Desert Cat Search
قطه الصحراء: 4/1/09 - 5/1/09

Monday, April 27, 2009

وافرضى قالت لى عايزة ؟؟


من يومين داخله اشوف رسايلى على الفيسبوك لاقيت رساله غريبة من شخص غريب بيقولى انا شوفت برنامج حضرتك على قناة الانسانية وكنت محتاج أتكلم معاكى فى كام نقطة كدا ممكن تسمحى لى ؟؟
مش اهتميت اوى بس تانى يوم لاقيت نفس الرساله قولت لما اشوف ايه موضوع النقط دى
رديت عليه وقولت له اتفضل لو انت موجود ... وعلشان الظروف الكويسه او اللى مش كويسه مش عارفه الحقيقة المهم طلع موجود
بدأنا الكلام ده الماسنجر بتاعى ممكن تضيفينى ؟؟ قولت له لاء خلينا هنا وخلاص
قالى طبعا ده حقك وبكل ترحاب وافق
وبدأ كلامه أنتى متحدثة لبقة وكلامك مقنع ماشاء الله بس انا كان عندى تعقيب على كلامك مع المذيعه وانتى بتقولى لها البنت مش نصف كائن هى من حقها تشتغل فى المجال اللى تلاقى نفسها فيه ومن حقها تتعلم الانترنت
قولت له جميل
ايه بقى اعتراض حضرتك
قالى اعتراضى يا استاذه ان البنت مش من حقها تتعلم اى حاجه مفسدة
هو انتى عارفه الانترنت ده ممكن البنت تدخل فيه ايه ؟؟
طيب انا هحكى لك حكاية عن واحد مدرس اعرفه كان بيجيب افلام فيديو اباحية يتفرج عليها هو وزوجته فى غرفة نومهم وفى يوم رجع من المدرسة بدرى لاقى ولاده قاعدين بيتفرجوا قام كسر الفيديو وضرب العيال ... وانتى بعد كل ده قاعدة لى فى التلفزيون وعمال تقولى من حق البنت ومن حق البنت واديتى لها الف حق !!
البنت بنت والولد ولد
قولت له طيب يعنى انت شايف ان الولد بس اللى من حقه يتعلم انترنت والبنت لاء ؟؟ ماهو الولد برضه ممكن يدخل مواقع اباحية ومحدش رقيب عليه ؟؟ بمعنى ان التكنولوجيا دى سلاح ذو حدين كل واحد ممكن يستخدمها فى اللى دماغه تؤهله ليها وكل واحد وتربيته ؟؟ ثم ان حكاية صاحبك المدرس دى قصور منه هو فى تربيه اولاده ... يعنى الفيديو مش راح جاب العيال وقالهم والنبى افتحونى واتفرجوا على الشريط اللى جوايا .. كمان انت بتقول ان الراجل ده بيتفرج على الافلام دى فى غرفة نومه هو وزوجته بس .. ايه عرف العيال بقى بالشرايط دى ؟؟
قالى هو كان ناسى الشريط فى الفيديو كمان الولد بس هو اللى من حقه يتعلم ويعرف كل ما هو جديد وحديث انما البنت تتعلم ليه ؟؟
ماهى البنت فى النهاية ملهاش غير بيت جوزها ليه نفتح عينيها على الانترنت ونعلمها ثقافات رامياها علينا اسرائيل علشان تدمر شبابنا مهى اسرائيل اللى ورا الدش والستلايت والانترنت ده واحنا فى غنى عن الانحراف ده كله !!
انا بكل ازبهلال
اسرائيل ؟؟ لو الانترنت والستلايت من عند اسرائيل ده احنا المفروض نشكرهم وبعدين انت عايز البنات يبقوا جهله افرض ابنها اللى هى قعدت فى البيت علشان تربيه رجع من المدرسة وسالها سؤال فى الكمبيوتر او فى الانترنت تقوله مش عارفه يا حبيبى اصل اسرائيل لما رمت علينا الانرنت والستلايت قالت الولاد بس اللى من حقهم يعرفوا وعلشان كدا روح اسال بابا هو اكيد عارف ؟؟
يا استاذه انتى بتجادلى فى ايه بالظبط
الولد بس اللى من حقه يتعلم التكنولوجيا ويدخل على مواقع اباحيه يدخل على مواقع تعليميه هو حر
انما البنت تتعلم ليه
طيب سؤال اخير
انت ممكن تتجوز ده اذا كنت مش متجوز يعنى واحدة جاهله يعنى مش تعرف يعنى ايه كمبيوتر ولا موبايل ولا نت ولا اى بطيخ ؟؟
طبعا انا اصلا مش هتجوز غير واحدة كدا اصل افرضى هى اتفرجت على الحاجات دى الاقيها جاية تقولى انا عايزه اعمل زى اللى شوفته .. طيب افرضى انا مش عايز اعمل اللى هى شافته او انا بشتغل شغل مرهق
طيب معلشى انا مضطرة اقفل دلوقتى اصل الساعه داخله على الواحدة صباحا وانا عندى شغل الصبح الحقيقة ولازم اقوم انام
اوعى تكونى زعلانة بجد انا سعدت جدا بالبرنامج وانتى كنتى منورة الشاشه ويارب دائما متألقه بس الله يكرمك ابعدى عن حوارات البنت زى الولد دى
انا صمت تاااااااااااااااااام مع شعور بارتفاع درجة حرارتى وعليه لاقيت ايدى بدون اى شعور رايحه على حرف الاكس فى اقصى اليمين وكانت الضغطة اللى فيها الخلاص
على فكرة انا استاذنته قبل ما انشر البوست وهو وافق بس قالى بلاش ذكر اسماء
طبعا انا كنت هعمل كدا مع انه برضه اسمه مش يدل على شخص بس لازم احترم رغبته

Friday, April 24, 2009

احنا عايزين نطبق الحكم الاسلامى بس ميمنعش ان عنينا على الكرسى

قريت بيان كوميدى النهارده لمحمد حبيب الحقيقة لا حد يقول عادل امام ولا سمير غانم ولا محمد هنيدى ولا اى كوميديان على الساحه الفنية .. يعنى هو المفروض يحلق دقنه ويروح يشتغل مهرج فى سيرك
السيد حبيب الاخوانجية بيقول فى بيانه العنتزى ايه بقى
تقول جماعة الاخوان المسلمين في مصر التي يجري استبعادها بشكل متزايد عن التيار السياسي الرئيسي في البلاد انها لن تخاطر بالدخول في مواجهة مفتوحة مع الدولة بالخروج الى الشوارع في مظاهرات على نطاق واسع كي تسحقها قوات الامن
اشطه جدا كدا .. الا هو السيد الحبيب بتاع الاخوان ده مش كان موجود فى مصر ايام مجزرة غزة ومش شاف اللى عملوه الاخوان فى الشوارع من صويت وتقطيع للهدوم ولطم الخدود وبعد شوية قلبت بطبل وزغاريد ورقص بعد ما طلع حسن زعبوله وقاله خطابة التحريضى فى انقلاب الشعب على الحكومة ؟؟ ولا شكله كان فى غيبوبة ولسه فايق منها برضه الواحد لازم يلتمس لهم العذر .
وقال حبيب لرويترز في مقابلة جرت في الاسبوع الحالي ان خروج الاخوان المسلمين وحدهم ليسحقهم جهاز الامن او الجيش غير وارد
طيب ماهو انتوا طلعتوا قبل كدا ياريس فى مظاهرات كتير ونددتوا ياما بس الحق يقال كله علشان خاطر غزة وفلسطين والقدس هترجع لنا وخيبر خيبر يا يهود جيش محمد سوف يعود .. وبعد ما قلتوا الكلمتين المحبوسين فى الحنجرة رجعتوا .. جيش ايه بقى اللى انت جاى تقوله ولا ليه اى موضع من الاعراب علشان تذكره ولا هو هروب والسلام .. بس طبعا انت قولت كلمة حق ودى تتحسب لك وهو خروج الاخوان المسلمين لوحدهم ليسحقهم جهاز الامن المركزى او الجيش غير وارد .. هو بالفعل غير وارد خالص لان الحكومة لو عايز تسحقكوا بالفعل مش هتلجأ لوسيلة مفضوحة قدام العالم كله اذن كلمة الجيش هنا ذكرها جه خطأ
وقال حبيب ان الاخوان المسلمين لن يعارضوا سعي جمال الى المنصب اذا جاء ترشيحه مع اصلاحات مثل انهاء قانون الطواريء واعادة الحريات المدنية واجراء انتخابات حرة ونزيهة وهي شروط قال حبيب انه ليس من المرجح ان تفي بها مصر
وماله ماهو قالها المخبر العام قبلك انه مش رافض ترشيح جمال ويبقى هو الريس المستقبلى
بس معلشى انتوا تبقوا اى سلطة فى الدولة علشان تقعدوا تفتوا وتقولوا تصريحات وعايزين ونرفض ونوافق ومش ممانعين ؟؟ الناس الغلابة اعطت الكام طرطور اللى قاعدين فى المجلس صوتها علشان يتكلموا بلسانهم وبدال ما يكونوا اد الامانة والمسئولية راحوا يرفعوا الجزم واحد ورا التانى فى وجه اللى عايز يناقش قضايا مصر او اى مشكلة تخص المصريين وداخل وخارج المجلس اشتغلوا ولوله على غزة وكانهم تناسو انهم فى برلمان مصرى وداخلين لمناقشه مشاكل المصريين وليس الغزاويين ولو حد قالهم يا جماعه عيب ميصحش يعلنوا جرى عن افلاسهم العقلى وانحطاطهم الفكرى ويكون المقابل السب والجزمه
هذه الافعال رفضها الكتير والكتير من المصريين واغلبهم من المتعاطفين معهم لان الناس خلاص فاقت لانه تمت ادانتهم من اقوالهم وافعالهم

Thursday, April 23, 2009

تفاصيل يوم 18 ابريل - يوم أن قلنا لا للتحرش








فى تمام الساعة الثالثة والنصف بدأت سيارات الأمن فى الحضور وكانت هناك سيارتان كبيرتان محملتان برجال الأمن المركزى وسيارتان بوكس بيلفوا حوالين الجنينة خلف خلاف وبعد شوية وقفواونزل منهم شوية شباب معاهم كورة وبدأو يلعبوا كورة فى جنينة الخزان تمويه يعنى ..
هاهاها
وعدة سيارات اتارى تدور حول الحديقة طوال الوقت المكان مرشق أمن على الآخر
ظباط كتيييييييير .. ومعاهم لاسلكى دة طبعا غير ماتشين كرة القدم اللى كانوا شغالين فى جهتين مختلفتين من الحديقة
كان أول الحضور الدكتور شريف حافظ مؤسس حركة 14 فبراير وهى حركة اجتماعية تنموية تهدف الى
تقويم السلوكيات الغير مقبولة فى المجتمع المصرى وتحارب العنصرية بشتى صورها
ثم توالى حضور الآخرين - مجدى وسامح سمير وهو منشىء جروب معا نمنع المعاكسات - حملة احمى اختك
بدأت الوقفة فى الموعد المحدد فى تمام الخامسة مساءا
وفى المكان المحدد وهو حديقة الخزان بالمقطم
حضر الوقفة العديد من المدونين والفيسبوكيين
بالإضافة الى أبى وزوجى وأخى شارك
بعض الاجانب فى الوقفة الإحتجاجية
شاركت فى الإحتجاج مندوبة من مركز دراسات المرأة الجديد
حضر الوقفة محمد عمر من المنوفية وهو الذى تبرع لنا بتصميم لوجو الحملة
حضرت حنان الشريف من الشرقية خصيصا للمشاركة
وزعت البوسترات على الحضور مع العلم انى قمت بطباعتها فى شركتى الخاصة وهى شركة برينتنس للطباعة الدجيتال
وكان عددهم 40 بوستر وزعت جميعها ولم تكفى الحضور فقام الزميل سامح سمير وهو رسام كايكاتير بعمل عدة بوسترات يدوية لتوزع على البقية من الحضور
وقام برفع علم مصر مكتوب عليه - احمينى يا بلدى
حملت البوسترات شعارات مختلفة تناهض التحرشلا للعنف لا للتمييز الجنسى
No to violence, of sexual discrimination
الإنتماء هو الحل
we all are Egyptians
انا مش سلعة
انا انسان كلنا نهى رشدى
كلنا آسر ياسر
المتحرش مش انسان
the harasser is not a human
احمى اختك
اوقفوا التحرش
stop harassing me
يوم 18 ابريل اليوم المصرى لمواجهة التحرش
احمينى يا ابن بلدى
مش هأسيب حقى
النهاردة بتقول انا مالى .. بكرة يحصل لأمى واختى وعيالى
احمينى يا بلدى
تابع الوقفة الإحتجاجية لفيف من الإعلاميين مثلوا العديد من وسائل الإعلام صحف - مجلات - قنوات فضائية ومحلية - مصرية .. عربية وأجنبية انضم للوقفة الإحتجاجية بعض المارة بعضا من سكان المنطقة اصطحبوا اطفالهم للمشاركة واذكر منهم سيدة شاركت وبناتها الثلاث محتجة وذكرت انها تتعرض هى وبناتها تتعرضن للتحرش فى كل مرة يخرجن للجامعة او المدرسة واشادت بمنظمى الوقفة ولم تذكر اسمها شارك بعض شباب المنطقة فى الوقفة ووعدوا بحماية اية فتاه من التعرض للتحرش اعتراضا ومشاركة منهم فى الحملة ضد التحرش
جدير بالذكر انه تقدم شاب الى مندوبة مركز دراسات المرأة الجديدة طالبا منها ان تساعده على الإعتذار لإحدى الفتيات المشاركات فى الوقفة من سكان المنطقة لأنه تحرش بها فى احدى المرات فحيناه جميعا وهو يقول لها ارجو ان تقبلى اعتذارى ومن هنا ورايح اى هشوفه بيضايق بنت هوقفه عند حده وصفق له الحاضرون لم تحدث أية قلاقل واستمرت الوقفة الصامتة لمدة ساعتين من القنوات الفضائية البارزة المحور - برنامج 90 دقيقة
الحياة - برنامج الحياه اليوم
الأوربيت - برنامج القاهرة اليوم
دريم - الطبعة الأولى
النيل - الساعة - الانسانية
الأهرام -الشروق - روزاليوسف - اليوم السابع - لها
وغيرهم العديد من القنوات والصحف والمجلات والمواقع الإخبارية على شبكة الإنتر نتلم يحضر الوقفة أحدا من المصرى اليوم لذلك فقد ارسلت لهم ردا على ما نشرته الصحفية بالجريدة هدى رشوان بخصوص الوقفة الإحتجاجية من معلومات مغلوطة سوف ينشر على صفحات الجريدة قريبا مع العلم ان الصحفية هبة عبد الحميد هى التى كانت تتابع الموضوع منذ بدايتها
أصدرت السفيرة مشيرة خطاب بيانا يوم الوقفة الإحتجاجية تعلن فيه رفضها لظاهرة التحرش التى انتشرت اخيرا وانها ظاهرة دخيلة على مجتمعنا
تحية لكل من شارك بالتواجد او شارك بقلمه او حتى بقلبه
أما عن الناقدين والحاقدين فأقول لهم
احنا عملنا حاجة كويسة .. حقيقى ايه اللى مضايقكوا؟؟؟؟
نقلاً عن الصديقة : آسر ياسر

Wednesday, April 22, 2009

الجوارى هى الحل

الجوارى هى الحل لأن معاشرتهن جنسيا كان لايعتبر فاحشه ولا ادرى لماذا ماعلينا وكان منتشرا جدا ايام العصور الأولى للأسلام لكثرة الأسيرات فى غنائم الحرب وكان هذا هو الحل الأمثل لغريزه طبيعيه وليس مقبولا ان نطبق العقوبات المشدده كالرجم مع غياب مؤسسة الجوارى فاما ناخذ الشروه على بعضها يا نتركها على بعضها ولنقرا هذا الخبر من السودان وبالمناسبه عقوبة الرجم اصلا يهوديه ساد هرج ومرج في الجلسة التي عقدت أمس الثلاثاء عندما فاجأ رئيس كتلة نواب الحركة الشعبية لتحرير السودان ياسر سعيد عرمان نواب البرلمان وطالب بمراجعة عقوبة "الزنا"، بحجة "هناك مجتمعات مختلفة ربما لا ترى بأنها جريمة"، وقبل أن يكمل عرمان حديثه قاطعته مجموعة من النواب بغضب شديد، وسادت حالة من الهرج بقاعة البرلمان، خاصة من النواب المحسوبين على القوى السياسية التي تنتمي إلى أفكار دينية.وبحسب صحيفة "الشرق الأوسط" اللندنية، وصف عرمان حالة الهياج في القاعة ردا على ما ذكره بقوله "أستغرب أننا نتناقش في قانون مكافحة الإرهاب وهناك إرهاب داخل البرلمان"، مطالبا بعدم تطبيق قانون العقوبات الجديد على غير المسلمين، وقال إن الجلد في الجرائم غير الحدية يتعارض مع الدستور
،،،،،،
نقلاً عن صديق عزيز

Monday, April 20, 2009

وقفتنا الاحتجاجية وانا بكره ضيفه فى قناة الانسانية


وقفتنا الاحتجاجية الحمد لله كثيراً نجحت نجاح غير عادى
طبعا عدد الحاضرين بالرغم من انه مش كان بالكم لكن يكفى اوى انه كان بالكيف
خايفه اذكر حد من الحاضرين احسن انسى حد تانى لأن فى الحقيقة كل اللى كانوا موجودين اشخاص وعقول فوق الممتازة
الجميل فى الأمر انى قابلت دانتى المصرى ووقفت اتكلم معاه ودكتور شريف حافظ وسهر الليالى والناس الحلوة اللى كانت موجودة وطول الوقفه حاسة انى شوفته قبل كدا لكن مش قادرة افتكر لحد ما فكرنى هو .. مش عارفه كنت مضيعه كدا ليه ما هى الصورة فى البروفايل يا جدعان ... الاعلام طبعا رفع راسنا 90 دقيقه والحياة اليوم والنيل للاخبار والساعه وقنوات كتير جدا الحقيقة من عددهم مش قادرة افتكرهم كلهم .. بخلاف الصحافة المصرية الجميلة .. يعنى اقدر اقول لكو وبكل فخر واعتزاز الحمد لله حملتنا لاقت نجاح جميل جدا

ايه بقى موضوع قناة الانسانية ده
انا بكره وبكره ده يعنى اللى هو الثلاثاء 21ابريل ضيفة فى قناة الانسانية برنامج نون النسوة الساعه 5مساءاً
اللى يشوف البرنامج بقى ياريت يسجله
وان شاء الله لما ارجع ابقى احكى لكو ع اللى جرى ع اللى جرى
تيرررراااااااا

Sunday, April 19, 2009

عيد سعيد بعد نجاح باهر

أولاً اهنئ أخواننا المسيحيين على العيد

ويارب كل ايامهم تكون اعياد وسعادة دائمة
نتكلم شوية عن شم النسيم وبعدين ارجع احكى لكو على وقفتنا الاحتجاجية اللى فعلا وجدت نجاح باهر منطقع النظير
سواء تغطية اعلامية من شتى القنوات المختلفة والصحافة والوجود الجميل للمشاركين فى الحملة
طبعا دى هفرد لها بوست لوحدها مش ينفع اقول كلمتين كدا واجرى

ان شاء الله غدا شم النسيم وهو العيد الأقدم تاريخياً للمصريين
ولأن أجدادنا الفراعنة اعتقدوا ان هذا اليوم هو بداية خلق العالم ولان العالم كانت بداية خلقه فى الماء يبقى الطبيعى من المحبب فيه اكل السمك وليه بقى البصل يا حلويين لأنه ايضاً أعتقدوا على انه قادر على طرد الأرواح الشريرة لما يتمتع به من رائحة نفاذه نفاذه نفاذه اوى جدا خالص يعنى .. فعلا قادرة على طرد اى حاجه بعون الله .. وانا فعلاً من دلوقتى أؤيد كل معتقدات اجدادى الفراعنة ولو حد جه يقولوا لكو يااااى الاحتفال بشم النسيم ده بدعه وكل بدعة ضلاله وكل ضلاله فى النار والمسلمين مش ليهم غير عيدين يا كفرة يا للى بتحتفلوا ما عليكو الا اكل كيلو بصل وخد نفس عميييق وروح مطلع اعلى ريحه فى وشه وانا اتعهد لكو انه هيجرى بكل ما يملك من قوة ولا حرامى الغسيل اللى اتقفش وهو طالع على المواسير .. ويا سلام بقى وهو بيجرى كدا وفى قفاه رزعته بيضه من الجميل الملون اللى قعدنا نزينه طول الليل بالوان جميلة واشكال مختلفة .. ولا اقولكو خسارة في العقول المتخلفة دى البيضه د حتى بتاخد مجهود وبتحتاج ذوق فى اختيار الالوان وتنسيق الاشكال



ليه بقى تم تسمية اليوم ده بشم النسيم

اصل الكلمة "شمو" وهي كلمة أصلها هيروغليفي قديم ويرمز شم النسيم إلي بعث الحياة

ولانها رمز للحياة علشان كدا تمتعوا بحياتكو ومش من حق انه يفرض علينا حاجات مش مفروضة اصلا

وكل شم نسيم والجميع فرحان وسعيد ومظأطط بحالصورة دى اهداء لطنط نفر .. نفرتيتى اصلى بحبها جدا مش عارفه ليه الهى اللى يحرم على الناس حاجة مش حرام اشوفه متعلق زى الفسيخة دى قادر يا كريم

Thursday, April 16, 2009

يا سلام على الزهد والتقشف

هو التجارة بالدين بتكسب اوى كدا ؟؟

بتخلى كل اللى قعد وربع رجليه يهبر طبق فتة كبير اوى كدا ؟؟

ده منزل الشيخ القرضاوى اللى المفروض انه هيتم هدمه وبينقل فى منزل تانى ما شاء الله خمسة وخميسة وخرزة زرقه فى عين اللى ميصليش على النبى افخم من ده الف مرة
طبعا بعد الدعوة بالزهد فى الدنيا ولا تحزن يا اخى فالله ما اخذ منك الا ليعيطك
واشترى الآخرة بالدنيا الفانية بنت الكلب دى .. دى حتى الدنيا من الدنو
بيعها واشترى الاخرة وعيش على العيش الحاف وادى دقنى لو لاقيت العيش اصلا
وهما يعيشوا فى قصور واولادهم يتعلموا فى اوربا وارصدتهم اتلال اتلال فى بنوك اوربا الكافره الا هى ارباح عمرو خالد برضه مش 2.50 مليون زولار سنوياً
وهو بيخسر ايه غير يقعد يتنحنح ويصرخ شوية ويعيط شويتين والحسابة بتحسب
ولسه فى ناس بتصدق شغل الجلا جلا ده ؟؟
واتارى من سنة عمرو خالد وحسان والحيوينى كانوا بيتخانقوا على قناة الناس وكل واحد يهدد لو عمرو خالد ظهر انه هينسحب طبعا طالما الموضوع ذلك وكذلك يبقى جانبكم الصواب فعلاً .. يا فقرا يا مساكين يادعاة الزهد والتقشف فى الحياة الدنيا
الرسول كان ممكن يكون اغنى منكم بمراحل لو اتربح من الدعوة للاسلام .. الا ده كان بيطلع كل ماله صدقات للفقراء والمساكين
اولا الدعوة للاسلام دى مش شغلانه اصلا ... لان مفيش مهنة اسمها داعية لا تم ذكرها فى القرآن ولا فى الدين ككل ولو فى انتوا هتدعوا مين بقى ؟؟؟ تكونوش فاكرين نفسكو عايشين وسط حنظلة وابولهب ؟؟
تربحوا براحتكو بس بلاش الضحك على الغلابة باسم الدين
....
الكومنت ده عجبنى اوى على الخبر
كيف تريدون أن يسكن الشيخ القرضاوي في بيت متواضع والقاعده الأمريكيه قريبه من داره ماذا سيقول الأمريكان عنا أننا لانحترم شيوخنا وماذاسيقول شمعون بيريز عندما يزور قطر فيسأل عن الخرابه أو بيت الطين لمن فبماذا نرد أنقول أنه لشيخنا القرضاوي . لا عيب ياجماعه بعدين يفضحنا شمعون

Tuesday, April 14, 2009

مش حسيب حقى

حملتنا بدأت على الفيسبوك من ايام معدودة .. لكن رفضنا لانتهاك آدميتنا وكرامتنا بيصرخ جوانا من اول تفشى ظاهرة التحرش الجنسى فى المجتمع وقفتنا الاحتجاجية يوم18ابريل ضد التحرش الجنسى تحت شعار مش حسيب حقى كام واحدة نزلت الشارع وتم التعدى عليها باللفظ او بالفعل كام واحدة مش بتخرج من بيتها وتمشى تتلفتت حواليها قلقانة من اللى جاى فى مواجهتها او ماشى وراها وكأننا فريسه نسير فى مدينة الذئاب كام واحدة نفسها تعلن عن رفضها لانتهاك ادميتها والحفاظ على كرامتها ونفسها تتكلم بقى وتقول انا عايزة حقى اعتقد كلنا جوانا نفس الطلب وبنطالب بيه كلنا عايزين حقنا علشان كدا احنا وقفتنا الاحتجاجية يوم 18 ابريل الهــــــــــــــــدفان يوافق مجلس الشعب على قانون تجريم التحرش الجنسىنشر الوعىبان تتقدم اى سيدة او فتاه ببلاغ فور تعرضها للتحرشان يتعاون الرجال المحترمون مع أى سيدة او فتاه تتعرض للتحرش بالمساعدةسواء كانت لمنع المتحرش او للشهادة ضدهتنبيه المتحرش بحجم الإيذاء النفسى الذى يقع على الضحية من جراء التحرش*****لو ليكم مطالب أخرى نتمنى المشاركةالوقفة ستكون فى المقطم حديقة الخزان بجوار حديقة الأندلساى ميكروباص من السيدة عائشة - تنزل عند حديقة الأندلس فى شارع 9التجمع عند حديقة الأندلس الساعة 5 مساءاالوقفة اجتماعية بحتة ولا تمت للسياسة بصلة ولا نتبع اى حركة سياسية معارضةوفى وقفة تانية فى نفس اليوم فى الشرقية امام جامعة الزقازيق الساعه 12 ظهرا على الكورنيشوبالرغم من انى شرقاوية الا انى هشارك فى الحملة اللى هتكون فى المقطم طبعا استطلاع رأى انا عملته فى محل اقامتى بالشرقية طلع الجميع رافض فكرة التحرش ما عدا اعداد قليلة انا هعرض بس ردين .. رد استفزنى ورد اسعدنى جدا الرد المستفز لشاب عمره 23 سنة : انا ممكن اجمع صحابى ونعمل وقفه قصادكو ونسميها انا عايز اتحرش رد شخص محترم جدا عمره 26 سنة انا والدى توفى وانا صغير واللى ربتنى واحدة ست ومعنديش اخوات ولاد لكن عندى 2 بنات اللى هتجوزها واحدة وممكن اخلف ويطلع كلهم بنات لذلك انا يهمنى جدا تفعيل القانون وان الوقفة دى تنجح لكن يكون القانون موضوعى الرد ده فعلا حسيت من خلاله ان بلدنا لسه بخير وفيها شباب محترم مش كل همه ينزل الشارع من اجل التحرش والمعاكسة واكيد اللى عمل القانون راعى انه لازم يكون موضوعى التغطية الاعلامية للحملة فعلاً بدأت من أول يوم اتعمل فيه الجروب شايفه حماس اعلامى وشبابى سواء من الفيسبوك او من الخارج منقطع النظير وان شاء الله حملتنا تنجح متنسوش معادنا 18 ابريل السعه 5مساءا حديقة الخزان بجوار حديقة الأندلس بالمقطم

http://www.facebook.com/reqs.php#/group.php?gid=86447686494&ref=mf

Monday, April 13, 2009

مصر مش النظام

فى البوست السابق وفى المواقع الالكترونية اللى قامت بنشر ما تخطط له عصابة نصر الله وحماس حسيت بذهول من بعض الكومنتات اللى بتدين مصر واللى قاعد يدعى لحزن الله بالنصر ..
نصر على مين بالظبط ؟؟ على بلدنا !!
هو النظام اصبح مصر الوطن اللى لامانا على ارضها وجنسيتها فى شهادات ميلادنا من اول يوم شوفنا فيه الدنيا حتى اليوم اللى بنفارق فيه الدنيا لما يتكتب برضه فى شهادة الوفاة ؟؟
النظام بيتغير حتى لو فضل الرئيس فى مصر 30 سنة ولو 50 سنة برضه بيتغير انما الوطن باقى
مبسطوين فى ايه بقى وبتدعو لمجرم ارهابى بانه ربنا ينصره علشان يدمر ويخرب فى البلد براحته ؟؟
حقيقى حالة ازدواج لا مثيل لها .. منين بنشكو من النظام الظالم القاهر ومنين عايزين نساعد ارهابى يدمر فى بلدنا ويخربها ؟؟
يعنى هنكون مبسطوين لما البلد تدخل فى مرحلة فوضى وتبقى عراق بديله ؟؟
ده بدال ما نتكاتف كلنا ونطالب بمحاكمة دوليه لحسن نصر الله .. حفاظاً على أمن البلد ؟؟
وما زاد الطين بله
بدو سيناء اللى كل اللى يمهم تهريب الاسلحة والمخدرات واى حاجه ينفع تتهرب طالما هيجى من وراها فلوس بلا بلد بلا وجع دماغ وهما ايش فهمهم اصلا فى معنى كلمة وطن ويكفى باعهم الطويل وافعالهم المذكورة فى كتب التاريخ ومعاونتهم للاحتلال الانجليزى .. ايامها هنقول كان لسه مفيش ستلايت ولا عنترنت ولا اى بطيخ .. لكن هل لحد النهارده مش خرج من بينهم واحد متثقف ومتنور وبيحب بلده ؟؟ هل هنفضل نذكر فى كتاب تاريخ 3اعدادى من اسباب النكسة خيانة بعض الأعراب ؟؟؟
اشمعنا اهل سيناء انا مش عنصرية ولا حاجه بس الخبر ده اللى بيقول كدا

رفح - أشرف سويلم - وقعت اشتباكات عنيفة وتبادل لاطلاق النار بين الاجهزة الامنية المصرية واهالي بدو سيناء بمنطقة وادي عمرو وسط سيناء في اطار حملة التفتيش الموسعة للسلطات المصرية بحثا عن 10 لبنانيين هاربين وسط صحراء سيناء وهو ما يعد اشارة لعودة اجواء التوتر مرة اخري بين البدو والسلطات المصرية.

Thursday, April 9, 2009

ليه مصر ؟؟

اكيد اللى متابع الاخبار شاف عنوان الخبر ده

النائب العام يتهم حزب الله بالتخطيط لتنفيذ اعتداءت بمصر..وحماس تنفي أي صلة بالخلية
توقفت عند العنوان للحظة وبعدها سألت نفسى هو يعنى النائب العام هيتهمهم ليه بينه وبينهم ايه كانوا عاملين جمعية مع بعض مثلا وقضبوها الاول ومش دفعوا دورهم علشان كدا قال يتهمهم ؟؟
قولت اكمل اشوف ايه الحوار وعينك ما تشوف الا حريق القاهرة ومعاه حريق مجلس الشورى بالمرة
وقال النائب العام فى بيان أصدره الأربعاء انه تلقى بلاغا من مباحث أمن الدولة بتوافر معلومات لديها أكدتها التحريات تفيد قيام قيادات حزب الله اللبناني بدفع بعض كوادره للبلاد بهدف استقطاب بعض العناصر لصالح التنظيم وإقناعهم بالانضمام إلى صفوفه لتنفيذ ما يكلفون به من مهام تنظيمية تهدف القيام بعمليات عدائية داخل البلاد وتدريب العناصر المدفوعة من الخارج على إعداد العبوات المفرقعة لاستخدامها في تلك العمليات.
وأوضح النائب العام أن التحريات أشارت أن ذلك يتم بهدف الإخلال بالأمن العام وإعداد برنامج حركي وتنظيمي لإعداد عناصر التنظيم بالداخل لتنفيذ ما يكلفون به من مهام تنظيمية على النحو التالى :
- تلقين العناصر التى يتم استقطابها للإجراءات الأمنية خلال لقاءاتهم واتصالاتهم .
- تأسيس مشروعات تجارية بأسماء العناصر المستقطبة لاتخاذها ساترا لتنفيذ المهام المكلفين بها من جانب التنظيم.
- رفع القرى والمدن الواقعة على الحدود المصرية الفلسطينية وإرسال النتائج إلى كوادر الحزب بلبنان .
- استئجار بعض العقارات المطلة على المجرى الملاحي لقناة السويس لرصد السفن التى تعبر القناة .
- رصد المنشآت والقرى السياحية بمحافظتي شمال وجنوب سيناء .
- توفير كميات من المفرقعات وإعداد العبوات المفرقعة .
- إرتباط قيادات الحزب لبعض العناصر الجنائية لتزوير جوازات السفر وبطاقات تحقيق الشخصية لعناصر التنظيم تمهيدا لتسفيرهم لتلقى التدريبات العسكرية بالخارج وإعادة دفعهم للبلاد للقيام ببعض العمليات العدائية ولاستخدامها فى استئجار الشقق والسيارات اللازمة لتحرك عناصر التنظيم .
القبض على مجموعة تدعم حزب الله- استئجار شقق مفروشة ببعض الأحياء الراقية واستخدامها للقاء عناصر حزب الله وكذا عقد الدورات التدريبية لبعض عناصر التنظيم المتواجدين بالبلاد .

طبعا دلوقتى وضحت النية الحقيقة من خطاب حسن زعبولة العنترى اثناء مجزرة غزة ..
بس ليه مصر وعايزين منها ايه ؟؟ نصر الله عايز يدمرها زى ما دمر لبنان فى 2006عايز ينام فى بيته والشباب المصرى يروح ينتحر ويقاتل علشان ايران ترضى عنه .. ايران اللى اتفقت مع قطر وقعدوا يشحنوا الشباب المصرى واحمدى نجاد مرمى فى احضان الحاخامات اليهود وقاعد يبوس فيهم فى الروحة والرجعة ده كمان راح المطار رجع الشباب الايرانى المتضامن مع غزة ايام المجزرة وقطر اللى قاعدة تشتم فى مصر وتشتم بكل قوتها وهى محتضنة 3قواعد امريكية ؟؟
نصر الله قاعد يجعجع واول ما صاروخ انضرب من جهة لبنان على اسرائيل طلع يجرى زى الفار المذعور ويخلى مسئوليته من الصاروخ .. كل ده والشباب المصرى المغيب قاعد يصرخ ويشتم فى النظام ومن اجل غزة ومن ينام متغدى ومتعشى وجاره جعان يحرم عليه النوم .. اهو جيرانه الجعانين وضحت نيتهم واهدافهم التخريبية من مصر والدمار اللى عايزين يجلبوه لمصر
حقيقى لاول مرة اعترف بحكمة الرئيس مبارك وحنكته السياسية .. وليذهب نصر الله الأفاق وأعوانه إلى اسفل السافلين .. حماس الكدابة طلعت تنفى وجود اى عناصر منها داخل التنظيم .. بالرغم من القبض على 7من اعوانهم .. حماس وحسن زعبولة بدال ما يتفقوا على تخريب مصر ودمارها كان الاولى بيهم ارسلوا التنظيم الغبى بتاعهم ده الى تل ابيب واهو كان اسمهم عملوا حاجه التاريخ يذكرها لهم بدال المهازل المتتالية ليهم فى كشف وجههم القبيح

Monday, April 6, 2009

هى اسمها ملاك الرحمة ولا عزرائيل الموت ؟؟

فجّر عدد من أعضاء مجلس الشعب المصري من جديد أزمة الممرضات المنقبات بعد التهديدات التي أدلى بها وزير الصحة الدكتور حاتم الجبلي أخيراً بوضع الممرضات أمام خيارين، إما خلعهن النقاب أو الطرد من وظائفهن

طبعا معاك كل الحق واللى عايزة تلبس اللثام عليها تقعد فى بيتها وتلتزم جوا الحيطان .. إزاى واحدة بالمنظر البشع ده ممكن تدخل على مريض وتديله حقنة ولا طفل ده ممكن الطفل يحصله صرع من منظرها .. حتى لو كانت حالته الصحية فى تحسن بعد ما يشوف كوم القماش الاسود اللى داخل عليه ولا كأنها عزرائيل الموت ممكن تيجى له سكته قلبية ... إذا كان من رحمة ربنا بعباده إن عزرائيل مش حد بيشوفوه يقوم احنا نجيبه للعيانين فى المستشفيات ؟؟


وقالت الدكتورة هدى زكي رئيسة الإدارة المركزية لشؤون التمريض بوزارة الصحة وممثلة الوزارة بمجلس الشعب في تصريح لـ"العربية.نت" إن القرار صدر في فبراير/شباط 2008 ويشمل المستشفيات والمراكز التابعة لوزارة الصحة.وأضافت رداً على ما أثاره نواب البرلمان بكون النقاب من الحريات الشخصية، أن وزارة الصحة حصلت على حكم قضائي عام 2007 باستثناء المستشفيات من الحريات الشخصية، وأن الوزارة تقوم حالياً بتنفيذ القرار بشكل كامل في كل الوحدات الصحية والمستشفيات بالمحافظات المختلفة
أؤيدك الرأى فعلاً فالنقاب ليس حرية شخصية .. أنت حر مالم تضر .. ولنفترض ان منقبة دخلت اعطت مريض حقنة جابت اجله والكل يعرف ان فى بعض الناس مش عندهم ضمير ممكن يرتكبوا اى مصيبة فى سبيل قبض المقابل .. او واحد دخل ينتقم من مريض لسبب شخصى واتخفى فى نقاب وقتها ممكن الحق يظهر ازاى ولا المريض ده فى ستين داهيه مش مهم حياته الاهم ان الحاجة الممرضة الطرق تخبى وشها اللى فى الغالب بيكون حل افضل اصل جمالهم مش بيكون باهظ اوى للغاية .. ثم ان النقاب ليس صحى ومن السهل جدا انه ينقل الميكروب واحدة قاعدة تتنفس خلف قطعة القماش طول ساعات عملها غير انها رايحة جاية تكنس طرقات المستشفى والشوارع اللى بتمشى فيها بالقماش الزيادة اللى بتجرجره وراها بخلاف انهم اساسا مش بيكونوا مهندمين يعنى الخمار والنقاب اخدته من المنشر على جتتها مباشرة وممكن تروح تقلعه وتلبسه تانى يوم مفيش اى مشاكل وريحتها ولا اسانس شادية .. يبقى من السهل جدا انها تلوث جرح اى مريض اتقوا الله فى المرضى اللى شايفه فى نفسها عورة تترمى فى بيتها وسبع الرجال يرجع لها اخر النهار بالغزالة تشويها وتقعد جنب العيال فى الكوخ لما النهار يطلع ... اعضاء مجلس الشعب الاخوانجية اللى فاضيين البلد مليانة مشاكل لو تهمكو فعلا اتلهوا فيها .. الا مش حد بيجيب سيرة الاسعار ولا التعليم ولا البطالة .. كل همهم اما غزة او قطعة القماش .. حاجة تم اخذ خطوات فيها وجارى تطبيقها فعلا وفات عليها وقت ومضى من الوقت الفاضى اللى عندكو وانتهاء المشاكل راجعين لها تانى .. صدق المثل العبقرى اللى بيقول تعالى فى اللثام واتصدر

Saturday, April 4, 2009

الإشاعات إسقاط لمخترعها

عندما تجد نفسك بين ليلة وضحاها مضغة فى فم الغائد والعائد ولا تدرى ما السبب خلف هذا الهراء فتحسس مسدسك ، ولا أقصد هنا كلمة جوبلز وزير الدعاية النازى الشهيرة ( حينما اسمع كلمة مثقف اتحسس مسدسى ) ولكن مقصدى هنا هو ان تنظر لنفسك فى اى شيئ برعت حتى تحوطك الاشاعات ممن يسكن الحقد قلوبهم .. فدعونا نتفق اولاً أن الاشاعة هى كلمات كاذبة لا اساس لها من الصحة يلفقها شخص ربما حاقد على حياتك العملية فحققت مالم يستطيع هو تحقيقه ، او لا يملك الأصل ولا العائلة التى تحظى أنت بدفئها وسعادتها ، فيببدأ فى ترويج الإشاعات حول حياتك أياً كان نوع الإشاعة ، فدائما المروج للاشاعه الحقد والسواد الذى يملأ قلبه يعمى عينه ليجعله لا يكل ولا يمل من اللهث خلف تشويه صورتك باى شكل من الاشكال وكل يوم ينسج خياله اشاعه مختلفة ، وهنا فقط عليك تحسس مسدسك فهذا الشخص يسقط عليك واقعه الذى يهرب منه فى شخصك الحاقد هو عليه.
إن الاسقاط هو الحيلة الدفاعية التى يهرب فيها الشخص من عيوبة ويلصقها بالآخرين حتى يبعد الشبهات عنه ، فيبدأ فى إختراع الاشاعات والترويج لها .. ولأننا فى الوطن العربى نتمتع بفن الاصغاء فقط للاشاعات ونقوم بمساعدة مؤلفها على اكمل وجه فى ترويجها فتنتقل الاشاعه من شخص الى اخر وليتها تنتقل كما خرجت من فم تلك المعقد الذى لا هم له ولا عمل سوى اسقاط عيوبه على الآخرين واللهث خلف اختلاق اى اشاعات حتى تبعد العيون عنه باى شكل من الاشكال ، ليتناولها ذو كل رأس فارغ من العقل وكل ذو نفس ضعيفه ويضيف عليها كلمتين من خياله وبالتبعية من يتناولها خلفه ليلهمه خياله الخصب بزيادة سطر آخر ، وإن بحثنا بعد اسبوع فقط خلف هذه الاشاعة لوجدنا الالسنة تلوكها بقصص وحكايات مختلفة يمكن ان تدون فى كتاب لتصبح فى متناول الجميع ، هنا فقط إعلم أنك فى المقدمة وأنك ذو تاثير سواء ثقافى او عملى او اجتماعى .. فلا يحدف بالطوب سوى الشجرة المثمرة ..
ويكفى أن مروج الإشاعات لا يهنأ بساعه صفاء نفسى أو هدوء روحى .. بل يكفى أنه تفرغ لك تفرغ تام لتحتل انت كل عقله الذى تبدل مكان الخلايا بالنخاعات المسلوقة ليؤلف القصص ويحبك الحكايات التى سيسعى غداً لترويجها .. وكيف سيختار معاونيه من ضعفاء النفس الذين يلقون له باذان صاغيه لمساعدته فى نشرها ، دون الإلتفات إلى كلام الله فى كتابه الكريم ( يأيها اللذين آمنوا إن جاءكم فاسق بنبأ فتبينوا أن تصيبوا قوماً بجهالة فتصبحوا على ما فعلتم نادمين ) صدق الله العظيم .. ولكن فى هذه الحالة تغيب العقول عند كل من لا يملك الضمير او العقل ويتلذذ باغتياب الآخرين الذين هم بالطبع وان سمعوا هذا الكلام المغلوط يقومون بتكذيبه او ان كان انسان يملك الثقه بنفسه يطبق مقولة ( الكلاب تعوى والقافلة تسير ) فمهما كان كلام الشرذمة التى تتفرغ للقيل والقال واسقاط ما بها على الاخرين لن ينقص هذا حتما من قدرهم .. بل من ينقص من قدرة هو مروج الاشاعات الذى تزداد ادانته له من فمه يوما بعد الآخر

مقالى فى مجلة على صوتك
http://www.3allisotak.net/apages.php?pids=1039&ids=do

Thursday, April 2, 2009

يعنى ايه لكم دينكم ولي دين

انا وقتى الايام دى ضيق جدا مشغولة بالف حاجة .. بس من وقت للتانى بحاول مبعدش عن المدونة واتابعاها من اى مكان واثناء نشرى للردود على البوست الاخير فوجئت برد لمواطن مصرى يحمل عنوان مواطنون يحرقون منازل بهائيين فى سوهاج
استغربت العنوان ولسه بعمل سيرش على عنوان الخبر لاقيت منه رد تانى جايب لى فيه لنك فيديو للصحفى الهمجى اللى قام بالتحريض دخلت جميع المواقع الاخبارية اشوف نص الخبر ايه يمكن يكون فى تهويل فى الموضوع الا انى وجدت جميعها كاتبة نفس الكلام اعتداء المسلمين على 4منازل لبهائيين واستأت جدا من الخبر اللى مكتوب فيه الصحفى الهمجى يكفر الدكتورة بسمه جمال موسى ويقول انها تستحق القتل .. أولاً الشخص الذى يدعى جمال عبدالرحيم المنسوب خطأ على الصحافة المصرية بجريدة الجمهورية لا يستحق الا ان يسافر إلى أى بلد أوربى وحينها يستوجب على من يحملون جنسية هذه البلد حرق منزله والمطالبة بقتله بزعم انه اقلية وان الدين الاسلامى ليس دين الدولة التى يعيش على ارضها وانه بكدا هيفسدها ..وهنا لا لوم على ما يفعلون .. من اعطى هذا الصحفى توكيل من الله للتصريح بقتل من على غير الدين الاسلامى ؟؟ ومن الذى اعطى الحق الذين لا يعرفون رؤسهم من اقدامهم الا بالعمة ؟؟
ومن الذى قام بإملاءهم ترديد هذا النداء اثناء مهاجمتهم لمنازل البهائيين
(لا إله إلا الله، البهائيين أعداء الله(
يا حلولى هما الصعايدة اللى ضربوا الرقم القياسى واحتلالهم لجميع قواميس البلاد العربية فى النكات الدالة على مدى جهلهم وتخلفهم هيعرفوا يقولوا نداء زى ده ؟؟
اين من يحتكرون الاسلام من قول الله سبحانه وتعالى " لكم دينكم ولى دين "
هل هذه الآية للأستئناث ... كل محاسب على أعماله هو فقط لا على أعمال غيره أم هم اعلم من الرسول الذى كان يحيا بين اشد الكفار شركاً بالله ؟؟ كيف اعطوا لانفسهم هؤلاء الشرذمة الحق فى حساب البشر ؟؟ وماذ يسمون تعديهم على حقوق الآخرين وحرقهم بيوتهم سوى التدخل فى شئون الله فى محاسبه عباده ؟؟
ومن أدراهم من يعتدون عليهم ويكفرونهم ويطالبون بقتلهم ليسوا عند الله افضل من هؤلاء المتخلفين عقليا ...
اليسوا هؤلاء البهائيين لهم فى الوطن مثل ما للصعايدة والهمج الذين يلعبون فى عقولهم
الم يحمل هؤلاء الصعايدة انفسهم مشقة التفكير ولو لثوان معدودة ليعلم ان من يعتدى عليه ربما يتقاضى من الضرائب التى يدفعها هذا البهائى وربما تصل الاعانات اليهم فى ادنى الارض من اموال هذا البهائى ام اعتادوا لا يحملون انفسهم مشقة التفكير واكتفوا بالانقياد حقيقى الجهل آفة كل شيئ

Wednesday, April 1, 2009

نهار جديد

تتوالى الايام تباعاً فى عزف منفرد اصبحت أمله .. الروتين اليومى يتكرر .. لا جديد فنجان قهوة مع بدايات الصباح ثم اختراق طريق قرب او بعد هى فى النهاية خطوات ولازم أمشيها .. هو انا لحقت امل ده لسه يادوب شهرين فى الطريق ده بس .. امال لو سنتين هعمل ايه ؟؟ هو انتى مش كنتى ناوية تنطشى رجعتى تانى ليه .. عجبتنى اللعبه هشتغل لاء مش هشتغل فى الآخر قولت مبدهاش

مهما كبرت المشاكل فالثقة بالنفس تحل جميع المشاكل
مشاكل ايه دى اللى بفكر فيها على الصبح ده ايه جو الكآية ده ؟
ايه نفس الوجوه المكررة دى الواحد نفسه يشوف اشكال مختلفة بقى التجديد مطلوب .. بس هيتجددوا ازاى دول وبعدين انا الجديدة هنا مش ينفع اقولهم والنبى غيروا اماكنكو الواحد لازم برضه يخليه شيك فى المعاملة مع الناس
الابتسامة لحن رقيق ترسله اوراق الحياة
حددتى عايزة ايه .. فى ايه حضرتك ؟؟ نعم ؟ انا مش قولت لك احنا خارجين اوعى تكونى لسه مش جهزتى كمان ؟ هو انت فين ؟ انا فى الطريق ؟ إشطة ده احنا فعلا خارجين .. انا ايه نسانى كدا .. فجأة يدق الباب اكيد مش هو اجرى افتح.. نعممممممممممم انتى لسه بالبيجامة .. بابتسامة واسعه جدا وعملاً بقول السيدة الرائعة الله يرحمها سعاد حسنى اقرب طريقة لقلب جوزك معدته .. بس فى الحالة دى ممكن يرمى الاكل من البلوكونة يبقى هو مش ينفع غير انك تاخديه من ايده مع الاحتفاظ بالابتسامة الواسعه علشان السنان البيضا تبان وقدام التى فى مع قهوته المفضلة والريموت والجرنان والواحد ياخد راحة راحته فى اللبس ده حتى تقريبا الوقت مش بيعدى ..
اذا اردت قتل المرأة إما ان تقتلها وإما أن تتزوج عليها
حبيبى .. إنت ممكن تتجوز واحدة تانية .. ليه بس بتقولى كدا امال اللى قاعدة هناك دى بتبص لك كدا ليه انت عارفها .. ولا عمرى شوفتها امال بتبص لك ليه ؟؟ انتى عايزه ايه ؟ يلا نمشى .. زى ما تحبى .. نعم علشان مش تيجى تكلمك قدامى صح .. هى الليلة نكد ولا ايه ؟؟ طب اعترف الاول .. ايوا اعترف بايه يعنى .. مفيش يلا نمشى .. لاء مش ماشى .. ليه بقى هو لا كدا عاجب ولا كدا عاجب اعملك ايه بس .. اممممممممم انا عايزة ايس كريم
الصداقة قطار سريع لا يركبه إلا من كان له قلب صاف ونية صادقه
انا ملولة اوى وبزهق من الناس بسرعه مش ينفع يكون عندى اصدقاء -- تجيب لقاء .. يا حلولى امال انا ايه ؟؟ ونانيس وجينول دول يبقوا مين ؟؟ ايه ده هو احنا كدا اصدقاء ؟؟ انتى شايفه ايه .. يابنتى الاصدقاء بيقولوا اسرارهم لبعض انا مش بعرف اقول اسرار .. ليه يا نونا .. لانك لازم تعرفى ان الاسرار ملعومات الشخص يبوح بها للآخرين ليقوموا باستغلالها ضده فى الوقت المناسب .. اشطة يا ست الفيلسوفة .. ومين اللى قالك كدا .. مدرسة الرسم فى ابتدائى يا كوكو .. ولما روحت البيت قولت لاختى ميس اميرة قالت لى النهاردة جملة عجبتنى اوى واختى قالت لى كلامها صح جدا بس ابقى قولى لى انا بس ومن وقتها واختى وميس اميرة هما اصدقائى الوحيدين بس مش عارفه ميس اميرة فين دلوقتى ..لقاء بازبهلال كويس انك قولتى لى علشان اعمل زيك .. مش ينفع يا كوكو اصل التعليم فى الكبر كالنقش على الماء .. نياهاهاهاها