ماهو كان بيجرى فى دمى


على غير العادة تغيب عن العمل اربعة أيام على التوالى أسأل على أخباره من أحد الأصدقاء المشتركين فيجيب موبايله مغلق ودايما فى البيت نايم او مش موجود .. همممم إذن الأمر جلل .. حضر فى اليوم الخامس شاحب اللون إن حادثته أنثى يرد باقتضاب وهو الذى طالما يملأ المكان فرح ومرح ونكات .. قلقت الحقيقة خوفت احسن يكون اتلم على اخوانجى وقاله المرأة عورة ومش تكلمها ولا حاجه خصوصا وإن دقنه اللى كان حريص على حلاقتها كحرصه تماما على كامل أناقته قد نبتت بل وصل طول الشعر الى حوالى 3 سنتيمترات .. كان ممسكاً بورقة وقلم ويخطط به شيئ لم أتبينه .. ذهبت إليه متودده ما بك يا عزيزى .. ابداً موضوع وهيروح لحاله .. ايوا يعنى مش ينفع اعرفه ؟؟ مش تشغلى نفسك .. لاء انا عايزة أشغل نفسى معلشى اصلى فضولية مع الناس اللى بعزهم وعايزة اعرف فى ايه .. اشاح بوجهه فى الإتجاه الآخر .. صحت بأعلى صوتى .. لاء أوعى خصوصا وانا بشوفك الأيام مع الواد بيجاد والواد ده أنا مش بستريح له .. تقصدى أيه .. يكون اخدك حلفك على السيف والمصحف والعيش والملح والأخوة وكل ايمانات العالم .. إبتسم إبتسامة باهته .. لا مش تخافى مش انا اللى أعمل كدا .. ايون طمنتنى كويس انك لسه بعقلك زادت ابتسامته شيئاً قليلاً .. أيوا كدا شوفت الضحك بينور الوجه ازاى سيبك بقى من الهم فى ايه واحكى لى .. الله يخليكى انا عايز أنسى مش لازم افتكر .. اممممممممم سحبت الورقة التى كانت يخط بها بحركة رشيقه .. وحينما طالعت ما بها انفرجت شفتاى عن إبتسامة مؤلمة .. فقد كانت تحمل ورقتة من قلب كل همه فى الوجود أن يحيا بكى .. أن يناديكى رغم البعد أن يظل دائماً يسأل عن شئ واحد هو أين أنتى ؟؟ لكنى لا أحب الخيانة وقد أتضح تماماً أنها اصبحت جزء منكن .. كنت أظن أنك غير كل النساء ولكن قد خابت ظنونى .. لا فرق بينكن إنها رساله موجهه كان لابد لى أن أعلم أنك رغم بلوغك سن الرشد إلا أنك لازلتى فى طور المراهقه اشكرك على كل لحظة عشتها فى حب كانت ممتعه والحقيقة انك أيقنتى لبس الاقنعة ...
ايه اللى حصل .. تنهد بكل ألم وحسرة شعرت حينها أن الكلام سيريحه وهو لا يريد لنفسه الراحة وكأنه بيعاقب نفسه
سألته ممكن اتصل بيها ؟؟؟ أنتفض من مكانه كمن بثت حول عنقه سموم الكوبرا .. انا مش هتسول مشاعرها .. مش قصدى بس فعلا انا محتاجه اتكلم معها .. ارجوكى لاء .. أوكى لك ما تشاء .. تركته وذهبت بيعداً ولكن حاله لم يعجبنى اطلاقاً وعلى غفلة منه حدثتها لعل تعود المياه إلى مجاريها .. واهى محاولة .. ردت بمنتهى هدوء الأعصاب والبرود التى لم أراها من قبل هو حبنى انا كمان حبيته هو حسسنى انه عايش علشانى هو كمان كان بيجرى فى دمى .. طب وايه اللى حصل ابداً انا بصحى من النوم الاقيه قدامى يرجع من الشغل قاعد فى وشى ما نتى فاهمه اننا جيران حسيت انه نقل محل اقامته فى البلكونة قولت له وجودنا فى وش بعض كتير هيسبب عندنا ملل من دلوقتى وعادة الملل بيحصل بعد الجواز لكنه مش فهم انا عايزة ايه وفى كل مكان الاقيه فى وشى وقدامى لما بقيت حاسه انى محتاجه نبعد فترة علشان اشوف مشاعرى ناحيته ايه وبعدت نفسى عنه مش كنت بخرج البلكونة خالص كان يكلمنى احاول اطلع باى مبرر علشان احس انه واحشنى لكن فى الفترة دى قست مشاعرى واكتشفت اننا مش ينفع نكون غير اخوات .. وبعد السنين دى كلها اكتشفتى كدا فجأة لاء بس كنت بكدب إحساسى
امممم قولى فى الفترة دى عملتى تغيير دم .. قصدك ايه ؟؟ قصدى حتفهميه بعدين .. قفلت معاها وعدت إليه ثانية لأمسك بنفس ورقته واخط فيها

لو احتضنت الحية فى صدرك وأعجبك نعومة جلدها لا يعنى هذا أنها تبادلك الحب نفسه ولن تلدغك

تعليقات

‏قال V.Hayat
كما اقول دائما

الحياة حلم والالم حقيقة

تحياتى
‏قال مفكر…
تعرفى ان عندك موهبة كتابة القصه القصيره...مش ناقص غير شوية سنفره للغه العربيه ...شوية نحو وخلافه
بصى ياقطه يا حبيبتى كتير مننا بيتغش فى التعود و العشره و بيفتكر انها حب بس بتيجى لحظه الانسان بيعيد فيها ترتيب اوراقه و يكتشف انه ابدا لم يكن حبا
و التراجع فى الاول احسن من التراجع بعد ماتكون فيه اشياء مشتركه كتير و اطفال و عشره و نفقه و خناق
و لا اييييييييييه
الحب حاجه كبيييييره قوى حرام نظلمها و نضيعها فى المشاكل عشان كده ساعات الانسحاب بيبقى اجمل
‏قال على باب الله
كويس أنها جت لحد كده و هما الأتنين لسة على البر
‏قال ريمو…
كتير جامدة كلمة عملتى تغيير دم دى يا قطة
انتى سكره
‏قال غير معرف…
قطقوطه

مشتاقه ليك والله

اخبارك ايه

لما تكتبي عن الحب والعاطفه بتكوني غير

جميله كلماتك

صافي الود
‏قال غير معرف…
انا قريت كلامك يا حنان اكتر من مرة وفى كل مرة ارجع تانى اقراه مش ممكن موهبتك فى الكتابة خصوصا اخر جمله جت على الجرح
‏قال مواطن مصري
حسن نصر الله انهزم و انتصرت ارادة الشعب اللبناني و اختارو الشيخ سعد
‏قال مواطن مصري
بجد شعب اللبناني رائع
‏قال مفكر قلق على مستقبل بلاده…
الى من يهمه الأمر
الخوف كل الخوف حاليا من ان تقوم اسرائيل بتفجيرات هى نفسها للتملص من ضغط اميركا بعد خطاب اوباما فى القاهره
التيارات السياسيه الأسلاميه
فهمت الرساله فى الخطاب الا تنظيم بن لادن
لأنه سيكون بلا معنى لو استطاعت ادارة الرئيس باراك الضغط على اسرائيل
اسرائيل او الصهيونيه فجرت اماكن لليهود فى اوربا لترغمهم على الهجره
ربنا يستر
‏قال صحصح
اه يا قلبي ... و دي قلبها نوعه ايه؟!!
‏قال غير معرف…
اثرت فيا الجملة الاخيرة اوي

الحب لا اعتقد الحب عاوز كل الوقت د لنعرف اذا الانسان ده مناسب او لا

تحياتي يا قطــــة
‏قال karim
الانسان دايما هو اللى بيوهم نفسة علشان مش عايز يكون وااقعى,تحياتى
‏قال amunraa
الحب شيء جميل لكن المهم التاكد ان الحب ده هيعيش
وبصراحة اللي عملتوا البنت احسن ما كان يتجوزوا وتكتشف انه مش بتحبه ووقتها المصيبة هتبقى اكير
انا بحي شجاعة البنت وربنا يبعت لزميل حب حقيقي
‏قال مواطن مصري
أعلنت وزارة الصحة المصرية الثلاثاء 9-6-2009 إصابة 5 حالات جديدة بإنفلونزا الخنازير، هم من زملاء الطالبيَن الأمريكييَن اللذين تم التأكد من إصابتهما بالفيروس أمس الاثنين,

وتسود حالة من القلق بين الطلاب وموظفى الجامعة، خشية ان يكون عدد المصابين اكثر من ذلك، خاصة أن منطقة الزمالك من ارقى أحياء القاهرة و تقطن فيها نخبة من المجتمع.

وكانت وزارة الصحة المصرية وضعت جميع طلاب السكن الجامعي تحت الملاحظة المشددة منذ أول أمس، كما تم عزل المبنى السكني الخاص بالجامعة في حي الزمالك بشكل كامل.

وأظهرت نتيجة التحاليل التى أجريت على 234 طالبا من زملاء الطالبين المصابين، التقاط 5 طلاب جديد للعدوى، بينما شفي الطالبان الأمريكيان المصابان، حسبما أعلن وزير الصحة المصرى حاتم الجبلى.

وأكد المتحدث باسم وزارة الصحة المصرية عبدالرحمن شاهين لـ"العربية.نت" أنه "بعد التحاليل ثبت ايجابية اصابة الطلاب وتم نقلهم الى المستشفى لتلقى العلاج، ولا توجد حالات أخرى مصابة بين الطلاب".

وأضاف "لدينا استعدادات تامة لأي حالات جديدة، إذ تم التنسيق مع كافة الاجهزة التنفيذية والمحلية فى نطاق المنطقة التى يعيش بها الطلاب ونجرى حاليا مسحا شاملا للمنطقة".

وتعقد وزارة الصحة المصرية مؤتمرا صحفيا اليوم الثلاثاء 9-6-2008 القاهرة لاعلان تفاصيل الاصابات الجديدة.

وكان وزير الصحة حاتم الجبلي أعلن استقرار حالة الطالبين المصابين بإنفلونزا الخنازير، واللذين تم اكتشافهما أول أمس بالجامعة الأمريكية بمقرهما السكني.

وتتوقع مصادر طبية من داخل المعامل المركزية التى تقوم بتحليل العينات، اكتشاف المزيد من الحالات الإيجابية.

وكان مجلس الجامعة الامريكية بالقاهرة قد قرر أمس اغلاق الجامعة و وقف اى نشاط دراسى واجتماعى بالجامعة حتى الاحد القادم، لحين الاطمئنان على جميع الطلاب القاطنين بالسكن الطلابى.

وقال رئيس الجامعة ديفيد آرنولد، في مؤتمر صحفى عقد مساء الاثنين 8-6 -2009 إنه "بمجرد الاشتباه باصابة 3 طلاب بفيروس انفلونزا الخنازير، والتأكد من اصابة طالب وطالبة امريكيين فى محل اقامتهم مساء أمس، جرى التنسيق بشكل تام بين الجامعة الامريكية ووزارة الصحة المصرية. بينما تأكد سلبية التحاليل التي أجريت على طالبة ثالثة كان يُشتبه بإصابتها بالفيروس"
http://www.alarabiya.net/articles/2009/06/09/75376.html
‏قال ريماس…
هايله يا نونا
وحشتينى كتير
‏قال Blank-Socrate
لى قصة مشابها للقصة دى
و فعلا كانت قاسيه شويه
اعتقد انه مش لازم يندم و يتحسر على حب زائف
fake
المفروض انه يكون قوى و ينتظر الحب الحقيقى
الموضوع خيالى فقط للى مش بيعرفوا يعنى ايه حب
:)
تحياتى يا قطتى
‏قال أنا حر
افضل ما يمكن ان يقال كتبتيه في نهاية البوست
تحياتي
‏قال Desert cat
حياة
بالفعل حياة ودائما الصدمة تكون قوية فى بدايتها لكنها تتلاشى كلما مر الوقت

تحياتى
‏قال Desert cat
مفكر
ميرسى جدا لحضرتك ها احاول المرة اللى جاية اخد بالى من مفردات اللغة

:))
‏قال Desert cat
صيدلانيه طالعه نازله
كلامك صحيح جدا يا دكتورة لكن يمكن علشان انا ملمة بكل جوانب الموضوع فحسيت ان فى حاجه تانية خالص اختلفت
عموما ربنا يوفقهم هما الاتنين كل واحد فى الطريق اللى يختاره

تحياتى ليكى
‏قال Desert cat
على باب الله
اه فعلا دلوقتى احسن ما كان يحصل بعد فوات الآوان

شرفتنى
‏قال Desert cat
ريمو
ميرسى اوى يا ريمو يا قمر
‏قال Desert cat
أبنوسة
انتى كمان وحشتينى كتير يا قلبى
ميرسى ليكى ولكلامك الجميل
‏قال Desert cat
Anonymous
ميرسى جدا وسلامتك من اى جرح
‏قال Desert cat
مواطن مصري
لا تتخيل مدى فرحتى بخسارة حسن زعبوله ده
‏قال Desert cat
مواطن مصري
ياريت كل الشعوب العربية تكون فى روعة الشعب اللبنانى
‏قال Desert cat
مفكر قلق على مستقبل بلاده
اعتقد ان اوباما اذكى من كدا عجبتنى اوى جمله فى الخطاب بتاعه وهو انه حامل حسن النوايا من الشعب الامريكى وتحية من الجالية الاسلامية
الراجل ده فعلا ذكى
‏قال Desert cat
صحصح
تقريبا من اللى بيتركب له زمبلك
:))
‏قال Desert cat
SeMSeM
كانت بتختبر نفسها فى حب سنين كان بيكبر مع سنوات عمرهم

تحياتى
‏قال Desert cat
karim
ماهو يا كريم مش هيوهم نفسه سنين يعنى مش عايزة اظلمها برضه واكون قاسية معاها
تحياتى
‏قال Desert cat
amunraa
هى تقريبا لما كبرت ولاقيت انهم العمر كله فى وجه بعض وقدم بعض ليل نهار عملت حساب اللى ممكن يحصل بعض الجواز وهو الملل فقالت مبدهاش من دلوقتى

تحياتى
‏قال Desert cat
مواطن مصري
قريت الخبر يا مواطن وربنا يستر على المصريين الغلابة الناس مش ناقصه
‏قال Desert cat
ريماس
ميرسى يا حبيبتى
انتى كمان وحشتينى اكتر
‏قال Desert cat
Blank-Socrate
هو اتصدم يا مينو بعد السنين اللى عاشوها من طفلتهم دى كلها كان اقلم حياته خلاص ومش عنده اى ذرة شك انها ليه لكن للاسف
نصيبه كدا بقى

تحياتى
‏قال Desert cat
أنا حر
ميرسى اوى ليك يا احمد
‏قال مفكر…
من فضلكم كفايه غباء
لكل من يحاول تحويل قضيه وطنيه هى قضية فلسطين الى حرب دينيه بين الأسلام واليهوديه وفى مقدمتهم جهابذة حماس كفايه غباء
فتحويل الموضوع الى عداء دينى هو فى حدمة اسرائيل ودعايتهاالتى تدعى انها ماقامت الا بسبب هذا العداء الدينى لها
فلسطين قضية وطن فيه مسلمين ومسيحيين
ولو سرق مسلم بيتك هل تتركه لأنه مسلم
ابعدوا الدين عن القضيه
وكفاكم تخريبا لها
رغم انني رجل الا انني ارفض وصف المراه بالحيه
فقط اصفها بكائن مستقل بمشاعره يحتاج ان يفهم
هو لم يفهمها من البدايه ربما تكون باردة الاعصاب قوية الشكيمه ولكنها مجرد بشر يبحث عن سعادته في ثنايا الكون تفح طيه ما فلاتجد فيها مرادها فتفتح طية اخري

ويبقي فقط ان يعرف انها لم تحبه م البدايه لو فعلت لاحالات هي ايضا حياته الي جحيم في كل مكان
الحب هو شئ غريب يجمع بين الغضب والحلم والرومانسيه والجنون والتفهم والحنان والقوه والضعف

يبقي ان يعرف ان الفتاه كائن رقيق يعشق معسول الكلام ويهيم عشقا بالاهتمام فربما مالت نحوه لظاهر حبه واهتمامه وهو ما تعشقه الانثي وخصوصا في سن معين

الخطا ليس في احتضان الحيه
الخطا في انك لم تفهم ابدا ان الحيه لو احبتك لتخلت عن سمومها من البدايه طواعيتا
‏قال Desert cat
مفكر
والله ما خرب القضية وجعل اغلب الشعوب لم تعد تتعاطف مع اهل فلسطين سوى اقحام الدين فى السياسة والغباء والجهل الذى تروج له عصابة حماس

تحياتى
‏قال Desert cat
حكاية لا تنتهي
هى البنت جه تفكيرها من منطلق ان كل الأزواج بيحصل عندهم ملل بعد الزواج مهما كانت درجة حبهم لبعض لأنهم بيكونوا اتعودوا انهم صبح وليل فى وش بعض ومفيش اى فرصه للاشتياق او بعدهم عن بعض الا اذا كان الزوج بيسافر طبعا بره مصر فى حالة قصتنا مفيش سفر ومفيش بعد بيحصل
قريت مرة فى رواية انجليزية لحياة زوجين من امريكا الشمالية كانوا علشان يجددوا حبهم باستمرار ان كل واحد يبعد عن التانى 4 ايام فى الشهر فى خلال الـ4 ايام دى كانوا يتعاملوا على انهم اتنين لازالوا فى مرحلة الحب وكانوا يكلموا فى التليفون ويتفقوا على مقابلات خارج المنزل ويتقابلوا لمدة نص ساعه لا يتطرقوا فى خلال هذا الوقت لمشاكل او لكلام عن البيت وخلافه
انما احنا فى مصر ما شاء الله الراجل يرجع اخر النهار شايل البطيخة على كرشه والست تطلع تقابله بالجلابية اللى ريحتها بصل وتوم فالطبيعى يحصل ملل وارف كمان
‏قال Unknown
الحب اجمل وهم في الحياه لا نستطيع الحياه بدونه و لكنه يبقى دائما مجرد وهم اخترعه الانسان بعقله ثم صار يبحث عنه
اسعدني لقائك و ارجو ان نتواصل دائما
طريقتك في الكتابه بسيطه و تصل الى الهدف منها بسرعه محببه

المشاركات الشائعة