Desert Cat Search
قطه الصحراء: 12/1/08 - 1/1/09

Wednesday, December 31, 2008

جنازة الرائد ياسر فريج

جنازة الشهيد الرائد ياسر فريج .. اللى اتقتل على ايد الفلسطينين وحكومة حماس الفاشله

ربنا ينتقم منهم انتقام عزيز مقتدر

هو احنا اللى محتلينكو يا جهله يا عجزة

اذا كانت حماس مضحية بغزة وبكل الشعب الفلسطينى ورغم فشلها الذريع وقلة حيلتها ورغم انها ضعيفه لا تقوى على مقاومة ولا تقوى على حرب ومن ضعفهم وجهلهم عايزين يدمروا مصر معاهم مصر مش هتدخل حروب انتوا تغلطوا وعايزين مصر تصلح أخطأكو ؟؟ مصر دورها فعال وقوى ومش اتخلت عنكو وعاملة تهدئه وانتوا اللى ضربتوا صواريخ ولا البمب اللى بتفرقعوه ده اتحملوا ما جنته ايديكو .. المفروض الحكومة الفاشله دى تستقيل

ربنا ينتقم من حماس ومن كل اللى يعتدى على مصرى ويحاول يشوه سمعتها سايبين اليهود وجايين تقتلوا فى حرس حدودنا حماس الضعيفة الفاشلة مش عايزة تستقيل وبتنادى بالجهاد ما تخرجوا من جحوركو وتجاهدوا بدل ما انتوا مستخبيين وهنيه صاحب التصريحات الغبية اللى بيقول لو تم ابادت غزه لن نستسلم ده كلام يخرج من مسؤول عن ارواح الفلسطينيين .. والاخوانجية بتوع المظاهرات نص ساعه ويمشوا تانى .. يروحوا يجاهدوا خلونا نخلص منهم .. و اللى عايز يهاجم مصر يورينا همته .. ربنا ينتقم من الحمساوية ومن الاخوان ومن الجهاد ويصبر أهل الشهيد ياسر فريج ويدخله فسيح جناته

Tuesday, December 30, 2008

حسن نصر الله من فضلك اخرس

دعا الامين العام لحزب الله اللبناني السيد حسن نصر الله الحكومة المصرية الى فتح معبر رفح الحدودي، والا فانها ستكون شريكة في الجريمة ضد غزة.
وفي كلمة له بمناسبة حلول شهر محرم الحرام، دعا نصر الله الشعب المصري وكل النخب الدينية والسياسية والقيادات العسكرية في مصر والعالم العربي والاسلامي الى مطالبة مصر بفك الحصار، متهماً بعض الانظمة العربية بالتواطؤ مع الاحتلال الاسرائيلي لتمرير مشاريع التسوية الاميركية والقضاء على المقاومة
.


حسن نصر الله فض الله فاك الناس مش ساذجة وعارف ان سيادتك اللى عميل لإيران لإن ايران طول عمرها بتكره مصر مطلوب من مصر ايه ؟؟ انها تحارب .. وأنت فين ؟؟ وايران فين والامارات فين وكل الدول العربية اتحذفت مواقعها من الخريطة ولا غيرت الجنسية ؟؟
الخونة الفلسطينين سايبين اللى محتلينهم واجيين يقتلوا فى حرس حدود مصر وكل يوم قتيل على ايديهم القذرة سايبين ارضهم وجايين يحتلوا ارض سيناء ياريت كل المصريين يتكاتفوا والنظام يقوى فى صد هؤلاء الاوغاد احنا مش هنسلم سيناء للفلسطينين واى عربى يشتم مصر ويقعد يحرض على الحرب وهو قاعد فى التكييف ياريت يورينا هو شطارته ومهاراته القتالية ويبعت جيش من عنده يحارب ويثبت انه مش عميل خاين ومتواطئ غزة مش ضحية لمصر علشان تقلوا ادبكو على مصر وسيادتها غزة ضحية لحكومة حماس الغبية فإما يسيبوا السلطة للى يعرف يدير شئون بلادهم ويجيد الحنكة السياسية يا اما يتكتموا هما واى عربى جبان بدل مايرموا بلاويهم على مصر نصر طلع يلقى بيان صدر مصر فى المقدمة وكأنه هندى مش عربى عملت انت ايه للقضية وخدمتها فى ايه ؟؟ عايز ايه من مصر ؟؟ مصر مش عجباك ابعت انت اللى يحارب مع فتح وحماس اللى ضيعوا اسم فلسطين وبدل ما القضية احتلال صهيونى اتحولت لصراع على السلطة .. عنجهية حماس وغبائها هى اللى وصلت غزة للوضع الحالى يبقى حماس والاخوان والجهاد إلى اسفل السافلين ... نصر الله اللى طالع يجعجع وفى الاخر بيطالب العرب بالاتحاد علشان يطالبوا مصر بفك الحصار عن غزة حد يقوله ان اسرائيل اللى محتلاهم مش مصر علشان يطلب مننا نفك الحصار .. نصر الله اللى جاى يحرض على الحرب يورينا همته وعزيمته وينزل يحارب بجيشه وشعبه .. والآن أتسائل يا سيد نصر الله وياريت اللى عنده اجابة يرد .. أين صواريخ سيادتك المزعومة لضرب اسرائيل ؟؟ أين نجاد الذى صور للعالم انه القوة الخارقه والذى سيمحو اسرائيل وامريكا عن ظهر الارض ؟؟؟ أين بشار ولا هما محتلين الجولان فالقلق برضه محاصره ؟؟ واين عاهر السعودية ؟؟ ما يحدث فى غزة هذا بفعل حماس وإدارتها الفاشله ، هنية يصرح من جحره بان قتاله لن يتوقف الا بعد ابادة غزة .. إذن اين أنت من غزة وماذا فعلت للإبادة مستخبى كالفأر الاذعر .. والضعفاء اللى بيردوا عليهم بالبمب هما اللى بيدفعوا التمن

Sunday, December 28, 2008

استشهاد ضابط مصري من قوات حرس الحدود برصاص فلسطينيين

استشهد مساء الاحد الرائد ياسر فريج من قوات حرس الحدود المصرية عند نقطة البراهمة في رفح المصرية.
وذكر مراسل مصراوي ان فريج تلقي طلقتين في البطن اردته قتيلا من قبل فلسطينيين قاموا باقتحام معبر رفح
وكان القصف الاسرائيلي للحدود قد تسبب في
انهيار اجزاء من الجدار الذي اقامته مصر بينها وبين قطاع غزة مما ادي الي اقتحام بعض الفلسطينيين للمعبر.

هو احنا اللى محتلينهم يقتلوا فى حرس الحدود المصريين ليه
اسرائيل تضرب فيهم وبدال ما يردوا الضرب لإسرائيل يجتاحو حدودنا ويقتلوا فى رجال الشرطة المصريين
ياريت اخوانهم اللى بيخرجوا مظاهرات نص ساعه وينسحبوا منها تانى ولو الشباب الليبراليين هتفوا ضد نظام مبارك يتهموهم بالعمالة زى ما حصل النهارده فى اسكندرية واللى كان واضح اوى من رد فعلهم مين اللى عميل يوجهوهم صح ويقولوهم ان المصريين زيهم واغلب كمان منهم وبالرغم من كدا برضه بيساندوهم مش مصر بس اللى دولة عربية علشان يشتمونا ... ..وبالرغم من المساندة جايين يحتلونا احنا ويقتلوا فى حرس الحدود .. ياريت الحكومة المصرية يكون لها رد فعل قوى لصد الفوضى والهمجية اللى عايز يدخل مصر يدخلها بالادب وباذننا مش يحطموا حدودنا ويقتلوا فينا وكمان يشتمونا

Friday, December 26, 2008

طالبان فى عيون وقحه

اثبتت حركة طالبان المتشدقين ليل نهار باسم الاسلام واللى بيلزقوا كل اعمالهم الارهابية فى الدين والدين منها براء مدى ارهابهم وتطرفهم .. فقد اصدروا اخر نكته قصدى بيان ولا عجب فيه فبيانهم الذى يلصقوه بالدين ايضا ينص على :
أصدرت حركة طالبان في وادي سوات، الواقع في مناطق القبائل في شمال غرب باكستان، قراراً يمنع الفتيات من التوجه إلى المدرسة اعتبارا من يناير المقبل، وهددت بقتل كل من تتحدى هذا الأمر, وفق ما أعلنه مسؤولون محليون الخميس 25-12-2008

وأصدر الزعيم المحلي في طالبان شاه دران القرار هذا الاسبوع في رسالة بثتها إذاعة غير قانونية في المنطقة بحسب المصادر. وصرح شاه دران قائلا: "لديكم مهلة حتى 15 يناير لتمتنعوا عن إرسال فتياتكم الى المدارس. وفي حال تجاهلتم هذا التحذير سنقتل الفتيات", وذلك بحسب مسؤول محلي. كما حذر المدارس من استقبال أي فتاة مضيفا "والا فسنفجر مبانيها"
وهل يوجد دين انزله الله سبحانه وتعالى يدعو لهذا التطرف من تهديد وترويع آمنين وترهيب وقتل نفس لحرمانهم من ابسط حقوقهم الانسانية فجميع الاديان نصت على التسامح والحب والمودة .. ولكنهم تناسوا اطلبوا العلم من المهد الى اللحد وايضاً اطلبوا العلم ولو فى الصين .. وما يعرى سؤتهم اكثر واكثر

وشكل وادي سوات حتى العام المنصرم مقصدا سياحيا مفضلا, وهو يضم منتجع التزلج الوحيد في البلاد. غير أنه تحول منذ ذاك الى منطقة نزاع بعد ان بدأ الزعيم المحلي المتشدد مولانا فضل الله المرتبط بحركة طالبان الباكستانية حملة عنيفة من أجل فرض الشريعة الاسلامية في المنطقة
على يد اى مريض نفسى تعلم هذا الثور تعاليم دينه فأول آية قرآنية نزلت اقرأ باسم ربك الأعلى " ولم يقصر الله العلم على الرجل او الانثى وهذا المريض النفسى يرهب ويهدد ويتوعد من تجرأ على الخروج لتقرأ .. دعوى صريحة للتخلف والارهاب والهمجية يجملها بشكل شرعى اهؤلاء هم القدوة التى يدعى اليها كل جاهل اهؤلاء هم حكام المستقبل الذي يتباكون من اجلهم ليل نهار .. فالجزائر باتت مجازر وحماس تحارب فتح وتقتل فتياتها وترهب نسائها وكأن فتح هى من احتلت فلسطين والاخوان يلهثون ليل نهار خلف مطامعهم واغراضهم الشخصية فكل يوم بيان مختلف متناقض حسب الهوى وحسب المصلحة واخره بيانهم الصادر بالامس تأييدهم للشيعه بالرغم من مخالفتهم التى كانت على اشدها منذ ايام مضت جميع هؤلاء يلصقون تراهتهم بالحكم الاسلامى وكاننا نحيا فى زمن ابو جهل وعكرمة لن تناولوا من مصر مهما طال الزمن فلن نكون مثل غيرنا من نادوا فى الظلام خفيراً فخرج إليهم قطاع طرق واليوم هم وحدهم يدفعون الثمن

Thursday, December 25, 2008

غنـــوا فعبـــــروا



الاغنية دى للناس اللى بتفهم بس اللى لسه فى طريقهم نحو الامية يمتنعون

Wednesday, December 24, 2008

ليه مش بيجرموه ؟؟؟

نشر على مواقع الاخبار اليوم
900 قافلة لوزارة الاوقاف تجوب المحافظات لمحاربة النقاب
أعلنت وزارة الاوقاف انها رصدت 10 ملايين جنيه تحت تصرف قطاع الدعوة بالوزارة وذلك لتسيير 900 قافلة دعوية بالمحافظات لمواجهة ظاهرة انتشار النقاب ومحاربة الزيادة السكانية التي تلتهم كل عمليات التنمية التي تقوم بها الدولة.
وقال مصدر بالوزارة ان القوافل ستجوب القري والنجوع والمدن والاحياء المختلفة والنوادي للتأكيد علي ان تنظيم النسل لا يتعارض مع صحيح الدين "وبتصحيح المعلومات المغلوطة التي يروجها بعض الدعاة المتشددين منالتيارات الدينية المختلفة" علي حد وصفه
.

طبعا القوافل دى جت فى الوقت المناسب ووزير الاوقاف اتخذ القرار الصحيح جدا والسليم جدا جدا .. بس زى ما الوهابيين والسلف قاعدين ليل نهار يبثوا سمومهم على الفضائيات المفروض يكون فى شيوخ معتدلين افاضل يمنعوا وصول السم ده للعقول اللى اتبدلت بمخ مسلوق بدلا من مراكز الاحساس والفهم ...
واضاف المصدر ان الوزارة قامت بعقد عدد من الدورات التدريبية للدعاة المعينين وعددهم 45 ألف امام علي مستوي الجمهورية للتأكيد علي ان النقاب عادة وليس عبادة دينية ولا تمت بصلة للزي الشرعي.
وقامت الوزارة
باصدار كتاب عن النقاب جمعت فيه اراء عدد من العلماء من بينهم شيخ الازهر والمفتي ووزير الاوقاف والشيخ الغزالي وتوزيعه علي كل دعاة مصر للتأكيد علي ان النقاب عادة وليس عبادة مؤكدا ان هماك حملة منظمة للقضاء على التشدد والغلو فى الدين والتى بدات المحافطات تشهدها مؤخرا بعد انتشار بعض التيارات السلفية
لما أنشأنا حملتنا على الفيسبوك .. حملة مصر بدون نقاب .. كنا بنبتدى حلم ولما اتكافت الجروبات المنادية بنفس الشعار معانا بدأنا تحقيق اول خطواتنا اما بقى 900قافلة تجوب المدن والمحافظات فهذه تعتبر قفزة .... وان شاء الله الخطوة القادمة تتكاتف الجهود وتتدخل وزارة الداخلية وتسن قانون لتجريمة وعقوبة رادعه لكل ملثمة ..
والى اقرب ريسيكل بن

Monday, December 22, 2008

الزواج على الطريقة البدوية

بعد عودة النت بنسبة معقولة تسمح لى على الاقل مطالعة المواقع الإخبارية .. ومن موقع الى موقع ومن خبر الى خبر وإذ بى فعجة تقع عينى على هذا الخبر
قاضٍ سعودي يرفض فسخ نكاح طفلة ذات 8 أعوام من خمسيني
خطر فى بالى مباشرة قصة البنت اليمنية اللى تزوجت وعمرها 8 سنوات من رجل يبلغ من العمر 29عام ورفعت قضية على والدها وكسبت القضية وتم تطليقها دى كمان اخدت جايزة .. بس عنوان الخبر بيقول قاضى سعودى يعنى الكارثة المرة دى فى السعودية .. دخلت اشوف تفاصيل الخير .. والتى يتضح منها ان العملية صفقة وليست زواج .. فوالد البنت التى تبلغ من العمر ثمانى سنوات يمر بضائقة مالية .. لذلك قام بتزويجها من رجل يبلغ من العمر 58عام وكتر الف خيره اشترط عليه شرط شفهى انه لا يعاشرها معاشرة الازواج الا بعد عشر سنوات يعنى البنت يبقى عندها 18سنة والزوج المحترم عنده 68سنة يعنى الآنسة هتروح تشتغل له ممرضة ده ان فضل عايش يعنى والأعمار بيد الله .. والدة البنت رفعت دعوى قضائية لتطليقها لكن القاضى علشان عارف ان 8سنين يعنى طفلة .. 8سنين يعنى لسه بتلعب مع الاطفال اللى فى سنها ولا تعلم من الدنيا سوى البرائه .. لكن السيد والدها علشان لا يعلم ماهى القيم الكبرى ولا يعرف اين الحق ولا معنى الحرية قام باغتيال برائتها .. اى مجتمعات هذه التى تجنى على اطفالها .. واى تخلف واى عصور جاهليه التى يحيا فها هؤلاء ؟؟؟ رفض القاضى لم يستند لدليل مادى او معنوى رفض القاضى الدعوى استند لأن الدعوى لم تقام من البنت نفسها وانه يجب الانتظار عندما يتم بلوغها السن القانونى لتقوم هى برفع دعواها بنفسها .. الجدير بالذكر ان الطفلة لم تعرف انها متزوجة .. فالى اى منطق يتم رفض دعوى تعتبر جرم فى حق طفلة أهذا هو الفكر الذى يريدون توصيله للعالم عبر فضائياتهم ؟؟ اهذا هو المنطق الذى يريدون اقناع العالم به ؟؟ فالمأساة متكررة من طفلة اليمن الى طفلة السعودية ومازال يخرج من مجتمع البداوة العجب

Saturday, December 20, 2008

الله لا يقطع لك كابل

فى ظل الثورة المعلوماتية والتطور الطبيعى للحاجه الساقعه وجميع دول العالم تسارع الزمن .. الطبيعى والبديهى والجدير بالذكر ايضا ان اى شخص فى حياته حاجه مهمة بيكون عنده بديل ليها علشان فى حالة التلف متقفش .. حتى اللى عنده جيرل فريند بيكون عنده برضه احتياطى علشان لو قالت له باى جالى عريس غنى هروح اتجوزه معطلكش بيروح للبديل مباشرة علشان مش يقعد يبكى على الاطلال كتير .. اما بقى بلدنا الحبيب بلدنا العزيز بلدنا اللى مفيش زيه على مستوى الكورة الارضية ليس لديه من الضمانات الا الستر .. حصلت الازمة المالية قالوا اللى ليه حاجه يجى ياخدها اتقطع كابل فى البحر المتوسط العام الماضى من المفترض اننا كنا نتعلم من الازمة علشان المليارات اللى بتخسرها الشركات المعتمدة إعتماد كلى على النت والبنوك مش تحصل تانى لكن فى اقل من عام عادت الازمة وتمر مصر هذه الايام بحالة شلل تام بل تنعزل انعزال كلى عن العالم .. تعدد الاسباب والعطل واحد .. هناك من يقول ان مصر مدفعتش فلوس وصلة النت اللى هى واخدها من النت كافيه اللى فى جزيرة صقلية .. وفى قول آخر ان مصر واخده النت ده اعانة وان عدد المشتركين فى مصر زاد بشكل رهيب صعيب فشيخ وان النت اللى جاى مصر مجرد اعانة يعنى بندفع 35% فقط من التكلفة ويكفى لعدد محدود من الناس علشان مش يعمل بينج ويهنج فى سيرفرات الدول المانحة كفرنسا او خطوط سى بون او فلاج والناس فى مصر متقدمين جدا وبيحبوا التكنولوجيا لدرجة بشعه علشان كدا العدد زاد قوم ايه بقى الباكبون بتاع الشركات الاجنبية هنج قوموا هما عملوا اللى عليهم وبعتوا للمسؤلين بتوعنا علشان يزودوا الباندويدث .. مسؤلينا طبعا مش فاضيين للكلام الفاضى ده ولا لت وعجن الفرنسويين ولا الايطاليين راحوا مكبرين دماغهم ولا ردوا عليهم .. الناس الافاضل عملوا اللى عليهم ولما مسؤلينا مش عبروهم عملوا فينا العملة المهببة دى ... اما اخر الاقوال وهى ان سمكة القرش جاعت فلما حبت تستمد غذائها مش فكرت فى اكل كابل لاء دول 3 فى وش العدو .. سؤالى ليه مش يكون فيه كابل باك اب ؟؟؟ وليه مش تتحول خدمة الانترنت فى مصر للستالايت ؟؟؟ ولحد امتا هنفضل معتمدين على كابلات غيرنا ؟؟؟؟

Thursday, December 18, 2008

تقديس اللامقدس

من المعروف والبديهى ان التقديس هو التقدير والإجلال والإحترام اللامتناهى ، فأنا أحب الله واحترمه واقدسه ، وأحب الكتب السماوية المنزلة من عند الله ، وايضاً لها قدسيتها التى تهتز لها المشاعر التى تعرف كيفية التقديس ومتى يكون ولمن ، ولكن من العجائب والغرائب المنتشرة فى مجتمعنا اليوم وهى تقديس الاشياء! بل ايضا نزع القدسية عما هو مقدس! فالقرآن الكريم تم نزع قدسيته بمقارنته بنظريات علمية تتغير وتستحدث من آن لآخر، ومبررهم الذى لا يستند الى حقيقة انه اعجاز!.. وهل نستكثر على الله خالق الكون والعالم بما فى الصدور الإعجاز؟؟وما أن انتهى العرب من عبادة اللات والعزى حتى ظهر لنا منهم فئة جديدة، فترى أحدهم بلحية تطول وتقصر حسب العقل المتمثل ليضفى صفة القدسية للحية! .. ونرى احداهن وهى تسير في الطرق تجرجر ثيابها التى تلملم خلفها كل ما تحمله الشوارع من قاذورات ملقاه وكأنها عينت لتوها فى المحليات وكل مهمتها هى كنس الشوارع بثيابها ، وإن تحدثت إليها بتهذيب ملبسها حتى يصلح لغرض الصلاة الطاهرة على احسن تقدير، تجدها تنظر اليك شذراً لتتهمك بعدم الحياء وكأن الأمتار التى تستخدمها فى كنس الشوارع من المقدسات! وأخرى تضع فوق وجهها قطعة من القماش لتتخفى كليا.وعن المعاملات حدث ولا حرج ، فالصوت العالى يلعلع والكذب فى الحوار والتدليس فى الكلام والتناقض فى الأفعال ، هذا كله ليس له علاقة بقطعة القماش الى تضعها احداهن على وجهها. فالأخلاق لا ترتبط حقاً بالزى ولكن من بين هؤلاء من تخلى عن الأخلاق التى وصى بها الخالق وكانت من اهم سمات الرسول الكريم فنزع عنها هذه القدسية، وذهب لتقديس قطعة قماش.. ومع تدنى الثقافات فى عصر اصبح يشبه بقوة العصور الظلامية، تخلينا عن المقدس باللامقدس، حتى صارت الاشياء التى يقدسها هؤلاء تستعبدهم بعد ان عبدوها ليجدوا انفسهم بين ليلة وضحاها يجتهدون ويرهقون انفسهم فى دعوة الاخرين الى تقديس "الاشياء" بإضفاء اسم الله عليها ، فالمنتمى لجماعة محظورة ما ان يسمعك تنتقدهم فى شيئ حتى ينعتك بانك كافر وكأن الإيمان بالله تمثل فى اسم هذه الجماعة! ومن يقدس لحيته إن فكرت فقط فى ان تسأله عن سبب طولها بهذا الشكل تجد رده انها سنة ، لتتسائل وهل أديت الفرض؟؟ وإن تعاملت معه فلا تستبعد الغش فى المعاملة والنصب باسم اللحية المقدسة ، ولنا فى شركات توظيف الاموال اسوةفرسالة النبى محمد (ص) كانت لانقاذ البشرية من الجاهلية والتوجه لعبادة الله وحده وتقدسيه والبعد عن عبادة الاصنام والخروج من مأزق الشرك بالله، واليوم نرجع اليها بسرعة الصاروخ وتحت مسمى الدين حتى لا تستطيع ان تجادل او تناقش. لكن هذه المرة لن يأتى رسولا جديدا لانقاذنا لأن الله ذكر فى كتابه الكريم ان النبى محمد (ص) هو خاتم الرسل، فمن اين أتيتم لنا بالعادات البالية؟ ولما العودة لعصور الجاهلية؟ وكيف حدثت عمليات غسل المخ ليحيا هؤلاء فى عصر التقديس الزائف للأشياء؟ هل ستحدث معجزة ربانية للإفاقة من الغفوة؟ أم ننتظر ان تحدث هزة لتصفية النفوس من رواسب الشرك لتسبيح الله وحده؟ ام كل ما نحتاجه هو التوعية لإصلاح فكر اتى إلينا مع هبوب رياح صحراوية بالية؟

مقالى فى مجلة مصر الجديدة

Wednesday, December 17, 2008

عدد جديد مميز ومتميز جدا

الطبيعى ان عدد الشهر من مجلة وسط البلد يكون مميز لكن الشهر ده مميز ومتميز وممتاز
مش هتكلم عن المقالات واختيارها بعناية وكتباها المتألقين
ولا عن السياسة والمجتمع والمدونين والفيسبوكيين
انا هتكلم عن الحوارات اللى مع ناس غير عاديين
وطالما غير عاديين يبقى اكيد حوارنا مع زعيم له بصمة قوية فى عالم التدوين
ولشدة تاثيرة واهتمامه بقضايا الآخرين .. اصبحت مدونة الوعى المصرى تحمل اعباء ومشاكل المصريين
حورانا مع زعيم عرض اجرأ القضايا وائل عباس - مدونة الوعى المصرى
وكمان مفاجأة العدد مع : إعلامى واعى عمله هو حياته لذلك النجاح حليفه .. ثقافته لا محدوده .. أفكاره متجدده مهتم بكل ماهو جديد ومفيد فى عالم الانترنت .. لذلك كان من السابقين فى إنشاء أول موقع لإذاعة مصرية على مستوى الوطن العربى ، بل اقترب من جميع الأفكار وجميع الأعمار فكانت مدونة البرنامج تلألأ فى سماء المدونات فى زمن قياسى جداً
حوارنا مع الإذاعى الكبير الأستاذ / صلاح حجازى معد ومقدم برنامج أنت تسأل والكمبيوتر يجيب
ولأنه يعمل فى مجالات مختلفة و حواره كان عبارة عن منوعات فكان لازم يبقى على حلقات
كلامى عن / محمد حمدى مدونة دماغى

Monday, December 15, 2008

جزمــة بـــوش

انا مش متعودة انزل بوستات ورا بعضها كدا لكن ما اثارنى حقا هو ردة الفعل الغريبة للمجتمعات العربية بعد ان قذف منتظر الصحفى العراقى بوش بالجزمة التى جعلت منه بطل قومى .. هل لأنه صحفى .. ام لأن الكاميرات كانت تلتقط الحدث

فكم من أبطال حقيقيون خلف الكواليس ولم يتم تمجيد احذيتهم ولم يشعر احد بهم
كم ابطال راحوا شهداء وعوائلهم فى صد عدوان عنهم او عن جيرانهم
لن اسهب كثيراً فى الحديث عن ذلك الحذاء البطل المغوار فى وجه بوش
ولكن الواضح جداً انه أظهر مدى العجز العربى
كمن يقهر فى عمله من مديرة يعود للبيت يقهر زوجته وزوجته بالتبعية تقهر الابناء
كالاطفال الذين يلعبون وفى النهاية القوى يضرب الاضعف منه فيروح الضعيف لاخو القوى الصغير ويضربه
فثقافة الجزم متمثلة بالفعل فى العراق فعند سقوط صدام قذفوه بالجزم
والمشهدانى يهدد برفع الجزمة فى وجوه معارضيه
تخيلوا معى ايضا ان ثقافة الجزم انتقلت لمصرنا من خلالهم فالمهدى العاكف ايضا هدد المعارضين بالجزمة
انا لن ادافع عن بوش لانه لا يوجد اثنان من العرب يختلفان على اجرامه
ولكن من المفترض ان لكل فعل رد فعل مش انا اضربك بصاروخ وانت تحدفنى بجزمة واعمل منك بطل
البطولة ليست بالجزم وليست بالشتيمة وليست بالردح كالرعاع والجرابيع المنتشرون على النت
البطولة افعال ايجابية متمثلة فى انقاذ حياة وانقاذ وطن

Sunday, December 14, 2008

اللامبالاة .. هدم لكيان مجتمع

مقالى بمجلة على صوتك


اللامبالاة تلك الظاهرة السلبية الذهنية الشعورية التى تصيب الفرد نتيجة للظروف الإجتماعية والإقتصادية وأيضا التربية الغير سليمة التى ليس لها أساس قويم، وربما تصيب الفرد نتيجة لهذه الأسباب مجتمعه سواء يتقدمهم عدم التربية الصحيحة والتوجيه القويم للفرد، فينتج بعد تلك الأسباب فرد مهمل لا يبالى بما يحدث حوله يعلم تمام العلم انه ليس له اى تأثير فى المجتمع يبنى حياته على إحباطات وفشل لا يتأثر بما يدور حوله. وبالتبعيه نجده أيضا لا يؤثر، فلذلك نرى دائما اللامبالي لا يهتم بتنمية ذاته ولا بالبحث عن مهاراته أو قدراته، فقد استسلم لهذا الشعور الغير متوازن وبعد أن يتعود عليه يشعر معه بالراحة لأن هذا الشعور ليس وليد الساعة، ولكنه عبارة عن عملية تراكمية مر بها طوال سنوات عمره حتى تكيف مع هذا السلوك السلبي لا دور له فى المجتمع ولا فأئده؛ فدائما الإهمال حليفه وصديقته الودودة عبارة "وأنا مالي"؛ لأنه يشعر بعدم القيمة عاجز عن مواجه جميع الأمور. المثير للذعر أن قطاع عريض من المجتمع يعانى اليوم من هذه الحالة حتى أصبحت تنعكس علينا جميعا بالسلب فبدلا من استثمار قدرات الشباب فى العمل على تنمية المجتمع فأصبح الشباب اليوم ثمرة أصابها العطب قبل النضوج ومن أهم مؤثرات العطب غول البطالة الذى يطارد الجميع فهو يفنى نصف عمره فى التعليم لا لهدف منشود ولا لطموح يريده يعلم انه يحيا فى مجتمع لا يريد منه شيء لن يستثمره فى عمل مفيد؛ حتى نجد قدراته مهدره ومفقودة فى اللامبالاة وعدم الإهتمام لا يريد أيا منهم المعرفة أو العلم. يتكاسل دائما عن تثقيف نفسه لا يعلم أن الثقافة والمعرفة والإطلاع تساعد بقدر كبير على الإقلال من هذه الظاهرة السلبية ؛ فبالإطلاع يتعرف على الأحداث الجارية والتى من الممكن مشاركته فيها ليصبح له دور فعال فى مجتمع يحيا به، وربما يستطيع عقله أن يعمل ويسعى لاكتشاف نفسه من جديد واختبار قدراته الفكرية التى من البديهي أن تسهم فى عمل شيء مثمر يفيد به ويستفاد منه هذه المقومات أساسها الأسرة التى تحث أبنائها دائما على المشاركة وحسن الأداء والتصرف والتربية السليمة التى تستند على إكتشاف قدرات الطفل منذ الصغر والمعاملة الحسنة وعدم تمييز أقرانه عنه، وعدم إحساسه دائما بأنه يحيا فى مجتمع يلفظه، ومهضوم حقه فيه فهمها يعمل لن يؤثر ومهما يعطى لن يأخذ... ومن هذا المنطلق نجده شابا يافعا وفى نفس الوقت فاقد لكل معاني الأهلية فالاعتماد على النفس هو أول الطريق لمحو كلمة الإهمال من قاموس الطفل والتشجيع الدائم على حسن الأداء يمحى فيرس اللامبالاة أما إذا وجد دائما مجهوده مقابل بالنكران فالطبيعي أن اللامبالاة هى حليفه فهو فى كل الأحوال مهمل وغير مهتم لذلك سيفضل الانفصال عن العالم قابعا فى زاويته لا يريد أن يتعلم شيء لأنه يعلم تمام العلم انه مهما فعل لن يعلم ولن يؤثر هذا بخلاف انه سيظل دائما يصاحبه عدم الإحساس بالأمان الإجتماعي والعدل ومع مرور الايام يستمر تدني مستوى الوعي، حتى نصبح بين ليلة وضحاها مجتمع مصاب بشلل فى العمود الفقري ألا وهو جيل الشباب حتى نحيا فى مجتمع خاوي هيكله العظمى هش لا يقوى على المقاومة متآكل ينهار مع أول نسمة هواء تهب من أى إتجاه.. ومع استفحال هذه الظاهرة السلبية فى يومنا وفقدان شبابنا لهويتهم ولمعنى وجودهم الحقيقي واتسام الآلاف منهم بهذه الظاهرة لن يقوى عودنا كثيراً، إذن لابد من البحث على حل جذري وفوري يبدأ من الأسرة باكتشاف مدى قدرات أبنائها وحثهم الدائم على استغلالها وتشجعيهم على تخطى اى صعاب والعمل على الثقافة والتوعية لمتابعه مجريات الأمور التى تحدث فى الحياة حتى نستطيع بناء مجتمع قوى قادر وصامد بسواعد أبنائه الواعي لحقوقه الذى لا يعرف للإهمال كلمة ولا للامبالاة طريق لنضع أول خطوة على سلم عبور السلبية.


من مقالاتى أيضاً بمجلة على صوتك
وجهان لعملة بخسة ( الرشوة والفساد
الرقى الفكرى وطلبة الاقتصاد والعلوم السياسية

Saturday, December 13, 2008

ويحـــك يا دينــا

دينا عبدالعليم الأسم تردد كثيراً فى الفترة الأخيرة على الصحف اليومية .. فهى فتاة فى العشرينات .. مشكلة دينا انها عندما فكرت أن تتحدث أتخذت من الصراحة طريق ونسجت من العفوية ثوب ولكنها أتكأت على مجتمع عبارة عن دمل كبير متقيح
مشكلة دينا أنها سردت تجربتها الشخصية خلال سنوات الجامعة فكانت الردود كالسيف البتار
دينا أحبت ثلاث شباب وفى كل مرة كانت الاقدار لها بالمرصاد لأن الثلاث دينهم المسيحية فكيف لها المسلمة ان ترتبط بهم .. الأول رامز دينا تصفه بانه شاب مثل جميع الشباب لا يوجد على صدرة بادج بديانته ولا يوجد فى ملامحه ما يختلف عن ملامح أى إنسان لأنه بالفعل إنسان خلقه الله هكذا كاد الموضوع يأخذ منحنى إيجابى فقد تم التعارف بينهم وتم تحديد موعد مع العائلتين للتقدم لها ولكنها تدابير القدر حينما تتصل دينا برامز ليخبرها بانه فى الكنسية
الثانى سمير ولم تعلم بديانته سوى من اختها ولكنها لم تستطيع منع عواطفها تجاهه ولكنها ايضا حطمت تلك العواطف تفادياً لأى مشاكل
الثالث بيتر ومن وضوح الاسم تتضح ديانته ولكن !! الم نقل إنها تدابير القدر ؟؟؟
رسالة دينا كانت واضحة للجميع بأن من يحييون معنا فى نفس الوطن من المختلفين دينياً هما بشر مثلنا لهم نفس العقل ونفس اللون ونفس الاحساس ونفس المشاعر .. يحملون عقل وقلب وحواس .. لا يختلفون فى لون او شكل او رائحة
اسهبت دينا فى حكايتها عن تجربتها أنبرت الكيبوردات فى مهاجمة دينا لتشكف لنا عن مدى الانفصام الذى يعانى منه مجتمع بأكمله
يلومها ويسبها وينعتها ... ويحك يا دينا
كيف تجرأين على الحديث بصراحة فى مجتمع لا يعلم عن المرأة سوى أنها عورة .. مع ان كلمة عورة لم تذكر فى القرآن سوى مرة واحدة ولم تكن عن المرأة .. فلو كنتى ذكراً وكتب مثل هذه السطور لكانت رفعت له الرايات فقد انتصر للدين الاسلامى
كيف تجرأين على الصراحة فى مجتمع يلتمس للمتحرش ألف ألف مبرر طالما من يتحرش بها انثى .. مجتمع يطلب الشفافية ولا يعرف عنها سوى حروف الكلمة ويؤيد ما يحدث فى الخفاء .. يدين الانتهازية واللصوصية وفى نفس الوقت يفتح درجه لكل مواطن لوضع ما فى محفظته
كيف تجرأين على الحديث بصراحة فى مجتمع تناسى انه من حسن اسلام المرء تركه مالا يعنيه وأعطى لنفسه الحق فى ان يتدخل فى اخص الخصوصيات وهى علاقة الإنسان بربه ... مجتمع لا يعلم عن الهلال والصليب سوى انه شعار يستخدم للإثتئناث فقط
كيف تجرأين على الصراحة فى مجتمع يعانى من ازدواجية جميع المعايير والقيم الاخلاقية
لا تعبأى كثيرا يا عزيزتى وارمى بكلامهم جميعا فى اقرب مرحاض يصادفك

Friday, December 12, 2008

كوكتيل القهر

على غير عادتى يوم الجمعه استيقظت مبكرا بكل نشاط وحيوية فاليوم مختلف .. مختلف ازاى مش لازم تفاصيل بس المهم انه يوم مختلف .. ركبت الميكروباص وتوجهت إلى وجهتى المنشودة سواق الميكروباص من الواضح انه كان هو كمان صاحى بدرى وبمعنى ادق صاحى مجبر أكل العيش بقى .. تحرك الباص وتحركت معه يد السائق لتشعل الكاسيت .. أول أغنية كانت

La Sortera
قولت الله ايه سواق الميكروباص الكووول ده .. اتاريه كوكتيل وتقريبا هو كمان بيسمعه قهر ومش عارف محتواه ايه .. يتبع باغنية لتامر عاشور .. ماشاء الله كدا تامر بيه عاشور بيوصف حاله لحبيبته بعد ما افترقوا وبيقولها ياريتنى قبل ما قولتها انا كنت موت فى وقتها .. يعنى من الاخر الراجل زعلان جدا انه طلب منها الفراق وبيلوم فى نفسه والايام عليه صعبه كتير لدرجة انه قاعد يدعى على نفسه الهى كانت روحى طلعت يارب كنت موت قبل ما اقول لك نفترق انا خلاص فى بعادك عنى بودع الحياة .. ايه الاغنية الغريبة دى طيب لما انت متقطع اوى كدا قولت لها ليه روحى حلى عنى .. فكرنى بموضة 2007-2008اللى كل واحد تعجبه واحدة يروح يقولها بحبك مش طايق الحياة من غيرك هموت لو مش حبتينى والنبى حبينى ربنا يبارك لك فى الاولاد إكسبى فيا ثواب وحبينى .. وبعد ما يزهق او يلاقى واحدة تانية .. يروح يقولها معلشى انا اسف مش عايز اظلمك معايا انا مش استاهلك خلينا اخوات احسن .. اسبوع تانى لما يحس فى حياته بفراغ ويروح يقولها مش قدرت ابعد عنك ارجعى حبينى تانى ويقعد يبكت فى نفسه زى الكابتن تامر عاشور كدا فى الأغنية .. يعنى هو اللى انا نفسى افهمه ازاى البنى آدم بيحرك قلبه بايده ومخليه طواعيه ليه .. يعنى قعد مع نفسه شوية داس على الزرار يقرر يبعد عنها حس بفراغ فى حياته يدوس على الزرار تانى يقرر يرجع لها طيب وهى بتصدق وبترجع ؟؟؟ لما قولت السؤال ده لاصحابى بعد ما وصلت عندهم تبرعت لقاء بالرد وقالت لى اه فى بنات عبط كدا يقولها روحى تروح يقولها ارجعى ترجع ... انتهى تامر عاشور من وصلة الندم واللوم والدعا على نفسه أنتقل بقدرة قادر لمطرب الجيل اللى البنات بتشوفه تغمن عليها تامر حسنى .. ومن تامر لتامر يا قلبى ما تحزن .. اصل تقريبا نفس وصلة الندم واللوم بس ده مش بيدعى على نفسه هو بس بيترجى فيها وبيقولها امانة عليكى يا حاجه وحياة ربنا ترجعى لى افتكرى لى بس اى مصيبة عملتها لك .. افتكرى بس اى داهيه روحنا فيها سوا .. والشوية اللى سمعتهم من الاغنية قاعد ينوح يقولها افتكرى لى اى حاجه كانت حلوة منى طيب وحشه ارجوكى ارجعى لى ... قعدت ابص .. والتفت اشوف نفسى قاعده فى ضريح من اضرحة اولياء الله الصالحين وكل واحد جاى ينوح ويعترف باللى عمله وبيحلف الشيخ الصالح الجليل ان اللى هجرته وسابته ترضى عليه او اللى طلب منها يفترقوا تحن عليه .. ابداً لاقيت نفسى قاعده فى ميكروباص وفيه ناس وكل واحد بيفكر فى اللى شاغله بقى ايا كان .. وهنا ضربت بكوكتيل القهر والعذاب اللى مشغله السواق عرض الحائط وعملت رحلة بحث عن الهاند فرى داخل حقيبتى المتواضعه وخالفت المثل القائل ما يجى من الغرب حاجه تسر القلب .. لأنه مثل كداب وبيوقع الدول العربية والغربية فى بعضها وقضيت الدقائق المتبقية مع يانى وزامفير وكينجى .. ومع كل مقطوعة موسيقية تصلنى عبر الهاند فرى ارسل اطيب تمنياتى وتحياتى للى اخترع الموبايل والميمورى واخترع اى حاجه تبعدنا عن اغانى الاعترافات الليلية .. المعروف انه لا حساب على القلوب .. لكن فى حالة تامر آند تامر حقاً لا حساب على العقول

Tuesday, December 9, 2008

عليا الطلاق ما انتى طالق

اتعجب حقاً لذلك الذكر الذى ما ان يجد فى بيته من تدعى زوجة له حتى يجلس ليلاً نهاراً يحلف بالطلاق وكأنها الكلمة السحرية التى يلقى بها على أذن شريكته حتى تجلس بين قدميه تلمس على ساقيه وتقدم فروض الولاء والطاعة لتلغى عنها شخصيتها وإنسانيتها وعفويتها وتقلئايتها .. لتحسب الف حساب للبغل الذى ترعى فى بيته حتى لا يطلقها او يتوعدها بالزواج عليها من أخرى .. بالأمس أول ايام العيد .. لست من هواة الخروج فى مثل هذه الايام ولكن على حين غرة مع بدايات اول ساعات الليل قررت الذهاب إلى بلدى الآخر الاسماعيلية .. قررنا واصدقائنا الذهاب لرحلة بحرية انفصلت ونصفى الآخر عن الآخرين حتى أصدقائنا امتزج مع جمال الليل وسحرة برد الشتاء وغموضه مع دفء المشاعر التى لمسناها بروحينا وأحساسينا دون اجسادنا .. واثناء همسى له كم اعشق الشتاء تلك الاسطوانة المشروخة التى أرددها دائماً على مسامعه طوال ايام الشتاء من كل عام .. وبالرغم من انى اشعر كم مل هذه الاسطوانة فى حب الشتاء ورقة الشتاء وجمال الشتاء ولكنه لا يريد البوح حفاظاً على مشاعرى وانا لم أريد الكف عن ترديدها حتى شعرت انه لو بيده لمحى من الفصول الاربعه فصل الشتاء .. وفى اثناء هيامى بالشتاء وإذ بى فجأة وعلى حين غرة أنتفض كمن لدغه ثعبان على صوت ثور هائج معنا على نفس الرحلة وهو يصرخ بصوته المتشفلخ المشتنج المتهبل المتهطل وبمعنى ادق جميع ما سبق يهدد تلك الإمعة التى كانت تجلس بجوارة بعليا الطلاق لو ما صالحتيها ... نظرت إليه فى توسل حتى أدار نظره للجميع فرأهم منتبهين .. وكأنه كان يظن ان صوت الغناء والطرب لن يمكن الآخرين من سماع خواره بس مين دى اللى علشان البغل عمل كدا يمكن تكون الست اللى خلفت جنابة ليتثور ويتحكم وزوجته إنسانة ليحلف يمين الطلاق كل فنية وأخرى عليها .. او الحيزبونه اخته التى من المحتمل ان يكون حدث سوء تفاهم بينها وبين من يحلف عليها يمين الطلاق بين فنية واخرى ليثبت من خلال ذلك رجولته المهدورة .. اعتقد بالفعل انها مهدورة لأنه لو كان يملك الرجولة الكاملة ما جلس هكذا مثل الشرشوحة يردح ويهدد ويتوعد وكأنه خالتى فرنسا فى عزبة الشراشيح العشوائية التى كانت تحيا فيها .. هو فى راجل مكتمل الرجولة شرشوح وبيردح اساسا .. كل هذه خيالات طافت بخاطرى بعد ان رايتها استسلمت لهذا الثور الهائج وكل ما تملكه هو التوسل بنظراتها ... وهنا سألنى آدمى عن ما ألم بى فأجبته تلك الإمعة .. ضحك ضحكة ساخرة وكأنه كان متوقع ردى وعاتبنى على هذا اللفظ الغير منقى بكلامه مش كل الناس بتفكر زيك ولا كل الناس عايشة زى بعضها .. يمكن هى عايشة حياتها فى معناه وقابلة علشان اطفالها او بيتها او اهلها او اياً كان بقى .. فأجبته لا يوجد فى حياتنا هذه ما يسمى بالمعاناة .. فالحياة جميعها عبارة عن تجربة بشرية كذلك الزواج فاما ان نتعرف على طبيعة هذه التجربة حسب قدرتنا المنطقية .. او نتعامل معها بشرف وكرامة قدر الامكان لكن فجأة تلاقى انسان كيان كامل متكامل عبدة مسخرة لكلمة عليا الطلاق أو هتجوز عليكى سورى يا عزيزى ... لاحظت الامتعاض على ملامحه ولكنه أصر على مواصلة الحديث بأن الرجل لم يخطأ لأنه عرف أين تكمن نقطة ضعفها .. فهى فى البداية من اعطته سر تلك الكلمة السحرية .. فكانت إجابتى بأن من يعطى لشريكه طوق حياته فهذا يسمى اقتراباً أخلاقياً اعتقد انها شجاعه منها .. فاجابنى بانها من اختارت الشجاعه مع شخص لا يملك سوى العنف فعليها ان تتحمل .. اليس حقها ان تثق فى من اخترته اب لاولادها حتى وإن كان فرض عليها رغماً عنها سواء من الاهل او من القهر ؟؟ أو ليس هذا البغل الذى يستخدم كلمة طلاق وكأنها سيف مسلط على رقبة الأنثى التى ترتضى أن تعيش فى ظل هذا الوضع أن يعلم ان الله لم يشرعها حتى كل من هب ودب يتشدق بها ؟؟ أليس هذا البغل وامثاله من يتسكعون فى الشوارع والطرقات لمعاكسة الغائدات والعائدات ؟؟ من يحتك بهن فى الاتوبيسات ؟؟ لم أجعل هذا الأمر يشغلنى كثيراً ولن أضيع وقتى فى مثل هذه الأمور التى تعج بها المئات من البيوت المصرية .. فمن ارتضت ان تعيش رهن لكلمة تستحق ان تسحق .... اكملنا نزهتنا وعدنا فى طريقنا .. إيه ده ؟؟ فين ؟؟ شايف محل لملابس السيدات اسمه سكس ناين سكس .. يمكن لانجرى .. لاء يا حبيبى ده ملابس .. باركن كدا فى اى مكان .. رفع حاجبيه علامة تعجبه على طلبى .. عايزة تنزلى تشترى منه ؟؟ لاء عايزة اصوره ؟؟ تصدقى بالله ما بضحك من قلبى ولا بحب الدنيا غير لما بتكونى معايا .. بس ليه دلوقتى الكلمتين الحلوين دول .. كل مواقفك يا حبيبتى تجنن .. ميرسى خالص مش عايزة اصور حاجه .. جاء الصبح سريعا سريعا وعدت أدراجى .. أشعر بزهق وقلق نفسى امبارح يرجع تانى .. قولت اطالع الاخبار ولسه بفتح المصرى اليوم .. وألاقى خير اللهم اجعله خير كدا العنوان ده
القبض على ٥٠ مراهقاً بتهمة التحرش فى وسط البلد أول أيام العيد
ضبطت أجهزة الأمن بالقاهرة ٥٠ حالة تحرش ومعاكسة أول أيام عيد الأضحى المبارك، فى حملة شنتها مباحث الأحداث، بإشراف اللواء فاروق لاشين، مدير الإدارة العامة لمباحث العاصمة، وأسفرت عن ضبط ٥٠ مراهقاً تحرشوا وعاكسوا الفتيات فى الميادين العامة وأمام دور السينما بوسط البلد، بينهم ١٥ من المنوفية والصعيد وكفر الشيخ
هو بقى موسم خلاص .. كل عيل صايع امه مش ربته ولا علمته الادب ينزل يتحرش لاء ده كمان فى وافدين يعنى منايفه على اللى كفروا الشيخ على صعايدة .. ههههههههه وليهم نفس .. طيب العيال المراهقين دى مش سمعوا عن اللى اتقبض عليهم فى جامعه الدول ولا سمعوا عن الولد اسلام اللى اتحكم عليه بسنة ؟؟ اسئلة كتير احاطتنى بعد ما قريت الخبر وشعورى كان اشبه بمن يسير داخل نفق مظلم فجميع الذكور يتعاملون في المجتمع بنظرية لا حياة لمن تنادى حتى بعد العقوبات التى نالها المتحرشون
طبعا اجهزة الأمن تستحق كل إحترام وتقدير لأنهم بدأوا بالفعل التصدى للظاهرة وبينزلوا دلوقتى فى اماكن التجمعات بس ياريت يكون طول السنة لأن التحرش أصبح عرض مستمر

Sunday, December 7, 2008

كل اما اكون فرحانه قوى

مشيت مشييييييت لاء مش على الاشواك وان شاء الله مش هيحصل ابداً .. مشيت فى طريق طويل حبتين تلاته كان عاجبنى قوى قولت اكمل الهاند فرى فى ودنى وبسمع فيروزتى حبيبتى .. فجأة لاقيت واحدة طالعة لى تقريباً شيطان متنكر .. تقترب وتقترب .. الله دى كمان بتكلمنى .. انا مش سامعه هى بتقول ايه الموبايل عالى عالى عاااالى .. شوية وقربت مشيت بالظبط جنبى ولسه بتتكلم .. قولت اشوف فى ايه .. لاقيتها بتسالنى الطريق فاضى وطويل .. ممكن امشى معاكى ؟؟ طبعاً لاء .. تعمدت ارد بسخافة لانى فى الحقيقة مش عايزة امشى غير مع نفسى
وضاع المود بتاعى ومعاه فرحتى اللى بالقوى
دخلت بيتى مارست طقوسى اليومية اللى احيانا بتكون مش عادية .. كان كل اللى فى ذهنى انى لازم انزل بدرى بكرة وقفة .. الوقفة يعنى هيندبح عندنا خروف ويوم العيد كمان خرووف اه رحمتك يارب انا لازم اهرب قبل ما اشوف منظر الدم ده ... صحيت من نومى متاخره كالعادة وكان الجزار خلص من مهمته وهى قطع رقبة الخروف .. كل سنة وانتى طيبة يا مامى ولو انى زعلانه .. اه انا عارفه طيب النهارده الوقفة ومش حد عنده دبح الا نادرا امال بكرة هتعملى ايه لما مصر كلها يكون فيها الدم للركب .. ااااه ربنا يصبرنى هسيب مصر كلها واروح سويسرا .. سؤال ذو مغزى من الست مامى .. واشمعنا وقع اختيارك على سويسرا ماكان من قريب لندن .. معلشى بقى التغيير مطلوب .. اصل زمان قالوا فى الامثال من لا يتجدد يتجمد .. ومع ذكر هذا المثل العظيم تقع عينى على رأس الخروف وتنقلب معها معدتى راساً على عقب حتى شعرت انها وصلت زورى من كتر الترجيع طيب الله ثراكم
وضاع مووودى وكمان فرحتى اللى مش كانت بالقوى
خرجت مع جينول ولقاء نزلنا القومية وفى مواجهة مدرسة اللغات ماسورة بنى ادمين وانفجرت .. شباب القومية بنات وولاد احلى من كدا ولا فى الاحلام .. قولنا نتمشى على الكورنيش اخدناها من عند الجامعه للمحافظة المشوار طويييل بس الوقت مفيش وكانها ثوانى وطااارت .. دخلنا البارون اكلنا الايس كريم .. خرجنا ونلاقى ايه ددده الناس تتدفق وتتدفق وتتدفق .. وانا فى حيرة من امرى اتسائل هو فى ايييه .. صوت ما اعرفوش جاى من ورانا اصل الليلة عيد
وبهذه المناسبة الميمونة احب اهنى الشعب المصرى والعربى والغربى حتى شعوب واق الواق واقولهم
بمناسبة شم النسيم نهنأكم بعيد الأم المبارك صوماً مقبولاً ونتمنى ان يتقبل الله حجكم سنة حلوة ونعيماً مقدماً وزواجاً سعيداً

Saturday, December 6, 2008

عبدالناصر كان اخوانجى !!!! مش مفاجأة

مع إنتهاء عصر المفاجآت وإنطفاء عيون الإندهاش .. لم استغرب ولم اتعجب حينما وقعت عيناى على هذا العنوان فى موقع العربية نت
عبدالناصر: "أشهد الله على تنفيذ مبادئه والجهاد في سبيلها"
شريط نادر يجمع نجيب وناصر والسادات على قبر حسن البنا

واصلت قراءة الخبر للوقوف على ماهية ما يقصدة العنوان تحديداً
لأجد هذا البرجراف
فيما تضمنت مجلة "التحرير" التي كانت تصدر في ذلك الوقت، وصفا تفصيليا لهذا اللقاء الذي استقبلت فيه أسرة حسن البنا، قادة الثورة الثلاثة، نجيب وعبد الناصر والسادات، وكلمة التأبين التي ألقاها عبد الناصر، والتي أقسم فيها على تنفيذ مبادئ مؤسس جماعة الإخوان والجهاد في سبيلها
وحينها تسألت ولماذا كانت إذن مسرحية المنشية ؟؟ أهى للهروب من الوعود والعهود بتنفيذ مبادئ مؤسس الجماعه المحظورة ؟؟؟
حينما طرحت سؤالى هذا على أحد اصدقائى اجابنى .. بأن عبدالناصر كان ينتمى بالفعل لجماعه الإخوان المسلمين ولكنه تخلى عن اهدافها .. واصلت قراءة المقال فقد تأكدت نظريتى لهذه الجماعة التى دائماً تمد يدها لمن تجد لديه المصلحة والوصول إلى تحقيق هدفها المنشود ..
ويقول د.عمار علي حسن مدير مركز أبحاث ودراسات الشرق الأوسط بالقاهرة والمتابع لتاريخ الحركات الإسلامية "الإخوان طوال تاريخهم الذي امتد لأكثر من 80 عاما تعاونوا مع كل من تولى الحكم في مصر بداية من الملك فاروق، وصولا إلى السادات، بما في ذلك جمال عبد الناصر قبل حادث المنشية، حتى السادات تعاون معهم في وقت مخاصمته لكل القوى الوطنية في مصر بسبب تحالفه مع إسرائيل، وما زالوا يمدون أيديهم للتعاون مع نظام مبارك، إلا أنه يرفض ذلك تماما".
اكثر من 80عام يحاولون الوصول للحكم ده من الواضح ان نفسهم طويل اوى مش مشكلة مع مين يتعاونوا مع رؤساء مصر مع الانجليز مع الامريكان المهم انهم يوصلوا للهدف المنشود مد ايديهم لعبادالناصر فى انقلاب يوليو .. وما ان تحقق هدفه حتى انقلب عليهم هو لأنه يعلم تماما ما تكنه أنفسهم .. وقام بدور الممثل البارع الذى لا يحتاج للوقوف على خشبة مسرح وقام بتمثيل مسرحية المنشية الهزلية .. ومن بعده الرئيس المؤمن اوى خالص انور السادات الذى انقلبوا ضده وارسلوا له بالاسلامبولى .. ومازالوا يمدون ايديهم لنظام مبارك الا انه يرفض تماماً .. وهل يلدغ المؤمن من الجحر مرتين ؟؟؟؟

Wednesday, December 3, 2008

من عجائب الاخبار

اول خبر السيدة الوزيرة عائشة عبدالهادى رجعت فى كلامها تانى وسمحت بسفر الاطباء للسعودية مرة اخرى للجلد .. سورى للعمل .. مش مهم الغاء الحظر ما احنا اتعودنا اننا بنلعب مع المسئولين بتوعنا .. شوية هنلعب وشوية تانية مش لاعبيين .. لكن تفسير السيدة الوزيرة لقرار حظر سفر الأطباء من الأساس ...كان كالآتى
وأوضحت الوزيرة أن قرارها السابق يحظر سفر الأطباء المصريين كان "تنظيمياً"، يهدف لتنظيم تدفق سفر العمالة المصرية للسعودية، دون أن تشير من قريب أو بعيد إلى وجود علاقة لقرارها السابق بأزمة الطبيبين المصريين، .
طيب ياترى لم تشير للطبيبين ليه ؟؟ يمكن نسيتهم ؟؟؟ طيب هو كدا خلاص يعنى يتجلدوا وينفذوا الحكم والموضوع ذهب طى النسيان ؟؟
الخبر التانى والمضحك حقاً
قاض سعودي يحكم بتطليق زوجة وصفت زوجها بـ"الحمار" في غيابه
طيب هى لو كانت قالت له يا حمار فى وشه كان مش هيطلقها ؟؟ يعنى المشكلة انها اغتابته ولا انها هزأته ؟؟
وكانت السيدة من سكان الاحساء في زيارة صديقتها، عندما اتصلت بزوجها هاتفيا للحضور وإعادتها إلى المنزل، إلا أنه تأخر لنحو نصف ساعة، فعاودت الاتصال به ليعتذر عن التأخير واعدا بسرعة الحضور.
وما إن انتهت من حديثها معه، وظنت أنه أغلق الخط، حتى بدأت تكيل السباب له أمام صديقتها، وتصفه بأنه ضعيف الشخصية ونعتته بوصف (الحمار) الذي تسيره كيفما تشاء. وما كان من الزوج الذي استمع لكامل الحوار إلا أن أغلق الخط، وأرسل إليها رسالة تفيد بعدم حضوره، وعليها الحضور إلى المحكمة صباح اليوم التالي لحسم طلاقها، حسبما نقلت صحيفة "عكاظ" السعودية، الثلاثاء 2-12-2008.وأقرت الزوجة بفعلتها أمام القاضي، لتسمع طلاقها بأذنها صادرا من قاضي محكمة الإحساء.

ده ايه الطلاق السريع ده ؟؟؟ لما هما حقانيين اوى كدا بيجلدوا اطبائنا عندهم وبيسجنوهم بدون عدل ليه ؟؟؟ الكفيل الاقطاعى اللى بياكل حقوق العاملين استشرى ظلمه وانتشر فى المجتمع السعودى ليه ؟؟ لو جينا للعكس وكان الزوج اللى شتم زوجته مش هقول مد ايده عليها .. ياترى لو كانت تجرأت وراحت للقاضى ده كان حقق طلبها بالسرعة العجيبة دى ؟؟ كان رد لها حقها وخلى زوجها يعتذر لها بلاش يطلقها وده اضعف الايمان ؟؟ ولا كان هيبقى مصيرها نفس مصير فتاة القطيف ؟؟؟
الخبر الثالث .. الطامة الكبرى
السجن 7 سنوات لأردني قتل ابنة أخيه المتزوجة "لتطهير شرف العائلة"
مش قتلها علشان سيئة السمعة ولا قتلها علشان حامل فى سفاح لا سمح الله وانما قتلها علشان شك هو وابوها انها كانت على علاقة بزوجها اللى اتجوزها .. قمة المهازل الحقيقة .. عيب قانون القبيلة بيقول التار ولا العار ازاى تتجوز واحد تعرفه قبل الجواز دى مصيبة لازم يقضوا عليها شرفهم يا ناس .. المفروض تبقى زى الجاموسة على عنيها غمى تتسحب من بيت ابوها لبيت زوجها حتى من غير ما تشوفه ولاتعرفه ... وآدى العادات القبلية واللى بيجى لنا منها منتهى التخلف والهمجية .. المثير للغثيان انه اتحكم عليه بـ 7 سنين ونص سجن .. يعنى واحدة اتقتلت علشان متجوزة والقاتل يتحكم عليه بـ 7 سنين يعنى مش مؤبد بلاش اعدام فى ميدان عام علشان يكون عبرة لكل متخلف بدوى يتمتع بالهمجية ازاى البنت تتجوز وجوزها يعاشرها معاشرة الازواج ياعيب الشوم .. كام لازم يعين من نفسه خصم وقاضى وجلاد

Monday, December 1, 2008

رمـــوز

إختلست من الوقت قليلاً جلست أقرأ الذين يملكون والذين لا يملكون للكاتب الأمريكى إرنست همنجواى
وكما انا اختلست من الوقت فقد اختلست منه ايضا ذاكرتى التى تركتنى مع الرواية وذهبت تبحر فى عالم سميرة موسى وهدى شعراوى وصفية زغلول وكاترين ميخائيل ... وجميلة بوحريد ... ومع تذكرى لجميلة بوحريد ذهبت سريعا الى جميلة اسماعيل ... والتى توقفت عندها لا أعلم لماذا .. رأيت فيها جميع الرائدات السابقات فى مخيلتى ... فهى تمثلت فى صورة صفية زغلول ام المصريين وهدى شعراوى بعزتها ورفعتها وسميرة موسى بعلمها وعقلها وكاترين ميخائيل بشموخها وبهائها وجميلة بوحريد بمبادئها ..
تمثلت امامى صورة جميلة اسماعيل المناضلة من اجل الكرامة والمبادئ
الوفية لزوجها الحافظة لعهدها
وجدتنى اغلق فصول روايتى واتسائل .. يوجد فى مصر كم جميلة تتسلح بمبادئها ووفائها
لم تبكى على سجن زوجها ولم تستدر عطف الشعب
عانت ووقفت وصمدت وتحدت الصعاب من اجل مبادئها ومبادئ زوجها
شتان بين المعارضة والمعارصة التى يتحلى بها من يطلقون على انفسهم معارضة شتان بين صاحبة المبادئ والرأى الحر وبين من يجيدون فن الرقص كالبهلونات على خشبات المسارح والتباكى أمام سلالم النقبات
فتحية إحترام وتقدير للجميلة .. جميلة

تحديــــــث
وبما ان البوست يتحدث عن الرموز فأفخر برمز رائع وهايل تشرف به عالم التدوين
الأديبة الجميلة هويدا صالح
والتى صدر لها مؤخرا رواية عشق البنات .. الصادرة عن دار الهلال