وداعاً .. ومرحباًً

هو البوست متأخر شوية لأن المناسبة خلاص فينش بح مفيش خلاص لكن على ما فوقت من الغيبوبة اللى كنت فيها
كل واحد ودع 2008 بطريقة أو بأخرى كل واحد عاشها برضه بطريقة أو بأخرى
فى اللى سابت فى نفسه اثر كويس وفى اللى اول ما خلصت قالها فى ستين داهيه واخد اثاث البيت كله ورماه من البلكونة روحه بلا رجعه
لما هلت علينا 2008السنة اللى فاتت انا كتبت عنها وكنت بسألها ياترى هتبقى حاجه كويسه هندونك فى مذاكراتنا واوراقنا وهيذكرك فى كل وقت تاريخنا ؟؟ ومن اول واحد يناير لاخر يوم فى ديسمبر وانا بيتردد السؤال ده على مسامعى
2008سابت علامة جميلة اوى فى حياة كل واحدة بتحترم نفسها وبتحترم كيوننتها وعارفه يعنى ايه كلمة كرامة وكلمة شرف وسيبقى الى ابد الدهر اول حكم تاريخى حصلت عليه المخرجه نهى رشدى فى جريمة تحرش
2008سابت ذكرى مؤلمة جدا فى حياة ذوى منكوبى عبارة السلام98 يوم الحكم العصيب ببراءة ممدوح اسماعيل وعمرو ممدوح
2008هيدونها التاريخ بالفعل فى حريق الشورى وحريق مسرح جورج ابيض
2008مش زعلانة منك لكنى زعلانة على الاحداث المغايرة التى تزامنت خلال ايامك
لما نهى صديقتى سالتنى انتى نفسك فى ايه فى 2009كانت اجابتى ان كل واحد يحترم نفسه .. ضحكت قوى وقالت لى انتى لو طلبتى العفريت بتاع مصباح علاء الدين كان بقى اسهلك
لكن مش كتير على ربنا فعلا انه يحقق امنياتنا .. كل واحد يحترم نفسه
وكل واحد مش يتدخل فى خصوصيات غيره
كل واحد ربنا خلقه بعضو ذكرى مش معنى كدا انه مميز وبنات الناس من حقه يقل ادبه عليهم سواء باللفظ او بمد الايد
كل واحد واخد الدين ستار للوصول لأهداف ومطامع شخصية
كمان قطعة القماش المسماة مجازاً بالنقاب وهى فى الاصل لثام تختفى من مصر نهائياً
اتمنى فى 2009الشعب يبقى عنده وعي بحقوقه وعارف ايه واجباته
المرأة المصرية الى بتشوف متحرش وتقعد تمصمص فى شفايفها وتقول ما تشوف نفسها لابسه ايه تثقف نفسها وتتعلم مش عيب يعنى وتعرف انها انسان
كمان ياريت حفلات التحرش الجماعى اللى بتتعمل فى الاعياد .. واللى لحد دلوقتى مش قادرة استوعب ان واحد كان صايم امبارح ومصلى العيد الصبح وبعد ساعه واخد صحابه ورايحين يتحرشوا
ياريت 2009مش يكون فى دويقة جديدة
بالنسبة لى شخصيا مش عايزة استنى منك حاجه حلوة لانى كالعادة سايبة الايام كما هى زى فى 2008 مقدرش ازعل على حاجه شخصية لأن اى موقف مش كويس حصل فيها انا مش بفكر فيه بعتبره شيئ عابر لا يستحق انه يذكر اما كل حاجه حلوة فانا اتمنى انها تدوم وللأبد وليس لمدة عام
اجمل حاجه حصلت 2008 على المستوى الشخصى كانت اخر 20ساعه فيها كانوا اغرب واجمل 20ساعه مرو فى حياتى كلها .. يمكن علشان اول مرة فى حياتى كنت اقابل ريماس اللى مش استنت لحد ما اوصل عندها وقابلتنى فى الطريق ويمكن علشان قابلت يوستينا اللى جت مخصوص علشان تقضى اجازة الكريسماس فى شرم الشيخ فانتى نورتى الفورسيزون وشرم ومصر كلها انا بالفعل مش عارفه اشكركو ازاى على اليوم الجميل ده وفى نفس الوقت بعتذر لكو انى عملت سندريلا واول النهار ما جه جريت انتوا فاهمين بقى ظروف الناس اللى كانت معايا وطبيعة شغلهم عاملة ازاى مكانش ينفع اخطف الامير اكتر من كدا :) المرة اللى جاية يكون معانا وقت كبير وفى اقرب زيارة مرة تانية ليوستينا اللى هتسيبنا وتطير تانى بعد ساعات على من حيث أتت اما بقى ريماس اللى خايفة تعمل بلوج علشان مش حد يقل ادبه عليها وبتكتفى بالردود اولا عندك حق علشان انتى بالفعل عبارة عن شكولاته بالكريمة فمتخيلة ايه اللى ممكن يحصلك لو حد قل ادبه عليكى لكن ده ميمنعش انك تعبرى عن رايك براحتك .. اما بقى يوستينا اللى كل مشكلتها فى بلوجى انها بالعربى وهى العربى عندها فى الضياع فمعلشى هاتى لك مترجم معلشى باخد حقى علشان اقنعتينى ان سلطة البحر باللمون وااااااو

البحر الساعه 7 صباحاً



مينا مول اللى شهد احلى تذكارات ومش عارفه الحقيقة افرق بين القطط والنمور اللى انتوا جبتوهالى بس عموما ميرسى ومعلشى بقى يا يوستينا انا عايزة الكوفية بتاع التيشرت حلبسه ازاى من غيرها

Comments

ريماس said…
ميث يا ميث تسمحى لى اكون اول رد عندك
بتشكر لك كتير على الكلام الحلو اللى كتبته علينا ويارب نكون عند حسن ظنك ونستاهله وانا اللى اتشكر لك انك شرفتينا ونورتينا ووافقتى انك تيجى شرم كلها كانت منورة بوجودك انتى والامير طبعا متتخيليش حسينا بفراغ صعب بعد لما مشيتوا وكان نفسنا تكملوا معنا شوية واكيد لينا لقاء آخر يوستينا كمان هتسافر بعد ساعتين وانا ارجع دهب كما كنت بس انا كلى ثقة فى الله زى ما جمعنا فى الاول وشوفنا بعض يجمعنا تانى وقريب يارب
Desert cat said…
ريماس
طبعا طبعا انتى تنورى اول كومنت وتنورى الدنيا كلها
ان شاء الله ترجعى بالسلامة وابقى كلمينى اول لما ترجعى ياريت
وانا كمان صدقينى اتمنى انى اشوفك تانى وعاشر كمان ربنا يسمع دعائك
سلاماتى بقى لكل الناس اللى عندك
:)
سمراء said…
كل عام وانت بخير
وتمر الايام بحلوها ومرها
تروي وتشد العود الاخضر
لحد ما يبقي شجرة كبيرة تضلل على عيدان خضرة جديدة

وتحققي كل احلامك
كل عام وانت بخير
سمراء
Desert cat said…
سمراء
ميرسى جدا لزوقك سمراء ولمشاعرك الطيبة
كل سنة وانتى بالف خير
amunraa said…
كل سنه وانتي طيبه و2009 يبقي احسن
كل عام و انتم بخير و نتمنى في عام منشفش الاخوان ولا المنقبات
Desert cat said…
amunraa
وانت طيب وبالف خير ويارب سنة سعيدة على الجميع
Desert cat said…
مواطن مصري
وانت بخير ويارب يحقق لك كل امنياتك
وان شاء الله يجى اليوم اللى يختفى فيه الملثمات والاخوانجية
:)
A.SAMIR said…
كل سنة وانتي بألف خير وصحة وسعادة
ان شاء الله 2009 تبقى احلى
تحيااااتي
ابو احمد said…
اولا كل سنه وانتى طيبه ودائما فى خير وسعاده
ثانيا ياريت تشوفى الكلام الكام ده وتقوليلى رأيك
http://sabahelgamal.blogspot.com/2009/01/blog-post.html
تحياتى
انا حرة said…
كل سنة و انتى طيبة
بس الاهم من اختفاء الاخوان ان ييجى البديل اللى يستاهل بجد يحكم البلد دى و ده مش هيحصل الا لما الناس تتعلم ازاى تختار و انها تكون ايجابية من الاساس و تبطل تمشى ورا اى حد يقول الاسلام هو الحل حتى لو ما كانش عارف حاجة عن الاسلام ولا عنده اى فكرة عن الحل

و مش معاكى فى حكاية النقاب مع انى لا بحبه ولا بحب شكله ولا عمرى هفكر اخليه يلمسنى بس مش النقاب اللى عامل ازمة قومية..هم احرار فى نفسهم و بعدين احنا عندنا بلاوى كتير اهم من مين لبس ايه

و معاكى جدا فى نقطة احترام المراة دى..و ان كنت فقدت فيها الامل من زمان..ده مش هيحصل هنا ولا بالناس دول ولا بالثقافة اللى عندنا دى..يمكن احفاد احفادى اللى يلحقوا اليوم اللى الست بيتبصلها فيه على انها بنى ادم مش مجرد جسم ولا شكل
انا أولا لست أخوان ولا أنصار سنة ولا من اى جماعة دينية

ولكن لو دول هما اللى وحشين مين الحلو

ولو المنقبات وحشين مين الحلو؟!

ارجو إعادة قراءة التاريخ ومعرفة مالنا وماعلينا فى الدين
ومحاولة التفكير بعقلانية
وليس إتباع كلام الأخرين فما فائدة العقل إذا
تحياتى
مسلم 100% said…
خلاص متزعليش من المشاركة السابقة
كل سنة و أنتي طيبة
كل سنة وانتي طيبة
والامل في السنة الجاية تكون احسن
Desert cat said…
A.SAMIR
وانت طيب يا احمد وبالف خير
سنة سعيدة على الجميع
Desert cat said…
ابو احمد
وحضرتك طيب يا دكتور ويارب تحقق كل امنياتك
بالنسبة للكلام فرأى فيه لا يختلف عن سابقه
الكلاب تعوى والقافلة تسير
طبعا حضرتك فاهم انا قصدى مين

مودتى واحترامى وتقديرى لحضرتك
Desert cat said…
انا حرة
كل سنة وانتى طيبة
هما لو الاخوانجية اختفوا والحكومة بالفعل قدرت تحجمهم يبقى مصر بدأت فى عصر النهضة من جديد
اما الملثمات فلا حرية فى التخفى
انت حر مالم تضر
اللى عايزة تتخفى مش تخرج من بيبتها افضل
عام جديد سعيد عليكى
تحياتى
Desert cat said…
Dr Ibrahim samaha
من الواضح ان حضرتك قريت تاريخ تانى خالص غير تاريخ مصر
فالاخوانجية النتاج الطبيعى لمدرسة الاسماعيلية التى انشأها المقبور حسن البنا وتاريخهم الدموى من اول مقتل النقراشى حتى اليوم مسجل فى كتب التاريخ
بالنسبة للملثمات ايضا تحتاج ان تتابع الاخبار لتعلم ان جميع الحوادث فى مصر فى الفترة الاخيرة بطلها اللثام
من خطف اطفال لسرقة محال ذهب واخرهم طعن دكتورة اثناء خروجها من عملها بسكين والجانى كان متخفى خلف لثام
اذا لم تكن تتابع وتقرأ التاريخ
فلا تتحدث بما لا تعلم
والا ما فائدة العقل لديك
Desert cat said…
مسلم 100%
لاء انا مش زعلانه لانى بعرف ارد كويس على اى حد وبالتالى الزعل عندى ممنوع
كل سنة وانت طيب انت كمان
Desert cat said…
علشان مصر
وانت طيب وان شاء الله القادم يكون افضل

Popular posts from this blog

قميص دهشور

كل تحرش وانتوا طيبين