خلف الأبواب المغلقة

منذ ما يقرب من العام تقابلنا فى أحد الأماكن العامة صدفة وهى التى كانت زميلة دراسة وانقطعت اخبارنا بانشغالنا فى ظروف الحياة .. جلسنا نتبادل اطراف الحديث وما ان سالتها عن اخبارها الا وجلست تحكى عن خطيبها الذى اشعرتنى بان كل ما مضى من حياتها كأن لم يكن حيث انها لم تذكر شيئ قط من كل الايام الماضية الا انها بدات بيوم خطوبتها وكانه كان يوم ميلادها .. كنت سعيدة جدا بكلامها وانه الشخص الذى دعت الله ان يرزقها به ولقد استجاب الله لدعواها حيث وهبها الله اكثر من ذلك فهم متطابقين حتى فى تاريخ الميلاد نفس اليوم ونفس الشهر ونفس السنة بل ظروفهم ايضا فهو الولد الوحيد لاسرته وهى البنت الوحيدة لاسرتها .. وطوال حديثها عنه وذكره محاسنة وصفاته وانا اردد الله يتمم لك على خير .. هبت علينا كإعصار جوستاف دون مقدمات او سابق انذار وسلمت عليها بكل برود .. ثم تبعتها بسؤال هو مين اللى بيقعد معاكى فى البلكونة ده .. ردت بكل سعادة خطيبى .. هو انتى متعرفيش انى اتخطبت ولا ايه ؟؟ ردت عليها بلامبالاة اه سمعت .. سمعتى ازاى اذا كنا عزمناكو ومامتك حضرت واستغربت انك مش جيتى .. قاطعتها بصى هو انتى مكتوب كتابكو ..قالت لها لاء كتب الكتاب هيبقى مع الفرح ان شاء الله .. ردت عليها باقتضاب .. امال ازاى تسمحى لنفسك تقعدى معاه فى البلكونة لوحدكو .. هو انتى مش تعرفى ان كدا عيب وحرام .. كل اللى فات وانا قاعدة متابعة فقط دون ان انطق بكلمة .. لكن ما ان نطقت جملتها الاخيرة الا وتدخلت .. طيب معلشى هو انتى اسمك ايه فى الاول قبل ما اتكلم اصلك دخلتى علينا كدا من غير احم ولا دستور وكانك فاتحة للبنت محضر .. ردت دون اهتمام سمر الدكتورة سمر .. قولت لها اه تشرفنا .. بصى يا سمر وتعمدت ان انطق اسمها دون القاب .. انتى بنفسك بتقولى انك بتشوفيهم قاعدين فى البلكونة .. وده معناه انهم بيقعدوا قدام اهلها .. لاء ده قدام الشارع كله كمان اصل انتى بتشوفيهم ازاى ؟ ردت بانفعال على فكرة انتى بتتكلمى غلط .. قولت لها وجبتى منين انك انتى اللى صح اذا كان مفيش حقيقة مطلقة غير الموت .. ردت باستنكار بلاش فلسفة فارغة .. اندهشت من طريقتها فى الكلام التى لا ترقى ان تكون طريقة شرشوحة من العشوائيات لا دكتورة .. انا بستند للقران كتاب ربنا قال ولا تتخذن اخدان وهى كدا بتتخذ اخدان لانه مش جوزها .. قولت لها بصرف النظر عن طريقة كلامك اللى مش حلوة بس هعديها وخلينى معاكى .. ده واحد دخل بيتها وخطبها ودبلته فى صباعها وبيقعد معاها قدام اهلها وبتقولى انها كدا متخذه اخدان .. امال اللى بتقف على الكورنيش لازقة فى واحد لا خطيبها ولا من باقى عيلتها دى اسمها ايه ؟؟ امال اللى بتخلى اهلها مسافرين وتتصل بصاحبها يجى لها البيت دى اسمها ايه ؟؟ ردت وياريتها ما ردت اللى بتعمل اللى انتى بتقولى عليه ده افضل منها عند الله اصلها مش جاهرت بالمعصية .. هو انتى قولتى لى انتى دكتورة ايه ؟؟ ردت انها دكتورة بيطرية .. رديت عليها كان الله فى عون البهايم اللى بتعالجيهم لو يقدروا يتكلموا كانوا رفضوا ايدك تتمد لهم .. بدات فى الصراخ وصديقتنا اللى كان عليها الكلام واقفه لم تتمالك نفسها من الضحك وما ان سمعتها تصرخ بقال الله وقال الرسولحتى قاطعتها لو شوفت فى عيون اخوك قشة فالاولى بيك انك تشيل الشجرة اللى فى عينك علشان تعرف تشيل القشة اللى فى عين اخوك .. بس علشان انتى بتشجعى المدارى متخيلة ان الناس مش عارفه وقال ايه قال قريت فى كتاب ربنا .. وسبناها واقفة زى الخرسة ومشينا .. افتكرت الموقف وانا بقرا خبر جلد فتاة سودانية مسيحية خمسين جلدة لارتدائها تنورة قصيرة .. هى الشريعة الاسلامية بتتطبق برضه على المسيحيين ؟؟ طيب الستات فى السودان يلبسوا بنطلون يتجلدوا يلبسوا تنورة يتجلدوا .. طيب ايه راى الشرع فى لبسهم شورت ؟؟ وبعدين الاخ اللى بيبحلق على اللى ماشية لابسه قصير ولا بنطلون ده مش يعرف حاجه اسمها غض بصر ؟ البنت قاصر عمرها 15 سنة ومسيحية واتحكم عليها بالجلد واتنفذ الحكم بعد النطق مباشرة دون استدعاء لاهلها .. يعنى اهلها مش عرفوا غير بعد بنتهم ما اتاخدت من السوق واتحاكمت واتجلدت .. حد يجيب لى نص صريح كدا من القران او حديث من السنة يقر بقلة الادب والانحطاط اللى حصل للبنت ده ؟؟ طيب يا اخوة يا بتوع جلد النسوان على بنطلون او تانورة او حتى لابسه براه علشان مش تغش السلعه ايه رايكو فى نسوان دارفور اللى مش لاقيين حتة قماشة تقيهم برد الشتاء والاطفال اللى مش لاقيين لقمة ياكلوها ؟؟ هو الجهاد فى جلد الاطفال الايام دى ؟؟ طيب مين يستحق الجلد الشيوخ اللى بيتجوزوا اطفال عمرهم 15 سنة ولا القاصرات اللى بتلبس جيبة قصيرة ؟ مين اللى يستحق الجلد اللى بيغتصبوا الاطفال فى الظلام ولا اللى ماشيين فى النور والدنيا كلها شيفاهم وعارفاهم ؟؟ ولا طالما كله يحدث خلف الابواب المغلقة اذن لا عقاب ؟

تعليقات

‏قال عمو عصام…
شر البلية مايضحك...رفع أحد الهنود قضيه فى كوريا لأن شخصا قال عنه أنه عربى عندما وجده يرفع صوته وهو يتكلم وقد كسب القضيه وحصل على تعويض لأن الإهانه كانت شديده..فهل لنا أن نحزن أم أننا نستحق الإهانه؟؟
‏قال karim
سيدتى الرائعة جدا بموضوعاتك الصحيحة, عندك حق فى كل ما ذكرتية, بس بجد الست الداااكتورة ديية تغيظ, بس كويس اننا طلعنا منها انا المعصية فى الديرا افضل من قاعدة فى اماكن امام الجميع, يانهاار اسود, مش عارف اقول و اللة, احنا واللة بقينا العن من الجاهلية, استررها يارب
‏قال Sahran
قطتي العزيزة

طبعا لا يكفي من وجهة نظرهم أن يختلي بها كي يتهموا بالفاحشة ,, فهم يعتبرون مجرد تبسم الفتاة إشارة للشاب كي يمارس الجنس معها,,

ولعلك تذكرين أبو إسحاق الحيوان الذي رفض مجرد خروج المرأة من بيتها

كل يوم يزيد اقتناعي بغباء مجتمعاتنا وأتحسر على هذه الشعوب التي غمست نفسها في مستنقع الجهالة والغباء الأبدي

استمري في فضح جهالاتهم ولا تأبهي لقول كل تافه وسفيه


تحيااااااااااااتي لك


ودمت سالمة
‏قال مواطن مصري
http://img20.imageshack.us/img20/8309/29441482.jpg


صور التحرش في العيد

ششوفي كدة البنات لابسة حجاب عشان الناس

تتصدق ان التحرش ملهوش علاقة ب الحجاب
‏قال أسماء علي
بصي يا نونة على شاكلة الدكتورة دي كتيييير ما تعديش
و حياتك دول الدكاترة دول خصوصا بيطري و لا بشري هما اللي بيطلع منهم البدع
تحسي ان الدماغ عندهم مش موجودة
فكريني احكيلك على موضوع لما نتكلم
:)

بالنسبة للي بيحصل ف السودان
بجد مش قادرة افهم اللي بيحصل ف الدنيا و هنروح لفين أكتر من كده
دمتِ قوية
‏قال مفكر…
جذور الغوغائيه
جذور الغوغائيه اقدم مما نتصور وليست قصص البنطلون للمراه او مشد الصدر بجديده...كان التاريخ يكرر نفسه عندنا الى مالا نهايه
فى عصر الدوله العباسيهكان الصراع على اشده بين اهل النقل واهل العقل او من يتقيدون حرفيا بالنصوص ومن يستخدمون عقولهم والمنطق مثل المعتزله متاثرين بالفلسفه اليونانيه اى انه كان هناك صراع بين اهل النقل من جهه واهل الراى اى من يستخدمون القياس والمتكلمين اى من يستخدمون المنطق
من جهة اخرى
ومنذ المامون شحعت الدوله اهل العقل والراى الى ان جاء خليفه فاسد انحاز للفريق الأول واطهض اهل العقل وهو الخليفه المتوكل لبغطى على فساده وفعلا كانت له شعبيه رغم فساده بين العامه
‏قال مفكر…
جذور الغوغائيه 2
وكان مافعله المتوكل من سحقه لأهل العقل والتفكير بداية الأنحدار وعصور الأنخطاط
‏قال مفكر…
جذور الغوغائيه3
اذكروا هذا الأسم ولا تنسوه
المتوكل
الخليفه العباسى الفاسد الذى صادر العقل للتغطية على فساده وانحلاله وتملقا للدهماء لأنه يتخذ فى ايامنا اسماء مختلفه كالبشير او نميرى او صدام او ضياء الحق او الملا عمر
ولا تصدقوا ان الأنحدار بسبب بعد الناس عن الدين ولكن لغياب العقل
‏قال غير معرف…
جذور الغوغائيه4
لاخظ ما ادى اليه غياب العقل من انحدار وتخلف المسلمين
ابن خلدون
‏قال فرعون
ايتها القطة
سلام كير عشانك
واشكرك على اثارة هذا الموضوع المحزن
ولكن ربنا موجود
تحياتى لك
‏قال Desert cat
بابا عصام
انا لو مكانه هعمل كدا
الحقيقة العرب بقوا معروفين بهمجيتهم فى اى مكان وكل مكان
لدرجة ان الناس بتتلاشاهم
‏قال Desert cat
مفكر
طيب احنا دلوقتى فى القرن 21 ومع التقدم التكنولوجى الهائل ده مش عارفين نتعلم من الماضى يمكن ننهض بدل من حرب النقاب ولا الحجاب اللى اخدنا فيها مركز مرموق فى التخلف والرجعية دى
‏قال Desert cat
اسماء على
قابلت دكاترة من النوعيات دى بلاوى
علشان كدا بشكر ربنا انك اثتثنا يا صديقتى الجميلة
‏قال Desert cat
مفكر
فى عالم النبات اعتقد ان الجذور العفنة تموت ويتم حرث الارض من جديد لتظهر جذور نباتات نجنى منها الثمار .. وهذا ما حدث بالفعل فى اوربا بعد العصور الوسطى .. ما يدهشنى هو كيف بدل من التقدم نحو الاصلح يهلولون نحو الجذور العفنة حتى تعمى رائحتها الابصار
‏قال Desert cat
مواطن مصرى
هو اساسا المتحرش لا يهمه حجاب ولا حتى نقاب المهم انها انثى
لكن اللى بياخد من الحجاب مبرر ده حد مريض وبدل ما يعالج مرضه بيبرر التحرش وقلة ادبه
اخاف يجى اليوم اللى الستات مش تخرج فيه من بيتها وفا من حيوانات الطريق يقوم يروحوا يتحرشواو بيهم جوا ويقولوا ماهما اللى مش خرجوا لنا فى الشارع
‏قال Desert cat
Sahran
عزيزى سهران تلك الحيوانات التى لا تفكر سوى بنصفها الاسفل انا بستخسر البصق على وجهها
‏قال Desert cat
فرعون
اخبارك ايه
ميرسى اوى ليك يا فندم
انت بجد شرفتنى

المشاركات الشائعة