على طول ضاربة بوووز


بدأت كلماته بالشكوى من الحياة ومن الدنيا كلها .. كل الناس ضده حتى أمه وأبوه .. بيته بيهرب منه علشان مش يشوف مراته اللى بوزها يقطع الخير من البيت .. يا ساتر يارب ليه كدا .. يحلف بكل ايمانات المسلمين والكفار بالمرة انه ما يعرف .. اصله بنى آدم طيب اوى خالص ودايما اللى فى ايده مش ليه .. تقريباً الشكاوى دى بدأت من اول خمس دقايق اتكلمنا فيهم وكأننا أصدقاء من رابعه إبتدائى وانا مش كنت واخدة بالى .. تابع الحكاية وانه كل يوم يتخانق معاها وش النحس اللى بتستناه كل يوم ومش بتنام غير لما يرجع لها البيت فى الفجر .. طيب مش يمكن بتكون قلقانة عليك .. لا مش قلق هى عايزة تعرف انا بروح فين وبعمل ايه .. يا سلام ودى حاجه تضايقك ؟

ده انت المفروض تفرح ان فى حد مهتم بيك

وبعدين بترجع لها البيت الفجر كل يوم ؟ هو انت بتشتغل ايه اصلا ؟

انا مش بشتغل ... انا مستنى فرصه علشان اسافر بره .. نعم ؟ امال بتصرفوا منين ؟

هى عندها شقة عايشين فيها .. وامى بتجيب لنا الأكل

فى سرى ومش مكسوف على دمك ؟ وبعدين هى مستحملة واحد جبلة بالشكل ده وبالرغم من كدا قاعد تشتم فيها ؟

انا كنت مسافر قبل كدا وكان معايا فلوس .. ولما رجعت من السفر هى اللى رمت الهلب حوليا لحد ما وقعتنى وكانت حلوة ورقيقة وطيبة .. وبعد الجواز ظهرت على حقيقتها دى بنى ادمة مش تتعاشر .. كل شوية رايح فين وجاى منين ومشاكل فى الفاضى والمليان .. لحد ما زهقت منها ..

بالرغم من حالة الارف اللى اصابتنى من اللى خلفوه بعد الكلام ده الا انى جيت على نفسى وغيرت نبرتى وعملت نفسى متفقه معاه ..

بصراحة هى مش عندها حق المفروض تسيبك براحتك وتنام هى بدرى وانت حتى تبيت بره البيت ولا الله لا يجعلك ترجع تانى يعنى انت هترجع وفى ايدك الديب من ديله .. ده انت حتى امك بتصرف عليك

نعم ؟

لا ابدا ده انا بهزر معاك .. طيب مراتك دى عندها شقة وانتوا عايشين فيها .. لو قدامك واحدة تانية ومعاها فلوس ولا سفر ولا بتاع بقى ماهى حتصرف عليك هتعمل ايه ؟

هى فين دى بس ده انا اعيشها فى حياة كلها عسل .. طيب لو قدامك شغل بس بطريقة غير مشروعه ومريح جدا وهتعمل منه فلوس كتير ..

بصى من الاخر انا عندى استعداد اعمل اى حاجه .. البلد دى مش عايزة غير كدا كله قاعد يقلب فى كله انا يعنى اللى هعيش بمبادئ ..

ما انا متمسك بمبادئي اهو ومش لاقى اشترى علبه سجاير

ايه ده انت طلعت بتعرف تنطق كلمة اسمها مبادئ اهو .. وكمان بتقول متمسك بيها .. هى فين المبادئ اللى عندك دى ؟

يعنى متجوز واحدة وعايش فى شقتها

امك بتصرف عليك

عندك استعداد تجرى على اى واحدة معاها فلوس فى سبيل انها تصرف عليك

عندك استعداد تشتغل فى اى حاجه وكل حاجه حتى لو غير شرعية المهم انك مش هتتعب وهتلاقى فلوس

وجاى تقولى عندك مبادئ .. حقيقى اللى اختشوا ماتو ..جتك الارف

انا شوفت قبل كدا اللى بياخد من بنت فلوس ومش يرجعها

واللى بيضحك على بنت علشان تجيب له هدايا ولما يشوف واحدة تجيب هدايا اغلى بيروح لها

لكن تناحة وسخافة واستنطاع وقلة ادب كدا فى الحقيقة عمرى ما شوفت ولا قابلت

وطبعا بعد الكلمتين دول كان لازم اجرى قبل ما كانت تصعد روحى لبارئها

تعليقات

‏قال عمو عصام…
فى إحدى المرات تعاملت مع مموله جاءت لتسدد ضريبة المرتبات عن عملها خارج مصر وجاء معها زوجها الذى كان يسبها بأبيها وأمها أمام الناس رغم عملها كمدرسه وعندما سأله حضرتك هتدفع ضريبه أجاب ببساطه (أنا مش بشتغل أصلا أنا مسافر معاها محرم)ويبدو ياصديقتى أن هذا النوع من الحيوانات(مع خالص إعتذارى للحيوانات) منتشر بأكثر مما نتخيل ولا أحد يعلم سر سكوت المرأه على هذه البلاوى وهو السكوت الذى يشجع هذه الحيوانات على همجيتها
‏قال على باب الله
يا طولة بالك يا قطة

: أنا لو منك كنت قلتله

" أمك في العِش و لا طارت ؟ "
‏قال ^ H@fSS@^
اه يانا يا قلبي
ايه المرار
ده
قال يقولك ضل راجل و لا ضل حيطة
لا والله الحيطو احسن
‏قال karim
طول عمرى معجب جداا بالراجل الى يكون جوز الست,ههههه بس صاحبنا دة كمان كدة و كمان ندل مش يحمد ربنا ,دة نهايتة مش حلوة خالص, استر يارب
‏قال غير معرف…
وااااهاهاهاها...ماهي لازم تضرب بوز, و لازم بالأخص بوزه هو النطع ده
‏قال غير معرف…
دا اخر اللى ما ليحمدش ربنا دا فيه غيره مش عارف حتى يخطب
ان الشكر يجلب مزيد من النعمة
صحيح رجالة اخر زمن
‏قال Sahran
قطتي العزيزة

ما هوا أخينا برضو من اللي بيعتبروا الزوجة بأنها المطية التي أباح الله له ركوبها وقتما شاء وكيفما شاء ,
وللأسف هم ما بيعرفوا شو معنى العلاقة الإنسانية الجميلة , والمسألة بالنسبة لهم مجرد استثمار بشع


تحيااااااااااااتي لك


ودمت سالمة
‏قال Unknown
اهلا و سهلا بيكي في عالم الواقع
:)
دي الشريحة الأكبر دلوقتي في مصر
من الشباب
و انا اختبرت دة بنفسي ..!!
فماتستغربيش
عشان هي دي مصر يا قطة !!
‏قال الصلاة عماد الدين…
السلام عليكم و رحمة الله و بركاته

أهم ما في الرجل أن يكون مسلم بمعنى الكلمة ، فالمرأة تقدر الرجل المصلي المحافظ على تعاليم الإسلام ،فهي يمكنها أن تسامح في أي شئ إلا إهمال الرجل في دينه و العياذ بالله .

فهنا أعرف أحد النساء المسلمات تقدم لخطبتها شاب يملك شركة إستيراد و تصدير و غني جدا و يصرف عليها ببذخ .

و لكنه و العياذ بالله لا يصلي فنهرته، فكان يتكاسل في آداء فرض الله ،و لم تره يصلي الفجر و لا مرة في الجامع ، هذه الأخت الفاضلة إشتكت إلى أهلها بعد شهر واحد من الزواج و كانت حامل فعاتبه أهلها و طلبوا منه الإنتظام في الصلاة و إلا يعتبر عقد النكاح مفسوخ من تلقاء نفسه و تحرم عليه الفتاه لأنه يعتبر في عداد الكفار و لا يجوز له التمتع بها ، فقام أهل الفتاة بطرده من فيلته التي إشتراها للعروسة مع الإستعانة بنفر من الإخوة لأنها حاضنة ، و عرض هذا المنافق أموال طائلة عليهم للعودة لعروسه و لكن أهلها رفضوا كل العروض لأنه كافر ، و القضايا مازالت في المحاكم ..

أما صديقك هذا يا قطة فطالما أنه مصلي و مسلم تقي فعلى زوجته الصبر عليه ، و بالنسبة لتأخيره ليلا ، فهو يجب أن يخبرها ، و يمكن أن يتزوج زوجة أخرى فديننا السمح و يبيح له ذلك .

و طالما أن أمه تؤمن له مصروف البيت فما مشكلة العروس و لماذا تضرب بوز ؟

صدقيني يا أختاه أهم شئ الصلاة ، فعليهم الإثنين الإنتظام في الصلاة فتنتظم كل حياتهم بإذن الله .

فالصلاة تنهى عن الفحشاء و المنكر و البغي
‏قال غير معرف…
عقد النكاح؟؟
دي من اقرف الجمل اللي سمعتها فحياتي.

عامة, كان الله مع الصابرين, و ربنا يصبرنا علي الناس اللي عملت سلطة سياسه و نكاح و حشرت فيها كلمة دين.

صلّوا من أجل السلام الكامل, و المحبه.
‏قال Unknown
الغلطة مش غلطته غلطة وةجته الى محتفظة بوجوده شكل اجتماعي و امه الى لسه بتصرف عليه بعد ما فتح بيت و كون اسره المفروضة انه مسئول عنها و غلطت البنات الى عايزة تجوز و خلاص فترضى بواحد زي ده
بس كويس برضة انك جريتي بعد ما بعترتيه
تحياتي لك و كل سنة و انت طيبة يا قطة
‏قال مواطن مصري
للمرة الثانية: إطلاق أعيرة نارية من الجانب الفلسطيني على الحدود المصرية.. ومصر ترفع درجة التأهب


رفح - أشرف سويلم - اكدت مصادر امنية لمصراوى بأن قوات الامن المصرى على حدود قطاع غزة بحى البراهمة الحدودى قد تعرضت لاطلاق النار من قناصة فلسطيين للمرة الثانية على التوالى.
وقد استهدف قناص فلسطينى من مكان مرتفع على الجانب الفلسطينى قوات الامن المصرى، حيث اطلق عليها عدة اعيرة نارية دون وقوع اصابات، وقد فوجىء رجال الامن المصرى السبت فى حوالى الساعة العاشرة والنصف صباحا باطلاق اعيرة نارية عليهم قادمة من الجانب الفلسطينى بمنطقة حى البراهمة فيما توخت القوات المصرية الحذر وتأهبت لأية عمليات أخرى لاطلاق النار.


http://www.masrawy.com/News/Egypt/Politics/2009/december/19/gaza.aspx

و يقولك عاوزين يفتحو المعبر

من حق مصر حماية حدودها بالطريقة التي تراها مناسبة
‏قال Desert cat
بابا عصام
للأسف يابابى فى ستات تستاهل كل اللى يجرى لها لانها بتحسسه انه لو مش مجود فى حياتها هتموت
وبالتالى بيدوس على كرامتها بقدر الامكان ماهى مش تقدر تبعد عنه
‏قال Desert cat
على باب الله
انا بحب اجيب اخر الناس دى وفى الاخر اقولهم انتوا اخركو تحت جزمة اقل واحدة فى الدنيا
‏قال Desert cat
^ H@fSS@^
ضل مين يا حفوصة
فى الحالة دى الحيطة ليها لازمة عنه
‏قال Desert cat
karim
والله يا كريم من كل قلبى بتمنى للنوعيات دى النهاية المأسوية اصلهم اتعودا على العيش على قفا الست
‏قال Desert cat
Gurren Lagann
انا شايفه بدل من ضرب البوز تضربه بالشوز وتخلص
‏قال Desert cat
Anonymous
وهو ايه جرى له ماهو عايش زى النطع وكمان بيتبطر
‏قال Desert cat
Sahran
بالظبط سهران
موجودة النماذج المقرفة اللى واخدة من الجواز مشروع استثمارى يدر ليهم ربح مش مهم هى مين او ايه الاهم معاها كام
‏قال Desert cat
قهوة بالفانيليا - شيماء علي

طالما دى الشريحة الاكبر فى مصر دلوقتى
يبقى بلاهم خالص وكل واحدة تحتفظ بكرامتها وفلوسها
‏قال Desert cat
الصلاة عماد الدين
اه فعلا الصلاة عماد الدين
بس القصة اللى انت حكيتها دى غبية اوى والزوجة تستاهل ضرب الجزمة مش تستاهل انه يفكر يرجع لها
ايه رايك فى امام المسجد اللى اتجوز واحدة لمجرد انها عندها فلوس وبعد شهر بالظبط من الجواز عقدها فى عيشتها وعلشان يطلقها ابتزها وبهدلدها فى المحاكم هى واهلها ؟
عارف يعنى ايه امام مسجد بيصلى كل الفروض فى وقتها والناس كمان بتصلى وراه
انا مش بعيب على الصلاة
بس النفوس والاخلاق مش ليها علاقة لا بصلاة ولا بصوم وعندك فى رمضان طول ما انت ماشى فى الشاع تلاقى الناس بتخانق فى نفسها وبعدها الخناقة ما تخلص يقولوا لك اللهم انى صائم
‏قال Desert cat
Gurren Lagann
ايوه كانه رايح يشترى جاموسة وبيكتب بيها عقد
‏قال Desert cat
malika
انا فعلا فى الحالات دى مليكة مش بلوم غير على اللى قابله الاهانة وراضية بيها بالرغم من ان كل الحلول فى ايديهاالدنيا مش بتقف لفراق انسان او موته
تحياتى يا جميلة
‏قال Desert cat
مواطن مصرى
مستنى ايه منهم ؟
طالما موجود بينا اللى يبرر لهم لطاتهم وكمان يصوت ويعيط على اطفالهم ولما قتلوا الرائد ياسر فريج قالوا يستاهل اصله منعهم يدخلوا مصر على اساس انها عمارة من غير بواب

المشاركات الشائعة