع