وافرضى قالت لى عايزة ؟؟


من يومين داخله اشوف رسايلى على الفيسبوك لاقيت رساله غريبة من شخص غريب بيقولى انا شوفت برنامج حضرتك على قناة الانسانية وكنت محتاج أتكلم معاكى فى كام نقطة كدا ممكن تسمحى لى ؟؟
مش اهتميت اوى بس تانى يوم لاقيت نفس الرساله قولت لما اشوف ايه موضوع النقط دى
رديت عليه وقولت له اتفضل لو انت موجود ... وعلشان الظروف الكويسه او اللى مش كويسه مش عارفه الحقيقة المهم طلع موجود
بدأنا الكلام ده الماسنجر بتاعى ممكن تضيفينى ؟؟ قولت له لاء خلينا هنا وخلاص
قالى طبعا ده حقك وبكل ترحاب وافق
وبدأ كلامه أنتى متحدثة لبقة وكلامك مقنع ماشاء الله بس انا كان عندى تعقيب على كلامك مع المذيعه وانتى بتقولى لها البنت مش نصف كائن هى من حقها تشتغل فى المجال اللى تلاقى نفسها فيه ومن حقها تتعلم الانترنت
قولت له جميل
ايه بقى اعتراض حضرتك
قالى اعتراضى يا استاذه ان البنت مش من حقها تتعلم اى حاجه مفسدة
هو انتى عارفه الانترنت ده ممكن البنت تدخل فيه ايه ؟؟
طيب انا هحكى لك حكاية عن واحد مدرس اعرفه كان بيجيب افلام فيديو اباحية يتفرج عليها هو وزوجته فى غرفة نومهم وفى يوم رجع من المدرسة بدرى لاقى ولاده قاعدين بيتفرجوا قام كسر الفيديو وضرب العيال ... وانتى بعد كل ده قاعدة لى فى التلفزيون وعمال تقولى من حق البنت ومن حق البنت واديتى لها الف حق !!
البنت بنت والولد ولد
قولت له طيب يعنى انت شايف ان الولد بس اللى من حقه يتعلم انترنت والبنت لاء ؟؟ ماهو الولد برضه ممكن يدخل مواقع اباحية ومحدش رقيب عليه ؟؟ بمعنى ان التكنولوجيا دى سلاح ذو حدين كل واحد ممكن يستخدمها فى اللى دماغه تؤهله ليها وكل واحد وتربيته ؟؟ ثم ان حكاية صاحبك المدرس دى قصور منه هو فى تربيه اولاده ... يعنى الفيديو مش راح جاب العيال وقالهم والنبى افتحونى واتفرجوا على الشريط اللى جوايا .. كمان انت بتقول ان الراجل ده بيتفرج على الافلام دى فى غرفة نومه هو وزوجته بس .. ايه عرف العيال بقى بالشرايط دى ؟؟
قالى هو كان ناسى الشريط فى الفيديو كمان الولد بس هو اللى من حقه يتعلم ويعرف كل ما هو جديد وحديث انما البنت تتعلم ليه ؟؟
ماهى البنت فى النهاية ملهاش غير بيت جوزها ليه نفتح عينيها على الانترنت ونعلمها ثقافات رامياها علينا اسرائيل علشان تدمر شبابنا مهى اسرائيل اللى ورا الدش والستلايت والانترنت ده واحنا فى غنى عن الانحراف ده كله !!
انا بكل ازبهلال
اسرائيل ؟؟ لو الانترنت والستلايت من عند اسرائيل ده احنا المفروض نشكرهم وبعدين انت عايز البنات يبقوا جهله افرض ابنها اللى هى قعدت فى البيت علشان تربيه رجع من المدرسة وسالها سؤال فى الكمبيوتر او فى الانترنت تقوله مش عارفه يا حبيبى اصل اسرائيل لما رمت علينا الانرنت والستلايت قالت الولاد بس اللى من حقهم يعرفوا وعلشان كدا روح اسال بابا هو اكيد عارف ؟؟
يا استاذه انتى بتجادلى فى ايه بالظبط
الولد بس اللى من حقه يتعلم التكنولوجيا ويدخل على مواقع اباحيه يدخل على مواقع تعليميه هو حر
انما البنت تتعلم ليه
طيب سؤال اخير
انت ممكن تتجوز ده اذا كنت مش متجوز يعنى واحدة جاهله يعنى مش تعرف يعنى ايه كمبيوتر ولا موبايل ولا نت ولا اى بطيخ ؟؟
طبعا انا اصلا مش هتجوز غير واحدة كدا اصل افرضى هى اتفرجت على الحاجات دى الاقيها جاية تقولى انا عايزه اعمل زى اللى شوفته .. طيب افرضى انا مش عايز اعمل اللى هى شافته او انا بشتغل شغل مرهق
طيب معلشى انا مضطرة اقفل دلوقتى اصل الساعه داخله على الواحدة صباحا وانا عندى شغل الصبح الحقيقة ولازم اقوم انام
اوعى تكونى زعلانة بجد انا سعدت جدا بالبرنامج وانتى كنتى منورة الشاشه ويارب دائما متألقه بس الله يكرمك ابعدى عن حوارات البنت زى الولد دى
انا صمت تاااااااااااااااااام مع شعور بارتفاع درجة حرارتى وعليه لاقيت ايدى بدون اى شعور رايحه على حرف الاكس فى اقصى اليمين وكانت الضغطة اللى فيها الخلاص
على فكرة انا استاذنته قبل ما انشر البوست وهو وافق بس قالى بلاش ذكر اسماء
طبعا انا كنت هعمل كدا مع انه برضه اسمه مش يدل على شخص بس لازم احترم رغبته

Comments

Ahmed Talk said…
ياستي إنسان قليل الأدب
dr.lecter said…
ياااه هو لسه فيه كده

؟

طيب بما ان هو عنده المعتقدات دي بيتكلم معاكي ليه علي النت؟ يبقي اكيد بقي رايه ان اي بنت بتستخدم الفيس بوك او النت بطاله بقي

ولا هو بيضحك علي نفسه وبيشتغلك من الصبح؟

الموضوع ده اتردم من زمان ومافيش حاجه اسمها ولد وبنت خلاص انتهينا منه من زمان

انت خساره بجد انك ضيعتي وقتك معاه لو النت هيبقي خطر يبقي اخطر علي الولد

انت عارفه بالظبط نفس الحوار بتاع انا مرتبطش بواحده كانت تعرف حد قبلي او مشيت مع حد


رغم انه هو مشي مع 3 مثلا

لكن يقولك لا الراجل راجل والست ست

وشكرررررررررررران

بجد خساره تعبتي نفسك في كتابه البوست

منك لله ياحنان حرقتي دمي من الاخ ده
tamer.sala7 said…
يا قلبك
يا صبرك
يا طولة بالك

يعني بعد الست بتاعة امبارح وبعد الراجل بتاع انهاردة عايز اقولك ان بجد مفيش امل كله بقي شبه بعضه نفس التفكير ونفس المخ ناقص ايه تاني

بس بجد عندك صبر وبطولة بال مكنتش شايفهم فيكي
صفا سارة said…
الله ايه يا قطة ازاى تقولى البنت زى الولد الله انتى مش عارفة ان البنت بنت والولد ولد

انا دمى اتحرق من الناس دى بجد منتهى التناقض والانانية والتخلف ربنا يرحمنا منهم بئه
مظبوط البنت زي الولد ماهياش كمالة عدد
هيه ايه المشكله لو المرأه اشتغلت رائدة فضاء حتي ؟؟؟؟
الربان said…
تحياتي


الاصل في الاسلام هو المساواة بين الذكر و الانثي لا فرق بينهما في الحقوق او الواجبات...عدا بعض التكليفات الشرعية التي تتناسب وكبيعة المرأة كالصوم مثلا...
قال الله تعالي :
سورة الحجرات)
(يَا أَيُّهَا النَّاسُ إِنَّا خَلَقْنَاكُم مِّن ذَكَر وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ)...

يقول الله تعالى: " ووضع الكتاب فترى المجرمين مشفقين ممافيه ويقولون ياويلتنا مال هذا الكتاب لايغادر صغيرة ولاكبيرة إلا أحصاها ووجدوا ماعملوا حاضراً ولايظلم ربك أحداً"

يعني الذكر و الانثي نفس التكليفات و الحساب...و لا يستثني الرجل من الحساب لانه رجل....

و رب أنثي خدمت دينها و أظهرت فضله
و هدي بها الله ما لم يستطع ان يفعله رجل....

المعرفة حق للجميع...و كل انسان و عمله...فمن يدخل علي مواقع محظورة اخلاقيا..مثلا...ذنبه عند الله يوفيه حسابه بصرف النظر عن جنسه ذكر كان ام أنثي....
و خيرا فعلتي بالتوقف عن الجدال.

تحياتي و تقديري
أبنوسة said…
قطقوطه

صباح الخير

الجهل مصيبه ومناقشة الجاهل اكبر مصيبه

صافي الود
ايـــويـــة said…
هاي يا قطة
انا باحييكي على النجاحات اللي حققتيها وباحييكي على الاسمرار والمثابرة والتصميم على النجاح في نشر الوعي والتغيير الى مجتمع افضل

كمان باهنيكي على صبرك على تحملك الاذى من اجل مبادئك السامية والنبيلة وانا باتعلم منك الصبر رغم ان دي حاجة صعبة بالنسبالي قدام نوعية الناس دي


فيه علامة سؤال كبرة على مدى اهمية تثقيف المراة التي تربي الاجيال ولازم يفهمو ان المراة المثقفة هي اللي بتبني مجتمع مثقف والما المراة المدفونة والمسلوب ارادتها هتخلف اجيال متحلفين ومش قادرين يعيشو

الشخص دة اللي سمح لفسه يستعمل التكنولوجيا اللي بيدعي انها من اسرائيل هو لو كان مسدق اللي بيقولو كان ماستعملش التكنولوجيا دي من اصلو, بس هو محللها لنفسه ومحرمها على اخته في لبيت

مجتمع بعاني من تناقض في الشخصية هو مبني على خلفية الجهل او على امراض نفسية اللي المفروض كمان انهم يستعملو تكنلوجيا العلاج النفسي, بس طالما موش فاهمين انهم بيعانو وبيسببو معاناة للناس فاذا يجب على القائمين على المجتمع من وزارات وباحثين ومفكرين انهم يلاقو حلول للجهل وفرض الراي على الاخرين رالارهاب والترهيب والا حيروح تعبك وتعب الناس اللي زي حضرتك سدى ما لم تكن لها اذان صاغية عند المسئولين

دة في الدول المتقدمة احيانا بيسنو قوانين جديدة بناءا على استنتاجات من المدونات العاقلة والمثقفة

انا لو كنت ادمنعلى الجروب بتاع حضرتك مكنتش استحمل اصوات الارهاب والتخويف اللي بيفرضوها على اراء ناس تانيين عندهم راي اخر عايزين يقولوه ودة موش اعتراض على اسلوبك في ادارة الجروب وانما من كتر المسيطرين بالارهاب على راي الاخرين

تحياتي
Blank-Socrate said…
طبعا مع احترامى ليه
العقليه دى مش جديدة تقريبا دى عقليه الاغلبيه
نقط سريعه
نظريه المؤامرة
خوف من معرفة المراءة امام عجز منه سواء معرفة جنسية او اى نوع معرفة اخرى
تحياتى
يا صبر أيوب

انا تعبت من مجرد قراءة البوست

بس هي المشكلة أنه بيقول اللي بيتقال له .. يعني هو ما يعرفش غير كده

قالوا له الست ست و الراجل راجل .. دي فطرتها الخنوع و الإستسلام و أنت فطرتك الشجاعة و الإقدام

إنفش ريشك يا ديك البرابر

---
agnonano said…
خلى بالك طويل, و نصيحة وتحاوليش تفهمى الناس دول حاجه, سيبيهم فى بساطتهم لانهم مش حايجيبوا غير الضغط النفسى

هما فى كوكب و احنا كوكب تانى, بالنسبالهم كائنات فضائية

اتناقشى مع علمانين او اجانب احسن

انا فقد الامل مش فى البلد بس لا فى جهل شعبها
Gehad said…
حنان انا شوفتك فى التلفزيون وبعد البرنامج والكلام اللى قولتيه انا رأى فيكى اتغير 180 درجة
فى البداية لماعرفت انك طالعه على قناة الانسانية كنت متحفز انى اشوف البرنامج علشان اعرف انتى حتقولى ايه علشان انا عارف ان اغلب كلامك خبط ورزع فى الاخوان وقولت بالفعل لو عملتى كدا فى التلفزيون انا حدخل بمكالمة تليفونية وارد عليكى
فى بداية ظهورك مش صدقت انك انتى حنان الشريف لان من كلامك فى الفيسبوك والبلوج يعطى انطباع انك واحدة كبيرة ولولا تقديم المذيعه ليكى فى البداية انا كنت قولت ان البرنامج غلط او ان الضيفه واحدة غيرك كمان تكرارها لاسمك فى خلال الحوار واللى عجبنى بشكل غير متخيل
اولا اسلوب كلامك على الطبيعه غير فى الانترنت يمكن علشان مش شايفين بعض فالواحد بيحس بحدة فى الكلام والطبيعى ان اسلوبه يقابل ايضا بحدة
كنت شايفك انسانة جريئة واثقه من نفسها بتتكلم باقتناع وبتعرض وجهة النظر اللى مقتنعه بيها
انا بعتذر لك يا حنان عن قلة الذوق اللى كنت بتكلم معاكى بيها واى غلط غلطه فى كل ردودى عليكى
عارفه ليه لأنك نموذج جميل لبنت مصرية متبنيه قضية مهمة وعندها طموح وعايشه لهدف وعايزاه يتحقق باتمنى اشوف كل بنات مصر عندهم نفس ثقتك وجرأتك فى طرح أفكارهم وتحقيق طموحاتهم
كنتى منورة الشاشه يا قطة
magi said…
عارفه انا قريت البوست ده وجاتلى حاله ضحك من الغيظ مقدرتش امسك نفسى

اصل ده مش متخلف
ده اهطل والهطل هو الدرجه الاقل شويه من التخلف
بلووووووووووووووووووووك على طول

ده المتخلفين يبقوا رحمه على كده ده لو فيه 10 على شاكلته دى تبقى ليله سودا ويا حسره عليكى يا مصر
فرعون said…
تسمحيلى انونو ...... ( الرَّجُلَ لَيْسَ مِنْ دُونِ الْمَرْأَةِ، وَلاَ الْمَرْأَةُ مِنْ دُونِ الرَّجُلِ فِي الرَّبِّ ) مكذا قال بولس الرسول وهذا يعنى ان الاثنين عند الله واحد ............ تحياتى
Anonymous said…
قطه
لم تنتبهى لمغزى هذا الحديث
هذا الحوار به كنز معرفى يكشف المستور
قى اخر الحديث عباره فى غاية الأهميه لم تفطنى الى مغزاها
ماذا لو طلبنت ان افعل مثل ما شاهدته وانا مرهق من العمل
هنا ياعزيزتى يكمن السر الدفين فى محاولات بعض الرجال المستميته لقهر المراه واسكاتها او تحجيمها او كتم صوتها او اخفائها
تاره باسم التقاليد وتاره باسم الدين
هى شعور دفين قاتل بالنقص عند بعض الرجال وخوف مرضى الا يستطيع تلبية رغباتها الجسديه
هذه هى خقيقة هؤلاء الصنف من الرجال بلا لف ودوران وسفسطه وتستر خلف اى حجه
وسبق ان قبت هذا فى مدونتك ولكن الجديد اننا نسمع اعترافا مدويا ربما لم يقصد الى كل معنيه هذا الشخص
صفا سارة said…
صحيح يا قطة ليا طلب عندك معلش يا ريت لو فى تسجيل للحوار بتاعك على قناة الانسانيه تنزليه هنا لانه فاتنى غصب عنى ونفسى اشوفه بجد :)
يا رب يكون فى تسجيل
Anonymous said…
انا قاعد اتابع حربك ضد الرجالة والحقونا بيتحرشوا بينا
ومش حسيب حقى وعايزين شارع آمن للجميع
وكل لما ادخل المدونة اشوف الكلام زى ما هو قولت اشوف المزة اللى الرجالة مبيبطلوش تحرش بيها دى
وخليت كل اللى فى البيت قطعوا النفس اول لما البرنامج بدأ طلعتى واحدة عدية يعنى مش حلوة ولا حاجه لدرجة التخلف العقلى اللى جبتيه لينا من كتباتك ده مفيكيش حاجه حلوة غير شفافيك الواحد برضه يقول الحق وشوفت صوركو فى الجرانين وشوية المزز اللى عاملين الحملة الاحتجاجية كل واحدة فيها ميزة واحدة بس والولد اللى اتحرش باسر ده المفروض كان ياخد اعدام مش علشان اتحرش بيها انما علشان الظاهر انه عنده عمى بطلوا بئه تقرفونا بقصص التحرش بتاعتكو دى ولما تكونى طالعه فى التلفزيون تانى متكتبيش على الفيسبوك علشان الواحد ميقعدش يضرب عشرة على شفايفك دى اصلنا وحياة ابوكى مش ناقصين اثارة كفاية اللى بنشوفه فى الشوارع كمان تدخلوا لنا فى بيوتنا اهو ده اللى ناقص
ايـــويـــة said…
للانونيمس الاخير

هو حضرتك ماتشيل النظارة اللي على عينيك وبوص لحنان على انها انسانة بتفكر وبتحس, وموش هدف جنس

------------------

اذا كان علية انا لما اعوز حد يتحرش بية بالبس نقاب علشان وانا لابسة عادي محدش معبرني خالص من شكلي

كان نفسي يتعاملو معاية كانسانة تثير العقل وليس الغرائز
مفكر قلق على مستقبل بلاده said…
بمناسبة خبر عن علماء مصريين يعملون فى البرنامج النووى الأيرانى
هذه صيحه من تونسيه تحتاج لتامل وعمل وحملات اسمعوا ماذا تقول وافيقوا...افيقوا ...افيقوا
مصيبة العرب كبيرة
تونسية من الخارج
|
28/04/2009 م، 09:24 مساءً
انه خبر محزن ان صح ...لان العرب لا يقدرون علمائهم ....خبراء نووي مصريين منتشرين في انحاء العالم و دولتهم لا تحتضنهم ؟؟؟ معقول هذا ..مثل هذه الاخبار تحزنني و تجعلني اموت من القهر ...ياعرب ...يا اصحاب الاموال استثمروا و لو جزءا تافها من ثرواتكم لتشجيع العلم و البحث العلمي ...يا حكومات اجعلي قسطا من الضرائب يصرف على التعليم و البحث العلمي .....عندما افتح القنوات العلمية العالمية كثيرا ما اشاهد علماء يبحثون و يكتشفون و يطورون تقنيات حديثة حتى في تلك الدولة الجاثمة على انفاس العرب .......من الضروري ان نفيق من الدروشة و اللغط و نوجد لانفسنا مكانا في عالم اليوم ......و لا بد من استثمار طاقات الابداع عند مواطنينا .....
عماد said…
ربما هى محاوله للتعرف عليكى , مثلا كان لا يعرف إنك مرتبطه
لأن من يؤمنون بالكيل بمكيالين لا يكشفون ذلك بصراحه الأن
أقول بما , لست متأكد طبعا
طيب ولما إسرائيل هي اللي رمت علينا النت والستالايت والفيس بوك, الباشا المحترم دا قاعد ليه بقي علي النت وبيعمل شاتنج مع مع البنات لحد الساعة واحدة الصبح...؟!!

هو فعلا صدق لما قال إن "البنت مش زي الولد" .. لأن البنت المحترمة والمثقفة أحسن من 1000 ولد تافه ومعقد وفاشل زي أخونا دا

ولا يهمك متهم يا قطة .. المهم أنا نفسي بجد اشوف الحلقة .. ياريت يكون حد سجلها وحطها علي النت ...

سلام :)
بالمناسبة يا قطة الصحراء لو تسمح لي إني أرد علي الشخص السافل المجهول اللي معندهوش حتي الشجاعة إنه يكتب اسمه وكويس برضه انه مكتبش اسمه هنا علشان المدونة ما تتنجس من الشواذ والأنجاس ومدمني العادة السرية من أمثاله.

أحب أقول لك يا حضرة المتخلف (وأنا آسف مضطر أقولك كدة), إنك أولا بني آدم في منتهي الحقارة والقذارة .. لأنك بتكتب كلام مظنش إنك تقبل إن حد يقوله علي أمك أو علي أختك أو علي مراتك. دا لو كنت أصلاً راجل وعندك النخوة.

ثانياً: مش عايز أتنافش معاك كتير لأنك أساساً شخص مريض بالهوس الجنسي وبممارسة العادات الجنسية ومش بعيد إنك تكون كمان مصاب بالعقد النفسية وبالأخص مرض النرجسية اللي بيعاني منه كل الشباب اللي من نفس حالتك. بس مش هقولك أكتر من اننا مش في حرب ضد الرجال او حرب ضد النساء زي ما انت متخيل بعقك الزنخ .. إنما إحنا في حرب ضد أمثالك من التافهين والمراهقين والصيع اللي وسخوا البلد وخلو شكلنا زبالة قدام العالم كله.

إنت اللي زيك المفروض أصلاُ ميتكلمش .. ولا أنت حتي تستحق إنك تقرأ الكلام اللي مكتوب علي المدونة هنا .. لأنك أتفه من كدة .. اللي زيك ملهوش في اي حاجه غير إنه يتفرج علي المواقع الإباحية ويغلق باب حجرته ليمارس عاداته النجسة ...

إنسان قذر فعلاً !!!
الشارده said…
هى النوعيه دى لسه منقرضتش مع الديناصورات
يكونش كان راكب كبسوله زمنيه ووراد علينا من ايام اليشمك والحرملك
لا حول ولا قوة الا بالله
شر البليه ما يضحك said…
أخر صيحات الموضه
من ماسورة الفتاوى المتدفقه
النقاب الشرعى
حذر الداعية السعودي الشيخ محمد الهبدان من ذهاب المرأة وحدها للتسوق دون محرم لها، وذلك اتقاء للشرور والمعاصي
ودعا الشيخ الهبدان من خلال برنامج "ليالي رمضان"على قناة المجد العلمية إلى عدم خروج المرأة من بيتها دون محرم إلا للضرورة كحالة صحية طارئة
ونبه الشيخ الهبدان إلى ضغط بعض الرجال على محارمهم لارتداء عباءة الكتف، كما قال إن الموجود في الأسواق الآن من "النقاب "غالبا" لا يصح ارتداؤه "بحيث تظهر المرأة عينيها أو وجنتيها، والنقاب المشروع هو ما ذكره ابن عباس حينما قرأ آية الحجاب فغطى وجهه وعينا وأبدى عينا واحدة صغيرة وقال هذا هو لترى الطريق، فنقول للأخوات من أرادت أن تتنقب فلتفعل هذا
ومن مصر
أكد الدكتور سالم عبدالجليل وكيل وزارة الاوقاف المصرية لشؤون الدعوة أن اللقاءات التي نظمتها الوزارة مع الموظفات "المنقبات" لاقناعهن بعدم فرضية النقاب أحدثت تأثيرات ايجابية لديهن، حيث قامت 3 موظفات من بينهن اليوم 29-4-2009 بخلع النقاب.

وقال عبدالجليل في تصريحات خاصة لـ"العربية.نت": لقد ركزت خلال حديثي مع الموظفات المنقبات على إعطاء فكرة عامة حول موقف الشريعة الاسلامية من "النقاب" وأنه مجرد عادة لا أساس لها مطلقاً في الدين من قريب او بعيد، وأن المذاهب الفقهية الاربعة تؤكد ان الوجه ليس بعورة، ما كان له تأثير كبير في نفوسهن، حيث خلعت احداهن "النقاب" قبل اللقاء الثاني، بينما خلعت موظفتان أخريان النقاب عقب اللقاء الثاني مباشرة.

وأشار عبدالجليل الى ان باقي الموظفات وعددهن (13 موظفة منقبة) اقتنعن بالفعل بعدم فرضية النقاب، إلا انهن اكدن انهن يرتدينه منذ 10 او 20 سنة ما جعلهن يتعودن على ارتدائه.
شر البليه ما يضحك said…
أخر صيحات الموضه
من ماسورة الفتاوى المتدفقه
النقاب الشرعى
حذر الداعية السعودي الشيخ محمد الهبدان من ذهاب المرأة وحدها للتسوق دون محرم لها، وذلك اتقاء للشرور والمعاصي
ودعا الشيخ الهبدان من خلال برنامج "ليالي رمضان"على قناة المجد العلمية إلى عدم خروج المرأة من بيتها دون محرم إلا للضرورة كحالة صحية طارئة
ونبه الشيخ الهبدان إلى ضغط بعض الرجال على محارمهم لارتداء عباءة الكتف، كما قال إن الموجود في الأسواق الآن من "النقاب "غالبا" لا يصح ارتداؤه "بحيث تظهر المرأة عينيها أو وجنتيها، والنقاب المشروع هو ما ذكره ابن عباس حينما قرأ آية الحجاب فغطى وجهه وعينا وأبدى عينا واحدة صغيرة وقال هذا هو لترى الطريق، فنقول للأخوات من أرادت أن تتنقب فلتفعل هذا
ومن مصر
أكد الدكتور سالم عبدالجليل وكيل وزارة الاوقاف المصرية لشؤون الدعوة أن اللقاءات التي نظمتها الوزارة مع الموظفات "المنقبات" لاقناعهن بعدم فرضية النقاب أحدثت تأثيرات ايجابية لديهن، حيث قامت 3 موظفات من بينهن اليوم 29-4-2009 بخلع النقاب.

وقال عبدالجليل في تصريحات خاصة لـ"العربية.نت": لقد ركزت خلال حديثي مع الموظفات المنقبات على إعطاء فكرة عامة حول موقف الشريعة الاسلامية من "النقاب" وأنه مجرد عادة لا أساس لها مطلقاً في الدين من قريب او بعيد، وأن المذاهب الفقهية الاربعة تؤكد ان الوجه ليس بعورة، ما كان له تأثير كبير في نفوسهن، حيث خلعت احداهن "النقاب" قبل اللقاء الثاني، بينما خلعت موظفتان أخريان النقاب عقب اللقاء الثاني مباشرة.

وأشار عبدالجليل الى ان باقي الموظفات وعددهن (13 موظفة منقبة) اقتنعن بالفعل بعدم فرضية النقاب، إلا انهن اكدن انهن يرتدينه منذ 10 او 20 سنة ما جعلهن يتعودن على ارتدائه.
gogo!sf said…
طول ما فى حد متفتح اوى كده
وبيقول البنت زى الولد عمر ما هيكون فى احترام وعمر التحرش اللى طبعا اساسه البنت اكتر من الولد ما هيقل بل بالعكس هيزيد اكتر واكتر

اسمحيلى كلام الشخص معاكى مش تخلف ابدا ده منتهى العقل والاحترام والتربيه الصحيحه

وفعلا ده راجل محترم وعنده مبدء

اما عن التكنولوجيا فعلا كتير بيستعملوها غلط وكتير بتخرب بيوت وتودى فى داهيه

انا شايفه ان حضرتك بتساعد البنات على الفساد اكتر وهما مش نقصين فساد اصلا

انتى شويه شويه هتشجعيهم انهم يقعدو برة البيت لساعه متأخرة مهى البنت زى الولد بقى عادى يعنى.. وعادى كمان لما تقعد تحشش مع الولاد هى واصحابها

بجد ده منتهى الفساد لما نقول البنت زى الوالد
يعنى لو افترضنا ان الراجل خان مراته تفضل معاه وتخونو هى كمان اكرم لها تموت نفسها او تخليه يطلقها لو ست محترمه

وليه استفسار وارجو الرد عليه
طبعا مدونتك جميله بس فيها حاجه مش عجبتنى لفتت نظرى... ليه بطلو جهل على صورة المنتقبات
ده كمان جهل وتخلف

ارجو انك مش تزعلى منى وتتقبلى كلامى بصدر رحب بس الحقيقه ده مبدئى تقولى عليا متخلفه او جهله مش مهم المهم عندى هو احترامى لذاتى ولاهل بيتى

وبجد مقدرتش احوش نفسى لمناقشتك فى هذا الموضوع...على فكرة انا مش بهجمك هى مجرد مناقشه وبس

شكر ا ليكى
Sherif said…
يدور الموضوع ويلف من بعيد او قريب على هذه الناحية فقط

نفس النت تعلم الأم الطبيخ والتريكو والتفصيل وعليها فيديوهات تشرح بمنتهى الروعة هذه الحرف ومليون الف حاجة

لااتعدى القول انها ايضا انسب الاوضاع لأمرأة زوجها متزمت قد لاتخرج من المنزل فى أن تأتى الدنيا اليها .. صح؟

قطة ودون الدخول فى جدل .. اتبنى قول ابن تيمية ان اى شئ فى الدنيا قبيحه قبيح وحسنه حسن

والعهدة عليك دائما


أخيرا لى عتاب ياقطة فى انك لم تحضرى حفل توقيعى .. وايضا لاتزورينى .. ربما اعجبك شيئا
ايــويــة said…
دة عارف ان الانترنت والستلايت من اسرائيل, ومش بس كدة, كمان راح ودفع فلوس واشترى الانترنت والستلايت بتوع اسرائيل, يبقى اسمو ايه دة؟

الشباب حياكلوك لحمة نية, بس يمكن يسامحوك لو شفايف اختك حلوة
مفكر قلق على مستقبل البلد said…
اللعب بالنار على حساب مصير البلد
قالت دراسة حديثة عن مركز مكافحة الإرهاب بالأكاديمية العسكرية الأمريكية في «وست بوينت» إن الحكومة المصرية تشجع الحركات السلفية في مصر علي اكتساب مزيد من الأتباع لمواجهة نفوذ الإخوان المسلمين المتصاعد. رصدت الدراسة ثلاثة تحديات أساسية أمام الإخوان المسلمون هي حملة التضييق الحكومية ومنافسة الجماعات السلفية والصراعات الداخلية.

وحسب الدراسة، فقد دفع حصول الإخوان علي 88 مقعدا في مجلس الشعب بانتخابات 2005 النظام إلي تبني سياسة أكثر ليونة مع الجماعات السلفية، فشجعها علي اجتذاب مصريين كثيرين لمواجهة اتساع النفوذ السياسي للإخوان. وأضافت الدراسة أن الجماعات السلفية بعيدة عن السياسة، لكن فهمها «المتشدد» للإسلام يجعلها تتخذ مواقف عدائية من الأقليات الدينية. وتستشهد الدراسة بالباحث المصري خليل عناني الذي حذر من «العنف الاجتماعي الذي يمكن أن يترتب عن تغلغل الفكر السلفي». وأطلقت سلطات مصر سراح غالبية المعتقلين من اتباع الجماعة الإسلامية السلفية، وبعض أعضاء جماعة الجهاد ممن قاموا بمراجعات دينية، وانتشرت في الفضائيات وبعض المساجد ظاهرة الدعاة السلفيين بصورة كبيرة. يذكر أن أكاديمية «ويست بوينت» إحدي أهم المؤسسات العسكرية في الولايات المتحدة، قد خرجت منذ تأسيسها أوائل القرن 19، بعض أبرز رجال النخبة العسكرية والسياسية في هذا البلد.
N VOK said…
اولا هى مش خناقه
ثانيا فى فرق كبير بين المبادىء والقيم والاخلاق اللى مينفعش عليها اختلاف لانها ثوابت لمصلحه الانسانيه وبين الرأى الشخصى او المعتقدات الشخصيه اللى مش ينفع حد يتخانق مع حد عشانها
-----------------------
البنت زى الولد فى كل شىء ودى حقيقه عندها نفس القدرات ونفس الصفات ونفس الاخلاق يعنى مش مخلوق فضائى بس اكيد ربنا بين ان فى تكليف للراجل فى حاجات وللست فى حاجات تانيه وده برضو مينفعش نجادل فيه

شكرا لكى
Desert cat said…
Ahmed Talk
وهو كذلك
Desert cat said…
dr.lecter
انا كنت فاكره ان اللى زى كدا ده انقرض من زمان لكن للاسف لازال موجود فى المجتمع ويتمتع بكافة الحقوق التى يتمتع بها البشر الطبيعيين المفروض ان الناس اللى بعقل الاخ تكون ليها منتجع صحى تعيش فيه كدا مع نفسها

تحياتى
Desert cat said…
tamer.sala7
ااااااااااااه
اسكت يا تامر انا حسيت اثناء الحوار ده انى بمت بجد كانت حالتى غريبة وصعب تشخيصها
الحمد لله انى لحقت نفسى

تحياتى
Desert cat said…
صفا سارة
ايوا كان المفروض اقوله ان البنت يعنى انثى والولد يعنى ذكر علشان اعرفه انى فهمت بس للاسف الوقت لم يمهلنى بعد

تحياتى
Desert cat said…
عزيز عيني
انت تسمح لنفسك وتقول كدا يا فندم فى فرق طبعا
الاستاذ بيقولى فى الحوار ان البنت بنت والولد ولد
ده على اساس انى قولت ان البنت والولد هنضربهم فى اتنين ونعمل منهم نوع ثالث
Desert cat said…
الربان
للاسف استاذى الفاضل فى ناس تربت على ان البنت ماهى الا نصف كائن مش من حقها اى حاجه فى الحياة غير انها شيئ لتحقيق رغبات الراجل
مش قادرة افهم مين اللى وظف الناس اللى بالعقلية دى انصاف آلهة على الأرض
تحياتى
Desert cat said…
أبنوسة
والله انتى عندك حق فعلا

محبتى ليكى يا قمراية
Desert cat said…
ايـــويـــة
اولا ميرسى ليكى جدا على ثناءك الجميل
ثانيا امثال هذا الشخص انا بحس انهم يستحقوا الشفقه لانهم مش قادرين يستخدموا العقل اللى ربنا ميزهم بيه عن سائر الكائنات وبالتالى مسلمينه لغيرهم يلعب فيه براحته ويحيشيه بكلام فارغ يصدقوا الكلام ويرددوه لكن افعالهم منتهى التناقض
بالنسبة للجروب فالتكرار بقى يعود الواحد انه يسيب الاشكال دى تتكلم من غير ما يعبرهم اصلا
بس ساعات بيكونوا استفزازيين زيادة عن اللزوم علشان كدا بضطر ارد وان زاد فى قلة ادبه ووقفتيه يقول اصل مش عندك كلام تقوله يعنى حقيقى قمة العهر الفكرى

ميرسى جدا ليكى ايوية
وشرفتينى يا جميل
Desert cat said…
Blank-Socrate
والله يا مينو انا شايفه انهم بدال ما يفضحوا نفسهم ويقعدوا يلكوا على الفاضى يتلهوا احسن ويداروا عجزهم بسكوتهم ويسيبوا المرأة فى حالها

تحياتى
Desert cat said…
على باب الله
ديك البرابر اساسا مش عايز المراة تعرف حاجه علشان مش تقوله عايزة اعمل كدا
يعنى اللى اتعمله من اللى اتحشى فى دماغه اصابه بالعجز

تحياتى
Desert cat said…
agnonano
اه والله هما الاجانب دول اللى يستحقوا المناقشه والكلام لانهم على الاقل ناس بتفهم مش عقول مليانه دبش

تحياتى
Desert cat said…
... amr
اعمل ايه بس
كنت فاكرة هيكون فى نتيجة
Desert cat said…
Gehad
اعتقد ان ردى وصلك يا جهاد
بصرف النظر عن السن او اى حاجه احنا بناقش افكار
عموما اعتذارك مقبول يا فندم
Desert cat said…
magi
ده كوكتيل من الهطل على التخلف طلع العقل العبقرينو ده
عموما هو مش كان على الميل ده كان حوار فيسبوكى بحت
حتى الاضافه اللى اتبعتت عملت لها اجنووووووور
:))
Desert cat said…
فرعون
ده انت تنونو وتعمل اى حاجه تحبها دى مدونتك يا فندم
شرفتنى جدا
تحياتى
Desert cat said…
Anonymous
هو تقريبا الاخ المتحدث قال الكلام فى لحظة صراحة زيادة او ربما كانت الكلمات مقصودة
ويمكن ده السر اللى خلانى انشر البوست ده علشان كل واحد عاجز يروح يتعالج مش يقول اصل المرأة مش ينفع يكون لها حقوق البنت بنت والولد ولد

تحياتى
Desert cat said…
صفا سارة
والله يا سارة انا كنت كتبت فى الفيسبوك ان حد ممكن يسجل الحلقة قبل البرنامج بيوم وفى كا شخص مش اصحابى قالوا هنسجلها ولانى اصلا مش عارفاهم مين مش سالت
وكمان انا كنت على الهواء يعنى مش ينفع اسجل وراح منى اسجلها فى الاعادة لانى بعد ما خلصت البرنامج خرجت مع بعض الاصدقاء ورجعت البيت نمت وبالتالى راحت عليا حتى اشوفنى فى الاعادة
عموما انا ها احاول اسال لو حد سجلهاولو لاقيت لها لنك هبعتها لك

تحياتى يا جميل
Desert cat said…
Anonymous

ربنا يشفيك
Desert cat said…
ايـــويـــة
لاء ازاى يا يويو انتى عايزاه يبقى بنى ادم محترم
ده حتى عيب
Desert cat said…
مفكر قلق على مستقبل بلاده
هو فعلا خبر يحرق الدم
ده يكفى ان الدكتور زويل مشروعه لم يجد الاستحسان فى مصر ودلوقتى مستشار لاوباما فى البيت الابيض
وبعد كل ده وبنقول مصر بلد متخلفه ليه
Desert cat said…
عماد
وهو فى حد بيتعرف على حد بالطريقة اللى تجيب الحسرة دى يا عماد
ده انا حتى لو عايزة اتعرف اكيد الهروب هيكون اول فكرة تخطر فى بالى
Desert cat said…
Servant of Christ
لاء ماهو النوعيات دى التى تفعل مالا تقول
مجرد كلام سمعوه ويرددوه فقط دون علم او معرفه
لو اللحقة حد سجلها اكيد هجيب اللنك
Desert cat said…
Servant of Christ
يا عزيزى رد على اللى انت عايزة المدونة مدونتك
بس تفتكر واحد بالعقل الزبالة ده هيبقى عنده ولو جزء يسير من الاحساس ؟

اشكرك جدا
Desert cat said…
الشارده
النوعية دى لازالت تحياوتتكاثر
هبطت عليا فى الفيسبوك بدون اى مقدمات
تحياتى
Desert cat said…
شر البليه ما يضحك
ماهو ده نفس الراجل بتاع فتة قتل ميكى ماوس
ده تقريبا مجنون
Desert cat said…
gogo!sf
انتى بتتكلمى عن المبدء والإحترام من أنهى إتجاه حضرتك ؟؟
إذا كان ربنا سبحانه وتعالى قال
{يهب لمن يشاء اناثًا ويهب لمن يشاء الذكور}
الله قدم الإناث على الذكور فى هبته
وقال فى سورة آل عمران )
وليس الذكر كالأنثى
المستثنى أولا (الذكر) هو الأقل مكانة كمان فى كلامك بتقولى ان البنت هى السبب فى التحرش ؟؟ كلامك يدل على مدى شعورك واحساسك بالدونية وتعميمك ليه ده خطأ فادح .. إذا كنتى انتى بتنزلى الشارع علشان الشباب يتحرشوا بحضرتك وبالتالى بتشجعيهم فدى حاجه ترجع لك مستحيل يتم تعميمها لأن فى بنات محترمات كتير جدا بينزلوا الشارع علشان رايحين شغلهم او جامعتهم او ايا كانت الوجهه اللى رايحينها مش نازلين علشان كائن قليل الادب ناقص يتحرش بيهم او يمد ايده عليهم بدليل ان بنات محترمات جدا مش بتسيب حقها وبتودى المتحرش السافل ده هو واللى بيبرر له سبب لتحرشه القسم بخلاف احساسك بالدونية اعتراف ضمنى منك المتحرش ده حيوان مش بيقدر يتحكم فى نفسه لمجرد انه شايف واحدة ماشية على الارض ربما باين منها خصلة شعر أو صباع رجلها الصغير وده محتاج علاج مش محتاج مش البنت تخرج من بيتها اصل يا حرام بيثار على نفسه
انتى شايفه ان الشخص اللى انا نشرت رسالته كلامه صح ومحترم انتى بقى بتستخدمى تكنولوجيا الغرب الفاسدة دى ليه ؟؟ مش خايفه على نفسك من الفساد ؟؟ بالمناسبة فى ستات محترمات جدا بيرجعوا بيوتهم الفجر زى الدكتورة مثلا اللى بتسهر علشان تنقذ حياة شخص
يعنى مش كل اللى بيرجع بيته الفجر بيكون حشاش لربما دى تكون النماذج اللى بتشوفيها قدامك علشان كدا حكمتى ان كل اللى بيرجع الفجر بيكون بيحشش او قاعد على القهوة
بالنسبة للمنتقبة فهى فعلا انسانة جاهله لا تختلف كثيرا عن قاطع الطريق او المجرم الهربان من عمله سودة وخايف حد يكتشفه
ربنا لو كان عايز الستات تتكفن بالكفن الاسود ده كان خلقهم بطريقة تانية

شرفتى
Desert cat said…
Sherif
يا استاذى انا بستغرب جدا من العقول المنادية بتحريم كل شيئ على البنت وكأنها خلقت فقط لخدمة الرجل
ده طلب العلم فريضه
ولم يتم تخصيص العلم للرجل فقط
ربنا يرحم المجتمع بجد من النفوس المريضة دى

بالنسبة لحفل التوقيع انا مش قاهرية لكن لما اسكن فى القاهره هرشق فى اى حاجه عمل لحضرتك
واسفه بجد على عدم متابعتى
:))
اشكرك جدا وشرفتنى
وربنا يوفقك دائما وابدا
Desert cat said…
ايــويــة
قمة الهبل صدقينى
بيحرم حاجات جاية تفسد فى المجتمع فى حين انه بيشترى الفساد ده
علشان يشوف عليه شفايف الناس ههههههههههه
شكله تخصص شفايف
انا حرة said…
انا جاتلى حالة ضحك هستيرى من اخر جملتين قالهم و من التاج بتاع البوست و تعليق الاخ بتاع الشفايف كمل عليا ..ربنا يكون فى عونك يا حنان انتى بتدنى فى مالطة..يخرب بيت دى عقليات متخلفة بجد
Desert cat said…
انا حرة
ماهو شر البلية ما يضحك يا حبيبة
ربنا يرحمنا
سيبك انتى بقى انا مبسوطة جدا انك رجعتى فى قرارك

تحياتى ومحبتى ليكى
حنان ازيك انا ع فكردايما بقرالك بس مبيبقاش عندى تعليق لأنة سواءوافقت او اعترضت دة فحد ذاتة مش هيغير انك كاتبة جيدة ومحاورة بارعة وصحفية شديدة الذكاء والقدرة على الدفاع عن ارائك الشخصية اللى شايفة انك مبتفريضهاش على حد اطلاقا ودة من افضل مزاياكى وطبعا انا بعتبر حق الاعتراض دة شئ مش طبيعى فالمدونات لأنة مش صح احجر على كلام وتفكير انسان داخل عرينة وموطن أفكارة اللى هوة المدونة
ع اية حال دى مقدمة طويلة لأنى اقولك انى قريت المقال وفالنهاية وبرغم انى لسة راجعة من المستشفى بسبب مرض ابنى ومرهقة جداااااااا لكن هلكت من الضحك على العنوان فنهاية المقال ابدعتى بجد ورديتى على غباء منقطع النظير من شخص كان بتفكيرة بيسئ لنفسة اكتر مابيسئ للفتاة او ليكى بجد تفوقتى على حنان فى أسم المقال ههههههههه
تحياتى
Desert cat said…
كلاكيت تانى وتانى
نرمو بجد وحشانى جدا
انا كويسه الحمد لله
والف ألف سلامة على أمر ربنا يقومه لك باللامة يا حبيبتى
ميرسى جدا ليكى ولشعورك الطيب
بالنسبة للشخص ده انا الحقيقة حسيت ان معدتى وجعتنى وكان نفسى ارجع بعد الحوار العظيم ده
بس ربنا ستر
انتى تنورى البلوج يا نرمو سواء متقفه او معترضه ده احنا بينا محشى وبرتقال
:))
والف سلامة مرة تانية على أمر

Popular posts from this blog

قميص دهشور

كل تحرش وانتوا طيبين