نهار جديد

تتوالى الايام تباعاً فى عزف منفرد اصبحت أمله .. الروتين اليومى يتكرر .. لا جديد فنجان قهوة مع بدايات الصباح ثم اختراق طريق قرب او بعد هى فى النهاية خطوات ولازم أمشيها .. هو انا لحقت امل ده لسه يادوب شهرين فى الطريق ده بس .. امال لو سنتين هعمل ايه ؟؟ هو انتى مش كنتى ناوية تنطشى رجعتى تانى ليه .. عجبتنى اللعبه هشتغل لاء مش هشتغل فى الآخر قولت مبدهاش
مهما كبرت المشاكل فالثقة بالنفس تحل جميع المشاكل
مشاكل ايه دى اللى بفكر فيها على الصبح ده ايه جو الكآية ده ؟
ايه نفس الوجوه المكررة دى الواحد نفسه يشوف اشكال مختلفة بقى التجديد مطلوب .. بس هيتجددوا ازاى دول وبعدين انا الجديدة هنا مش ينفع اقولهم والنبى غيروا اماكنكو الواحد لازم برضه يخليه شيك فى المعاملة مع الناس
الابتسامة لحن رقيق ترسله اوراق الحياة
حددتى عايزة ايه .. فى ايه حضرتك ؟؟ نعم ؟ انا مش قولت لك احنا خارجين اوعى تكونى لسه مش جهزتى كمان ؟ هو انت فين ؟ انا فى الطريق ؟ إشطة ده احنا فعلا خارجين .. انا ايه نسانى كدا .. فجأة يدق الباب اكيد مش هو اجرى افتح.. نعممممممممممم انتى لسه بالبيجامة .. بابتسامة واسعه جدا وعملاً بقول السيدة الرائعة الله يرحمها سعاد حسنى اقرب طريقة لقلب جوزك معدته .. بس فى الحالة دى ممكن يرمى الاكل من البلوكونة يبقى هو مش ينفع غير انك تاخديه من ايده مع الاحتفاظ بالابتسامة الواسعه علشان السنان البيضا تبان وقدام التى فى مع قهوته المفضلة والريموت والجرنان والواحد ياخد راحة راحته فى اللبس ده حتى تقريبا الوقت مش بيعدى ..
اذا اردت قتل المرأة إما ان تقتلها وإما أن تتزوج عليها
حبيبى .. إنت ممكن تتجوز واحدة تانية .. ليه بس بتقولى كدا امال اللى قاعدة هناك دى بتبص لك كدا ليه انت عارفها .. ولا عمرى شوفتها امال بتبص لك ليه ؟؟ انتى عايزه ايه ؟ يلا نمشى .. زى ما تحبى .. نعم علشان مش تيجى تكلمك قدامى صح .. هى الليلة نكد ولا ايه ؟؟ طب اعترف الاول .. ايوا اعترف بايه يعنى .. مفيش يلا نمشى .. لاء مش ماشى .. ليه بقى هو لا كدا عاجب ولا كدا عاجب اعملك ايه بس .. اممممممممم انا عايزة ايس كريم
الصداقة قطار سريع لا يركبه إلا من كان له قلب صاف ونية صادقه
انا ملولة اوى وبزهق من الناس بسرعه مش ينفع يكون عندى اصدقاء -- تجيب لقاء .. يا حلولى امال انا ايه ؟؟ ونانيس وجينول دول يبقوا مين ؟؟ ايه ده هو احنا كدا اصدقاء ؟؟ انتى شايفه ايه .. يابنتى الاصدقاء بيقولوا اسرارهم لبعض انا مش بعرف اقول اسرار .. ليه يا نونا .. لانك لازم تعرفى ان الاسرار ملعومات الشخص يبوح بها للآخرين ليقوموا باستغلالها ضده فى الوقت المناسب .. اشطة يا ست الفيلسوفة .. ومين اللى قالك كدا .. مدرسة الرسم فى ابتدائى يا كوكو .. ولما روحت البيت قولت لاختى ميس اميرة قالت لى النهاردة جملة عجبتنى اوى واختى قالت لى كلامها صح جدا بس ابقى قولى لى انا بس ومن وقتها واختى وميس اميرة هما اصدقائى الوحيدين بس مش عارفه ميس اميرة فين دلوقتى ..لقاء بازبهلال كويس انك قولتى لى علشان اعمل زيك .. مش ينفع يا كوكو اصل التعليم فى الكبر كالنقش على الماء .. نياهاهاهاها

تعليقات

‏قال V.Hayat
نهار جديد واول ابريل وما فهمت حاجة خالص

تحياتى
‏قال ^ H@fSS@^
حبيبتي
تغيير طريقك المعتاد ميعتبرش تغيير اوي
بالذات لو واحدة شخصيتها حرة و منطلقة زيك
ده كان ينفع معانا و احنا اصغر شوية

عارفة احساسك عامل ازاي
لاني اعتقد بمر بنفس الظروف او الحالة
احنا بنحلم بتغيير كبير ف يحياتنا
حاجة اكبر من اغلب الحاجات اللي حصلت دلوقتي
تغيير جذري
احيانا بنحب نستريح
سميها استراحة المحارب زي ما بيقولوا
عشان لسه قلبنا شغوف بحاجة كبيرة اوي انا متاكدة انها حتحصل و لو بعد حين

تمنياتي ليكي بالخروج من حالة الملل دي بسرعة
و لو راحة او نوع من الانتخة
فبراحتك
روق يا جميل
‏قال قارىء مستنير…
غارقون فى بحار الحلال والحرام
منذ ثلاثين عاما ونحن أمة المسلمين غارقين في بحر من الأسئلة غرق السفن في بحر الظلمات ذلك البحر العاتي الشرس الذي ذكر مرارا في حكايات ألف ليلة وليلة.

وبحر الأسئلة أو الظلمات التي يعيشها المسلمون في ربوع الأرض تلك التي لا تبحث إلا عن إجابة حول «الحلال والحرام»، وكأن الرسالة الإسلامية نزلت منذ ثلاثة أيام وقد عجز معتنقوها عن فهم أو معرفة الفرق بين الحلال والحرام، أو كأن عقولهم قد غابت عن الإدراك.

ودارت الأسئلة حول حرمانية دخول الحمام بالقدم اليمني، وتلك التي تعطي مقاسا حلالا للجلباب، وغيرها من نوع تحريم كلمة «الو» واعتبار مصافحة المرأة حراما بالثلاثة.

ووصلت الأسئلة ومن بعدها الإجابات إلي التكفير والقتل إلي بقية المطاردات المعروفة لكل مخالفي أشباح بحر الظلمات.

ولأنهم أي «بتوع» الحلال والحرام يجددون أنفسهم فأصبحت لدينا وجوه جديدة وحديثة احتلت مساحة واسعة للتأثير لن نقول في الفضائيات المملوكة لرأسمال خاص يعمل بمنطق «مالي وأنا حرفيه» ولكن مساحات في صحف الحكومة وتليفزيونها وجامعاتها لأن هذا يؤكد مصلحة النظام الحاكم وحكوماته وحزبه وسياساته مع إغراقنا خاصة الشباب في بحر ظلمات هذه الأسئلة.

فلا النظام ولا رواد بحر الظلمات طرحوا مرة أو حاولوا الإجابة عن أسئلة من نوع: «لماذا تتقدم إسرائيل ونتخلف نحن؟» مع بقية الأسئلة التي تتعلق بحجم الإنفاق علي التعليم فيها مقارنة بالتعليم عندنا، وعن محاسبة رجال السلطة هناك وتقديمهم للمحكمة، وعن وعن وعن.

هذه الأسئلة تهدد وجود هذا النظام خاصة إذا بدأ البحث الجاد عن إجابات، وبعد الإجابات المواجهة والمطالبة بالمحاسبة وفتح دفاتر الوطن، بعيدا عن جلد الذات ورفضا للفرق في غيبوبة أسئلة بحر الظلمات، فهذا النظام سعيد ومطمئن ومستقر.

مادمنا نواجه عدونا بالدعاء عليه من فوق المنابر، وطالما وضعنا عقولنا في يد مفتيي الفضائيات أو بئر السلم، ومادمنا اعتقدنا واستقر في يقيننا أن تردي أوضاعنا هو إما عقاب من الله أو امتحان منه عز وجل.

ومادمنا تنفتح وتنشغل الصحف والشاشات وندوات الجامعات لأسئلة حديثة من نوع: «هل الكونسلر حرام أم حلال؟» و«الكونسلر» هو نوع من أدوات التجميل توضع أسفل العيون المجهدة لتداري عيوب الإجهاد وعلامات السن عند النساء.

وبالمناسبة لماذا تسأل مثل هذا السؤال فتاة في العشرينيات من عمرها وهو عمر الزهور والنضارة الطبيعية؟
من مقال للكاتبه الصحفيه بهيجه حسين
هل لدى احد اجابه على اسئلتها الحارقه؟
‏قال مواطن مصري
مواطنون يحرقون منازل ٤ بهائيين فى سوهاج بعد ظهور أحدهم فى التليفزيون

http://www.almasry-alyoum.com/article2.aspx?ArticleID=205317#
‏قال مواطن مصري
قطة الصحراء الصحفي دة لازم يتشال من نقابة الصحفين
http://www.youtube.com/watch?v=3usdvcu1fVQ



هو بيستفيد ب اية لما يشعل حرب اهلية
‏قال ريماس…
ايه يا حنون
يعنى اخد حذرى
مهما قولتى يا بنتى او عملتى انا بموت فيكى
حقك الاحتفاظ باسرارك وحياتك الشخصية
يعنى كلامك صح وانا حكون زى لقاء واقلدك
وحشتينى
‏قال Desert cat
حياة
آآآآآآه موضوع كدبة ابريل ده مش عارفة ليه بكرهه
‏قال Desert cat
^ H@fSS@^
تسلمى لى يا حفوصة
انا المشكلة انى ملولة ومش بعرف اتعود على حاجه وقت كتير
وربنا يستر بقى
ربنا يخليكى يا قمر
‏قال Desert cat
قارىء مستنير
والله انا الناس اللى بتقعد تسال فى الحرام والحلال دى مش بلتفت لها لانها فى الغالب من شدة حالة التخبط اللى بتعيشها
مش بتعمل اى حاجه حلال
تحياتى
‏قال Desert cat
مواطن مصري
انا بما انى مشغولة اليومين دول فمش متابعة اوى
بجد الموضوع لما قريته احزنى
هحاول اجمع اجزائى بعد الصدمة دى واكتب فيه
‏قال Desert cat
مواطن مصري
تعالى نعمله حملة
مش عارفه لسه فى ناس بالجهل ده بالرغم من التقدم اللى فى العالم كله
وبالرغم من انه بيشتغل مهنة لها قدسيتها
‏قال Desert cat
ريماس
لاء مش قصدى تاخدى حذرك الا انتى ده انتى روحى من جوا
هههههههه
وحشتينى اكتر يا هانم حاولى تاخدى اجازة فى التاريخ اللى كلمتك فيه الله يخليكى لازم تكونى موجودة
‏قال سمراء
فية جملة من أغنية لسيد مكاوي
بتقول حلوها وافرحوا بيها

سمراء
‏قال Desert cat
سمراء
صح الفرح دائما لا يالتى الا تباعا للحلول الصحيحة

شرفتينى
‏قال محمد حويحي
أقولك الاول كل سنه وانت طيبه
وعيد ميلاد سعيد عقبال 100 سنه

اصلي يومها مش هبقي موجود فقلت اسبق وبعدين اقرا :)
‏قال Desert cat
عقل مهوى
وانت طيب
وميرسى ليك جدا
‏قال غير معرف…
اذا اردت قتل المرأة إما ان تقتلها وإما أن تتزوج عليih

قطقوطه

ده ارهاب

معقوله بس ؟؟

صافي الود

المشاركات الشائعة