ياجهابذة علماء الأزهر مالكم ومال هيفاء



من الواضح وضوح الشمس إننا نعود للعصور الوسطى بسرعة البرق
حيث الحجر على الثقافة والفن والإبداع
حيث حرق وقتل كل من تسول له نفسه إعمال عقله أو إخراج فنه وإبدعه إلى النور أو حتى مجرد التعبير عن رايه
لقد تغاضيت جبهة علماء الأزهر عن الفساد والرشوة والمحسوبية وعن السعار الجنسى المنتشر فى الشوارع والمواصلات العامة كل هذا لم يحرك لها ساكن ولم تخرج ببيان تتحفنا بيه أو لم يهتز جفن لاصحاب الحناجر العالية اللى قارفينا فى الفضائيات ليل نهار كلام عن المرأة العورة الناقصة عقل ودين .. ولكن السادة الشيوووووخ ازعجهم جدا فيلم " دكان شحاته " لذلك توجهوا مباشرة للسيد رئيس الجمهورية للتدخل فى منع عرض دكان شحاته بحجة إنه يسيئ للمقدسات الإسلامية .. ويا سلام على الإساءة اللى ارتكبتها هيفاء وهبى وخالد يوسف يا ناس .. دخلوا مسجد الحسين يا حلولى يعنى لو كانوا دخلوه من غير تصوير فيلم رايحين كزيارة يعنى زى آلاف السياح كنتوا هتقدموا نفس البيان برضه .. ثم إن الهيئة الموقرة سابت شغلها المخولة بيه وراحت تقوم بدور الرقابة على الافلام وازاى الرقابة هتسمح بعرض فيلم فيه اساءة للمقدسات اذا كانت رفضت عرض فيلم تحت النقاب الذى يناقش الحوادث والبلاوى التى تحدث من خلف قطعة القماش كالسرقة والقتل وارتكاب الفواحش ماظهر منها وما بطن بس الرقابة الشجاعة خافت من الموافقة على عرض الفيلم مش علشان مشاهد الفيلم لاسمح الله انما علشان الشعب المصرى اللى اثبتت الدراسات انه اكثر شعوب العالم تدينا وانه برضه اكثر شعوب العالم تحرشاً ولا عزاء للأخلاق ، مخرج فيلم تحت النقاب اصر على عرض الفيلم على نفقته الخاصة وفى مكان غير مصر وانا الحقيقة ارفع له القبعة احترما لرغبته فى عرض بلاوى متخفيه تحت هذه القطعة الكئيبة من القماش واللى متخذها كل صاحب مصيبة للتخفى خلفها
يا ريت الهيئة تخليها فى عملها وتترك الفن والإبداع لأهله وقبل ما يسمعوا كلام الجماعه إياهم ويروحوا للرئيس علشان يتدخل ويمنع الفيلم يخسروا تمن تذكرة سينما ويشوفوه

تعليقات

‏قال مواطن مصري
هههههههههه فاتك النهاردة على 90 دقيقة


جابو محامي الجبهة و خالد يوسف محامي الجبهة قال ان الجبهة قالت ان هيفا رقصت في المسجد الحسين

و خالد يوسف قال ان محصلش رقص

بعد كدة المحامي قال ان فية مناظر ان الناس بتتمسح و دة حرام و بتنشرو الفكر دة

قام خالد يوسف قال ابقو امنعوهم من الاول



بجد

الجبهة دي اساسا محظورة و ملهاش شرعية


مش هيا حللت الدم المصري و سمحت للحماس انهم يقتلو


ولا هيسئلو في دعوة الجبهة دي
‏قال غير معرف…
بعد نتائج انتخابات نقابة المجامين
هل ستتحول البلد الى كهوف تورا بورا...ربنا يستر
انتخبوا الخراب ليس حبا فى عمرو ولكن كراهية لزيد
‏قال Dr. Ahmed Wagih
يا عزيزي، هؤلاء ليسوا علماء بالمعنى المفهوم! هما بالكتير جايبين 50% في الثانوية العامة، ولايفقهوا شيء عن العلم الحقيقي! ماذا تنتظر من مثل هؤلاء؟ هؤلاء هم دعاء الظلام والإظلاميين الحقيقيين!

تحياتي!
اظن ان المفروض يكون فيه ترتي لاولويات العمل لدي علماء الازهر فيكون الاهتمام اولا بحقوق الانسان و رعايتها و الثوره لاجل شخص مات تعذيبا لدي قسم شرطه اولي من الثوره علي فيلم و خلافه
ياريت يكون فيه مستوي تفكير اعلي مما نراه الان
تغيير طريقة التفكير هو اول سبيل لتغيير النفس المطلوب لتغيير الاحوال
‏قال A.M.H…
السلام عليكم
ممكن اطلب طلب ضغنون من حضرتك
بلاش فكرتك ان كل المنتقبات وحشات ومتطرفات زى ماانتى متخيله اوى كده لان فى الوحش والحلو
وزى مافى بنت بتلبس البدى والجينز وهىمؤدبه واخلاقها عاليه .. زى مافى شبيهتها برده بتلبس البدى والجينز وهى من فتيات الليل

وبالتالى نفس الوضع بالنسبه للمنتقبه فى منهم الكويسين ومنهم الوحشين

يعنى العبره بالاخلاق اما اللبس بقى فلنا خالقنا هو اللى هيحاسبنا على الوحش والحلو
‏قال A.M.H…
السلام عليكم
ممكن اطلب طلب ضغنون من حضرتك
بلاش فكرتك ان كل المنتقبات وحشات ومتطرفات زى ماانتى متخيله اوى كده لان فى الوحش والحلو
وزى مافى بنت بتلبس البدى والجينز وهىمؤدبه واخلاقها عاليه .. زى مافى شبيهتها برده بتلبس البدى والجينز وهى من فتيات الليل

وبالتالى نفس الوضع بالنسبه للمنتقبه فى منهم الكويسين ومنهم الوحشين

يعنى العبره بالاخلاق اما اللبس بقى فلنا خالقنا هو اللى هيحاسبنا على الوحش والحلو
‏قال فرعون
فعلا علماء الازهر تركوا الفحشاء فى كل مكان وزهبوا وراء كل ماهو ينقص من قدرهم كمشايخ محترمين .... واشكر جرائتك فى الكلام .........تقبّلى نونوتى
‏قال غير معرف…
7anoooooooon 7abebty:
ya bnty maho 2e7na 3amlen zay el na3ama elly 7atet rasha fel raml 2al ya3ny keda ma7adesh hayshofha,el nas kolaha 3arfa elly 7asel f masr o el balawy ya3ny el fil wala hay2adem wala hay2a7'ar 3ashan aslan el 7ayah f masr ba2et 3amla zay el fil el porno b wegod shewayat el hamag elly 3aysheen feha
ta7eyaty leky ya amar
sa7e7'
domty b 7ob :)
fakraha
‏قال غير معرف…
اجراس الخطر
المؤشرات فى انتخابات المحامين لا تطمئن ...المستقبل ...مستقبل البلد فى خطر ...الناس المغيبه مصممه على اختيار الخراب وتتجاهل ما فعلته حماس من تمزيق وخراب وتدمير ...لم يلتفتوا الى القتال الدائر بين حماس والسلطه وسقوط القتلى والجرحى....ما العمل؟ختى لا نواجه بسيناريو مشابه للجزائر وتدخل المؤسسه العسكريه نقول كما خدث فى الجزائر ...بعد ينوات طويله من تجمد العمل السياسى لا يمكن القفز مباشرة الى الديمقراطيه والا كانت النتيجه كما راينا....نحتاج لفترة انتقال لخمس سنوات يسمح فيها بنشر الوعى بحطر تحول البلد الى كهوف تورا بورا وفى ظل سلطه مقبوله من الشعب
‏قال غير معرف…
اجراس الخطر
المؤشرات فى انتخابات المحامين لا تطمئن ...المستقبل ...مستقبل البلد فى خطر ...الناس المغيبه مصممه على اختيار الخراب وتتجاهل ما فعلته حماس من تمزيق وخراب وتدمير ...لم يلتفتوا الى القتال الدائر بين حماس والسلطه وسقوط القتلى والجرحى....ما العمل؟ختى لا نواجه بسيناريو مشابه للجزائر وتدخل المؤسسه العسكريه نقول كما خدث فى الجزائر ...بعد ينوات طويله من تجمد العمل السياسى لا يمكن القفز مباشرة الى الديمقراطيه والا كانت النتيجه كما راينا....نحتاج لفترة انتقال لخمس سنوات يسمح فيها بنشر الوعى بحطر تحول البلد الى كهوف تورا بورا وفى ظل سلطه مقبوله من الشعب
‏قال مفكر قلق على مستقبل بلاده…
هذا السرطان
هذا السرطان الذى يحبط اى بارقة امل لتقدم الى المستقبل
لا تجدى معه المسكنات بل الأستئصال...البلد فى خطر حقيقى
والناس مغيبه او غافله
وتائهه تفترسها بشائر الفوضى
...نعم تدين وتحرش فى نفس الوقت ونصب وغش وفهلوه واحطف واجرى واهمال وهجر للأتقان
نختاج ليقظه وتوحد للمهمومين بمستقبل هذا البل...البلد فى خطر النزلاق الى الفوضى الشامله وهذا ما يحذر منه الفيلم
‏قال karim
هى دة مصر ناس فاضية وبيبوصوا لبعض وسايبين الاساس احنا دايما كدة و علشان كدة دايما متاخريييين
‏قال غير معرف…
الخطيئه الكبرى للحكم
الخطيئه الكبرى للحكم
انه حاصر وشل وسحق الأحزاب المستنيره الحره وهى المدارس الطبيعيه لتوعية الشعب وتنظيم صفوفه ظنا من الحكم انه بذلك سيسيطر
واكتفى بعلاج سرطان المتاجره بالدين ومواجهةتيار العوده الى الوراء بالقمع الأمنى فقط وليس بادوات السياسه
فكانت النتيجه ان الحكم ترك لهم الساحه واظهرهم امام البسطاء فى دور الضحايا والشهداء وشعبنا بطيبته يتعاطق مع هؤلاء
خاصة وانهم يرددون ليل نهار ان السماء سترسل لهم الحل لكل مشاكلهم فقط لو وصلوا الى السلطه
‏قال غير معرف…
لا تنخدوا بالكلام الشعاراتى المعسول
حينما يطالب المتجرون بالدين بالديمقراطيه
لأنهم اعداء لهاويريدونها سلما للقفز على السلطه ثم دخرها وانظروا الى خماس وافيقوا
فلا ديمقراطيه مع اعداء الديمقراطيه
هكذا تفعل الدول العريقه فى الديمقراطيه
‏قال غير معرف…
الطريق السريع المضمون الى الفوضى
في جميع الأحوال وبصرف النظر عن الغموض، فالأحزاب التي ستقرر خوض انتخابات الرئاسة في عام 2011 تدرك جيدا أن النتيجة محسومة سلفا لمرشح الحزب الوطني، ليس فقط نتيجة للتزوير الذي تمارسه الإدارة والأمن عادة، وكما وقع في عام 2005 بصورة فجة، ولكن يضا لانعدام التكافؤ في الفرص والإمكانيات المتاحة بين مرشح الحزب الحاكم ومرشحي الأحزاب الأخري، والمقاطعة الواسعة للناخبين للتصويت سواء في انتخابات مجلس الشعب أو رئاسة الجمهورية.

الحقيقة الثانية تتعلق بالأوضاع السياسية في مصر، فقانون الأحزاب وقانون مباشرة الحقوق السياسية وقوانين انتخابات مجلسي الشعب والشوري وعديد من القوانين الموروثة والمستحدثة، وحالة الطواريء المعلنة منذ أكثر من 27 عاما حتي الآن.. أدت إلي غياب حياة سياسية صحيحة، وإلي حصار الأحزاب السياسية المعارضة، سواء المعترف بها قانونا، والمحجوبة عن الشرعية، وتغييبها عن الري العام ومنع تواصلها معه، وحرمانها من الوجود الحقيقي في المجالس المنتخبة «الشعب والشوري والمجالس المحلية»، وهيمنة الحزب الحاكم علي السلطتين التشريعية والتنفيذية والإذاعة والتليفزيون والصحافة القومية، والدمج بين الحزب وأجهزة الدولة، وتزوير كل الانتخابات العامة، وهو ما أدي يضا إلي انسحاب الناس بعيدا عن العمل السياسي مما زاد في ضعف الأحزاب والحياة السياسية عامة.

وفي ظل هذه الأوضاع يطل علينا خطر الفوضي، فالرفض لما هو قائم وفقدان الأمل في التغيير، يفتح الباب واسعا أمام المغامرين، ومواجهة هذا الخطر الداهم هي مسئولية الجميع، وتتطلب تكاتف كل القوي الوطنية والديمقراطية للعمل معا من أجل وضع رؤية مشتركة والتحرك معا من أجل التغيير وانتقال سلمي حقيقي للسلطة قبل فوات الأوان.

من مقال للكاتب الصخفى حسين عبد الرازق
‏قال غير معرف…
وهذا ما وصلنا اليه
رغم جحافل الأمن المركزى
الجكم ضعيف بشكل غريب فيسلم لطيور الظلام ويمنع فيلم ما تحت النقاب
فالقوه الحقيقيه هى تاييد الناس
ومره مليون
لا تنطيق الأفكار التقليديه مثل فى الخلو والوحش بين من يلبسون البدى ومن يلبسون النقاب
هذا هراء
النقاب ليس لبسا كالجينز
وانما هو رمز ورايه فى معركة نضال الأشاوس طيور الظلام والسواد اعداء الحياه من اجل الرجوع بالبلد الى عصور الأنحطاط
ولا ينخدع السذج بالشعارات التى لا تنطبق فى كل حاله
والبداوه
‏قال على باب الله
تدخل رجال الدين في كل كبيرة و صغيرة هدفه في الأساس إستعراض للقوة و محاولة لفرض واقع جديد .. معناه هو : أنتم مش ها تعرفوا تعملوا حاجة من غير مباركتنا
‏قال Magi Mostafa
ليه فكره الحجر على اى فكر مختلف عن فكرهم مسيطره على علماء الدين على اختلافهم كل رجل دين سواء سلفى او اخوانجى او سنى يعتقد انه يملك الحقيقه المطلقه وان هم المسؤلين عن الدين الاسلامى باعتبار انهم المصدر المعتمد ليه او حاجه
مع تحفظى على فكره الرقص فى المسجد وطبعا هيفا مرقصتش ولا حاجه يبقى يشوفلهم حاجه مفيده يعملوها
‏قال غير معرف…
كنس الشوارع هو الحل
عجيب امر كثير من المصريين
يصدقون ان انه لو اطالت النساء ذيول فساتينهم ليمسحوا بها الشوارع
وغطوا عينا وتركوا عينا واحده ينظرون بها
واغلقنا دور السينما وحطمنا الناى والربابه
ومارس المتزوجون الجنس وهم بملابسهم كامله
ودخلنا الحمام بارجلنا اليمين
او دهبنا للخلاء اسوة بمن سبقونا
واستعملنا السواك بدلا من فرشاة الأسنان
وتداوينا بالكى بالنار لكل الأمراض ووقرنا ميزانيات كليات الطب ومراكز الأبخاث
سوف تغمرنا السماء بالخير الوفير وتتحول الصحراء الى جنات للنعيم
الجل هو كنس الشوارع
والمفزع ان هناك من يصدق هذا الهراء
‏قال Desert cat
مواطن مصري
الناس مجرد بغبغانات يا عزيزى اصلا دول لا شافو الفيلم ولا عارفين حاجه مجرد سمعوا من واحد مجنون وهما مشيوا وراه
‏قال Desert cat
dr.lecter
يعنى هى كلمة عالم فاضية دى زوق اوى يا دكتور والله يعنى انا علشان قليلة الزوق هقول عالم جاهله
‏قال Desert cat
Anonymous
اهو الغباء بتاع البشر من اننا علشان بنكره واحد ننتخب التانى رغم مسائه وغباءة اللى جايب الشعب فى اسفل السافلين
‏قال Desert cat
Nah·det Masr
والله عندك حق فى كل كلامك
‏قال Desert cat
ذو النون المصري
لاء ازاى هما مالهم بحقوق الانسان
المهم عندهم هيفاء واحد يروح يقولهم شوية فساء فى دماغهم وهما زى البغبغان يرددوا ويجروا على الرئيس
جتهم ستين نيلة
‏قال Desert cat
A.M.H
مقارنتك خاطئة خالص خالص
فى فرق شاسع جدا بين المتخفية على هيئة قطاعين الطرق واللى عامله عملة مهببه وبتدارى عن عيون الناس وبين اللى لابسه بادى وبنطلون حتى لو ماشية عريانه اسمها ظاهره وواضحة للجميع بيانا عيانا مش كانها منتهية لتوها من ارتكاب جريمة ولا مطلوبه للعدالة حيا او ميتا
‏قال Desert cat
فرعون
هما بعد الهرجلة اللى بيعملوها دى حرام يطلق عليهم لفظ علماء
اشكرك على ثنائك
تحياتى فرعون
‏قال Desert cat
Sola
سولا يا قلبى الناس عايشه قمة فى التناقض والغباء بجد
طبعا فاكرة يا حبيبتى دومتى بحب وبطلتها علشان تبطلى تتريقى تانى
:)))
شرفتينى يا جميلة
‏قال Desert cat
karim
اللى حقيقى اتمنى اعرفه الناس دى شايله عقلها فين ؟؟ معطلينه ازاى ؟؟
‏قال Desert cat
Anonymous
وبسب جميع ما ذكرت الناس اتعودت على النقل يعنى حدث زى موضوعنا الجبهة المستنيرين مش شافوا الفيلم وبيحكموا على حاجه سمعوا عنها
‏قال Desert cat
Anonymous
كلمة ديموقراطية يستخدموها للاستئناث والوصول لمبتغاهم وبعد انقضاء مصالحهم الشخصية السيف هو الحل
‏قال Desert cat
على باب الله
وهما فين رجال الدين فى كل صغيرة وكبيرة يا عزيزى
ماهى البلد تعج فوضى وفساد ولم يحرك لهم ساكن
‏قال Desert cat
magi
هى مش رقصت فى المسجد يا ماجى ده مجرد كلام غوغائى لجماعة من العمى والصم لكن لسانهم عايز قطعه
‏قال غير معرف…
بجد ناس فاضية
شي بضحك بجد :)

حاسة ان العالم العربي مثالي مافيه ايا مشاكل وكلو تمام
ليجو يعملو رقابة ونقاد للافلام الي بتنزل
مادام هم فاضين وقادرين يحضرو افلام
طب ماتخلو العالم تعيش وخلصونا من هالقرف كل ويوم فتوى شكل

ارق تحية يا قطة
‏قال A.M.H…
استاذتى الفاضله
مازال هناك اختلاف فى اراء العلماء حول النقاب سواء فريضه او فضيله
بمعنى انه كده او كده شكل من اشكال الحجاب
مش شبه قطاعين الطرق... وحتى تكون المقارنه عادله بان تصفى اللى لابسه الضيق بالراقصه زى مابتصفى المنتقبه بقطاع الطرق
‏قال Soooo
اعتقد ياقطه انهم اعترضو على اللقطه بتاعة المولد
اللقطه باختصار عشان بس تبقي فاهماها ويبقى الكل فاهمها
مرجيحه من المراجيح الشعبيه اللي بتكون على هيئة سفينه وبتبقى في الموالد
شحاته وبيسا - اللي هي هيفا - بيركبو المرجيحه وبيتمرجحو
في الجهة المقابله للمرجيحه مجموعه من المجاذيب وأتباع أحد الطوائف الصوفيه .. بيعملو ذكر وتفقير
كل ما المورجيحه تعلى لفوق وهي نازله .. فستان هيفا بيترفع نتيجة للهوا
مشايخ التفقير بيبصو عليها ويسبوهم من الذكر
بينزل الاتنين .. شحاته وبيسا من المرجيحه ويبصو لبعض مستغربين من رد فعل المجاذيب ونظرتهم بلهفة على بيسا
شحاته : - باندهاش - هو في ايه؟؟
بيسا : مش عارفه .. بس انا نسيت البس بنطلون تحت الفستان زي ما قلتلي

---
يعني الحوار كللو إفيه
لو فيه سخريه يبقى مش من بتوع الازهر
لأ
السخريه من بتوع الطرق الصوفيه والمجاذيب اللي بيكونو في الموالد

تقريبا كده ولا حد من بتوع الازهر شاف ولا عمل .. هم شافو اللقطه بتاعة هيفا في الحسين في اعلان الفيلم .. وقالو يالهوووووووي .. ارفع قضيه واعمل زيطه وزمبليطه

ولو ان الاعتقاد التاني من وجهة نظري .. انها شغل دعايه .. خاصة ان خالد يوسف بيلعب على الوتر ده عشان الجمهور يروح الفيلم



ياااه .. ده ايه الرغي اللي انا رغيته ده؟؟؟؟





سلاموووووووووووووووز
‏قال goodman
حقيقه انا لا اطيق هيقار اطلاقا
لكن الفبلم باين عليه جامد ولو انى مشفتوش
عموما الازمة هتستمر
مع اى تحرك يكسر رتابة حياتنا المريضه
ثم ان مواقف الازهر والمحامين بتوع الحسبه والناس دى
بتهدف اصلا مش بس الى محاربة اى فكر مخالف
بل الى ارهاب اى فرد اخر من ملامسة مايدعونه بمحظوراتهم
‏قال Jannah
المشكلة في الأولويات
فيه قضايا الأمة الكبيرة لا وقت و لا مجال للكلام في أمور سخيفة مثل هاذي من وجهة نظري
الناس كلهم عقولهم نخرها السوس وواقفين في منطقة بين الرجعية اللي مسميينها في أحيان كثيرة تدين و بين الحداثة اللي البعض الاخر فاهم انها انقطاع عن الدين و نبذه بالكامل
و لأنه علماءنا مثل ما قال الأخ أغلبهم رايحين يدرسوا شريعة لأنه مجموعهم ضعيف في الثانوية و لا لشيء اخر فماعاد نرتجي منهم شي

غير متوقع منهم انهم يروحو للقضايا الكبرى قضايا العدالة و التكافؤ و المساواة و الحقوق و الخ الخ واللي كلها أساس الدين الاسلامي و مقوماته مادام يتكلمون على أساس ديني و هذا تخصصهم


القصة كلها باختصار ماقدرش على الحمار اتشطر على البردعة
عفوا على المثل بس أشوفه مناسب

دامهم مو قادرين يراجعوا التراث و التاريخ و يصفوا و ينظفوا قالوا خلنا في صغائر الأمور

قبل أن يصرف وقت و يعمل دعاية مجانية لفيلم من بطولة هيفا و اخراج خالد يوسف و الاتنين ما شاء الله فنانين بمعنى كلمة فن !!!! كان أولى يخططوا يدا بيد مع جهات أخرى حتى يمنعوا الدجل و الشرك و الشعوذة اللي قاعدة تصير في المقامات و تحسب خطأ على الاسلام
أظن هذا يسيء أكثر للاسلام من راقصة و طبال أمثالهم بالالاف و الخلاص منهم بييجي تلقائي لو عرفنا كيف نشتغل على الخطوط العريضة و الأولوياااااااات
الله يصلح الأحوال و يرحم الجميع برحمته
‏قال Desert cat
AnGeL
بالظبط انجل كلامك منطقى كأن العالم الربى خلاص اصبح خالى من جميع المشاكل وفيلم هيفاء هو اللى باقى لازم يتغلبوا عليه
التافهه ليها ناسها يا قلبى
انتى شرفتينى بجد
تحياتى ليكى
‏قال Desert cat
A.M.H
لو النقاب فريضة مين اللى فرضه ؟؟
وأى رسول اللى كانت رسالته فيها فرض قطعة القماش هذه ؟؟
مش معقول يكون فى رسول بعد النبى محمد اصل هو خاتم الأنبياء زى مال القرآن أنبأنا وبصراحة اركان الاسلام وفروضه واضحة خالص وصريحة ومش فيها فرض هذه القطعة الكئيبة من القماش وياريت تقرأى فى الدين شوية علشان تعرفى أقل واجب ليكى تجاه الله سبحانه وهى الفروض والاركان اللى المفروض بيدرسها الاطفال فى الابتدائى
ولو فضل زى ما قولت/ى فضل من مين على مين ؟؟
هل هيتفضل بشر على الله وهو الخالق
حاشا لله
بالنسبة لتشبيهك بان اللى بتلبس ضيق كالراقصة ايضاً يدل على ضحالة فكر حضرتك لأن حتى الرقاصة واضحة بيانا عيانا للجميع بصرف النظر عن مهنتها فحسابها على الله سبحانه وتعالى مع العلم انها من الممكن ان تعمل عمل تدخل به الجنة اما الملثمة التى تجوب الشوارع كنش بامتار القماش الزيادة او قطعة القماش التى تتخفى خلفها فمن الممكن ان تكون منتهية لتوها من ارتكاب فاحشة او عمل اجرامى وبين الناس تمثل دور الطهر والبراءة الفرق شاسع جدا بين من تاتى فى المواجهه والجميع يراها وبين من تتخفى كالمجرمين وقطاعين الطرق
‏قال Jannah
شحاته وبيسا - اللي هي هيفا - بيركبو المرجيحه وبيتمرجحو
في الجهة المقابله للمرجيحه مجموعه من المجاذيب وأتباع أحد الطوائف الصوفيه .. بيعملو ذكر وتفقير
كل ما المورجيحه تعلى لفوق وهي نازله .. فستان هيفا بيترفع نتيجة للهوا
مشايخ التفقير بيبصو عليها ويسبوهم من الذكر
بينزل الاتنين .. شحاته وبيسا من المرجيحه ويبصو لبعض مستغربين من رد فعل المجاذيب ونظرتهم بلهفة على بيسا
شحاته : - باندهاش - هو في ايه؟؟
بيسا : مش عارفه .. بس انا نسيت البس بنطلون تحت الفستان زي ما قلتلي

---
يعني الحوار كللو إفيه
لو فيه سخريه يبقى مش من بتوع الازهر
لأ
السخريه من بتوع الطرق الصوفيه والمجاذيب اللي بيكونو في الموالد

----------
معلش يا قطة الصحراء اسمحي لي أقول تعليق هنا على هامش تعليق
sooo

عزيزتي
من فضلك دعونا نتخطى مرحلة الحكم
على الأشياء بدون معرفتها حق المعرفة
الأزهر يحكم على الفيلم من التريلر
وخالد يوسف يحكم على الصوفية من مولد في الحسين
وواحد يحكم على انسانة بسوء الخلق لأنها غير محجبة
والعكس بالعكس
وعايشين في الجهالة ننعم



ليس من العدل نحكم على أشياء بدون أن نعرفها
كلامك فيه أيضا سخرية من الصوفية
ومن الخطأ تحكمي على حاجة من خلال الأشخاص الخطأ
اللي قاعد يصير في الموالد هو دجل و شعوذة و حاجات مالها علاقة بالدين بالاحرى ليها علاقة بالجهل و قلة العقل ونقطة نهاية
ربنا يعفو عنهم
أما التصوف فهو أرقى من كل هذا و مرفع عنه و لكن كم من الناس يعرفون ماهو التصوف الحقيقي ؟
اعلمي باختصار أن التصوف هو أعلى درجات الايمان
ومشايخ الصوفية اللي على حق و على علم مالهم مكان في هذه الموالد من الأساس ومو بمستوى انهم يوقفوا ذكر حتى يطالعوا الناس سواء هيفا أو غيرها

انتهى زمن الشيخ اللي حسب وصفك مجذوب وحوله مجاذيب
اليوم شيخ الصوفية ماعاد ييجي دايما عن طريق "شفت حلم " و مادري ايش
اليوم شيخ الصوفية جاي بعد دراسات في الديانات و الفلسفة و أشياء لأخرى
ومستوى اخر أكثر عمقا و ثقافة و نضجا من مستوى نجتمع في المولد و نحرك راسنا

وحتى لا أطيل بس أنا حبيت أقول انه يجب أن نتجاوز مرحلة الحكم على الاشياء بدون معرفتها
اتمنى تتقبلي كلامي و تفهمي قصدي صح

والسلام عليكم
‏قال Yasmine
انا متفقة جدا مع تعليق اول انونيموس
انتخابات نقابة المحامين اثبتت فعلا ان البلد دى اخرتها هتبقى سودة..المصيبة مش فى الاخوان و اتباعهم المصيبة الحقيقية بقت فى اللى بيصوتوا عشان مش لاقيين بديل..يعنى بدل ما احنا موكوسين وكسة واحدة هنبقى بين وكستين و يا قلبى لا تحزن

المشكلة الحقيقية ان فتاوى الازهر و حتى المواضيع اللى بيتناولوها فى الاعلام بقت انعكاس لثقافة انعدام الاولويات اللى عندنا..مش العكس..يعنى بدال ما يرتقوا هم بفهم الناس للدين بقوا بيقدمولهم مادةاعلامية تشدهم بغض النظر عن كونها بتتكلم فى اولويات و اصول الدين ولا قشوره

يعنى سابوا القمح ابو حشرات و العيش ابو مسامير و انعدام الاخلاق و الذمة و الضمير و مسكوا فى فيلم هيفا..يخرب بيت كدا بجد
‏قال أسماء علي
القاعدة الفقهية إن في أولويات

خلااااص خلصنا كل اللي عندنا و مسكنا ف الأفلام ده أولا

ثانيا

يا نعم

هو مش في حرية فكر و فن و لا البلد دي خلاص بقت ظلامية ظلاما تامااااا

ده ايه ده
!!!!!!
‏قال good4u
ايه يا جماعه انتو بتتكلمو عن الحريه زي ما يكون هو الفستان والبدي والجيبة القصيرة هههههههه اظن الحريه اكبر من كدا
وليه الهجوم علي النمقبات بالطريقه دي انا مش بحب النقاب بس كمان محبش واحده تلبس هدوم تبين اكتر ما تستر ودا
خلاص العرب كلهم اصبحو ضد الازهر دفاعا عن هيفاء وهبي يا سلام ايه الاخلاص دا هيفاء زي غيرها سلعه وكمان سلعه مش غاليه ومحدش يقلي ان بوس الواوا دا فن وحريه ومش عارف ايه
اه فيه منقبات مش كويسه ودا طبيعي لانهم بشر بس اظن كل اللي تلبس بنطلون يحدد الـــــ طبعا فاهمني دي مش كويسه وبردو دي مش حريه
ووان كان تخلف من وجهة نظركم انا زعيم المتخلفين انا احب انا اشعر بالامان لما اختي تنزل الشارع وهي انسانه محترمه في كل شيء حتي اللبس اللي ممكن يكون مش عاجب ناس كتير علشان شايفين ان الحشمة تخلف
والحريه ان تعلقي بنشر
‏قال مثلية فقط
هيفاء وهبي

هي فعلا هايفه

بس بتظل أهم

من شيوخ الأزهر

على الأقل فهي منطقية

و عملية

أما هم فمازالو يخترعون

أوهاما يبيعونها للناس

باسم الدين


تحياتي
‏قال غير معرف…
لعبه سياسيه خطره اسمها التمسح بالدين
جعفر نميرى فى السودان ومثله صدام خسين فى العراق
بعد أن كان الدستور الذي وضعه نميري عام 1973 في أعقاب توقيع اتفاقه مع الجنوبيين في أديس أبابا لوقف الحرب الأهلية ينص علي أن الشريعة والعرف مصدران للتشريع، والأحوال الشخصية لغير المسلمين يحكمها القانون الخاص بهم، عدل هذا الدستور في يونيو عام 1984 ليتوافق مع قوانين سبتمبر التي كان قد أصدرها عام 1983، والتي عرفت بقوانين تطبيق الشريعة الإسلامية وتوسعت في تطبيق الحدود وقطع أطراف فقراء السودانيين، ورجمهم في الطرقات العامة، وحبس النساء في البيوت، وفرض أحكام الشريعة علي غير المسلمين. ومع هذا التحول نصب «نميري» نفسه إماماً للمسلمين، وكان من الطبيعي بعد ذلك أن يعدل النصوص الدستورية، التي تحدد فترة الرئاسة لست سنوات، ليبقي في الحكم مدي الحياة،
‏قال Desert cat
Soooo
غريب امر الناس الحقيقة ط
يب ده ايه علاقته بالازهر ولا بالدين الاسلامى اساسا الا هو اتباع الطرق الصوفية كانوا رسل منزلين واحنا مش عارفين .. ثم ان الدين الاسلامى مش يعرف الانقاسامات دى سنى وشيعى وسلفى ووهابى واخوانجى دى كلها اخترعات والله من وراء القصد اعلى واعلم
وعلشان كد انا بقول العبقارة بتوع الازهر يعملوا جمعيه مع بعض ويروحوا يشوفوا الفيلم

شرفتنى جدا يا كبير
‏قال Desert cat
goodman
هو بصرف النظر اننا مقتنعين بهيفاء او مش مقتنعين الفعل اللى قامت بيه جبهة علماء الازهر نفسه خطأ فى حقهم وليس فى حق هيفاء

تحياتى
‏قال Desert cat
Jannah
كلامك منطقى جدا وانا متفقه مع كل حرف فيه
تحياتى
‏قال Desert cat
Jannah
طبعا انتى تشرفينى جدا وخدى راحتك فى مناقشه اللى تحبيه
لكن انا راجعت كومنت العزيز سووو والحقيقة هو مش فيه اى سخرية من الصوفية كايدولوجية انما هل من الممكن اننا نسمى ما يفعله الصوفية فى الموالد من ذكر انه صحيح الدين الاسلامى ؟؟؟ اعتقد ان كلام سوو ينصب فى ما يفعله الصوفية فى الموالد وليس فيهم كاشخاص او كفكر

تحياتى وشرفتينى جدا
‏قال Desert cat
انا حرة
اهو ده بقى يا مونى اللى عصبنى بجد
يعنى ايه البلد تعج فساد وسايبينه ينتشر وبدال ما يحسو باوجاع الناس ويتوجهوا للريس بتوفير حياة كريمة للشعب رايحين يتوجهوا له بالغاء فيلم شوفت خيبة اكتر من كدا يا حبيبتى
:))
شرفتينى
‏قال Desert cat
أسماء علي

يا سمسمه يا روح قلبى دول بالظبط بيطبقوا المثل جه فى التافهه واتصدر

تحياتى ليكى
‏قال Desert cat
sayed
يا استاذ سيد اللى تتخفى دى بالتاكيد انسانة غير طبيعية
اما اللى تلبس بنطلون محدد او تمشى عريانه فدى حسابها على ربنا فى حاجه اسمها وسطية يا امة الوسطية
ابشر كمان مفيش امان حتى للى حاطه قطعة قماش على وشها
اصل المتحرشين بيقولوا عليه بتتدارى فيه وهى اكتر واحدة بيتحرشوا بيها هههههههههه
شرفت
‏قال Desert cat
مثلية فقط
حبيبتى بصرف النظر عن هيافه هيفاء البلد فيها بلاوى اهم كتير من هيفاء فعلا المفروض يركزا عليها حفاظا على حقوق الانسان على الاقل

تحياتى يا جميله
‏قال Desert cat
Anonymous
الدين اصبح بيزنس ومصلحة جامدة اوى
كل ما زاد الفقرا والجهلاء كل ما تم قضاء المصلحة كما صاحبها شاء
‏قال Soooo
بعد اذنك ياقطه عايز اعلق بس على تعليق جانا على تعليقها على تعليقي
ياخبر ابيض !! ده انا نسيت انا عايز اقول ايه !!؟

لا افتكرت

اولا يا جانا انا ماقللتش من الصوفيه كفكر .. وما قللتش من اي فكر ولا اي معتقد في عبادة الله .. حتى لو كان واحد شايف نفسه بيعبد الله متمثلا في زلطه قدامه
دي حريه شخصيه وهو حر فيها مادام مش بيضرني ومش بيقلل من فكري

ثانيا .. هنتخيل فعلا انه وعلى كلامك .. اللي بيحصل في الموالد الشعبيه من تفقير وحلقات ذكر خرافات وان الصوفيه الحقيقية بريئة من ده .. يبقى بالتالي الغلط على اللي بيفقرو لأنهم خدو قشور الصوفية وبيطبقوها .. وبيستغلو هيئتهم القريبه من المشايخ بدون تعمق في الفكر .. ويستحق ان يقال عليهم مشايخ مجاذيب

ثالثا .. الفكر الصوفي بيعتمد على الزهد في الحياة الدنيا والتقرب من المولى عز وجل .. وبالتالي لما يجي واحد عامل نفسه من أتباع الفكر الصوفي وينسى ربنا في حلقة الذكر والتفقير ويبص على وراك هيفا وهي بتتمرجح .. ويركز معاها وينسى ربه متمثلا في تفقيره .. يبقى بالتالي ده مش صوفي حقيقي .. ويستحق أن يقال عليه مجذوب

رابعا .. لو واحد بيعبد زلطه .. زلطه .. وشايفها هي رب الكون .. وبيعبدها باخلاص شديد .. وشاف حاجه شتته عن اخلاصه في عبادة الزلطه .. يبقى هو مش مخلص في عبادته للزلطه دي .. يبقى بالتالي مش مخلص في عقيدته .. وماينفعش انه يتكلم بلسان اهل هذه العقيده

خامسا .. انا راجل وعهد الله .. وانتي كل شوية في تعليقك تقولي انتي وافهمي واعرفي .. (سوووو) ده اسم رمزي معناه مصيبه او كارثه .. هو أي نعم ينفع للرجل وللانثى .. بس انا رجل

واتمنى انك تكوني خدتي كلامي بصدر رحب .. ولو حسيتي اني منفعل شويه في تعليقي اعذريني .. لأن الفيلم اصلا مش حلو ومش مستاهل كل الضجه واحنا بنعمل شو اعلامي ليه على الفاضي


معلش ياقطه .. رغيت كتير عندك .. بس ان ماكنتش ارغي عندك .. هارغي عند مين يعني





سلاموووووووووووز
‏قال غير معرف…
hi to all catofdesert.blogspot.comers this is my first post and thought i would say hello to you all -
thanks speak soon
gazza
‏قال غير معرف…
hi just registered ,, tinas

المشاركات الشائعة