Desert Cat Search
قطه الصحراء: 7/1/08 - 8/1/08

Wednesday, July 30, 2008

لا شــــيئ


لا شئ فقط سوى فى كل ليلة ألمم رماد يوم مضى .... رفات حلم أحتضر وأمضى إلى وحدتى بجسد متعب وروح واهيه مسكونة بوحشة الصمت كطائر يضرب بأجنحته سراباً يمضى إلى حيث يأتى ..
لا شئ سوى أنى فى دروب الليل أحتضن بين الحنايا كل القلوب ... أسكن مدناً رحلت .. أبعثر نبض ... مفردات شجن أتوهم الربيع قادم وأنا أبعد ما أكون
لا شئ سوى أنى أحمل قلباً أوفى من الأيام فى زمن الليل أخبئ بين أحضانى سحباً من نور تمضى فى مدن الأيام الحبلى بالجراح ... منتظرة الغد الواعد أن ينهض .. الفجر الكاذب أن يأتى يتهادى الوقت ولا يأتى
لا شئ سوى أنى عصفورة فى كف القدر تتوكأ فوق اللحظات الأخيرة من الحياة تطيل النظر فى وجوه من أحبوها .. تناجى قلوبهم الدامعة برجفه وجع كنهار فقيد .. وليل وليد .. تحمل رعشات الدقائق الباقية لها بصوت واهن ... يتردد عبر الرياح كأنها تربت على ذكراها ... راحلة مع الشفق الغائب ...
لا شئ سوى انى قدر لى أن أرتدى رداء الموت والدموع .. لأن ربوع قلبى سنابل للوجع القادم أحملها أينما رحلت
فقط لا شيئ

Monday, July 28, 2008

المطالبة بانشاء سجل اسود للمتحرشين بالسائحات فى مصر

بعد تعدد البلاغات فى الفترة الاخيرة تطالب شركات السياحة بانشاء سجل اسود للمتحرشين بالسياح فى مصر برافوا يا متحرشين جرستونا وفضحتونا لدرجة ان الشركات السياحية فى الخارج بتحذر السيدات منكو وكانهم جايين ولامؤاخذه على قطيع من الحيوانات
انا اعتراضى مش على كدا انا اعتراضى اشمعنا السياح يعنى هما التحرش بيهم حرام واحنا حلال وانا مالى انا كمان بطالب بانشاء سجل اسود للتحرش بالمصريات فى الداخل

صباحو رعب ... نياهاهاها

المجهوووووووول
الى بعت لى الكومنت ده
Anonymous said...
ده لنك مدونة واحد ملحد اسمها الباحث عن الله www.elbahesofgod.blogspot.comتم اختراقها وحذفها خالص من النت حتى جربى ادخليهافاحذرى قريبا سيتم اختراق مدونتك

قال يعنى بيهددنى ... تصدق يا شيخ اترعبت وخايفه وقاعدة العرق محمينى وركبى عمال تخبط فى بعضها يا مامى على الرعب اللى انا فيها يا خراشى يا ناس الحقونى يالهوووووى الارهابيين هيدمروا مدونتى ..... اهئ اهئ اهئ عااااااااا
اول مرة اشوف حرامى غبى
اه ما هو انت مش تفرق حاجه عن الحرامى اللى بيدخل يسرق من بيوت الناس اللى هو بيحقد عليهم وشايفهم ارقى واعلى واحسن منه وهو علشان واطى ومش متربى ومش لاقيى ياكل بيروح يسرقهم
انت كدا علشان حرامى حلوف داخلى مجهول وكاتب كومنت ومكرره مرتين قال يعنى بتهددنى
وفى نفس الوقت بتقولى اخد حذرى ههههههههه والله باين عليك بنى ادم اهبل
طيب يا مرعب يا قاهر يا مدمر طالما بتعرف تعمل حاجه زى كدا ما تعرفنا سيادتك مين اصل فى كام واحد عايزين ندمر مدوناتهم
طيب انت عارف انى قافله التعليقات
هقولك زى ما قولت للمنقبة اللى بتفتخر لما كانت بتدور على عنوانى ومن بعدها مش شوفت وشها
اكتب لى كومنت باسمك الحقيقى وانا اديلك باسورد مدونتى وده وعد منى قدام كل زوار المدونة
ده لو انت فعلا بنى ادم محترم وتقدر تعمل حاجه
لكن عادة الارهابيين يستخبوا ويتخفوا ويهددوا وهما اخرهم نفخه تلزقهم فى اخر الحيطة
طير يا رعروع وقتك انتهى

Sunday, July 27, 2008

ألف مبروك ياباشا على البراءة !!!

من كل قلبى وكليتى وكبدتى وجميع اعضائى صدقنى ببارك لك على البراءة
انت اتظلمت معانا كام سنة والناس بتقطع فى فروتك وانت هربان بره البلد

ويقولوا ممدوح اسماعيل
قصدى ممدوح باشا اسماعيل قاتل اكتر من الف واحد
انا شايفه انك طالما اخدت براءة
ترفع عليهم قضية رد شرف لانهم شهروا بيك وسوأو سمعتك
شايفه طالما انك اخدت براءة
ترفع قضية وتطالب فيها بتعويض للسفينة اللى بوظها الرعاع وغرقوا فيها
وتطالب اهاليهم بدفع تعويض مادى وادبى عن قلة ادبهم وموتهم فى عبارتك اللى بسببه اتأذيت نفسيا وماديا





لما يموت اكتر من الف بنى ادم فى عرض البحر واللى تسبب فى موتهم ياخد براءة
يبقى اسمه اييييييه ؟؟؟؟
اه الف هنا وشفا للسمك





لما تكون دى مناظر ناس بدل ما تستقبل اولادها بالاحضان
رايحه تستقبلهم فى صناديق .... وفى النهاية القاتل ياخد براءة
لما الناس اللى نجيت من الغرق يتهربوا من مستشفيات الغردقة وسفاجا واهاليهم مش يعرفوا عنهم حاجه يبقى اسمه ايه ؟؟؟؟
لما طبيب يفقد اسرته قدام عينيه زوجته واولاده وفى الاخر القاتل ياخد براءه يبقى ده اسمه ايه ؟؟؟؟
لما مصرى يتهان بره بلده مش يشتكى لانه فى بلده مش ليه تمن
لما مصرى يغرق وهو هربان من بلده يدور على شغل اهله مش يشتكو ؟؟؟ لانه طماع رايح يدور على لقمة عيش حلال
لما مصرى يتسجن فى بلد تانية وحقوقه تضيع مش يشتكى ... ماهو فى بلده وجبه شهيه لسمك القرش ومالوش تمن ..
فى ستين داهيه دم المصريين الجرابيع اللى مالهومش تمن
المهم البهوات الكبار يعيشوا
مش مهم اطفال اتيتمت وستات اترملت وامهات اتحرق قلبها ... المهم براءه البهوات الكبار
اتكتموا يا مصريين مش حد يفتح بؤه
لاننا فى نظر حكومتنا ولا حاجه ... فى نظر قضاءنا ولا حاجه
لما اسرائيل تسلم اسرى قصاد رفات يبقى احنا حقيقى كلالالالالالاب ولا حاجه
الف مبروك يا ممدوح باشا
والف اهلا وسهلا بالقضاء الشريف النظيف العفيف
اللى بيدين القتيل ويبرء القاتل
مرحبا بقانون سكسونيا فى بلدنا ام الدنيا

Wednesday, July 23, 2008

ثـــــورة ولا انـقــــــلاب ؟؟؟؟؟

قررت الخروج من عزلتى ... قررت التمرد على ذاتى ... ولكن !!!!!!! وماذا بعد لكن ؟؟؟ لا ادرى
كنت اهرول بقوة وكانى تاخرت عن موعد مهم واود الالحاق به ... وعندما سالت نفسى .. هو انا بجرى كدا ليه ؟؟؟ كانت الاجابة الصامته .. انتى بتشغلى نفسك باى حاجه .. ولما مش لاقيتى حاجه قولتى تبذلى مجهود فى المشى باقصى سرعه ... وصلت منزلى مارست كل طقوسى اليومية بتمعن شديد ودقة متناهيه .... لا لشيئ فقط اريد إعمال عقلى ... اريده ان يتناسى ما قد كان لذلك قررت أرهاقه دون رحمة ... اتى صباحى مسرعاً غير ما كنت متوقعه تماماً ... ولا ادرى كيف حدث ذلك ... يمكن ارهقت عقلى كثيرا لذلك تناسى عامل الزمن ... تذكرته انه فقط من يستطيع أن يحتوينى فى مثل تلك المواقف كنت اسير فى طريقى اليه بسرعه وببطء لا احد يسير فى الشارع غيرى كنت مستمتعه جدا لذلك عندما كانت تسرع خطوتى رغما عنى انهرها كى لا تفعل ذلك مرة اخرى فانا اريد استنشاق عبير الصباح باكمله واود الاستمتاع بكل لحظة تشعرنى انى املك هذه الدنيا وحدى ... انانية اعلم ... ولكن اهلا بكل انانية العالم فى سبيل لحظة شعور بالحرية والامتلاك معا ... وصلت اليه ... اول ما رآنى اشاح بوجهه عنى ... يااااه للدرجة دى مش طايقنى ... زعلان منك علشان مش بتسالى ... طيب ما تسال انت ؟؟ ومين قالك انى مش بسال .. ابتسمت .. طبعت قبلة على وجنتيه اشعرتنى بحنان العلم كله .... نظر لى وابتسم ابتسامة ودوده واخذ يدى بين راحتيه وضغط عليها بكل قوته التى فى الحقيقة تساوى قوة طفل عمره شهرين ... ثم باغتنى بسؤاله ... فيكى ايه ؟؟؟ هو لازم يكون فيا حاجه علشان اجى ... اه انتى مش بتجيى هنا غير لما بتكونى بتدورى على نفسك .... غاصت عيناى فى ارضية الغرفه وصمت أو بمعنى ادق توهت ... تركنى داخل متاهتى ولم يقطع عليا صمتى ... وحينما طالت اللحظات نظرت اليه وجدت نظره احتواء لا مثيل لها داخل مقلتيه ... انا جاية اشرب معاك شاى ... هقوم اعمله .... داعبنى بكلماته ... معقول بقيتى بتعرفى تعملى شاى ؟؟؟ هتعلم فيك ... لا انا مش ناقص ادوية زيادة .... هو انتى اصلا بتعرفى تشربى نفسك كوباية ميه ... خلاص يا سيدى روح اعمله ... تسللت الى غرفه مكتبه امسكت برواية الاجنحه المتكسرة لجبران خليل جبران ... وحينما رآها .. ابتسم ابتسامه ذات مغزى .. اشمعنا دى اللى اخترتيها ... عادى وقعت فى ايدى .. ولا جاية علشانها ؟؟؟؟؟ لاء جايه علشانك .. طيب عينى فى عينك كدا ... لم اقوى ولكنى نظرت فى الرواية .. طيب ما تسمعينى بتقرى ايه ... اندفعت بدون تفكير .. واجبت .. تاهت خطاى عن الطريق .. ماذا أرى رحل المكان !!! مضى حمام الحى يخبط فى الظلام ... برق عينيه ... انتى متأكده ان الكلمات دى فى الرواية ؟؟؟؟ لاء مش فى الرواية ... امال جبتيها منين ؟؟ دى حالة هلوسة ما تاخدش فى بالك ... قولى لى فى ايه قلقتينى عليكى اوى ؟؟؟ فيه انى قررت اعمل انقلاب ؟؟؟
طيب بما اننا فى ذكرى ثورة يوليو ما تعملى ثورة احسن ... لا انقلاب هعمله على نفسى لكن الثورة بتكون ضد المستعمر ؟؟؟ حاولى توضحى ... زى مثلا عندك ثورة 19 اقدر اسميها ثورة .. وثورة الفرنسيين .. لكن ثورة يوليو دى اسميها ثورة انا بناء على ايه ؟؟؟ هى كانت ضد الحاكم ولا ضد المستعمر ؟؟؟؟ ما الحاكم برضه كان مستعمر ... لاء معلشى فى فرق انا قصدى المستعمر الانجليزى او الفرنسى او اى مستعمر .. لكن فاروق كان حاكم بصرف النظر كان ظالم او عادل ولو انى متاكده من تزوير صفحات التاريخ اللى صورته خمورجى وبتاع نسوان ... اصل لو قارنا بين مصرنا دلوقتى ومصر على ايامه شتان .. شوف الفرق بين الشوارع والنظافة والشعب نفسه والرقي .. ده حتى الفلاح كان اسلوب كلامه راقى لانه يحكمه ملك من اسرة ملكية مش شوية رعاع .... كانت مصر بخير وثرواتها محفوظة مش بتتباع للقطاع الخاص بابخث الاثمان ... ناصر واصحابه بدؤوا بالانقلاب ومعاه بدؤا بتبديد ثروات البلد مرورا بالرئيس المؤمن وصولا للرئيس المبارك واديك شايف الحال ..... لا معلشى انتى .. ناصر بنى السد العالى ... واعاد للعرب كرامته ؟؟؟ ناصر بنى السد العالى من خير مصر ... ناصر عاد للعرب كرامته .. مش الاولى انه كان يعيد لمصر كرامتها واذكرك بهزيمة 56 وصديقتها 67 اللتان تضاهيان هزيمتنا حاليا بقتل التطور الاجتماعى والاقتصادى ؟؟؟
طيب ان كان على ثورة يوليو فهى حصلت والملك اللى انتى معجبه بيه مشى وكل ده اصبح امر واقع ... لكنى ملاحظ انك لحد دلوقتى مش اتكلمتى فى اللى تاعبك انتى شخصياً ... لاء مفيش انا كدا استريحت خلاص ... انتى جاية ليه ؟؟؟؟ هو كدا وخلاص !! يعنى ايه كدا وخلاص ... يعنى انا ماشيه ... انتى جايه الساعه 6 الصبح علشان تفكرينى بالملكية وتحكى لى على الثورة هو انتى اعصابك تعبانه من سنة 52 اللى مش كنتى موجودة فيها اصلا لحد دلوقتى ودلوقتى بس استريحتى ؟؟؟؟ انا شايف معاكى برضه انك لازم تقومى تروحى والزيارة الجاية بلاش تبقى فى اكتوبر

Sunday, July 20, 2008

خلـــف أســـوار الأمـــــل


يتهادى الوقت متثاقلاً .. كم من الدقائق مضى لا أدرى
أريد أن أفعل شيئ غير المألوف .. أود الخروج عن العادة ... أريد أن أغرس سكينى فى قلب العصر فى الجهر لا فى السر ....
كم الوقت الآن ؟؟؟ ولكن فى ماذا يعنينى الوقت .. ماذا سأفعل به ... يتسلل إلى أعماقى صوت ماجدة الرومى ... أحتاج إليك وأهرب منك وأرحل بعدك من نفسى
.... أحقاً يمكن ان يحدث ذلك ... ولما لا وانا منذ تركته وانا تائهه .. تائهه وأنا جالسة بين أصدقائى .. تائهه وأنا أسير فى الشارع وحدى .. تائهه عن نفسى ... أحاول الهروب من إتخاذ قرار ... أخشى أن يسقط القرار من بين يدى رغماً عنى ... تخوننى ذاكرتى وتأخذنى إلى ذلك المقهى الذى كانت تستقبلنا فيه طاولتنا المفضلة بابتسامة هادئة ... اشعر بها وبسعادتها البالغة وهى تشاركنا كل احاديثنا وضحكاتنا حتى لحظات غضبنا ... اتذكر ذلك اليوم البعيد ... منذ ان جلسنا لم يحول نظره عنى .. واسأله .. أنت بتبص لى اوى كدا ليه ؟؟؟؟ حاسس إنى مبسوط اوى بيكى مش عايزك تغيبى عن عينى لحظة ... وعلشان كدا عايز اخطفك جوا عيونى واقفل برموشى عليكى .... لم أقوى على الرد .. أشعر بكيانى وكأنه مفكك .. أوصالى مبعثرة ... ياربى ماذا أفعل ... اممممممم انت ليه مش بتخلينى اسوق عربيتك بالليل ... يضحك ضحكة عاليه وكأنه فهم مغزى سؤالى ... ثم يعود الى اتزانه ... انتى عارفه بالنهار بسيبك تعملى اللى انتى عايزاه .. لكن اى وقت احس فيه بخطر عليكى انا فداكى ... لحظة صمت ثم يتسائل هربتى ليه ؟؟؟؟ لاء مش هروب ده سؤال خطر فى بالى ... اااااااااه بدأنا فى شغل العيال.... اعود ثانية لكلمات الأغنية ... هل بالفعل أحتاج إليه وأهرب منه .. أم أنى أود الهروب إليه ؟؟؟؟؟ أرنو إلى هاتفى واطلب رقمه ... يأتينى صوته .. بتعملى ايه لحد دلوقتى .. بكلمك .. طيب و ياترى كنتى بتقولى لى ايه .؟؟؟؟ امممممممم كتير .. مالك حاسس بضعف فى صوتك ... لاء مش تقول كدا تانى انا عمرى ما اكون ضعيفه ... انا قوية جدا بيك .... مش بهتم بحد وانت جنبى ... بحطم كل القيود من عادات وتقاليد بعيش معاك فى دنيا بتاعتنا لوحدنا ... فيها عقليات جديدة .. وتفكير جديد .. وتفتكرى هنقدر نعيش فى دنيا بتاعتنا احنا بس ... اذا كان واضعى القوانين نفسهم بيراعوا العادات والتقاليد لدرجة انك بتلاقى القانون احيانا بيتطبق فى صرامة لمجرد انه اصبح عادة ... ماهو مش تنسى انت كمان بعض العادات السلبية اللى كانت فى العصر الماضى دلوقتى بقت قمة الايجابية ... زى مثلاً التعليم زمان كان عيب للبنت بدعوى انه مش من الاسلام وانه حرام ... دلوقتى البنات موجودة فى جميع الجامعات ... وده معناه ان الاسلام مش اتغير لكن العادات اللى اتغيرت لان المنهج اللاسلامى واضح وصريح وعمره ما يتغير على مر التاريخ ... انا موافقك على كلامك لأنه فعلا يثبت صحة نظرية ان التطور تدريجي وشمولي ... ماشى ياعم هيجل ... يعود ليسالنى .. مش قولتى كنتى بتعملى ايه قبل ما تكلمينى ؟؟؟ كنت بسمع ماجدة الرومى ... وخنتى حبيبتك فيروز .. . ههههههه لاء ماهو انا قولت لك انا عايزة اخرج عن المألوف ... طيب بتسمعى لها ايه ... امممممم احبك وبعد ... يردد هو احتاج إليكى وأهرب منكى وأرحل بعدكى من نفسى ..... يغلق كلانا هاتفه ... لينبعث من الخارج صوت آذان الفجر .. إنه إعلان بمولد يوم جديد ... فيه النور وفيه النار .. كما أعشق ذلك الفجر واسعد بالنور .. ولكنى أثور على النار

**************************************************************
غداً الاثنين 21/7/2008 حلقة خاصة ببوست مولد سيدى بلوج
فى البرنامج الإذاعى
أنت تسأل والكمبيوتر يجيب
http://netonradio.blogspot.com
الذى يذاع يوميا الساعه 9.10 صباحا على اذاعة البرنامج العام ما عدا يوم الجمعه
ابقوا اسمعوها

Tuesday, July 15, 2008

مـصـــــر هـبـــة النيـــل

مقالى فى مجلة مصر الجديدة الإلكترونية
http://masrelgedeeda.blogspot.com/2008/07/blog-post_07.html
بقلم حنان الشريف

مصر هبة النيل ... المقولة الخالدة لهيردوت
لأنه رأى أن مصر ليست خيمة وناقة وجمل وحصان وسيف وصحراء وقحط .. فالبلاد التي تحمل تلك الصفات هي بلاد أخرى وهوية أخرى غير مصر .. واسمها بلاد العرب ... أما مصر فهي نيل ، نهر طويل عريض ، ووادي خصب وأهرامات ومسلات.. فمصر بمعابدها واهرامها وملامح اولادها التى رسمها اجدادنا الفراعنة على جدران معابدهم ونقشوها على الحجارة تصرخ بأن مصر فرعونية
نعود لعبارة مصر هى هبة النيل ... ولكن مهلاً.. تنتابنى هنا وقفة ً.. لو ظل هيرودت حياً حتى يومنا هذا كان نطق مثل تلك الكلمات؟
بعد أن إنقلب لون المياه الزرقاء بفعل إنعكاس السماء الصافية على صفحاتها التى تغزل فيها بيرم وابدعت فى ادائها ثومة ..
شمس الأصيل دهبّت خوص النخيل يا نيل تحفة ومتصورة في صفحتك يا جميل ....
فلا اصبحت الصفحة زرقاء ولا خضراء بل قلبت للون الأسود بفعل جرائم الإغتيال اليومى من عوادم سيارات ودخان مصانع حتى تم قتل اللون الأزرق مع سبق الإصرار والترصد ليحل محله اللون الأسود! ...
ومع التعود على رؤية صفحات النيل باللون الأسود اصبح اللون المفضل لدى الكثير من المصريين، لدرجة انهم اختزلوه فى زي موحد ليصبح فرض يغطى الأجساد من أعلى الرأس حتى أخمص القدمين والعقول أيضاً، فأصبح من يكتشف ويخترع كافر، ومن يكتب فى الأدب لابد من قتله او نفيه خارج البلاد، حتى هرب العلماء وكف عن الكتابة الأدباء وحل مكانهم الدجالون والمشعوذون .. اختفت الشياكة وحل مكانها السروال واللحية -التى كلما طالت كلما قصرت الجلابية- والزبيبة وتصاريم الوجه الصارمة لابراز البشاعة... إختفت الأناقة وحل مكانها السواد الداكن من أخمص القدمين حتى أعلى الرأس، فالقدمان عورة لذلك فرض ارتداء الجوراب الصوف الاسود، والكفان ايضا عورة لذلك يجب ارتداء القفازين الاسودين.. ولكن طالما مقتنعات انهن عورة، فلماذا ينتشرون فى الاسواق وفى الشوارع؟
وكيف تحادث الرجال فى المتاجر؟
ألا يخاف مالكها عليها من سماع الغرباء لصوتها العورة ويروا مشيتها العورة ...
أنا لا اطالب بنزعه ولا بعدم خروجهن ، فهن أحرار، ولكن أرى أن من واجب من يصدر لها تعاليمه ضد ما هو إنسانى وحتى لا يُفتن بها الغرباء من الرجال او تُفتن بهم فعليها جلب ما تشاء بالتليفون وهى جالسة فى بيتها.. فإذا كان التليفون ذكر وحرام لمسه فيطلب هو لها وعليها ان تحادث الغرباء من خلف ستار.
مصر المنارة .. مصر الحضارة هل هذه الكلمة يمكننا ترديدها والأفتخار بها بعد ذلك الغزو ؟؟؟
ما الذى يحدث هذا فى مصرنا ؟؟؟ من هؤلاء الغرباء الذين لوثوا الفكر الإنسانى؟
من هؤلاء الغرباء الذين يريدون هدم مصر وهدم كل ما هو إنسانى تحت إسم الدين؟ والدين مما يفرضونه بإسمه براء.. براءة الذئب من دم ابن يعقوب .... فبإسمه ينمو الاستعباد و تفرض التبعية بالقوة المادية من قبل شخص او مجموعة اشخاص ، وهذا الاستعباد ان لم نفق سيؤدى حتماً إلى الحروب.. اقصد حروب التحرير.. فالحضارة لا تتوقف عند زمن معين وإنما الحضارة إستمرار ومن يسعى لوأدها يرتكب جريمة بحق الانسان

Monday, July 14, 2008

من الثانـــوية للكليــة .. على الشارع حدف


أولاً وقبل اى حاجه ألف مبروك لكل الناجحين النهاردة فى شهادة الثانوية العامة
سواء مدونين او ابناء مدونين او قرايب مدونين او جيران مدونين او محدش من اللى مش يعرفهم المدونين خالص بتاتا نوهائى
باركنا والحمد لله نيجى للكلمتين اللى واقفين فى زورى وداخله علشان اقولهم
طول ايام الامتحانات عمال اسمع عياط وصريخ وناس بتنتحر ومراقبين عربياتهم بتتكسر ومدارس بتدمر
والامتحان فوق مستوى الطالب الممتاز مش الشاطر وبس
والامتحان من خارج المنهج
واللى حاطط الامتحان راجل عقد وابن ستين فى سبعين
طيب يا جماعه انا النهارده طلعت نتيجة الثانوية عندى فى النت كافيه
مش عايزة قر قل أعوذ برب الفلق
ما علينا مش دى قضيتنا
اقل مجموع طلع ما شاء الله اللهم مالا حسد كان 87 % ده اقل مجموع
والله فى ناس جايت 98% وبرضه كانت ماشية تعيط هى العيال دى اييييييييييه جاية تغيظنى مستقصدانى
انا كنت عايزة اقوم ادى الواد اللى جاب 98% وقاعد يعيط ده جوز قلام
الناس قعدت تهديه وده ابدا انا اتظلمت ده مش مجموعى ... حد يشيل الواد ده من هنا احسن اقوم له .. طبعا ده يبقى انا اكيد
من المواقف المؤثرة جدة جاية تشوف نتيجة حفيدها
والناس فوق دماغى ما شاء الله الله اكبر عارف كدا لما تكون قاعد موطى على كيبورد لمدة نص ساعه مثلا وفجأة ترفع راسك تلاقى ضلمه .. مش ضلمة النور مقطوع .. ضلمة فى روس كتير كدا فوقك وانت مش مميز اللى فى مواجهتك مباشرة ده عين ولا مناخير ولا رجل حتى ... المهم لما طلعت للجدة دى نتيجة حفيدها كان جايب 91.5 % وموصرة لازم تبوسنى ... والناس يقولوا لها بعدين يا حاجه ابقى تعالى بعدين وهى تقول والله ما انا ماشية غير لما ابوسك ... وانا قاعدة فرحانة فيها تبقى جدعه لو قدرتى توصلى لى ... مش عرفت توصل لى قولت لها ابقى تعالى بكره بوسنى واحضنينى براحتك ... ومش رضيت تمشى ولن تتنازل غير لما تبوسنى والله
ونولتها غرضها وجت اخدتنى حضن جامد كله حنية وباستنى ....
موقف اخر جميل جمال مالوش مثال
احمد بيطلع النتيجة لواحدة ست برضه مش عارفه انا ايه موضوع الستات ده .. مش حد يفهم غلط مش طلبت تبوسه ... المهم بنتها جابت مادتين ... بانفعال شديد .. راحت بتقوله ربنا ينتقم منك دى يتيمه ... طبعا احمد قعد مبرق من رد الفعل ومش نطق .. وانا قاعدة شاورت لها تعالى هنا .. هو ماله بتشتميه كدا ليه ... مش بنتك اللى بتلف طول السنة ومش بتذاكر ... يعنى انتوا تهملوا فى عيالكو وتيجو تشتمونا احنا .... لاقيتها بتقولى حقكوا عليا كلكوا والله بس غصب عنى وقعدت تحكى لى مصاريف الدروس وانا بعد ما قالت حقكوا عليا كدا استريحت واخدت نفس عميق ودول الموقفين اللى حصلوا يعتبروا من نوادر النتيجة ... اما بقى مشاعر الاهالى بنجاح اولادهم طبعا شيئ لا يوصف .. وعلشان لا يوصف فانا من الطبيعى مش هوصفه .... وهسيبكو تتخيلوا
قولت الكلمتين اللى كانو واقفين فى زورى مشاعر النتيجة والفرح والزعل ولحظات الهلع اللى كانت بتنتابنى والله اول ما كنت ادخل رقم الجلوس كان قلبى يقف ... واول ما اشوف الدرجات هييييييييييييييه اعمل فرح مبروك يا جدعان والله وعملوها الرجالة ... وكل سنة والجميع فى نجاح بس والنبى بلاش حوارات كل سنة فى الامتحانات والعياط والامتحان مش عارفه ماله احسن بيجيب لى استبحس علشان فى النهاية النتيجة بتكون كويسة ... يلا تصبحوا على خير لازم اروح انام منمتش من يجى اد ايه لاء كتيييييييييير
تصبحو على خير

Saturday, July 12, 2008

إنقســــامــات

تحديث مهم جداااااا
شكر خاص للصحفية المتألقة دائما / آسر ياسر
لبحثها الدئوب بين المدونات واختيار المناسب ونشرها فى جريدة الاسرة العربية والتى تصدر يوم الاثنين من كل اسبوع
يارب دائما فى تألق يا آسوووور
وللاسبو ع الثانى على التوالى يتم نشر بوستات للاستاذ / طارق الغنام
انسان فكره واعى وعقلية فوق الممتازة
تم اليوم نشر بوست بعنوان
يارب دايما فى تقدم ومن نجاح لنجاح يا استاذ طارق
***********************************************
حياتها مقسومة اتنين .. نص حقيقة ونص اوهام .. بتعيش الحقيقة بكل ما فيها ... مجازفة لأبعد الحدود ... بتسمتع جدا بحكياتها التى لا تخلو منها روح المغامرة والعناد ... احيانا محتارة تايهه فى عالم بلا عنوان .. تتداخل خطوط حياتها مع قلوب لا تتبارى عن اعلان استعدادها لمنحها مشاعرها ودفئها في مقابل بعض المشاعر لبعض الوقت .. انظر لها متعجبة تماما ... بتفضلى عالم الوحدة كتير وبتخرجى من كل مشاكلك وهمومك بطريقة او باخرى ... انتى اكتر واحده عارفه المفروض تعمل ايه وازاى ... تصدمنى بردها البارد .. بصى مش تتعبى نفسك كتير من حقى ارفض الإستجابة ... فليس هناك قانون للاحاسيس بان يجب على ان احب من احبنى او اصادق كل من رغب فى صداقتى ...هيضايقوكى ... هما الخسرانين انا مش خسرانة حاجه ... طيب ادى نفسك فرصة وحاولى ... اصل ليه رغباتهم الملحة والمتتابعه ... طيب حاولى تقيميها وتحتفظى بنتيجتها لنفسك ... وقررى بشكل فردى اللى انتى عايزاه ... طيب ليه كل ده وانا مش مسئولة عن عاطفة أى حد تجاهى ... اتعجب حقا على من يتحايل على مشاعر الآخرين ويعد عقله الواعى بالقاء جمرة المشاعر فى قلبه ... وعلى الاخرين واجب تحمل مسؤليتهم تجاههم ... لاء معلشى استنى مش تسرحى اوى كدا فى الكلام ... انا اتفق معاكى تماما لو انتى بعيدة كل البعد ... انما لو انتى طرف فيها فانتى كمان مسئولة لانك ساهمتى ولو بقدر ضئيل فى ميلاد المشاعر دى ... انا فعلا بتكلم على اللى ماليش اى علاقة بيهم ولا اعرفهم ... ممكن يكون ليكى دور بدون وعى ... لان الاصل فى المشاعر هو الافتقاد للشعور لا للاشخاص ... مش وقت الفلسفة ... انا قولت لك ماليش علاقة بيهم ولا اعرفهم ... لحظة سكوت .. ثم تتسائل .. ممكن تفهميينى الجملة اللى فاتت ؟؟ ولو ان الامر بعيد عن الفلسفة لكن هوضح لك يعنى اذا انتقلتى من مجتمع لمجتمع تانى بيكون عندك احساس بافتقاد مشاعر الصداقة ... وعلشان كدا ممكن تمنحى صداقتك لاول حد تقابليه ... لحد ما تتعرفى على غيره تحت ضغط الاحتياج مش اكتر .... حاسه انك مش فاهمه ... اممممم لاء انا عايزة انام دلوقتى .. طيب تصبحى على خير ... الصبح صحيت على صوتها وهمست لى ... بتحبينى ؟؟ جدا ... علشان محتاجه لى ... علشانك انتى مش احتياج قد ماهو شعور حب ... بس قبل ما تنامى قولت لى احتياج ... كان قصدى الاحتياج بمعنى الفقد مش الحرمان .. مفيش فرق بينهم .. لا ازاى الفرق كبير جدا ... احتياج من الحرمان زى العطشان اللى ماشى فى صحراء وعايز يشرب اى مية وخلاص مش فارقه معاه ... لكن من الفقد ... اللى عايز يشرب مية ساقعه بس قدامه مية تانية كتير ... لكن هو عايز مية ساقعه وبس لانه مفتقدها علشان كدا حيستناها لانه مش عايز يشرب غيرها ... طيب انتى ايه مشاعرك بالنسبة لى .. مشاعر صادقة ممزوجة بالاحتياج ... بس المشاعر الصادقة ايثار والاحتياج انانية ... يبقى مفيش مشاكل يا عزيزتى فانا احبك باصدق مشاعرى مع اعترافى انى بحبك بانانية .

Wednesday, July 9, 2008

كــــــم هــــو بائـــــس


كــــم هـــو بائــــس
ذلك الحقود او الحسود فكيف نعرفه هو دائما ... يتظلم وينشر الاشاعات ضد من يحسدهم ويحقد عليهم كقناع يخفي فيه حقيقته .... دائما شعاره انا لا اكذب ولكنى اتظلم .....
طيب والحل ... طبعا محلولة جدا جدا .... التجاهل هو الحل الافضل... لأنه لا يضرك فى شيئ بالعكس ده بيفيدك جدا ... إذا جائتك مذمتى من ناقص .. فهى الشهادة بأنى كامل .... يبقى هنا يستحق الشكر مع المزيد والمزيد من التجاهل ....
كــــم هــــو بائـــــس
من لا يتعلم الدرس جيداً من تجاربة السابقة ... فتجاربك السابقة تساعدك وبشكل مباشر على إتخاذ قرار حول ثقتك بمن حولك ... طيب لو مقدرتش تثق فيهم ... اوعى تقطع علاقتك بيهم طالما مش عملوا معاك حاجه وحشة .... انما كمل لحد ما يثبت العكس برضه مع عدم الثقة الكاملة ... يعنى لو حد كل شوية يسالك على شخص انت مرتبط بيه اكتر ما بيسال عليك انت شخصيا .... فهمه انكو دايما متخانقين ومش طايقين بعض ويمكن تطلقوا قريب قبل ما حد فيكو يقتل التانى ... ومهما حاول يقولك اصالحكو على بعض بس ايدينى اى بيانات توصلنى ليه دائما احبط محاولاته بحجة ان الطرف الاخر مش يستاهلك ... فى نفس الوقت انتوا عايشين حياتكو كويس جدا والحمد لله ....
كــــم هـــــو بائــــــس
الإنتهازى .... جميعنا متفق أنه إنسان ذكى لاعب ماهر ... يجيد كل الأدوار البهلوانية يستخدم كل الحيل والأكاذيب للوصول لغرض ما مع من يقع فريسة له ... طيب لو الفريسة تجيد فن الجرى وعندها الحدث عالى شوية .... يبقى هارد لك فى جولة اخرى مع فريسة اخرى وتنمياتنا بالشفاء العاجل ....
******************************************************
سؤال جديد على مدونة برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحاً على إذاعة البرنامج العام ماعدا يوم الجمعه
السؤال
قام رجل سعودي بتطليق زوجته بعد عشرة دامت أكثر من 15 عاما بسبب رسالة وصلت إلى هاتف الجوال وفي التفاصيل التي أوردتها صحيفة "الرياض" السعودية فإن تلك الرسالة قد استلمها ابنه الصغير والوحيد -9سنوات- بعد أن طلب والده أن يقرأها له وهو يتناول وجبة الغداء، وفي نص الرسالة كما أفاد (ع. ا) صاحب الجوال "تعال.. لترى أجمل العطور لدي.. وأروع مواد التجميل التي أحضرتها لك.. أنا بانتظارك". وقالت الصحيفة إن الزوجة صرخت في وجه زوجها بعد سماع الرسالة، وانتابتها موجة غضب عارمة، وطالبته أن يُفصِحَ عن صاحبة هذه الرسالة، واتهمته بالخيانة الزوجية، وأنه غير مقدّر لكل هذه السنوات التي قضياها معا، وقد حاول الزوج -على حد قوله- أن يبين للزوجة أن الرسالة دعائية ليس لها أية علاقة أو مفهوم آخر، بل إنها من المحل الذي اشتروا منه العطور أثناء قضائهما فترة إجازته في جدة، ولكن محاولات الاستجداء وتفهم الزوج لم تجد نفعا. وختمت الصحيفة بأنه وبعد مطالبات الزوجة بالطلاق، طلّقها زوجها من المخطأ المحمول الزوجه الزوج ام من؟
فى انتظار ارائكو واقتراحاتكو

Friday, July 4, 2008

يسألـــونك عـــن النقــــاب

بقلم: احمد صبحي منصور
(1)
حكى أحدهم أنه كان فى بلد يعتنق فكرة النقاب للنساء، وانه كانت له علاقة غير شريفةباحداهن ، وحدث أن زاره زوجها على غير موعد ، وكانت تلك المرأة عنده فىالبيت ،وتحير صاحبنا ماذا يفعل ، ولكن الزوجة المحترفة طمأنته، ولبست النقاب ودخلت عليهما تقدم لهما الشاى، ولم يعرفها زوجها ، ونجا صاحبنا بفضل النقاب . فى تلك القصة كان النقاب هو البطل الذى يتظاهر بالفضيلة والعفاف ويخفى داخله الرذيلة والنفاق ، وتلك كانت وظيفة النقاب فى مصرفى العصر المملوكى حيث ساد التمسك بمظاهرالتدين دون مراعاة لحقيقة الدين وومنهجه الاخلاقى القائم على التقوى .
(2)
وقد جاء لمصر المملوكية الفقيه المغربى ابن الحاج ( توفى سنة 737 هجرية
وكتب فيها أروع الكتب الفقهيه وهو ( المدخل ) فى ثلاثة أجزاء ، واتبع فيه ما أسميته بالفقه الوعظى, أى ان الفقيه لا يتكلم فى الفقه بالمنهج التصورى والتخيلى مثل ( من فعل كذا فحكمه كذا ) ولكن بالمنهج الواقعى ، حيث ينظر الفقيه الى ما يجرى فى الواقع ويذكره ويعلق عليه منبها على خروجه عن الشرع مستخدما لغة الوعظ والارشاد. والفقه الوعظى بهذه الطريقة سجل الكثير من خفايا الحياة الاجتماعية التى اعتاد تجاهلها المؤرخون المتخصصون. ولذلك فان كتاب ( المدخل ) فى الفقه لابن الحاج يحوى بين سطوره معلومات تاريخية ثمينة عن الحياة الاجتماعية والدينية والاقتصادية فى مصر المملوكية. ولقد كتب الكثير عن أحوال المرأة وقتها ، وأبرز الكثير من الانحلال الاخلاقى الذى كان يجرى تحت النقاب وهو الزى الرسمى والشعبى للمرأة فى العصر المملوكى فى مصر وخارجها.مثلا .. كتب الفقيه ابن الحاج أن المرأة فى القاهرة المملوكية كانت لها حرية الخروج من بيتها كل أيام الاسبوع عدا يوم واحد ، وانها كانت تخرج من بيتها متنقبة فاذا ابتعدت عنه أسفرت عن وجهها وخالطت ـ اى صادقت وصاحبت ـ الرجال حيث لايعرفها أحد، فاذا عادت واقتربت من بيتها تنقبت .وأقول إنه من هذه الحال الفريدة جاء التعبير المصرى عن المرأة الفاجرة ( دايرة على حل شعرها ) أى طالما هى فى المجتمع الذى يعرفها فهى متنقبة ، فاذا خرجت من نطاقه خلعت النقاب ودارت هنا وهناك تبحث عن صيد من الرجال و حلّت شعرها لدى أول طالب لها. وكان هذا حال معظم النساء التى تحدث عنهن ابن الحاج وغيره فى العصر المملوكى، وبالنقاب كانت المراة تخرج الى الموالد والافراح والى القرافة ( أى مدافن القاهرة ) وحفلات الأذكارالموسيقية التى يختلط فيها الذكر الصوفى بالرقص والطرب وتناول الحشيش و ممارسة الفواحش العادية والشاذة. وكانت تلك مفردات الحياة الاجتماعية المملوكية ، ظاهرها التدين باقامة الموالد و الأذكاروزيارة الأولياء الأحياء وأضرحة الموتى منهم وقبورهم المقدسة، وباطنها الانحلال الخلقى . وفى هذه المسرحية العبثية كان البطل الأعظم هو النقاب الذى يعلن الفضيلة ويخفى الرذيلة..المظهر السطحى ـ النقاب ـ هو البطل هنا. مثله مثل الشعار المقدس للعصر المملوكى وهو تطبيق الشريعة ، وتحت هذا الشعار المقدس دارت أفظع جرائم الاستبداد والتعذيب والظلم والفساد، وفى ظل كل هذه الجرائم أقام المماليك أروع المبانى الدينية التى لا تزال تحفة معمارية تزين القاهرة حتى اليوم ، من مساجد وخوانق ورباطات وزوايا، بنوها بالسخرة والعسف والظلم والمال الحرام. وتحت نفس التدين السطحى المظهرى ـ ايضا ـ انتشر الانحلال الخلقى فيها وحولها متمتعا بالنقاب
(3 )
وقد فوجىء العلامة عبد الرحمن بن خلدون بمظاهر الانحلال المعتاد و الطاغى فى شوارع القاهرة دون ان يستنكره أحد من علماء الشرع وقتها، فقال متعجبا عن القاهرة " وللاينكر فيها اظهار أوانى الخمر ولا آلات الطرب ...ولا تبرج النساء العواهر ولا غير ذلك مما ينكر فى بلاد المغرب . ". الفقه السنى الحنبلى المتشدد كان مسيطرا على شمال افريقيا حيث كان يعيش ابن خلدون قبل انتقاله لمصر، وبسبب سيطرة التشدد السنى فى المغرب وشمال أفريقيا فقد كان منكرا التظاهر بشرب الخمر و حفلات الموسيقى والطرب، وكان ممنوعا ظهور النساء العواهر فى الطريق. فلما جاء الى القاهرة المملوكية وجد كل ذلك منتشرا بسبب سيطرة التصوف وعقيدته القائمة على عدم الاعتراض. ولكن المشترك وقتها بين مصر وشمال افريقيا هو النقاب ، فالمرأة المصرية حينئذ كانت تتصرف كيفما تشاء طالما كانت ترتدى النقاب ولا يتعرف عليها أحد. وقال المقريزى فى كتابه المشهور( الخطط ) عن المصريين فى ذلك العصر " ومن أخلاقهم الانهماك فى الشهوات والامعان فى الملاذ وكثرة الاستهتار وعدم المبالاة ، وقال لى شيخنا عبدالرحمن بن خلدون ان أهل مصر كأنما فرغوا من الحساب " . أى فرغ حسابهم فى الآخرة وضمنوا الجنة ولم يعودوا ملتزمين بأى التزام خلقى أو دينى. المقريزى هنا ـ متأثر بما قاله شيخه عبد الرحمن بن خلدون ، وقد حكى المقريزى عجائب من مظاهر الانحلال الخلقى فى ( الخطط المقريزية ) وقت أن كان النقاب هو الرداء الشرعى للمرأة ، ولا سبيل لخروجها بدونه. وتحت شعار النقاب كان فجور المرأة علنا فى الشوارع طالما لا يتعرف عليها أحد. يقول المقريزى فى الخطط : ولقد كنا نسمع ان من الناس من يقوم خلف الشاب أو المرأة عند التمشى بعد العشاء بين القصرين ، ويجامع ( أى يمارس الجنس مع المرأة أو الشذوذ الجنسى مع الشاب ) حتى يقضى وطره وهما ماشيان من غير أن يدركهما أحد لشدة الزحام واشتغال كل أحد بلهوه ..)
(4 )

ووصل الفجورالى أماكن العبادة مما دعا السلطات المملوكية الى تطهيرها من أصحاب الفجور كما حدث بالنسبة للجامع الأزهر سنة 818 وبالنسبة لجامع الحاكم 822 هـ .واشتهرت المؤسسات الصوفية بذلك حتى كانت وثائق الوقف عليها تشترط تعيين خفراءلطرد راغبى المتعة الحرام منها !!!وازدهر الانحلال الخلقى فىالموالد ـ ولايزال ـ حتى أن السلطان جقمق أبطل مولدالبدوى 851 بسبب ما يقع فيه من مفاسد فاقيم مولد أخر بالقرب من المحلة الكبرى ليتنفس فيه الفجور بحكم العادة !! وكانت المرأة تذهب لتلك المناسبات الدينية تلبس النقاب بحكم العادة أيضا !! والدولة المملوكية التى احترفت التدين وتطبيق الشريعة كانت تأخذ الضرائب من البغايا وتسميه" ضمان المغان" وكان للبغايا زى معروف وصفه المقريزى فى الخطط ، وارتبطت مهنة البغاء بالعجوز القوادة والمكارى الذى تركب العاهرة على حماره وهى ترتدى النقاب فى غاية الاحتشام!!وأحيانا كانت السلطة المملوكية تمنع خروج المرأة ليلا لتحد من الفجور ، وتطرف بعضهمفى عقاب النساء اللاتى يخرجن ليلا فكان نصيبه السخرية من النساء ، ولذا قلن فى الامير دولات خجا سنة 835 ( راحت دولة عمر ـ أى عمر بن الخطاب ـ وجت دولة خجا...)"وفى سنة 836 تندرت النساء على الامير منكلى بغا المحتسب الذى كان يضربهن مائى جلدة اذا خرجن ليلا ، فكتبت النساء فيه اغنية راقصة يقلن فيها: لا تمسك طرفى منكلى خلفى علقته ميتين قلّ ما يعفى . وكن يرقصن بهذه الاغنية وهن يرتدين النقاب !!!
( 5 )
ونقول للاخوات المؤمنات العفيفات:ان النقاب بدعة لم يعرفها عصرالرسول عليه السلام، اذ كان وجه المرأة وقتها مكشوفا معروفا ، فالله تعالى يقول للنبى "( لايحل لك النساء من بعد ولا أن تبدل بهن من أزواج ولو أعجبك حسنهن) : (الأحزاب /52 )" والحسن فى الوجه . والله تعالى يقول عن مجتمع المدينة فى عصر الرسول محمد عليه السلام ( والمؤمنون والمؤمنات بعضهم أولياء بعض، يأمرون بالمعروف وينهون عن المنكر ويقيمون الصلاة ويؤتون الزكاة ويطيعون الله ورسوله) ( التوبة 71 ) فهنا تفاعل اجتماعى حى ونشط يقوم على الايمان والتقوى والأمر بالمعروف والنهى عن المنكر والتناصح بالخير. ولا نتصور حدوثه فى مجتمع النقاب والنفاق.هناك ارتباط بين النفاق والنقاب ـ فالنقاب رسالة موجهة للبشر تقول فيها من تتخفى خلف النقاب : انظروا ايها الناس اننى مؤمنة تقية نقية. مع أن الأولى أن تتجه النفس البشرية لله وحده بالتقوى والعفة و الخشية فى الخلوة والسر قبل العلن. وهناك ارتباط بين النقاب والاستعلاء على الاخرين ، ليس فقط فى أنه رسالة لهم بالتميز عليهم ولكن أيضا لأن المتنقبة تعطى لنفسها الحق فى أن ترى الاخرين وتقتحمهم بعينيها دون أن تسمح للاخرين بأن يعرفوا هويتها ومن هى.الأفظع من ذلك أن النقاب استعلاء على الله تعالى وشرعه ودينه.النقاب فيه مزايدة على شرع الله تعالى ، وقد حرّم الله تعالى أن يزايد أحد على شرعه فقال : ( يا أيها الذين آمنوا لا تقدموا بين يدى الله ورسوله واتقوا الله إن الله سميع عليم ) ( الحجرات 1 ) فالله جل وعلا لم يحرم كشف وجه المرأة ، فكيف يأتى بشر من الناس ويجعل الحلال حراما ؟ هل يتهم الله تعالى بالتقصيرفى التشريع ؟ هل يتهمه جل وعلا باباحة الفاحشة على أساس أن وجه المرأة عوره وسفورها فاحشة؟ هل هو أعلم من الله جل وعلا بالدين والعباد ؟ ؟ اليس الله تعالى هو القائل ( ألا يعلم من خلق وهو اللطيف الخبير ؟ ) ( الملك 14 ) أهو يعرف الخلق أكثر من الخالق جل وعلا؟ أهو صاحب الدين وصاحب الشرع ام الله تعالى ؟ ألم يقل جل وعلا عن ذاته العلية ( وله الدين واصبا أفغير الله تتقون ؟ )( النحل 52) أى أنه جل وعلا هو مالك الدين ومالك يوم الدين وصاحب الحق الوحيد فى التشريع ، وأنه ليس لأحد أن يحل ما حرم الله تعالى أو أن يحرم ما أحل الله جل وعلا.الذين يحرمون ما أحل الله تعالى يعتدون على حق الله تعالى فى التشريع ( المائدة 87 ) ويدخلون ضمن من قال عنهم ربنا الواحد القهار ( أم لهم شركاء شرعوا لهم من الدين ما لم يأذن به الله ؟ ) ( الشورى 21 ).ان تعبئة المرأة فى النقاب ليس اهدارا فقط لكرامتها الانسانية ومحوا لشخصيتها البشرية التى تتحدد بالوجه الذى به تعرف وتتميز عن غيرها ـ ولكنه أيضا تضييع لاقامة الشريعة الاسلامية الحقيقية التى ترتكز على الشاهد والجانى والمجنى عليه. فاذا كانت المرأة جانيا أو مجنيا عليها أو شاهدا فلا يمكن التعرف عليها وهى فى النقاب .من حق أى انسان أن يرتدى ما يشاء فى ظل القوانين المرعية. ومن حق المرأة ان تتنقب فهذه حريتها الشخصية, ولكن إذا ارادت ان تقرن ذلك بالاسلام وتجعله شعارا لدين الله تعالى فقد وقعت فى عداء مع الله تعالى لأن الدين الالهى ليس ميدانا للتلاعب السياسى والفقهى وليس مجالا للتنابذ بالأزياء والجلباب والألقاب والنقاب.إن التقوى الاسلامية تعامل خاص بين العبد وربه تعالى الذى يعلم خائنة الأعين وما تخفىالصدور والذى يتقى الله تعالى ويخشاه بالغيب ليس فى حاجة لأن يعلن ذلك على الناس.لقد كان العصر المملوكى عصر النفاق الدينى حيث شاع الفجور وتقديس الأولياء، وعبادتهم وممارسة الانحلال تحت شعار النقاب وفى حماية الأولياء وشفاعتهم المزعومة، وظلالأمر كذلك الى أن بدأت الصحوة الاجتماعية بقاسم أمين . ولكن أطاحت بها ما يسمى بالصحوة السلفية التى تهدد بعودة ظلمات القرون الوسطى ..
***********************************************************
تعقيب أحمد فى جروب اتكلم واسمع على الفيسبوك
مره واحده قربتي كانت لابسه نقاب كانت ماشيه في الشارع معها شويه حاجات عوزه (المفروض) ان حد يشيل معها و انا عديت جنبها معرفش هي مين (مش هساعد واحده معرفهش و اتفهم غلط ) كمان هي مشفتنيش الا بعد شويه مكنش ينفع تنادي والسبب ايه......طيب انا غلطان و لا هيه اللي مش عمله مساحه رؤيه كويسه.....طبعا النقاب بيساعد في كل الحاجات دي .....بس اللي ناويه تعمل حاجه هتعملها و لو علي بابها 100 شنب بيحرسوهاالمفروض نتحول من ممارسه العاده الي ممارسه العباده بمعني لو لبستي النقاب اعملي بيه لانه حجه عليكي يوم القيامه .مش عجبك اخلعيه وكفايه عليكي منه الدين مش هيذيد علشان واحده لبست ولا خلعت هي اللي ربنا هيحسبها ع اعملها

Wednesday, July 2, 2008

مولــــد ســـيدى بلـــوج


موضوعى فى مجلة على صوتك الالكترونية
مولـــــــد سيــدى بلــــــوج
مشكلة تؤرق كل الناس من كل الناس هي التدوين . ولأن التدوين جاء طبيعيًا كالتطور الطبيعي للحاجة الساقعة ، فالتدوين هو التطور الطبيعي للمنتديات والمتعاملين مع شبكة الإنترنت .
ولأن الجميع رافض لكل القيود ، ولا يستطيع تحمل فكرة قيود في الإنترنت أو المجتمع الافتراضي ، والذي عايشه الكثير من خلال منتديات أو ساحات حوار ، كان هناك من يفرض عليهم قيود بعدم نشر آرائهم أو تقويضها ، فكان التطور الطبيعي أن ينشئ كل منهم بلوج خاص به أو مدونة خاصة به ، لينعم بقليل من حرية ربما افتقدها في حيا
ته الخاصة أو العامة أو حتى الافتراضية .
ولكلٍّ الحق في كتابة ما شاء ، أي أنها أصبحت المتنفس له ، ومن حقه أن يرفض فكرة شخص آخر أو معارض له في الرأي أو يستخدمها كبوق ليروج بها أفكاره ، فأصبحنا كأننا في سوق عكاظ ، كل منا يتحدث وتختار من تختاره للاستماع له ، وإن وافقتك الفكرة فحاور صاحبها ، وإن لم توافقك فبضغطة على لوحة المفاتيح تتركه وشأنه . ولأننا في سوق عكاظ أو سوق المدونين ، فمن الطبيعي أن تجد توجهات كثيرة ، فمنهم المعارضين ، ومن يلزم الحيادية ، ومنهم من هو عكس ذلك تمامًا . منهم من يستند في رأيه إلى حقائق ، ومنهم من يكتب رأيًا ويصر عليه دون أي سند ، ومهما حاول أي شخص آخر تصحيح الرأي لا ينصت له . وهناك نسبة من المدونين تجهل كيفية التعامل معه وتتعامل كأنها في المنتدى شكرًا ومشكور ، لأنهم مؤمنون بأن النت في المجمل عبارة عن عالم وهمي ، ومنهم من يتناسى مشاعر الآخرين ، ويتناسون أن الطرف الآخر الذي يخاطبهم إنسان يملك أحاسيس ، وهذا من يتمتع بغرور وتكبر وجهل وحقد دفين .
أيضًا من هو صاحب رأي وفكر يثير النقاش حول قضايا سياسية ومجتمعية تهم المواطن والمسؤول ، ولإثارة ردود فعل تكون في غالبها للمصلحة العامة .
وهناك أيضًا من يحاول الوصول إلى الآخر من خلال فكر وتعاليم ، لينشر علومه ويستفيد من علوم الآخرين ، ومن يهرب من واقعه يحاول نسيانه أو تناسيه ، فلكل إنسان همومه وآلامه ، فيود الهروب إلى عالم وأشخاص لا يعلمون عنه الكثير .. وهناك من يرى في الواقع ما ينقصه ، فيعوض النقصان من خلال ما يطرحه في مدونته .
ومنهم من هو أداة في يد من هو أكبر منه أو يوجهه ، فهو بيدق على رقعة شطرنج يستخدمه آخرون ، وهناك الموالون ، وهم بالكاد حالهم كالمعارضين ، ومن بين هذا وذاك تجد هناك من اتخذ من هذه الفكرة لعرض آراء جيدة من الممكن أن نستخدمها أو تؤثر فينا إلى شيء جيد . وقد تجد راكبي الموجة ، المهم أنه يكتب ، فتارة تجده مواليًا وتارة أخرى تجده معارضًا ، وربما تجد أفكاره متناقضة في بعض الأحيان .
وبالرغم من ذلك ، فإن هناك الكثير من الصعوبات ، وأشخاص لا يهمها سوى إثبات رأيها ولو بالقوة ، تعارض من أجل المعارضة فقط ، لا يوجد لهم هدف أو قضية معينة ، المهم هو إثبات الرأي .. عالم المدونات عالم خيال وحلم وواقع ، أي عالم مليء بالمتناقضات .. وهناك من يتخذ من التدوين حرفة لنقل معلومة ما أو حدث ما ، ومنهم من تجده يهتم بالأخبار المثيرة ، وهناك من اتخذ من المدونات بديلاً عن الورقة والقلم القديمة ، وأصبحت هي بمثابة مذكراته الشخصية ، ربما وجد من يروق لهم أفكاره .. المهم شئنا أم أبينا أصبحت واقعًا ، بل أصبحت تهم أناسًا كثيرين في مجالات عدة .. هكذا أصبح التدوين
( مولد وصاحبه حاضر ) .
علـــــى الهامــــش
يمكن اتاخر شوية فى الردود
اصل عقبال عندكو لمينا عزالنا وهنروح نعيش فى المحافظة ذات نفسيها
لكنى هفضل متابعه اصلى احتليت على اللاب توب بتاع محمد وحرمته من النت لمدة اسبوع يعنى كدا كدا موجودة
هو بس يومين نرتب نفسنا فى السكن الجديد وارتب الكافيه بتاعى الجديد وارجع ادوشكو تانى
وميرسى جدا جدا لكل حبايبى الحلوين اللى باركوا لى سواء ميلات او تليفونات
***********************************************************
ســــــؤال جديــــــد
على مدونة برنامجنا الإذاعى
أنت تسأل والكمبيوتر يجيب
والذى يذاع يوميا الساعه 9.10 صباحاً ما عدا يوم الجمعه
على إذاعه البرنامج العام
الســـــؤال هــــو
تسمح لى اقرا افكارك ؟شكرا
الأشاره حمراء الأشاره خضراء صفراء لافرق فانت متاخر متاخر عن موعدك ....ايه كل العربيات دى؟
المرور متوقف لا يتحرك وبعدين لو اقدر اطير!؟؟؟
وتفكر وتسرح ....ما هو السكه واقفه....تفتكر حيخترعوا سيارات تطير؟؟؟؟
ونحب نعرف منك بماذا اجبت .
اهلا وسهلا بارائكم واقتراحاتكم
تمنياتنا بدوام التواصل