لما كل هذا النواح ؟؟

حظرت سويسرا بناء المآذن نتيجة لتصويت الأغلبية .. طيب وايه المشكلة ؟؟ وايه الداعى اصلاً للنواح والتباكى والغضب المزيف اللى فى المواقع الاخبارية ده ؟ وطلعت من جديد نظرية المؤامرة ضد العرب والمسلمين والحقد على الإسلام مع ان سويسرا فيها اكتر

من 30000 مسلم مش عارفه هيحقدوا ازاى على الاسلام والمسلمين وسيابين العدد الهائل ده عندهم بيشتغل حتى لو مش بيشتغل بياخد بدل بطالة وبياكل وبيشرب وعايش حياته عادى يعنى .. طيب ايه الضير فى حظر بناء المآذن اذا كان ربنا جعل الأرض مسجدا وطهورا ؟

ايه الضير فى حظر بناء المآذن اذا كانت المآذنة مجرد شكل معمارى ويوجد فى مصر مئات المساجد دون مآذن ؟

ايه الضير فى عدم بناء المآذن اذا كان فى ميكرفون فى وقت الصلاة بيخرم ودن الجميع يعنى مفيش مؤذن بيطلع فوق المآذنة ويرفع الصلاة ولا حاجه ؟

ايه الضير فى حظر بناء المآذن والقانون مش قال نهدم المآذن القديمة مثلاً ولا عدم بناء مساجد جديدة ؟

وبعدين حظر المآذن ده جه فين فى سويسرا ؟ طيب دى بلد وليها قوانينها وهى حرة تبنى مآذن تهدم مآذن كل واحد حر فى قوانين بلده .. ولا تكونوش فاكرينهم زينا بالرغم من وجود قانون يجرم السرقة وبالرغم من كدا البلد مليانة حرامية ده انت بتبقى راكب مواصلة ومحفتك تتسرق ولا الست ماشية فى الشارع وشنطتها تتشد منها .. حتى الأطفال مش سايبينهم بيسرقوا موبيالاتهم بعد ما يثبتوهم طفل وفى عينه مطوة هيعمل ايه يعنى الطبيعى انه يسلم الموبايل للكابتن الحرامى والاتنين جنيه اللى واخدهم مصروف وان كان فى شنطته كمان سندوتش مربى مفيش مانع البلطجى اللى ثبته ياخده بالمرة يمكن جعان .. بالرغم من ان القاتل بياخد اعدام برضه جرائم القتل فى زيادة مطردة واحكام الاعدام شغالة وبالرغم من كدا مفيش حاجه اسمها التزام بقانون .. اللى قاعد فى اى بلد اوربى وحاسس باضطهاد ومش عجباه قوانينها بدل يتعامل بهمجية ويلم له خمسة ستة من اصحابه ويعملوا مظاهرة وعايز البلد تطبق القانون اللى على مزاجه يرجع لاحضان بلده اللى برضه مش بتعمل حاجه على مزاجه .. واللى فى بلد عربى وقاعد يتباكى ما يطبق الاسلام العملى يعنى لا يكدب ولا يغش يصل الرحم يبطل يتحرش بالبنات والستات ويتقى ربنا فى افعاله ووقتها هيثبت للعالم كله ان ده الاسلام الصحيح مش الهمجية والارهاب وتفجير المدارس وجلد البنات على لبسهم والتحرش بالبنات بحجة ان لبسها مش عاجبة ولو لبسها كويس يقولك اصل طريقة مشيتها على اساس انه موكل بمحاسبة الناس فى الارض

تعليقات

‏قال غير معرف…
هذا مايستحق النواح
أكدت 16 منظمة حقوقية مصرية في تقرير مشترك نشر يوم الخميس أن مصر باتت "دولة بوليسية" تلعب الأجهزة الأمنية فيها "دورا محوريا في جميع مناحي الحياة".

وقال التقرير الصادر عن المنظمات ال 16 أنه "لا يمكن النظر إلى أوضاع حقوق الإنسان في مصر بشكل منفصل عن حزمة القوانين والسياسات والممارسات بل إن الملمح الأساسي لوضع حقوق الإنسان في مصر اليوم هو سيادة نمط متكامل من الاستثناء والانتهاكات في ظل مناخ من الحصانة تم إنشاؤه وتعميمه بشكل عمدي على مدار عدة عقود".

وأضاف التقرير أنه "في ظل سياسة الاستثناء هذه توسعت سلطات الأجهزة الأمنية حتى أصبحت مصر دولة بوليسية ، فإلى جانب الانتهاكات المباشرة التي ترتكبها أجهزة الأمن ضد المواطنين والتي يفلت مرتكبوها في الأغلب الأعم من العقاب ، أصبحت الأجهزة الأمنية تلعب دورا محوريا في كافة مناحي الحياة العامة".

وأكد التقرير أن "الأمر لم يعد يقتصر على تدخل الأجهزة الأمنية في شؤون المؤسسات السياسية أو الأهلية أو التعليمية أو الدينية أو الإعلامية إنما امتد أيضا إلى تعطيل تنفيذ أحكام القضاء في الكثير من الحالات".
‏قال غير معرف…
وتزامن نشر التقرير مع صدور بيان عن الشبكة العربية لمعلومات حقوق الإنسان يدين القبض من قبل قوات الأمن المصرية قبيل صلاة عيد الأضحى الجمعة الماضي على طالبة جامعية في مدينة الزقازيق تدعي آية محمد عيد بعد أن رفضت انصياع شقيقها الأصغر لضباط الشرطة الذين طلبوا منه خلع "حطة فلسطينية" كان يرتديها.
‏قال غير معرف…
وتضمن التقرير "تقييما لمدى وفاء الحكومة المصرية بالتزاماتها" في ما يتعلق بحقوق الإنسان واستعرض "الانتهاكات" التي ارتكبت في ستة مجالات وهي "الحق في الحياة والحرية والأمان الشخصي"، و"إدارة العدالة وحكم القانون"، و"حريات الدين والمعتقد والرأي والتعبير والتنظيم والمشاركة العامة"، و"الحقوق الاقتصادية والاجتماعية"، و"حقوق النساء"، و"حقوق اللاجئين وطالبي اللجوء".

واعتبر التقرير المقدم إلى مجلس الأمم المتحدة لحقوق الإنسان أنه "ليست هناك حماية للمصريين من التعذيب الذي يمارس بشكل منهجي وروتيني يوميا في أقسام الشرطة ومقار مباحث أمن الدولة".

وفي ما يتعلق ب "إدارة العدالة وحكم القانون"، قال التقرير إن "النظام القضائي المصري يحفل بأشكال مختلفة من انتهاك معايير المحاكمات المنصفة وضمانات استقلال القضاء" ، مشيرا إلى أن "الاستمرار المتواصل للعمل بقانون الطوارئ منذ 6 أكتوبر 1981 أدى إلى الإهدار الفعلي لقيم دولة القانون والمساواة أمام القضاء".

وانتقد التقرير "التعديلات الدستورية التي دفعت بها الحكومة في عام 2007" ، مؤكدا أنها "أضفت حماية دستورية على الالتفاف على القضاء الطبيعي وإنشاء نظام دائم موازٍ له لإجراء محاكمات لا ترغب الدولة في إجرائها أمام القضاء الطبيعي إذ جرت إضافة المادة 179 إلى نصوص الدستور التي أصبحت تكفل لرئيس الجمهورية إحالة المتهمين في قضايا الإرهاب إلى (أية جهة قضاء منصوص عليها في الدستور أو القانون) ، في تكريس لمبدأ القضاء الاستثنائي".

واعتبر التقرير أن "الحكومة المصرية استمرت في انتهاك استقلال القضاء بأشكال مختلفة تشمل تحكم السلطة التنفيذية في إجراءات تعيين وتأديب وندب وإعارة وتدريب وإجازات القضاة وكذلك تبعية إدارات الإشراف القضائي لوزارة العدل وما يمثله ذلك من نفوذ للسلطة التنفيذية على القضاة ووكلاء النيابة".

وأكدت المنظمات الحقوقية "استمرار تراجع أوضاع حرية الدين والمعتقد خلال العقود الماضية" واستمرار "السياسات التي تكرس التمييز على أساس الدين أو المعتقد ، خاصة التمييز ضد الأقباط الذين يشكلون نسبة تترواح بين 8-10% من سكان البلاد".

وقالت المنظمات أن "أبرز أشكال التمييز في ذلك الصدد تلك المتعلقة بحرية ممارسة الشعائر الدينية والحق في إنشاء وترميم الكنائس ، والقيود المفروضة على الحق في اختيار أو تغيير الدين أو المعتقد".

وأكد التقرير أن "الحكومة ارتكبت في عام 2008 انتهاكا خطيرا للقانون الدولي حين قامت بترحيل ما يقرب من 1400 من اللاجئين وطالبي اللجوء من الإريتريين والسودانيين إلى بلادهم رغم أن حياتهم معرضة للخطر في بلادهم".
‏قال عمو عصام العجوز…
أنا ضد منع المآذن ماداكت ملتزمه بالإرتفاعات المسموح بهاوأرجو أن تتحملى رأيى بديمقراطيه ولكنى أهمس فى أذن الغاضبين بأن يتابعوا مايحدث فى مصر من الثوره التى تحدث عند بناء أو تجديد كنيسه أو حتى ترميم سلم كنيسه متهالك أو ترميم حمام ويكفى أن كثير من المنازل تم هدمها لمجرد شائعه بأنها كنائس رغم الرسوم الهندسيه التى تقطع بأنها بيوت ضيقه وياليتنا نستيع بناء كنيسه بلا مناره ولا قبه ولا صليب بدلا من الصلاه على المتوفين فى الشوارع وملحوظه للجميع المآذن والمنارات لاعلاقه لها بالدين وإنما هى طرز معماريه مستوحاه من المسلات..وربنا يهدى
‏قال ITHat
بصي انا رأيي بصراحه و من غير زعل ان موضوع الاستفتاء فيه كثير من الظلم للمسلمين .. لعده اسباب ..
- اولا لا يصح القول ان اللي مش عاجباه البلد دي يمشي المفروض ان الغرب ينادي بالحرية و المساواه بغض النظر عن الجنس و الدين و القوميه و المهلبيه .. فأين هذه المساواه .. يعني في مصر ممكن يكون فيه صعوبه في بناء الكنائس و الاتحاد الاووربي و بتوع الحريات مش ساكتين و كذلك امريكا
- ثانيا حتي لو افترضنا ان اللي مش عاجبه يمشي طيب المسلمين اللي هم اصلا مولودين سوسريين دول يروحو فين و هم سوسريين ابا و اما و المفروض انهم مواطنين من الدرجه الاولي و بعضهم لا يعرف غير البلدي بلد اخري ..
- ثالثا ان الاستفتاء ده غريب جدااااا ده استفتاء للاغلبيه علي الاقليه ..يعني بالظبط ده لو الحكومه في مصر قررت تعمل استفتاء (مش مزور طبعا)بتغيير شكل الكنيسه المسحيه الي بدون الصليب و العمدان الكبيره ؟!! طيب و حنا مالنا كمسلمين بشكل البناء المسيحي .. زي المسحيين اللي مش عاجبهم شكل الجامع ..
الموضوع كله زفت في زفت واضطهاد في اضطهاد بس لما في مصر يمنعو النقاب بغض النظر عن رأيي أو رأي غيري و محدش يمنع البكيني يبقي لازم فرنسشا تمنع الحجاب اصلا و بعد كده سويسرا تمنع مش عارف ايه و بيقولو فرنسا ان الاستطلاعات العامه عاوزه تعمل زي سويسرا و غيرهم من اوروبا..
و ربنا يستر علينا احنا بقينا اصلا كعرب او مسلمين غير مرحب بنا في اي مكان ..

انتي عارفه ان فيه محكمه في كوريا حكمت بالتعويض لواحد هندي علشان حد قاله يا عربي ...
‏قال عمو عصام…
برجاءالدخول على هذا الرابط لمعرفة أن كل الرموز الدينيه ممنوعه وليس الإسلاميه فقط فقد منعت المحكمه الأوروبيه تعليق الصلبان على حوائط المدارس منعا لإيذاء شعور غير المسيحيين وليتنا نتعلم كيف عارضوا القرار بالطعن عليه فى صمت ودون ضجيج إعلامى فقد أعلن الفاتيكان تأييده لوزارة التعليم الإيطاليه فى طعنها ولم نسمع عن شكوى من الإضطهادأو إتهام القاضى بالكفر والزندقه وشخصيا أؤيد قرار المحكمه بالمنع لأن هناك أطفال ليسوا مسيحيين ومن حق ذويهم أن يتذمروا من تعليق رمز دينى مسيحى دون باقى الرموز لأن ذلك يعد مهينا لباقى الأديان فلكل منا الحق فى الفخر بدينه ولكن دون تسفيه ديانات الآخرين..وإليكم الرابط بالإضافه لإمكانية متابعة الموضوع على http://www.coptreal.com/WShowSubject.aspx?SID=26599آلاف المواقع عن طريق جوجل
‏قال Ehab Fayez
ما موقف هؤلاء النائحون والباكون من القوانين المصرية التى تمنع بناء الكنائس أو حتى ترميم دورة مياة بكنيسة إلا بموافقة جهات سيادية
لماذا لم نسمع نواحهم من قبل على أشقائهم فى الوطن الذين يحجر على حقهم فى ممارسة شعائرهم
‏قال غير معرف…
هذا مايستحق النواح
تصريخات مسؤول اميركى كبير هو ريتشارد ارميتاج
قرات روايات نجيب محفوظ وعرفت مقدار ما يتمتع به المصريون من روح الفكاهه والصبر
والمعاناه
ولكن عند لحظه معينه يختفى الضحك وينفد الصبر واعتقد ان هذه اللحظه اقتربت خاصة بعد تحول مركز الثقل من القاهره الرى الرياض
من مقابله مع موقع بريزم
Reading he recommends, and why: "Have you read the novels of Naguib Mahfouz? They're great, and through them all you get a couple of things, I think. First, the good humor of Egyptians; they have enormous good humor. Second, patience and long suffering, but you realize that at some point in time you can't joke something away. You can't outwait it. I would be afraid the tipping point is going to come, and particularly now that the strategic center of gravity in the Middle East has shifted to Riyadh and away from Cairo."
‏قال Sahran
قطتي العزيزة

للمئذنة قصة مضحكة في الإسلام وهي أن الله سوف يغفر للمؤذن أكثر كلما سمعه عدد أكبر من الناس , ولذلك لا تستبعدي بكرة يجيبوا سماعات ستيريو ديجيتال من اللي صوتها يلم التايهين , وطبعا ستجدي من المهللين لتلك الأفكار العظيمة التي سوف تنشر الإسلام وتعلي رايته فوق الأمم

يعني هيك سويسرا منعت دراويشنا المؤذنين في هذا البلد من نيل الأجر والثواب ولن يضطر ملائكة الرحمن لعمل القياسات المسحية لحساب المساحة التي انتشر فيها صوت مؤذننا المجعراتي


تحياااااااااااتي لك


ودمت سالمة
بلدهم وهما حرين فيها يسمحوا أو يمنعوا بالماذن هما أحرار لأنها بلدهم
ويارب أعيش فى سويسرا
‏قال ^ H@fSS@^
عشان احنا نحب جنازة و نشبع فيها لطم
والله ما عارفة اقولك ايه
احنا وصلنا لمستوى احض من الحضيض لعى معايرنا المزدوجة و تدخلنا في شؤون دولة اخرى و كمان محاسبتنا ليها بكل جبروت و عين فاجرة
انا خلاااااااااااااااص
زهقت
‏قال karim
والل صح الصح انا لسة كنت بتكلم فى الموضوع دة من يومين كل دولة ليها شئونها وقوانينها المهم انهم مش بيدايقوا المسلمين فى شىء ماذنة بقى ولا لا مش مهم المهم فى جامع واللة ناس غريبة بجد وفاضية واعتقد ان هذة الازمات نتكبرة عن عمد علشان الناس تنسى اللى حصل من اخداان على القفا لبلدنا فى السودان و الجزائر علشان يهدوا الامور ولاحظى و هاتشوفى, تحياتى
‏قال على باب الله
نتهم العالم كله أنه يكيل بمكيالين مع أننا أحنا اللي بدعنا الغش في الميزان أصلاً

قبل ما نتحمق قوي كده على مسلمي سويسرا اللي واخدين حثوثهم تالت و متلت ... نبص على قانون توحيد بناء دور العبادة في مصر اللي محدش في مجلس الشعب راضي يقرب له من خمسين سنة
‏قال غير معرف…
سبب حقيقى للنواح فى مصر
مسؤولون يتورطون فتدفع مصر ملايين تعويضات لهم منها قد ايه عموله الله اعلم
بعد13 عاما من المحاكم والقضايا والخلافات محليا ودوليا توصلت حكومتنا الرشيدة إلي اتفاق مع رجل الأعمال المصري الايطالي متعدد الجنسيات وجيه سياج صاحب القضية الشهيرة في أرض طابا.. حصل سياج من حكومة مصر بمقتضي هذا الاتفاق علي تعويض قدره74 مليون دولار أي أكثر من400 مليون جنيه . و التانية آه : وحدد مركز «أكسيد» الثامن من يناير موعدا لتلقى الرد المصرى على المذكرة الأولى التى تقدمت بها شركة «ماليكورب» البريطانية فى دعواها ضد الحكومة، التى تطالب فيها بتعويض قدره ٥١٨ مليون دولار عن سحب مشروع إنشاء مطار رأس سدر عام ٢٠٠١. و التالته آآآآآآآآه يا دماغى . كل ده و غيرة كتير و ما فيش حد حاسب حد !!!!!!
‏قال حقى اهرتل
هوه طريقة نظرتك للموضوع غريبه بس المشكله ان دايما البدايه بتكون حاجه صغيره بعد كده ممكن يعملوا استفتاء ويهدوا المساجد الموجوده
‏قال غير معرف…
كان يجب عليك ان تترك هذه الكلمات ليقولها غير المسلمين فمن الواضح ايضا انك لا تعرف قيمة الماذنة في اي مكان على الارض وليس في بلد له قانون كما ذكرت فاعلم انه يهمني جداً ان تكون الماذن في سويسرا و فلسطين وامريكا والهند والصين و في اي مكان على الارض بقي ان تعرف ان المسلم في مثل هذه البلاد اذا سال عن المسجد ربما لا يدله احد ربما لا يعرف احد المسجد من المنزل لكن بالمئذنة يمكننا ان نهتدي يمكن ان يشعر غير المسلمين بعظمة الاسلام فيمكن للمئذنة ان تخاطبهم حتى يمكننا نحن ان نتذكر اذا نسينا ان الاسلام يبقى للابد eslamalanany
‏قال انا الحكومه
والله كلام 10 على 10 بس اللى يفهمه !

أغلب اعرب للأسف حافظين مش فاهمين
‏قال Hatem-Afandi
أوافق علي كلامك مائه بالمائه. أتمني أن يكون الجيل الجديد فى مصر متمتعا بهذا القدر من الموضوعيه والعقلانيه.
‏قال Desert cat
Anonymous
هو انا ضد اى انتهاكات تمارس ضد اى شخص لكن احنا مصريين واذا كان انتمائها لفلسطين يبقى تروح تعيش هناك هى واخواها
‏قال Desert cat
بابي عصام
رايك طبعا انت حر فيه تماما والطبيعى انى اتقبله
لكن المآذن زى ما حضرتك ذكرت عبارة عن شكل هندسى ثم عدم وجودها مش هيمنع ان ربنا يتقبل الصلاة من عدمه

تحياتى
‏قال Desert cat
ITHat
اولا الاستفتاء ديموقراطى جدا وطالما فى استفتاء وده راى الاغلبيه يبقى البد اللى بتتكلم عليه فعلا ديموقراطى .. ثم معلشى هو يعنى ان الغرب ديموقراطى نستغل احنا ديموقراطية دى ونروح نفرض عليم قوانين مش بتاعتهم خالص ولما يعترضوا نقولهم امال فين الديوقراطية ؟؟ يعنى انت بتشتغل فى مكان بقالك 30سنة مثلا وجاى موظف جديد لسه اول يوم ليه فى الشغل واتعين مدير عليك ولما تطالب بحقك يرد هو يقولك الله امال فين الديموقراطية اللى انت بتتكلم عليها دى ؟؟

بالنسبة لعدم ترميم الكنائس فى مصر حتى مش بنائها اوربا وامريكا قالبه الدنيا عليه ازاى ؟؟؟ بدليل ان قانون توحيد دور العبادة الورق بتاعه تآكل فى مجلس الشعب ؟؟ دى لو امريكا فكرت تتدخل كان زمان القانون سارى من سنين .. الموضوعية حلوة برضه والتفير العقلانى بيحمى من كوارث كتير
بالنسبة بقا لمسلمى سوسرا نفسهم بيقولوا لكو سيبونا فى حالنا حنا كدا مبسوطين اوى . اه والله واقرا حتى حوارات مسلمى سويسرا على المواقع الاخبارية وانت تتاكد بنفسك
‏قال Desert cat
بابا عصام
احنا الغوغائية عندنا مزاج ده انا بنتلكك لنفسنا علشان نعمل حالة هرج ومرج والله انا شايفه بعد الغباء اللى بيحصل ده دول اوربا ليها كل الحق انها تخاف من من اى حد ملامحه عربية
عايزة اقولك ان مخرج 2012 خاف يشير لاى رمز اسلامى فى فيلمه خوفا من صدور فتوى ضده
يعنى الارهاب الفكرى كمان بقى ثمة العصر
‏قال Desert cat
Ehab Fayez
انت بتقول ايه بس يا ايهاب ده اللى بيفكر يصلى فى بيته بيولع في الحى بتاعه باكمله
يبقى عايزهم ينوحوا على شركاء الوطن
‏قال Desert cat
Anonymous
تقريبا دول الخليج بتحقق ما تتمناه بالتدريج فى ظل الصراعات الداخلية فى مصر ومحدش حاسس ولا فايق المهم الكرسى
‏قال Desert cat
Sahran
اساسا دول الغرب مفيهاش آذان
حتى فى البلاد اللى فيها آذان المؤذن مش بيصعد فو المآذنة ولا حاجه
بس هما يخلصوا النية لله ويتعاملوا بادب وربنا يتقبل صلاتهم حتى لو فى الشارع
‏قال Desert cat
أنت عارفنى وأنا عارفك
ازاى تقول كدا
ده احنا لازم نتحكم فى بلدهم وفى حياتهم كلها
احنا منزهين عن الاخطاء ومفوضين من رب العالمين نتحكم فى البشرية كلها
‏قال Desert cat
^ H@fSS@^
انا مش اق منك ذهول يا حفصة باى حق الناس تتدخل وكل واحد قاعد يفت من ناحية ومتناسيين البلاوى الل عندهم فى الداخل
ده منتهى الجنان بجد
ربنا يرحمنا
تحياتى
‏قال Desert cat
karim
اه يا كريم انا قاعدة اتابع تصريحات مبارك بعد ما كان بيقول انا متضايق زيكو بالظبط دلوقتى بيقولك الجزائر ومصر دولتان علاقتهم قوية ولا يمكن ابدا الته تكون مباراة كرة سبب فى الخصومة يا ختشى عسل بجد
واحنا بقى نتفلق
‏قال Desert cat
على باب الله
ده بيقولولالك هى فين الديموقراطية دى على اساس انا مدين كل الناس حقها علشان نحاسب غيرنا
‏قال Desert cat
Anonymous
ولا حد هيحاسب حد طالما كل ورطة الحكومة تقع فيها يتفننوا ى فرض ضرايب الناس تقول اشمعنا انا اللى هعترض يعنى لازم ادفع
‏قال Desert cat
حقى اهرتل
والله هما بيعلموا استفتاء ويهدوا احنا مانعيي ناس تصلى حتى فى بيوتها دون اى استفتاء ولا اى وجه حق وبنرح نولع فى بيوتهم
‏قال Desert cat
Anonymous
وت لما بتمشى ى شارع فى مصر وتلاق مسجد اسفل عمارة مش بتعرف اذا كان ده مسجد ولا لاء ؟؟ اذا كنت مش بتعرفه يبقى قصور الفهم ده مش بيعانى منه كل الناس علشان تعممه .. وطالما بتدى نفسك الحق لبناء المآذن والمساجد فى سويسرا وامريكا وفلسطين والدنيا كلها ؟ ليه بتحجر على غيرك اختيار عقيدته وبناء دار عباده لمجرد انه مختلف فى الدين مع انه شريك فى الوطن زيك زيه تماما ؟؟
‏قال Desert cat
انا الحكومه
الناس فاهمن ان الماذنة دى هى اللى بتوصل الصلاة لربنا باين
:))
‏قال Desert cat
Hatem-Afandi
هو يختفى طيور الظلام المنتفعين اللى لابسين باية الدين ومر هيطل منها اجيال كويسة جدا
تحياتى
‏قال ITHat
طبعا انا سعيد جدا برأيك و عارف برضه ان كلامنا ده للاسف لن يفيد احد .. غير انه دردشه بس ..
انا مش دارس قانون لكن لو عملنا استفتاء عن مثلا مش حقول المسيحيين خلينا اليهود مثلا اننا نمنعهم من الصلاه او مثلا نخليهم يصلو في بيوت عاديه مش زي اللي عما عاوزينه او نطردهم من البلد .. محنا بلد اسلامي و اللي مش عاجبه يشرب من البحر علي الرغم انهم مصريين زينا بالظبط .. اعتقد ان ده غير قانوني لاننا كده بنستقوي عليهم بأغلبيتنا .. يعني ينفع مثلا الاغلبيه في مجلس الشعب و هي حزب وطني تعمل مشروع قرار بطرد المعارضه الاقليه او تخليهم يقعدو علي الارض مثلا .. لو عملت ده حيكون اغلبيه و ديمقراطي بس ده صح ..
يعيني ينفع نقول المسيحيين يبنو الكنايس بدون صليب او الشكل المعروف .. لو عملنا ده الناس كلها حتروح و من غير تزوير لانه يصب في الناحيه الدينيه للاغلبيه و الناس حتتصور انه نصر لدينها و العكس بالعكس ..
فيه حاجات لايصح اخذها بهذا الشكل اسمها حقوق الاقليات ..و لا ايه
و بعدين موضوع بناء و ترميم الكنائس اغلب الناس العاقله شايفه انه عادي بس التعقيدات او التابو هات الله اعلم لكن نحن دول عالم ثالث و عاشر اما سويسرا المفروض انها دوله متقدمه و حمي الاقليات ..
و علي فكره مش شرط ان كلامنا حيأثر في الناس في سيويسرا و ينكد عليهم علي اي حال الناس هناك اوضاعهم احسن من هنا
و شكرا يا قطه علي سعة صدرك
‏قال Desert cat
ITHat
تعرف لو الكلام ده انت بتقوله من 30سنة فاتت ؟ كنت قولت لك لو فى يهودى حب يمارس طقوسه حتى فى الشارع كل الناس حتوافق مسلمين ومسيحيين ويهود ولو واحد كان هيعترض
لكن فى الوقت وجاى تقولى استفتاء
وفى مصر ؟؟
يعنى بعد كل الهمجية اللى فى البلد دى وجاى تقولى استفتاء ؟
ده الناس بتصلى الجمعة وتخرج تحدف طوب فى المسيحيين وتهدم عليهم بيوتهم ؟؟ هى سيوسرا عملت كدا مع المسلمين ؟؟
البهائيين لمجرد انهم قالوا انهم بهائيين اتولع فيهو وفى اطفالهم وخرجو من بيوتهم حافيين ؟ هى سويسرا عملت كدا ؟
انت بتقارن ايه بايه بس
‏قال ITHat
مهو علشان كده احنا اسمنا عالم ثالث و عاشر كمان يعني متخلف مش اقتصاديا بس لا و فكريا و حضاريا ..
و هو دول متقدمه .. اللي اقصده انهم بحاولو يقيدو المسلمين هناك لانهم اقلية زي اللي بيحصل هنا مع البهائيين و بناء الكنائس ..
بس احنا يمكن فيه تصرفات عاطفيه و شوية همجيه .. يعني الناس عاوزه تنفذ باديها ..
هناك فيه تطاول بالشتيمه و قليل بالايد .. لكن بقي فيه توجهات حكوميه برضه و ده الجديد .. يعني ساركوزي رئيس فرنسا اللي منع الحجاب في المدارس (او المظاهر الدينة كلها ) النهارده شايف سويسرا صح . و ان اللي زعلان مش فاهم ..

يعني من الاخر معاملة الاقليات بقت زفت في كل مكان .. كل دوله بطريقتها ..و ده و الله مش دفاع عن البلد هنا بس المقصد ان ده اللي بيقولو عليه صراع الحضارات ..

المشاركات الشائعة