العصفورة طااااارت


نزلت مع اختى الكبيرة وطفليها نشترى بعض احتياجتها وبالمرة فوانيس رمضان طبعا كان شرطى قبل الخروج فانوس ويكون كرموبو قالت لى موافقة يا اكبر طفلة توجهنا الى مكاننا المنشود باركنت فى اقرب مكان ينفع ونزلنا نشوف احتياجتها وفوانسينا قربت جولتنا على الانتهاء بعد عشرتاشر ساعة من اللف كعب داير وبعد خبط ورزع مش عارفه الناس بتمشى تخبط فى بعضها ليه تقريبا البشرية كلها نازلة فى نفس اليوم بتاعنا.. اشتريت فانوس على شكل الحاج كرومبو وباسنت اخترتها جى جى بنت اختى الذيذة كل حاجتها لازم تبقى انوثه طبعا وبما ان هدفى المنشود اللى انا خارجة اصلا علشانه اتحقق وكرومبو فى شنطة بين ايديا يلا نمشى بقى علشان انا تعبت قالت لى خلاص خدى آثل ومفتاح العربية واستنوا ربع ساعة بالظبط هكون اشتريت اخر حاجه وجاية لكو .. قولت ومالو تيجى بالسلامة .. اخدت ابنها ولازم اكون الخالة الحونينة اشتريت له ايس كريم وليا طبعا ورحنا ننتظر فى العربية واثناء احنا قاعدين ناكل الايس كريم وقاعد يسمعنى اغنية نانو القطة نطت نطة للمرة السبعتلاف وواحد عدى من جنبنا 4 ولاد وماشيين يشاوروا لحد وراهم وانا بقيت مشتته النظر قاعدة ابص على الاشارات شوية عدت عربية اوبيل سريعه .. انا قولت بس هيحصل عملية خطف هنا واتصل بالبوليس وابقى كدا عملت واجب وطنى .. شوية فى موتسيكل عليه 3 شباب رايحين جايين وفاتحين اغنية انا شارب سيجارة بنى بصوت يصحى اللى نايمين فى القبر .. قولت اشطة فاتت بنت سمبتيك خالص بتتكلم فى الموبايل بصوت عالى وقاعدة تقول خلص بقى تعالى بسرعه انا مش عارفه امشى خالص ... الشارع واسع شوية وعلى اليمين حديقة للطفل وحديقة تانية للكبار يفصل بينهم شارع جانبى ... شوية العيال بتوع الموتسيكل رايحين جايين يلفوا حواليها ودى وقفت عمال تتلفت يمين وشمال ومش عارفه تتحرك من مكانها سمعت صوت اختى الكبيرة جاية وبنتها من الاتجاه التانى وبتبص على البنت اللى الولاد بيلفوا حواليها وبتقولهم عيب انتوا مش عندكو اخوات بنااااات راجل كبير تقريبا فى اواخر الاربعين ولا همه دخل جرى ناحية البنت وهو بيزعق يلا يا ولاد الكلب يا صيع من هنا وفى نفس الوقت بيطمن البنت وبيقولها متخافيش طبعا العيال لما شافوه داخل بالطريقة دى جريو زى الكلاب وراح للبنت وقالها رايحة فين يا بنتى قالت له رايحة بيتنا هو مش بعيد بس مش عارفه امشى من الشباب دول ماشيين يلموا بعض وجايين ورايا من اول الشارع قالها طيب مش تخافى راح مشاور لتوكتوك معدى وقاله وصلها زى ماهى عايزة بس معلشى انا مضطر اخد رقمك .. طبعا شكله طلع ابن حلال وقاله لو عايز كمان رقم البطاقة انا معنديش مانع قاله لاء كتر خيرك انا اخدت خلاص رقم التوكتوك الـ4 شباب اللى عدوا فى الاول واقفين قدام حوالى 100 متر واللى راكبين الموتسيكل جريوا من شارع جانبى والعربية الاوبيل رايحة جاية ... الولاد اللى واقفين قدام بصوا لبعض وضحكو بصوت عالى خلالالالاص العصفورة طااااارت وراحو راكبين زى التيران الهايجة مع صحابهم فى العربية ومشيو .... انا قاعدة واخده آثل فى حضنى وحاسه جسمة كله بيتنفض .. اختى جت وعلى وجهها كمية علامات تعجب غير طبيعية .. سالتها مالك ؟؟ قالت لى ايه اللى بقى بيحصل فى مصر ده ؟؟
ده جزء من كل يا حبيبة قلبى حكيت لها اللى حصل لنهى رشدى قالت لى كنت متابعة على النت بس مش كنت متوقعه ان الموضوع بقى ظاهره كنت فاكرة حاجه وانتهت حكيت لها الحادث اللى اتعرضت له آسر ياسر .. حسيتها شردت فى عالم غير العالم
من شوية كنتى بتقولى لى زهقتوا غربة وناويين تستقروا ؟؟
كان ردها انها مش شافت الغربة الحقيقية غير لما ولاد البلد الواحدة بيطاردوا بعض واستباحوا عرض بنات الناس لبعضهم البعض حبيت اغير الجو شوية قولت لها بس على فكرة عجبنى اوى موقف الراجل .. البنات بتتعاكس فى الشارع وبتتبهدل والناس بتقول هى السبب خارجة ليه .. الراجل ده طلع جدع اوى وكويس اوى وموقفه عجبنى اوى .. وده معناه انه لسه فى خير .. وقعدت اقول ياااارب كتر من امثاله واحرمنا من السلبية ومن مجعراتية الفضائية اللى مش ليهم شغل غير انهم يلبسو الجلابية المينى ويطولوا الدقن مترين ويلبسوا الطرحة فوق راسهم ويقعدوا يعلنوا عن اثارتهم وافتتانهم بشعر المرأة وجسم المرأة العورة بدل ما يوجهوا جهودهم للعواطلية اللى ماليين الشوارع

تعليقات

‏قال Hossam
صديقتى قطة الصحراء
وحشتنيى جدا
الموضوع بجد جميل وواقعى جدا وبالنسبة للفانوس انا هشترى فانوس من الطراز القديم بتاع الشمعة انا اعيل منك اهو hahahahahahahahahhahahah
بجد فعلا ربنا يبعدنا ان نكون عواطلية وعندنا لا مبالاة
كل سنة وانتى بخير
تحياتى
‏قال صفا سارة
انا من زمان مجبتش فانوس بافكر اجيب :)
بالنسبه لبقيت الموضوع فعلا يا ريت امثال الراجل المحترم ده يزيدوا وربنا ياخد الاغبيه واللى مش طبيعين الباقيين دول
‏قال عمو عصام…
فى كل يوم ننحدر لأسفل عشرات الأميال حتى كدنا ان نصل لهوه سحيقه ولولا بقيه من أمل لقلت أننا قد وصلنا لها فعلا وعموما هؤلاء الشباب هم نتاج تدين شكلى وإلحاد عملى وتجارة الدين الرائجه فى الفضائيات والتى تحالفت مع تجارة العرى فى الكليبات وغيرها وغياب تام للأسره والحكومه والمؤسسات الدينيه وأملنا الآن فى الله وفى أمثالك من الشباب الرائع ليعيد مصر إلى مصر ..وفقك الله يا إبنتى (إن كنت تقبلين أن أدعوك إبنتى)
‏قال AHMED SAMIR
الشارع المصري اصيب بلوثة عقليةللأولاد و البنات على حد سواء
الشباب كله بقى بايظ
بجد حاجة تقرف
‏قال karim
اولا كل سنة وانتى طيبة, ثانيا عندك حق تماما فى اللى قولتية, بس ياريت تقوليلى البنت كانت شكلها ازاى ولابسة اية علشان اكيد فى سبب للحصل دة مش ممكن مكنش فى غيرها فى الشارع و بمعنى انهم كانوا وراها يبقى فى اكيد شىء شدهم ليها, ولا ايية
‏قال مطلق
ارجع و اقول يا قطه لازم دعوه للتسليح يعني البنت دي لو معاها سيلف ديفنس علي الاقل مكانش حد قرب منها

مش حقول اليكترك شوك ولا حاجه اكبر رغم ان كل حاجه متوفره ديلوقتي

انا بقول اي وسيله للدفاع
‏قال مفكر قلق على مستقبل البلد…
تعليق على تعليق
ياريت تقوليلى البنت كانت شكلها ازاى ولابسة اية علشان اكيد فى سبب للحصل دة مش ممكن مكنش فى غيرها فى الشارع و بمعنى انهم كانوا وراها يبقى فى اكيد شىء شدهم ليها, ولا ايية
فى هذا التعليق تكمن بين السطور اكثر من ماساه
فهذا القول يعطى هذا الشباب الحقير حق الحكم على مظهر الفتاه واتخاذ ما يراه عقلهم الخيوانى من تصرفات
وكبعا مايشد انسان اليها سيختلف من واحد لآخر حسب درجة حيوانيته
ومرضه
النفسى
لدرجة ان محجبات بل منقبات تم التحرش بهن
واذكر انه منذ سنوات كانت موضة الميكرو جيب ولا توجد بنت واحده محجبه قبل هوجة التدين المسرحى التى نشاهدها الآن ولم تكن تلفت نظر اى انسان
وفى الجامعه كانت العلاقات ارقى ماتكون
هذا الكلام هو عرض من اعراض الفوضى التى انحدرنا اليها
وتتمثل قيما يوصف به الأنسان المصرى من انه انسان فوضى ولننظر للشارع وما يحدق فيه لنرى صدق هذا القول
ولا فائده ولا امل فى تقدم مع مثل هذا النمط من الشخصيه
‏قال سمكه واحده
الموضوع ده بجد بقي يضايق جدااااا
ويخوف وحاجه قذره بمعني الكلمه ومستفذه ومش هقدر اقول غير ربنا يهدي ويصلح الحال
ويولع في الناس الي ذي كده بجد دول حيونات ومش متربين
ثانيا
معلش كنت عاوزه اقول كلمه لاستاذ كريم
انا مش مع اللي مش محجبات ولو المحجبات واني ادافع او مدفعش انها تلبس كويس او مش كويس دي حاجه ترجع لشخصيه البنت ودي حاجه بنها وبين ربنا وربنا يهدي كل بنات المسلمين ومش معني كده اني مع اي حد بيلبس غير لائق طبعا
بس كنت عاوزه اسال حاجه
ياتري ايام زمان ايام ما كانوا بيلبسوا ميكروجيب وكات كان بيحصل كده
مكنا بنشوف افلام زمان و الجيل بتاع زمان كانت الستات كلها بتلبس مش لابسه بس كانت في مرجله ونخوه وتربيه
ياتري وبردو ومش هقارن بين بلد عربي وبلد اوروبي في اي دوله اوروبيه بيحصل تحرش واغتصاب ومعكسات
والاجانب كلها لابسه مش لابسه حضرتك مهما مشيت في الشارع في امان
العيب لا نقول بنت ولا مش بنت ولا لبسه
لا طب ميغض بصره هو فين الدين والنخوه والتربيه اصلا فين الرجاله اللي بجد
اه بنت لابسه ضيق محزق منيل مهبب علي عنيها عاوزه قطع رقبتها ابوها ولا اخوها يقطع رقبتها
ربنا يعقبها
دي حاجه ترجع ليها حريتها الشخصيه انا مش بدافع عن البنات
انا بستغرب علي الولاد واللي بقينا فيه
بجد حاجه وحشه ومخجله
فين الامان في البلد احنا فين؟؟؟؟؟؟
الحاجه اللي تفتح النفس شويه في الموضوع الراجل ابن الحلال ده اللي دافع عنها كبني ادمه لاهمه لبسها او الساعه الي كانت ماشيه فيها لا هو اتعامل بكرمه هو ربنا يبارك فيه ويارب يكتر من امثاله
وربنا يهدي شباب وبنات المسلمين بجد
حاجه تحزن
ومش هكلم علي الشيوخ عشان في ناس ربنا يبارك لهم بجد مش مجرد ذقون وناس محترمه ومتدينه بجد وكتير وبتأدي واجبها خالص لوجه الله تعالي وفي ناس بردو وخدها تجاره وبرد رب العباد اللي بيحاسب ملناش دعوه احنا لينا عقلنا ولللي نقتنع بيه ونحسه بجد
اسفه علي الاطاله
‏قال Migo Mishmish
قطه العزيزة
انا من هواة الفانوس التقليدى ابو شمعه ..معرفش ليه بيفكرنى بايام رمضان زمان ..ايام البهجه وايام مكانت الحاجه ليها طعم وليها شكل فى خيالنا ..رمضان دا له ذكريات جميله ايام ماكنا مصريين بجد ايام ماكان عندنا ذوق واخلاق وضمير واحترام ..دا زمااااان دلوقتى بقينا فى زمن الوحوش وانا شارب سيجارة بنى واجوجوجوجو
تحياتى ميجوووووووو
‏قال Migo Mishmish
معلش تانى
الاخ كريم استفزنى تعليقه
استاذنك فى الرد ياقطه
يا استاذ كريم يعنى هى البنت هى سبب المشاكل دايما ..طب هى قليله الادب ولابسه مستفز او مش لابسه خالص فين بقى دورك كشاب هو مش ربنا برضه قالك غض البصر ؟ هى المراة علطول كدا مدانه ؟ معلش اسمحلى انت زيك زى الناس الى فى الشارع الى عاكسوها ودورو على مبرر ليهم ..وبعدين الراجل الى دافع عنها اكيد يعنى شافها واحده عاديه ومش بعيد محجبه .. بص عالتحرشات الجماعيه مش بتعتق محجبه او مش لابسه من غير محجبه يبقى العيب فى مين ؟ فى الشباب السافل اصلا ..اذا كان انا بمشي فى الشارع انا ومراتى ومعانا بنتنا الرضيعه ..بتلاقى الناس بتعاكس مع انها ماشيه فى حالها ولابسه لبس محترم ...لو سمحت يا استاذ كريم ماتدورش على مبرر للغلط ..الصح صح
تحياتى
ميجووووو
‏قال الكلمة نور
او سيف وربما سفوريا
الاشكال دى مينفعش معاها سيلف ديفنس
دول عايزين عظةو عبرة وقتية
ومعرفش ازاى
‏قال UncŁē Sam
كل سنة وانتى طيبة
وحاوى يا وحاوى
‏قال أنا حر
للاسف الموضوع ده بقى بالفعل منتشر ودي مش حالة استثنائية دي خلاص بقت العادة في الشارع المصري يعني
نتمنى سلامة كل بناتنا والقبض على كل المتحرشين والحكم عليهم بالسجن مدى الحياة علشان ننضف البلد دي شوية
تحياتي
‏قال مفكر قلق على مستقبل البلد…
والآن وبعد ان ندد الجميع بهذا الفعل الهمجى ما العمل؟
طبعا لا يمكن الأنتظار حتى نصلح التربيه وننرشد ماتفعله فضائيات فتاوى الجاز
ولكن على المدى القصير يمكن تشديد عقوبة المتحرش لتقترب من عقوبة الأغتصاب
ونشر شرطه سريه لتعقب مثل هؤلاء المجرمين
ولا يمكن ان يترك الشارع هكذا نهبا لعصابات هؤلاء المرضى
والا الشرطه لا تظهر الا عند مرور شخصيه مهمه؟
‏قال غير معرف…
تسالى الشهر الكريم
اضحك كركر
منقول
خروج المرأه للفضاء بدون محرم حرام
المشاركة
الأمس في الساعة 08:31 مساءً‏
اعلنت وكاله ناسا الفضائيه عن اختيار العالمه

المسلمه خوله الراوندى ضمن طاقم المركبه

المنطلقه الى المريخ اوائل الشهر القادم وقد مثل

الاعلان مفأجاه كبيره فى الاوساط العلميه

والسياسيه
وقد اثار الاعلان موجه من الجدل فى العالم

الاسلامى حيث اعلن الشيخ عرعور المكفراتى شيخ

مشايخ الوهابيه عن حرمة ذهاب العالمه المسلمه

الى الفضاء بدون محرم وصرح بان المرأه بطبيعتها

تعشق الغوايه وقد اكرمها الاسلام بضروره وجود

محرم معها فى خروجها من منزلها مابالك بالخروج

للفضاء
واعلنت جماعه احنا بس اللى مسلمين والباقى كفره

المصريه على موقعها على الانترنت بعدم جواز

سفر العالمه الى الفضاء وبأن ما يحدث هو مؤامره

من الدوله الغربيه واللاتنينيه واليابانيه على الاسلام

ونساء المسلمين وقد سيرت الجماعه مظاهره

حاشده خرجت من الجامع الازهر تندد بالحدث

وتعالت الهتافات حسن البنا يا حبيب ادخل ادخل تل

ابيب (علامة تعجب كبيره قوى(
وبدوره اعلن الشيخ يوسف البدرى فى مؤتمر

صحفى كبير بالامس انه قرر رفع دعوى حسبه

على العالمه لمنعها من القيام بهذ الجرم العظيم

ورفع دعوى تكفير ضدها ان هى رفضت الامتثال
وقد شغلت القضيه اغلب البرامج الحواريه فى

القنوات الفضائيه العربيه ففى برنامجه على قناه

كلو حرام اعلن الشيخ زعرور ان هناك اشكاليه

اخرى فى سفر العالمه الى الفضاء وهى عدم

ارتدائها الزى الاسلامى وهو النقاب الشرعى ابو

عين واحده ورغم ان ملابس الفضاء تغطى جميع

جسم المرأه لكنها لاتفى بالغرض فهى تمثل تشبهها

بالكفره من اليهود والنصارى فى ملابسهم
وفى برنامج حوارى اخر اعلن احد المشايخ بانه

لكى تحل القضيه لابد من العوده لفتوى الشيخ عزت

عطيه ارضاع الكبير لانها ستجعل من زملائها

الرواد محرم بالنسبه لها
وفى اتصال مفاجىء بالقناه خرج الشيخ عزت عن

صمته واعلن ان فتواه مختصه بفقط بارضاع

المسلمين وليس الكفره الامريكان لان لبن المسلمه

محرم على الكفار
وقد شهدت عدن مدن اسلاميه مظاهرات احتجاجا

على خروج العالمه الى الفضاء بدون محرم ففى

طهران وصف المتظاهرون امريكا باشيطان الاعظم

واحرقو الاعلام الامريكيه فى الشوارع وكذلك

شهدت باكستان واندونسيا واليمن مظاهرات من

هذا القبيل
وفى تسجيل صوتى للشيخ الظواهرى الرجل الثانى

فى القاعده اعلن فيها الجهاد الفضائى ضد امريكا

الكافره وبان القاعده ستدمر الماكوك الامريكى الذى

سيخرج الى الفضاء حاملا معه العالمه المسلمه
وحول ابداء ارائكم فى هذا الموضوع زورو موقعنا

على الانترنت لمشاهده الاستفتاء
هل انت
مع
ضد
ماليش دعوى
‏قال غير معرف…
كنت فاكر انك حتقولى انك اتعاكستى والا يبقى ماعندهمشى نظر
‏قال إيمان قنديل
شفي ياقطة اللي بيحصل في مصر ده صعب جدا، أنتهاك حريات وتحرش وأنتهاك أعراض عيني عينك،لإننا في بلد تسودها الفوضي وغايب عنها القانون لو فيه قانون بيعاقب وفيه شرطه وأمن في الشوارع كان محدش قدر يتجرأ على بنت ماشيه في الشارع




كل سنه وانت طيبه ورمضان كريم
‏قال Desert cat
Hossam
لو لسه موجود قولى هتجيبه منين
اصل فى الحقيقة مش لاقية ابو شمعه ده خالص
كل سنة وانت بخير يا حسام
‏قال Desert cat
صفا سارة
طبعا انا فرحت اوى من موقف الراجل المحترم وده ان دل فعلا يدل على ان فى ناس كويسه وفى خير لسه فى الدنيا
تحياتى صفا
‏قال Desert cat
عمو عصام الحبيب
اولا وقبل اى حاجه
انا يشرفنى جدا تنادينى بابنتك واتمنى اكون عند حسن ظنك يا احلى بابا عصام
:))
تحياتى وشرفتنى جدا
‏قال Desert cat
A.SAMIR
طيب هى اللوثة دى مش ممكن يكون لها علاج يا دكتور ؟؟
‏قال Desert cat
karim
اهلا يا كريم كل سنة وانت طيب ومبروك الزفاف السعيد
الحقيقة استغربت جدا لسؤالك البنت كانت لابسه ايه ؟؟
حتى لو البنت ماشية عريانة هل ده مبرر للتحرش بيها ؟؟
يعنى انت انسان متربى وعندك اخلاق لو دعتك فتاة ليل هتروح ؟؟ ولا هتغض بصرك وتلتزم باخلاقك وبتربيتك ؟؟
ومع كلاً يا سيدى البنت كانت لابسه جيب جينز طويلة على فكرة لحد الأرض ولابسه قميص ابيض وتصدق يا كريم انها كانت محجبة لاء ومش اى حجاب دى لافه طرحتين فوق بعض ... شوفت بقى ان البنت مش كانت عريانة
‏قال Desert cat
مطلق
الظاهر يا كريم ان مبقاش فى حل غير كدا
واللى مش تلاقى سيلف ديفنس تشترى لها مطوة
‏قال Desert cat
مفكر قلق على مستقبل البلد
يا استاذى للاسف عند سماع كلمة تحرش تجد السؤال الذى لم يمل البعض من تكراره كانت لابسه ايه وكانهم يتفننوا فى ايجاد مبرر للمتحرش كما حدث فى التحرش الجماعى فى شارع جامعة الدول عندما تم استضافة الشباب اصحاب المحلات اللى اتدخلوا ودافعوا عن البنات كانت كل التليفونات اللى جت البرنامج سؤالهم واحد البنات كانوا لابسين ايه والمفاجأة ان الشباب قالوا انهم 2 محجبات التالتة منقبة
ولما لم يتلقى المتصلون اجابة شافية فكروا فى مبرر تانى وهو ايه اللى نزلهم فى يوم عيد ومشاهم فى شارع جامعة الدول وهو معروف ان سمعته مش كويسه الا اذا كانوا رايحين لغرض ما .. وكان سكان شارع جامعة الدول ساكنين هناك لغرض ما ويحيا المتحرشين
‏قال Desert cat
سمكه واحده
من يوم انتشار الفضائيات وكل شيخ ومفتى لكل مشاهد وجميعهم همهم واحد السبوبة والرزق يزيد واكبر دليل مظاهر التدين اللى انتشرت والافعال التى لا يرتكبها اكثر الحيوانات شراسة
تحياتى
‏قال Desert cat
Migo Mishmish
اااااااااه يا ميجو فكرتنى لما كنا بنقعد محمد جنب مينا وفاطمة جنب مريان ونعمل زينة رمضان بايدينا وقبل الفطار نشوف عمو فؤاد وبعد الفطار نشوف جدو عبده وننزل الشارع بفوانسينا وفى العيد كله بيهنى كله ومتقدرش تفرق بينا السمة اللى الوحيدة اللى كانت بتجمعنا ان كلنا مصريين .. حاسة ان الشعب اللى بجد هاجر وجالنا شعب تانى مستورد .. تفتكر مصر ممكن ترجع تانى يا ميجو ؟؟
‏قال Desert cat
Migo Mishmish
رد يا ميجو وخد راحتك
انا شخصيا بيحصلى حالات قيئ لما بسمع كلام زى كانت لابسه ايه اه اكيد كانت مشيتها مش كويسة لاء كانت بتضحك فى الشارع ومبررات من هذا القبيل مع ان الستات اللى عندها 60 سنة بتتعاكس فى الشارع .. معلشى برضه فى حادثين اغتصاب اخريتين حصلوا مش عارفه بطلاتهم كانوا ماشيين عريانين ولا لابسين ايه واغروا المغتصب ازاى ؟؟ اصل الاولى كانت لطفلة عمرها 9 سنوات والتانية لعجوز عمرها 70 سنة
‏قال Desert cat
الكلمة نور
ممكن يتولع فيهم فى وقتها برضه عادى
‏قال Desert cat
мσ∂έέ8
ميرسى جدا
كل سنة وانت بالف خير
‏قال Desert cat
أنا حر
نفسى بجد يتفعل قانون للمتحرشين ويتم تطبيقه على مراى ومسمع من الجميع
واللى هو اخصاء المتحرش علشان يموت بعارة ونخلص
‏قال Desert cat
مفكر قلق على مستقبل البلد
بعد ان ادان الجميع الفعل واشجب واستنكر يتم الصمت حتى تثار قضية اخرى ويتم جريمة تحرش او اغتصاب اخرى ونشجب ونستنكر وهكذا

تحياتى
‏قال Desert cat
Anonymous
ايه ده هو لسه حيتم اسئلة الشيوخ والمناضلين والمجاهدين دى تتقتل على طول ازاى تسمح لنفسها اصلا تخرج للعلم والمعرفة واذاى تدى نفسها الحق اصلا تفكر فى الخروج للفضاء ده فسق من عمل الشيطان
‏قال Desert cat
Anonymous
لا ءوالله انا املك الجرأة الكافية يعنى ان اللى يفكر يفتح بؤه اهزئه واهزء اللى يتشدد له كمان
هاي الظاهرة مش بس بمصر لكنها انتشرت بكل مكان
المفروض انو الشرطة تتولى هيك امور و تنتشر دوريات تحل هاي المشاكل في كل مكان زي الدول - واخدة بالك الدول

مرة سافرت لمكان ما - دولة - من الدول الغربية العالم ماشية و بتحكي و الناس و كل 100 متر فيه دورية شركة و امان ما الاقيلك الا شبابنا الهمام بس سمعونا بنحكي عربي قربوا منا كتير و بلشوا يخففوا دم و هددتهم بالشرطة و فلوا و هم بقولوا هيك يا بنت العرب الله يسامحك
تخيلي . في الاخير انا اللي بنظرهم غلطانة ؟

بس و الله موقف الرجال عجبني بجد رجال

شكلي حكيت كتير صح ؟
‏قال Desert cat
jafra
ماهى البنت مدانة فى جميع الاحوال فى الدول العربية واللى يدهشك اكتر انك تلاقى واحدة ست واقفة بدل ما تقول كلمة كويسة او تقول للشباب التافه ده عيب تلاقيها هى كمان بتلوم البنت
طبعا لازم تدخل قوى من الشرطة لكن الشرطة هى كمان فى الغيبوبة
تحياتى

المشاركات الشائعة