ممنوع دخول الرجال

ورقة مكتوبة بالخط العريض وملزوقة على باب زجاجى بداية شكيت انى اتلخبطت وبدل ما ادخل محل هدايا دخلت تواليت للسيدات رجعت دققت النظر تانى فى الورقة والباب اللى ملزوقة عليه .. الباب كله طبعا عليه عروض من انواع الهدايا اللى بالداخل طبعا خطر فى بالى وانا واقفه اتفرج على الورقة مش على الهدايا المعروضة انى ممكن الاقى جوا انجلينا جولى ولا بريتنى سبيرز او اضعف الايمان جينفر لوبيز

واستعنت على الشقا بالله ودفعت الباب للداخل ودخلت وراه المحل والاقى واحدة قاعدة على الكرسى تزن من الحجم 300كيلو متشحة بالسواد ومبينه الوجه والكفين .. وقتها حسيت انى مش داخله محل هدايا فى مصر تقريبا حصلت لى معجزة فى الشهر الكريم وانتقلت السعودية ولا افغانستان ... وبدل ماساأل على الهدية اللى انا داخله علشانها ابتسمت لها وسالتها على الورقة .. هو انا مثلا لو جاى معايا جوزى دلوقتى اوقفه فى الشارع علشان ادخل اشترى انا هدية طبعا انفرجت اساريرها عن ضحكة على اثرها لفيت وجهى فى اتجاه تانى خالص .. وقالت لى معلشى اصل انا لسه جاية مصر من سنة بس ومش متعودة اتعامل مع رجالة .. هو حضرتك كنتى عايشة فين ؟؟ لاقيتها بتقولى كنت فى البحرين وكنت بشتغل فى مدرسة بنات لمدة 7 سنين يعنى مش بتعامل مع رجال خالص .. قولت لها ماهو بيجوا صدقينى من اى دولة عربية وبيتعاملوا عادى خالص مع الرجال هو اينعم الذكور المصريين وليس الرجال يستحقوا ضرب النار لكن معلشى ده محل مفتوح ومن حق اى حد يدخله والا لو كل واحدة كانت مسافرة ورجعت استقرت وعملت محل وكتبت عليه ممنوع دخول الرجال فالافضل نبنى لنا مدينة مستقلة نعيش فيها بعيد عن الرجالة ونريح ونستريح .. طبعا هى حبت تقطع الكلام وبدل ما تقولى وانتى مالك يا حشرية جاية تشاركينى ولا ايه .. راحت سالتنى بطريقة مقتضبة حضرتك محددة هدية معينة ولا تحبى تتفرجى ؟؟ جاوبتها انا هتفرج يمكن الاقى حاجه احسن من اللى انا محدداها .. قالت لى خلاص تحت امرك .. واثناء الف وادور ببصرى على الهدايا يلح عليا سؤال عايزة اسأله بس الحقيقة مقلقة تقولى اطلعى بره انا هقفل المحل خلاص مش هفتحه تانى .. بس مش ينفع ممكن يجرى لى حاجه لو مش سالته المهم اخدت نفس عمييييق .. هو ليه حضرتك مش لبستى النقاب وسبتى المحل مفتوح عادى لكل الرواد ؟؟ طبعا خيبت ظنى وضحكت بغيظ وقالت لى جوزى رافض ؟؟ .. قولت لها جوزك ده عسل قالت لى نعمممممممم .. ها لا مفيش .. سالتنى بطرقة رخمة طبعا هو انتى بتعملى دراسة ولا حاجه على الستات اللى رافضين الاختلاط ؟؟ جوابتها طبعا بالنفى .. ولانى شوفتها جابت اخرها منى قولت لها ميرسى اوى مش فى حاجه عجبتنى وقبل ما تخبطنى باقرب حاجه تقع ايديها عليها كنت بره باب المحل .... طبعا واضح ان البعض من اللى بياسفروا بلاد
عربية ويرجعوا مش بيتاثروا بس بطريقة اللبس لاء ده كمان بيتاثروا بنظام الحياة عامة .. ازاى بقى بمنتهى السهولة انسلاخ المصريين من هويتهم ؟؟ ليه بنقلع نفسنا من جذورنا وبكامل ارادتنا الست فى محور حديثها بتقولى انها خايفة ان راجل يفتتن بيها وانها هتشيل ذنبه وانا بمنتهى السخافة بقولها هى فين الفتنة دى ؟؟ ولو افتتن انتى تشيلى ذنبه ليه ما يغض بصره ..قالت لى اسمعى محمد حسان يمكن ربنا يهديكى .. قولت لها اقرى انتى الدين الصحيح والسيرة النبوية الشيخ محمد حسان واخوانه قاعدين يقولوا كلام على حسب هوى الزبون المهم المكسب .. قالت لى انا عندى خبرة كافيه .. خبرررررره ايه علاقة الخبرة بالقراءة والمعرفة ؟؟ لو فضلنا على الحال ده مش بعيد نلاقى كام خيمة وشوية غنم فى ميدان التحرير على رمضان اللى جاى

تعليقات

‏قال محلل…
تحولت الشخصيه المصريه من الشخصيه الفهلويهالتى تعمل بطرق الأونطه والأحتيال بسبب طول اضطهاد الحكام عبر التاريخ
الى الشخصيه الفوضويه التى تعمل بطريقة اخطف واجرى مع الأنفتاح
وحلم الثراء السريع وعزز ذلك الثروه النفطيه التى انهمرت على دول التخلف والجمود
ومع انتشار الفضائيات التى تروج لعادات هذه المجتمعات
عن طريق المرتزقه من الدعاه الذين يخلطون الدين بهذه العادات فى توليفه ترضى صاحب المال تحولت الشخصيه المصريه الى الشخصيه الأسفنجيه التى تمتص كل ما يلقى عليها دون تفكير خاصة لو حمل بطاقة دينيه
ومن هذا كله طهرت شخصيه غريبه هى كوكتيل من الفهلويه والفوضويه والأسفنجيه
فلا عقل يفكر ولا احترام لنظام او لحق الغير وتلقى مايرد من وراء الحدود من اى فكر
‏قال أبو كريم
بسم الله الرحمن الرحيم

رمضان كريم أولا وثانيا أنا معك فى جزئيه الإنسلاخ من الهويه المصريه ولكننى لست معك فيما قلت عن محمد حسان لان هذا الرجل أحسبه ممن يجدد للامه أمر دينها ولا أذكيه على الله ولو كل واحده أقتنعت بخمارها أو نقابها إقتناع انه أمر من الله حتى لا تفتن من حولها من الرجال حتى ولو كانت 300 كيلو لان الله قال لرسوله أن يفعل ذلك مع أمهات المؤمنين فما بالك من هم أدنى منهم مرتبه...وربنا يلهمنا الفهم الصحيح لكتابه وسنه نبيه


تقبلى مرورى
‏قال عمو عصام…
عزيزتى القطه...هناك حكمه تقول(أنت تقود بمقدار ماتعطى)وعندما كنا نعطى العرب الأمان ممثلا فى قوتنا العسكريه والأموال والخبره كنا نقودهم وكانت كلمة مصر مسموعه أما الآن فنحن نتسول منهم فرص العمل لأبنائنا ولم نعد نقودهم سياسيا ولا عسكريا حيث أصبحت أمريكا هى البديل الطبيعى لمصر..ولذلك لاتحزنى إذاكنا قد تحولنا لتابعين ننفذ أفكارهم حتى لو كانت متخلفه ونرتدى نقابهم الذى يحجب العقل قبل الجسد ولا أحديعلم إلى أين نسير خلفهم وإلى أين يقودوننا...وربنا يستر...شدى حيلك
‏قال مداعبه من عمو عصام…
ممنوع دخول الرجال ...عنوان أرجو ألا اقرأه يوما على مدونتك الجميله حتى لايصيبنى الإكتئاب وأرجو أن أحصل على وعد منك بعدم كتابته أبدا.
‏قال غير معرف…
لماذا تندهشين لوجود مثل هذا الهطل
اذا كانت الدوله تمنع قيام جزب لهذه الأسباب
.......
دعوته للديمقراطية ولإطلاق الحريات العامة وللمساواة بين المواطنين وبين النساء والرجال وكفالة حرية الاعتقاد الديني واحترام كرامة الإنسان وحقوقه الدينية والسياسية، والاقتصادية والثقافية، والعمل علي التداول السلمي للسلطة وعلي حرية الرأي والتعبير والتفكير والتأكيد علي حق تكوين الأحزاب وحق التظاهر وضمان نزاهة الانتخابات، وتقليص سلطات رئيس الدولة، وتحديد مدة رئاسته بفترتين فقط،
‏قال غير معرف…
المراه ثم المراه ثم المراه
هى مصدر الفتن والشرور
وكان الحل فى الجاهليه هو وادها واليوم من الصعب وادها ولكن خرج علينا مرتزقة الفضائيات بالوأد الجزئى
تحت الخيم المتنقله
او منع ظهورهن بالمره تحت عنوان الأختلاط
الى درجة انه لم يسمح لرجال الأطفاء فى دوله خليجيه بالدخول الى مدرسة بنات اشتعل فيها حريق كبير خشية الأختلاط وترك البنات لمصيرهن
شفت عباء
ووجشبه مثل هذا
والهجيب ان يتم هذا باسم الدين
‏قال غير معرف…
المراهمصدر الفتن والشرور
......
ولا نلتفت ان هذا كله من منظور ذكورى وترويج هذه الفكره او النظره الى المراه مصدرها تفكير الذكر فى المراه كاله جنسيه لأشباع غرائزه
وهو ما شوه صورتها فى اعين المتحرشين
والفضل يرجح للمجددين امثال هذا الحسان
‏قال محلل…
عندما يتعانق الهوس الجنسى مع الهوس الدينى
تكون المراه هى الضخيه مره لتحويلها الى مجرد شىء لأرضاء غريزة الذكر ومره اخرى بقبامها هى نفسها بالترويج لأفكار تنال من انسانيتها
عندما لا تفهم ما رواء مثل هذه الدعاوى الشديدة التخلف
‏قال غير معرف…
مش حسان ده اللى اتخانق مع مصيبه تانيه قصدى مرتزق أخر على الفلوس فى المحطه الفضائيه
بسبب عمرو خالد
‏قال برج المراقبه…
وتطبيقا لفكرة الشخصيه المصريه الجديده
الفهلويه الفوضويه الأسفنجيه
هو ما لجا اليه مرتزقة الفضائيات
لغسل مخ النساء فابتكروا حيلة ان المراه جوهره يجب ان تصان بلفها جيدا واخفائها
طبعا اى امراه بلهاء سيرضى غرورها حكاية الجوهره
فلا تلتفت الى ان الجوهره هى شىء وجماد
بينما هى انسان له حق ان يعيش كانسان وليس كشىءلأن الشىء يباع ويشترى كما كانت الجوارى تباع وتشترى كاشياء لا كبنى ادمين
وهذا هو التجديد والا بلاش
‏قال مواطن مصري
دة ل الاسف سبب من الاسباب انتشار الطائفية و العنصرية في مصر

البترورويال بيلغي المخ و بيعمل ليها غسيل و يسسستمها و يصدرها


و يغرق الدول الاخرى عشان كدة لازم نعمل قانون نكافح اغراق الشعب المصري

فاهماني؟
‏قال روابط
عزيزتى

هذا نمط شاع وأستشرى فى البلاد كالبلاء فى زمن ما بعد الحرب, وأحسن شئ اننا نبعت كل الرجاله اللى نعرفهم-لو فيه رجاله- الى المحل ده... غتاته
هههههههههههههههههه
طبعا انا خارج تحديد الهوية المصرية
و عم احكي بالجانب الاخر
يمكن انا بختلف معاكي بهدا الموضوع
يعني هي حرة متل ما اي وحدة لابسة قميص نوم و ماشية بالشارع حرة
يعني الرجال انزنقوا يشتروا من عندها ؟
و لا رح يتحول المجتمع بوجودها لخيم و غيروا لانو المجتمع المصري خاصة يتميز بالتعددية
يعني هي حرة بافكارها و لبسها و محلها و اللي ماشية عريانة تتلمس بالرجال كمان حرة
و انا و انت النا حرية باختيار النهج اللي بنمشي عليه مش برضوا هاي الديموقراطية اللي بنحلم فيها
و الا هنستثني الملتزم دينيا منها و نفرض راينا عليه

( يمكن انا من العالم القليلة اللي ما بتسمع شيوخ و بتحاول تتعرف على دينها بنفسها )
و هامش : الخلاف بالراي لا يفسد للود قضية
تحية
‏قال AHMED SAMIR
يااااااااااااااااااااااه
انتي هتقولي لي على اللي بينسلخوا عن هويتهم؟؟
طبعا الناس اللي راجعة من السعودية حدث و لا حرج
النقاب و الجلابية و اللسان المعووج و الكلمات الغريبة
انما هنا في ليبيا كانت المفاجأة
اغلب المصريين اتحولوا لمسخ مشوه
بيتكلموا كلمات ليبي عجيبة جدااا
و افظع شيء و اصعبه على النفس انك تلاقي مصري بيتكلم لهجة بلد مش بلده
بيبقى فعلا سيء مقرف و مثير للاشمئزاز
‏قال برج المراقبه2…
هديه لمن لا يزالون
يسيرون وراء دهوة الدوله الدينيه
هذا الخبر
واليس الذكاء هو ان نتعلم من اخطاء الغير والغباء ان نكرر نفس الأخطاء
اقروا وفكروا
علمت "العربية" أن هاشمي رفسنجاني رئيس مجلس الخبراء سلم المرشد الأعلى للثورة الإيرانية آية الله علي خامنئي اسمي ضحيتين من المحتجين على نتائج الانتخابات تم اغتصابهما في سجن كهريزك، نقلا عن تقرير لقناة "العربية" الخميس 27-8-2009.
‏قال غير معرف…
من سيكسب المليون؟
اقول لك لكى تربى اولادك على اساس ما ساقول
الذى سيكسب ليس فقط المليون ولكن الملايين واحد من اربعه
داعبه اسلامى فضائى
لاعب كره
ممثل مشهور
مسؤول مرتشى او حرامى
واوعاك تسال بعد ان علمت لماذا تخلفنا وسوء احوالنا
‏قال karim
عادى جداا اللى انتى بتحكية دة زى موضوع المنقبات اللى انتشر و كل يوم علية مشكلة وخلافات الناس بتتاثر وتيجى هنا تعملنا البلاوى وربنا يستر علينا
‏قال محمد حويحي
لا افهم بقي معلش ماااااالهم الرجااااله المصريين تحديدا علي وجد الخصوص؟؟
:‏(‏(
‏قال Unknown
فعلا تخلف .. نساء المسلمين يظنون انفسهم جنس مختلف عن البشر .. لا اعلم لماذا من ترى فى نفسها عورة .. ان تجلس فى بيتها ولا تخرج حتى لا تقرف الناس بتخلفها
‏قال Desert cat
محلل
طبعا بعد هذا الانتشار الهائل للدعاة والمرتزقة تم تعطيل العقل واصبح النقل هو الحل
‏قال Desert cat
ابو كريم
محمد حسان راجل فاضل
ههههههههههههههههه
هو فى راجل فاضل بيتخانق مع شوية مرتزقه زيه على البرامج بسبب دخول اخ مرتزق زيادة لقناة الناس خوفا من ان يقاسمهم طبق الفتة اللى قاعدين يرجعوا علينا فيه تخلفهم العقلى من بول بعير وخلافه
ثم يا ابو كريم ليتك تقرأ جيداً فى السيرة النبوية كى تعلم وتفهم وتدرك ان السيدة عائشة كانت تجلس بين الصحابة وتلقى عليهم أحاديث الرسول ياريت تشغل عقلك ولا انت بتسمع للراجل الفاضل اللى بيتخانق على سبوبة قناة الناس
‏قال Desert cat
بابا عصام
للاسف يا بابى وصل الجهل والتخلف بالبشر انهم يتغاضوا عن افعال النصابين والمرتزقة ويقولا عليهم افاضل لمجرد الجلابية المينى والدقن وحفظ كام حديث وآية وبكدا اصبحوا رجال فاضلين
مش عارفه ايه الفضيلة الحقيقة فى بول البعير ده حتى النظافة من الايمان ولا ايه الفضيلة فى خناقة على تقسيم السبوبة بينهم كانهم شلة من الحرامية
‏قال Desert cat
بابا عصام
مداعبتك مقبولة يا حبيبى بس عايزة اقولك ان يوم ما هفكر بالطريقة دى يا بابى يبقى اعرف ان ده اخر يوم فى حياتى وصدقنى ده وعد منى

دايما منورنى ومشرفنى جدا
‏قال Desert cat
Anonymous
ماهو الدولة مستفيدة من تعطيل الناس لعقولها واعتمادها على النقل من الاوباش مرتزقة الفضائيات طالما لازالوا يفتون على حسب هوى الزبون وكمان بيوصوهم اطيعوا اولى الامر ولن ننسى يوسف الفقرى فى حواره طاعة الحاكم واجبه حتى لو ظالم
‏قال Desert cat
Anonymous
ماهو تلاقى راجل فاضل من بتوع الفضائيات اللى افتى بعدم دخول رجال الاطفاء لعدم الاختلاط مش مهم البنت تموت محروقة الاهم مش ينقذها راجل
يخربيت الجهل
‏قال Desert cat
Anonymous
حلوة اوى فعلا نكته الشيوخ المجددين دى هو الدين بيتجدد ؟ بس اهى اسماء ومهن يتربحوا من خلالها
‏قال Desert cat
محلل
يعنى هما الحقيقة نجحوا اوى فى الوصول لعقول المتخلفين عقليا والعشوائيين والستات اللى يبلغوا من العمر 50 عام مع انهم المفروض اسمهم القواعد .. والظريف انك تلاقى واحدة صورة طبق الاصل من محمد حسان وتقولك اصل انا هسبب للراجل فتنة
Looooooooool
‏قال Desert cat
Anonymous
اه اتخانق مع مصبتين مش مصيبة واحد
كانت الخناقة بينه وبين الحيونى ويعقوب فى قناة الناس والفضايح ملت الصحف لكن بس اللى رموا عقولهم فى اول تواليت صادفهم بيقولوا لك لالالالالالالالالا دول علماء
اصلهم اخترعوا التجارة باسم الدين
‏قال Desert cat
برج المراقبه
وسبحانه الواحد الاحد دائما تلاقى اللى شايفه فى نفسها عورة ومخبية وشها حاجه مش تتشاف
لدرجة انها لما تشيل اللثام اللى متلثمة بيه تقول ياريتها فضلت مختفية
يا ما تحت البراقع ضفادع
‏قال Desert cat
مواطن مصري
طبعا فاهماك
وبنتيجة فلوس الجاز الشعب المصرى اصبح مشتت وعيال العشوائيات المتدينين اوى خالص يصوموا رمضان ويصلوا ويو مالعيد ينزلو يتحرشوا تحرش جماعى
‏قال Desert cat
حازم سويلم
هههههههههههه
فكرتك ممتازة يا حازم نشوف كل رجالة البلد ونبعتهم للست دى
‏قال Desert cat
jafra
طبعا اختلفى براحتك
بس من ضيق الأفق انك تقولى عكس الكفن المسمى مجازا بالنقاب هو العرى .. لأن هناك كلمة اسمها احتشام
ثم الفطرة تفرض على كل شخص انه يمتثل لامر الاحتشام والا كنتى شوفتى راجل ماشى فى الشارع بشورت فقط طالما الموضوع عبثى والعرى مباح .. واذا كنتى ترى بين قومك من تسير فى الشارع بقميص نوم وتتلمس الرجال فالتعميم جهل .. وليس بالأحرى ان كل الفتيات تسير مثل فتيات عائلتك من يلبسون قميص النوم ويسيرون يتلمسون الرجال بالشوارع .. فنحن فى مصر نعلم معنى الاحتشام ومعنى كلمة وسطية .. اما من ترى فى نفسها عورة وتريد تخصيص مكان عام بدعوى الحرية فعليها التزام بيتها لانه ليس من حق اى شخص اقتحام خصوصيتها أما المحل التجارى مثله مثل الميكروباص من حق اى شخص يرتاده
وايضا الاختلاف فى الراى لا يفسد للود قضية
‏قال Desert cat
A.SAMIR
الناس اللى بتكون خارج البلد وترجع تتكلم بالطريقة دى مش برد عليها يا دكتور وبقطع اى معاملة معهم كذلك المنقبات لو رايحة اركب وسيلة مواصلات وفيها منقبة انزل منها لانى مش ضامنة البرميل الاسود اللى على الكرسى ده عبارة عن ايه وكذلك فى اى مكان ايا كان لما تعرف تحترم نفسها وقتها احترمها واتبادل معها المعاملات

تحياتى وربنا يصبرك على اللى بتشوفه فى بلاد الغربة
‏قال Desert cat
برج المراقبه2
الاغتصاب حلال ليهم اصلهم كدا بيجاهدوا طالما فوضوا نفسهم يتحدثوا باسم الله
‏قال Desert cat
Anonymous
دول مجرد احترافهم اللعب او التجارة بالدين هيكسبوا ملايين فى ايام معدودة
‏قال Desert cat
karim
ايوا يا كريم الناس فى البلاد العربية بتتاثر بالنقاب وما شبه ويجو هنا يسرقوا ويقتلوا وحد شايف حاجه

تحياتى
‏قال Desert cat
عقل مهوي
ياباشا انا اقدر اغلط فى الرجالة المصريين
انا بغلط بس فى الذكور وطبعا ليس كل ذكر رجل
‏قال Desert cat
heartbreakgold
انا متفقة معاك فى ان كل من ترى فى نفسها عورة تجلس فى بيتها
لكن ليس كل نساء المسلمين متخلفين فيهم برضه ستات تشرف
‏قال Blank-Socrate
بوست جميل جدا
فعلا الفكر الاسلامى المتطرف شىء وارد علينامش مصرى اصيل
بيكمل صورة الشيخ العالم الوقور فى فترة السبعينات و حوالية مراته و بناته مش مغطين شعرهم بالرغم من انة عالم جليل
العيب فى الوهابية الى جتلنا من السعودية و طمست هويتنا المصرية الجميلة
اللى اصبحت مشوها
و علاقاتنا بقت مشوها
و كل بنت او امراءة اصبحت تحس انها عورة او شىء منقوص مملوك لذكر
و توتر فى علقاتها مع كل الاولاد او الرجال
و نسوا اننا فى النهاية اخوات او اصدقاء
او حتى شركاء فى الحياة
و للاسف الغرب اللى الاصولين و المتطرفين شايفينه كافر محترم و اخلاق اكتر منهم
تحياتى يا قطة
صدقينى انا خايف عليكى من الناس اللاسعة خدى بالك من نفسك
‏قال Desert cat
Blank-Socrate
انت عارف اكتر حاجه تثير الاشمئزاز ايه انك تلاقى واحدة متكفنة ولو شالت البرقع اللى على وشها تقول ياريتها فضلت مستخبية وتقولك اصلى فتنة

المشاركات الشائعة