القهر بغلاف الحرية الشخصية


ذات مساء مشرق وضعت كل خطوط الأرض خلف الشمس فى عزف حزين .. ربيعى تائه عن موقعه أحاول رسم إشراقات جديدة لكى يأتى المساء المنتظر .. أضع خطوطاً عريضة لرسم قلب يغذى أعماق الأعماق عند إحتضانه بعيداً عن أعين حاقدة بل فى موقع لا يحتوى سوى على أرض وقلب وسماء .. وفى وسط غفوتى واحساسى بنشوة سرحانى فاجأتنى بزيارة غير متوقعة وعلى غير العادة دون موعد سابق .. متجهمة الملامح عندما رفعت عينى وحينما رأت ابتسامتى المفعمة بالدهشة انهمرت دموعها وكانها أخذت إفراج لتوها من خلف أشد القضبان قساوة .. لم استطع الوقوف على قدماى من هول المنظر ولم أقوى على النطق لمجرد السؤال عما ألم بها بل تحجرت مقلتاى وظللت أنظر إليها دون أى حراك منى .. تركتها حتى روت دموعها وجهها الذى شعرت بأنه كالأرض التى فاضت بها المياه لتتسربل منها فى جميع الإتجاهات دون وضع حدود أو أى قيود حتى أغرقت اراضى الجيران من شدة دموعها المتدفقة .. كل ذلك وأنا أشعر برعشة من داخلى .. شيئ ما يحدث .. الكلام يقف على شفتى .. تركتها حتى هدأ الإعصار .. بدأت تتحدث بكلمات متقطعه لم أتبين منها حرف فشهيق دموعها سلبها صوتها .. استشعرت من خلال نظراتى انى لم اتبين شيئ حاولت جاهدة نطق كلمة على بعضها .. رجوتها الصمت قليلاً فلقد أوشكت العاصفة على الرحيل حينها نستطيع الحديث بكل سهولة ويسر ... كلمة السر خرجت من بين شفتيها وهى بابا .. بعدها أسترسلت فى الحديث إنضم إلى المحظورة منذ عام ونصف العام .. بعد إنضمامه لها وجدنا كل شيئ تغير وكأنه ليس هذا الرجل الذى عشنا فى كنفه كل السنوات الماضية وهو الأب الحنون الطيب الذى يتبادل الحوار معنا .. تبدلت الأحوال ليصبح كل كلامه فرمانات غير قابلة للنقاش .. وان فكرت مجرد التفكير فى مناقشه أمر من أوامره يجيب بمنتهى الحزم .. لا فائدة المبدء مرفوض .. فجأة وجدناه يأتى بكم من اكياس القمامة السوداء التى تسمى بالنقاب ليغطى بها كل من تحمل تاء التأنيث فى المنزل على اساس ان اكتمال الدين بهذا الشيئ الذى لم ينزل الله به من سلطان .. تمردت على هذا الوضع ولم أرضخ لطلبه .. قاطعنى وقاطع الطعام معى على سفرة واحدة ... لم اشعر براحة بالطبع لما يحدث ولكنى لن أسجن نفسى خلف هذه القضبان .. إذا كنا فى الحج نقابل الله بوجوه مكشوفة فما بالنا بالبشر الذى خلقهم الله .. فهذا الشيئ ليس من الاسلام فى شيئ ... بعد عدة ايام تعودت على هذا الوضع ولم اتنازل عن

إذن ما الجديد يا عزيزتى وما الذى أوصلك هذه الحالة الآن ؟؟

الجديد أن فى اخ شاب وملتزم وغير مدخن والى اخر الشعر اللى اتقالى فيه لما عرضوا الموضوع منضم للجماعه

انا مقاطعه .. وعايزين له عروسه صح ؟؟؟

أه صح وبما انى متمردة فهو اللى هيكسر مناخيرى ويلبسنى البتاع ده ..

طيب يا مامى انتى مش بتشتغلى وعندك دخل خاص بيكى ..

أجابت نعم ولكن حتى العمل بعد الزواج ساستقيل منه وهذا شرط العريس

انتى مش اكتر من 21 سنة دلوقتى ؟؟

يعنى ايه

يعنى القانون فى صفك

ماهو اكيد المأذون هيكون من الاخوة ويجوزنى ليه حتى لو قولت رافضه ..

مش توقعى خالص

ماهو ولى الامر هيوقع

بس ده اسمه تزوير

ارفعى عليهم قضية

انا بابا محامى

:)))

حبيبتى إذا كانت للذنوب رائحة لفررنا من جوار من نظن أنهم أتقى الناس

يعنى ايه ؟؟

يعنى قصدى أهدى النفوس

تعليقات

‏قال ريمو…
يابنتى كلهن فى الهم سواء اللى مش بتعمل من وراه مصالح بيكون ابوها زى الراجل ده بس بتقنع نفسها بكلمة الحرية الشخصية انتى يعنى عايزاها تنتحر
‏قال Magi Mostafa
واحده فوق 21 سنه وكبيره وبتشتغل اظن ان من حقها اختيار حياتها واول قرار صح هو انها تبلغهم كده بصوره مباشره بدون عياط وبدون ضعف وبقوه انها مش هتتجوز الشخص ده بدون مجادله كتير اذا كان كويس او لا
تقولهم انا مش هتجوزه وخلاص
‏قال Kalimalhus
على فكرة الإخوان رسميا لا يعتبرون النقاب فرضا على المرأة و بالمناسبة برضه همه ما بيعتبروش صوت المرأة عورة ..

طبعا فى منتمين للجماعة بينقبوا زوجانهم و بناتهم و فيه منهم بيعتبر صوت المرأة عورة لكن الرأى الرسمى للجماعة غير كده..

ده مش دفاع عن الإخوان .. بس لما تتعاملى مع ناس مخالفين ليكى يبقى أحسن إنك تعرفى توجهات كل تيار منهم عشان ما يطلعش حد يقولك إنتى بتتبلى عليهم ..

أنا واثق إنك عارفة إن الإخوان غير السلفيين و حتى لو رفضتى الإتنين فالتفريق بينهم ضرورى..

سواء كانت القصة واقعية أو من نسج الخيال فينبغى على بطلتها ألا تستسلم لأى شيئ يفرض عليها دون إرادتها .. عليها أن تبحث عن سبيل تستقل فيه بنفسها بعيدا إذا كان التفاهم مع والدها قد أصبح مستحيلا ففى نهاية المطاف لا يمكن لأحدنا أن يحكم على نفسه بالسجن طوال عمره فى إطار لا يقبله لمجرد أنه شعر بالخوف و التردد فى لحظة ما..
‏قال أسماء علي
هو الدين قالهم نجبر حد راشد على حاجة؟

طيب هو المفروض إن الجواز لما يكون على غير رضى طرف من الأطراف يبقى جواز أصلا؟

لما احد الشروط موافقة الطرفين

مش فاهمة فعلا

هي الناس بترجع لورا

أنا زي ما قلت يا نونة .. احنا لسا في عصر ما يوازي قبل عصر النهضة في آوربا
الدين بيفصلوه على مزاجهم و عاملينه تابو
و اللي يربي دقنه و يمسك سبحة و يلبس جلابية يبقى هو الحاكم بأمره

و لو شفتي سماحة الدين أو الحرية
ابقي سلميلي عليهم
و قوليلهم ماتخلونا نشوفكم
!!!!!!!!!

و حمد الله على سلامتي من الغيبة
ما سألتيش عليا يعني
:((
‏قال غير معرف…
يعنى ايه الراى الرسمى غير راى اعضاء فى الجماعه كما يقول احد المعلقين
الراى الرسمى هل يعنى
محاولة التجمل
بينما الممارسه هى اعضاء يفرضون التنقب على نسائهم
وماهو بالتحديد اوجه الخلاف بين الأخوان والسلفيين
اين نضع الحدود الفاصله
ام هى ايضا محاوله للمراوغه والتجمل
‏قال غير معرف…
المشكله الكبرى هى ان كل التيارات التى توظف الدين لخدمة اغراض السلطه والسياسه
انما تدعو الى مايعرف فى السياسه بالدوله الدينيه او الثيوقراطيه
وهى نظام انقرض منذ النهضه الأوربيه
ولم تعرف اوربا النهضه الا بعد زواله
‏قال Desert cat
ريمو
لاء مش عايزاها تنتحر بس تعترف انها مكبوتة مش تقولك دى حرية شخصية
ههههههههههههههه
‏قال Desert cat
magi
هى مش استسلمت لهم على فكرة وتقريبا موضوع الفرار اللى ذكرته لها فى اخر جملة هى فهمته صح
فاصبح سلاح فى ايدها
:))
‏قال Desert cat
مهندس حر

على فكرة يا بشمهندس
كان فى دراسة من كام يوم منشورة على موقع العربية نت عاملها اخوانجى قديم وسابهم بعد تغيير فكرهم بيقول ان اللى موجودين على الساحة دلوقتى ليسوا اخوانا وليسوا مسلمين كما قال البنا قديما لأن اللى موجودين دلوقتى كل فكرهم وهمهم المصلحة الشخصية وان مش حصل يبقى الارهاب والقتل
يعنى بيطبقوا قانون ميكافيللى لست معنى اذن انت ضدى

القصة حقيقية والبنت لازالت حية ترزق وعلى فكرة عندها مدونة بتفضفض فيها ساعات لو هى عايزة تنشر لنك مدونتها تنشره او تسمح لى انشرها على حسب رغبتها بقى الشخصية
اما بالنسبة للفرق بين الاخوان والسلفيه فتخبط الاخوان ما بين السلفية شوية والوهابية شويتين اصبحوا بطيخ ولا ليهم فكر معين ولا ليهم اى هدف منشود لان السياسة اكلت دماغهم خلاص فاصبح قانون اللى تغلب به العب به هو السائد عندهم
يعنى الشعب حالتة الاقتصادية فى سوء والناس ولت وجهها لله وماله الناس مش تعرف من الدين غير الدعاء والنقاب وان صوت المراة عورة برضه مش مهم خينا معاهم حسب الموجه

تحياتى
‏قال Desert cat
أسماء علي
هو كان فاكرة يا دكتورة انها ما ملكت يمينه تقريبا يعنى يتحكم فيها زى ما هو عايز دون الالتفات لمشاعرها او انسانيتها

على فكرة انا بسال بس من بعيد لبعيد حتى اسالى كدا الناس التانية
:)))
‏قال Desert cat
Anonymous
اذا كان الراجل اللى لسه داخل الجماعه اتعمل له غسل مخ ورايح بيته ينفذ الراى الرسمى للجماعه وهو تكفين زوجته وبناته
‏قال Desert cat
Anonymous
انا بستغرب اصلا على اللى يقولك السلفيين بس اللى بينقبوا زوجاتهم
طيب ياريت يروح يزور واحد صاحبه اخوانجى فى بيته ويشوف الستات اللى فيه هيطلعوا ازى ده ان طلعوا يعنى
ان مش كان ياخد بعضه ويجرى فى اشلارع ويقولك ايه ده
عفريت بالنهار
ههههههههههههههه
‏قال نشأت العمده
دى اول مره ادخل المدونه واتابع فيها وسعيد بوجودى طبعا والى عايز اقوله ان
فعلا كلام مش صح بالمره لان مش من حقه ان يغصب على بنته تلبس نقاب لا هى طالما لابه لبس فضفاض وكويس يعنى مش يثير الشهوه خلاص لاكن النقاب دا على ما سمعت من المختصين فى الدين انه مش فرض ما علينا مش من حق اى شخص انه يتجوز وا يقضى عمره مع شخص مش عايزه دا العمر مره واحده ثانيا ربنا بيقل وادعوا الى سبيل ربك بالحكمه والموعظه الحسنه مش من حق اى حد انه يحكم برايه على حد تانى لا انتا كلمه بس يكون باحترام وبالدلليل
ومفيش حاجه بتتغير مره واحده هو الراجل عايش عمره كدا وفجأه عايز يغير اسرته مره واحده وكمان بغير ود وتفاهم لا غلط اكيد هو مش فاهم
اخيرا مش من حق اى شخص مهما كانت رتبته ومهما كان مكانه انه حجر على راى اى شخص مهما كان طالما لا يجمل فكر تدميرى صريح ولا علاقه لاحد بنيات الاخرين ولا الغرض من فعل الاخرين لاكن يرى الواقع ويحلله تحليل جوهرى صحيح ومن ثم يبنى عليه رايه
من غير شرح مفهومه
دا بقى الى عايزين نتكلم فيه الاسره دا ككيان هو بسيط لاكن هو فى حد ذاته مجتمع كبير الى يطبق فيه ممكن يطبق فى مجتمع كامل واذا لم يكن التفاهم والمشاركه موجوده مهما كان الفكر ومهما كانت الاتجهات فلن يعيشوا بسلام ولا بطمأنينه طالما كل التيارات فى هذا الكيان غير متفاهمه وكلا متمسك برايه
ومدونه جميله وربنا يباركلك فيها ويكرمك

المشاركات الشائعة