باتت رمزاً للمقاومة والصمود

كنت قاعدة اشوف ردود افعال المتعرعرين على لافته اعتذار كتبها زوج مصرى لزوجته يعتذر لها عن الاساءة التى وجهها لها أمام عائلته لذلك حب يرد كرامتها قدام ملايين البشر ويعتذر لها .. وعن ردود الذكور معدومى الإحساس حدث ولا حرج اللى يقول تافه واللى يقول عايز شهره واللى يقول الراجل مش بيعتذر لست .. واضح انهم مش يعرفوا ان الراجل هو اللى بيعتذر عن أخطائه فعلا حتى لو كان لطفل مش لزوجته

فجأة لاقيت الصديق العزيز مواطن مصرى باعت لى لنك اللحظات الأخيرة من حياة ندا سلطان اللى حاولت مرارا وتكراراً مش اكتب عنها ولا أتكلم فى الموضوع ده لأن العالم كله شايف ومتابع ما يفعله الارهابيين باسم الدين فى ايران

اللى نفسى افهمه هو نجاد قاعد يعاند فى مين ؟؟
ناس مش طيقاه ولا عايزاه وعاملة ثورة علشان يغور عايز يحكمهم بالقوة الجبرية إزاى ؟؟
ناس بتطالب بحريتها وبأمنها وسلامتها من اصحاب العمائم وفتاوى التباكى على كل لون وحسب الهوى والمزاج الشخصى .. يحجر عليهم ويكبس على نفسهم بتاع ايه ؟؟
تزوير الإنتخابات واضح للأعمى قبل البصير ... قوات الحرس الثورى الايرانى كانت قاعدة جوا لجان الإنتخابات تعمل ايه ؟؟؟
طيب الناس الحرة اللى نفسها تتنفس حرية مش عايزاك ومش طيقاك
بدل ما تسيبهم وتغور طالق عليهم يقتلوا فيهم وينهوا حياتهم .. ده ايه اسمه ؟؟؟
هى دى الديموقراطية اللى بيتكلم عليها الاسلاميين ؟؟
يا اما معايا يا اما القتل هو الحل واصحاب العمائم والفتاوى موجودة تحلل دم الأبرياء وتفت على مزاج الحاكم اللى الناس مش عايزاه ولا طيقاه .. الاخوانجية مش طالع لهم صوت يعنى من اللى بيحصل فى ايران ومن قتل ندى اللى هى من بين آلاف الأبرياء اللى نفسهم فى حياة حرة كريمة ؟؟؟ مش دول مسلمين برضه ؟؟ ولا صوتهم مش بيطلع إلا علشان اطفال غزة ووزة .. و لازم يكون فى مصلحة علشان يتكلموا ؟؟ وفين آية الله من اللى بيحصل ده ؟؟ فاكرين العالم مش بيتفرج على المهزلة طالما محرمين الاعلام الإيرانى بث احداث الثورة وقتل الابرياء .. نجاد قاعد جوا برجه العاجى متخيل انه مش مفضوح على الفضائيات شكله لسه عايش فى العام الثانى قبل الميلاد ومش سمع عن كلمة اسمها موبايل .. وان دم ندى اللى الاسلاميين حرموا على والدها الصلاة عليها وامروه بدفنها مباشرة لعدم لفت نظر الاعلام والرأى العام ، هى الناس دى الغباء متمكن منهم بالشكل البشع ده ازاى ؟؟ لن يغفر لك التاريخ دم ندا واخوانها من الابرياء يا نجاد

تعليقات

‏قال غير معرف…
ياريت كل المتشدقين باسم الاديان يشوف منظر ندا لو كان يملك قلب
‏قال Abd Al-Rahman
طبعا زيارة اولى لمدونتك
***********
جزء كبير من حديثك صحيح من وجهة نظرى ، فبالطبع لا أخد عاقل يتقبل فكرة اراقة الدماء وازهاق ارواح الأبرياء ، لكن انا فقط سأرد على نقطة استغربتها من حديثك وهى
"الاخوانجية مش طالع لهم صوت يعنى من اللى بيحصل فى ايران ومن قتل ندى اللى هى من بين آلاف الأبرياء اللى نفسهم فى حياة حرة كريمة ؟؟؟ مش دول مسلمين برضه ؟؟ ولا صوتهم مش بيطلع إلا علشان اطفال غزة ووزة .. و لازم يكون فى مصلحة علشان يتكلموا "
حضرتك الاخوان اوغيرهم يكلموا ليه اصلا فى حاجة زى كده ، ده شان داخلى ايرانى ايرانى ، الناس اللى ماتت ايرانيين واللى قتلوهم برضه ايرانيين ، لكن غزة أو فلسطين عموما دى بتاعة المسلمين كلهم لحد ماتتحرر ، ده غير ان اللى بيموتو مسلمين واللى بيقتلوهم يهود ، الفكرة ان فى ايران احنا اصلا مش عارفين مين الصح ، نجاد بيقول انه فاز ، وموسوى بيقول لا ، فنجاد بقى رئيس جمهورية وموسوى بقى معارض ، موسوى بيعمل مظاهرات ، لو اتسابت ممكن تؤدى لانقلاب فبيقمعوها فبيؤدى لاحتقان اكبر ، فموسوى مابيبطلش تظاهر ،ونجاد مابيبطلش قمع ، احنا بقى كمصريين مالناش علاقة اصلا باللى بيحصل ، دى ناس مختلفة مع بعض ، لكن فى الاخر ولاد شعب واحد ، نجاد موسوى بالنسبة لنا ماتفرقش ، مين الصح ومين الغلط مانعرفش ، المسئول عن الضحايا نجاد عشان قمعه ولا موسوى عشان محاولات انقلابه ، برضه مانعرفش ، ومايخصناش ، وحضرتك بتقول دى الديمقراطية اللى بيكلموا عليها الاسلاميين ؟!، هم أصلا كلهم اسلاميين لأن فكرة المرشد الأعلى هى المسيطرة فى ايران ، وايران اصلا دولة دينية بما تحمله الكلمة من معانى سواء نجاد حكم ، موسوى حكم ، هو نفس النظام ، الموضوع مش حزب وطنى و إخوان يعنى ، هههههه
.........
خلاصة الكلام ان احنا ممكن نعترض من الجانب الانسانى لأنها فعلا مشاهد صعبة جدا على النفس ، لكن فى الجزء السياسى أعتقد ان احنا كلنا كمصريين المفروض ماندخلش فى حاجة زى كده ، وخصوصا ان على الاقل الناس دى عملت انتخابات رئاسة ، ههههههههه .....
*********
موضوع جميل
واستمتعت بزيارتى لمدونتك
وان شاء الله فى استمرار للزيارات
*********
دمتى بخير
‏قال غير معرف…
هذه بداية نهاية الدوله الدينيه فى ايران ولو بعد حين وجرس انذار لكل السذج المؤمنين بان الحل هو تولى بشر الحكم باسم السماء
‏قال غير معرف…
درس من اعرق البلاد الديمقراطيه
لا ديمقراطيه مع اعداء الديمقراطيه
اقروا الخبر وفكروا
ددت الأحزاب الليبرالية والتقدمية بصعود التيار العنصري الى البرلمان الأوروبي . ونظمت مجموعة من المحتجين تظاهرة أمام البرلمان . وأشار دون جوثري المتحدث باسم الغاضبين بأن الحزب الوطني البريطاني عنصري ويمثل التيار النازي ولابد التصدي لهذا المرض قبل تفشيه في بريطانيا
أن بريطانيا تقف مؤسساتها الديمقراطية والحكومية بحسم ضد هذه المنظمات وتمنع انتشارها . .
‏قال Jannah
وفيه أيضا أشخاص أصحاب توجهات اسلامية ماتوا في المعتقلات
وتعرضوا للتعذيب لما قالوا وجهة نظرهم

هذا أيضا اسمه انتهاك

الديموقراطية و العدالة لازم تكون للكل بصرف النظر عن توجهات كل واحد
و الشعب بيختار اذا كان يريد شخص بهذا التوجه أو ذاك
سواء عاجبينا او مو عاجبينا

يالنسبة لايران
مانقدروش نقولو انه كان تزوير أو ماكانش ..كل شي لازمه دليل
فيه ناس ضد نجاد و لكن أيضا فيه ناس مع نجاد و مو قليل يعني

دايما هناك مرشح فائز و مرشح خاسر أوباما نفسه مو كل الأمريكيين كانوا يريدونه
بس عمرنا ما شفنا الناس بتطلع في الشوارع بهذه الصورةو الغرب يتكلم و يعيد و يزيد و يشجع و يدعم
ما تكلموا عن الديكتاتوريين اللي في المنطقة و اللي قاعدين 70 سنة في الرئاسة بانتخابات مسرحية مضحكة

اوووه لا ...هؤلاء حلفاءهم


لأنها ايران فكان لازم يصير مظاهرات والغرب يتكلم و يتحرق من اجل الشعب الايراني المسكين !!!!!!!

في افريقيا المظاهرات لا تتوقف و مناظر الدم و القتل و الأطفال اللي حاملين سلاح و منخرطين في الخراب كل يوم نشوفها
ومع ذلك لم يتحرق الغرب من أجلهم
تدرين ليش؟

لانه بالفعل دايما المصلحة هي اللي بتخلي الناس تتكلم
يعني
مو بس الاخوانجية اللي بيتكلمو بمصلحة




أنا مادافع عن النظام في ايران احنا عارفين انه ظالم
ولكن بحاول أقول انه ما يحدث في ايران فيه أطراف خارج ايران من مصلحتها انها تهيج الشارع بهذه الطريقة
تهيجه فقط ما يهمها انه الموضوع ينتهي بظروف أحسن للايرانيين و حكم يتناسب مع تطلعاتهم
ما يهمها لا ندى و لا غير ندى
ندى مجرد صورة ستتداولها وسائل الاعلام من أجل اثبات بشاعة النظام في ايران..النظام الاسلامي

وان كان احنا عارفين انه اسلامي بين قوسين


و بالتالي مادام الموضوع هكذا فأنا باعتبر اللي فايران شأن داخلي و بتمنى انهم ينجحوا في انهم يديروا الأزمة بأقل خسائر و يفتحوا قنوات حوار و مصالحة بدون ما ييجي ناس من برا يفرضوا عليهم اختيارات تانية على مقاس مصالحهم في المنطقة
‏قال غير معرف…
مفاهيم كثيره تحتاج لتوضيح
اولا فكرة الديمقراطيه للجميع بما فى ذلك اعداء الديمقراطيه والشعب يختار
هذا الكلام يشبه نصيحة مارى انطوانت عندما علمت ان الشعب لا يجد الخبز فنصحته بان ياكل جاتوه
الموضوع ليس بهذه البساطه او الحلاوه
فالديمقراطيه ليست صناديق الأقتراع
لو اجريت باكر انتخابات فان الناس ستختار الرجل الطيب المتدين بسبب تغلب العاطفه الدينيه وانتشار الأميه الأبجديه والسياسيه
بل وغياب الحياه السياسه نفسها
لأكثر من نصف قرن
سيختار الناس الرجل الطيب المرتدى جلابيه بيضه ويمسك سبحه ومربى دقنه كما وثقوا فى مثل هؤلاء من نصابى شركات توظيف الأموال
الدبمقراطيه اسلوب حياه لابد اولا ان توجد فى البيت ومحل العمل والمدرسه
والشارع
ولا يجوز ان نقفز الى الجرى ونحن لا نقدر على السير
نحتاج لتغيير مجتمعى شامل وتنشيط الأحزاب وليس حصارها وهى المدارس الطبيعيه لتربية الناس سياسيا
مع الوقوف بكل قوه صد اعداء الديمقراطيه كما فعلت مؤخرا دولى راسخة فيها الديمقراطيه كبريطانيا
نحتاج لفترة انتقال خمس سنوات على الأقل
ننفذ فيها برنامجا مكثفا للأنتقال للديمقراطيه اذا صدقت النوايا
ولكن اشك فى وجود هذه الرغبه عند الطبقه الحاكمه
اما عن ايران فليس بها انتخابات كما نتصور بين مرشخين احرار هم جميعا عرايس يمسك بخيوطها المرشد الأعلى وما هؤلاء الرؤساء سوى سكرتاريه لتنفيذ مايراه
وهو باق لا يتغير ابدا
اما ان مايحدث فى ايران هو شان داخلى فهذا التبرير لم يعد مقنعا فى عصر تحول العالم الى قريه صغيره فما يحدث فى ايران داخليا يؤثر على المنطقه كلها
وهى منطقه لها اهميتها الكبيره وتختلف عن مناطق اخرى لا تحظى بكل هذا الأعتمام وهذا طبيعى فانه يوجد علم او علوم تبخث فى الأهميه الجيوبوليتكيه لمنطقه دون اخرى
واخيرا لا يستطيع كائنا من كان ان يحرك هذه الجماهير الغفيره مع تعرضهم للقتل الا اذا كان لدى هؤلاء دوافعهم الشخصيه القويه ضد عسف الحكم الدينى باسم السماء
‏قال غير معرف…
أنا أنتقد معاملة المتظاهرين بوحشية

لكن فى نفس الوقت أعتبره شأن داخلى إيرانى

مينفعش نتكلم فيه من الناحية السياسية لإننا لا نملك معطياته

و مينفعش برضة كل حاجة نقول الإخوان

لإن الإخوان ملهمش إنهم يتكلموا فى شأن داخلى لدول


أمر غزة يختلف كلياً

شعب مقهور بيحارب محتل ظالم .. هنا بأه لو أى حد فى الدنيا متكلمش و مأدنش .. و نصر المظلومين يبقى غلطان

لكن خلط الأمور بهذا الشكل

و نحط الشأن الإيرانى على الغزاوى
!!

مينفعش
‏قال AHMED SAMIR
الفيديو في منتهى القسوة و البشاعة
‏قال غير معرف…
باختصار
كل من يدعى حقا الاهيا لحكم الناس او يدعى انه سيحكم نيابة عن السماء وباسمها
وفى اى صوره من صور الحكم مرشد الجمهوريه او خليفه او امير او رئيس هو بالتعريف معادى للديمقراطيه ومعادى للعصر ولنضال الشعوب من اجل الحريه والكرامه
ويجب ان لايسمح له باستغلال الديمقراطيه للقضاء عليها
دول مثل بريطانيا والمانيا وهى عريقه ومتخضره ومبادىء الديمقراطيه راسحه فيها تفعل ذلك
‏قال غير معرف…
قطعا كان الأخوان سيتكلمون باعلى صوت
لو كان فى الفيديو الماساوى قمصان نوم
او صور لهيفاء وهبى
فهذه هى اس البلاء الذى حل بنا
ولن ترفع الغمه الا باعدام قمصان النوم وهيفاء وهبى ايضا..يا اخوانا الأخوان لا فكر لهم غير مافى كتب خطب الجمعه
وحتى هذه هم غير متفقين فيها
ويعلنون شيئا ويمارسون شيئا آخر
متى نتوقف عن التعلق بالأوهام ونفكر بجديه فى حياتنا
‏قال غير معرف…
الشان الداخلى
عندما نقول ان مايحدث فى ايران ليس شانا داخليا لا نقصد الموافقه على تدخل جهات اجنبه
وانما نعنى انه يهم من هم خارج ايران ايضا وعليهم ان يتابعوا ما يحدث عن كثب
وفرق بين الأهتمام والتدخل كبير
‏قال غير معرف…
اوافق على الدوله الدينيه بشرط واحد ان ينزل ملائكه اطهار ليحكموا نيابة عن السماء وليس بشر لهم نقائصهم كبشر
لا يحق لهم
ان ينوبوا عن السماء
‏قال غير معرف…
على استعداد ان اوافق على الدوله الدينيه لشرط واحد هو ان تنزل ملائكه من السماء اطهار تعرف ماتريد السماء لتحكم وليس بشر لهم نقائصهم كبشر لا يحق لهم التحدث باسم السماء
او يكسبون افعالهم قداسه تبرر العسف والوحشيه فى معاملة الخصوم
‏قال غير معرف…
ياسلام
مسلمين بيقتلوا مسلمبن فمناش دعوه
لكن يهود بيقتلوا مسلمين فلينا دعوه...ياسلام
يعنى لو سرق بيتك مسلم تسيبه ؟القتل والوحشيه من اى مصدر هى عند
البشر الحقيقيين مرفوضه مرفوضه
‏قال غير معرف…
ياسلام
مسلمين بيقتلوا مسلمبن فمناش دعوه
لكن يهود بيقتلوا مسلمين فلينا دعوه...ياسلام
يعنى لو سرق بيتك مسلم تسيبه ؟القتل والوحشيه من اى مصدر هى عند
البشر الحقيقيين مرفوضه مرفوضه
‏قال غير معرف…
والآن بعد كل ما قيل لماذا صمت الأخوان عما يجرى فى ايران ولا اقول اكثر من الصمت عن التعليق ولا اعنى بالطبع التدخل
؟السبب ببساطه هو هذا الفشل المدوى لفكرة الدوله الدينيه...
وكاننا فى منطقتنا امام خيارين كلاهما مر: الدوله البوليسيه او الدوله الدينيه البوليسيه
وامامنا المثل والغبى من لا يتعلم من تجارب الآخرين
والأخوان يدركون هذاويعرفون ان الأحداث فى ايران تنسف مشروعهم عن الدوله الدينيه مهما حاولوا تجميلها لحداع الناس عن الحقيقه
‏قال غير معرف…
القتل العشوائى فى شوارع بغداد
هلى الذين يحططون وينفذون هذا القتل العشوائى للأبرياء فى الأسواق ليسقط العشرات من العراقيين وليس من جنود الأحتلال...هل هؤلاء من جنس البشر وهل يستحقون ان يعاملوا كبشر
‏قال Desert cat
مواطن مصري
الله يرحمها ويهلك اللى كان السبب
‏قال Desert cat
Anonymous
لو شوفت ردود الفعل هتلاقيها عادية خالص
‏قال Desert cat
Abd Al-Rahman
نش ليك دعوة بمين ولا ليك علاقة بيمن ؟؟
وهل الجريمة تتجزأ
هو لازم اللى يتقتل يكون اللى قاتله يهودى او واحد على غير المله علشان تتدخل ؟؟
وبعدين هما الاخوان اساسا بيتدخلوا فى حاجه غير بالصراخ والعويل ماهو من سنين قاعديني يصوتوا ويعيطوا على غزة طيب فين الفعل .. يعنى مش شوفناهم لموا بعضهم مرة واحدة وراحوا مسكو سلاح وحاربوا اسرائيل يمكن كان يجى عليهم صاروخ ويخلصنا .. فى المقابل مش حد طالبهم يروحوا ايران بس هما فين من الدماء دى .. الاخوان لما بيتكلموا عن غزة بيقولوا لك انقذ اخاك المسلم وتبرع من اجل اطفال المسلمين .. وهى دماء ابرياء ايران برضه مش ملسمين ؟؟
‏قال Desert cat
Anonymous
بالرغم من حزنى واستيائى لما يحدث فى ايران لكن سعيدة ببدء انكشاف الغمة
‏قال غير معرف…
وهى حد قالها تخرج فى اليوم ده وقال ايه رايحة مع ابوها تتفرج على المظاهره يكون كانت رايحة تتفرج على سينما
‏قال Desert cat
Anonymous
اللى فى بلاد العرب مجرد ابواق كل يتمنى حكم ديمقراطى لكن لا يسعى
‏قال Desert cat
Jannah
فين اللى بيمتوا فى المعتقلات دول ؟؟
اذا كانوا فى اى مصيبة تلاقيهم لامين بعض وطالعين مقفلين الشوارع ومعطلين مصالح الناس وقاعدين يصوتوا على غرار خدوهم بالصوت وان الامن خرج يعمل تفرقه واخذ بطاقة عيل منهم يعملوا منه بطل قومى ومناضل شعبى وهو اخره واحد فاضى رايح ينفذ اوامر ولا عارف بيعمل كدا ليه ولا ازاى بس هى الاوامر جايه له كدا لازم يطلع يصوت ويصرخ ...
فعلا اتفق معاكى ان كل الناس بتعمل للمصلحة لكن لمصلحة بلدها وليس لمصلحتها الشخصية مع التمسح بالدين وان جيتى تناقشى وتساليهم انتوا فين من مصلحة مصر يقولوا لك طز فى مصر وشعبها .. طيب لو مسكتوا الحكم هتعملوا ايه يقولوا لك المعارض بالجزمة ... الكلام ده ولسه مش شافوا كرسى الحكم بعنيهم امال لو قعدوا عليه هيعملوا ايه ؟؟؟
اكيد مصر تقلب على ثورة ايرانيه
وان شاء الله لن ينالوها

تحياتى جنا
‏قال Desert cat
Anonymous
متفقه مع كلامك تماما
‏قال Desert cat
Anonymous
الجريمة لا تتجزأ
يعنى لو اخوك قتله واحد ايطالى هتطالب بالقصاص
ولو قتله جارك المصرى هتقول عفا الله عما سلف اصل اللى قتله مصرى الجنسية زينا ؟؟
‏قال Desert cat
A.SAMIR
دماء ندا عار يلطخ جبينهم المفروض لو عندم نقطة من الدم او ذرة من الكرامة كان استجابوا للشعب الايرانى
‏قال Desert cat
Anonymous
مش يتحقق ده الا بالرفض وانتفاضه الشعوب
‏قال Desert cat
Anonymous
هههههههههههههه
هما مش بيعرفوا يتكلموا غير فى قمصان النوم والله حالهم يبكى تحت المجلس لما بيتزنقوا فى اى مناقشه يقوموا رافعين الجزم زى الغجر
‏قال Desert cat
Anonymous
اعتقد ان كلمة شأن داخلى التى يتم ترديدها من قبل احد المعلقين
للتبرير ولحفظ ماء الوجه ليس اكثر
‏قال Desert cat
Anonymous
اه وياريت اللى يحكم يورينا التوكيل اللى معاه من ربنا بالحكم مش اى بطيخ ويقولوا اصله من الدين
LoooooooooooL
‏قال Desert cat
Anonymous
اساسا لابد من التخلص من السطلة الدينية وفي أي مكان في العالم لكونها اثبتت فشلها فلننظر الى حماس التى تركت المحتل واخدت قتل واعتقال فى الفلسطينين المختلفين معهم فى الفكر بخلاف الى فرض الحاكم باسم الدين لحصار فكري وثقافي يقتل الابداع ويسحق منطق العقل
‏قال Jannah
anonymous
اللي رد علي و تكلم عن الناس الساذجة اللي تصدق الجلابية البيضا و عن كيف يجب أن يتم الانتقال الديموقراطي
أقوله انت تتحدث عن مصر أنا أتحدث عن الديموقراطية كمبادئ
لازم نلتزم بيها و المطلوب المجتمعات تتفاعل مع هذه المبادئ بمراعاة ارثها و تاريخها السياسي
و لذلك لا يوجد نموذج بعينه للديموقراطية
يعني مو كلنا بنلبس نفس مقاس الفستان بس كلنا بنلبس نفس التصميم
:D
و القصد انه المبدأ لا يجب أن يخضع لأنه مو عاجبنا ما يناسب توجهاتنا
...
واذا كان في مصر الحزب الاسلامي يصوت عليه السذج في بلاد اسلامية أخرى الحزب الاسلامي يصوت عليه بالعكس ناس مثقفين و عندهم هذا التوجه
و بالتالي أنا تكلمت بالمبدأ مو بالنظر لظروف مصر أنا مصر ما عرف ظروفها تماما

ولي كلام كثير في هذه النقطة و لكن في مناسبة قادمة لأنه هذا الموضوع صار أرشيف

مشكورين :)

المشاركات الشائعة