Desert Cat Search
قطه الصحراء: 5/1/08 - 6/1/08

Friday, May 30, 2008

انـــا فـــى الإذاعــــه ....

انا فى الإذاعه ... اه وربنا

اتذاع لى بوست ( قسوة .. حنين )
حقيقى الحلقة جامدة جداً
واجمل ما فيها انها فى البداية بدأت بصوت حبيبتى الرائعة فيروز
انا بجد بشكر جدا استاذ / صلاح حجازى
لأن من الواضح ان الحلقة معمول فيها مجهود كبير اوى
لأنها طالعه متميزة جدا جدا ومختلفه جدا
أعدها الاستاذ صلاح حجازى بكل دقه وجمال
واذاعتها الاستاذه عبير بصوت كله رقه
ودى العنواين اللى ممكن من خلالها تتابعو الحلقة بتاعتى واى حلقات سابقه ليها
بالطريقة اللى فى الكومنت
sal said...
قطة الصحراء تحياتى يمكن الآن سماع حلقة برنامجنا الأذاعى عن مدونتك بالدخول الى
موقعنا والضغط على عنوان رسالة قطه فى بوكس جديد اضفناه للأرشيف اى الحلقات السابقه
CAT MESSAGEمكتوب العنوان فى البوكس كده وهو تحت صورة اسرة البرنامج الى اليسارونفس
نفس الشىء ممكن من مدونتنا ونحب نسمع آراء الجميع فى هذا التجديدالعناوين هى الموقع
المدونه
تحية خاصه حاره لصاحبة هذه المدونه اسرة برنامج انت تسال والكمبيوتر يجيب
************************************************************************
اشكر اسرة البرنامج شكر خاص جدا جدا
وتحية تقدير وإحترام للإذاعى الكبير الأستاذ / صلاح حجازى

Thursday, May 29, 2008

حاولـــت تعمــل حاجــه ؟؟؟؟

حاولت تعمل حاجه ؟؟؟ كل واحد مننا ربنا خلق له عقل وقلب وكل واحد ليه احلام وطموح نفسه يتحقق ... كلنا عارفين ان وضع البلد مش حلو ومش كويس ولا يصلح والجو العام من حوالينا كلنا واحد ومفيهوش اى اختلاف ... لكن فى فعلاً اللى بيسعى لتحقيق حلمه او طموحه ومش بينكسر من أول مرة وبيحاول مرة والتانية .... وفى برضه اللى من اول مرة يعمل دقن ويعتزل الحياة باللى فيها ... بس ده مش الحل ... الحل انى احاول مرة والتانية والوقعة اللى متكسرنيش تقوينى وتزيدنى اصرار على اصرارى ده مش كلام شعارات والله انما الحل بسيط جدا وسهل وهو عامل الاستمرار وضمان النجاح وطبعا النجاح بيد الله وهو وحده الضامن ... لكن برضه ربنا قال فى الحديث القدسى " انا عند ظنى عبدى بى " .... احنا كلنا متفقين ان الحكومة خلاص مش هتعمل لنا حاجه وهما بنفسهم بيجيبوا لنا اعلان القطر والطالب الجامعى اللى القطر فاته لكن الصنايعيى كسيب واتجوز وبيحوش كمان يا بخته وربنا يزيده... ليه مش كل الناس تتحد مع بعضها ... بس بشرط يتوفر بينا الحب .. يتوفر بينا اننا فعلا عايزين نعمل حاجه ونساعد بعض وناخد بايدين بعض .. ومش نعمل فى بعض مقالب ... والحكومة كمان عليها عامل كبير يعنى مش يكون لسه مجموعة شباب بيبتدوا اول خطوة فى مستقبلهم وتحقيق طموحهم وتلاقيها تجبرهم على قفل المشروع من قبل ما يبدء ضرايب وتامينات ورسوم عدم النظافه وحوارات ملهاش اى وجود فى البلد اصلا كل الموضوع اننا بندفع فلوس على حاجات عبارة عن وهم ... انا مقولتش ما ياخدوش ضرايب بس ربنا اسمه الرحمن الرحيم ... وبكدا المجتمع كله هيستفاد من المنظومة كلها

تعالوانلقى نظرة سريعة على العالم من حوالينا ... هتلاقى فى جميع البلاد الاوربية وساعات العربية مش كلها علشان الناس الى عندها بترول مانتخين شوية ... بيشتغلوا وبيدرسوا فى وقت واحد من سن 16 سنة بيبتدى يعتمد على نفسه ... يعنى بيكون لسه فى ثانوية عامة ... لكن احنا عندنا هنا الشاب عنده 30 سنة ولسه قاعد فى بيت باباه وبياخد المصروف احيانا من ماما وده دافع كبير هيشتغل ليه ما فى مكان عايش فيه وفى حد بيديله مصروف .. انا مش بقول نسيب بيوت اهالينا ونروح نعيش فى الشارع ... احنا اصلا وضعنا ميسمحش ولا عندنا الثقافة اللى تؤهلنا لكدا ... بعض الناس لوخرجت الشارع مش بترجع البيت الا بمشاكل بيعاكس على الناصيه دى وبيمشى ورا واحده على الناصية التانية وقاعد على الانترنت فى الكافيه اللى على الناصيه التالته يعمل شات شوية ومنتديات شوية ومشكور يا غالى .. وتسلم ايدك موضوع جنان ... الف الف مبروك لمصر انها كسبت انسان زيك يا غالى قاعد يتفنن فى كتابه كلمة تسلم ايدك بانهى طريقة ... فريق تانى مقضيها طول النهار مسلسلات على افلام على قنوات الرياضة يالهوووى التى فى نفسه ذهق منه والود وده يصرخ ويقوله ارحمنى يا اخى ابوس ايدك اعتقنى لوجه الله شوية ... ولو يقدر يوصل لاقرب قسم هيروح يعمل فيه محضر ... خطف تى فى وتعذيبه ... وزى ما فى النماذج دى فى كمان نماذج جميلة جدا ومشرفه والواحد يفتخر بيها فاكرين احمد الشاب الجامعى اللى بيبيع جرايد ... فيه منه كتير جدا .. هو مش الحالة الفريدة ... احنا مش محتاجين اكتر من شوية امل وعزيمة وتعاون برضه علشان الناس اللى عندها هواية فى فرقعه البمب من تحت لتحت ونحاول نسعى لتحقيق طموحنا مش نتكسر من اول محاولة ... ومحتاجين كمان مساعدة المسؤلين ... خصوصا اللى بيحطموا امال الشباب ... وبكدا بلدنا بدل ما هى من سيئ لأسوء ... هتكون بينا احنا احلى ... وقبل ماالبلد هتستفيد احنا كمان هنستفيد
ها بقى .. حاولت تعمل حاجه ؟؟؟؟
****************************************************************
زميلتنا بسمة عبدالباسط توفى احد اقربائها
اسالكم جميعا الدعاء

Monday, May 26, 2008

أكــل لحـــم ميــــت

لاء مش قصدى الفراخ المصابة بأنفلونزا الطيور ... ولا لحم الحمير الميتة القضية الشهيرة فى الفترة الأخيرة

ولو أنها أخف وطأة من أكل لحوم البشر بعضهم لبعض .... ولا أقصد أيضاً بعض القبائل البدائية من آكلى لحوم البشر ولكن مقصدى هنا هو الغيبة والنميمة .... التى سادت وأنتشرت بشكل مقزز ... أثناء تواجدى فى أحد التجمعات العامة كان يجلس بجوارى رجلين يتكلمون بصوت مسموع .... فى البداية كان حديثاً عادياً وما لبث أحدهم ان ذكر اسم شخص فأخذ الآخر يعدد من سيئاته وينتقل بالحديث من شخص لشخص آخر والغريب أنه لا أحد ممن ذكرهم توجد به حسنة واحدة ترضى الله ... وكأنه هو الملاك ذو الأجنحة البيضاء الذى هبط لنا على الأرض فجأة .... عجبت حقاً ووجدت نفسى اتسائل إن الله سبحانه وتعالى نهى عن محاسبة البشر لبشر آخر فما بال من يجلس ويجمع حوله الآخرين ليغتاب هذا ويلعن ويسب هذا ويخوض فى عرض ذاك ... أهذا الشخص متناسى قول الله سبحانه وتعالى " ايحب أحدكم أن يأكل لحم أخيه ميتاً " ( صدق الله العظيم )
أهذا الشخص ومن هم على شاكلته من يخضون فى أعراض الناس متناسين " كما تدين تدان والديان لا يموت "
وهنا تذكرت مناقشه بينى وبين احد الاشخاص عندما سالته لماذا عندما يرى اسم شخص كان صديق ودود له او يتحين الفرص هو لذكر اسمه ليظل يسب ويلعن فيه فاجابنى لانه انسان كداب ... طيب كذب عليك فى ايه ؟؟ كان بيوصلنى كلام على لسانه من ناس قريبين ليه .... وبتصدق ليه انا مؤمنة بمبدأ إذا سمعت أذناك لابد أن ترى عيناك ... كان جوابه لاء هو كداب ومنافق والقاء العديد من السباب الى مالا نهاية فكان لابد من قفل النقاش قبل ما اصاب بهارت اتاك .... وفى النهاية اكتشفت الموضوع مكانش كدب قد ما هو كان موقف واختلاف لم يوافق هوى الشخص الذى كنت اتناقش معه ... الهذا الحد اصبح من يختلف مع رؤيتنا وهويتنا انسان كداب ومنافق و العديد من الاتهامات ؟؟؟؟
.... واعود بفكرى الى عالمنا الالكترونى لاتذكر البعض يجلس خلف شاشات الحاسب باسماء مستعارة ويظل يسب ويلعن وفى النهاية يستشهد بآية قرآنية قاصص منها ما يتناسب مع هواه ... وكأنه اثناء سبه والخوض فى عرض الناس يظن أنه يعمل عمل عظيم او كانه يجاهد فى سبيل الله ليختتم كلامه اللاعقلى بقول مأثور او آيه قرآنية وكأنه اثناء غيبته للآخرين كان متلذذ بطعم لحم أخيه الذى كان يغتابه ..... وهنا اذكر نفسى والجميع بحديث الرسول صلى الله عليه وسلم
( إن المفلس من أمتي يأتي يوم القيامة بصلاة وصيام وزكاة، ويأتي قد شتم هذا، وقذف هذا، وأكل مال هذا، وسفك دم هذا، وضرب هذا، فيعطى هذا من حسناته، وهذا من حسناته، فإن فنيت حسناته قبل أن يقضى ما عليه أخذ من خطاياهم فطرحت عليه، ثم طرح في النار! ) صحيح مسلم

Saturday, May 24, 2008

اثبـــت ثبتـــك الله

محدش يتفاجأ محدش يستغرب خلاص اتعودنا من المهدى عاكف صاحب أقوى تصريحات متناقضة فى التاريخ ... فمنذ فترة ليست بالبعيدة أصدر تصريح قوى البنيان شديد البيان بأن تنظيم القاعدة صناعة أمريكية ... ولأن الأرض قروية وتجيد فن اللف والدوران قام بنقض هذا التصريح وبين يوم وليلة اصبح اسامة بن لادن مجاهد ... والمجاهد مهدى عاكف يرسل تحية للمجاهد اسامة بن لادن ... اللى تسبب فى قتل 3000 مدنى فى برج التجارة ... واكيد كان منهم مسلمين ... ماهو مش كل امريكا كفار وفاسقين خارجين عن الملة .. يعنى لو حد من عيلتك كان فى البرج وقت ما اتفجر كنت هتقول ايه على بن لادن مجاهد برضه ؟ ... المجاهد بن لادن اللى اتربى فى حضن الامريكان وجاهد ضد السوفييت ... اه ماهو القتل والخراب دلوقتى جهاد حتى لو علشان اكسب الود ... وانتوا انصار المجاهدين والتاريخ على مر العصور شاهد ابتداء من مقتل النقراشى مرورا بالخازندار ومحاولة قتل جمال عبدالناصر ... واخيرا وليس اخرا ارهاب طلبة واساتذة الازهر .. وطبعا رايك فى بن لادن اللى قولت عنه صناعة امريكية ورجعت نقضت التصريح تانى بانه مجاهد .. ومش قولت رايك فى الظواهرى ... بحكم انه الرجل الثانى فى تنظيم القاعده .. مجاهد برضه ولا ايه ... اللى يدعو لتوجيه الضربات داخل الكيان الصهيونى فى الذكرى الستين للنكبة مجاهد من وجهة نظر سيادتك ؟؟ ...
المثير للتساؤل هو ليه دايما مفيش تصريح بترسى فيه على بر يعنى بتقول كلام وبعد كام يوم ترجع تعكسه .. هل هو عامل السن مثلا .. ام بيتجدد فى الأمور السياسية أمور ؟؟؟ فايام التعديلات الدستورية اعلن نواب الجماعه انسحابهم من مجلس الشعب علشان رافضينها ... وقرار الانسحاب كان بالليل طلعت الشمس على القرار ساح ... ولاقيناهم تانى يوم بيتنططوا فى المجلس .. واظن ان الجميع مازال حاضر فى ذهنه التصريح الطويل العريض فى 2 ابريل للحث على الاضراب ويا سبحان الله يوم 4 ابريل طلع محمود عزت يتبرأ من الاضراب ومن التصريح كمان ... تضارب التصريحات بتاعتك كترت وذلات لسانك بقت اكتر ... المعارض بالجزمة وطز فى مصر وشعب مصر وكل ده ولسه محكمتش امال لما تحكم ايه اللى هيحصل ... لو حضرتك عندك زهايمر ماهو السن برضه احنا مقدرين ... ممكن تعين لك نائب ينسق لك التصريحات المتناقضه ويتكلم هو فى الصحافة منعا لذلات اللسان
تحديـــــــــــــث
فى أحد الكومنتات وصلنى هذا اللنك من الاستاذ محمد حسن
وبعدما طالعته لا أدرى أهو رجل دين أم بلطجى
اتهام مرشد الإخوان بالتهجم علي جارته الإيطالية

Wednesday, May 21, 2008

سياســـة القهر

كلنا متفقين إن المجتمع كله عايش فى قهر بسبب الجمايل التى لا تعد ولا تحصى من حكومتنا الرشيدة واللى كل يوم تغرقنا بيها فى صور مختلفه

لكن لما يبقى القهر مننا لبعض .... لما نكون عايشين فى مجتمع واحد واللى بيحصلى هو نفسه اللى بيحصلك ..... يبقى كدا محدش يستغرب من حالة الحقد والكره اللى غزت المجتمع من حوالينا ... حاضر هقولكوا انا بقول الكلام ده ليه
الصبح توجهت لإحدى المصالح الحكومية أخلص أوراق خاصة بالسيد الوالد .... طبعا الأوراق دى المفروض هو اللى يخلصها بنفسه ... لكن لاسباب صحية مينفعش وبما إن انا الوحيدة اللى قاعده له فى البيت فانا الوحيدة برضه اللى معايا توكيل بالتصرف فى الاوراق محدش يفهم غلط ... اوراق بس .... وبناء على هذا التوكيل قمت بالذهاب الى المكان المنشود وهنا تفضل الموظف المختص وسألنى على بطاقتى ... اتفضل ... مسك البطاقة وفضل يبص فيها ... انا شكيت ان البطاقة مزورة بصراحة ... وبعد ما ظنونى قعدت تودى وتجيب ... لاقيته بيقولى يعنى ايه مساحة جوية ... قولت له ده تخصصى يا فندم ... راح قالى وبتشتغلى فين بتخصصك ده .. قولت له فى حالة لو هشتغل بتخصصى ده يبقى اولى بيا موطنى الاصلى وهو الهيئة العامة المصرية للمساحة ... راح قالى يعنى انا دلوقتى اكتب مهنتك ايه فى الورق اللى قدامى ده ... قولت له اكتب اللى قدامك فى البطاقة ... يعنى انتى بتشتغلى كدا فعلا ... هو مكتوب فى الورق بشتغل ولا حاصله ؟؟؟ ... امال بتشتغلى ايه ... انا صاحبة كوفى نت .. راح راكن الورق فى جنب وابتسم ابتسامة عريضة ..... خير يا فندم فى حاجه ؟؟؟ لاء .. بس ايه علاقة دة باللى مكتوب فى البطاقة مش بتشتغلى فى تخصصك ليه ... بطر بعيد عنك .... هو فى حد فى البلد دى بيشتغل فى تخصصه ... عمرك ما شوفت خريج تجارة بيشتغل مهندس ولا خريج هندسة بيشتغل مندوب ... اه على رايك ... فى الوقت ده دخل واحد ولسه الراجل بيقوله صباح الخير ... لاقيت الموظف اللى كان قاعد منشكح وضحكته من الودن للودن قلب على شكل ديناصور ويقوله انا مش قولت لك لما ورقك يجى هبقى ابعتلك ... انت ايه اللى جابك اتفضل من هنا ... الراجل بمنتهى الاستكانة حقك على راسى من فوق يابنى ولف بضهره ورجع .... مهما وصفت مستحيل اقدر اعبر عن حالة الذل والانكسار اللى الراجل خرج بيها ... وبعد ماخرج قعد يكلم نفسه ويقول الواحد هيلاقيها منين ولا منين ... كل شوية دوشة وورقى جه من الوزارة ومجاش ... قولت له اللى انا اعرفه ان الشخص المضغوط هو اللى بيتعامل مع الناس بالطريقة دى بعنى مثلا عنده زحمة شغل وكل واحد بيساله من ناحية وهو مش ملاحق على طلباتهم يعنى عنده ضغط شغل مع ان برضه مش مبرر انه يعامل الناس كانهم جايين يشحتوا منه مش جايين مصلحة حكومية المفروض انها محترمة .... قالى وانتى ايه عرفك انتى شايفه الاوراق دى كلها مطلوب تخلص النهارده ... وراح واخد بطاقتى والتوكيل وقالى انتظرينى دقيقتين وجاى ... وانا قاعده مؤشرات عقلى كلها عمال تعمل حوادث مع بعضها .... هو مش المفروض ان ده المكان المخصص لخدمة المواطنين ... والمفروض انه له حق عندهم .. حتى لو توقيع على ورقه اسمه حقه لان الموظف ده قاعد هنا لخدمته وخدمة غيره .... هو بياخد مرتب من جيب الشعب كله ... مش علشان يخلص لهم خدماتهم ولا علشان يطلع عليهم حالة الحقد والكره اللى اتولدت عند الغالبية بسبب الاحساس بالخيبة والعجز من تغير واقع مستبد او نابعه من التربية نفسها كاحساسه بالدونية او نسب وضيع او تحصيل علمى دون المستوى ايا كان بقى الشخص سواء كان موظف او حتى مدير مراجيح مولد النبى ... بتتولد جواه حالة من الحقد والكره تخليه يمارس سياسة القهر على اى حد لأنه دايما حاسس ان الشخص اللى قدامه احسن منه ... واثناء وانا قاعده اصلح الحوادث اللى حصلت من رد الفعل اللى حصل قدامى دخل الموظف ولاقيته بيقولى وقعى هنا ... خلصت الاوراق وخلاص همشى لاقيته بيقولى مش قولت لى مش بتشتغلى فى مجالك ليه ... قلت له لما الاقى نظرية " انطونينى اتمحت من المجتمع ... قالى نعم مين ده ... قولت له ابدا ده واحد كنت قريت له مقولة جميله جدا زمان بيقول فيها
" يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه "

لاقيته بيقولى يعنى ايه
قولت له من فضلك البطاقة

Monday, May 19, 2008

ثقافــــة محدثـــــى النعمــــــه

جميعنا يتعامل فى حياته اليومية مع انواع واشكال مختلفه من البشر .. سواء فى العمل أو فى الشارع او فى الاسواق ... فيوجد من يترك اثر سلبى وهناك ايضا من يترك اثر ايجابى ... فنرى الراقى فى اخلاقه وفى جميع تعاملاته نجده يسبقه رقيه .... ونرى محدث النعمه وذلك الذى رصيده من الرقى الروحى والنفسى والإنسانى = صفر ... لقد تأملت كثيراً فى ذلك النموذج فوجدته لا يفرق بين ذكر واثنى حتى وان اختفلت ثقافتهم او شكلهم الخارجى .. فمنهم المصاب بمرض القمع التربوي المستبد و الحرمان العاطفي و منهم إرهابيون مصابون بهوس الاضطهاد و عقدة المؤامرة و من بينهم من يحملون فى يمينهم صكوك الغفران و بيسارهم الجحيم الأبدي لإخافة المرضى و المشوهين و معهم تائهون و فقراء وجهلاء ... وإن حاورهم الشرفاء والصادقون والمتنورون على ندرتهم تجدهم يكيلون لهم الاتهامات جزافا وينعتونهم بالفاظ خاليه من كل ذوق وادب ... والغريب انهم يقولون على نفسهم مثقفون ... وهنا أتساءل أية ثقافة تلك التي يتحدثون عنها ؟ ثقافة الرعاع و محدثي النعم التي تمحي كل يوم هوية الأوطان .... ثقافه منحطة مريضة و غير قابلة لأى علم حديث لأنها ثقافة عدوانية لا تملك القدرة على المحاورة و التعامل بثقة مع الثقافات الراقية ... و مازال بكل خبث مرضى هوس الاضطهاد و عقدة المؤامرة يلقون على مسامع البسطاء و الجهلة أفكارا عقيمة لا حظ لها من المعرفة و العلم و لكنها قادرة بسهولة على الانتشار بين الضعفاء و التعساء و البائسين نفسيا و روحيا لأنها لا تخاطب عقولهم البليدة و المعاقة عن التفكير إنما تُخاطب الجانب المريض في شعورهم المكبوت .... إذن هنا لا تقتصر ثقافة محدثى النعم على من هم نتاج مجتمع وبيئة تفتقر لابسط مستلزمات الحضارة وأنعدام الخدمات العامة وفجأة لقيوا نفسهم فى مستوى مكانوش يحلموا بيه بطريقه أو بأخرى .... أياً كانت الطرق فمعاملته مهما اخفى حقيقته بتكون واضحة وضوح الشمس إذا كان هذا الشخص محدث نعمة أم انسان مولود بالفعل وفى يده ملعقه ذهب مثلما يقال ... فإحداث النعمة لا يقتصر على نقل الانسان من بيئة الى بيئة ولكن ايضا من فكر الى فكر وهنا اتذكر مقوله
سيدنا على رضى الله عنه " اطلبوا الخير من بطون شبعت ثم جاعت فان الخير فيها باق ولا تطلبوا الخير من بطون جاعت ثم شبعت فان الشح فيها باق "

Saturday, May 17, 2008

طيب ما احنا اغنياء اوى اهوه

دخلت المصريون والاقى فى وشى الخبر ده
جمال مبارك وأحمد عز وحسين سالم يشاركون في فعالياته .. 20 مليون دولار تكلفة استضافة مصر لمنتدى دافوس و10 ملايين للحراسة والتأمين
امال ايه بقى
الشعب عمال يعيط والناس مش لاقيه تاكل ليه
بتطلعوا اوشاعات على الحكومة يا شعب منك له ليها ليه
من كام يوم قريت خبر فى المصرى اليوم انهم بيرحلوا كل العمال المصريين اللى فى جنوب سيناء وشرم
يعنى قطع ارزاق العمال علشان ايه
خايفين على وفد منتدى دافوس احسن عينيهم تقع على مصرى ياااااى المصرى اصبح حاجه وحشه اوى مينفعش حد يشوفوه احسن اللى يشوفوه ممكن يجى لهم عمى فى عنيهم
المصرى اللى عنده استعداد يعمل اى حاجه علشان لقمة العيش حتى يرمى نفسه فى المحيط للسمك مش مهم بترحلوه من بلده
وتقطعوا عيشه
علشان تصرفوا ملايين الدولارات علشان الوفد اللى جاى واللى هى برضه من جيبوهم وجيوب اهاليهم من ضرايبنا ومن الرسوم اللى بتخترعوها لنا كل يوم ... انتوا ايه معندكوش دم
انتوا مش حاسين ان كدا بقى اوفر اوى والوضع زاد عن حده بشكل مبتذل
مبتسمعوش عن الناس اللى مش لاقيه رغيف العيش
الناس خلاص بقت ماشيه تكلم نفسها
ارحموا من فى الارض يرحمكم من فى السماء

Friday, May 16, 2008

من فضلكو سيبوا الجميع ياخد فرصته

أعتدت يومياً فى الصباح وانا فى طريقى الى عملى شراء جريدتى المفضلة الدستور .. ولكن منذ أيام قليلة بدأت تصدر على النت فأكتفيت بمطالعتها كمثيلتها .. ولكن اليوم مينفعش أطالعها على النت كان لازم اشتريها مش لان معنديش نت .. لكن اليوم محمد سيعود لعمله وهذه جريدتنا المفضلة سويا ... اعتدت يوم سفره لازم انا اللى اجيبها له ... كما يفعل هو نفس الشيئ .... ولكنى لا اشتريها من أى بائع فهو فقط بائعى المفضل ... شاب فى بداية العشرينات ... يعمل بائع جرائد وطالب جامعى فى نفس الوقت ... ذهبت الى مكانه ولم اجده انتابتنى حيرة مذهله .. توجهت للسوبر ماركت الذى كان يجلس بجواره وسالت الشخص الموجود عليه فأجابنى أمشى قدام شوية حتلاقيه فى الميدان ... مشيت وعينى بتدور عليه فى جميع الاتجاهات . فرحت جدا لما عينى وقعت عليه ... وتوجهت اليه مسرعه .. ازيك يا احمد ؟؟ هو انا اغيب يومين ارجع الاقيك مغير مكانك ... امال لو غبت شهر هتعمل ايه ؟؟؟ حأهاجر يا بشمهندسه ... يا ساتر يارب .. ليه كدا وبعدين هى الهجرة سهله كدا ... إنت ليه غيرت مكانك يا احمد ؟؟؟؟ أجابنى بإنكسار .. والله غصب عنى زى ما حضرتك عارفه مكانى هناك من زمان وكل زباينى عارفين المكان ده ... لكن أعمل ايه بتوع البلدية منهم لله ... بيضايقوك ؟؟؟ دول بيقرفونى مش بيضايقونى بس ... طيب ما انت هناك من زمان إشمعنا الايام دى ... لأ هما كدا على طول انا بقسم معاهم الرزق اللى ربنا بيبعتهولى بالنص علشان يسيبونى فى حالى والايام دى انا داخل على امتحانات ومحتاج لكل جنيه وعلشان فى يوم مش اديتهم رموا لى الجرايد فى الشارع ... وبنعيب على الحكومة لما ناس مننا فينا وعايشين نفس الحياة اللى عايشينها وبيعملوا فينا كدا هى البلد دى مش ناوية تنضف بقى ... طيب خلينا منطقيين ... ماهو الجنب اللى انت كنت بتقعد فيه صاحب السوبر ماركت عارض فيه كراتين شيبسى يعنى كدا كدا مشغول .... هل بيعملو معاه كدا ؟؟؟ مش عارف والله بس بجد انا زهقت من كل حاجه مبقتش قادر أواصل ... انا كتير بقعد اقول يارب خدنى علشان استريح ... يا احمد عيب انت شاب مثقف واصبر ان شاء الله خير ... الا قولى مفكرتش تأجر محل صغير كدا تبتدى فيه ... ضحك ضحكة كلها مرار ولاقيته بيقولى انا مش عارف اعمل كشك حتى .. ليه يعنى ... إجراءات معقدة وكل مكان ادخله لازم ادفع .. لحد والله كنت بستلف وانا رايح اعمل الترخيص وفى الاخر السيد المسؤل فى المجلس حط الورق فى الدرج وقالى فوت علينا بكره ... الكلام ده فات عليه شهور وكل لما اسال بكره لحد ما بقيت حاسس مفيش حاجه اسمها بكره .. لاء والنبى بلاش نبرة اليأس دى احنا مش هنفضل فى ليل على طول وباذن الله الشمس هتشرق قريب اوى بس انت اتحمل شوية ... مش عارف ارد اقول لحضرتك أيه بس انا حاسس إن الدنيا كلها متقفلة فى وشى حاسس انى مش قادر اتنفس من الجبال اللى كاتمه نفسى ... وقتها أنا اللى معرفتش أرد عليه ... حسيت بثورة جوايا لكن للاسف ثورة عاجز لا يملك الطاقة ولا السهولة لتفجيرها ... حسيت بتأنيب ضمير طيب إزاى اللى بيدمر بنى ادم بالشكل ده علشان جرة قلم بيعرف ينام ويستريح .... حسيت بالتمرد على كل قوانين العالم وتجاوزها حسيت انى محتاجه اصرخ واعلن باعلى صوتى يا قوة الزمن لن تكسرينا أو تثنينا على أهدافنا او تقتلى امانينا ... قطع احمد شرودى ولاقيته بيقولى انا اسف يابشمهندسه والله اسف ... اسف على ايه بس يا احمد انت عملت لى حاجه ؟؟ لاء اصلى لاحظت انك سرحتى وملامحك أتغيرت ... لا ابدا مفيش حاجه .. ادينى الدستور لو سمحت .. اخدت الجريدة ومشيت مش شايفه اى حاجه من الشارع كل لما ابص على حاجه قدامى اجدها ما هى الا اضافه سرياليه للفنان البوهيمى .. ادخل بخيالى لاى مصلحة حكومية ... لأرى ذلك المسؤل الجالس على كرسى والجميع من حوله ينادونه بالقاب مختلفه لينالوا توقيعه الكريم ... وعندما يأتى له شاب دون ان يكلف ذلك المسؤل خاطره بعمل معاينه للمكان المحتاج ترخيص من عدمه يرمى الاوراق فى الدرج حتى تهترئ ... حينها فقط اراه شيطان فى ثوب رجل ... واعود بفكرى لواقع المجتمع فالدكتور يريد ان يصبح ابنه دكتور والمهندس يريد ان يكون ابنه مهندس واستاذ الجامعه كذلك ... ويبذل قصارى جهده للترقى بابنه فى اعلى الدرجات حتى ولو كان يفتقر الى ما يؤهله لهذه الدرجة ... ونفس الدكتور او المهندس او استاذ الجامعه حينما يتقدم له شاب من الطبقه المتوسطة يتغاضى عن مستوى ذكائه وتقديره العلمى لياخذ ورقه ويرميه جانباً حتى يهترأ ... ألهذا الحد نعود بأيدينا للطبقية .. ألهذا الحد اصبحت البلد وسية لمن يملك المال والنفوذ اما العامة فلا يحلمون بالوصول اليهم ... فابن البواب محكوم عليه ان يظل بواب حتى لو كان حاصل على درجة الامتياز ... اى بلد محترم بتستغل طاقات الشباب وتوفر لهم الدعم حتى تساعدهم على الاستثمار ... شباب مصر مش عاله عليكو يا سادة .. دى بلدنا ولينا حق فيها زى ما ليكو .... من فضلكو سيبوا الجميع ياخد فرصته.

Tuesday, May 13, 2008

الإرهاب الفكرى = عقل متعفن

انت مختلف معايا يبقى انت ضدى يبقى استحمل الاتهامات اللى هرميها عليك ... يا ألف اهلا وسهلا باحدث طريقة للارهاب الفكرى

احتار البعض من مدعى التدين والثقافة فى تصنيفى وتحديد هويتى .. ولكنهم فى النهاية اجمعوا انى علمانية كافرة ... ولا ادرى ما علاقة العلمانية بالكفر فى حالة لو العلمانية اساسا تهمه يحاسب عليها القانون .. ولا أدرى ايضاً مالهم بهويتى الشخصية ...

ألسنا نعيش فى دولة مدنية اى الدولة التى لا تفرق بين مواطنيها على اساس دين او جنس او لون او عرق

الا يعلموا هؤلاء الجهلاء ان لا علاقة بالعلمانية بالكفر ومعنى العلمانية فصل الدين عن الدولة اى عندما يختار أي منا مرشحا لأي منصب يجب أن يختاره لأنه قدوة وذو سمعة طيبة ويرفع برنامجا واضحا وليس لأنه يرفع شعارا مكتوب عليه أنا متدين

لسيت العلمانية هى الدعوة للانحلال والرشوه والفساد كما تفضل احد المتاسلمين وترك لى كومنت يحمل تلك الكلمات التى تنم عن فهم ووعى ثقافى وذكاء حاد

ومن الواضح انه هو ومن تركوا كل ما وراؤهم وامامهم واجتمعوا على تصنيفى ولاى هوية انتمى .. لا يعلمون ان العلمانية تؤمن بالمساواة و اننا مادمنا نخدم ذلك الوطن فكلنا متساويين فى جميع الحقوق و الواجبات

ولكن كيف يعلمون وهم لا يؤمنون بحرية الاعتقاد و كل شخص حر فى اختيار دينه وأرائه بكل حريه

كيف يعلمون وهم من وضعوا الخطط لإلغاء إحدى أهم مواد الدستور المصرى من حق المواطنة لأنهم لا يؤمنون ان المواطنة حق لكل الاقليات فى المجتمع وكأن المجتمع حكر لهم فقط

مازلت اتسائل لما كل هذه الحيرة فى شخصى الكريم كل ذلك لأنى أرفض الطائفية

ليس من حق اى شخص مهما كان دينه ان يستأصل انسان او ان يفقد انسان حقه المشروع فى القيام بواجباته او التمتع بحقوقه المدنية ومهما اجتمعوا ساظل اعلنها انا ارفض جميع اشكال الارهاب و التطرف و التعصب الدينى الاعمى

فالدين لله والوطن للجميع
وليس من حق اى متاسلم ان يحتكر الدين لتحقيق اهدافه ومساعية الشخصية وليست اللحية هى دليل الورع وليس غطاء الوجه هو دليل النقاء والحياء فاكررها لمن يكرهون سماعها وكان على راسهم البطحة التى اضع فيها ملح من لم تحترم قطعة القماش التى تضعها على وجهها فهى كيس زبالة اسود متحرك ...
فكما يعلم الجميع عن المتأسلمين انهم على استعداد لاتباع شتى الطرق للوصول إلى معتقداتهم واهدافهم الشخصية .. فلماذا لا تكون عندهم الشجاعة لتسمية الأشياء بأسمائها .. .
ولكن ما يحدث الان من اجتماعات حول هويتى وكيفية تصنيفى ماهو الا دائرة صغيرة داخل مجتمع يوجد به العديد من نشر الفكر المتطرف .. واجماعهم على انى علمانية واسعى لنشرها ولنفترض .. اذن هنا لدى افكار اوجهها وهذه هى حريتى الشخصية ... افيدونا بافكاركم ان كان لديكم اين جديدكم من ابحاث علمية وثقافية تفيد المجتمع ... اين انتم من الحداثة والمنهج العقلى ... لم نرى منكم أى تطور محسوس فلا تملكون الا السنة متطاولة لمن يخالفكم الرأى ومشايخكم من اصحاب الفكر الوهابى لا يقدمون سوى فتاوى الخبث والفتنة وارضاع الكبير والثعبان الاقرع .. ماذا فعلت جماعتكم المنتشرة فى المغرب والجزائر ومصر والامارات ... فلم نرى منها أي مشروع حضاري غير أعمال الارهاب والقتل والتكفير فالجزائر و فلسطين ليسوا ببعيد
فالى كل محبى الفتنة والغيبة والنميمة

موتوا بغيظكم وعلى قلوبكم حجر

تحديــــــــــث

التحديث عبارة عن كومنت للدكتور ضياء النجار

ولانه قيم ويحمل الكثر من المعانى والعبر هضيفه فى البوست

مواقف من سيرة الرسول صلى الله عليه وسلم ونرى إن كانت تصب في خانة العلمانية من عدمه:أولا: عندما توفى إبراهيم ابن النبي صلى الله عليه وسلم - وكان في سن الطفولة الباكرة- حزن النبي صلى الله عليه وسلم عليه حزناً شديداً، وفي ذلك اليوم كسفت الشمس فأراد الناس أن ينظروا إلى كسوف الشمس على أن السبب فيه هو موت إبراهيم ولكن حتى في هذا الموقف شديد الحزن على قلب الرسول أبى الرسول صلعم إلا أن يرد الناس إلى العقل والتفكير العلمي، إلى العلمانية، بعيدا عن اقحام الدين في ظاهرة طبيعية مثل الحياة والموت، فقال لهم: (إن الشمس والقمر آيتان من آيات الله لا يخسفان لموت بشر ولا لحياته، فإذا رأيتم ذلك فادعوا الله وكبروه)

ثانيا: في غزوة بدر سأل الحباب بن منذر الرسول صلى الله عليه وسلم عن مكان التعسكر الذي اقترحه الرسول صلى الله عليه وسلم وقال له: "يارسول الله .. أهو منزل أنزلك الله إياه ؟ أم هو الرأي والحرب والمكيدة ؟". فرد عليه الرسول " لا بل هي الحرب والرأي والمكيدة " .. وعندها قال له الحباب :" إذاً ليس هذا بمنزل" وأشار الحباب على النبي بمكانٍ آخر. وبقية القصة معروفة. إنه موقف جديد يدل على "علمانية" الرسول، ولولا أن الصحابة كان يعرفون عن الرسول أنه "علماني" في توجهاته الحياتية لما طرحوا سؤالا يفصل بشكل واضح الدين مثل الوحي عن الأمور الدنيوية مثل امور الحرب. وهناك مواقف اخرى في السيرة

وبمناسبة علمانية الرسول صلى الله عليه وسلم احب : لما الرسول أمر المسلمين بالهجرة الأولى إلى الحبشة وهو يعلم أن من يحكمها ملكا مسيحيا، أي أنه لم ير غضاضة في أن يكون جماعة من المسلمين تحت إمرة ملك مسيحي، وقال مقولته المشهورة عن عدل هذا الملك وأنه لا يظلم عنده احد، ألم يكن هذا السلوك سلوكا علمانيا محضا؟

أشكر حضرتك جدا دكتور ضياء على التوضيح وما يحمله من مواقف من حياة الرسول صلى الله عليه وسلم مودتى واحترامى وتقديرى

العلمانية نشأ هذا المصطلح في فرنسا في القرن التاسع عشر وكان يصف المساعي الرامية إلى تقليص تأثير الكنيسة على الدولة وعلى الحياة العامة، وفي عام 1905 صدر قانون بشأن فصل الدولة عن الدين، والعلمانية توجه مضاد لرجال الدين ولكنه ليس مضاد للدين بشكل عام

"علمانية" كلمة معادلة للكلمة الإنجليزية "Secularism" (سيكيولاريزم) وتعني إصطلاحاً فصل الدين والمعتقدات الدينية عن السياسة والحياة العامة وعدم إجبار الكل على اعتناق وتبني معتقد أو دين أو تقليد معين لأسباب ذاتية غير موضوعية. ينطبق نفس المفهوم على الكون والأجرام السماوية عندما يُفسّر بصورة مادية بحتة بعيداً عن تدخل الدين في محاولة لإيجاد تفسير للكون ومكوناته.

( المصدر ويكبيديا العربى + موسوعه مايرز )

Sunday, May 11, 2008

مداخـــــلات

على فكرة انتى لغز كبير أوى ... عندك قوة وجبروت واستبداد غير عاديين وعندية بس بالرغم من كل ده لذيذه

هههه اه لذيذه بالمكسرات ... بس ايه المدح الشبيه بالذم ده

انتى ليه كدا ... ليه فيكى كم الاختلافات دى كلها عن جنس حواء

لاء انا مش مختلفة عن حواء انا حواء وحواء انا ... انا بس بكره صورة امينة الست الضعيفة المغلوبة على أمرها ... بكره اوى الست اللى قررت برغبتها ان الرجل يتعامل معها على انها جسد من غير ان ترهقه فى الدخول الى اعماقها ... قررت بنفسها تدوس على مشاعرها فى مقابل الاستقرار بالرغم من ان مفيش اساسا حاجه اسمها استقرار بدون حب ..... اكره جدا الست اللى تسمح لنفسها انها تنام داخل عقل رجل يتعامل معها مثل صابون الحلاقة ... فيستخدمه متى يشاء ويزيله كيف يشاء ....

على فكرة بقى ... انتى قوية ومفترية

لاء خالص انا قولت لك قبل كدا انى انسانة عادية

بس محبش المرأة اللى تلقى بنفسها للتهلكة تحت مسمى نظرة المجتمع ... من اختارت الحياة كما يريدها الرجل بحجة انها انثى لا تستطيع المقاومة .... من تمارس متعة الظلم حتى ادمنتها ... فتجدها فى كل احاديثها انا مظلومة انا مضطهدة حتى وان كنت تتعرف عليها لاول مرة ...

بس مينفعش نتناسى المجتمع لاننا شرقيين

انا مقولتش نتناسى المجتمع لاننا عايشين فيه مش شرقيين وبس .. لكن الناس متفرضش عليا حياتى .. من حقى احقق احلامى وطموحاتى فالحلم والطموح ليس مقصور على الرجل ... ولا يوجد شئ اسمه نجاح رجل ونصف نجاح انثى .. قرار رجل ونصف قرار انثى ... لمعان رجل ونصف لمعان انثى ..... اثبات الذات مفيهوش حاجه اسمها راجل وانثى

بس مينفعش حياة الست تختزل فى الشغل والطموح وتحقيق الأحلام

وانا مقولتش انها تختزل حياتها لازم يكون فى توازن لانها برضه ليها مشاعرها اللى مينفعش تتجاهلها فالموضوع هنا نسبة وتناسب .... لكن انا اللى يهمنى الخروج من افلام الابيض واسود ... يهمنى اوى المونتاج ومقص الرقيب لحذف مشاهد هترجعنا لورا آلاف السنين بالرغم من اننا فى القرن الواحد والعشرين ... لكن مازالت هناك اصناف متعددة فمنهم من تقدر على موازنة حياتها وهذه اتمنى لها كل التوفيق .. وتوجد ايضا من لا تصلح الا للمتعة والانجاب ومسح الحمام ودى اسخم واضل سبيل من اكياس الزبالة السودة المتحركة اذن هنا لابد من المونتاج ومقص الرقيب

على فكرة انتى عليكى تشبيهات تودى الى ما وراء البحار

اه سمعت الكلمة دى قبل كدا ... بس رأى وانا حره فيه

Thursday, May 8, 2008

إذا حضر عمرو خالد ... ذهب يعقوب وحسان والحوينى

دخل الداعية العلامة عمرو خالد قناة الناس برجله اليمين خرج منها بالشمال يعقوب وحسان والحوينى
هل يا ترى ايه السبب
يمكن علشان عمرو خالد واخد ايه الار تى لحسابه حكر واعلان وصلات الدش اللى بيتحفنا بيه كل شوية والتانية قال يعنى الوصلة حرام والدش حتى لو بتشغل عليه القنوات المشفرة حلال ده ايه الدين الحديث ده يا حضرة الداعية الا هو مين اللى لقبه بالداعيه ما علينا مش مشكلتنا دلوقتى
بس فى حاجه غريبة بتحصل هما مشيوا وسابوا له قناة الناس ليه
ولا يمكن غيرانين منه علشان دخله وصل من البرامج 2.5 مليون دولار فقالوا هو ورانا ورانا جاى يقاسمنا فى رزقنا هنا
زرع السطوح بطاطس ... ودهن الهوا دوكو وكمان جاى ورانا قناة الناس ... العبوا سوا يا شيخ ولا يا داعيه منك ليه
مش عيب لما تقعدوا طول النهار تقولوا قال الله وقال الرسول وتيجو تتخانقوا مع بعض كدا امال فين التسامح والحب والمودة ولا انتوا اقوال لا افعال
قسموا الناس اللى مسلماكو دماغها تلعبوا فيها براحتكو على بعض
وقسمو السبوبة مع بعض بالتساوى
اتفقوا سوا على فتوى تزرعوا فيها السطوح بطاطس تزرعوها كوسه المهم عيب تتفضحوا كدا على الفضائيات وفى النت

يعقوب وحسان والحويني ينسحبون من قناة الناس بسبب عمرو

اقروا اللنك ده واللى يعرف السبب الحقيقى يتصل على 0900
يربح بطاطسية من اللى فوق السطوح هدية فورية

Wednesday, May 7, 2008

صباحو خناقات ... بركاتك يا علاوووة

من امبارح عمال ادفع فى المواصلات الضعف ... الصبح قبل ما اركب لاقيت السواق بيقولى الاجرة دوبل يا اوستااااذه .. مش رديت عليه اصلى بامانة على الصبح لما برد على حد يبقى ربنا يكفيه شرى وشر اللى بقوله وبالتالى علشان معملش مشاكل بفضل قلة الرد بدل ما ابتدى اليوم بقسم ولا مستشفى .... وانا مروحه بالليل مناااااااااحه فى الميكروباص واحد شكله راجل وقاعد يقول انا هخلى العيال الكبيرة تبطل دراسة ... الواد الكبير فى اولى جامعه يقعد كلهم لحد الاعدادية ويقعدوا فى البيت انا هجيب له مواصلات منين الواد عايز مواصلات بس للزقازيق عشرة جنيه طيب واخواته الباقيين ياخدوا ايه وياكلوا منين اذا كان مرتبى كله على بعضه 400 جنيه ابص جنبه على حد يرد عليه مش لاقيه اتارى الراجل طلع قاعد بيكلم نفسه .... قولت اكسب فيه ثواب وارد انا علشان الناس متاخدش عنه فكرة انه اتجنن ولا حاجه وقولت له هو ده الحل يعنى انك تقعد ولادك من التعليم علشان تعرف تعيش .... قالى امال عايزانى اعمل ايه معنديش اى مصدر دخل غير وظيفتى ... انتى ابوكى هيعمل ايه وانا اعمل زيه ... قولت له انا ابويا مش هيعمل حاجه اصل للاسف انا اخر حاجه عنده والكبار كلهم عندهم بيوت ومنهم الى سابوا البلد وهجو منها خالص وانا الحمد لله بشتغل وبصرف على نفسى وبالتالى ابويا مش عامل ولا هيعمل .... قالى طيب انتى واحده عيشتها كويسة بتبصى علينا احنا ليييه ما تخليكى فى نفسك ومش تتحشرى فى حياة الناس ... قولت له تصدق انا غلطانة انا اللى استاهل انى حبيت اساندك واوسيك فى الوكسة اللى البلد كلها فيها دى ... مش عارف تتشطر على اللى خلوك تكلم نفسك جاى تتشطر عليا انا .... شعب مش بيجى غير بزيادة الاسعار صحيح .... الصبح جاية فى الميكروباص .... قاعده قدامى واحده ست دفعت له الاجرة القديمة اللى متعودين عليها قالها الاجرة جنيه يا ست قالت له مش هدفع غير نص قالها طب انزلى ... قالت له مش نازلة ومش هدفع غير نص ... راح مفرمل وقالها مش شغل عافية هو كل حاجه سعرها زاد وانتى مش احسن من الناس دى كلها قالت له يابنى انا نازلة قريب وبعدين انا راكبة الصبح بنص جنيه .... رد واحد من اللى قاعدين ورا قاله يا سيدى اطلع وانا هدفع لك الفرق متاخرين على اشغالنا ... راحت الست قالت لاء محدش يدفع لى حاجه انا هدفع نص جنيه بس .... راح السواق مسمع للجميع الشخرة اللى هيا اللى تصحى الميتين بامانة ربنا يعنى حاجه كدا مستوردة اتخن شنب فى بلاد الانجليز ما يعرف يعملها ... ويلللللللللله كله هينزل انا مش شغاااااااال انا مش بتاع شغل يعلن ام دى بلد بنت تييييييييييت ... يلعن دى حكومة بنت 60 تييييييييييت ... كل واحد دفع اجرته ياخدها انا مش شغال انا طافحه من امبارح ... انا روحت للدكتور بالليل علشان زورى وجعنى من المناهده مع الناس طول النهار حتى الدكتور ابن التيييييت رفع سعر الكشف ....... والله كان هاين عليا انزل اطبطب عليه واقوله معلشى والف سلامة عليك ياريس لاء بلاش ياريس احسن يدينى بضهر ايده ... الف سلامة عليك يا هندز .. بس قولت اشوف اخرتها ايه الاول ... والناس تتحايل عليه ويقولوا له متاخرين يابنى وواحدة ست قاعده تقوله حرام عليك انا مقدرش ااقف على رجلى اصلا انا رايحة للدكتور وده اللى طالع عليه البلد بنت التييييت والحكومة بنت 60 تييييت وانا اضحك والله ما كنت عارفه انا بضحك على ايه بس طلبت معايا ضحك مسخرة مسخرة يعنى ولا كانى كنت مش فى وعييى ولا حاجه .... ولد شاب واقف بيقولى انتى بتضحكى علينا ولا على اللى بيحصل لنا قولت له بضحك على نفسى .... وانت ايش اخششك بينى وبين نفسى والخاشش بينى وبين نفسى خشران .... وكل ده والناس عمال تتحايل على السواق وهو لسانه ربط على شتيمة البلد والحكومة وفى الاخر مفيش حل بقى قضيناها تكاتك .. ولسه بركب التوكتوك لاقيته بيقولى ها اخد 4 جنيه يا ابله قولت له ياعم اطلع اربعين عفريت لما يركبوك انت واللى رفعوا الاسعار ..... على فكرة انا دفعت 4 جنيه على مسافه هتاخد بالظبط 10 دقايق مشى .... طيب ايه هنفضل كدا ناخد على قفانا .... انا دمى محروق على الـ 4 جنيه اللى دفعتهم وكمان مش عندنا سجاير
حد شاطر وحلو كدا يبترع ولو بعلبة سجاير كيلو باترا انا راضية باللى مرسوم عليها فشة بايظة بس الاقيها بلدنا مفيهااااااااااااش
والدوفى دوف اللى عندى بح مفييييييييييش
بركاتك يا علاووووووة
تحديييييييييييييث
علشان ايه اقعد انا نص ساعه مش عارفه ادخل البلوج بتاعى
كل لما اجى افتح المدونة الاقي رساله فيما معناها منعطلكيش تعالى بعد نص ساعه
واسال كل اصحابى على الماسنجر مدوناتهم بتفتح وشغالة وزى الفل
ويعنى كدا الناس تشمت فيا وتقعد تقولى هنجيب لك عيش وحلاوة وحلاوة من غير عيش اصله مش موجود
طيب والنبى لو فعلا ظنون الناس اللى كانت بتتريق عليا دى صح يبقا الاخوة اللى قاعدين لى هنا هشششششششش يهوونا حبة
انا لا انا عاملة ثورة فى البلوج علشان اقلب نظام الحكم ولا منزله افلام سكس علشان تتفرجوا عليها وفى الاخر تقولوا بتبوظ اخلاق الشباب انا واحدة غلبانة بتيجى تفك عن نفسها بكلمتين
فى حاجات تانية تستاهل اهتمامكو اكتر منى ... وتستاهل تقفلوها نص ساعه ونص قرن كمان

Tuesday, May 6, 2008

مبروك علينا الخواذيق يارجاله

الف الف مبروك علينا جميعا
اضخم ارتفاع حصل فى الاسعار
الف مبروك لاصحاب السيارات اصحاب النصيب الاكبر من الخوذئه
من زيادة فى البنزين وفى الضرايب وفى الرسوم
الف مبروك للمدخنين .. اصحاب النصيب الاقل شوية من الخوذئه الزيادة فى اسعار السجاير
وانت داخل اى محطة بنزين يا حبيبى منك ليه ليها له تعملوا حسابكو انكو هتدفعوا الأتى بدل اللى كان فعل ماضى

البنزين 95 يباع بسعر 250 قرش
البنزين 92 يباع بسعر 185 قرش
البنزين 90 يباع بسعر 175 قرش.
السولار يباع بسعر 110 قرش.

وبهذه المناسبة القومية العظيمة بدءاً من زيادة العلاوات 30 % للموظفين و حيث ان الشعب اتخوذق جمعااااااء ....... جمعااااااااااء ..

اهديكو هذه الابيات

بلادي بلادي بلادي
لكِ سخطي وامتعاضي
***
مصر يا أم الأذلة
البلاد ناهباها شلة
والنظام بقى ريحته جلة
هي دي ريحة بلادي
***مصر يا ارض الجحيم
والعصا في المستقيم
والكبير * مهما يولو
لما في منقذ م الاعادي***
يا بلادي عيشي عرة
زي شجرة سنط مرة
وانسجي م الفقر صرة
وزعيها بالأيادي***
مصر اولاد ضحايا
في البحار ما لهمش راية
يغرقوا تبقي النهاية
وعلى الله اعتمادي
***بلادي بلادي بلادي
لكِ سخطي وامتعاضي
الابيات دى منقوووووووولة
ولو غبت ابقوا اسالوا عنى والنبى العنوان ميتهوش اى قسم شرطة اسالوا فيه

Monday, May 5, 2008

تم حذف كلمة كرامة من القاموس

كان يا مكان فى سالف العصر والأوان كان فى بلد اسمها مصر وكان الصغير قبل الكبير فيها كرامته متصانة وبيتعمل لهم الف حساب حيث كانت جامعة القاهره والتى اصبحت الان كازينو مشهور يتخرج منها الملوك والامراء العرب
ومع التطور الطبيعى للحاجه الساقعة تفننت حكومتهم الالكترونية الذكية والتى لا تعمل الا باللاب توب وواخدين وصلة من ايجى نت فى الشهر بـ 20 جنيه علشان يتابعوا اخبار الشعب من خلالها
ضاعت كرامة المصرى جوا بلده الشاب يبقى طول بعرض وزى الفل واهله صارفين عليه دم قلبهم وقبل ما يتخرج يكون حاجز مكان استرتيجى على القهوة اللى على ناصية شارعهم
وبخلاف الغلاء اللى جعل الشعب كله تحت خط الفقر
ومع تشبس الناس بأى بارقة أمل فقد كثر النصب وانتشر الفساد
فى البر والبحر
فى البر انتشار الرشاوى وفتح عينيك تاكل ملبن الموظف يقعد على المكتب فاتح لك الدرج ولازم تحط له الى فيه النصيب والا فوت علينا بكره يا سيد
فى البحر حيث يغامر الشباب ويسافرون ليموتوا غرقا ويكونوا وجبة شهيه لسمك القرش ويا حرقة قلب امك عليك يا ضنايا
وما زال مسلسل الاهانات مستمرا بدءا من تسفير بناتنا للعمل كخادمات إلى السعودية مروراً
بالصحفى الكويتى الشرشوح بعمل وصلة ردح للمصريين فتارة يشبههم بالدمامل وتارة اخرى مواسير المجارى اللى انفجرت واخيرا حدد لنا تسعيرة واننا لا نتعدى سعر الغسالة الكورية اللى كانت مامته بتغسل عليها فى بلدنا ايام ما كان لينا كرامة اييييييييييه
كانت اياااااااااام وعلى راى الست عايزنا نرجع زى زمان قول للزمان ارجع يا زمان
واليوم إبان تناولى شاى الصباح المظبوط قولت اتمشى شوية على النت ده حتى الكسل وحش وبيزود الوزن ولسه بدخل مصرواى والاقى ايه دهههههه
السودااااااااااااان
اغمض عنيا وافتحها مين دول تانى السوداااااااااااااااااااااان ياربى انا نسيت القراءة ولا اييييييه
ده ايه نحو الامية الى انا فيه ده ... اجيب حد محايد يقرى الخبر والاقيه برضه بيقولى السودااااااااااااااان
قال ايه مسلحون سودانييون خطفوا تسع مصرييييييييين
الخبر اهوووووه
مسلحون يخطفون 9 مصريين من مناطق حقول النفط بالسودان
حتى أنت يا بروتوس ..... مش دول اللى كانوا جايين لاجئين عندنا فى المهندسين باين ومش هما اللى كانوا عاملين الجناين خمارات ولما الامن واجههم عملوا مشاكل ده حتى لو هما على حق كانوا احترمونا فى بلدنا على اساس انهم لاجئين يعنى مش اصحاب بيت ماعلينا مش موضوعنا دلوقتى مش وقت المعايرة
انا نفسى افهم السادة المسؤلين مجودين فى الحكومة علشان ميييين ؟؟؟؟ هو فى شعب تانى غيرنا بيحكموه إذا كان بيحصل كل مصيبة ومصيبة ولا حد بيتحرك ولا حس ولا خبر ... طفلة اتقتلت وهى بتلعب قدام بيتها عادى مافى ستين داهيه حد قالها تلعب وبعدين تروح سماح فى الف سماح غيرها ....
بمبوطية انضرب عليهم نار ... والموضوع اتكتم عليه وكانهم ارتكبوا فعل فاحش فى الطريق العام
سودانييييين يخطفوا ولادنا طيب ايه ؟؟؟؟؟
السيد ابو الغيط مش محرج حضرتك من اللى بيحصل ده
جميع السادة المسؤلين ... مش مكسوفين من المرمطة اللى شعبكوا فيها
اما آن الأوان تحفظوا ماء وجهكوا وتعملوا اى حاجه لاودكو ولا مش فاضيين لنااااااا
لو مش فاضيين لنا مش عايزين نتقل عليكو خليكوا فى مصالحكو واحنا نشوف حكومة تانية تعرف تحترمنا علشان غيرنا يعرف يحترمنا فى بلدهم
وعلى راى الفنانة الشابة الصاعدة الموهوبة خيرية احمد اللى جوزها يقولها يا عورة الناس يلعبوا بيها الكورة
اهو ده بالظبط اللى بيجرى لنا كل واحد يلطش فينا شوية وبيلعبوا بينا كورة شراب كل واحد يشوط فيها شوية

Saturday, May 3, 2008

اول الـغــيــث

هو انا مش قولت
يعنى اللى ما اخدش باله انى قولت العلاوة هتتعوض من جيوبنا كلنا نفر نفر يراجع البوست اللى فات
هو مش قالهم أخلقوا موارد علشان العلاوات
بدءوا فعلا يخلقوا الموارد
من الصبح
من الصبح مين ده من الفجر
نازلين حملات الله ينور على المحلات التجارية والغير تجارية
حتى اللى قاعد فى الشارع يقول حاجه لله يا محسنين برضه بيروحوا له
تلاقى موظف داخل شايل شنطة معفنة تحت باطه وتلاقيه داخل يقولك انا الاستاذ بتاع من الغرفة التجارية هات اوراقك
واوراق عيلتك كلها وجيرانك
خرج موظف الغرفة التجارية داخل 4 اشخاص وبرضه فيهم واحد شايل نفس الشنطة اللى كان شايلها الشخص الاول ... مباحث الكهرباء
اخر ايصال فييييييين
اسمك وسنك وعنوانك ومقاس جزمتك
خرجوا بسم الله ما شاء الله
مباحث الأموال العامة جت
وبقول مباحث الاموال العامة والكهربا مش قولت الاداب علشان الناس اللى بتسمع كلمة مباحث وتحرف الكلام على مزاجها والله العظيم لو آداب لاقول ومش هخاف من حد انا مبخافش غير من ربنا ....
نرجع لموضوعنا
هو فى ايه بقى
الموظفين يزيدوا 30 % وياريتهم 200 % كنا قولنا الزيادة تستاهل المهرجانات دى كلها
طيب هو بيشوف الاوراق اللى بيطلبها بياخد البيانات ليه بقى ؟؟؟
حد يقولى ومش سالتيه ليه السؤال ده جاية تقرفينا احنا ليه
هرد جوا قناة استاكيوس وانا صوتى عالى طبيعى واقوله وحياة الغاليين سالته ... رد السيد المحترم وقالى ده مجرد روتين .. ولما قولت له نفس الكلمتين دول سمعتهم قبل كدا من زميل لسيادتك من سنتين بالظبط قالى مجرد روتين وبعد ما اخد بياناتى راح واخد بعضه وطالع على القسم عاملى محضر إدارة سيبر بدون ترخيص ... حلو كدا ومقطط على مقاسى وابن ناس ... ... امال الملف اللى فى امن الدولة ده يبقى ايه بقى تهريج مثلا .. ولا اسمى اللى موجود فى جميع الجهات الحكومية والغير حكومية ... مزاج عندى الشهرة والنجومية ... متقلقوش مش اتحبست الحكم كان غرامة 100 جنيه حار ونار فى جتتهم
طيب ايه انا النهارده مليت بياناتى يجى 5 مرات كدا لو على كل محضر 100 جنيه يبقى 500 جنيه ... كل موظف يدخل البلوج بتاعى يبعت لى الـ 30 % اللى اخدهم زيادة من الحكومة حتى لو مش اتعملى محاضر برضه ابعتوا الزيادة اذا كان ده اول الغيث امال السيول هتبقى ايه ؟؟؟
معلشى سؤال واقف فى زورى .... هى العلاوة مش 30 % ... امال لو كان المرتب اتضاعف مرتين ولا 3 مرات كان ايه اللى حصل
؟؟؟؟؟؟