مصر مش النظام

فى البوست السابق وفى المواقع الالكترونية اللى قامت بنشر ما تخطط له عصابة نصر الله وحماس حسيت بذهول من بعض الكومنتات اللى بتدين مصر واللى قاعد يدعى لحزن الله بالنصر ..
نصر على مين بالظبط ؟؟ على بلدنا !!
هو النظام اصبح مصر الوطن اللى لامانا على ارضها وجنسيتها فى شهادات ميلادنا من اول يوم شوفنا فيه الدنيا حتى اليوم اللى بنفارق فيه الدنيا لما يتكتب برضه فى شهادة الوفاة ؟؟
النظام بيتغير حتى لو فضل الرئيس فى مصر 30 سنة ولو 50 سنة برضه بيتغير انما الوطن باقى
مبسطوين فى ايه بقى وبتدعو لمجرم ارهابى بانه ربنا ينصره علشان يدمر ويخرب فى البلد براحته ؟؟
حقيقى حالة ازدواج لا مثيل لها .. منين بنشكو من النظام الظالم القاهر ومنين عايزين نساعد ارهابى يدمر فى بلدنا ويخربها ؟؟
يعنى هنكون مبسطوين لما البلد تدخل فى مرحلة فوضى وتبقى عراق بديله ؟؟
ده بدال ما نتكاتف كلنا ونطالب بمحاكمة دوليه لحسن نصر الله .. حفاظاً على أمن البلد ؟؟
وما زاد الطين بله
بدو سيناء اللى كل اللى يمهم تهريب الاسلحة والمخدرات واى حاجه ينفع تتهرب طالما هيجى من وراها فلوس بلا بلد بلا وجع دماغ وهما ايش فهمهم اصلا فى معنى كلمة وطن ويكفى باعهم الطويل وافعالهم المذكورة فى كتب التاريخ ومعاونتهم للاحتلال الانجليزى .. ايامها هنقول كان لسه مفيش ستلايت ولا عنترنت ولا اى بطيخ .. لكن هل لحد النهارده مش خرج من بينهم واحد متثقف ومتنور وبيحب بلده ؟؟ هل هنفضل نذكر فى كتاب تاريخ 3اعدادى من اسباب النكسة خيانة بعض الأعراب ؟؟؟
اشمعنا اهل سيناء انا مش عنصرية ولا حاجه بس الخبر ده اللى بيقول كدا

رفح - أشرف سويلم - وقعت اشتباكات عنيفة وتبادل لاطلاق النار بين الاجهزة الامنية المصرية واهالي بدو سيناء بمنطقة وادي عمرو وسط سيناء في اطار حملة التفتيش الموسعة للسلطات المصرية بحثا عن 10 لبنانيين هاربين وسط صحراء سيناء وهو ما يعد اشارة لعودة اجواء التوتر مرة اخري بين البدو والسلطات المصرية.

تعليقات

‏قال Magi Mostafa
بصى فى حاله عدم انتماء منتشره بشكل رهيب بين الشعب المصرى
طبيعى ده يحصل وفى انتظار نتائج التحقيقات واحكام القضاء
‏قال مواطن مصري
انا شايف ان تقديم قاادة اسرائيل بجرائم حرب و محاكمة سامي شهاب بتهمة الارهاب
‏قال Ahmed
فاكرة فيلم ليلة سقوط بغداد كانت في شخصية دايما تقوم دووووووووول هينضفونا وكان بيقصد الأمريكان لو دخول البلد هينضفونا وفي آخر الفيلم اخدله رصاصة وترمي علي الزبالة وكان هي دي النظافة

دي الحاجة لجت علي بالي وانا بقرأ الموضوع بتاعك

مشكووووووووورة
‏قال AHMED SAMIR
تفتكري من المسئول عن كدة؟
مين اللي وصلنا للحالة دي؟
مين اللي خلانا نطيق الموت ولا نطيق النظام دة بظلمه وجبروته و اجهزته القمعية
مين اللي حول الشعب لكائنات مهمشة لا حول لها ولاقوة ولا تقوى على اتخاذ اي قرار و ابداء اي رأي في اي قضية؟
زي ما قلتي
مصر مش هي النظام
ولذلك فأعداء النظام دة مش هم اعداء مصر
تحياتي
‏قال V.Hayat
مشكلة المصريين انهم عاطفيين ازيد من اللازم تعاطفوا مع معتوه دمر بلاده من اجل ان ينال رضى اسياده فى طهران والكاميرات التى كان يراقب بها اهل بلده ها انسان معتوه ركبه جنون العظمة ومن يتعاطف معه من المصريين فاكيد ليس بمصرى

تحياتى
‏قال Unknown
عزيزتى القطة كيف حالك
تعليقي هو اخر كلمة قريتها في البوست دا
لك الله يا مصر
تحياتي والى الامام
‏قال Blank-Socrate
ها ها ها
انا اطلع عامل
ADD
لقطه الصحراء على الفيس بوووك و انا مأعرفش
بصراحه سعيد جدااااااااا
:)
تحياتى
‏قال غير معرف…
Those whom the Bedwens were shooting are the Interior Ministry officers who torture people, and the 'Badw' knew that if they were taken in, they will be tortured and perhaps even maimed by the brave officers of the 'Dakhleia', and since they are armed and have automatic weapons, they thought it was perhaps a good idea to defend themselves.

It is really striking, don't you think that any torture victim would give it a serious thought to shoot at the Ministry of Interior Officers next time they show up to take him for a new round of torture? Just a thought for you to consider.
‏قال روابط
من المؤسف اننى اختلف معك فى هذا البوست جملة وتفصيلا

فاسرائيل هى من يجب ان نعاديها, وليس فصيل سياسى مختلف عنا مذهبيا فى اطار نفس الدين كحزب الله

اما بدو سيناء, فأرجو ان تراجعى قراءاتك التاريخية بشأنهم, لأنك مدينة لهم بأعتذار

تحياتى
‏قال الربان
تحياتي


للاسف مازال البعض منا غير مستوعب الحقيقة...

حزب الله هو حركة مسلحة لها فكرها المرتبط بايران...و حزب الله تدخل في بلاد
عربية اخري مثل:

اليمن ( الحوثيين )باعتراف الرئيس اليمني.
البحرين...درب بعض شيعة البحرين في معسكر بسوريا...لاعمال تخريبية تهز النظام الحاكم....
هذا باعتراف وزير داخلية البحرين.

السودان..القافلة التي قصفتها اسرائيل.

مصر ليست هي الحكومة او النظام...مصر
وطن لاجيال و اجيال...لازم نفرق و نستوعب الفرق جيدا...


نختلف مع بعض نعم...ننقد سياسات نعم
لكن حين يتم اختراق الامن القومي المصري
فلا و الف لا....لقد استشهد مئات الالاف
للحفاظ علي مصر و شعبها و حتي يبقي هذا الوطن آمنا مطمئناً و نحن يجب ان نستمر في المحافظة عليه كذلك بعيدا عن
اي خلافات بيننا كشعب او مع الحكومة.


تحياتي و تقديري
‏قال عرب ستان…
تحياتي لكي يا حنان
انا قولت من زمان ان عملية غزة هي استهداف مصر وذلك عن طريق جرها للحرب والمؤامرة على مصر فشلت, والان بدئت مؤامرة ثانية على مصر اصعب من من الاولى وهي تجنيد مصريين لضرب اهداف مصرية

المدعو حبيب الله ينفذ المؤامرات الايرانية على مصر لانهاك قواها واضعاف نفوذها في الشرق الاوسط لانه يعرقل المصالح الايرانية عند العرب

اعتقد ان الاعداء مثل حزب الله وايران يجب ان نعمل لهم الف حساب لانهم منتشرون داخل مصر
‏قال ألِف
طالما أنك واخدة بالك أن مصر مش هي النظام، ممكن توضحي لنا ازاي تصرفات نصرالله متعارضة مع "مصر ال هي مش النظام" و مضرة بها؟
دا سؤال استفهامي، مش استنكاري.

الوطن، مصر، مش هو الاسم ال بيتكتب في شهادات الميلاد و الوفاة يا قطة. في ناس شايلين أوطانهم جواهم و فيه ناس أنشأوا أوطان ما كانتش موجودة، و فيه أوطان أسمائها بتتغير كل كم ميت أو ألف سنة.

ما ينفعش تتهمي السيناويين - او غيرهم - كدا جزافا بأنهم مش هاممهم غير الفلوس، و أنت عارفة كويس أن دا حال معظم الناس غيرهم في البلد..و دا مش تبرير لأي سلوك من أي حد.

لكن أنت بتحكمي على السيناويين بمعايير هي بالنسبة لهم وهمية و لا تنطبق عليهم، ابتداء بالحدود السياسية و الجمارك - ما هي دي ال بتحدد الفرق بين التهريب و التجارة الحرة - لغاية مفاهيم الانتماء و الوطنية بتاعتك أنت؛ مرورا بمشروعية حمل السلاح و الاتّجار فيه. دي كلها مش مفاهيم عالمية و متفق عليها. حظك بس جا أنك من مواليد وادي النيل و في العاصمة أو مدينة مركزية أخرى و إلا كنت شفت العالم بشكل مختلف.

عاوزة نجم منهم، عندك المزني، شِعره كان معلق على الكعبة. هم كمان عندهم مشاهير تاريخيين :)

عاوزة اسم واحد منهم معاصر "مثقف" و متعلم؟ عندك مسعد أبوفجر في المعتقل قرب على سنتين. مش ذنبهم بقى أن عددهم أقل فبالتالي احتمالات نجومية أفراد منهم أقل، و لا أن التعليم وصلهم متأخر.
مسألة "بيحب وطنه" دي مسألة نسبية بقى، واضح مبدئيا أنك مختلفة معهم في تعريفها، و مش معهم بس، لكن كمان مع ناس كثير هم اقرب لك اجتماعيا و ثقافيا.

يا شيخة، بقى النكسة سببها خيانة السيناويين! هم ال قالوا للإسرائيليين ازاي يضربوا المطارات، و للقواد العسكريين يتخبطوا و يتهرجلوا في الصحراء؟
لو كنت قلتي الأعراب ال خانوا عرابي زي ماهو مكتوب في كتب إعدادي فعلا كنا قلنا معلش، و كنا تناقشنا في مفهوم الخيانة..لكن 67!!

و إذا كنا هنحكتم لكتب التاريخ الرسمي، نسيتي حكايات العسكر و الضباط المصريين ال خبوهم السيناويين و لبسوهم لبسهم؛ و دور السيناويين في حرب الاستنزاف ال جرت على أرضهم و ماكانش ممكن تنجح من غيرهم!
و مع كدا فضلوا مهمشين و عاملتهم حكومة الوطن زي ما إسرائيل عاملت الفلسطينيين ال ادعت أن أرضهم كانت مهجورة و بلا شعب سوى شراذم من البدو لمجرد أن ماكانش معهم ورق مسجل فيه الحيازات!
عاوزة تتكلمي عن الوطنية و الخيانة ما تتشطريش على الناس على الأطراف لأن دول عملوا اختيارات واضحة جدا، و ما كانش حد يقدر يلومهم لو كانوا عملو غيرها.

العنصرية مش أي حاجة غير خليط من التذكر و النسيان الانتقائي و التعميم الساذج و الخوف و الكراهية السماعيين و عن بعد عبر الصحف.
‏قال غير معرف…
كلامك يبقى صح يا قطة
لو فعلاً البيانات و التصريحات الحكومية دى صح
و ال 10 اللبنانيين دول موجودين فعلاً
و حزب الله بيخطط لعمليات لقلب النظام و تخريب و و و و و غيرة
لكن نا أعتقد أن دة كلة ونطة
و بيحاولوا يردوا اللم لنصر الله
و يرضوا حبايبهم الإسرائيليين و الأمريكان
الراجل كان صادق و قال أن سامى دة تبعهم فعلاً و أنة كان بيساعد المقاومة فى غزة
علشان إحنا معندناش دم و كنا محاصرينهم بدل ما نفك عليهم
و هو كان ممكن ينكر كل دة
و ينكر أنة يعرف لراجل دة أصلاً

و تاريخ حزب الله
بيقول
أنة مش بتاع الكلام دة
و أنة حزب بتاع مقاومة شعبية
و بيحارب إسرائيل و بس

و محدش ممكن يقنعنا بحاجة تانية غير كدة
و ياريت يبطلوا يدخلوا حكاية الشيعة و نشر التشيع دى بقى
لأنها نكتة بايخة قوى

و المخططات الإيرانية و الكلام الفارغ
إيران مش فاضية لنا
إيران بتخطط أنها تبقى قوة عظمى
و عندها نووى
علشان متخيبش خيبتنا القوية
و تبقى مكسورة الجناح
و ملطشة زينا
‏قال أسماء علي
العلاقة المتوترة بين المصريين و النظام خلت البعض يطلع بآراء غريبة
بس لازم نفهم المصريين
ان مصر دي بتاعتنا احنا
و لكِ الله يا مصر فعلا
‏قال Desert cat
magi
طبيعى يحصل حالة عدم انتماء للبلد ؟؟
ليه ماجى
هما اللى ضحوا بارواحهم وحياتهم لتحريرها من الاحتلال كان علشان تيجى الاجيال بعد كدا تبيعها وميبقاش عندها انتماء

ان شاء الله تكون نتيجة التحقيقات منصفة علشان الرعاع يعرفوا ان مصر مش لكل من هب ودب

تحياتى
‏قال Desert cat
مواطن مصري
مش شهاب وبس
شهاب واللى مشغله ومشغل مئات زيه
‏قال Desert cat
Ahmed
ياريت يا احمد الزبالة اللى فى البلد تنتهى من غير تدخل اجنبى البلد مش ناقصه

تحياتى
‏قال Desert cat
A.SAMIR
المسئول تخلف الناس وخنوعهم
وكل واحد يقولك وانا مالى انا همشى جنب الحيط علشان اكل العيال رغيف عيش لحد لما مبقاش لاقيه ومن كتر المشى جنب الحيط بقى زى الحشرة ماشى جوا الحيط وبرضه مش قادر ينطق وبدال ما يواجه ويطالب بحقه بقى بيتمنى الدمار للبلد اللى لاماه

تحياتى
‏قال Desert cat
حياة
كلامك صح حياة
متفقه جدا معاه

تحياتى
‏قال Desert cat
Medus
شرفتنى جدا
واشكرك
‏قال Desert cat
Blank-Socrate
ده انا ليا عظيم الشرف ياباشا
انت بتتكلم فى ايه
بس هو انت اسمك ايه فى الفيسبوك ؟
‏قال Desert cat
Anonymous
There is a difference between the intervention of the police and accused the victim, if you are you waiting for Gani Why them??
That they treat you hotels 5 Stars
Not only afraid of the police outside the law and criminals
‏قال Desert cat
حازم سويلم
ايه دخل اسرائيل فى اللى بيحصل دلوقتى
يعنى تركت نصر الله وايران
ومسكت فى اسرائيل هى اسئرايل فاضيه لنا برضه
ولا نظرية المؤامرة دى مش حننتهى منها خالص
انا مش مدينة لحد باعتذرات بالعكس ده اهل سيناء اللى المفروض يعتذروا لثمانين مليون مصرى عما اقترفوه فى حقهم بخلاف اعتذراهم لوزارة الداخلية بسبب قلة ادبهم اللى كل يوم والتانى يعملوها دى

تحياتى
‏قال Desert cat
الربان
طبعا كلام حضرتك صح جدا يا فندم
لكن الناس محتاجه فعلا تتوعى لتعرف مصلحتها وتعرف يعنى ايه نظام ويعنى ايه وطن

تحياتى
‏قال Desert cat
عرب ستان
ولن تنتهى مصر من المؤامرات طالما يوجد بها مغيبون لا يعلمون معنى لكلمة وطن ويرحبون بالمخربين

تحياتى لحضرتك
‏قال Desert cat
ألِف
الا هو انت بترد كدا من غير ما تعرف الاهداف اللى بيخطط لها نصر الله داخل مصر ؟؟
يعنى مش قريت هو هدفه ايه وعايز ايه من مصر والمصريين ؟؟
اساسا سؤالك لا يرقى ان يكون استنكارى لانه يعبر عن ضيق افق وعدم فهم
يعنى لما واحد يبعت عناصر داخل مصر .
لتاسيس مشروعات تجارية باسماء وهمية لحين الانتهاء من المهمة المكلفين بيها . يبقى ده اسمه ايه ؟؟
- رفع القرى والمدن الواقعة على الحدود المصرية الفلسطينية وإرسال النتائج إلى كوادر الحزب بلبنان .. يبقى سيادتك ده هدفه ايه ؟؟
- استئجار بعض العقارات المطلة على المجرى الملاحي لقناة السويس لرصد السفن التى تعبر القناة ... الا هى قناة السويس دلوقتى بقت النظام ؟؟
- رصد المنشآت والقرى السياحية بمحافظتي شمال وجنوب سيناء . ... هنا برضه يكمن النظام ؟؟
- توفير كميات من المفرقعات وإعداد العبوات المفرقعة .. علشان يفرقعوا النظام ؟؟
بالنسبة للناس اللى شايله اوطانها جواها اذن من فمك ادينك يعنى مش ينفع احكم غير على اللى بيبعوا وطنهم واللى بيقولوا على البلد اللى لامهم طز فيها وفى شعبها غير خونة وعملاء
السيناويين مش يمهم غير الفلوس وده مش حال ناس كتير بدليل ان فى ناس كتير ضحت بحياتها من اجل الوطن كان المفروض لو زى ما انت بتقول مش يهمهم غير الفلوس كانوا قالوا ولادنا اهم احنا نعاون الاحتلال ونبيع اسلحة بلا حرب بلا بلد بقى .. انما الناس الشريفه ضحت بحياتها فى سبيل تحرير شبر بس من ارض سيناء اللى السيناويين واخدينها دلوقتى مرتع لتجارتهم المشبوهه من المخدرات والاسلحه
مسعد ابو فجر اقرى له رواية اتاتش اللى كانت السبب فى رميه فى المعتقل دلوقتى وانت تعرف هو مشرف هناك ليه
هو مش مناضل ولا مجاهد ولا اتسجن علشان يحرر البلد ولا الوطن من الاحتلال الانجليزى ولا البريطانى عايز تنتقد انتقد بادب او استحمل اللى يجرى لك .. مش تقل ادبك وفى الاخر تاجر شوية عيال يجروا يعيطوا وراك فى المنتديات والمواقع الالكترونيه علشان يقولوا شوفوا سجين الكلمة يا حرام ياى على النظام البشيع القاسى خالص
‏قال Desert cat
Anonymous
واللى جاى يحارب اسرائيل ده جاى يرصد المواقع والمنشأت السياحية ويعمل مشروعات ومفرقعات فى مصر
للاسف مصر لازالت مليئه بالجهله والمتخلفين عقليا
ده المفروض بعد اعترافه يقدم لمحاكمة دولية
البلد مش مرتع لكل من هب ودب يبث فيها سمومه
‏قال Desert cat
أسماء علي
الناس المتخلفة بتقولك يا دكتورة ان نصر الله كان باعت عناصر تصنع مفرقعات فى مصر كان هدفه يساعد اهل غزة اللى مصر مش معبراهم ويحارب اسرائيل واخدة بالك الا هما اسرائيل غيرت محل اقامتها وعملتها جوا مصر
ولا الجبان بيبرر افعاله الغبية بالكلام العبيط اللى مش يصدقه حتى ساذج
ولكن للاسف فى سذج فى مصر بيصدقوه

تحياتى
‏قال ألِف
يا قطة،

أنا ماأعرفش "سؤال يرقى" دي معناها إيه الحقيقة!

لكن ال أعرفه كويس أن السيناويين إن كان فيهم تجار مخدرات فالقاهريين و المنايفة و الأسايطة و كل الأقاليم المصرية الأخرى فيها برضو..تعميمات "مش هاممهم غير الفلوس" و الاتهامات الجزافية ال من النوع دا ساذجة قوي في رأيي.

تهريب السلاح عبر الحدود مش أخطر أنواع الفساد الحاصل في البلد، و هو جزء من طبيعة الناس الساكنين على الحدود في كل مكان، متفقين أنه مخالف للقانون، لكن مدى فداحته كجرم أو اعتباره مبرر للخيانة و عدم الوطنية موضوع فيه كلام. الصعيد غالبا فيه سلاح أكثر من سيناء، بحكم عدد السكان على الأقل، و تهريب المخدرات و السلاح شغال من الجنوب قبل سيناء.

و ال أعرفه كمان أن السيناويين ما كانش لهم علاقة بهزائم مصر في أي حروب.

ما ينفعش نقول أن "السيناويين أخدوا سينا يبرطعوا فيها بالتهريب" دي أرضهم أصلا..إلا إن كان ممكن نقول إن "الجالية المصرية في القاهرة واخدة راحتها قوي و تتمشى على الكورنيش من غير رابط و لا حاكم"!

لكن ال أحب أعرفه، هو أنت دالوقت من دعاة "الانتقاد لكن بأدب" و من مؤيدين اعتقال الكُتّاب ال يقولوا رأيهم في كتب؟

"أبوفجر يأجر عيال" دي برضه من الكلام المرسل لأنك عارفة زيي أن حملات مناصرة المعتقلين و سجناء الرأي - لغاية دالوقت - ما فيهاش تأجير، و هو يعني مش شخص عالمي و لا غني و لا مهم للدرجة دي علشان يأجر و يدفع و غالبا ماعندوهش فلوس يدفعها أصلا.

و مستعرب أن اختلافك معه - ال أنا مش عارف مبرره - يخليك تصدقي ببساطة الاتهامات الساذجة الجزافية بتاعة الحكومة عن "المدونين المأجورين و العملاء"! ما تنسيش أن الاتهامات دي ممكن تنطبق عليك برضه في مقالة ثانية تكتبيها تنتقدي فيها الحكومة أو الإسلاميين أو مسؤول فاسد أو أي حد ما يعجبهوش كلامك.

موضوع أهداف حسن نصرالله دي مسألة ممكن نتناقش فيها طبعا و ممكن يطلع وغد و كان ناوي على شر لمصر، دا شيء ما يهمنيش قوي؛ لكن كل دا مالهش علاقة بتعميماتك عن السيناويين

و بالنسبة لتصديق دعاية الحكومة عن الأفعال الأسطورية ال كانت *الخلايا* ناويين يعملوها..عندك مصدر لادعاء زي مراقبة قناة السويس دا مثلا؟ مصدر نقال عن اعترافات المتهمين أو محاميهم؟ أصل أنا أخدت قناة السويس بالطول من أولها لآخرها و مش فاكر أن فيه جزء من حرم القناة الجيش غافل عنه أو من السهل أن الناس يشتغلوا فيه شغل مخابرات و الحكومة مش دارية؟ دول بيضربوا الصيادين المصريين بالنار لما يهوبوا ناحيتها! و في نفس الوقت تلفيقات الحكومة عن تنظيمات "الطائفة المنصورة" و "تنظيم المايوهات" و غيرهم يخليني أفكر كثير قبل ما اصدق أي مخططات جهنمية يكتشفها جهابذة الأمن.

إظهار الوطنية بتخوين الآخرين سهل يا قطة، لكنه مش لطيف، و بالذات كوسيلة لإظهار الانتماء عندما يكون ال بيرتكب الفعل دا هو نفسه من السهل على آخرين أنهم يستخرجوا من كلامه أشياء يدّعوا أنها إثباتات لخيانته أو كفره أو عدم انتماؤه، و الحاجات ال أنت عارفاها دي.
‏قال Reem
لك الله يا مصر فعلا
http://omoma-tugheya.blogspot.com/
‏قال غير معرف…
Yоuг own post has сonfiгmed necesѕагy to myself.
It’ѕ extremely helpful аnd you really аre certainlу quite knoωleԁgeаble in thiѕ геgion.
You havе pοpρed my face to be able tο numerοuѕ vіеwѕ on thіs
kind of matteг аlong wіth interesting
and ѕound cоntent.

Fеel free to ѵіsit my blog ... http://wiki.malerfreunde.com/index.php?title=Benutzer:Reed01X
My blog :: viagra

المشاركات الشائعة