حد يسكت الست دى

الست الداعية سعاد صالح تربعت على عرش الفضائيات وقعدت تفت هى كمان فى اكبر طبق فتة صنعه المسمين بشيوخ العصر فتوى الست الداعية العلامة ان المفروض الناس تتصدق باموالها لترقيع غشاء البكارة للفتيات اللى فقدوه بس بشرط انهم يكونوا تائبات او مغتصبات هل الحاجه مدركة لمدى الخطر اللى بتعمله بترجيعها الكلام المقرف ده فى طبق الفتى اللى كل واحد فاضى مش لاقى حاجه يعملها يجى يرجع لنا فيه وكان اللى بيسمعوا دول مش بنى ادمين قطيع يساق اينما يوجهوه يعنى فتاة تم اغتصابها تعمل عملية ترقيع لغشاء البكارة ليه ؟؟ وهى ذنبها ايه فى اللى جرى لها ؟؟ ده اسمه اغتصاب يعنى حاجه حصلت غصب عنها .. والله اللى متقدم لها ده عاجبه اهلا وسهلا مش عابجه يبقى السكة اللى تودى لكن علشان ايه تدارى على شيئ لم يكن ليا يد فيه .. وفتاة الليل بقى تروح تتوب والناس يتصدقوا لها بفلوس لعملية الترقيع اى هذيان ده يا ست الضاكتورة ؟؟ اذا كان الله تواب يغفر الذنوب جميعا ولو كانت مثل زبد البحر .. يبقى بشر مش هيغفر لها يبقى برضه السكة اللى تودى .. إنما علشان ايه الكذب والتدليس .. المفروض الانسان لما بيتجوز بيبدأ حياة جديدة مع شريك حياته بعيد عن اى كدب او اضمار لاى سوء نيه .. والست الداعية الضاكتورة تقول نتصدق للبنات لترقيع غشاء البكارة المغتصبة والتائبة .. طيب وسبع الرجال بقى اللى جاى مش قابل توبتها ورافض يغفر لها من غير غشاء بكارة ايه اللى يضمنلك ياست الضاكتورة انه مش بتاع نسوان ولا ليه نزوات .. ده كمان هتطلبى الناس تتصدق له علشان ايه ؟؟ ولا هو مالوش غشاء بكارة اختزل شرف الأنثى بين رجليها ؟؟ طيب وياترى الراجل شرفه فين بقى ؟؟ واحد بيسرق ويرتشى وينصب وكداب ومنافق . تفتكرى ده شريف ؟؟ارحمونا بقى من فتاويكو اللى خلت العرب مهزلة العالم كله .. قال يتبرعوا لترقيع غشاء البكارة قال .. يا ختى اطلبى منهم يتبرعوا لاطفال الشوارع اللى نايمين يونسوا الفيران وكلاب السكك تحت الكبارى .

Comments

الست دي مش بتجيب كلام من عندها
هي بتطبق الحديث القائل:
وإذا بليتم, فإستتروا

وفي نظرهم مش بلوة اكبر من إن البنت متكونش عذراء ! عشان كدة مش غريبة أنهم يفتوا بجواز ترقيع غشاء البكارة لبنات الليل (علي شرط إحضار شهادة بالتوبة مختومة من عند مشيخة الأزهر وكتابة تعهد بعدم ممارسة البغاء مرة اخري) !!
Banoota said…
مش احتمال قصدها حاجة تانية غير اللي اتي كتبتيه؟
يعني ممكن يكون تفسيرك لكلامها مش مظبوط
للأسف في المجتمعات المتخلفة بتاعتنا الشرف متعلق بعذرية الفتاة
يعني عدم وجود غشاء البكارة ممكن يؤدي الى كوارث
و الست سعاد يمكن قصدها ساعدوا البنات دول و لا عليهم العوض في حياتهم
ده طبعن مش حل بس على الأقل ممكن ينقذ حياة انسانة
tamer.sala7 said…
طيب ونفترض الناس اتبرعت والعملية نجحت وكل *الثيبات بقت مترقعات* تفتكري حتقول للمغفل اللي رايح يتجوز امتي يعني هي بتعمل العملية دي علشان تضحك علي اي حمار يتجوزها وخلاص ولا علشان تعترفله وبرضه تبقي عملت العملية بصراحة مستغرب جدا الموقف ده


مفيش لينك للبقين دول ؟؟
rania said…
العرب الى حد الان يربطون البكاره بمسألة العفة و الشرف !!!!!؟
لماذا ننظر الى الفتاة فقط لهذه القطعه الصغير أليس هناك فتايات افقدو عذريتهم من اجراء عمليه او سقوط وتزوجُ بدون اي كذب او غش ......؟
يعني هذه الدكتوره عنده احد في البيت واقع في مشكله واصدرت جلالتها هذه الفتوه الطاهر

...ياامت التخلف


تحياتي لك قطتنا الجميله
هههههههههههههه يبقى انتي اكيد اكيد في مصرر لازمن قانون يراقب المواد التي تقدم في البرامج و الفتاوى لازمن بتصريح من الازهر بعد مراجعتها من كبار العلماء في الازهر
sigon1977 said…
غشاء البكاره للفتاه يدل على العفه..اوكى
عايزين بقى حاجه تدل على عفة الرجل كمان..تقدروا؟؟
يا جماعه بلاش هوس البكاره إتقوا الله كده غش حاولوا تفهموا البنات ممكن يمارسوا اى فعل دون ضرر لبكارتهم إحنا كنا فى كليات و كله على البحرى
البنت إن لم تكت تربت فى بيت سليم فلن تصل لشئ سليم إلا فى حالات نادره و هذا يشمل التطرف فالتى ترى التكفير يرضعها و أتهام المجتمع بالفسق يهشتكها و شبه ماما المنقبه تفسها لن ينتج عننها الا شر و الفتاه التى لا حدود لتربيتها غالباً ستظل عذراء لذكائها و علمها بمأساة المصريين الذين يعتبرون البكاره دليل العفه و هى خاضت حروب عاطفيه ضروس دون ضرر الغشاء القدس
ربما كلامى صعب لكن واقعى و أرجو ألا يتصور أحد انى ادعوا للعلاقات غير الشرعيه لا سمح الله فقط أطلب ألا نكون مهووسين و ان نعتبر المغتصبه ضحيه لا جانيه
kafrawy said…
هههههههههههههه
و الله عندك حق كل من هب ودب عمال يفتى ف الفته اصلهم مفتيين قبل ما يطلعوا
ع الهوا يفتوا ثم ان الدوكتورة سعاد صالح عجبها التلفزيون اووووووى

مش برضه الست الضكتورة اللى قعدت
ف وسط مسجد سعد الصغير ف وسط الرجال
ف اول سابقه ف تاريخ الدوله الاسلاميه
و لما سالوها عملتى ليه كدة قالت
ان الناس كانت بتتقلى العلم على يد السيدة عائشه -رضى الله عنها -
ف المسجد برضه و يظهر انها نسيت تقول
انه من وراء جحاب مش بقعدة النساء وسط الرجال ف المسجد

لاحول ولا قوة الا بالله
أبنوسة said…
اول كونت ؟؟
واوووووو

قطقوطه
انتي بتجيبي الكلام من وين

الشيخه نوسه دي فتواها دي مافيها اي شئ يخليها فتوي شرعيه او مقبوله اجتماعيا الا لدي بنات الليل وما اكثرهم

يا زوله بدون هذه الفتوي اي بنت هذا الزمن تقضي زمنها وتمارس الجنس المحرم وبرضوا تجي تتزوج احسن راجل من نظرها هي طبعا

دي من وجهة نظري كلام فارغ .. لانو مافي احسن من الصراحه مع النفس ومع شريك العمر

صافي الود يا ام لسان طويل
bluestone said…
يعني هي بتقول
تصدقوا بفلوسكوا لصناعة أكاذيب ؟؟؟

لان الله يغفر لكن الناس لا تغفر ولا يجب أن تعرف
Desert cat said…
Servant of Christ
تصدق فعلا نفس الاية دى استند ليها باحث تانى فى مشيخة الازهر واباح هو كمان ترقيع غشاء البكارة
مش عارفه الحقيقة انا الناس دى بتفهم ازاى
اصل كل بلاوى المجتمع انحصرت فى غشاء البكارة والبنت والمرأة وازاى يكفنوها اما الراجل فده نصف اله من حقه يعمل كل اللى هو عايزة براحته
Desert cat said…
Banoota
تصدقى ممكن
علشان كدا جبت لك الفتوى زى ما هى علشان تتفرجى على المهازل اللى فيها
اتفضلى
http://www.alarabiya.net/articles/2009/03/12/68279.html
Desert cat said…
tamer.sala7
الغريب يا تامر انها بتقول فى الفتوى ان فى بنت اتصلت بيها وكانت عاملة العلمية دى وزوجها اكتشف الموضوع فلما سالها اعترفت له وطلقها بعد 20يوم والبنت بقى طلبت منها تكلمه يرجع ليها ردت الست الضاكتورة قالت لها لاء مش هيرجع اصله خلاص كدا فقد الثقه هيهيهييييييييي
اشقط اللنك يا ريس
http://www.alarabiya.net/articles/2009/03/12/68279.html
Desert cat said…
rania
اولا انتى شرفتينى جدا
ثانيا بالنسبة للمجتمع فالراجل اتعود ان شرف البنت هو ما بين رجليها وان ضاع تحت اى مبرر يبقى هى كدا فاسقه ومش متربية مع ان البنت لو لعبت رياضة عميفة ممكن انها تفقده لكن هتقولى ايه فى التخلف اللى احاط بالعقول الشرقية

تحياتى ليكى يا جميل
Desert cat said…
مواطن مصري
شكل الازهريين هيسوا
اصل عبدالله النجار عضو مجمع البحوث الاسلامية عمل بحث كامل متكامل علشان يبيح ترقيع غشاء البكارة هو كمان
Desert cat said…
sigon1977
كلامك مظبوط يا فندم
مدعيات العفة ما اكثرهم وهم فاتحينها لكل من هب ودب حتى اللى مطروح من بيته هههههههههههه
تحياتى
Desert cat said…
kafrawy
بصرف النظر عن تصرفها فى مسجد سعد الصغير بس معلش امهات المؤمنين مش كانوا بيكلموا حد من خلف حجاب يا فندم بل كانوا يقدمون الطعام للصخابة والسيدة عائشة كانت احيانا تلقى عليهم الحديث لكن كان لا احد ينظر لهم وبقلبه مرض لذلك تسموا بامهات المؤمنين يعنى كل اللى يكلم واحدة من زوجات الرسول يكلمها باعتبار انها امه
سعاد صالح مش جنت لما دخلت المسجد والقت خطبة بالمناسبة ذاك الوقت
لكن خطأها يتركز الآن فى انها تبيح شيئ يسوق للكذب والتشجيع على الفاحشه

تحياتى
Desert cat said…
أبنوسة
هعتبرك اول كومنت وهجيب لك شكولاته جلاكسى
:))
الست الضاكتورة قاعدة ترجع علينا فى الفضائيات وتفت زى ما هى عايزة لكن اعتقد لو الموضوع يمسها من قريب او من بعيد اعتقد ان ردها على هذا الموضوع هيكون الصمت التام

تحياتى يا احلى ابنوسة
Desert cat said…
bluestone
الجميل انها علشان تبرر كلامها تقولك انا حددت نتصدق للتائبات والمغتصبات
على اساس ان التائبة هتقدم لها شهادة موقع عليها 4 موظفين ومختومة بختم النسر
مش مهم نكدب على الناس ونغشهم
الاهم اننا نكدب على نفسنا

تحياتى
dodoo said…
ياسيتى هى بقت هيييييييييصه

كل من هب ودب جاى يفتى فتوه

ارررررحمنا ياااااااارب
Desert cat said…
dodoo
عندك حق يا دودو
ربنا يرحمنا
شرفتينى
انا قريت الخبر امبارح وبجد حاجه تقرف
اصلا برنامج عم يتسائلون ده برنامج حقير هو والمذيع الى مبيفهمش حاجه عاوز بس يعمل فرقعه كل اسبوع عشان الجرايد تكت عنه ويشتهر ربنا ينتقم منه
اما سعاد صالح دى انا جبت اخرى منها ناقص تنزلنا ن الحنفيه يابنت على كل البرامج وبتتصل بيهم بالتلفون هيا موراهاش حاجه تعملها؟ ولا عينوها مفتيه خلاص؟
ربنا يهديها او ينتقم منها بجد زهقت منها جدا بقيت لما بشوفها بتعصب
اما موضوع الستر بقا الى بتكلم عنه ربنا حط حد للزنا يعنى حاجه كبيره اوى عند ربنا ازاى تيجى بمنتهى البساطه تقول ستر
ثانيا لما الماذون يقول اشهد الله والحاضرين فلان على البكر الرشيد فلانه ده يبقا زواج صحيح؟؟ وهل جوز صحة الزواج
بجد اى كلام فى اى كلام
ربنا يرحمنا بقا
مع خالص الإحترام للجميع
ولكن كلنا يعرف إن موضوع غشاء البكارة ده فطش في فطش
واللي عاوزه تعمل حاجه بتعملها لما تشبع من أماكن بديله
وحتي لو حصل اللي حصل بتاخد غرزتين عند حلاق صحه وتلبس الجردل العمه
والجردل من دول يدور علي بنات الناس وفاكر نفسه غضنفر
ويوم ما يتجوز يقول لك واخدها عالزيرو
وهي أقلها استعمال طبيب
مش حانبطل نضحك علي نفسنا بقي؟

فاكرين النكته؟
تبرعوا لبناء جامع نفق شبرا
بنينا النفق وبنينا الجامع وفاضل شبرا

بس بقت تبرعوا لترقيع بكارة البنات
رقعنا المغتصبات والتائبات والشراميط
وفاضل نرقع عقول رجالتنا الجرادل
Desert cat said…
الشموع البيضاء
هى بالفعل زى ما قولتى شكلها فاضية مش لاقية حاجه تعملها .. علشان كدا ممكن تلاقيها بتتنطط على الفضائيات
اما موضوع الستر فده مالوش علاقة بغشاء البكارة موضوع الستر هو انى اشوف انسان فى وضع خطأ واستر عليه مش اطلع اعمله فضيحة واجرسه بين الخلق .. انما ترقيع غشاء البكارة للتائبة او المغتصبة ده معناه يعنى يا حبيبتى دورى على حل شعرك وخدى راحتك خالص واحنا هنتصدق لك بفلوسنا وروحى اعملى عملية ترقيع وادى الحمار اللى هيتقدم لك فيما بعد ختم النسر على قفاه

تحياتى
Desert cat said…
Hassan El Helali
هى الست كانت قاصدة تخلى الشعب كله يرفع قرون وبمزاجه وبتلزقها فى اسم الصدقة علشان مش يحسوا انهم رافعين قرون ههههههههههه

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز