Desert Cat Search
قطه الصحراء: 1/1/09 - 2/1/09

Saturday, January 31, 2009

جريمتين فى اسبوع 3شباب بمكة يغتصبون فتاة افريقية

فى بوست الفتاة الأندونيسية التى قام باغتصابها 13 سعوديا فى مكة المكرمة كان فى واحد لذيذ بيقولى نسبة الجريمة فى السعودية لا تقارن باى دولة تانية هو انتى مش بتقرأى جرايد .. هو من الواضح ان الجرايد اللى الاستاذ المتسائل بيقراها مختلفة عن الجرايد اللى انا بقراها اصلى بقرأ الجرايد اللى بتصدر فى السعودية بذات نفسها واثناء مطالعتى للجرايد النهارده واجهنى خبر حسسنى بالازبهلال الحقيقة ... الخبر بيقول ايه بقى
تجري الشرطة السعودية تحقيقات بشأن اتهامات بحق 3 شباب سعوديين تناوبوا على اغتصاب فتاة إفريقية (19 عاما)، بعد حجزها على مدار أسبوعين كاملين

طبعا الجريمة بتحصل فى كل مكان لكن بالبشاعه دى ؟؟؟
وتكرار نفس الجريمة فى اسبوع واحد يبقى اكيد المجتمع ده فيه خلل ... ومحتاج لعلاج نفسى من حالة الكبت اللى بيعانى منها .. وادى المجتمعات المغلقة اللى عايزين يقلدوها .. يروحوا يعيشوا عندهم مش ناقصين جرايم ومرضى نفسيين

Friday, January 30, 2009

«مجزرة الإسماعيلية» التى تحولت عيداً للشرطة

نقلاً عن جريدة المصرى اليوم

فى المسافة الواقعة بين قيام رئيس الوزراء مصطفى النحاس بإلغاء معاهدة عام ١٩٣٦ ومروراً بتداعيات إلغاء المعاهدة التى اعتبرتها بريطانيا مبادرة من طرف واحد، وقيام إنجلترا بحشد قواتها لحماية حضورها على خط القنال اندلعت «المواجهة» غير المتكافئة بين قوات الاحتلال ونفر من رجال البوليس البواسل، فيما عرف بـ«مجزرة الإسماعيلية»، وانتهاء بالحريق الذى طال القاهرة على خلفية ما حدث فى الإسماعيلية.
فى هذه المسافة مرت الأحداث متدفقة متدافعة خاصة فى اليومين الأخيرين ٢٥ و٢٦ يناير حيث «مجزرة الإسماعيلية»، التى أصبحت عيداً للشرطة، ومن بعدها حريق القاهرة يكون قد مر نصف قرن وثلاث سنوات، مما استدعى الاحتفال من جانب والتذكر من جانب آخر أن ما حدث فى الإسماعيلية يستدعى التذكر لعل الذكرى تنفع «المصريين»، حينها كانت الشرطة والشعب «لحمة واحدة» ترفض الاستبداد من الداخل والاعتداء من الخارج.
الشعب أطلق «كتائب الفدائيين» ضد الإنجليز
فى الثامن من أكتوبر عام ١٩٥١م اجتمع البرلمان المصرى بمجلسيه النواب والشيوخ، وألقى مصطفى النحاس بياناً مستفيضاً عن سياسة الحكومة تجاه معاهدة ١٩٣٦، وأعلن قطع المفاوضات السياسية مع بريطانيا لثبوت عدم جدواها، وهو القرار الذى استقبله الناس بفرحة غامرة وسيطرت روح الكفاح والجهاد على الجميع، وكان إلغاء المعاهدة بمثابة «مرحلة جديدة» تستلزم توحيد الصفوف، فقد كان أحد وجوه قرار إلغاء المعاهدة ينطوى على إعلان حرب على الاحتلال.
وظلت وزارة الوفد تؤكد أنها أعدت لكل شىء عدته فيما سيواجه مصر من جهاد شاق، وأنها أمضت الوقت فى الاستعداد للكفاح.
ولما كان النحاس فى طريقه من القاهرة إلى الإسكندرية يوم ٢٠ أكتوبر ١٩٥١م تعالت هتافات الشعب بمحطة العاصمة: «نريد السلاح للكفاح»، فكان يرد عليهم النحاس قائلاً: «كل شىء سيتم فى أوانه والله مع الصابرين».
ويقول الناس: «إن كل شىء تمام»، ويمضى كما هو مقدر له.
وعلى الجانب الآخر، وفى مجلس العموم البريطانى، كانت وزارة العمال تتولى الحكم فى بريطانيا، وأعلنت تمسكها بالمعاهدة، وقال وزير خارجيتها هربرت موريسون إن بريطانيا ستقابل القوة بالقوة، لبقاء قواتها فى منطقة القناة.
وأعلنت السفارة البريطانية فى مصر عام ١٩٥١م بياناً يقضى بعدم قانونية إلغاء المعاهدة، واعتبرتها سارية المفعول ومضت الأحداث سريعاً.
وفى مصر كان للشعب زمام المبادرة وليس للحكومة، فامتنع عمال وموظفو السكك الحديدية عن نقل الجنود البريطانيين ومهماتهم، وأخذت بريطانيا تستعد للمواجهة وبادرت بإرسال قوات حربية جديدة إلى منطقة القناة لتعزيز الحاميات البريطانية فى المنطقة، وبلغ حجم التعزيزات ثلاثة آلاف رجل وأضرب العمال المصريون فى المعسكرات البريطانية وانسحبوا جميعاً، وكانوا نحو ٦٠ ألف عامل، وأضرب المتعهدون والموردون عن إمداد القوات البريطانية بما تحتاجه.
إلى أن كانت المواجهة الأولى فى الإسماعيلية فى ١٦ أكتوبر عام ١٩٥١م وقد كان يوماً عصيباً، بدأت مظاهرات سلمية تأييداً لإلغاء المعاهدة، وتحرش الإنجليز بالمتظاهرين وأطلقوا النار عليهم وسقط سبعة شهداء مصريين واحتلت القوات الإسماعيلية بدعوى الحفاظ على الأمن وحماية الرعايا البريطانيين.
وفى اليوم ذاته، اندلعت مواجهات مماثلة فى بورسعيد، ووقع خمسة شهداء، وفى اليوم التالى تم احتلال كوبرى الفردان الذى كان فى حوزة الجيش المصرى وسقط جنديان شهيدين.
واحتل الإنجليز معظم المناطق والمرافق الحيوية فى المدينتين وقاموا بعزل منطقة القناة، وأقاموا فيها حكماً عسكرياً، وبدأت حركة تطوع بين المصريين للكفاح ضد الإنجليز وألفوا كتائب عرفت باسم «كتائب الفدائيين» و«كتائب التحرير»، التى تكونت فى القاهرة والقناة والقرى المجاورة، لها وأنشئت مراكز لتدريب الفدائيين فى الزقازيق ودمنهور، وتطوع فى هذه الكتائب ضباط مصريون وتولى الفريق عزيز المصرى تدريب بعض هذه الكتائب.
وبدأ الشعب حملة محمومة للتبرع لهذه الكتائب لتجهيزها إلى أن وقعت معركة الإسماعيلية الثانية بين ١٧ و١٨ نوفمبر من نفس العام والتى بدأت بقيام البريطانيين بإطلاق النار على رجال البوليس وهم فى ثكناتهم فاضطر زملاؤهم لرد العدوان وأبلوا بلاء حسناً، فاستدعى البريطانيون تعزيزات وأحاطوا بالجنود المصريين وسقط الكثير من الجانبين، كان معظمهم من رجال البوليس، إلى أن حدث اتفاق بين القائد البريطانى العام هناك «أرسكين» ومحافظ القناة «عبدالهادى غزالى».
ثم اندلعت معركة السويس فى ٣ ديسمبر عام ١٩٥١م والتى سقط فيها ٢٨ شهيداً منهم ٧ من رجال البوليس وسقط ٢٢ بريطانياً وتجدد القتال مرة أخرى فى السويس فى اليوم التالى. وفى ١٧ ديسمبر تم ضرب مبنى محافظة الإسماعيلية بالمدافع، وفى اليوم التالى تم تدمير حى «كفر أحمد عبده» وإبادته بالكامل.
وخرجت جموع الشعب فى ٦ ديسمبر ١٩٥١م تهتف ضد الملك فاروق لأول مرة، وفى يومى ٣ و٤ يناير ١٩٥٢م اندلعت معارك أخرى بين البريطانيين والمصريين بمن فيهم رجال البوليس، وتتابعت المواجهات فى أبى صوير والمحسمة، وصولاً للمجزرة الأكبر والمواجهة الأكثر سخونة وشهرة، ألا وهى «مجزرة الإسماعيلية» التى وقعت يوم ٢٥ يناير عام ١٩٥٢م.
قائد القوات البريطانية ينحنى احتراماً لرجال البوليس
حاصرت القوات البريطانية برجالها ومصفحاتها، مبنى محافظة الإسماعيلية وثكنات بلوكات النظام. قصد ضابطان بريطانيان منزل البكباشى شريف العبد، وطلبا منه أن يذهب للقاء قائد القوات البريطانية بالإسماعيلية، «إكسهام»، فلما ذهب إليه، سلمه القائد البريطانى إنذاراً يطلب فيه تسليم أسلحة جميع قوات البوليس وجلاء تلك القوات عن مبنى المحافظة وسائر الثكنات على أن يتم ذلك فى السادسة والربع من صباح ذلك اليوم،
وأن ترحل كل القوات المصرية عن منطقة القناة، فقام الضابط شريف العبد بتسليم هذا الإنذار إلى قائد بلوكات النظام اللواء أحمد رائف وإلى وكيل المحافظة «على حلمى» فرفضا الإنذار بلا تردد، وسارعا بالاتصال بوزير الداخلية آنذاك فؤاد سراج الدين فى تمام السادسة والربع صباحاً، فدعم سراج الدين موقفهما وطلب منهما عدم التسليم ومقاومة أى اعتداء يقع على دار المحافظة أو على ثكنات بلوكات النظام أو على رجال البوليس أو الأهالى، ودفع القوة بالقوة والصمود لآخر طلقة.
وبعد دقائق، عاد القائد البريطانى، وأبلغ قائد البوليس المصرى بأنه إذا لم تقم القوات المصرية بتسليم أسلحتها فوراً، فسيتم هدم دار المحافظة والثكنات معاً على من فيها، فأصر القائد المصرى على موقفه الرافض للاستسلام، وأصدر أوامره إلى قواته بالمقاومة حتى النهاية.
ولم تكد تمر دقائق قليلة أخرى حتى نفذ البريطانيون إنذارهم وأخذوا يضربون دار المحافظة والثكنات بالمدافع ويلقون عليها القنابل، وانهال الرصاص من الدبابات والسيارات المصفحة على جنود البوليس، فرد جنود البوليس على هذا العدوان وكانوا لا يزيدون على ٨٠٠ جندى فى ثكنات بلوكات النظام وثمانين فى دار المحافظة فى مواجهة سبعة آلاف جندى بريطانى بالأسلحة والدبابات والمصفحات،

ونشبت مواجهة ضارية أبدى فيها رجال البوليس شجاعة كانت مضرب الأمثال فى البطولة والتضحية حتى نفدت آخر طلقة لديهم بعد ساعتين من القتال المتواصل، وعندئذ اقتحمت الدبابات البريطانية الثكنات وأسرت من كان حياً من رجال البوليس المصرى،
أما القوة المصرية الأخرى التى حوصرت فى دار المحافظة، فلم تقل شجاعة وبسالة عن نظيرتها فى الثكنات، فقد تحصنت وأبلت بلاءً حسناً حتى إن الإنجليز هددوهم بنسف مبنى المحافظة، لكن رجال البوليس رفضوا الإنذار وواصلوا القتال.
وفى هذه المواجهات، سقط من رجال الشرطة خمسون شهيداً ونحو ثمانين جريحاً، وقام الإنجليز بأسر من بقى على قيد الحياة من أولئك الجنود والضباط، وعلى رأسهم اللواء أحمد رائف، قائد بلوكات النظام، واليوزباشى مصطفى رفعت، ولم يتم الإفراج عنهم إلا فى فبراير من عام ١٩٥٢، أما القيادة البريطانية، فقد قدرت خسائرها بـ١٣ قتيلا و١٢ جريحاً.
وكانت أول تجليات هذا السخط الشعبى، فى صبيحة يوم السبت السادس والعشرين من يناير عام ١٩٥٢م، حيث تجمع فى مطار القاهرة الدولى عمال المطار وجنوده وموظفوه المدنيون وكلهم مصريون، تجمعوا حول أربع طائرات كبيرة لشركة الخطوط الجوية البريطانية تتملكهم روح السخط والاحتجاج على ما وقع فى الإسماعيلية ومنعوا نزول الركاب من الطائرات وكان عددهم يزيد على ١٠٠، كلهم من الأجانب وامتنع المصريون عن تزويد الطائرات بالوقود وقد بلغ هذا الوضع المسؤولين فى وزارة الداخلية فأوفدوا إلى المطار ضابطاً كبيراً استطاع أن يقنع المتظـاهرين بأن ما يقومون به ستكون له عواقب دولية وخيمة، فعادوا إلى عملهم بعدما عرفوا أنه يصب بالسلب فى مصلحة مصر.
وأمكن احتواء هذا الموقف وأعربوا عن السبب الذى دعاهم لهذا الإضراب وهو ما جرى لزملائهم فى الإسماعيلية غير أنهم لم يتحينوا الفرصة ليعربوا عن أمر آخر يثير سخطهم وهو أن أحداً فى االحكومة لم يستجب لشكواهم بخصوص وقف صرف بدل الطوارئ إليهم وأن رؤساءهم رفعوا هذه الشكوى لفؤاد سراج الدين فأشار بحفظها، وظل هذا «البدل» محبوساً عنهم زهاء الثلاثة أشهر، والغريب أنهم صرفوا البدل بعد أن ازدادت الأمور سوءاً واحترقت القاهرة.

=======================
الشرطة مش اتغيرت لكن اللى اتغير هو اخلاق الناس .. ولا ذنب بدون عقاب
كل عام وشرطة مصر رافعه راسها

Thursday, January 29, 2009

Just For You

Let's start with the end of this journey together to write the beginning of our first meeting and our hearts and our bodies together Whenever I woke up as I had hoped that you sleep On my chest cradled my heart put it a touch of your hands .. Li whisper I love you

I love you .. I think since I told you my love
- I was the farthest the most beautiful dream of becoming a reality
- God created love to love you so
- Happy ending is one that we will

Wednesday, January 28, 2009

خير مثال للجهل والهمجية

تعرضت عاملة اندونيسية لاغتصاب جماعي من قبل 13 سعوديا تناوبوا الاعتداء عليها في استراحة بمكة المكرمة وتمكنت قوات الشرطة من ضبطهم حيث بدأ استجوابهم في مقر هيئة التحقيق والادعاء العام بالعاصمة المقدسة

هما دول أدعياء العفة والفضيلة اللى بيسافروا يجلبوا لنا ثقافتهم البربرية ؟؟
وقاموا باغتصابها كمان فى مكة قبلة المسلمين !!
اذا كانوا تناسوا ربنا ممكن الكعبة كانت تفكرهم
الكتاكيت المغتصبين ياترى عقوبتهم هتكون ايه ؟؟
الجلد الفورى زى الاطباء المصريين واللى يستانف تتضاعف عليه العقوبة .. ولا يومين والقضية تتنسى ولا ممكن تطلع فتوى تحلل اغتصاب الاجانب ؟؟
هو ده المجتمع اللى عايزينه وبتسعوا انكو تكونوا زيهم
الراجل يرجع من هناك لابس الجلابية المينى و ساحب فى ايده الحرمه حقه اللى مكفنها بكيس زبالة
ويقولوا اصل دى العفة .. العفة دلوقتى اصبحت فى الكبت ؟ طيب وآدى نتيجة الكبت اغتصاب وانحراف ولواط وأكل أموال الأطباء اللى بيعالجوهم والمدرسين اللى بيعلموا لهم اولادهم .. فاكرين نفسهم ببرملين البترول اللى عندهم انهم بقوا بنى ادمين .. وللاسف بالرغم من الجهل والظلام اللى بيتمتعوا بيه الا ان المتخلفين واخدينهم مثال وبيتبعوهم

Monday, January 26, 2009

إن فاتك الميرى .. إنت الكسبان

من حوالى 3 شهور وحبة لاقيت لولو صديقتى الأنتيخ بتتصل بيا وبتسألنى .. مش عايزة تشتغلى فى تخصصك يا قطة ؟؟

يا بنتى انا نسيت اصلا انا خريجة ايه تقولى لى تخصصى .. وبعدين انا شغلى دلوقتى كويس ومبسوطة بيه اوى ..

لولو : بس الهيئة العامة للمساحة ناشرة إعلان طالبين خريجين

أنا : طب وايه يعنى ماهم طول عمرهم بيطلبوا وانا مش بقدم

لولو : ومش بتقدمى ليه

انا : علشان عارفه انهم اكيد عايزين ناس خبرات وانا مش اشتغلت فى مجالى خالص

لولو : طيب ايه رايك ما تاخدى ورقك وتروحى تقدمى المرة دى وخليكى حافظة رقم الطلب

انا : يعنى هيقبلونى من بين كل الناس اللى هتتقدم وبعدين انا مبسوطة اوى بشغلى يا لولو

لولو : يا قطة انتى خسرانة ايه يعنى

يا لولو انا تخصصى مساحة جوية .. يعنى ممكن يكون مش هو المطلوب وفرضا لو قبلت يا ستى هيدونى كام يعنى .. انا عندى شغلى الخاص يا مامى ويكفى انى مديرة نفسى ولا حد يقولى اعملى ولا روحى ولا تعالى

لولو : يعنى هى دى كل مشكلتك .. وبعدين جربى انتى يعنى ضامنة اوى

انا : اممممممممم هفكر

وبعد شوية تفكير عميق اتصلت انا على لولو .. انا هروح اقدم اوراقى وزى ما تيجى

وبالفعل روحت الهيئة وقدمت اوراقى .. ونسيت

وفى يوم شتاء الدنيا برد والجو ممطر .. طبعا ده الجو اللى نفسى فيه انا حاسة ان السنة دى مفيش شتا اصلا .. الدنيا مش مطرت غير مرة واحدة وحلفت ماهى مطرة تانى .. لاقيت حد بيضرب الجرس .. ايه ده مين جاى لنا على الصبح كدا .. ليكون بوليس ولا حاجه .. روحت افتح . لاقيت واحد بيقولى بوسطة .. بوسطة مين يا اونكل ده ايه الناس البدائية دى .. دلوقتى فى موبيلات وميلات ، اونكل بتاع البوسطة بحزم ده منزل .... ؟ ايو انا .. طيب وقعى بالاستلام .. فتحت الخطاب طبعا قبل ما اوقع .. ايه ..ده ؟؟ مين ؟؟ فين ؟؟ انا هبقى موظفة فى الحكومة نياهاهاهاها ... وتانى يوم توجهت على العنوان المكتوب فى خطاب العمل وبعد شوية توقيعات ونظرات من كل اللى يقابلنى من السادة الزملاء .. ايون لازم اناديهم بالزملاء هما قالوا لى كدا احنا زمايل .. وبدون دخول فى اى تفاصيل علشان لو هحكى تفاصيل يبقى قدامى بكره على ما اخلص .. بعد التوقيعات والمشواير وطلوع سلالم ونزول سلالم فى النهاية دخلونى غرفة كبيرة فيها مكاتب كتير جنب بعضها وكل مكتب قاعد عليه واحد وحاطط نضارة .. وباصص فى ورق قدامه .. انا قولت هو شرط اساسى للى يشتغل فى الحكومة لازم يكون لابس نضارة ولا ايه ؟؟ انا مش عندى ومش هلبسها يا جماعه .. المهم اتعرفت على الزملاء زى ما قالو لى وكل اللى يدخل يقولوا له الباشمهندسة زميله جديدة .. وانا بكل سرور وسعادة ابتسم ابتسامة واسعه واقوم اسلم لما رجلى ورمت من القوم والقعاد كل شوية .. وبعد التعارف والذى منه .. كل واحد حط وشه فى ورقة تانى وانا قاعدة ابص عليهم .. فى الاخر حسيت انى زهقانة ... طيب يا جماعه فرصة سعيدة انا ماشية بقى مش عايزين حاجه .. كله ساب اللى فى ايده وانتبه لى .. انتى ماشية رايحه فين ؟؟ مروحة بيتنا .. ردت عليا الزميلة وقالت لى يا حبيبتى فى مواعيد حضور وانصراف مفيش اجى بمزاجى واروح بمزاجى .. يعنى ايه يا طنط .. قلعت النضارة وردت هى كمان بكل ما تملك من جبروت .. طنط دى تقوليها لى لما نكون قاعدين مع بعض فى صالون بيتكو انما هنا انا اسمى الباشمهندسة نيفين .. يالهوى على الاوحراج .. انا اسفه سورى اوعدك مش هتتكرر تانى .. لا مفيش حاجه .. طيب هى مواعيد الانصراف دى امتا ؟؟ لسه شوية ؟؟ مسكت ورقة وقلم وقعدت اشخبط شوية هعمل ايه ما انا مش لاقيه حاجه اعملها ..وفجأة تليفونى رن .. ازيك .. مش كويسة خالص .. ليه كدا بس .. مش عارفه حاسه بجد انى فى سجن .. للدرجة دى فى ايه يابنتى .. بيقولوا لى فى مواعيد انصراف غير انى كل يوم هصحى من الساعه 7 علشان اكون هنا الساعه 8 وانا كنت بصحى الساعه 11 بالعافية .. ضحك ضحكة عاليه حسيت بجد ان الناس اللى فى الشارع اللى ورايا سمعوها .. بتضحك على ايه .. هو انتى فاكرة نفسك فى الملاهى يا ماما ماهو الشغل كدا .. انسى خالص حوار صحيان 11 والدلع اللى انتى فيه ده .. لا وعلى ايه انا مش ها اجى هنا تانى .. اه انا اشيف انك مش بتاعة شغل اصلا وكمان مش متعودة حد يقولك اعملى ومش تعملى .. انتى تروحى تقدمى استقالتك وتسيبى مكانك لحد يكون محتاجه .. إشطه انت بتسخنى .. لا يا حبيبتى انا بقولك اللى المفروض يحصل .. لانى عارف كويس انك مش هتقدرى تكملى .. صباحو تكسير مقاديف .. لا خليكى قدفى بس خليكى فاكره كلامى وربنا معاكى .. الزميل المواجه لى يتسائل زهقتنى شكله كان رامى ودانه معانا وقت المكالمة .. انا جداً .. طيب فاكرة اللى درستيه .. يعنى طشاش .. اممممم طيب لو قدامك رسم كروكى دلوقتى تقدرى تطلعى مقاييس الرسم بتاعته .. وتعملى ميزانية لقطعة ارض وتطلعى مكعبات الحفر والردم .. انا مروحة يا جدعااااااااااااان .. وان فاتك الميرى يبقى انت الكسبان .. ده كفاية الصحيان بدرى ده لوحده جهاد استحق عليه ادخل الجنة وربنا يصبرنى اعاااااااااااااااا

Sunday, January 25, 2009

عاكف يحذر حماس

فى أول رسالة مباشرة من المرشد العام للإخوان إلى حركة حماس، حذّر مهدى عاكف إسماعيل هنية رئيس الحكومة المقالة لحماس فى غزة من محاولات سرقة النصر فى الميدان على موائد المفاوضات تحت اسم مبادرة أو اتفاقية أو تفاهم أو ما إلى ذلك، وأوضح أن هذا ما عانيناه فى حرب 1973م

هى الناس دى بتفكر ازاى ؟؟ والـ 1300 قتيل اللى 500 منهم اطفال نساء دول ايه ؟؟ والـ 6000 مصاب دول مين ؟؟؟ فريق تمثيل بيأدى دور على خشبة المسرح مثلاً ؟؟

يعنى ايه قادرين ينطقوا كلمة انتصار بعد تحطيم الأنفاق و السيطرة على المعابر وعلى تهريب السلاح وبتعاون دولى ؟؟
للدرجة مستهنين بالدمار وبدماء المواطنين اللى اغلبهم اطفال ونساء وشيوخ ... يعنى مهدى اللى بيتكلم على الانتصار مش شاف برك الدم .. ولا تخيلها مجرد الوان حمرا والارواح دى كلها اوهام ؟؟
يعنى مشعل اللى خرج يقول سلاح المقاومة انتصر وهو هربان فى دمشق وهنية اللى بيقول حققنا نصر الهى وهو جوا الجحر .. لم يحرك له ساكناً بعد وقف اطلاق النار وهو يرى المدنين يبحثون عن اشلاء ذويهم فى مقالب القمامة ؟؟
للدرجة ارواح الشعب عندهم رخيصه ولا يهم سوى الحفاظ على السلطة حتى ولو بالكذب والتدليس وقلب الحقائق بكل تبجح اعلن لن يتنازل حتى لو ابيدت غزة عن بكرة ابيها .. فما فائدة غزة بدون مواطنين ايها القواد البربرى ؟؟
اسرائيل دخلت وضربت جوى وضربت برى واستخدمت اسلحة محرمة دوليا ودمرت وخربت وانسحبت وعاكف بكل سذاجه جاى يحذر حماس من سرقة انتصارهم بالمفاوضات .. عالم كدابة عديمة الاخلاق

Friday, January 23, 2009

حرب من جديد

بعد ان هدأت الأجواء قليلاً وخرج قادة حماس من جحورهم لجمع التبرعات اللى فى النهاية فى حجورهم
وبعد ان بدأ الناجين من مجزرة غزة فى البحث عن أشلاء ذويهم فى مقالب القمامة
وبعد أن بدأ يسترد المصابين عافيتهم شيئاً فشيئاً ليعرفوا كيف مصير ا ولادهم واخوانهم هل ذهبوا الى بارئهم واستراحوا من الهجمات المكررة بفعل السياسة الفاشلة ام لازالوا تحت الحصار ينزل الرعب فى قلوبهم بين لحظة واخرى
يطل علينا اليوم تنظيم القاعده للتحريض مرة اخرى على شن حرب ولكن هذه المرة ليست الحرب على اسرائيل فقط فحسب بل الحرب ايضا على كل من يدعم اسرائيل .. فدعواهم للحرب على الولايات المتحدة وبريطانيا ردا على الحرب التي شنتها اسرائيل على قطاع غزة .. وبدأ يتلاعب باسم الدين كالعادة لأنه يعرف أن الدين هو الورقة الرابحة التى يلغى المغيبين عقولهم عند سماعها ويهرولون لحمل الاسلحة التى لا ترقى لاصطياد العصافير وتوجيهها للعدو الصهيونى الذى لا يفكر كثيرا فى استخدام الاسلحة المحرمة دوليا .. وما أن يبدأ الهجوم والإشتباك حتى نجد القوادين من هاجر البلاد ومن عمل بيات شتوى داخل الجحور بجوار الفئران ومن قام بتحريضهم يجعجعون من داخل مخابئ سرية وحجتهم البلهاء اصل مصر مش فتحت المعبر ، والمفروض جيش مصر يروح يحارب .. حتى بن لادن الذى يسمونه المجاهد لتركه الصهاينة وتفجيره لارواح الابرياء دون ذنب اقترفوه حينما تحدث كان عبارة عن رساله صوتية ايضا من مخبأ سرى أترون الشجاعه وصلت مع المجاهدين لاى مدى ؟؟ ومن يدفع الثمن المدنيين والنتيجة آلاف الأرواح وآلاف المصابين .. ياريت ابو يحيى الليبى اللى قام ببث البيان الرهيب المهيب ده يورينا همته ونشاطه ويتحد كدا مع اقرانه فى انزال الرعب بقلوب الصهاينة وبريطانيا وامريكا بدلا من التحريض وقت اللزوم اخرهم يشتغلوا وناسه للفئران

Wednesday, January 21, 2009

أول ميثاق للفتوى في التاريخ الإسلامي

أوصى بعدم نشر الفتاوى الشاذة والترويج لها
170 عالما وفقيها يصدرون أول ميثاق للفتوى في التاريخ الإسلامي

مواطن مصرى ساب لى لنك للموضوع من المصرى اليوم فى البداية حسيت انه هيكون مجرد كلام ليس إلا يعنى فض مجالس مش فى حاجه هتتنفذ .. لأن دلوقتى الفتوى اصبحت لكل من هب ودب كان زمان مش من زمان اوى يعنى من حوالى عشر سنين كان الشيخ يقول فتواه ويتبعها بعبارة هذا والله اعلم .. لكن دلوقتى مع زيادة عدد الخريجين بالتالى مفيش وظائف يعنى الناتج عواطلية فكل عواطلى شغل عقله شوية لقى الطريق سهل قدامه ومش شرط اللبس يعنى يبقى شيخ كوول برضه يعنى ممكن يلبس شيميز وبنطلون ويعمل سكسوكة او بدله مستوردة ويعمل قصة ويقعد يسرسع طول النهار والحاج عمرو خالد ما شاء الله عليه منتشر انتشار النار فى الهشيم ، بمعنى انه مش شرط اساسى مفتيين اليومين دول يلبسوا الجلابية الشهيرة بتاعة محمد حسان ولا الحوينى اللى ملامحه والتكشيرة اللى بيرسمها على وجهه تمنع الخميرة من مخابز العالم كله وقاعدين طول النهار والليل يرهبوا الناس ويخوفوهم على قناة الأنجاس ومش مهم التخصص يعنى خريج كلية تجارة زى خريج دبلوم التجارة زى خريج محو الامية مش فارقه كله محصل بعضه فى ظرف يومين هيحصل على لقب الاستاذ والداعيه والجهبذ والعلامة واى لقب يحلم بيه هينوله هى الالقاب بفلوس يعنى .. دخلت كام موقع اخبارى اشوف الدنيا فيها ايه لاقيت نفس الخبر منشور على اكثر من موقع .. حبيت اشوف ردود الأفعال لكن فى الحقيقة جت عكس توقعى تماما اصلى مش تخيلت ان كل الكم ده من العالم العربى قرفان من كمية العواطلية اللى بيسترزقوا من ورا الفتاوى اللى كل يوم طالعين لينا بيها .. طبعا ماعدا الشرذمة المتشرذمة اللى تركت القرآن والسنة وتقدس اى واحد قاعد يقول سمك لبن تمر هندى لكن قبلهم قال رسول الله صلى الله عليه وسلم وفى النهاية صدق رسول الله صلى الله عليه وسلم
اتمنى ان يتم العمل بهذا الميثاق فوراً لينتهى العالم من فتاوى التكفير لكل المخالف فى الرأى نهايك عن الفضيحة الكبرى فتوى ارضاع الكبير ولا بول الرسول وفتاوى اغتصاب الاطفال تحت مسمى زواج شرعى ، امتا نفتح التلفزيون منلاقيش واحد من المرتزقه قاعد يصرخ فى وجوهنا بكلام ولما نقلب على قناة تانية نلاقى زميله بيقول كلام عكسه لما قلبوا المعايير واصبح الحلال حرام والحرام حلال دون اى احساس بمسؤليه او ذنب

Tuesday, January 20, 2009

حفل توقيع دولة الفيسبوك


من وقت مش كتير كتابنا نزل الأسواق
وموجود فى كل مكتبات دار الشروق على مستوى الوطن العربى
وبعد النجاح اللى حققه ونسبة المبيعات فى الفترة الوجيزة دى كان لازم نتوج مجهودنا بحفل توقيع للكتاب
معادنا الثلاثاء 3 فبرابر بجناح الشروق بمعرض القاهرة الدولى للكتاب فى تمام الساعه الرابعه مساءاً
والدعوة عامة
تحديــــــــــث
انت تسال والكمبيوتر يجيب said...
عزيزتنا الغاليه حنان
بمناسبة ظهور اول كتاب من دولة الفيسبوك ننوه عنه يوم الأحد25-1فى برنامجنا الأذاعى انت تسال والكمبيوتر يجيب على أذاعة مصر الرئيسيه اى البرنامج العام التاسعه وعشر دقائق صباحا والتفاصيل فى مدونتنا وموقعنا المدونهnetonradio.blogspot.
http://dear.to/cairoمع \
مع تحيه خاصه للصديق محمد على البسيونى على
جهده الواضح فى خروج الكتاب لحيز التنفيذ

Monday, January 19, 2009

عن اى نصر يتحدثون ؟؟ واى نصر يزعمون ؟؟

هنية: الفلسطينيون حققوا نصرا إلهيا في غزة وسنواصل لتحرير القدس
الست هنية المستخبية فى جحر طلع بعد لما اسرائيل اعلنت وقف اطلاق النار علشان يقول انهم حققوا نصراً إلهياً وسيواصل لتحرير القدس .. أى نصر اللى حققه هذا الفاشل على اشلاء جثث 1300 قتيل غير آلاف المصابين اللى هيعيشوا بعاهات مستديمة وان عاشوا جميعهم أساساً .. لقد انتصر هنيه من داخل الجحر على اساس انه ملاك وارسل الله له بجيش يحارب بدلاً منه .. أنتصر هنيه بعد قتل1300مدنى أغلبهم نساء واطفال وتدمير منازل وهدم مساجد ومدارس ولم يحرر نص سهم من فلسطين ومن بجاحته وعبطه بيقول سنواصل حتى تحرير القدس مش لما تحرر نفسك من الرعب والخوف اللى اصابك خلاك تجرى على جحر تستخبى وتقطع كل وسائل الاتصال خوفا من وصول اسرائيل ليك يا اذعر .. ولو حررت القدس هتلاقى مين من الفلسطينين اللى يحتفل بالتحرير ده ما انت بتورطهم وتجرى تستخبى هو النصر فى قتل شعبك ؟؟ ده ايه النصر الجديد ده يا هنيه الله لا يهنيك هو علشان انت لسه حى كدا خلاص هو ده الانتصار .. حقيقى اذا لم تستحى فافعل ما شئت .. اذا كنت بتسمى المجزرة والبهدلة اللى حصلت لفلسطين دى نصر يبقى من نصر لنصر حتى لا يبقى فى فلسطن شخص واحد و من مسيلمة الكذاب لهنية الكذاب سجل يا تاريخ

Sunday, January 18, 2009

خلفاء الله فى الأرض

مع انتهاء العصور الوسطى هذه الحقبة الزمنية التى شهدت ابشع انواع التخلف والجهل والفكر البربرى .. ومع ظهور بيير بيل وفوليتر وجان جوك وكل فلاسفة التنوير الذين كانوا النبراس الذى اضاء الطريق حتى اليوم ظننت اننا نحيا فى عصر التطور التكنولوجى ونواكب التقدم والرقى .. ولكن اليوم وبعد صدور فتوى تنظيم القاعده بالمغرب عن إهدار دم عادل امام والذى تجرأ وأدلى برايه وعبر عن موقفه تجاه حماس بأنه يرفض موقفها الداعم لانشقاق الصف الفلسطيني كما انه انتقد المظاهرات، وشعارات بالروح بالدم نفديك يا فلسطين وإضراب التجار في مصر ووقف السوق تضامنا مع الفلسطينيين. وقال: "أعتقد أن هذه الأفعال تفيد إسرائيل أكثر مما تضرها؛ لأننا نخرب اقتصاد بلادنا". .. فلقد تمطع ابو مصعب عبدالودود ليتقيئ لنا فتواه التى تفيد باهدار دم الزنديق الكافر عادل إمام .. هكذا عادت عقارب الساعه الى الخلف قرون .. فمن يعبر عن رايه زنديق وكافر وواجب اهدار دمه .. فلم نرى أياً من هؤلاء البلطجية السفاحين قتلة من يخالفهم الرأى يقفون نداً فى جه اسرائيل .. ومن اعطاهم الحق باصدر فتاوى فى قتل وسفك دماء من يخالفهم الرأى ؟؟ من الذى عينهم وسطاء ربانيون فالموت والحياة لله فقط وليس لهمج يرتكبون حماقتهم ويلصقونها بالإسلام .. واى اسلام هذا الذى أمر امثال هؤلاء البلطجية بسفك دماء المخالف لهم فى الرأى ... ما هذا الفكر الهمجى وما هذه البربرية التى يحيونها .. ومن الذى جعلهم اوصياء على الناس فى الأرض ؟؟
ومن الذى أعطاهم الفصل والقرار فى موت وحياة الآخرين ؟؟
ومن الذى يستطيع ايا كان حجمه او وزنه يصادر حق الآخر فى التعبير عن رأيه ؟؟
لا عجب فى العيال المطلوقة ليل نهار على النت كالبعير تقل ادبها على كل من يخالفهم الرأى ينعتوه بالكفر فاذا كان معلموهم لا يفقهون سوى سفك الدماء فكيف يكون منطق هؤلاء المتخلفين
فما يستحق اهدار دمه سواهم لتنظيف العالم من رواسب الفكر الظلامى المتبقية والتى تتمثل فيهم

Friday, January 16, 2009

حماس لم تهزم

لا دجل ولا شعوذة لما يكون عدد القتلى 1100وعدد الجرحى قرابة6000 طبعا دون وجه مقارنة بينه وبين جيش العدو و النهاية يخرج مشعل فى اجتماع القمة يقول حماس لم تهزم يبقى المفروض الجميع يتكاتف ويعمل سيرش على امهر طبيب اذن مش هقول طبيب عيون لأنه مش شايف حاجه اصله قاعد فى فنادق دمشق وتقريباً الفندق فيه جميع الخدمات ما عدا وسائل الإعلام المرئية أو المسموعة
هو فعلاً حماس لم تهزم اصلهم كانوا بياخدوا من الأطفال دروع بشرية
فعلاً حماس لم تهزم اصلهم كانوا بيجمعوا الاطفال والنساء ويقعدوهم قدام المكان اللى مستخبيين فيه لضمان عدم قذف قنابل او اى اصابات من تجاه اسرائيل ولما اسرائيل كشفت اللعبة باتت لا ترحم اطفال ولا نساء .. حماس لم تهزم لأن قادة حماس اللى مستخبيين فى الأنفاق قافلين موبيلاتهم وقاطعين وسائل الاتصال اللى ممكن من خلالها اسرائيل تحدد مكانهم وتوصل لهم حتى لما هنيه فكر يتكلم اتكلم من موقع سرى وبعد 17يوم من بدء المجزرة
فى السابق بيان هنية واليوم تصريح مشعل لا يختلف كثيراً عن كلمات الصحاف فى بداية دخول الامريكان العراق كان يقف قدام وسائل الاعلام وبملئ فيه لقد هزمنا العلووووج هزيمة ساحقة والعلوووج مش مبطلين قتل فى العراقيين وسحلهم واهانة كرامتهم فى ابو غريب ... اليوم يتكرر نفس السيناريو ونفس البيانات التى لا تمت للواقع بصله فحماس بعد فشلها فى عدم اعتراف اقليمى او دولى حتى جامعة الدول العربية التى اعلنوا عدم الاعتراف بها وانها لا تمثل الفلسطنيين لانها لا تتشاور مع حماس كما صرح أحد قاداتها فمن الواضح ان حماس جعلت من نفسها كل فلسطين لذلك لا يهم ان تباد غزة او فلسطين من شرقها لغربها .. الأهم ان حماس لم تهزم
المثير للضحك ان قطر ومورتنيا قررا اليوم فى القمة الطارئة بالدوحة قطع العلاقات مع اسرائيل .. بالمناسبة قطر كانت قالت الكلام ده فى بيان اتذاع على الجزيرة فى بداية مجزرة غزة ومن يومين بس كان وزير خارجية قطر يرفض اغلاق المكتب التجارى الدبلوماسى الاسرائيلى وقبلها تم تكريم المنتخب الاسرائيلى من قبلهم ... قطر التى تضم مخزن للقنابل التى تستخدمها اسرائيل وتصدر الغاز لتل ابيب اليوم تعلن المقاطعه ... وان صدقت بالفعل فى القرار الذى تم اتخاذه اليوم فى قمة الدوحة فما موقفها من الثلاث قواعد امريكية التى تحتضنها والتى يتم تدعيم اسرائيل من خلالها ؟؟؟

Wednesday, January 14, 2009

فتاوى ديلفرى

اعتبر مفتي السعودية الشيخ عبد العزيز آل الشيخ أن زواج الفتيات اللواتي يبلغن سن العاشرة "حلال"، مشيراً إلى أن "الانثى إذا تجاوزت العاشرة من العمر، أو الـ12 فهي قابلة للزواج، ومن يعتقد أنها صغيرة فقد أخطأ وظلمها

الكلام واضح وصريح وطبقاً لكلام المفتى كل واحد وواحدة عندهم طفلة فى رابعه ابتدائى يادوب يستروها ويشوفوا لها عدلها لأنه لو استنى لحد لما توصل تانية اعادى يبقى كدا انسان ظالم وبيظلم بنته الطفلة اللى بتلعب فى الشارع مع العيال اللى فى سنها بس نسى يقولنا وياترى الولد هنجوزه على كام سنة بما انه قوى يعنى وفى الشدة شديد وفى القوة قوى يعنى ممكن نجوزة وهو عنده 7 سنين مثلا ولا نجوزها واحد عنده 30 سنة مش هبالغ واقول 50سنة يعنى .. ياريت حد يكسب ثواب فى الشيخ بتاع الامر بالمنكر والنهى عن المعروف ده ويطلعه على قانون الطفل ، ولا قانون الطفل فسق من عمل الشيطان ، المفروض عملا بكلامه محكمة الجنايات تعاقب الاطفال اللى بيتركبوا جرائم وتلغى الاحداث وتطبق عليهم عقوبة البالغ الرشيد ، ماهو لما طفلة بتلعب فى الشارع اهلها يوجوزوها ويبقى هى محتاجه اللى يبقى مسؤل عنها ويهتم بمذاكرتها واكلها وشربها وعلشان الصفقه تكمل والبيعه تبقى برضا العروسة يعملوا لها الفرح فى الملاهى ولما العريس يجى ياخد حقوقه الزوجيه يجيب لها شكولاته ايردبير ويفرجها على سبيس تون .. ربنا يكمل الشيخ ده وامثاله بعقولهم قادر يا كريم

Monday, January 12, 2009

هنيه يصرح من داخل الجحر

بعد حالة فقدان للنطق اصابت هنية منذ اندلاع المجزرة التى يحياها شعب فلسطين المغلوب على امرة عاد النطق لهنيه اليوم ليصرح من مخبأة حيث الفئران التى انست واستأنست به منذ 17 يوم والى أجل لا يعلمه الا الله
ليس هذا العجيب ولكن الاعجب ان يكون هنيه فقد السمع ولم يسمع أن عدد الشهداء قارب من الألف وعدد الجرحى فى تزايد مستمر ليلقى بتصريح قمة فى الإستعباط والإستبهال
ان شعب غزة ضرب المثل في التعاون والوحدة "فكأنهم جسد واحد". ودعا أهل غزة الى استمرار التعاون والتضامن مشيرا إلى أن ذلك "يعكس الثقة في نصر الله"
هما فين اهل غزة اللى عايزهم يستمروا حد يقوله انهم خلاص اوشكو على الانقراض طبعا مش فى حاجه بعيدة على ربنا ومن الممكن ان يتم الفوز المبين بس نسى يقول إزاى ورئيس العصابة مستخبى فى جحر وباقى افراد العصابة اللى فى سوريا واللى فى اليمن ؟؟
الصبح كنت بطالع الأخبار زى اى حد بيطالعها علشان يعرف ايه اخر التطورات وقرأت خبر ان شخص فلسطينى راح يساعد فى اسعاف الجرحى لاقى ابنه فى وسطهم .. حد يقدر يتخيل المنظر ؟؟ حد ممكن حد يوصف شعوره ؟؟
هنية سعيد ان الشعب الفلسطينى لا زال يقاوم يعنى الحمد لله لسه فى ناس حيه ترزق وبترد على الصواريخ اللى بتضربها اسرائيل بحدف الطوب ... ولن نقبل التهدئة حتى تسمح لنا كبيرتنا ستنا وتاج راسنا اللى بنأتمر بأوامرها ايران اللتى تقوم بقمع اى مظاهره للتضامن مع غزة ومن شدة مساعدتها لغزة اعتقلت اليوم 40من المتظاهرين هنيه الشجاع لم يقوى على الظهور على الهواء مثله مثل نظيره حسن نصر الله الذى يدعمه بالبيانات التحريضية فكل يبث تصاريح من مخبأ ، اما شلة المرتزقة الذين يذهبون إلى مجلس الشعب بكامل أناقتهم ليرفعوا احذيتهم فى الوجوه اذا اراد احد الاعضاء الالتفات لمشاكل المصريين .. المصريين الذين وثقوا بهم واعطوهم اصواتهم للتحدث بالسنتهم فخذلوهم وتركوهم يعجون بمشاكلهم وتنتهى او لاتنتهى لا يهم فالأهم هم اطفال غزة الذين يموتون كل يوم بسبب سياسة فاشله وحاكم خانع جبان فمن واجب كل مصرى ذبح طفل من اطفاله تضامنا مع غزة وبلاها مناقشة مشاكل التعليم والصحة وإصلاح المجتمع المصرى ماهو طز فى مصر وشعبها .. وإلى أن يتم انتخاب نواب يتحدثون باسم الشعب ويهتمون بحقوقه اطالب بالتضامن مع مصر

Saturday, January 10, 2009

تغيير الشعار .. الجزمة هى الحل

تحديــــــــــــــــــــث
لليوم التانى على التوالى يثبت لنا الاخوان مدى همجيتهم ومدى تمتعهم بضيق الأفق وعدم النمو
فلقد دلل لنا بالامس اشرف بدر الدين واليوم يتم رفع الحذاء فى المجلس مرة اخرى من النائب على لبن النائب الاخوانجى اهذه الأمانة التى وضعها فى اعنقاهم من استأمنوهم على انفسهم واعطوا لهم اصواتهم ليتحدثوا بالسنتهم ؟؟
اهذا هو الفكر والرأى الذى يملأ عقولهم لا يفقهون سوى ثقافة الجزمة ؟؟؟
لا اعلم لما النظام يترك هؤلاء الهمج المتخلفين الذين لا يعلمون ابعد من مستوى الجزمة التى تبدلت بعقولهم
ولا عزاء لمن اختارهم يتحدثون عنه فقد اساء الاختيار فهؤلاء الهمج ليس لهم وجود فى الاماكن المحترمة وانما مكانهم الطبيعى فى حقول البرسيم
============================
قمة الهمجية والتخلف تجلت بوضوح اليوم فى مجلس الشعب من النائب الاخوانى اشرف بدر الدين .. الذى بدل من ان يرد على زميله الحجة بالحجة والدليل بالدليل .. اثبت مدى ضعفه وعدم مقدرته على مناقشة الفكر ودرء اى كلام حتى لو اتهام موجه بالدليل فكان رده المباشر هو رفع الجزمة التى عبر بها عن فكر الجماعه المحظورة التى تلهث بكل قواها للوصول لحكم مصر ، فكيف لجماعه تعبر عن رايها بجزمة وفى السابق اعلن مرشدها بانه طز فى مصر وشعبها ان تؤتمن على هذا البلد وشعبه لابد من اتخاذ موقف حازم من الحكومة المصرية والتصدى لهذه الجماعه التى اثبتت جميع مواقفها خذلانها ومدى تخلفها وهمجيتها ، لن ننتظر حتى يبيعوا مصر لايران ويجنوا على شعبها ولن تكون مصر حماس الاخرى التى كانت تلقى الشعب الفلسطينى من اعلى المنازل .. والغريب بل العجيب انهم لازالوا يتشدقون باسم الدين ، من الذى جعلهم اوصياء على الناس فى الأرض كيف لهذه الجماعه الهمجية ان تصبح ذات سلطة ويكون لها الحق فى الفصل والقرار فى حياة بشر .. كيف لهؤلاء الرعاع الذين لا يملكون فكر ولا منطق ولا حجه ولا رأى مصادرة حق الآخر فى التعبير عن رأيه كيف لمجتمع ان يتقدم ويرقى وينهض فى ظل وجود هؤلاء المتطرفين الذين لا يعلمون من الحياة سوى القتل والدمار و ثقافة طز واليوم رفع الجزم .. لابد من مواجهه النظام لهم فتهاونه معهم اتاح لهم منذ نشأة مدرسة الاسماعليلة ان ينصبوا أنفسهم رجال ادعاء وقضاء حكم بالتكفير والقتل .. واليوم يعودون الكرة مرة اخرى برفع الجزم فالى اقرب مرحاض الاخوان وثقافتهم الهمجية والرعوية
http://www.youm7.com/News.asp?NewsID=62662

Friday, January 9, 2009

شكراً لعواطفكم لكن لا يمكننا فعل شيء

قال لهم: شكراً لعواطفكم لكن لا يمكننا فعل شيء
منع المرشد الأعلى للجمهورية الإيرانية علي خامنئي المتطوعين الإيرانيين، المحتشدين في المطارات، من الالتحاق بالمقاتلين الفلسطينيين في غزة، وعبّر لهم عن "جزيل شكره"، مستدركاً "ينبغي عليكم أن تنتبهوا إلى أننا لا نستطيع أن نفعل شيئا في هذا المجال


طبعاً بعد كلام خامنئي مفيش كلام .. اعتقد مولد المزايدات على مصر المفروض انه ينتهى من يومين تم اطلاق صواريخ على اسرائيل من جهه لبنان طبعا كان رد حزب الله اسرع من الصواريخ اللى انضربت ينفى انه هو اللى ضربها فى نفس التوقيت حدثت مصادمات بين الشرطة والشعب السورى لقمع مظاهره تضامن مع غزة فى سوريا ... واليوم تصريح على خامنئي بعدم السماح للشباب بالسفر طيب ليه بيطالبوا الشعب المصرى بعمل ثورة وانقلابات والخروج للجهاد هو الجهاد مش يكون ليه معنى الا بدماء المصريين ؟؟
اكيد دلوقتى وضحت الحركات المفقوسة وتسخين الشعوب على بعضها لزعزعة الاستقرار وبالرغم من كل الجعجعه دى لا ان النظام المصرى سعى لتهدئة وقف فوري وملزم لاطلاق النار يؤدي الى انسحاب كامل للقوات الاسرائيلية من غزة ولأن حكومة حماس لا يهمها شعب ولا يهمها دماء اطفال ولا نساء رفضت التهدئة وقالوا بالرغم من اننا الطرف المعنى لكن لا تعنينا هذه التهدئه فعلا هما عندهم حق اصل اللى قاعد فى فنادق واللى عامل بيات شتوى فمش مهم بقى القتلى والمصابين اللى بيقعوا كل يوم عنجهية و افلاس سياسى منقطع النظير ولا عزاء للأطفال والثكالى الذين يدفعون ثمن مالم تقترفه ايديهم

Wednesday, January 7, 2009

فى انتظار رد من الحكومة المصرية

النظام الإيراني يمنح الجائزة لمن يغتال الرئيس المصري
أعلن عدد من المؤسسات والمنظمات التابعة للنظام الإيراني جائزة لمن يغتال الرئيس المصري.وكتبت وكالة أنباء (فارس) الحكومية: أعلن عدد من المنظمات والمؤسسات وخلال مراسيم خاصة بان يمنح مبلغ مليون دولار لشخص في أي مكان في العالم ينجح في تنفيذ ما وصفوه بـ «الاعدام الثوري لحسني مبارك هذا الارهابي الدولي».هذا وفي عددها الصادر يوم أمس الاحد كتبت صحيفة (جمهوري اسلامي) الناطق باسم ولي الفقيه خامنئي في افتتاحية وصفت الرئيس المصري بانه (فرعون) و(مفسد) وطالبت بالقضاء عليه.

لنك الخبر برضه .. من عند مواطن مصرى
المجزرة الحاصلة دلوقتى فى غزة واللى السبب الرئيسى فيها حكومة حماس اللعينة وليس مصر ولا شعب مصر ولا حاكم مصر اظهرت
فعلا مدى الحقد فى القلوب ضد مصر .. اظهرت حقا مين العميل ومين الخائن ... يعنى حسن زعبولة بخطاباته اللى قام فيها بتحريض المصريين على بعض وقناة الحقيرة اللى قايمة بواجبها ضد مصر على اكمل وجه زادت من شعبية الرئيس المصرى وأتت الرياح بما لا تشتهى السفن .. ولما مالقوش حل والاخوانجية جعجعوا شوية فى الشوارع وبدأ الأجواء تهدى دون اى انقلاب داخل مصر ... ظهر الجرابيع والرعاع على حقيقتهم وافصحوا على ما تكنه صدورهم وفضحوا نفسهم ايم فضيحه بالجائزة الحقيرة التى رصدوها لمن يغتال الرئيس مبارك ... بعد ان امقت الجميع نصر الله وقام عدد من المحامين المصريين برفع قضية ضده فى المحكمة الجنائية القومية بسبب تصريحاته التحريضية فكانت بالنسبة لهم خنجر فى ظهورهم لم يتخيلو ان الشعب المصرى من الممكن ان يهب ليقف بجوار من يمثل مصر باكلمها وهو رئيسها ... فالى الجحيم ايران ونصر الله وحماس والاخوان فجميع هؤلاء فى كفة واحدة لا يعلمون سوى فقه الجنازير والارهاب ... لا يحترمون حقوق ولا يعلمون اتفاقيات ... لا اعلم لماذا النظام المصرى يمهل الاخوان هذه الفرصه ويتركهم يعيثون فى الارض فسادا فالاولى بهم جمعهم فى قفص للدجاج والالقاء بهم فى اول محرقة لحفظ الامن العام

Tuesday, January 6, 2009

ده لعب عيال بجد

حزب الله: لن نقوم بأى خطوة استباقية إلا فى حالة اعتداء اسرائيل على لبنان
ده طلع فعلا لعب عيال بجد وانا اللى كنت بهرج فى البوست اللى قبل الاخير وبقول ان حسن نصر الله ومن شاكلته عامل زى التلميذ البليد اللى مش عمل الواجب وقال ان زميله سرق القلم بتاعه ... امال فين التحريض اللى كان بيحرضه للمصريين وانه عايز ثورة وحرب .. المفروض بقى يتلهى على عينه ويسكت ... وعلى فكرة بعد البيان العجيب اللى وضح خلاله انه لن يتحرك ضد اسرائيل الا للدفاع عن النفس قامت6طائرات اسرائيلة برحلة داخل الاجواء اللبنانية ولا حد قالهم انتوا بتعملوا ايه .. يا حلولى على الجدعان .. يا سلام على الشجعان .. انا مش شمتانة فيهم وفى خيبتهم القوية اصل الشماتة ليست من قيم السادة انا بس بوضح صورة البطل من ورق اللى طلع يزايد على مصر ويجعجع ويحرض المصريين على بعض المفروض بقى الاخوانجية هما كمان يتكتموا اصل الرجال افعال لا اقوال والرجالة جت وقت اللزوم وكسكست
التعليق ده سابه الصديق مواطن مصرى فى كومنت
http://www.washingtonpost.com/wp-dyn/content/article/2009/01/04/AR2009010401434.
خيار الثلاث دول بيتكلم عن توطين غزة و حماس
في سيناء تحت الادارة المصرية و توطين فتح في الاردن و تكون تحت الادارة الاردنية عشان كدة حماس عاوزة تفغتح المعبر كليا عشان تسهلهم العملية دي
==============
انا مش بفتح اى لينكات حد يسيبها لى فى البلوج .. لكن كومنت مواطن مصرى مع لنك الواشنطن بوست حرك الفضول جوايا وخلانى ادخل اشوف حكاية اللنك ده ايه وقولت بينى وبين نفسى لو حصل اى حاجه اهو برضه مننا وعلينا وهتبقى نيران صديقة يعنى فداه الف بلوج
محتوى المقال بالمختصر المفيد
يوضح مدى فشل حكومة حماس فى ادارة البلاد وعدم نمو فلسطين اقتصاديا وما يعانيه الشعب الفلسطينى من صراعات داخلية على السلطة .. بمعنى اصح كاتب المقال وضع ايده على سبب ألم الفلسطينين يعنى المفروض يتحدوا داخليا الاول .. كمان الكاتب مش نسى يقول ان اسرائيل حزينة للى بيحصل لكنها بتواجه حماس الارهابيه اللى قواعدها فى لبنان وسوريا .. وتقريبا نسى يقول ايران او انه اكتفى بلبنان على اساس انهم المحرك الرئيسى للورقة بتاعتهم الرابحة فى لبنان حسن زعبولة .. فى نهاية مقاله بيقول ان الشعب الفلسطينى والاسرائيلى محتاجين قليل من المصارحة وانا اؤيده الرأى بالفعل خصوصا الشعب الفلسطينى اللى افتكر ان حماس بديل عن فتح وممكن تعمل لهم حاجه مفيدة لكن هما لوحدهم اللى بيبكو بدل الدموع دم دلوقتى ... يعنى المفروض دلوقتى ايه ؟؟ ان كدابين الزفة واصحاب الحناجر اللى بيطالبوا بفتح المعبر لتوطين غزة وحماس واللى بيزايدو على مصر وضحت لعبتهم القذرة وظهر خنوع اصحاب الحناجر بعد مناورة اسرائيل فى سمائهم واللى بعدها اتضح انهم عبارة عن شعله تطفأها حفنة من التراب

Monday, January 5, 2009

وصول وفد حماس للقاهرة

وصل مطار القاهرة مساء اليوم الاثنين، وفد حركة المقاومة الإسلامية (حماس) قادما من دمشق، ويضم عماد العلمى ومحمد نصر عضوى المكتب السياسى للحركة
امال فين المقاومة ؟؟؟ وفين التصريحات الرنانة بإراقة دم اسرائيل وتعليمهم الدرس القاسى ؟؟؟ خارت قواهم والعيل رجع فى كلامه وجايين يتفاوضوا .. اتأكد كدب البيانات المزعومة اللى كل يوم يقولها هنيه وتبثها قناة الحقيرة بقتل واسر اسرائيليين ؟؟ بالمناسبة البهوات جايين من دمشق شكلهم كانوا بيحاربوا هناك فى الفنادق والتكييف والسرفيس ال7 نجوم .. والغلابة بيحاربوا وبيواجهو الموت فى غزة بمبب العيد
ومن المقرر أن يجرى وفد حماس مباحثات بشأن العدوان الإسرائيلى الأخير على قطاع غزة، وفرص التهدئة مع إسرائيل، وفق الخطة المصرية التى طرحتها مصر على الاتحاد الأوروبى. تأتى زيارة وفد حماس بعد أيام من تصريحات للمتحدث باسم الخارجية المصرية حسام زكى، قال فيها إن مصر تجرى اتصالات مع مسئولين من حركة حماس للتداول معهم بشأن الأفكار المطروحة لوقف إطلاق النار بينها وبين إسرائيل.

يعنى لما اتنزقوا مش لقيوا ليهم مكان يلمهم غير مصر .. يعنى اللى بيجرى اتصالات ومفاوضات لحل ازمتهم برضه مصر .. علشان كل عاجز حرضهم على نقض التهدئة وبعد ما خاضوا الحرب وقف يتفرج عليهم وعلشان عجزه مش يبان يلقى اللوم على مصر .. علشان كل حاقد وكائن نكره مش لاقى له حاجه يعملها قاعد يجاهد من خلف كيبورد ويشتم فى النظام المصرى يخرس .... علشان الجميع يعرف ان مصر اللى بتمرر لهم مساعدات واللى فاتحه للجرحى مستشفياتها يتعالجو .. وبهذه المناسبة احب اقول للى كانوا بيقولوا لى انتى موقفك مش انسانى اصل يعنى المفروض انهم يفتحوا المعبر ويسكنوهم فى سيناء لحد الازمة دى ما تتحل فى مواطن فلسطينى كان بيتعالج فى مستشفى ناصر والكابتن هرب من المستشفى يبقى شوف بقى سيادتك لما يدخلوا سيناء شهر اتنين تلاته هيعملوا ايه اذا كان المصاب هرب للداخل امال الشديد هيعمل فينا ايه ؟؟؟

Saturday, January 3, 2009

مولد المرتزقة

حزب الله.. دَعَمَ حماس "معنويا" وَرَفَضَ فتح جبهة مع إسرائيل عسكريا

طيب ما تخرس يا حسن بدل البينات اللى بتبثها من مخبأك وبتمليها عليك ايران .. يعنى طالما انت لا تملك سوى الحنجرة فبلاش التملق والمداهنة على حساب مصر ... مصر اللى برضه وقفت جنبك وساندتك لما قمت بالحرب اللى جلبت للبنان الخراب والدمار واللى بالرغم من طوله لسانك انت وامثالك العجزة عليها برضه بتساعد الفلسطنين وبتستقبل الجرحى وبتدخلهم مستشفياتها يتعالجوا فيها الجرحى اللى فى بداية الحرب كانت بتمنعهم حماس من الدخول لمصر ظنا منها انها كدا بتضغط على الحكومة المصرية لفتح المعبر ما يولعوا هما جرحانا ولا جرحاكو .. دى حكومة امينة على ارواح شعبها ؟؟؟ فى المقابل كان وزير الصحة الفلسطينى يناشد الرئيس بفتح المعبر لاستقبال الجرحى .. احنا مش معترضين بس حكومتك المتأسلمة هى اللى معترضه من الاولى انك ناشدها هى .. مش انت برضه اللى قولت اسرئيل لن تخسر الا من حزب الله طيب فين جيشك ورينا همتك ؟؟ اتفضل افتح جبهه من ناحيتك عايزين نشوف النصر المبين على يد حزب الله ولا فى الحروب نعامة واكتفيت بالدعم المعنوى ... وقاعد تحرض حماس على الدخول فى حرب وهى اضعف واهزل من اى مواجهه لا تملك ما تواجه بيه كان الاولى بيك بدل التحريض انهم يخوضوا حرب تمدهم بالاسلحة ولا انت برضه مستخبى وقاعد تشجع اللعبة الحلوة مجرد متفرج على الانتحاريين اللى بيواجهو صواريخ اسرائيل وطائراتهم وهم لا يملكون سوى فرقعه بمب وطرقعه صوابعهم ... فين امير قطر مش جبت سيرته ليه فى بيانك الحنجورى الغبى مين الاولى بالقاء اللوم مصر اللى بتسمح بمرور مساعدات و فاتحه دراعاتها للمصابين وبتعالجهم وبالرغم من كدا حكومة حماس تعطى تعليمات لقتل ظباطنا وحرس حدودنا ولا امير قطر اللى عنده 3 قواعد امريكية ؟؟ كل واحد له مصالح مشتركة يتنصل من حماس طبعا بعد ما حرضها دلوقتى سوى انه يدعمها معنويا وهذا اضعف الايمان وفى المقابل يقوم بتصدير مصر فى المقدمة والقاء اللوم والتهم علشان طبعا يبان قوى مهاجك حتى اخر نفس .. مصر لن تصحح أخطاء عصابة حماس الارهابية هى من قامت بنقض التهدئة بتحريض من ايران ونصر الله فيا من تدعون المــقاومة وبانكم من ستمحون اسرائيل من الخريطة في أيـــران وسوريا وحزب الله .. الرجال افعال لا ابواق وحناجر وتحريض وبعدها تملص من المسؤلية كالتلميذ البليد الذى ينسى القيام بعمل واجبه فيتهم زميله بانه سرق قلمه

Friday, January 2, 2009

وداعاً .. ومرحباًً

هو البوست متأخر شوية لأن المناسبة خلاص فينش بح مفيش خلاص لكن على ما فوقت من الغيبوبة اللى كنت فيها
كل واحد ودع 2008 بطريقة أو بأخرى كل واحد عاشها برضه بطريقة أو بأخرى
فى اللى سابت فى نفسه اثر كويس وفى اللى اول ما خلصت قالها فى ستين داهيه واخد اثاث البيت كله ورماه من البلكونة روحه بلا رجعه
لما هلت علينا 2008السنة اللى فاتت انا كتبت عنها وكنت بسألها ياترى هتبقى حاجه كويسه هندونك فى مذاكراتنا واوراقنا وهيذكرك فى كل وقت تاريخنا ؟؟ ومن اول واحد يناير لاخر يوم فى ديسمبر وانا بيتردد السؤال ده على مسامعى
2008سابت علامة جميلة اوى فى حياة كل واحدة بتحترم نفسها وبتحترم كيوننتها وعارفه يعنى ايه كلمة كرامة وكلمة شرف وسيبقى الى ابد الدهر اول حكم تاريخى حصلت عليه المخرجه نهى رشدى فى جريمة تحرش
2008سابت ذكرى مؤلمة جدا فى حياة ذوى منكوبى عبارة السلام98 يوم الحكم العصيب ببراءة ممدوح اسماعيل وعمرو ممدوح
2008هيدونها التاريخ بالفعل فى حريق الشورى وحريق مسرح جورج ابيض
2008مش زعلانة منك لكنى زعلانة على الاحداث المغايرة التى تزامنت خلال ايامك
لما نهى صديقتى سالتنى انتى نفسك فى ايه فى 2009كانت اجابتى ان كل واحد يحترم نفسه .. ضحكت قوى وقالت لى انتى لو طلبتى العفريت بتاع مصباح علاء الدين كان بقى اسهلك
لكن مش كتير على ربنا فعلا انه يحقق امنياتنا .. كل واحد يحترم نفسه
وكل واحد مش يتدخل فى خصوصيات غيره
كل واحد ربنا خلقه بعضو ذكرى مش معنى كدا انه مميز وبنات الناس من حقه يقل ادبه عليهم سواء باللفظ او بمد الايد
كل واحد واخد الدين ستار للوصول لأهداف ومطامع شخصية
كمان قطعة القماش المسماة مجازاً بالنقاب وهى فى الاصل لثام تختفى من مصر نهائياً
اتمنى فى 2009الشعب يبقى عنده وعي بحقوقه وعارف ايه واجباته
المرأة المصرية الى بتشوف متحرش وتقعد تمصمص فى شفايفها وتقول ما تشوف نفسها لابسه ايه تثقف نفسها وتتعلم مش عيب يعنى وتعرف انها انسان
كمان ياريت حفلات التحرش الجماعى اللى بتتعمل فى الاعياد .. واللى لحد دلوقتى مش قادرة استوعب ان واحد كان صايم امبارح ومصلى العيد الصبح وبعد ساعه واخد صحابه ورايحين يتحرشوا
ياريت 2009مش يكون فى دويقة جديدة
بالنسبة لى شخصيا مش عايزة استنى منك حاجه حلوة لانى كالعادة سايبة الايام كما هى زى فى 2008 مقدرش ازعل على حاجه شخصية لأن اى موقف مش كويس حصل فيها انا مش بفكر فيه بعتبره شيئ عابر لا يستحق انه يذكر اما كل حاجه حلوة فانا اتمنى انها تدوم وللأبد وليس لمدة عام
اجمل حاجه حصلت 2008 على المستوى الشخصى كانت اخر 20ساعه فيها كانوا اغرب واجمل 20ساعه مرو فى حياتى كلها .. يمكن علشان اول مرة فى حياتى كنت اقابل ريماس اللى مش استنت لحد ما اوصل عندها وقابلتنى فى الطريق ويمكن علشان قابلت يوستينا اللى جت مخصوص علشان تقضى اجازة الكريسماس فى شرم الشيخ فانتى نورتى الفورسيزون وشرم ومصر كلها انا بالفعل مش عارفه اشكركو ازاى على اليوم الجميل ده وفى نفس الوقت بعتذر لكو انى عملت سندريلا واول النهار ما جه جريت انتوا فاهمين بقى ظروف الناس اللى كانت معايا وطبيعة شغلهم عاملة ازاى مكانش ينفع اخطف الامير اكتر من كدا :) المرة اللى جاية يكون معانا وقت كبير وفى اقرب زيارة مرة تانية ليوستينا اللى هتسيبنا وتطير تانى بعد ساعات على من حيث أتت اما بقى ريماس اللى خايفة تعمل بلوج علشان مش حد يقل ادبه عليها وبتكتفى بالردود اولا عندك حق علشان انتى بالفعل عبارة عن شكولاته بالكريمة فمتخيلة ايه اللى ممكن يحصلك لو حد قل ادبه عليكى لكن ده ميمنعش انك تعبرى عن رايك براحتك .. اما بقى يوستينا اللى كل مشكلتها فى بلوجى انها بالعربى وهى العربى عندها فى الضياع فمعلشى هاتى لك مترجم معلشى باخد حقى علشان اقنعتينى ان سلطة البحر باللمون وااااااو

البحر الساعه 7 صباحاً



مينا مول اللى شهد احلى تذكارات ومش عارفه الحقيقة افرق بين القطط والنمور اللى انتوا جبتوهالى بس عموما ميرسى ومعلشى بقى يا يوستينا انا عايزة الكوفية بتاع التيشرت حلبسه ازاى من غيرها