لسه فيكى رجال يا مصر


لأن المجتمع إنتشرت فيه البذاءات والإنحطاط الأخلاقى من جميع الأعمار إلا أنى أشعر بالذهول .... الصبح والصبح بتاعى بيكون الساعه12يعنى وقت أذان الظهر متوجهة رايحه أخد أى مواصله توصلنى لوجهتى المنشودة .. واقف على جنب شوية بنات اخرهم ثانوية عامة وواقين منكمشين عل بعض ووشهم فى الأرض ومش بينطقوا ولا بيبصوا حتى لبعض لفت إنتباهى اوى شكلهم بصيت لهم شوية .. وعايزة اسالهم شكلكوا مذعورين كدا ليه بس قولت خلينى فى حالى ... اقل من دقيقة ووضحت الرؤية .. عيل مش جايب العشرين سنة ويادوبه الواحد يسلك بيه سنانة حاجه رفيعه اوى وملهاش ملامح .. ولاقيته واقف قدامى وبيبص بصة استفزازية وبيقول بلا مواصلات بلا زفت احنا هنتفرج النهارده .. طبعا منظر البنات اللى جنبى مش شجعنى خالص على الكلام وواقف قصادى شاب تقريبا اده فى العمر بس هناك فرق شاسع فى التشبيه طبعا ... والفرق ده بقى هو سبب ذهولى لحد دلوقتى ..والولد التانى واقف متابع من بعيد وساكت .. الحيوان اللى واقف بيص نظرات استفزازية زاد عن حدة بالفاظ كلمة نابية غير معبرة عنها بالمرة .. هنا وحسيت ان حراراتى ارتفعت ولو سكت اكتر من كدا ممكن يحصلى انفجار فى المخ .. قولت له كلمة كمان وهديلك باللى فى رجلى .. لاقيت الواد بيسب لى الدين .. وراح مكمل الزبالة اللى بيرميها من بؤه .. الولد اللى واقف متابع جه وقاله انا واقف من الصبح استنى واحدة فيهم تتكلم علشان اعرف اتحرك .. راح القذر التانى شتمه .. قاله انامش هنزل لمستواك وارد عليك وراح مطلع موبايله ومتصل بالقسم بلغ عن حالة بلطجة وتحرش وادالهم عنوان المكان .. القذر التانى وقف برضه يسب الدين له وللشرطة اصله كان فاكره بيرسم وبيعمل راجل قدام البنات وهو لا اتصل ولا نيله .. الناس بدات تتلم وكل اللى يسال فى ايه البنات يحكو والقذر ده يشتم فيهم ويسب لهم الدين .. راح الولد اللى اتصل بالقسم لف من وراه ومسكه من دراعاته وقاله قسما بالله لو ما بطلت قلة ادب لأحط الجزمة فى بؤك والواد عمال يزيد فى الشتيمة وقلة الادب بالفاظ ازبل من الزبالة بشوية راح الولد ضربة والناس اللى رايح واللى جاى قعد يضرب فيه وده عمال ينضرب ويشتم اكتر .. معدى واحد راكب عربية ركن فى جنب وبيسال فى ايه .. ولد صغير حكا له .. قلهم هاتو الواد ابن الكلب ده ارموه فى العربية ولو انه هينجسها وناخده ونطلع بيه على القسم هو اللى حيربية .. الولد قاله لا ماهما اتصلوا بالقسم والبوكس جاى دلوقتى .. وبعد شوية فعلا البوكس جه واخد الولد اللى كان بينضرب القذر ده والراجل اللى كان عايز ياخده فى عربيته القسم اخد معاه الولد اللى اتدخل من البداية واتنين تانيين وحصلوهم .... سعيدة ومبسوطة اوى .. هموت واعرف مين الولد اللى اتصل بالقسم واشكره من كل قلبى واعرف اهله فين واوصل لهم امتنانى وتحياتى لتخريجهم راجل محترم للمجتمع يعرف ازاى يحترم نفسه ويحترم الناس ازاى يكون راجل فى كل المواقف وكل الاوقات .. ونفسى اشوف البلطجى اللى كل شغلته قلة ادبه على الناس واتف فى وشه واشوف اهله علشان العنهم الف لعنة ولعنة .. لانهم فعلا معرفوش يربوا .. لحد دلوقتى بجد حاسة بذهول ونفسى يكون من الولد الشجاع ده كوبى فى كل شارع فى البلد .. كل لما احكى لحد يا سلام انتى مزوهولة اوى كدا ليه فى شباب كتير زيه كدا ... طيب انتوا بتتدخلوا لو شوفتوا واحدة بتتعاكس .. اللى يقولى اه ساعات واللى يقولى مش يمكن يكون هى عاجبها وتحرجنى .. طب الشاب اللى انت لسه مبدى لى اعجابك بيه ده ليه مش قال زيك كدا ؟؟ طيب وفين الشباب الكتير اللى زيه ده ؟؟ ياريت يكون فى شباب كتير زيه بجد .. وياريت يكون فى ناس محترمة كتير زى أهله يربوا اولادهم على الأخلاق وعلى الرجولة الحقيقية .

تعليقات

‏قال السنونو
أنت اللى جدعة علشان رديتى على الولد قليل الأدب فالشاب المحترم اتحرك لو كانوا البنات دول مخافوش وعملو زيك من الصبح كان فى القسم
‏قال Desert cat
السنونو
تعرفى انا اصلا من النوع اللى مش بيسكت لحد وبسبب انى مش بسكت برضه بتشتم ساعات من العيال قليلة الادب دى بس معلشى اتشم واخدحقى بدل ما احرق فى دمى واحس انى جبانه بس هضحكك على موقف من قريب اوى ولد قل ادبه ورديت عليه وشتمنى وشتمته جه راجل كبير بيقوله عيب كدا يابنى امشى من هنا .. قاله انا مش عملت لها حاجه راح الراجل قاله يعنى هى اللى بتتلزق فيك مش انت اللى عاكستها قاله يا عم افرض انا مش محترم هى ترد عليا ليه
ولكى ان تتخيلى واحد بيقوله انا مش محترم وعارف انه مش محترم وبدل ما يلم نفسه مش عايز الناس اللى بيقل ادبه عليها ترد عليه
وعلشان فى عالم زبالة اوى كدا ساعات البنت بتخاف ترد

ميرسى لزوقك يا قمر
‏قال مواطن مصري
طيب لسة فية ناس محترمة في الشارع الحمد الله

و الله احنا شعب جدع بس فيةشوية ناس وسخة لازم تمشي من البلد
‏قال Ehab Fayez
تحية لكى ولهذا الشاب الشجاع
فعلا المشكلة مش بس فى وجود بعض الشباب المنحرف أخلاقيا ولكن فى السلبية اللى عايش معظمنا فيها
الكتير مننا بيشوف حاجات غلط وبيكون رده : يا عم أنا مالى خلينى فى حالى
وحتى الناس اللى أتجمعت تضرب فى الولد ده ما كنش حد منهم حيعمل حاجة لو لم تتحركى انتى أولا
‏قال Ehab Fayez
تحية لكى ولهذا الشاب الشجاع
فعلا المشكله مش بس فى بعض الشباب المنحرف أخلاقيا، ولكن فى السلبية اللى عايش فيها معظمنا
كتير منا بيشوف حاجات غلط وبيقول يا عم أنا مالى خلينى فى حالى
متهيألى الناس اللى اتجمعت تضرب الولد ما كنش حد منهم حيعمل حاجة لو مكنيش انتى أخدتى موقف معاه
‏قال salwaa
يا عزيزتى هذا هو المجتمع الذى نعيش فيه
وهذا ماصارت اليه الامور الآن..ومانحدرت اليه اخلاق افراد المجتمع ..ويمثل السلبيه فى الناس التى جعلت هذا السافل يروع هؤلاء الفتيات..ولاينقذهم أحد..ة
‏قال karim
صدقينى فى كتيير بس فعلا فى اكتر بيعجبهم كدة و حصلتلى لدرجة انى ضربتهم هما الاتنين و مشي واللة, علشان كدة الواحد لازم يستنى فعلا ويشوف رد الفعل من البنت اية, عماار يامصر
‏قال على باب الله
برافو عليكي و برافو عليه

هو ده الكلام
‏قال Desert cat
مواطن مصرى
مهى الناس الجدعة اللى فى البلد دى بقت عملة نادرة اوى والسائد هو الانحطاط
‏قال Desert cat
Ehab Fayez
بالظبط يا فنان هو ثقافة وانا مالى دى اللى خلت العيال السافلة دى تنتشر فى البلد بالشكل المقزز ده
والاسخم من دا ان فى ناس تقولك البنت اللى بترد على اللى بيقل ادبه تبقى مش محترمة .. ده ايه المنطق المعوج ده ؟؟
يعنى انت لو واحد شتمك وانت ماشى فى الشارع من غير سبب هتسكت له .. يقولك لاء طبعا بس انا راجل اعرف اخد حقى .. يا سلام واي الفرق ماهى برضه تعرف تاخد حقها .. الوضع بعد ما استفحل بالشكل ده مبقاش ينفع السكوت ولازم الناس المحترمة اللى بجد تتدخل لان اللى هيسكت النهارده على اى واحدة بتعاكس يمكن بكره اخته ترجع له مغتصبة
‏قال Desert cat
salwaa
يا عزيزتى دول كما بقول بيزعلوا لما بنرد عليهم ويقولوا لك البنت المحترمة مش بترد .. واللى بيعاكس وبيتحرش ده يبقى ايه ؟؟ لما الضحية دلوقتى مش محترمة
‏قال Desert cat
karim
نظرية كتير بيعجبهم كدا دى يا كريم غلط جدا
بتكون فى بنات فعلا مش عندها القدرة انها تتكلم بتخاف من ردود افعال الناس اللى بقت غريبة جدا
وبترمى عليها هى باللوم والسلبية المسيطرة على المجتمع ككل
اتمنى كل واحد يكون عنده ربع اجابيتك وايجابية الولد اللى وقف الموقف الشجاع ده وصدقنى لو فى ايجابية فى الشارع لمدة شهر بس هنلاقى الظاهره دى اختفت خالص

تحياتى
‏قال Desert cat
على باب الله
اتمنى والله الكلام ده يتعمم
علشن نخلص من قلة الادب دى
تحياتى
‏قال Sahran
قطتي العزيزة

العالم المنحطة هادي ما بتيجي إلا بالعافية , يعني الاحترام لهيك أشكال ما بينفع , وكان المفروض بالشاب الحمش أن يتدخل من البداية لوقف التصرف الهمجي لابن الشوارع

لسة فيكي خير يا مصر طول ما فيكي ناس بتتحدى الواقع السيء


تحياااااااااااااااااتي لك


ودمت سالمة
‏قال Desert cat
Sahran
هو اعتقد انه كان قلقان سهران من رد فعل البنات نفسهم
بس كويس انه اتدخل
لان ده مبقاش بيحصل ابدا

تحياتى
‏قال sab7al5air
صح كلامك يا قطه هي الموضوع كده انه انت لمن تسكت الغلط بزيد ولما تكلم ماي همك راي الناس لانه انت عارف انه انت صح يعني لمن انت رديتي كنت متوقعه انه يرد عليك بشتيمة بس الفكره انه فعلا هو خوف البنات بس هو في الحقيقه جبان وكان عايز زول ويقفه عند حده تحياتي
‏قال غير معرف…
برافووو عليكي ياقطه بجد وبرافوو علي الشاب المصري الجدع اللي اتدخل علشان يوقف الحيوان التاني عند حده فعلا احنا محتاجين منه كوبي في كل شارع من شوارع المحروسه الحكايه بقيت زياده قوي والواحد قرف من الاشكال المعفنه دي اللي بقت ماليه شوارعنا انا عن نفسي اللي بيتعرضلي بصراحه بضربه ومش بيهمني وان شالله تولع بعد كده المهم اخد حقي من الكلب اللي فاكر ان بنات الناس مشاع لاي مهوووس يمارس عليهم سفالاته وتطاوله.انا نفسي كل بنت تتعلم ازاي تدافع عن نفسها ضد اي حيوان يحاول يأذيها ولو بكلمه
انا من اشد المحبببي لمدنتك يا غالى
بالتووووووووووفيق
والى اامامامام

المشاركات الشائعة