مسلمو المهجر والمطالبة بتطبيق الشريعة فى الغرب

مقال كتبه الأستاذ حامد عبدالصمد والمقيم بإحدى دول أوربا

ناقش فى مقاله ما يريدونه مسلمو المهجر وهو تطبيق الشريعة فى بلاد الغرب الكافر ألا هما لما عايزين يطبقوا الشريعه سابو ليه بلاد الإسلام الحق واللى كل يوم بيزيد فيها التدين الظاهرى من لحية ونقاب لكن حدث ولا حرج عن السرقة والنصب والإحتيال والقتل والاغتصاب والتحرش بالاطفال قبل الكبار ؟؟

ولد الإسلام غريبا وسيعود غريبا"، مقولة منسوبة للرسول يفسرها المهاجرون المسلمون فى الغرب على هواهم. أنصار الفكر السلفى والإخوانى يرون فيها نبوءة أن أسلمة أوروبا قادمة لا محالة وأن شرارة الثورة الإسلامية ستندلع من بلاد الفرنجة قبل أن تعود نارها المتأججة إلى البلاد الإسلامية.

ايشى خيال يا ناس يعنى الاخوة المتأسلمين بتوع المهجر رايحين يأججوا نار الإسلام فى بلاد الفرنجة وسايبينها هادية خالص رماد فى بلاد الاسلام ؟؟ طيب نظرة سريعه كدا على طالبان واللى بيحصل فيها من تشويه وجوه لقتل للى بتفكر فى ابسط حقوقها وهى الخروج للتعليم حتى هدموا المدارس ؟؟ هو ده برضه من تعاليم الاسلام ومن الشريعة ؟؟ دى اول آية نزلت على الرسول كانت إقرأ ؟؟ وصلت بيهم الدرجة لتحطيم المحلات التى لم تبيع السواك وحبة البركة اصل معجون الاسنان حرام ؟؟ والصيدليات من عمل الشيطان

عايزين تطبقوا الشريعة فى اوربا علشان يزحفوا بسرعه البرق نحو التخلف وحياة الصحراء .. عايزينهم فى اوربا يقطعوا ايد اللى بيسرق ما هى بتتقطع فى السعودية وبالرغم من كدا برضه لازال فى ايادى كل يوم جمعه بتتقطع وده معناه ان فى ناس لسه بتسرق

بنظرة سريعه على دول اوربا الكافرة اللى مسلمين المهجر رايحين يطبقوا الشريعه عندهم وبنظرة لبلاد العرب الجميلة الوديعة اللى مش فيها اى حوادث ولا اى مصايب والناس عايشه حياتها كلها فى ترف وسعادة اما دول اوربا ياى على اللى بيحصل فيها من اشياء مقززة الشوارع فيها حدث ولا حرج اللى بياكل بيرمى تحت رجله واللى فى ايده منديل بيرميه فى الشارع مع ان النظافة من الايمان .. الستات فى الشارع تزعق فى اطفالها وممكن يضربوهم فى الشارع برضه مش فارقه مع انه انكر الاصوات لصوت الحمير وبلاش اتكلم عن الشياكة والاناقة اللى بيتمتعوا بيها فعلا لازم اوربا تمشى على العجين مش تلخبطة وحكومات دول اوربا فعلا حكومات ساذجة هتنفذ لهم كل اللى يطلبوه ويقولوا لهم سمعا وطاعه .. سيبوا اوربا فى حالها

Comments

ممكن أعرف قرائتى مقال حامد عبد الصمد فين؟؟
Desert cat said…
فى اليوم السابع
Anonymous said…
اسوا مافى هوجة الهوس الدينى الذى ابتلينا بها
انها تقضى على البيئه الصالحه للتفكير واعمال العقل وبالتالى تجديد الفكر والحياه
ومهما حاول هؤلاء المهووسون فان الغرب عانى كثيرا من الأستبداد والجمود والأجرام باسم الدين ونيابة عن السماء
ولم ينطلقوا الا بعد ان حطموا قيودهم فلا خوف من ان يتنازلوا عن كل ما حققوه لسواد عيون مجموعه من المهووسين دينيا
المفروض يحترمو قوانين دول اوربا

و بعدين هما الاغلبية لو ماشين بمنطق البية و اقلية يبقى يحترمو الاغلبية لو رافضين المنطق دة

يطبقو عندنا الاول و يبقى مش على اساس اغلبية دينية او عرق معين
Anonymous said…
يتوهم هؤلاء المهووسون دينيا ان لديهم شيئا يقدمونه للعالم
فينظر العالم فلا يجد لدى المسلمين الا الخراب والدمار وقتل الأبرياءباسم الجهاد
ولا تغادر مخيلة الناس ذلك المنظر الكئيب لملثم يحمل رشاشامن صناعة الكفار طبعا او حزاما ناسفا لقتل من يدفعه حظه العاثر للوجود بجواره
او منطق اهبل يقول مادام الغرب يرسل قواته
فلنا ان نقتل منهم من نصادفه
وقد يكون من بين هؤلاء الضحايا من يعارض سياسة حكومته
او يرى العالم صورة امراه وئدت جزئيا كما فى الجاهليه باكوام من الأغطيه فلا يسمح لها الا بالنظر من خلف استار ثقيله الى العالم
بينما دول فى أسيامثل كوريا الجنوبيه او تايوان
قفزت قفزات هائله لتنافس اعتى الدول المتقدمه صناعيا
والمسلمون لا يزالون
يحاهدون لتغطية شعر النساء واخفائهم من الحياه
فماذا يغرى العالم فيى ما لدينا من خراب ودمار
العزيزه قطة الصحراء
هؤلاء المتأسلمين اساؤاللملياروالنصف مسلم الذين يعيشون فى كوكبنا ويعتقدوا انهم يستطيعوا تغيير العالم ولكنهم نجحوا فقط فى ان يجعلوا العالم يكره المسلمين ويحاربهم.وهم لن يغيروا لااوربا ولاامريكا..بل ولن يستطيعوا ان
يغيروا بلادهم الاصليه.وسيهزموا شر هزيمه
وشكرا لزيارتك لمدونتى..ز
عمو عصام said…
عزيزتى قطة الصحراء:لدى الكثير يمكننى إضافته عن التدين الظاهرى وذلك بحكم عملى بالضرائب وإحتكاكى اليومى بمحاسبين ومحامين وممولين وقد إكتشفت أن الخطيئه الوحيده لديهم هى الزنا أو العلاقات الجنسيه خارج نطاق الزواج أما الرشوه والسرقه وخلافه فهى أشياء عاديه يفعلها الإنسان ثم يؤدى صلاته وصيامه فهل هذا ماسينشرونه فى أوروبا ؟وهل لم يكفهم ضياع بلادهم فذهبوا لأوروبا لتدميرها؟عموما قلبى عندك وربنا يسترها معك ولا يستحلوا دمك
اوروبا و حكامها و شعوبها بداو في الشعور بخطر موجات الهجرة اليها وربما كانت موجات التعصب المضاد من نتائج هذه الانماط من التفكير وربما كانت حوادث التعصب ردة فعل تجاه من شوه الصورة الاسلامية الصحيحة
مفكر said…
دعونا ننظر للموضوع نظره تحلبليه متعمقه
هناك موقفان من الدين ودوره فى الحياه
الموقف الأول وهو الصحيح والأقرب لروح الأسلام يتلخص فى العباره المشهوره اعقلها وتوكل
اى قم بكل المطلوب منك كانسان يفكر ويخلل ويصل الى الحل بالتفكير ثم يضيف الى ذلك راحة الأيمان النفسيه
وهذا رغم مكابرة المكابرين هو موقف العلمانى المستنير
والموقف الثانى الذى ابتدعه اصخاب المصلحه فى الحكم والسيطره
ويتلخص فى العباره التى تتردد كثيرا كلما واجهنا مشكله فنسمع الرد السهل الجاهز الغامض السبب هو البعد عن الدين
وكان علينا ان ننتظر حتى يتمسك كل الناس بدينهم ويصبحون جميعا نمزذجا للتدين الصحيح وهذا مستحيل ولم يحدث ابدا فى اى عصر
حتى ولو كانت المشكله زيادة الرطوبه فى الجو وخطورة هذا الموقف هو الترويج للأتكاليه والجمود
مما يؤدى بالضرورة الى تفاقم المشاكل مما يدفع الى الياس واللجوء الى العنف والأرهاب او الى الدعاوى الغريبه المنفصله عن الواقع والزمان والمكان مثل دعوة الشريعه فى اوربا
كلما واجه المهاجر مشكله فى حياته بالمهجر
وهنا فى شعار الأسلام هو الحل ...كشعار غامض لو سالت من يرفعه عن كيفية تطبيقه فى مشكله محدده عجز وغطى عجزه بتكفيرك
هذا باختصار تصوير للحلقة المفرغه التى ندور فيها
Anonymous said…
لماذا يخشون الحقيقه
متابعة لقصة مازن عبد الجواد الشاب السعودى الذى فضح مايجرى خلف ابواب مغلقه
من مهازل جنسيه
على تيلفزيون ال بى سى اللبنانى
بدلا من ان يواجهوا الحقيقه مهما كانت بشعه فى مجتمع مريض يمنع الأختلاط كل ما فعلوه هو القبض على الشاب واخيرا غلق مكتب المحطه فى جده
ونندهش بعد ذلك من تخلفنا المزرى
AnGeL said…
انا بس قرأت العنوان ضحكت
ما بالك بس قريت الموضوع وطبعا مع اسلوبك الساخر العسل

لا هو البلاد العربية زي الفل وصار زي اروبا بعصر النهضة

اما الحكومات الغربية داعرة وفاجرة على قولة عادل امام

ولازم يطبقو فيها الشريعه وجاكلين وباتريسيا وكاثرين يلبسو النقاب
والحج بوب و مارثن وجميس
يطلقو اللحى ويقصرو الجلابيب

ايه التخلف اي شريعه تنتشر بالغرب وهم اساسا لما راحو الغرب عارفين ان في دساتير معينه للدول دي

يلا ماعلينا

حتشوفي مصيرهم القادم هاهاها
Desert cat said…
Anonymous
كتخيلين ان الغرب ساذج هينفذ لهم ما ينالوا
دول على ادق تعبير شوية مجانين
Desert cat said…
مواطن مصري
القى نظرة واحدة على البلاد اللى بيتم فيها تطبيق الشريعه زى قطع يد السارق وقطع رقبة القاتل .. هل الجرائم هناك انتهت ؟؟
Desert cat said…
Anonymous
فتيات وادى سوت تمت مساواة مدارسهم بالأرض اصل حرام البنت تدرس بعد الصف السادس الابتدائى
البنات بيخرجوا كتبهم تحت ملابسهم علشان الارهابيين اللى معيين انفسسهم اولياء الله على الارض بيرموا عليهم ماء النار وبيقتلوهم
هى دى الشريعه اللى عايزين يطبقوها فى الغرب ؟؟
Desert cat said…
سهيل ولى الدين علام
يا عزيزى هؤلاء مجانين عايزين يحللوا الفلوس اللىب يقبضوها ويقولوا لك خلاص لاسلام هيعم الغرب الكافر
اذا كانوا فى بلاد المسلمين ابشع صور الجرائم وانعدام القيم ناهيك عن حياة الجهل والتخلف
فلو اتيت بعربى ونظرت الى مقتنياته لوجدتها جميعها صناعة الغرب الكافر اللى عايزين يطبقوا فيه الشريعه

انا تشرفت بزيارة مدونتك
تحياتى سهيل وشرفتنى جدا
Desert cat said…
عمو عصام الحبيب
انا كنت فى احد المصالح الحكومية فى رمضان اللى فات الموظف قاعد يقرأ القرآن وصايم وفى نفس الوقت فاتح الدرج تدفع مصلحتك تخلص
عايز ايه اكتر من كدا تدين بديل
ربنا يرحمنا
تحياتى لحضرتك
Desert cat said…
ذو النون المصري
طبعا دول اوربا مش بالسذاجة اللى متخيلها هؤلاء المجاذيب لكن عقولهم أهلتهم لكدا دول فى الغالب يستحقوا الشفقه
شرفتنى يا ابا عمر
:))
تحياتى
Desert cat said…
مفكر
ياااه مفيش موقع اخبارى ينشر اى حادث الا لما تلاقى الردود من عينةة الناس بعدت عن الدين ربنا بينزل عليهم غضبه لازم الناس ترجع للدين والستات يرتدوا الحجاب علشان يمنعوا الغلاء
مش مهم بقى تحصيح اخلاقهم ومش مهم اتقان العمل ولا الامانة ومراعاة الضمير الاهم هو المظاهر والجوهر ده بقى مش مشكلة اصل خلاص تم اختراقه
Desert cat said…
Anonymous
سياسة القمع ودفن الرؤس فى رمال الصحراء التى يحييون بها
Desert cat said…
AnGeL
صديقتى العزيزة
شوية المجاذيب دول فعلا خير رد على كلامهم هو الضحك على العته اللى ماسك فى عقولهم ان وجدت
ولا اجمل من اسلوبك فى تعليقك يا جميلة
شرفتينى
فهمتيني غلط انا بقول الي عاوز يطالب بحقوقة في الغرب بعتبار انة اقلية هناك


يدي حقوق الاقليات الي عندة في الشرق الدول العربية اذا كان رافض انو يدي حقوق الاقليات بتاعت الشرق

يبقى يستاهل الي هيجرالو من حكومات الغرب
كله بسبب الاحزاب اليسارية الليبرالية فى اوروبا و اميركا
هما المسئولين عن الحرية اللى بينعم بها الارهابيين هناك
شفتي بقى واحد زيي بيحب بوش عن اوباما ليه؟
Desert cat said…
مواطن مصري
شكرا على التوضيح يا صديقى العزيز
Desert cat said…
The Count of Monte Cristo
والله انا شايفه ان الارهابيين دول مكانهم الطبيعى الغابات الاستوئاية يعيشوا فيها وياكلوا فى بعض هناك

Popular posts from this blog

قميص دهشور

كل تحرش وانتوا طيبين