Desert Cat Search
قطه الصحراء: 9/1/08 - 10/1/08

Tuesday, September 30, 2008

اين تذهب هذا العيد ؟؟؟؟؟

انتهى شهر رمضان وبعد ساعات صلاة العيد .. انا شخصيا بحب احضرها جدا واقعد اصور فى الناس وهما يبصوا لى ويستغربوا بتصورنا ليه دى .. وناس تدينى ضهرها وناس تبصلى وتبتسم وكل سنة اقول انا هبقى استنى اخر واحده واخرج او اول ما الامام يخلص اخد الشوز فى ايدى واجرى على الشارع اول واحدة .. لكن فى كل مرة المحاولات تبوء بالفشل .. واخرج بين الجمع اللى بيدهوسونى تحت رجليهم وانا اصلا قصيرة يعنى كدا كدا رايحه فى الرجلين .. ما قولنا الصبر حلو بس هنجيب منين الاستاذ صابر يصبرنا ...

حاجات بتضايقنى فى العيد ..


الشباب اللى بيشدوا الرحال من الصبح ويقسموا نفسهم على النواصى وفى منتصف الطرقات وصفافيح الزباله .. علشان اى واحدة معدية اهو ان مش طال يمسك كم التيشرت يرمى كلمه زبالة زي البيئة اللى هو متربى فيها .. البنات ياخدوا بالهم كويس واللى تخرج .. تخرج مع اهلها او فى شنطتها مطوة علشان تضمن انها ترجع بيتها بسلام .. لم ولن يخرج من الاذهان تحرشات العيد وكل سنة وسعد ودينا طيبين

الحاجه التانية .. انى اكون ماشية والاقى حد بيفرقع صواريخ تحت رجلى باقف اتنطط وساعتها بتحول لدراكولا وبيبقى نفسى امسك اللى عمل كدا علشان اشرب من دمه .. لكن فى كل مرة بيعملها ويتبخر ... اخر مرة شهدت هذا الموقف البشع اول يوم فى رمضان واقفه باتكلم فى الموبايل عدى من قدامى ولدين اخرهم 10 سنين بالكتير ووقفوا يتكلموا شوية انا مش مركزة معاهم وبعدين دول اطفال مش فى نيتى اى سوء يعنى... بعد دقيقتين مشيو .. مفيش ثوانى والاقى صاروح مفرقع تحت رجلى رقعت بالصوت الحيانى اللى وقف يتفرج واللى قالى مين اللى عمل كدا .. وانا ايه عرفنى يا ضنايا ؟؟؟ اللى بيكلمنى طبعا اتخض قولت له الحرب العالمية التالتة قامت تحت رجلى قعد يضحك قفلت السكه فى وشه ..

من شوية سمعت اغنية اهلا بالعيد لسيدة الشاشه البرونزية صفاء ابو السعود ... حسيت الحقيقة انى رجعت طفلة من تانى مش عارفه ليه دايما عندى احساس انى مش بكبر خالص .. مع انى بلغت من العمر ارذله ... فضلت اقول معاها اهلا اهلا بالعيد مرحب مرحب بالعيد .. ولسه واخده بالى النهارده بس بعد العمر ده كله انها بتقول سعدنا بيها بيخليها ذكرى جميله لبعد العيد .. انا طول عمرى بقولها سعد نبيهه .. واقعد طول السنة افكر مين سعد نبيهه ده يا جدعان اللى دائما يخلينا نتذكر فرحة العيد .. يا بخته الحاجه صفاء بتغنى له كل سنة

الكحك يا جماعه اعملوا حساب ان المعدة لسه ما اخدتش على الاكل الكتير .. وانها اتنظمت لمدة 30 يوم على وجبه وليها وقت معين .. يعنى الحذر ثم الحذر ثم الحذر وإلا بدال ما نسمع عن شهداء طوابير العيش هنسمع عن شهداء طوابير التواليت


وكل سنة والجميع بالف خير
عيد سعيد

Sunday, September 28, 2008

حـنيـــن

حنين .. أغنية لوردة الجزائرية من فيلم آه يا ليل يا زمن
الاغنية دى انا بسمعها كتير اوى .. لكن النهارده بالذات حساها باحساس غريب جدا ومختلف جدا جدا
وفى كل مرة اسمعها احس بحنين غريب اوى لحاجات قديمة وحاجات مش فات عليها كتير وحاجات كمان مازالت موجودة
ناس عرفتها وناس فارقتها واماكن زرتها والنصيب الأكبر طبعا لناس دخلت قلبى ومخرجتش منه
بس اللى واجعنى اكتر ومخلينى متاثرة بيها بلدنا اللى بتضيع مننا .. مصر اللى كانت قبلة العالم
مصر اللى كانت منارة ... مصر اللى قضى عليها الطاغيه بكل جبروت
قلبى وجعنى اوى وانا بسمع كلماتها اللى بتقول فيها يا اعز واغلى حب .. لفيت فى الدنيا بعدك مالقيتش فيها قلب يا كل ما بتمنى الجنة نار فى بعدك والنار فى قربك جنة .. انا منك وانت منى توهنى البعد عنك انا من غيرك ابقى مين
وردة كانت بتغنيها لحبيبها لكن انا بسمعها وانا بشوف قدامى كل شبر مشيت فيه فى بلدى ... كل مكان زرته وترك اثر عندى .. مش كنت اعرف انى بحبها اوى كدا .. مش كنت اتخيل انى ممكن اتوجع علشانها اوى لما تتأذى ويضيع تاريخها بالشكل ده
كمان افتكرت كلمات كنت كتبتها زمان فى منتدى هريدى
عصفور يلهو فى قصره حيث القصر بلا جدران
كان يغنى فى عشق أنشودة حب للأغصان
يفرح حين يرقص حبنا
ويسافر فى كل الأحيان
وتهب من الغيب رياح تفاجئ هذا العصفور
وينكسر القلب المذعور
وتهاجر كل الأطيار
رغم اليأس ورغم القهر لم ينسى العزف على الأوتار
يارب مصر تفضل صامدة زى العصفور كدا ومش تنكسر ابداً
يارب حررها كفاية عليها المؤبد اللى عاشت فيه الفترة الزمنية دى كلها
كفاية تحطيم وكسر أقلام بتنطق فى كل وقت بحبها
كفاية تكميم أفواه .. مهما اتحبس فينا شرفاء مش هنبطل نقول بنحبها
يارب إبراهيم عيسى يطلع من أزمته بخير يارب
ده لنك الاغنية اسمعوها واعتذر مقدما للى يحس انه اتوجع
http://www.mawaly.com/file/play/25579.html

Saturday, September 27, 2008

مصر المحروقة

حريق بالمسرح القومى بالعتبه
شب الحريق قبل المغرب مباشرة وأسفر عن ؟؟؟؟ لاء مش قتل حد انما دمر القاعه الرئيسية بالمسرح والقبة تماما
والظريف ان بعد الحريقه مباشرة فاروق حسنى يقولك السبب ماس كهربائى .. يعنى من غير لجان فنية ولا خبراء ولا اى حد يحدد سبب الماس حدده سيادة الوزير الفنان وهو قاعد فى مكتبه وبيشرب السيجار
هو الحاج ماس ماله ماشى فى البلد كدا بالترتيب ومختار الاماكن الاثرية ليه .. مش ياخد بعضه ويتمشى ناحيه القبة يمكن يغلط ويدخل المكان إياه .. ولا ده متحصن .. قاريين عليه عدية ياسين .. يعنى ايه مجلس الشورى يتحرق وبعده بشهر مسرح جورج ابيض
يعنى ايه اثارنا تدمر بالتدريج
يعنى ايه البطل فى كل مرة من اول حريق الاوبرا مرورا بحريق المسافر خانة وصولا لحريق المسرح القومى البطل هو الماس الكهربائى
ده ايه المجرم العتيد اللى مش حد قادر يسيطر عليه من سنة 71 ده
الناس بتتعلم من اخطائها واحنا سايبين الاخطاء تولع فينا واحدة واحدة وبالتدريج
من 71 لـ 2008 الجانى واحد واحنا قاعدين نتفرج .. مش مهم والنبى مشوها ماس كهربائى
بيدمر فى اثارنا وبيولع فى البلد بالتدريج .. ما تخلصنا بقى يا حج ماس وتقضى على مصر المحروقه
تحديث تالت
رساله من احمد عبدالفتاح على الجايكو
الحريقة خلصت تم اخماده
الحريقة شغاله من 5.30 وتم اخمادها الساعه 10.30 .. حريقه عبور المسرح القومى
يا ظالمه امال لو مش كان المطافى جنبها كنتوا طفيتوها فى كام ساعه ؟؟
خط بارليف اتحطم وتم العبور فى 6 ساعات والمسرح القومى اللى جنبه المطافى يتطفى فى 5 ساعات امال لو فى الهرم كنتوا عبرتوا فى اد ايه فى 48 ساعه ؟؟؟؟؟
بالمناسبة الماس الكهربائى عامل جايزة ذهبية للى يعرف الشهر الجاى الحريقه هتكون فين ؟؟؟؟
تحديث تانى
من عزة مغازى
الامن ابتدي مصادرة الموبايلات و الكاميرات و اقتياد اصحابها للبوكسات
تحديث
رساله من عزة مغازى .. هى دلوقتى موجودة فى مكان الحدث
عاجل: الحريق يعاود الاشتعال الان في مخزن الديكور



Wednesday, September 24, 2008

سمك + لبن + تمر هندى = فتوى

من رضاع الكبير للتبرك بشرب البول .. إلى قتل ميكى ماوس
تلك الفتوى التى طالعنا بيها الشيخ العلامة محمد المنجد
الذى اثار ضحك الجميع حتى الاطفال الذى يطالب الشيخ باعدام صديقهم الودود
لأنه من فئة الفئران ويحل قتله في الحل والحرم، وأوضح الداعية المعروف أن الفئران من جنود إبليس ويسيرها الشيطان، مشيرا إلى أن الإسلام سمى الفأر "فويسقة" ويجوز قتل الفئران في أي وقت لأنها نجسة وهي كائنات ممقوتة .
هو الشيخ العالم العلامة ده مش حد قاله ان ميكى ماوس شخصية كرتونية طيب وماذا يا شيخنا عن عالم سمسم .. وماذاعن تيمور وبمبه ثم يستكمل الشيخ هرائاته
إن الرسوم المتحركة التي يتابعها الأطفال غيرت نظرة الأطفال للفأر حيث أصبح الفأر من الأشياء المهمة العظيمة، ومن الشخصيات المحبوبة لدى الأطفال، رغم أن الشريعة ترفضها فهي كائنات ممقوتة ومفسدة، واختتم بأن الفأر "ميكي ماوس" شخصية عظيمة لدى الأطفال رغم أنه يقتل في الحل والحرم.
هو مش المفروض يستضيفوا فى البرامج الناس اللى بتعرف تعمل على لسانها كنترول .. ولا هما بيجيبوهم على الفضائيات لاثارة الضحك وايضا اثارة البلبه ... من فتاوى تفسير الاحلام لفتاوى قتل ميكى ماوس لفتاوى قتل اصحاب الفضائيات التى تثير الغرائز على اساس ان اللى قاعدين يتفرجوا على التلفزيون كل واحد قاعد مستعد للاثاره اصلهم حيوانات ولا مرضى نفسيين .. طيب وياترى اصحاب الفضائيات اللى بتستضيف امثالكو من اهل تأليف الفتاوى لإثارة الانتباه والتى هى فى حد ذاتها دعوة للتحريف فى كلام الله والتشكيك فى الدين حكمهم ايه .. غياب الرقابة على القنوات الفضائية سمحت لمرضى الشهره بعمل ميكس بايخ مكرر يومى من السمك + البن + التمر هندى لينتج فى النهاية فتوى مثيرة للضحك من اصحاب العمم الذين يلصقون كل كلامهم بالاسلام ليصبح الاسلام اضحوكة من لا يعرفونه .. يا أمة ضحكت من جهلها الأمم
القرضاوي يكشف: اجتماعات التنظيم الدولي للإخوان كانت تتم في «مكة» تحت غطاء العمرة
وبجملة الهراءات العودة لموضوع زغلول النجار الحقيقة كومنت عجبنى اوى جه فى البوست يستحق يتفرد له بوست لوحده

مفكر يحترم عقله ويقدم الضربه القاضيه لخرافة الأعجاز العلمى said...
الضربه القاضيه لخرافة الأعجاز العلمى يجب الا نترك الموضوع هكذا بعد كل هذه المناقشات والا اصبحنا كمن يصرخ فى الصحراء فيضيع صوته مع الهواء ولا نحقق ولا خطوه واحده الى الأمام.. بينا ان طريقة الأكتشاف العلمى باثر رجعى اى البحث فى النصوص عما يكتشفه الآخرون بلوى المعانى واعتصار الكلمات وليس قبل ان تكتشف المكتشفات هو نوع من البهلوانيه او الفهلوه التى لا ضابط لها ولا رابط فبطريقة خفة اليد يمكن استخراج اى شىء نريده وهذا ليس من العلم فى شىء فهذا يستخرج 11-9-2001 من النصوص بجمع وطرح وضرب وقسمه ويرينا كيف تنبات النصوص بل وحددت وقت الجريمة الشنعاء فى حق الأسلام والأنسانيه بتحطيم طائرات بمن عليها من ابرياء ببرجى التجاره بكل من يعملون فيها ليعيشوا اذا كيف نحكم على حقيقة هؤلاء الدجالين؟ بالطريقه العلميه الصحيحه... العلم يسال اسئله يريد ان يجد لها اجابات... والسؤال الكبير اليوم فى الفيزياء مثلا هو عن سر قوة الجاذبيه ... فاذا وجد هؤلاء الدجالون اى شىء يفيد فى كشف هذا السر فى النصوص ساكون اول من يعلن خطا كل كلامى واعترف بعبقريتهم... الجاذبيه دوخت العلماء حتى اينشتاين نفسه... وما قاله فى نظريته لا ينطبق على كل حاله... لا ينطبق على ما يحدث داخل الذره مثلا ... فهل لدى جهابذة الأعجاز اى شىء يلقى ضوءا على هذا اللغز فى النصوص؟ وقبل ان يكتشف احد سر اللغز وليس بعده؟

Tuesday, September 23, 2008

كنت فاكراه شغل سينما

كالعادة كل رمضان العيلة كلها بتتجمع فى بيت جدو يوم يكون مناسب للجميع لأن اليوم ده مش ينفع فيه استثناءات لا من صغير ولا كبير وبما اننا عيلة واحده يعنى تلاقى عمك هو نفسه جوز خالتك وهكذا عملية التزاوج والنسل مننا فى بعض .. مش دى قضيتنا المهم جه يوم الفطار العائلى وكلنا اتجمعنا وكعادتى فى اى حاجه بوصل اخر واحده على الاكل علشان اكل بس .. خلصنا الفطار وقمنا انا وبنات العيلة نشرب الشاى فى الفراندة ونرغى وننم وكل اللى عندها حكاية شيلاها لليوم ده تحكيها .. شوية وسمعنا دوشة وهيصة كتير خير فى ايه بيحصل بره طبعا قدامنا جونينة مش شايفين حاجه من الشجر .. يبقى اللى هجيب لنا الخبر اليقين عمو إسماعيل حارس المنزل .. تبرعت جينول ابنة خالى وقامت نادت عليه .. دخل علينا بضحكة من الودن للودن والله يا بنات انتوا منورين وياريت طول السنة رمضان علشان تنورنا بدل ما انا قاعد اكلم نفسى طول السنة .. رديت عليه انا المرة دى اه ما هو احنا هنسيب بيوتنا واشغالنا ونيجى نقعد هنا علشان نونسك .. قالى العفو مش قصدى .. وهنا بادرت غدير بسؤالها واللى هو كان خروج بعيد عن كلامى السخيف باين ... فى ايه بره ؟؟؟؟

قالها ده اللى بره ده حكاية من الف ليلة وليلة اصل بنت الحاج ( ..... ) هتتجوز ابن عمها
أنا : طيب وايه يعنى وبعدين عربيات البوكس دى ليه هو ابن عمها ده قريب وزير الداخلية ولا حاجه قال لاء اصل البنت كانت هربانة ولسه راجعه وخايفين عليها من ابوها او اخوها يعملوا فيها حاجه .... كلنا فى صوت واحد نعمممممممم
اقعد ياعم سيماعين احكى ... وقعدناه وقال الآتى والعهده على الراوى اللى هو عمو سيماعين
الولد والبنت بيحبوا بعض وهو سافر من سنتين البلد الى بيهربوا فيها الفلوس دى ... فلوس مين اللى بيهربوها ياعم سيماعين .. اللى فيها البنوك اللى الكبار بيحطوا فيها الفلوس .. اها قصدك سويسرا .. قال ايووا هى دى .. وبما ان الاتنين ولاد عم فالولد اخد ابوه وراحوا يتقدموا لها ابوها راجل تاجر وعايز يجوزها ابن تاجر صاحبه والمواضيع مصالح داخله فى بعضها .. طيب ماهو لو الموضوع فلوس اهو ابن عمها جاى من سويسرا اللى البلد كلها بتهرب فيها الفلوس يعنى معاه اد كدا .. قال لاء هو الموضوع مش فلوس ابوها يابنات اصلا تاجر كبير ومعروف اوى يعنى مش ناقصه فلوس .. هى مشاكل بينه وبين اخوه ومش عايز يبقى فى نسب بينهم حاجه زى كدا والله اعلم بالسبب الحقيقى ... قوم البنت عرفت الليلة دى اخدت بعضها وهربت يومين والدنيا اتقلبت وابوها خاف يبلغ عشان الفضايح و سمعته وقعد يهدد اخوه ويقوله هخطف ابنك واحرق قلبك عليه زى ما حرقت قلبى على بنتى ومهما تعملوا عمرها ما هتكون ليه ... البنت كل ده مستخبية فى بيت بنت عمها اللى هى اخت الولد بس الجميع انكر معرفته هى فين .. وراح لها عمها علشان ترجع لانه خايف على ابنه وكاننا فى ذئاب الجبل الحقيقة ... البنت رفضت ومش رضيت ترجع من هنا لهناك مش لقيوا حل غير ان البنت ترجع ويتكتب كتابها على ابن عمها ويتحط السيد الوالد قدام الامر الواقع وقد كان عملوا كدا بالفعل وبعدها مباشرة راحوا قسم الشرطة علشان ياخدوا على ابوها واخوها اللى عايزين يقتلوها تعهد بعدم التعرض ابوها واخوها وهما هناك قالوا لاء مش ينفع يبقى حاطين راسنا فى الرمل كدا احنا نعمل اشهار فى المسجد بعد صلاة العشا يوم الخميس وده كان اليوم اللى احنا متجمعين فيه الكل كليله ... طبعا عملوا الاشهار تحت حراسة الشرطة والبنت راحت تعيش فى بيت بنت عمها مرة تانيه وابن عمها ايام وراجع سويسرا وهى هتروح تعيش معاه هناك ..
انا قاعده بسمع الحكاية وكانى بتفرج على فيلم لسعاد حسنى وحسن يوسف وكل شوية اقول هو لسه فى كدا ؟؟؟
معقول لسه فى ناس بتحب كدا وعندها الجرأة لكدا ؟؟؟
انا كنت فاكره ان ده مش بيحصل غير فى التلفزيون بس وفى افلام الابيض واسود كمان
انا الحقيقة مش مغلطة البنت
ومش مغلطة عمها فى حاجه
انا مغلطة ابوها اللى مفضل مصلحته الخاصة على المشاعر الانسانية لبنته
قلب البنى ادم مش بالريموت اضغط على الزر يحب ويكره
انا لما قولت راى ده ناس قالت اه صح وناس تانية قالت لاء دى كدا البنت مش متربية ازاى تهرب وتعمل كدا فى اهلها
طيب معلشى ماهو اهلها اللى اضطروها لكدا .. تناسوا ادميتها واتعاملوا معاها على انها قطعه اثاث هيحركوها فى المكان اللى يحبوه
دى كيان كامل متكامل ومن حقها تختار حياتها بنفسها وتقرر هتقدر تعيش مع مين وترفض مين ولا انتوا ايه رايكو ؟؟؟؟

Sunday, September 21, 2008

من دولة الفيسبوك لوسط البلد... نحييكم

بداية وقبل اى حاجه بشكر جدا كل المدونين الاعزاء اللى وقفوا جنبى وضد الشخص اللى انا مش مسمحاه لحد اخر يوم فى حياتى اللى انتحل شخصيتى واخد صورة بورفايلى واسم مدونتى وداير يشوه فى صورتى قدام الناس .. الصحاب اللى بجد بيبانوا فى الازمات وانا عندى اصحاب واخوات حتى المختلفين معايا برضه كانوا جنبى فى الموقف الغبى ده وبقوله موت بغيظك وعلى قلبك حجر مش حد هيصدقك لاننا اخواااات مهما حصل بينا اسمنا اخوات ومش ممكن نتخلى عن بعض ابدا.. الجميع عارف شخصيتى كويس ... ميرسى ليكو كلكوا وربنا ما يحرمنيش منكو ابداً
***************************
نخش فى الموضوع على طول وبدون اى مقدمات بعد انتهائنا من كتاب دولة الفيسبوك وهو الان فى مطابع دار الشروق بيستعد ويتزوق ليتم طرحه فى الاسواق مع اول ايام عيد الفطر المبارك ... احب اقول لكوا العيد هيكون بالنسبة لنا 3 اعياد
عيد الفطر وطرح كتاب دولة الفيسبوك وصدور اول عدد من مجلتنا الالكترونية وسط البلد
شهر اكتوبر السنة دى علينا خير وبداياته مبشرة وموفقه
وللمرة التانية نشترك انا والجميلة بسمة عبدالباسط فى عمل واحد
منتظرينكو اول اكتوبر نحتفل بالعيد وصدور الكتاب والعدد الاول من مجلتنا وسط البلد
مودتى واحترامى للجميع

Saturday, September 20, 2008

مش انا والله

يا جماعه احذروا فى واحد عنده عته فى عقله عامل اكونت باسمى وبنفس صورة البروفايل بتاعى
وبيدخل يشتم فى الناس
والله العظيم ما انا الشخص ده
خدوا بالكو
desert cat
انا عامله بين ديزرت وكات مسافة واحده بس
هو عاملها مسافتين
كمان انا اسم المدونة موجود تحت قطة الصحراء بالعربى
هو عامل بروفايل بس بدون اسم مدونة
اى حد والنبى يدخل عنده هذا الكائن المتخلف عقليا يبقى يتاكد
والله العظيم ما انا اللى بشتم الناس فى مدوناتها
انا طبيعى بدخل مدونة عجبنى اللى فيها برد مش عجبنى باخد بعضى ونمشى تانى انا وبعضى ومش برد انا مالى كل واحد حر فى مدونته يكتب اللى يعجبه حتى لو قال آمان يا ليل
انا بقول الكلام ده ليه
علشان آآكد ان البتاع اللى بيشتم ده مش انا خااااااااالص
وابقوا اتاكدوا والنبى من البروفايل
ميرسى جدا لمحمود رئيس جمهورية نفسى
علشان هو اللى لفت نظرى وانا قاعده مضيعه وقتى كله فى الفيسبوك واسمى بيلف فى المدونات يشتم كدا بقدرة قادر
التحديث ده
رد مواطن مصرى نايم
ياريت تاخدوا بالكو
عمل حاجة جديده يا قطه دلوقتىبقى بياخد اللينك بتاع البروفايل بتاعكو يكتب اسم ديزرت كاتمع اللينكعشان اللى يضغط على الاسميدخل البروفايل بتاعك حتلاقيه عامل كده عند مايكلhttp://strugglingmichealitoo.blogspot.com/خلى بالك كمان و اعملى تنويه بكدا

ربنا ينتقم من اللى بيعمل كدا
منك لله يا بعيد

Thursday, September 18, 2008

بـــدولتنا قادمـــون


لاء ده مش مسلسل جديد ولا بوستر لفيلم الموسم
انما ده حلم مجموعة من الشباب صاحب الفكر الراقى والواعى .. بدأ بفكرة الصديق العزيز ( محمد البسيونى ) وبتعاونا جميعا يصدر العدد الاول من كتاب دولة الفيسبوك ... والذى سيصدر من أكبر دار نشر .. دار الشروق
.. والذى يضم مجموعة من الجروبات التى لها هدف وتعبر عن رأى
ويزيدنى فخراً بأن جروب اتكلم واسمع والذى أنشأته خصيصاً لحرية الرأى والتعبير من ضمن الجروبات التى يضمها كتاب دولة الفيسبوك
بل ومن دواعى سرورى اكثر انه يضم جروب أنا والنت للإذاعى الكبير الاستاذ / صلاح حجازى وصديقتى الرائعة بسمة عبدالباسط
أنتظرونا موعدنا بعد عيد الفطر مباشرة ... حلم شباب بيتحقق وفكرة انسان واعى يتم تتويجها
موعدنا مع العدد الاول خلال ايام العيد
تحياتى للجميع

Monday, September 15, 2008

إهانة الإسلام لا تأتي دائماً من خارج أتباعه

إهانة الإسلام لا تأتي دائماً من خارج أتباعه. المصيبة الأكبر حينما تأتي إهانة الإسلام من كبار الكُتاب في واحدة من أوسع الصحف الورقية إنتشاراً. تزاداد المصيبة ضخامة واتساعاً، حين يصمت بقية الكُتاب المثقفين، أو مَن بيدهم أمر السلطة الأدبية من أصحاب الفكر والثقافة والرأي أينما وجدوا. في رمضان منذ خمسة أعوام مضت ـ 11 نوفبر 2003 ـ نشرت جريدة الأهرام المصرية مقالة صغيرة في باب ثقافة دينية للدكتور زغلول النجار قال فيها "إذا وقع الذباب في شراب أحدكم فليغمسه ثم لينزعه فإن في إحدى جناحيه داء وفي الأخرى شفاء". وقال الدكتور زغلول النجار: إن مجموعات من العلماء درسوا وتحققوا من صحة هذه النظرية المعملية الفذة، والتي بمقتضاها يطلب من كافة علماء الأمة أن يعيدوا حساباتهم العلمية والمعملية حتى يستخرجوا لنا ما لذ وطاب من تقدم علمي مخفي.ضخامة المصيبة، أن بعدها أصبح للدكتور زغلول النجار مساحة كبيرة وثابتة في جريدة الأهرام المصرية. استمر يشرح فيها الجوانب العلمية ويربط العلم بالدين ويصدر الفتاوى الدينية. ولكي يزداد شهرة كان يدعم ما يقوله ببعض الهجوم على الإنجيل والتوراة. فهل هكذا تكون صنعة الطبيخ "العلمديني" تحتاج إلى "بهارات" و"مشهيات"؟ وفي مثل هذه الأيام من شهر سبتمبر وفي يوم الحادي عشر منه تمر علينا أيضاً ذكرى أكبر إهانة وهي عملية تدمير برجي التجارة العالمي في نيويورك. ذكرى 11 سبتمبر2001. وكم كانت الإهانة كبيرة حين قام رافعي شعار: "الإسلام هو الحل" بالتهليل والتكبير فرحاً بالخراب والدمار من أكبر كارثة دمار صنعها الإرهاب المنتمي إلى تيارات دينية إسلامية. ثم أيضاً، آه على مقدار الإهانة التي لحقت بعالمنا وعلمائنا وعلومنا التي ندرسها لطلابنا في جامعاتنا. فقبل رمضان الحالي ببضعة أيام يخرج علينا نقيب أطباء مصر المحروسة بفتوي "طبدينية" مفادها: لا لتبادل الأعضاء بين المسيحيين والمسلمين. تحول نقيب الأطباء إلى مفتي ديني في سابقة علمية طبية فتوية يمكن أن نطلق عليها: "الفتوى الطبدينية". ولا تعليق أمام التخلف الطبي والمهني الذي نحياه ونتنفسه في الأخبار اليومية. ولا يكاد يمر الأسبوع الأول من رمضان الحالي الكريم أيضاً، إلا ويخرج علينا كعادته أيضا زغلول النجار بمجموعة أخرى من الفتاوى "الطبدينية" التي يُفحم ويُدضحت بها أعداء التفكير العلمي رافعاً صوت منهجه الترابطي العلمديني في جريدة المصري اليوم 5/9/2008.يا سادة، يا كرام، حتى متى نستمر في إهانة العلم وإهانة الدين بالترابط والتربيط بين الإثنين؟ والنتيجة الظاهرة للعيان والعميان: أن تخلفنا في العلم، وتدهورنا في الأخلاق، ولم نتقدم حتى في المظاهر الدينية. فمع انتشار الحجاب والنقاب واللحى وامساك المسابح زادت جرائم الشرف. ومع ازدياد الوضوء والصلاة زادت الأمراض والأوبئة. أعزائي القراء، فتحت هذا الموضوع ولا أعرف كيف أغلقه، احتاج آرائكم الكريمة!!!! لكن عزائي في مصابنا الأليم ما قاله المحترم الدكتور خالد منتصر في كتابه وهم الإعجاز العلمي ـ صفحة 164 ـ رداً على مثل هذه الخرافات: "صدقوني أكبر ضرر على الإسلام أن يروج لمثل هذا الكلام.... والغرب لم يتقدم إلا بقراءة الواقع أولاً وليس بلوي عنق الواقع حتى يستجيب للنص، هم تقدموا لأنهم إستخدموا المنهج العلمي في التفكير وليس المنهج التخريفي في التفسير..". ويضيف قائلاً : "حرام عليكم تغييب وإهانة للعقل فقطار التقدم والحضارة ترك محطتنا منذ زمن طويل". يا سادة، حتى لا نُتهم بإهانة الإنسانية وحتى لا نزدري العقل والعلم والعمل، لقد تمادينا في مظاهر العبادة والتدين فقط. علينا بالدفاع عن العقل والعمل والعلم واحترام حق الإنسان في أن يكون إنسان وليس مجرد رقم في قطيع.

مقال للأستاذ أيمن نخلة .. عجبنى اوى محتواها
http://www.elaph.com/Web/AsdaElaph/2008/9/364354.htm

Saturday, September 13, 2008

اقتحـــام ذاتــــى

اشد واصعب واقسى من الاستعمار .. انه ليس عدو ومن غير الممكن اعلان الحرب وطردها خارجك هى لحظة الاقتحام الذاتى من اقسى اللحظات على النفس البشرية ..

وجدتنى اهرع الى عزل نفسى داخل تلك الجدران الأربع المظلمة .. اخشى الضوء . اخشى مجرد شعاع نور .. لا اريد جليس ولا اريد سماع صوت لأحد .. جلست وونيستى عزلتى متخذه وضع القرفصاء .. لتعود بى ذاكرتى الى الوراء وجدتها تؤنبنى تارة وتبهجنى تارة وتسلخنى تارااات .. ارفع راسى فى تؤده لأجدنى اخشى مواجهة عينى بالمرآة التى لم أرها فى هذا الظلام الدامس ولكنى استشعرتها لعلاقتى القوية بتلك الاركان .. دفعتنى قوة عليا للخروج من هذه الدائرة الكئيبة خرجت الى بلكونة غرفتى لاجلس بين ظلام الكون الفسيح .. جلست اتأمل المنازل العالية بنوافذها المغلقه .. وابوابها التى خلفها الآلاف من الحكايات وكأننى اردت الهروب من عالمى الى عالم الجيران الذى لم اهتم لأمرهم ولم أعبأ بأحدهم يوما .. على الجانب الآخر أنظر لأجد الكون الفسيح وهنا اجدنى تتردد على مسامعى اقوال أحدهم والذى دائما يلفت انتباهى لافعال ربما تكون غير محسوبة تنقلب احيانا للتأنيب بادب ولا اعلم ما الذى جعله يخطر ببالى فى تلك اللحظة .. يعنى هى ناقصاه هو كمان ... هربت منها بطريقتى ولكن ما لبثت ثانية ان عاودتنى مع لحظة اتخاذ قرارى المصيرى .. والذى معه اعلنت دقات الوقت انه قد آن الأوان .. لحظات هى بعدها شعرت وكأنى مكبلة بقيود لم اقوى على تحملها .. هممت ان اهاتفه ولكنه سبقنى .. فى نفس اللحظة التى فكرت فيها بدأ بالاعتذار على الازعاج لأن الوقت يعنى .. وكانت اجابتى ده العادى .. يعنى مالوش لزوم الاعتذار .. كنتى بتعملى ايه ؟؟ اللى انت عايزه .. ازاى ؟؟ بحاول اوصل لقرار .. ووصلتى ؟؟ .. تقريبا .. طيب ايه ؟؟ تسود لحظات صمت ثم يغلق كلانا هاتفه .. لأدخل فى الغرق مع افكارى داخل دوامة تتقاذفنى خلالها الامواج .. وكأنها اصابتنى بحاله فقدان مؤقت للذاكرة وللشعور معا.. فقط اتعامل كفرد بدون وعى فاقدة لجميع مراكز الاحساس .. كم من الوقت مر .. ربما يوم يومان ثلاثة لم اكن ادرى بالوقت ولا احسبه.. ومثلما فقدت الذاكرة وسط دوامة الافكار .. فكما قال ابو نواس وداونى بالتى كانت هى الداء .. عادت ايضا ذاكرتى بنفس الطريقة بين الأمواج التى تتقاذفنى .. لملمت بقايا منى وسمعتنى اهمس ما الذى يحدث .. فاجابتنى ذاتى انها مخلفات الاقتحام فلا تعبأى ..

Thursday, September 11, 2008

اخبار تثير القئ العمد

هما فى الحقيقة خبران وليس خبر واحد
الاول ان السيد المحترم عضو مجلس الشعب احمد فتحى سرور هيعمل اجتماع يحاكم فيه معاليه اعضاء البرلمان ويختص بالمحاكمة عبدالعظيم وزير محافظ القاهره والسيد المحترم وزير الاسكان والسيد المحترم وزير التمية المحلية .. يعنى الحكومة هتحاكم الحكومة واحلى سلام وتحية لكل الناس الموجودة فى قلب المنطقة ديا .. يعنى لما هشام طلعت ابن الحكومة البار .. سورى ابن الاسكندرية البار يتحبس فى سجن 7 نجوم ويطلب مكتب يجى له وجهاز كمبيوتر واتنين محمول وسكرتيره الخاص كل يوم يزوره من الساعه 10صباحا للفطار لمتابعه اعماله من داخل السجن .. وكأن سيادته محبوس فى الفورسيزون مش فى برج العرب ... يبقى لما السيد المبجل رئيس مجلس الشعب يحاكم السادة الوزراء .. مش بعيد سيادته يلومهم ازاى الصخور مش وقعت على كل سكان الدويقة ومنشية ناصر واهى كانت ابادة جماعية للمنطقة كلها وخلصنا ...

نيجى بقى لعجب العجاب والمثير للاشمئزاز والقئ العمد والغثيان
ان السيد الاستاذ المبجل رئيس هيئة قناة السويس تبرع بمليون جنية لضحايا الدويقة .. واخدين بالكو تبرررررررع
تبرع من جيب السيد الوالد يعنى ... هى مش قناة السويس دى برضه هيئة حكومية ؟؟؟
وهما موظفين الحكومة من اول السيد الرئيس لحد الساعى فى اى مصلحة حكومية بيشتغلوا فى خدمة الشعب اللى المفروض انهم قائمين لحمايته والحفاظ على مصلحته وحفظ حقوقه ؟؟؟
ده المفروض وخير دليل عندنا من الحفاظ على الحقوق والمصالح الدويقة اقرب كارثة مش هفكروا باللى قبلها لانهم مش اتنسوا
يقوم السيد المحترم بكل فخر يقول انه تبرع لمنكوبى الدويقة بمليون دولار .. لما حكومتنا تتبرع لنا امال الدول التانية تقول ايه بنشحتكو يا كلاب
طيب هيئة قناة السويس والاستاذ الفاضل فاضل تبرع ذكاة عن صحته وصحة اولاده والسيد الرئيس
فين بقى باقى التبرعات من البترول للسياحة للزراعة للاستثمار والتنمية
ياريت كل الهيئات والوزارات فى مصر تتبرع للاجئين اللى قاعدين فى عزبتهم ده احنا حتى فى رمضان

البانر من عند نوارة

Sunday, September 7, 2008

اسقاطات

من المعروف للجميع ان الاسقاط هو نوع من انواع الاضطراب النفسى ومن السهل ملاحظته فى خلال معاملتنا مع الشخص
فالاسقاط هو حيله دفاعية يستخدمها المضطرب نفسيا لينسب عيوبه وكبته للأخرين حتى يبعد الانظار عنه
فاحيانا تقابل من يدعى الوطنية وحبه الجم وانتمائه لوطنه وعند اول اختبار حقيقى تجده ذهب مع الريح لتفاجا به ينسب فشله وهروبه الى اخر .. هو اللى هرب مش انا .. اصله تقريبا افتكر ان وراه مشوار مهم فى الوقت ده .. لكن المجهول هو اللى هرب
وهناك من لم يكف لسانه عن ذكر الله وذكر رسوله ... وتجده فى المعاملة لا يتقى الله ولا رسوله وحينما تحدثه بان الدين المعاملة يكون رده الفورى كما من الاتهامات لم توجد بك انت ولكن ما به يلصقه بك حتى يشعر براحة ..
وهناك من ليس لديه اصل ولا يعلم من هو وتجده يخترع حكايات ومؤلفات عن عائلته الوهمية التى لا يوجد لها اى اساس او ربما طرد من بينهم فى يوم من الايام وعندما يشعر بدفئك بين عائلتك تجده ينسب ما به بك كى يشعر بالراحة النفسية ولا ادرى اى راحة نفسية هذه ولكن ليس على المضطرب نفسيا حرج ...
وهناك الكاذب الافاق الذى يدعى ما ليس به من دين وعلم ومعرفه وعندما تقترب منه تجده سطحى هش لا قاعدة له ولا سقف ايضا فهو متدين لغرض ما وسياسى لغرض اخر ... وان تحاورت معه فجميع الناس هكذا وهو العالم الوحيد فى هذه الحياة
موقف اثارنى وجعلنى اتذكر كل الكلام اعلاه
الصبح كنت فى البنك ... فى طريقى توقعت انى الاقيه فاضى لاننا فى رمضان والحياة صعبة شويتين تلاته اربعه المهم توقعاتى جت العكس ولا قيت على شباك الايداع ناس كتيييير طبعا العرف السائد فى اى مكان ان فى طابور ستات وطابور رجاله وانا اكره موت وقفة الطوابير دى زمان البنك كان جنبى مباشرة مش كنت بقف كنت بروح شوية لما يكون فاضى وارجع لكن دلوقتى بعيد شوية فمضطرة انتظر .. موضوع النقل من مكان لمكان ده صعب عليا حاجات كتير ما علينا ... قربت من الشباك الموظف قالى خلى الفلوس معاكى هاتى الدفتر بس وانا هنادى اسمك قولت وماله روحت قعدت لما ينادينى .. جنبى اتنين ستات الست الداعية قاعدة فى النص بينى وبين واحدة تانية ... وقاعدة تتكلم عن رمضان وفضل رمضان والتانية شكلها من الناس اللى بتكبر دماغها وتسمع من هنا وتطلع من هناك عمال تهز دماغها وخلاص ... شوية ولاقيتها بتوجه لى الكلام انتى عارفه يا اختى رمضان ده زى الضيف العزيز اللى عينك بتتمناه .. مش لما بيجى لك ضيف عزيز بتقدمى له كل اللى عندك فى البيت وبتتمنى تشيليه من على الارض شيل ... اهو رمضان كدا بالظبط لازم نقدم له كل الطاعات والعبادات ونصوم ونقرا قران ونؤدى كل الفروض والتراويح ده هو شهر فى السنة ... قولت لها يعنى مش نصلى طول السنة ولا نؤدى الفروض غير فى رمضان بس ؟؟؟
قالت لى انتى هتغلطينى ليه انا مش قولت كدا انا بقول نعبده زى ما ربنا امر ... نعبد مين يا ست انتى ؟؟ نعبد رمضان ؟؟؟ ايوا ده شهر مفضل عند ربنا يبقى ازاى مش نقيم الليل ومش نقرا القران كله حتى لو الواحد بيموت لازم يصوم ويصلى ... سالتها مين اللى قالك الكلام ده .. ده ربنا نفسه بيقول وان كنت مريضا او على سفر فعدة من ايام اخر .. مش لو بنموت نصوم ونصلى ... وبعدين احنا مش بنعبد رمضان احنا بنعبد رب رمضان وهو نفسه رب كل الشهور يمكن رمضان له قدسية بين الشهور اينعم لانه شهر القرآن والصوم للتقوى .. ربنا لما فرض الصيام قال لعلكم تتقون مش لعلكم تعبدون رمضان ... سابت كل الحوار ده ومسكت فى انا ديانتى ايه .. اصلى كدا بغلط فى رمضان ... سالتها انتى حافظة كام جزء من القرآن لاقيتها بتجاوبنى على حاجه تانيه خالص قالت انها دارسه دين وبتحضر دروس دينية فى المسجد ومن واجبها انها ترشد للطريق الصحيح .. يا ستى ارشدى مش حد ماسك فى لوزك .. بس مش تقولى كلام مغلوط كفاية الجهل اللى الناس فيه ...
واحدة تانية واقفه تقولى هما ضافوا الارباح بتاع شهر 7 اصلى مش جيت من زمان قولت لها مش عارفه انا برضه مش جيت هنا انا كنت بروح هناك .. لاقيتها خبطت الكلمة فى وشى .. انا مش عارفه اخدهم ولا لاء اصل الشيخ كان بيقول ان الارباح حرام .. خلا الواحد يشك فى كل الفلوس اللى اخدها قبل كدا .. مش عارفه اعمل ايه لو الارباح دى حرام .. قولت لها يا ستى الشيوخ دى مش وراها حاجه غير انها تحرم الحلال وتحلل الحرام وتشكك الناس فى نفسها مش تتفرجى على الناس دى تانى .. يعنى ارباح البنوك حرام وفلوس الفتاوى الهزلية اللى قاعدين يفتوا بيها طول النهار فى القنوات دى حلال ... يعنى انتى تشيلى فلوسك فى بنك حرام وهما ثرواتهم بالملايين فى بنوك سويسرا وامريكا حلال .. قالت لى ربنا يسامحنا بقى لو حرام ... قولت لها حلى الموضوع واتصلى بدار الافتاء مش تعتمدى على القنوات الهابطة ... لسه بترد وتقولى هابطة ازاى .. الموظف نادى اسمى ودخلت عملت الايداع طبعا هى سمعت اسمى لما الموظف ناداه وانا ماشية لاقيتها بتقولى انتى ساكنه فين يا حنون .. قولت لها فى دنيا الله الواسعه ومشيت على طول ... طيب انا قاعده احسبها مع نفسى من الصبح لحد دلوقتى لاقيت ان كل واحد عنده استعداد يسلم دماغه لاى حد وكانه بيدق ... ولما تيجى تكلمه تلاقيه بيلومك ويتهمك باللى فيه هو شخصيا ...
الست الداعية اللى مفوضة نفسها تدى دروس فى الاماكن العامة ولما ترد عليها تشكك فى دينك و الست اللى خايفة ان فوايد البنك حرام نظرا لقول الشيخ بتاع التلفزيون وبرضه بتسال عنها وهتاخدها .. والشيخ بتاع التلفزيون اللى شكك الناس فى نفسها مع ان هو نفسه بيتربح من الفتة اللى بيفتها كل يوم والتانى ... من كام يوم استاذى الجميل سالنى .. اين اختفت عبارة والله اعلم التى كان يقولها المفتى بعد كل فتواه .. كان يقول هذا والله اعلم .. دلوقتى بقوا بيقولوا الفتوى وكانها قران كريم لا جدال فيها .. قولت له الاول كان فى ناس بتفهم .. وبتسال بعد كل فتوى عن مدى صحتها مع انها من دار الافتاء وعلى لسان المفتى نفسه ... كمان خوفه من ربنا انه يقول حيحرم حاجه وتطلع حلال والعكس وكان فى احترام لعقول الناس .. كمان الناس كان بتتبين مدى صحة الكلام من الكتاب والسنة .. لكن دلوقتى الناس فى دوامة ومسلمة عقلها لاى حد يلعب فيها شطرنج ..
اضطرابات نفسية ادت الى فصام ثم اسقاط وادى النتيجة

Saturday, September 6, 2008

ايه اللى بيحصل فى مصر ده ؟؟؟؟

قريت من شوية عند نوراة زيارة جمال مبارك لمحافظة الشرقية
طيب ياترى هيعمل ايه فى الدويقة ؟؟؟
بعد وقوع الصخور عليهم وحالات الوفاة والاصابات اللى حصلت
كان عمل ايه قبل كدا لما صخور وقعت والناس ساكنة فى عشش ولا حد اتحرك ولا سال فيهم ؟؟؟
الاخبار بتقول حتى الآن 20 قتيل مع انى اشك فى العدد
لان نفس الاخبار بتقول انه مازال تحت الانقاض المئات
هو الاستاذ هشام طلعت ولا ممدوح باشا ولا السيد محتكر الحديد مش يتبرعوا بربع الملايين اللى بيصرفوها على الهجص ويبنوا لسكان العشوائيات وحدة اسكان متوسط انقاذا لحياة البنى ادمين دووول .. المثير للاعصاب ان المتوفيين بينهم اطفال والمصابين معظمهم اطفال
ولسه فى ناس كمان تحت الانقاض
فين وسائل الانقاذ ؟؟؟؟
قبل كدا فين هيئة المساحة وعمل مسح للمناطق دى ودراسة انهيارات الصخور
الحكومة لحد دلوقتى مش حد اتحرك من مكانه ولا حد هاين عليه يقوم من على الكرسى نص ساعه احنا لو فى بلد محترمة كان زمان الحكومة كلها استقالت من زمان حفظا لماء الوجه
احنا الكوارث عندنا متتابعه ومتتاليه والجميع محلك سر لازق فى الكرسى
ياترى الكارثة الجاية بعد كام يوم والكارثه هتكون عبارة عن ايه ؟؟؟
قدامنا كام اسبوع ولا كام يوم علشان بعدها نسال فين مصر ؟؟؟
شاهد بالصور
http://www.elbadeel.net/index.php?option=com_content&task=view&id=30804&Itemid=120

Friday, September 5, 2008

هو فى ظابط امن دولة كدا ؟؟؟؟

محسن السكرى ثابته عليه كل الادلة الجنائية داخل عمارة مثبت فيها كاميرات تصوير بدون حتى ما يغطى وجهه مع انه ظابط امن دولة ويفهم كويس فى الاصول .. قصدى فى الحاجات دى اشترى الكوتشى اللى لبسه وقت الجريمة والخنجر اللى قتل بيه سوزان تميم اللى محدش سمع عنها قبل كدا واشتهرت بعد قتلها .. بالفيزا كارت الخاصه بيه يعنى فيها اسمه وكل بياناته ... واللى توصلت ليهم شرطة دبى من خلال الوصول للشركتين بائعه الخنجر والكوتشى وملابسه كان عليه دم القتيله وغيرها ورماها فى الدور اللى تحت شقتها وتحليل الدى ان ايه اثبت فعلا انه خاص بالسيد ظابط مباحث امن الدولة محسن السكرى الهمام ياترى السيد محسن السكرى بالغباء ده علشان يسيب كل الادلة دى وراه وقت ارتكاب الجريمة ولا هو مقصود بالفعل انه يسيبها وانه قبض اكتر من حد تانى لايقاع طلعت مصطفى فى المحظور وانها فعلا عملية مدبرة من منافسية او مدبرة من حد هو مش اشترى منه الحديد لمشاريعه واستورد حديد من اكورانيا فالاخر حس انه انضرب فى مقتل فقال يخلص منه ؟؟؟؟
طيب ليه صور هشام هى اللى ماليه الجرايد الرسمية والمعارضه وكل المواقع الاخبارة والفنية كمان .. ومحسن السكرى مش اتنشر له ولا صورة ؟؟؟؟
تساؤلات محتاجه اجابات هل من مجيب ؟؟؟؟؟؟

Happy Birth Day

Just For You
You have my words
You found with patent owners
You only know what friendship
Therefore I give you all my love and sincerity
فى مثل هذا اليوم اللى هو يعنى 6/9 مش النهاردة نورت دنيانا ارق بنوتة فى الدنيا
فى صورتها عفوية وبرائه وفى كلامها عقل ووعى وثقافه
عيد ميلاد الصديقة والاخت الغالية اوى اجندة حمرا
كل سنة وانتى بالف خير يا جميله
وعقبال يارب عيد ميلادك المليون
وبالمناسبة الجميلة دى الجميع معزوم على تورتة
بس خلوها لبعد الفطار
مش حد يمد ايده عليها دلوقتى
ممكن تبصوا عليها بس


دى بقى علشان صديقتى الجميلة هارت

Wednesday, September 3, 2008

محاكمة طلعت مصطفى

تحدد موعد لمحاكمة طلعت مصطفى ومحسن السكرى المتهمان بقتل المطربة سوزان تميم الاسبوع المقبل ... واوضح رجال القانون ان الحكم اعدام للقاتل .. وللمحرض على القتل ...
طيب اللى قتل 1300 واحد اخد براءه ليه ؟؟؟
والمتسبب فى حرق قطر هو فين ؟؟؟
والمسؤلين عن حريق الشورى الصقوها فى ماس كهربائى ليه ؟؟؟
ومستورد اكياس الدم الفاسدة أخد براءه ليه ؟؟؟
ومستورد المواد المسرطنة بينعم بفلوسنا ليه والسرطان بيهرى فى اعضاء الشعب ازاى ؟؟؟
واللى سرقوا اموالنا من البنوك ههما فين ؟؟؟؟
مش معترضة على محاكمة طلعت مصطفى بس معترضة على الضغوط اللى مصر تحتها واللى من اجلها قدمت طلعت مصطفى للقضاء ... هو علشان اللى اتقتلت مش مصرية يبقى لازم التحقيق ومحاكمة الجناه لكن الـ 1300اللى فى العبارة شوية صعايدة مصريين مش مهم غرقوا فى غيرهم 80 مليون
اللى ماتوا مسرطنين وبسبب اكياس الدم الفاسدة شوية فلاحين مش مشكلة برضه مصريين فى غيرهم موجودين ؟؟؟
اللى هربوا بفلوسنا و3/4 الشعب تحت خط الفقر لدرجة اننا عاشين دلوقتى فى نظام الاقطاع ... هيفضلوا كدا احنا جوا متهانين وهما بره بفلوسنا عايشين فى نعيم ؟؟؟؟؟
ملفات محتاجه يتم ازالة التراب من فوقها وملفات اخرى تخرج من تحت الانقاض واخرى يلفظها الرماد
ويتم التحقيق فيها من اجل حقوق المصريين

تحياتى للجميع

Monday, September 1, 2008

الدنيا مش بتدى محتاج .. بتدى عايز

الدنيا مش بتدى محتاج ... بتدى عايز

الكلام ده قاله لى دكتورى العزيز
فى مرة من ذات المرارير كنت قاعدة بحكى له على حاجه واقوله عارف انت اللى شاف حد قاعد على شط البحر وساله انت قاعد كدا ليه .. قاله محتاج اعدى الشط التانى ومش عارف .. قاله طيب تعالى انا هساعدك .. وفعلا اخد بايده ومشى بيه فى البحر وهما فى نص المسافة بالظبط .. قاله كمل لوحدك انا ماليش دعوة بيك ... التانى وقف محتار لا عارف يكمل ولا عارف يرجع .. طيب كان ليه من الاول اخده من مكانه ؟؟؟
قوم لاقيته بيقولى يابنتى الدنيا مش بتدى محتاج بتدى عايز
قولت له وايه الفرق يا دوك
قالى محتاج = لا املك اختيار .. مش عارف اعيش من غير الحاجه دى ولا قادر استغنى عنها
لكن عايز = اعرف اختار واميز بين الحاجات وبعضها واقدر اعيش
صحت باعلى صوتى وقولت له
WooooooooooW
I am now at ease psychologically
Merci Dr. :)

رجعت امبارح من اسكندرية عندى ميكس من الاحاشيش ودى جمع احساس مش حشاش يمكن علشان مش قعدت هناك كتير
ويمكن علشان فى ناس زعلانة منى بدون ذكر اسماء وخلى الطابق مستور يا اللى زعلان ههههههه
اول ما نزلت الرمل وشوفت تمثال سعد زغلول وقفت قدامه ولاقيت نفسى بفتكر حياته طبعا حسب ما قريت فى كتب التاريخ وتذكرت منفاه وثورة 19 وقعدت اقارن لو هو موجود فى الفساد والسرقة ومصر كلها عايشة فى الفقر ده ايه اللى كان ممكن يحصل ؟؟؟
على ايامه الستات كانوا بيلبسوا برقع وعباية لف .. طيب لما نفكر نرجع للايام الخوالى دى مش نرجع لجذورنا .. ما يلبسوا العباية اللف والبرقع بدل ما يبدلوا هويتنا وتاريخنا رايحين يرجعوا لجذور شبه الجزيرة الصحراء الجرداء ناقص يجيبوا لنا شوية غنم ويعلموا لهم مراعى فى ميدان التحرير ... فينك ياباشا تشوف الدروشة اللى الخلق بقت فيها ؟؟؟
هو ايامه مش كان فى عبارات بتغرق فى البحر ولا شورى بيتحرق ...ولا القاهره اتحرقت ايامه اصلا .. اللى حرقها البطل المغوار ناصر واعوانه ... وجه بعدهم الرئيس المؤمن كمل بشعاراته التى يتوارثها اخوان بعض عبر الزمان كل واحد ومصلحته بقى .. قصدى كل واحد وضميره ... وصولا الى المبارك اللى ماكلنا ومشربنا ومهنينا ومن الهنا اللى احنا فيه من كل قلبنا بنشكره ونقوله كفاية اوى ياريس الـ30سنة عز وفخفخفه وانتخه .. نفسنا بقى نجرب حياة الجوع ياراجل .. نفسنا نجرب ان لما رمضان والمدارس والاعياد يدخلوا ورا بعض الناس تمشى تكلم فى نفسها وتقول هنعمل ايه ؟؟ وهنجيب منين ؟؟ ويعملوا مظاهرات واعتصامات علشان الدراسة تتاجل ... مش علشان الاكل غالى ياريس ولا حاجه .. ولا علشان مش عارفين يدفعوا للعيال مصاريف المدارس اللى بتقل سنة ورا التانية ولا علشان دخول العيد كل سنة وانت منور وحسك فى الدنيا ياريس فى وسطنا كدا ... انما علشان بس هما بيشتكوا من قلة المصاريف نفسهم يصرفوا كتير وانت مش مدي حد فرصه .. لما الناس اتحرقت احتراق ذاتى ...
وفجأة انتبهت على انى واقفه على البحر مش فى مجلس النواب لاقيت نفسى بقول مفيش فايدة .. مفيش فايده وجريت على تريانون قولت اضيع المود اللى يجيب هارت اتاك ده
وقعدت اقول فعلا الدنيا مش بتدى محتاج بتدى عايز


البحر وقت الضهر .. بس انا مش نزلته خالص اصلى بصراحة وقتها كنت عايزه مش محتاجه

كل رمضان ومدارس وعيد والناس مش بتكلم نفسها والسنة اللى جاية نكون بنهنى بعض وبنقول رمضان كريم او سيد او سعيد