Desert Cat Search
قطه الصحراء: 2/1/08 - 3/1/08

Wednesday, February 27, 2008

عــلامــة اســتفهــام ؟؟؟

أفقت من نومى دون ان اشعر بكسل كل يوم ... أنظر إلى عقارب الساعه .. إنها الثامنة والنصف صباحاً ... وهذا معناه انى لم أنم سوى ساعتين فقط .... أهذا أرق أم نشاط ... فليكن ما يكون .... طوال الاسبوع الماضى قبل نومى اقرر فى الصباح ساذهب لاستكمال الاقرار الضريبى ... واصحى من النوم متاخرة كالعادة ... وأأجل ليوم آخر ... أظن دلوقتى الوقت المناسب .... دخلت المأمورية .. على غير العادة فى كل عام .. نظام ملفت للنظر بشكل واضح .... فالمأمورية متقسمة لجان ... فهذا مخصص للسيارات .. وهذا للأشخاص .. وذاك للعقارات ... قبل كدا كان كله رز بالخلطة مع بعضه ... كل الموظفين قدامهم اجهزة كمبيوتر وبيخلصوا مصالح المواطنين بسرعة ... لم أستغرق سوى عشر دقائق فقط ... مليت الإقرار ووقعت عليه واتسجل على الكمبيوتر ونزلت وانا مش مصدقة .... معقول انا فى مصلحة حكومية ومعقول خلصت بالسرعة دى ...... إنه النظام لو إتبعناه فى كل شئ لأنجزنا ووفرنا معظم وقتنا اللى ضايع فى انتظار ... المشوار بعيد شوية من مأمورية الضرائب للشغل ... فضلت إنى أمشية .... لأنى بجد ماليش نفس للشغل ... عايزة اقعد لوحدى دخلت أحد الأماكن أشرب نسكافية وما اظنش انى ممكن اقابل حد يعرفنى هنا يقطع عليا خلوتى ... مسكت النسكافية بين يدى انظر اليه فى تحدى هل يمكن فصله عن اللبن بعد ان امتزجا سوياً .... وأجدنى أتسائل فى حدة أيمكن أن أنتزع من تعمق بداخلى بعد أن اصبح جزء من عقلى وقطعة من قلبى ... اااااه ياربى ساعدنى .... اشعر بنظرات من حولى تخترقنى ... انقل نظرتى من مج النسكافية اليهم وكأنى أتسائل هو شكلى مش من هنا ولا حاجه ؟؟؟ ... ولا علشان قاعدة لوحدى ؟؟؟... طيب انا ليه عاملة مشكلة .. وليه شايفة علامة الاستفهام .... انا مقتنعة ان كلنا بشر وكلنا بيمر بحالة من اللاوعى .... فمن الحمق الا اتجاوز طالما انا مقتنعة من داخلى ... ومن الظلم الا اغفر .... فالله سبحانه وتعالى بيغفر الذنوب فمن اكون بجوار عظمته ... افقت على صوت اعرفه جيداً ... إنها سارة ... ازيك بتعملى ايه هنا ايه قاعدة لوحدك ليه .... انا كويسة ... سورى يا سارة مضطرة امشى ... انا اسفه لو ضايقتك ممكن اسيبك لوحدك وامشى انا بس شوفتك حبيت اسلم عليكى ... لا يا جميل انا كنت ماشية خلاص .... رحت الشغل مع انى كنت قررت ما ارحش ... الوقت لا يمر .... لسه مفيش حل لعلامة الاستفهام المرسومة امام عينى ... بعد وقت كبير دخل صديقى الودود اون لاين .... وبدون ما احكى تفاصيل لاقيته بيقولى الحياة سهلة ... وكانها العصا السحرية التى القى لى بها ... فعلاً الحياة سهلة بس محتاجين نحبها .... اسدل الليل ستارة .... اتفقت مع الدقائق على قتل الوقت ... فلن اشعر به متثاقلاً لأنه سوف ينتهى .... تعمدت التأخير ... نفسى امشى فى شارع لوحدى .... دخلت فى طريق طويييييل..... لا يوجد به سواى الجو اكثر من رائع .... حسيت انى عايزة اجرى .... عايزة اصرخ باعلى صوت من غير ما حد يسالنى مالك ... او يتهمنى بالجنون ... وفجأة أسرعت فى خطوتى ... وكلما اسرعت فى خطوتى اكثر كلما احسست بالراحة .... وأخيراً وجدت إجابة لعلامة الإستفهام .... محتاجة أتنفس حرييييييييييييييية

Saturday, February 23, 2008

مــــن هــنـــا وهــنــاك


افكار مبعثرة ... إحساس بالتوهان ... ابحر فى عالم النت ... لاول مرة اشعر انى ممكن استغنى عنه ...
افتح ماسنجرى ولكنى اوف لاين ... اشخاص تدخل وآخرون يخرجون أفكر ... حقاً صدق المثل اللى قال وما الدنيا إلا ماسنجر كبيييييير ... افتح ماى كمبيوتر ابحث عن روياتى المفضلة ... اتصفح رواية الآمال الكبرى لتشارلز ديكينز .... ولما هذه الرواية تحديدا مع انى قريتها كتيييييييييير ... صوت من داخلى يووووه انتى رخمة اوى هو كل حاجه اشمعنا اشمعنا ما تقرى وتخلصينا .... اتصفح الرواية .... وسألنى الرجل ما اسمك ؟؟؟ .. اجب بسرعة .... فى نفس الوقت ينبعث من جهازى صوت ماجدة الرومى .. يسمعنى حين يراقصنى كلمات ليست كالكلمات ..... هنا يشرد ذهنى ... يا ترى كان بيقولها ايه ... علشان تبقى كلماته ليست كالكلمات ..... من بين افكارى يرن هاتفى ... امك تتصل بك احترس ... وطبعا دى النغمة اللى انا عاملاها لست الحبايب يا حبيبة ... وبالرغم من انى عارفة ان اللى بتتصل ماما ما هو عمال يقولى احترس برضه بصيت على الشاشة مش عارفه ليه .... عدت لاستكمال الرواية ... امسكنى بقوة وقلبنى رأساً على عقب ..... تصيح ماجدة الرومى ... يخبرنى أنى تحفته وأساوى آلاف النجمات .... يا بختتتتتتتتتك ... اللى عطاكى يعطينا يا ست ماجدة ... ثم اشرد بفكرى وافكر وافكر وافكر .... وفى النهاية اجد انى كنت لا افكر فى شئ .... يعنى انتى تعبانى معاكى من الصبح وعمال تفكرى وتفكرى وفى الاخر مش لاقية حاجه تفكرى فيها ..... ارحمينى بقى ربنا يرحمك دنيا واخرة .... وده يبقى عقلى الباطن .... وبينما اقنع عقلى الباطن بانى كنت اريد ان اشغله فى اى شئ بدل ما هو واقف زى عقارب الساعة اللى مش فيها حجر .... يقاطعنى رنين هاتفى ... ايوه يا ايمو ... هتروحى امتا .... اممممم مش عارفه ... طيب لو هتتاخرى رنى لى علشان اوصلك ... لاء مش تشغل بالك هروح لوحدى .... بعد مرور ثلاث دقائق .... ايوا يا ايمو ... ابقى تعالى روحنى ... اشرد بذهنى للمرة رقم كام مش فاكرة ... هو الشخص ده مستحملنى ازاى ... كتير بتنرفز عليه ... وكتير جدا بكون رخمة لدرجة مش بقدر استحمل انا نفسى وبزهق منها وبفضل ازعق فيها واقولها ارحمييييينى .... انتى يا نفسى رخمة وعصبية وبتتنرفزى كتير على اقرب الناس ليكى ... ناس كتير اوى بتزعل منك بسبب عصبيتك وشخطك فيهم لاتفه سبب ... الاقيها ترد عليا بكل رخامة .... لاء متخافيش .... اللى قريبين منك فهمونى كويس اوى علشان كدا مش بيزعلوا واللى مش قريبين وعايزين يزعلوا يتفلقوا ..... ارفع لها سبابتى وارفع صوتى عليها .... نظام خدوهم بالصوت و اقولها اسمعى .... انتى لازم تبقى اهدى من كدا شوية ... ولازم تفكرى فى كلامك الف مرة قبل ما تقوليه علشان مش نزعل حد مننا ولا نفهم الناس غلط ونزعل منهم ... تدينى ضهرها وتقولى انا حرة ومش تزعقى لى كدا تااااانى والا دورى لك على نفس غيرى .... تهورت وكنت خلاص همد ايدى عليها مع انى ضد الضرب .... بس قولت استخدم معاها نظام التعذيب فى المعتقلات يمكن تفوق لنفسها وتعترف .... ولم ينقذها منى سوى صوت احدهم يقف امامى .... يمد لى ورقه لو سمحتى محتاج اعمل البحث ده .... انظر لساعتى انها العاشرة والنصف مساءاً ..... وقبل انا انطق وكأنه فهم معنى نظرتى الى الساعه .... على فكرة انا مش عايزه دلوقتى ... ها اجى اخده بكره على العصر ... كويس .... اممممم كويس .... والآن جهازى العزيز

Shut down

أغداً ألقاك
؟؟؟؟؟

Thursday, February 21, 2008

إلتماس للشركة الثالثة للمحمول ( إتصالات يعنى )

حد فيكو يا جماعه ليه علاقة بأى مسئول فى شركة المحمول الثالثة ( إتصالات ) لاء انا مش عايزة اشتغل فيها ولا حاجه ولا عايزة منهم خط ... من يوم ما نزلوا العرض بتاع الكارت اللى بعشرين جنيه يديلك عشرين دقيقة واللى باربعين يديلك اربعين دقيقة ... وانا تليفونى طول الليل وفى اول ساعات النهار الاولى مبيبطلش رن لدرجة انى كنت هنطرد من البيت فى فجر احد الايام من قريب اوى .... اول مرة الرقم ده رن عليا شخص بيسأل على إيمان ... قولت له النمرة غلط وقفلت ... بعدها بعشر دقايق نفس الرقم طيب انا محمد ممكن نتعرف ... لاء اسفه انا مش بتعرف على حد وقفلت ... بعدها بـ 3 ثوانى انتى بتقفلى السكة فى وشى ليه ... هو انتى مش عندك اخوات صبيان ... لاء معنديش وبعدين انت شكلك واحد فاضى من فضلك مش تتصل فى الرقم ده تانى وبرضه قفلت ... وطبعا فى الوقت مكانش ينفع اقفل التليفون لانى كنت مستنية مكالمة من رفح ... بعد شوية اتصل تانى نفس الاخ .. لو سمحتى ممكن مش تقولى عليا فاضى تانى ... لانى انسان كبير ومحترم وعلى فكرة انا عارفك شخصيا وتعبت جدا والله لحد ما وصلت لرقمك .. وانا كنت عايز اتكلم معاكى فى موضوع .... والله يا فندم مش بتكلم مع حد وياريت تقفل دلوقتى لانى بجد مش ينفع يبقى تليفونى مشغول فى الوقت ده بالذات ... بعدها بدقيقة واحدة تليفونى رن .... لاء مكانش هو كان حد تانى .... أيون اللى فى رفح ... الحمد لله المكالمة خلصت على خير بعد كام استجواب وعدت ... الساعه 4 صباحاً .... لاقيت الاخ بتاع 011 ده بيتصل روحت مكنسلة وقافلة الموبايل خالص ... لسه بفتح الموبايل الصبح لاقيت منه رساله ... بصراحة كدا عيب وميصحش تقفلى فى وشى .... ولسه بعمل ديليت للرسالة ... والاقيه بيتصل ... سبته يرن ويرن ويرن وانا مارست طقوسى اليومية عادى جدا ... ونزلت الشغل ... لسه بوصل الشغل والاقى رسالة ... تصدقى لون الكوتشى بتاعك يجنن والله من زمان بدور على كوتشى زيه كدا الا هو مفيش منه رجالى .... قولت يمكن جت معاه صدفة يعنى .... الدنيا مطر والطبيعى ان اى حد ممكن يلبس كوتشى ... طول اليوم يتصل وانا اكنسل لما عملى هوس .... فى الاخر فتحت ومش اتكلمت ... لاقيته بيقول بصى ما هو انا مش هسيبك لانى بصراحة بحب الحاجات التنكة دى ... وطريقة معاملتك خلتنى احطك فى دماغى اكتير .... انا قولت بس انا شكلى هتخطف النهارده .... رجع يتصل تانى وكل لما يتصل افتح وما اردش ... تانى يوم الصبح لاقيته باعت لى رسالة مدينى مواصفات لبسى كله .... ده كدا بقى يبقى حد فعلا عارفنى .... اتصل رديت عليه بالآتى ... بص حضرتك انا مش هسالك انت جبت رقمى منين ولا انت تبقى مين لأن ده اصلا ميهمنيش فى حاجه ... بس كل اللى هقوله لك ... من الواضح انى معنديش استعداد اتكلم معاك ولا مع غيرك وبالرغم من كدا بتتصل كتير وفى اوقات مختلفة وده بيعملى ازعاج وبيضايقنى جدا ... لاقيته اتاثر وشوية وهيعيط ويقولى خلاص انا اوعدك مش اتصل تانى وانا راجل وعند وعدى .... قولت له شكرا وقفلت على كدا ... التزم بوعده 12ساعة ... والصبح لاقيته باعت لى رسالة بصى انا اسف للازعاج بس ليا عندك طلبين وبعدها مش هتشوفى رقمى تانى ... ياريت مرة واحدة بس تمشى من غير النضارة .. والتانى انا بكره اوى الموضة بتاعة البنطلونات الجينز المتقطعة دى .... انا معنديش حريم يلبسوا جينز مقطع انتى فاهمة ولا لاء .... هنا وكنت هرقع بالصوت الحيانى وافرج عليا الناس ..... لولا ستر ربنا وتماسكت فى اللحظات الاخيرة ..... وعليها اخدت قرار انى اغير الطريق هو اينعم الطريق التانى لفة كبيرة شوية بس مش مهم .... استلمنى الاخ كل شوية رسالة انتى فين ... مبتعديش ليه ... انا قلقان عليكى ... يا حرام قطعت قلبى عليك يابنى . وهو يبعت فى رسايل وانا احذف ... امبارح بالليل الجو كان برد شوية والشارع فاضى قولت كويس اروح من طريقى العادى .... وانا ماشية وماشية وماشية والاقى حد جاى جنبى يقولى انتى كنتى فييييييين قلقتينى عليكى .... على فكرة انا محمد ... ولا بصيت شوية وايه ده انا محمد 011 ... واخيرا شوفتك من غير نضارة فى سرى قولت والله حهزأه وأبص جنبى والاقى ايه ده الواد طلع موووووز مووووووز ... وكفاية عليه كدا اصل البلوج احيانا بيكون متراقب .... ومن غير ما انطق ولا حرف رحت موقفة توكتوك مع انى عاملة مقاطعة من يوم ما اتسرقت بس قولت العمر واحد ... وحتى الان هذا الزيرو حداشر مبطلش رن ولا رسايل ... اخرهم انا محمد وعندى 29 سنة تتجوزينى ... البعيد بيتفرج على قناة ميلودى كتير وبيغش من الرسايل اللى بتيجى عليها ..... انا من بلوجى هذا ومن هذا الموقع اناشد السادة المسؤلين عن الشركة الثالثة للمحمول ارحمونى بقى والغوا العرض ده علشان الاستاذ محمد اللى عنده 29 سنة بيستغله غلط

Tuesday, February 19, 2008

هى البلد دى مفيهاش حد غيرى ولا أيه ؟؟

معلشى انا بقالى كتير مش بتكلم غير فى مشاكل .. بس اعمل ايييه ... ما هى المشاكل اللى بتيجى لى لحد عندى مش انا اللى بروح لها امبارح ... لسه بدخل السيبر والاقى جاى لى جواب ..... خير اللهم اجعله خير .. اصل ده متخصص جوابات الضرايب ... وجاى يقولى وقعى هنا يا استاذة واستملى ..... نعم اوقع على ايه حضرتك .. زى ما انتى شايفة جواب من الضرايب ... اصلا انا لسه معملتش الاقرار يبقى هيبعتوا لى جوابات علشان ايه ... قالى والله مش عارف حضرتك توقعى بقى وتستلمى الجواب علشان امشى انا ... ومالك فرحان كدا نظام انك هتسلمنى ورقة طلاقى ... وادى توقيعى الكريم يا سيدى .... وافتح الجواب والاقى اييييه ده ... ضرايب للمرة التانية فى خلال 4 شهور على اليافطة ... هى الناس دى فاضية ولا ايه مفيش غيرى عامل مشروع فى ام البلد دى .... رحت متصلة على شخص كان زميلى ايام الدراسة .... وبيشتغل هناك ... قابلته هناك بالصدفة فى اخر مرة كنت رايحة علشان برضه اخلص موضوع اليافطة ده ...
هو :آلو اخبارك ايه
انا : بدون اى مقدمات .. انت بتعمل ايه عندك يابنى .. كل شوية استلم جواب وضرايب على اليافطة دى كلها على بعضها مش مكملة متر وكمان مش بنورها ولا ليها اى لزوم اصلا ... بقولك ايه انا المرة اللى جاية مستنية ضرايب على التراب اللى بمشى عليه فى الشارع ... ما هو ده اللى ناقص
هو : اهدى بس فى ايه
انا : حكيت له طبعا على كل اللى حصل وانا مفقوعة ... راح قالى هتعملى اللى عملتيه المرة اللى فاتت ... وهو بقى يا حضرات
انى هروح مجلس المدينة ... واجيب من هناك جواب ان مفيش حاجه عندهم اسمها ترخيص كوفى نت واخده اقدمه فى الضرايب وكان الله بالسر عليم .... بس المرة اللى فاتت كان معايا ايهاب وخلص لى كل الحاجات دى فى وقت قياسى المرة دى انا لوحدى ... استعنت على الشقا بالله .. رحت الصبح النهاردة مجلس المدينة ... وطلعت قسم الادارة الهندسية والادارة الهنسية تقولى التنظيم والتنظيم يقولى الادارة الهندسية ... وانا طالعة نازلة .. نازلة طالعة ... خلاص هنجت ومش قادرة اتحرك فينك يا ايهاااااب .... بعد ما كنت رايحة بورقة واحدة بس اتجمع فى ايدى ملف كامل وكله توقيعات ... دخلت لموظف الادارة الهندسية عاشر قالى لازم توقيع مدير الادارة الهندسية ... يا عم هو انا هبنى عمارة .. ده انا عايزاكو تقولولى انتى مالكيش عندنا ترخيص ... طيب ما هو حضرتك لو هتبنى عمارة التوقيع الواحد هتجيبيه فى شهر .. قولت له امرى لله ادخل للمدير هو انا يعنى صغيرة .. قالى لاء مينفعش الاستاذ عبعال هو اللى هيدخله ... هو فين الاستاذ حبعال ده .... لاقيت واحد حاطط النضارة على مناخيرة وبيقولى نعم قولت له لاء مفيش عايزة توقيع المدير بتاعكو بس .. قالى هاتى الجواب هدخله مع الاوراق دى ... وفضلت قاعدة وقاعدة وقاعدة لما الكرسى اشتكى من طول قعدتى ... شوية الاقى واحده داخله وزنها تسعتلاف كيلو ولابسه خمار كبييييير وحاضنة لى كام رغيف عيش وتبص لى من فوق لتحت وتقولى هو حضرتك محامية ... انا باذبهلال .. ها لاء مش محامية ... امال بتعملى ايه هنا ... ولا حاجه جاية اشم النسيم ... شوية تانية واحدة لا تقل عنها فى الوزن وتقريبا موحدين اليونيفورم بس المرة دى حاضنة برطمان مربى مليان سكر ... ولاقيتها نفس البصة الى بصتها لى الاولانية ... وتقولى هو انتى قريبة الاستاذ على .. والله ولا اعرفه يا فندم .. امال انتى محامية .. يا ستى انا مش زفت .... ورحت ماده لهم البوز المتين ومطلعة ورقة من الملف اللى اتكون فى ايدى عندهم .. وعمال ابص فيها لما حفظتها ... شوية ودخل واحد ... وفضل يبص لى اوى ... وانا اتنح له .. ياربى السحنة دى مش غريبة عليا ... اتاريه مييييين .. الشخص اللى بيجى يقولى هاتى 120 جنيه رسوم نظافة وانا بنفض له .... لاقيته بيقولى انتى بتاعة النت .. جاية تدفعى رسوم النظافة ؟؟؟؟ ... نظافة مين ياعم الحاج فى سرى بقى ربنا ينظفكوا كلكوا من البلد ونخلص ... وبعدين ايه انتى بتاعة النت دى ... قالى ما انا مش عارف اسمك ... قولت له ممكن تقولى يا انسة .. يا بشمهندسة ... احترت فى الالقاب خالص ممكن تقولى يا استاذة ... لاقيته بيقولى انتى بتتكلمى كدا ليه .. ده انتى جايه لنا برجليكى ... من قبل ما ارد الشخص اللى قاعد قدامى .. قاله هى صح .. حد مش عارفه يبقى استاذ فلان او استاذه فلانة او من غير فلان دى خالص .... وفى هذا الوقت الحاسم دخل الاستاذ حبعال وجاب لى الجواب وعليه توقيع المدير بتاعهم و لاقيته بيقولى جيبى توقيع من التراخيص ... فى الدور الاخير ياربىىىىىى امرى لله .. وانا ماشية موظف رسوم النظافة بيقولى طب و120 جنيه ... قولت له بص انا عندى استعداد ادفعهم لك دلوقتى .. بس ماتقوليش كلمة نظافة ممكن تقولوا اتاوة .. شحاته .. اخر مرة المطر كانت من اسبوع والى بيدخل السيبر عندى لحد النهاردة كانة جاى طالع من بركة مليانة بلهارسيا ... وسبته فاتح بؤه وطلعت التراخيص فوق .. شوية موظفين كتيييييير ماليين المكاتب حوالين بعض .. واللى ماسك جرنان .. واللى ماسك كوباية شاى .. واللى قاعد يلعب فى صوابعة ... وكل لما ادى الجواب لموظف يقولى الاستاذ فلان والاستاذ فلان يشاور لى على الاستاذ علان ... يا جماعة ما تخلصونى هو فى ايه .... لاقيت واحد قاعد بيضحك بيقولى تعالى وان هخلصك ... صورى لى بطاقتك صورتين ... متصورة اتفضل مسك البطاقة ... وقعد يبص فيها ويبص لى وعلى الحال ده يجى عشر دقايق .. قولت له حضرتك بتشبه عليا ولا انا متبلغ عنى ومشتبه فيا ولا ايه ... لاقيته بيقولى هو انتى ساكنة فى ؟؟؟؟؟؟؟ ما العنوان عندك فى البطاقة ... هى مامتك اسمها ؟؟؟؟؟؟؟ وراح قايلى اسم ماما الثلاثى ... لاء بقولك ايه كله الا سيرة الام .... خالك يبقى الكابتن ؟؟؟؟؟ هو فى ايه حضرتك ... راح قالى انتى لازم تشربى حاجه ... من غير ما اشرب انت عارف الناس دى منين .. قالى ابقى اسالى مامتك على المهندس ؟؟؟ وقالى اسمه الثلاثى برضه .. قولت له لاء حضرتك اللى هتقولى .. راح قالى كنا جيران زمان ايام بيت جدك القديم ... بس ظروف الحياة اختلفت ... بس لما بقابل حد من اخوالك بطمن منه على العيلة طبعا .... فى سرى : اصيل ابو احمد ... طيب بما انكو كنتوا جيران بقى ممكن حضرتك توقع لى ... قالى بس كدا عنيا الاتنين بس لازم تشربى حاجه الاول ... اشرب نسكافية .. بصى يابنتى علشان مش نخسر بعض هو اللى هنا يا شاى يا قهوة يا حلبة ... لا ياعم جيبلى قهوة .... ونفس الشخص اللى جابلى القهوة لاقيت البشمهندس بيقوله خد الورقة دى وانزل ادفع الرسوم من الخزنة وجيب لى الايصال وتعالى .. دفع الرسوم واللى كانت اربعة جنيه وربع ... ومرضيش ياخدهم منى ... ده ان جاية عليك بخسارة النهاردة قهوة واربعة جنية وربع ... قالى لسه توقيع مش عارفه المهندس مين من خدمة العملاء ... فى الارضى تحت وبعدها خلاص ... طيب بسيطة ... لاء استنى ... وراح باعت نفس الشخص اللى دفع لى الرسوم بكل الاوراق اللى كانت معايا وطلع بعد شوية بالجواب اليتيم اللى رحت بيه فى الاول وجاب توقيع موظف خدمة العملاء فى 5 دقايق .... وسلم عليا اوى ولو احتجتى اى حاجه ابقى تعالى ... انا فى سرى شكرا ربنا ما يحوجنا ليكو تانى ... وبابتسامه صفرا انسحبت ورحت الضرايب ... قابلت السيد المسؤل عن الملف بتاعى واديت له الجواب اللى عليه سبعين الف توقيع .... وقولت له انا جاية اعمل الاقرار الضريبى الاسبوع اللى جاى قبلها بيوم ابعت لى جواب فيه ضرايب على الرصيف اللى بقف عليه او على التراب اللى بمشى عليه فى الشارع .... وسبته ورجعت السيبر .... اولا لو مش الشخص اللى فى الترخيص ده كان جار جدى ايام زمان كان زمانى لسه قاعده هناك لحد دلوقتى ... هو لازم فى كل مكان يبقى لى واسطة .... ولازم علشان افتح مشروع يصطادونى كل يومين اختراع جديد وضرايب جديدة ورسوم نظافة على شوارع مطينة ومتبهدلة ومليانة زبالة ..... ممكن بقى السادة المسؤلين عن البلد يشوفوا لهم حد غيرى ... يا اما اقفل السيبر ويشغلونى هما بمعرفتهم بقى

Sunday, February 17, 2008

قبـــل الثلاثيـــن انتى اللى بتختارى لكن بعد التلاتين هو اللى بيختارك

ان هنشر موضوع كنت نشرته قبل كدا .... بس هقولكوا مناسبته فى الآخر


كلمات اتوجهت لى علشان اى واحد يخبط على الباب اقبله بسرعه البرق اصلى خلاص كلها كام سنة وابقا ثلاثين سنة وبعد كدا مش حيكون لى حق الاختيار ..... ( مناسبة الكلام ده ايه وليه اتوجه لى ومن مين ) فتاة فى السابعه والثلاثين من عمرها عائلة محترمة ... وضع مادى ما شاء الله اللهم ما لا حسد .... بقالها فترة بتتردد عندى على السيبر تتحدث مع خطيبها كل يومين على الاكثر .... فهو يعمل بالخارج .... نادتنى اظبط لها الكام ... وبالفعل شوفت الكاميرا بتاعته فتحت بؤى على مصراعيه ... قالت لى انا فاهمه قصدك ... لانى حسيت انها بتكلم جدو ... وبعد ما خلصت جت قعدت جنبى ولاقيتها بتقولى انتى عندك كام سنة ... جاوبتها على سؤالها ... لاقيتها بتقولى انتى شكلك اصغر من كدا بكتيييييييير قولت لها اه كلهم بيقولوا لى كدا بس حعمل ايه ... قالت لى اعملى اللى حقولك عليه .... اصل انا فضلت اتبطر على كل اللى يتقدموا لى .... لحد العمر ما جرى بيا ومش فوقت غير وانا بعد الثلاثين ... والبنت بعد السن ده زهرة شبابها بتنطفى وبتكون مرغمة توافق على اى حد زى ما شوفتى كدا ... مش تغلطى غلطتى لأن البنت قبل الثلاثين هى اللى بتختار ... لكن بعد الثلاثين هو اللى بيختارك .... انا اللى بكلمه ده صاحب اخويا فى السعودية واحنا عيلة كبيرة ... وكل بناتها متزوجين زواجات كويسة ومحترمة ... لكن انا اللى اتبطرت فى الاول ... وده متزوج وعنده 4 ولاد اصغرهم اولى ثانوى .... بس بينه وبين زوجته الاولى خلافات ... وانا تخطبت له ... قولت لها وافرضى الخلاف ده زال ورجع لها ... قالت عادى لأنى لازم الحق قطر الجواز حتى لو على ضرة .... مش عرفت ارد عليها انا نفسى مش لاقيه اى كلام اقوله .....معقول علشان البنت تتجوز تضحى حتى لو على حساب اولاد وزوجة تانية مش عارفه انا اسميها انانية ولا اسميها بنت غلبانه محتاجه تهرب من واقع بيفرض نفسه عليها ... حقيقى مش عارفه
........................................
نيجى بقى للأحداث اللى فكرتنى بالموضوع ده وخلتنى اعيد نشره
بنوتة كانت بتتكلم على النت وانا مش كان قصدى ارمى ودانى والله بس هى اللى كان صوتها عالى لانها كانت تقريبا بتشتكى لحد وبتعيط كمان ... وانا قاعدة منهمكة فى كتابة مذكرة الانجليزى ... وفجأة لاقيت صوت زى ميكون صراخ ... طيب انا ذنبى ايه ... انا هروح لاى واحد كدا فى الشارع واقوله تعالى اتجوزنى علشان ترحمنى من لسانها ... كل شوية تفضل تقولى يا عانس ... شوفى اللى اصغر منك عيالهم دخلوا المدرسة وانتى لسه قاعدة كدا فى ارابيز ابوكى .... ورجعت بعد شوية واصلت كلامها ... ده مش هى لوحدها ان بتخنق والله يا شيخة لما واحدة تقابلنى وتقولى ايه ده انتى لسه مش اتجوزتى ولا اتخطبتى ... والاقيها بتمصمص شفايفها وتقولى ربنا يرزقك بابن الحلال .... وقتها انا نطيت فى الكلام ومن غير ما احس والله ... وقلت لها وانتى تعملى للاشكال الزبالة دى قيمة ليه ... ده مجتمع غبى متخلف ... انتى مالك بيه ... قالت لى والله عندك حق ... تعرفى يا اختى ... ألا هو انتى الاول اسمك ايه ... قولت لها اسمى ... بعدها قالت لى اصل الست السافلة دى تبقى مرات بابا ... وكل لما تلاقى نفسها فاضية تيجى تقولى يا عانس ... قولت لها دى واحدة مخها تعبان لان هى نفسها مش ملكت لنفسها شئ ده اولا وثانيا الزواج ده ارزاق وبيكون مكتوب للبنت هى هتتجوز مين وامتا ؟؟؟ سيبك بقى من النظرة المتخلفة بتاعة الناس دى ... قالت لى هخلص كلام مع ماما واجى اقعد معاكى شوية ممكن ؟؟؟ خلصت كلام مع مامتها واللى واضح طبعا من خلال الحوار انها منفصلة عن باباها وعايشة فى بلد عربى تانية خالص ... وفعلا جت قعدت معايا لاقيتها بتحكى لى على حاجات كتير جدا تخلى الاقرع يشد فى شعره .... طيب ليه اساسا المجتمع يبص للبنت النظرة الغبية دى ... واشمعنى يعنى كلمة عانس ... ما هى الكلمة تطلق على البنات والذكور كمان .... عموما انا مبعترفش بالكلمة دى ... لان الموضوع فى النهاية قسمة ونصيب وارزاق متقدرة .... ممكن بقى الناس تخليها فى نفسها شوية ويسيبوا اللى بتتجوز وبتتطلق فى حالها ... ويقتنعوا ان اللى ربنا مقدره هيكون

Thursday, February 14, 2008

قـصـاقـيــص ورق

كنت بدور النهاردة على صورة الإقرار الضريبى بتاع السنة اللى فاتت علشان اشوف المبلغ اللى كان فيه كام .. اصلى ناوية قريب اروح اعمل الاقرار بتاع السنة دى بقى دعواتكو كدا ... قعدت ادور عليه ابدا مش لاقيه حاجه ... اصلا انا كل اوراقى من اول شهادة الميلاد لحد شهادة التخرج محتفظة بيها داخل شنطة صغنونة مكتوب عليه always my heart اشمعنا الشنطة دى مش عارفه تقريبا كان جاى لى فيها هدية مش عجبانى فقولت اشيل فيها الاوراق الخاصة بالحكومة عقابا للهدية اللى مش عجبتنى .... وفضلت ادور وادور لحد ما جالى دوار البحر ولا لاقيت حاجه ... فى النهاية لاقيت شنطة صغنونة لونها ابيض جوا شنطة هاند باج ومليانة ... إيشى ورق متطقع على ورق شكولاتات على ورق بسكوتات على علبة بيبسى كنز فاضية ... وكمان علبة سجاير فيها سجارة واحدة بس جت لى منين دى ما علينا خليها على جنب دلوقتى .... وفضلت قاعدة اقلب بقى فى الحاجات دى واتنهههههههههههد وافتكر كل قصقوصة ورق بحد معين من صحابى ... لاقيت فيها جوابات كتيير لصديقة رحلة كفاحى وانتمتى ذاك الوقت أبتهال واللى مش عارفه هى فين دلوقتى ... لأننا بعد ما اتخرجنا فضلنا نتصل ببعض ونبعت لبعض جوابات ... وفى النهاية اتنقلوا من مطاى راحوا بنى مزار ايه الفرق مش عارفه وانا اتنقلت من عند التأمين الصحى روحى سكنت فى مكان تانى خالص ايمو عارفه ... احم احم ما علينا ... والدنيا اتلخبطت عندنا احنا الاتنين ومنعرفش عن بعض حاجه بقالنا كام سنة .....
القصقوصة التانية لاقيتها مكتوب فيها ... احنا صحاب صح .. امل 3/2 ... بصراحة مش فاكرة مين امل بالظبط وكان انهى 3/2 ياترى ابتدائى ولا اعدادى ولا ثانوى .... اللى يعرف امل بقى يبقى يقولها صح احنا صحاب بس اللى هيجننى انى عمرى ما كنت فى تالته تانى انا على طول يا اما اول يا اما رابع ... تانى دى جت منين مش عارفه ....
علبة البيبسى كنز بقى عندى تقريبا من سنتين وكانت من بور سعيد تحديدا تحديدا من النورس علشان اللى يروح هناك يبقى يفتكرنى ... اه والله بيبسى من بور سعيد للشرقية وفاضية على اساس انى ساكنة فى هونولولو معندناش ..... اما بقى علبة السجاير اللى فيها سجارة واحدة بس دى فهى اللغز اللى لو حليته اكيد هوصل للأمير .. قصدى لصاحبها يعنى .... بس يبقى مين وليه اخدت علبة السجاير بتاعته وليه الواحدة دى لسه فيها لحد دلوقتى ... عموما عادى حتتشرب محدش يقلق .....
قصقوصة تانية مكتوب فيها شوية عتاب كتيييير بس اللى لفت نظرى الجملة الاخيرة اللى مكتوب فيها هموت وتبطلى العصبية الى فيكى دى ... حاولى تتعاملى مع اى موقف بهدوء ومتبقيش تاخدى الكلام على صدرك ابقى نفخى فى الهوا دى حتى السما واسعه علشان مش تزعلى نفسك ولا تزعلى حد منك ... دى كانت من احمد كان زميل دراسة بس كنا بنتعاتب على ايه او ايه الموقف بالظبط مش فاكره... واشمعنا كتب لى فى ورقة هو ايامها مكانش فى نت ولا اس ام اس .. وبعدين ايه انفخ فى الهوا دى على اساس انه كان بيعزم عليا بسجارة حشيش ... هو فين دلوقتى .... برضه مش عارفه
القصقوصة دى .... لاء دى مش قصقوصة ده جواب كبير ومكتوب فيه كلام كله من عينة انتى اللى ليا انتى بس فى الدنيا دى انتى بس ... وده انا اللى كنت كاتباه لرحاب بنت عمتى ... كنا زعلانين من بعض بس مش فاكرة ليه لان تاريخ الجواب مكتوب الجمعة الساعة 5 الفجر 12/5/1998... انا دقيقة فى الحاجات الغرامية دى بكتب مواعيدها بالظبط والصبح كنت ناوية اروح ارميها ليها تحت الباب اه والله زى روميو كدا ... هو كان بيرمى لها جوابات ولا ورد ما علينا ... المهم هى اللى جت صحتنى من النوم وبعدين قولت ما احنا اتصالحنا بقى مش مديالها الجواب ... اساسا احنا زعلنا دى بيكون زى الاطفال اللى بيلعبوا مع بعض فى الشارع يضربوا بعض وبعد ثوانى يلعبوا مع بعض تانى ..... واثناء وانا ماسكة القصاقيص والمستندات المهمة اوى دى ... لاقيت ماما داخله تقولى انتى بتلمى الزبالة ولا ايه ... ايه يا ماما مش تصوتى قصدى تخبطى ... ايه يابنتى اللى انتى عاملاه ده .... بدور على البتاع .... لاقيتها بتقولى البتاع ... طيب سيبى البتاع ده دلوقتى وتعالى علشان تفطرى ...
طبعا فى حاجات كتير مش افتكرتها .... فكنت اللى مش افتكره اشيله ارميه فى جنب واللى افتكره ارميه فى الجنب التانى وفى النهاية جمعتهم كله تانى وحطيتهم جوا الشنطة ... ورحت علشان افطر مع مامتشى اللى بهرتنى بالفطار اللى كانت عامله لى اللى ياكل محافظتنا والمحافظات المجاورة جنبها الا وهو بيضة مسلوقة ... ولسه لحد دلوقتى ملقتش البتاع .... حدش شافه بقى ؟؟؟؟؟

Tuesday, February 12, 2008

عملوها الرجالة ... عملوها الوحوش

اولاً حمد الله على سلامة المنتخب المصرى اللى رفع راسنا فوق

والف مبروك علينا جميعا فوز مصر والف مبروك علينا ابو تريكة والف مبروك علينا الجهاز الفنى بقيادة حسن شحاتة اللى استحق وبكل جدارة لقب المعلم .... بالرغم من انى ماليش فى الكورة بس حسيت انى فرحتى غير طبيعية .... خرجت انا وصحابى وشجعنا
الشارع كان مليان وكل الناس فرحانة صغيرين وكبار رجالة وستات ... عمو اللى فى العربية وجنبه زوجتة وورا اولاده كلهم بيشجعوا ... حتى الحاج الكبير هو وزوجته الحاجه ماشيين قدامنا وبيدوا تلكسات كتيييييير .... والله الفرحة احساس جميل والناس زى ميكون كانت مستنية اى حاجه علشان تنطلق ... لفينا فى البلد كلها وقدام مجمع الشرطة كانت ناس كتير والله والامن كانوا واقفين يتفرجوا ومبسوطين ومادوش حد على قفاه ولا اى حاجه ... ورجعنا كلنا تانى وتيييييت تيييييت مصررررر ... مش عارفه انا ايه الحب الجارف اللى طلع من قلوب الناس كلها دى ... واللا الناس هى اللى كانت بتتلكك علشان تطلع الكبت اللى عندها ولا فى ايه بالظبط ... واللى لفت نظرى اكتر ان الشباب اللى بيقفوا يعاكسو فى الشارع مشغولين وكانوا لما يشوفوا بنت سايقة العربية مش يرخموا عليها ومياحولوش يزنقوا عليها ... البنات اللى كانت بتنزق على بعضها بس ... واحنا ماشيين كانت قدمانا عربية شبهت عليها وكنا هنكسر الفانوس بتاعها بس رجعنا قولنا احنا فى ليلة مليانة بالفرح بلاش الأذية ..... ننسى شغل الشياطين ده يوم واحد بس وبعد كدا نرجع له .... عموما انا من جوايا كنت فرحانه ايه السبب وليه مش عارفه يمكن علشان كنت شايفه كل الناس فرحانين فقولت اشمعنا انا ... بس كنت كل لما اسال حد انت فرحان ليه ... كان يقولى علشان انا مصرى ... ومصر هى اللى فازت فلازم افرح ... نفس الجواب من اشخاص مختلفة ... وقتها عرفت قد ايه احنا بنحبها ... ومهما حصل لنا برضه فراحنين بيها وليها ... كل اللى اقدر اقوله انى بجد فخورة بكونى مصرية .... ماهى صحبتى من الامارات ... كانت بتابع المباريات كل يوم وكل يوم الاقيها مغيرة النيك نيم بتاعها على الماسنجر .. شوية الفراعنة ركبو الافيال ... وشوية تانية عملوها الوحوش ... وشوية تالتة المصريين اهمه .... كنت كل لما اسلها ليه كدا ... تقولى انا بحب اسمع اوى نانسى وهى بتقول شربت من نيلها وعلشان كدا بغنى لها ... وانا شربت من نيلها يا نانا وبجد بحن لها .... رجعت بيتنا ببص على الموبايل لاقيت عليها 32 مكالمة لم يرد عليها طبعا مكنتش سامعة ... كانت ماهى وسارة بيتصلوا بيا علشان يقولوا لى مبروك وانا مش سمعت خالص طبعا هسمع ازاى وانا فى المهرجان اللى كنت فيه ده ..
بس لاقيت منهم الماسجات دى ...

الله عليك يا ابو تريكة .. الله عليك يا زيدان وحسنى ومتعب ... الله عليكو يا رجالة مصر .. الله عليكى يا مصر ... حقك يا حبيبتى تفخرى بانك مصرية ... من قلبى بحبك يا مصر

ودى رساله تانية

مبروك فوز ملوك الجدعنة ... مبروك فوز الفراعنة


Egypt We
Woooooooooooooooooooooooooooooooooooooowe Won

طبعا فخورة بانى مصرية .... يارب دايما النصر لمصر

أول لما الماتش خلص كل واحد مسك فى ايده علم مصر وطلع يجرى فى الشارع

حريق القاهرة .... لاء دى مش حريقة دول بيعملوا صواريخ


الولاد سابو الكراسى وكانوا بيقفوا فوق العربيات اصل كلها كانت بالمنظر ده تقريبا العربيات كانت ماشية لوحدها من غير سواق

متجمعين عند النبى إن شاء الله


الصوردة دى بقى اهداى للجميلة Heart Beat


دى بقى الاختراع الخزعبلى اللى اسمه توكتوك جبته لك لحد عندك


اللى معاه صواريخ بقى ميفرقعش فى المدونة

كفاية النار اللى فيها

Sunday, February 10, 2008

مــبـــــروك لــمـــصــــــــر


مبروك لمصر الفوز ولو انى كنت عايزه الكاميرون هى اللى تكسب ... اصل بابى من الكاميرون فانا عندى انتماء ليهم بصراحة طبعا مش ابناء بلدى ... طبعا انا كدابة فى الكلام اللى فى الاخر ده .... بس اللى بيحصل عندى هنا فى المنطقة شايفة الناس من العصر عمال تستعد واللى سايب شغله وراح اشترى علم مصر ... واول ما الساعه جت 7 لاقيت المحلات اتقفلت والجميع اتجمع فى محل واحد وكان كل شوية الاقى صريخ زى ميكون الحرب قامت ... ووقت الجون الشارع اتكسر ... ولما الماتش خلص الرجالة ... الحلوين اوى اللى بجد كل واحد شال علم مصر وطلع جرى فى الشارع اه والله كانوا بيجروا زى الاطفال .... رجالة كنت بتكسف ابص لهم وانا ماشية ولما اكلم حد فيهم اقوله حضرتك وسيادتك ويا افندم ... الاقيه ماسك علم وطالع يجرى بيه فى الشارع ... طنط اللى فى التالت بتقولى هو فى ايه يا نانا ... قولت لها اصل مصر فازت يا طنط قالت لى قطيعة تقطعهم وتقطع مصر صحونى من النوم مفزوعة ... يعنى محسوش على دمهم وولادهم متلاقحين فى القهاوى مش لاقيين يشتغلوا ولا ولادهم اللى قاعدين فى البيت مش لاقيين ياكلوا وبيعملوا كل ده علشان مصر فازت فى الكورة أنهى فراغة عقل دى يا بنتى .... قولت لها معلشى يا طنط الشعب نفسه يفرح هيفضلوا يكبتوا فى نفسهم كدا ليه .... شوية ولاقيت عربيات انطلقت فى الشارع زى ميكون صواريخ ... وكله عمال يرزع ويقولا مصر وضرب نار للصباح الباكر حلاوتك يا ابو اشرف ... والستات واقفة فى البلكونة واللى تضحك وضحكتها من الودن للودن واللى تزغرط ... واشطة مصر اليوم فى عيد ... لاقيت طنط اللى فى التالت بتقولى والله ما عاجبنى غير دماغك يا نانا ربنا يكملك بعقلك .... قولت لها طبعا يا طنط انا واحدة وقورة عيب اعمل الحاجات دى ... شوية ونهى اتصلت بقولك ايه استعدى انا هعدى عليكى اخدك اصل انا وسحر راسمين علم مصر على عربيا تنا وعمالين نلف ... بس كدا طيب تعالى بسرعة والنبى اصلى هموت والف زى الناس دى ... طبعا انا فى انتظار نهى دلوقتى بس قولت اكتب لكو البوست لحد ما توصل علشان ابقى اول واحدة بتقول لكوا مبروك لمصر
... اسيبكو انا بقى اصل نهى وصلت وهركب معاها عربيتها لان عربية سحر فيها كل الشلة بتاعتها ....
ايون يا نهى جاااااااااااااااهزة ثوانى
دنج دنج
مصصصصصصصصصصصصصصر

Saturday, February 9, 2008

أحلام رجل فى ليلة الزفاف



الموضوع ده انا كنت نزلته من سنة تقريباً فى أحد القهاوى .... بما إنى كنت من اكبر رواد القهاوى اللى هى المنتديات يعنى وكنت مشتركة فى قهاوى كتيييييير اوى بس الهى يكرمه الحاج بلوجر اقترح عليا اعمل مدونة واهى تلمنى من اللف فى القهاوى طول الليل والنهار ... والحمد لله اتلميت وبقيت مقضايها مدونات

المعازيم مجتمعون ... والسهرة للصباح .. والكوشة تحيطها الورود .. الراقصة تتمايل والزفة تسير ... ما هى إلا دقائق وسيجد العريس نفسه فى حجرة دافئة يستيقظ فى الصباح مودعاً وسادته الخالية بعد أن يشغلها وجه جميل يجاورة ... ستتهادى أمامه بقوام كغزال وتتفنن فى أرتداء ألوان يحبها سألته عنها قبل أن يحملها دولاب ملابسها ... وستضع عطراً يعشقه وتصفف شعرها كما يشتهى ... ستجعله طويلاً متى أشتاق لمداعبة خصلاته وسيكون قصيراً متى تطلب الأمر التغيير سيتخلص من أوامر والده وشقيقه الأكبر وسخافة أخيه الصغير الذى كان يسبقه ويندس فى فراشه ولن تختفى البناطيل والقمصان بين ملابس أخوته وسيخجل أصدقاؤه من رن الهاتف فى عز الليل ... لن يحمل هماً للنقود والمشاكل المادية ولن يفرغ جيبه فى لحظة ويمشى دون مدد فقد أودع فى البيت وزيرة للمالية يسلمها ما معه فتدبر الأمور حتى نهاية الشهر سيعود من عمله كل يوم فيجد أذنا يفرغ فيها متاعب ومشاكل حدثت وأوجاعاً أصابت .... فيلعن رئيسه ويسب مديره ويفرغ كل الكبت الذى يحتجزه صدره ولا يستطيع البوح به إلا لها .وبدلاً من أن كان فى المجتمع أسم مهمش سيصبح جملة مفيدة .. وفقرة مكتملة وزوج له زوجه ... ورجل له " جماعته " وسيجد على مائدته أطباقاً ساخنة على ذوقة هو وليست نتاج استفتاء أمه وأبيه وأخوته وربما الضيوف ... وسيقول أريد ملحاً قليلاً أو دهناً كثيراً ... فيجد المستجيب وملابسة ستكون نظيفه مكوية مرتبة فى دولابه وأزرار مخيطة مثبته فى أماكنها وفراشه يوحى بالنوم وسيستغنى عن الأحلام بالواقع ... أما الكوابيس فسيجد السيدة التى تزحزحه لتنقذه منها ... كل هذا سيستمتع به العريس أما العروسة .... دقائق قليلة بقيت ليكون عليها أن تؤدى كل هذه المهام إضافة إلى تحمل وجود أعباء ومرافقة رجل اطلقوا عليه المجتمع زوج لها

Friday, February 8, 2008

ثلاثـــــــة فـــى واحــــد

ثلاثة فى واحد ده مش إعلان شامبو جديد إنما ده تاج وصلنى من 3 مدونين زى العسل ... ولما تكتب بوست وتلاقى الكومنتات عندك منورة يبقى اكيد شمس اول كومنت ... ولما الموضوع يحتاج لجدعنة اكيد اكيد يبقا هنا اجدع دكتورة ولما تتزنق بقى وتلاقى نفسك فى خانة اليك يبقى مفيش حل غير خالو احمد الصباغ ....

نشوف السؤال الاول بيقول ايه
هل توافق على حزف خانة الديانة من البطاقة الشخصية ؟
أه طبعا أوافق ونص ... علشان ايه اتعامل مع انسان على اساس ديانته

ما رأيك فى المثليين ؟

بنى أدمين وبشر وكل واحد له اتجهات تخصه لوحده

هل هى حرية شخصية ؟

طبعا حرية شخصية

هل توافق على الإعتراف بالمثليين ؟

هى مش حاجة لسه تحت الدراسة علشان افكر اعترف ولا لاء هما واقع وموجود .... ثم انا مين ولانا انا ولا غيرى على الاعتراف بيهم من عدمه

هل لديك أصدقاء من المثليين ؟

يمكن يكون فى وانا ايه عرفنى ...

هل تعتقد بوجود إضطهاد للمسيحين فى مصر ؟

طبعا الاضطهاد موجود ... بالرغم من اننا فى 2008 الا ان لسه فى ناس عقلها حجرى وتقولك ده مسيحى يعنى استبيح ماله وعرضه ولما تتكلم معاه يقولك ياعم نفض .... ده مسيحى

من هو الشخص الذى تختارة لرئاسة مصر ؟

هختار اللى يضمن لى ان مفيش اسرة فى مصر تنام من غير عشا ... واللى يضمن انه يرجع كرامة الشعب ويرحمنا من الفساد المتفشى فى كل مكان

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟

حزب ليبرالى بحت .... والافراد يبقى ناس تفكيرها متوازن

هل توافق على مشاركة كل من : الإخوان المسلمين - الأقباط فى الحكم ؟

امال مش اخوان .... علشان يبقى من فساد لارهاب وتطرف .... ده الواحد منهم طول ما هو قاعد قال الله وقال الرسول وبعد شوية تلاقية فى اوضة نوم جارهم بيعمل لزوجته مساج ... يبقى اخوان لاء ثم لاء ثم لاء ...

الاقباط هما مش مصريين برضه ولا انا هروح انتخب قبطى من بلاد واق الواق

فى رأيك الشخصى .. ما هى أفضل مدونة على بلوجر قمت بزيارتها ؟

والله انا زورت كتير وكل مدونة بحس فيها بفكرة مختلفة ووجهة نظر مختلفة يعنى لو ذكرت بلوج معينة يبقى ظلمت الباقى

اذا تزوجت وأنجبت ولدين وبنتين .. أى الأسماء تحب أن تسمى ؟

4 ليه بس هو انا ارنبة

هما ولد وبنت كويس اوى بس ما علينا القافية حكمت .. قصدى السؤال

البنتين يبقى غزل ونغم .. والولدين آدم وأدهم

هل تعتقد أن توريث الحكم فى مصر . . سيتم فعلا أم لا ؟

والله احنا شعب كداب زفة ... يعنى نفضل نقول لاء ومش هيحصل ومش ينفع ولما الاوامر تيجى من هنااااااااااك نقول آمين اصله بيد عمرو لا بيدى

فى رأيك الشخصى : ماهو أفضل إنجاز لحكومة مبارك ؟

عروستى

وما هو أسوأ عمل قامت به ؟

كتيييييييييير ..... عندك وقت تعد ... تدهور تعليم بطالة وانتشار المخدرات وزيادة نسبة الادمان وبطالة وفساد إدارى وغلاء اسعار وقلة ادب منتشرة فى كل مكان

ثم لمن تمرر هذا التاج ؟

طبعا احمد وشمس والدكتورة قاموا بالواجب ومرروه تقريبا لكل البلوجر
علشان كدا انا مش هذكر حد معين اللى عايزه يتفضله

Saturday, February 2, 2008

يومين فى اسبوع واحد معرض الكتاب .. طبعا طبعاً الثقافة

نبتدى باليوم الأول وده كان يوم كله مطر وبررررد بس علشان انا بحب الشتا فكان بالنسبة لى الوضع طبيعى .... واليوم الاول كان ده يوم الثلاثاء صباحاً ...اول ما دخلنا المعرض اخدنا الخريطة واللى فى نهاية الجولة طبقتها وحطيتها فى جيبى وتقريبا لفينا كل القاعات من قاعه واحد حتى 19

المهم انا بقى دخلت اخبار اليوم لوحدى ولسه بدخل برجلى الشيمين والاقى الدنيا عملتها فيا واشتغلت مطرررررر اوبااااااااااا اتحبست انا كدا .. شوية والمطر خلاص بطلت .. خرجت من اخبار اليوم ادور على ماى فريندز ابدااااااااا
مش شايفه حد خالص انا قولت العيال اتخطفوا ولا اييييييييه احسن برضه فى هذه اللحظة جتلى مكالمة تليفون كنت مستنياها من زمااااااااااااان ... وفى عز المكالمة ظهروا واتاريهم كانوا هنا

ايون بالظبط كدا نهضة مصر
بعد شوية وانا باخد الصورة دى لاقيت 3 اطفال زى القمر ... عمال يلعبوا وشافونى بصور وكل لما اجيب الصورة يمين يجيوا يمين اتحرك شمال الاقيهم شمال ... قولت لهم طيب بعيد بقى شوية مش عارفه اركز ... برضه فضلوا يعاندونى شوية ... قولت وبعديييين هضرب بعد كدا ... لاقيت القمر اللى فى الصورة دى بيقولى ما هو انا لازم اتصور ...... قولت له تدفع كام واصورك ... قالى هديكى بوسة ... بصراحة كان العرض مغرى مغرى يعنى وبدون تفكير له مواااااااااافقة ...بس الدفع مقدم قالى انا كمان موااااااافق ....

والحمد لله نفذنا احنا الاتنين شروط الاتفاق ...
هنا كانت الدنيا بتمطر والناس فى عز البرد يجروا ويستخبوا ... لاء انا مكنتش بستخبى ده انا كنت واقفه تحت الشجرة
خلاص بقى المطر خلص والدنيا كانت نضييييييييييفه بالشكل ده
هنا بقى كدا خلاص خارجين من المعرض ورايحين الباركن واحنا داخلين الشخص اللى واقف على الباب بيقولنا وير يو جوينج ... كلنا فى نفس واحد رايحين نجيب العربيييييييييييية ... بس نعم يعنى هو فى حاجه ... اوعى تكون عايز خمسة جنيه تانية ولا حاجه .... مش عارفه انا ايه نظام التقليب ده
************************************************

بعد كدا خرجنا روحنا جنينة مول ... لفينا واشترينا حاجات... وبعدين نزلنا حجزنا سينما .. وخرجنا على هاردز اكلنا سريعا سريعا ورجعنا على طول لان كان يادوب باقى ربع ساعه فقط والفيلم يشتغل ... ودخلنا ايييييييييييه ... ايون شاطرين .. حين مسخرة ... اه والله من البلاوى اللى فيه بجد بجد مسخرة ... سكان العشوائيات وطريقة عشيتهم اللى تجيب استبحس ... ولا طريقة كلامهم اللى لازم يتبع كل كلمة لفظ يا ابن الكلب ... اصل تقريبا مش بيعرفوا يتكلموا غير لما يشتموا حتى لو بيهزروا مع بعض ... ولا ناهد اللى هى تبقى سمية الخشاب .. فعلا فعلا حظها حظ عوالم زى ما بيقولوا .... مش هحكى طبعا حاجه عن غادة عبدالرازق لان الاخوة المدونين اتكلموا باستفاضة وقالوا كل حاجه .... نيجى بقى لايمن ابن ناهد وعادل واللى بعد ما بقى عنده 7 سنين اصبح طفل شوارع ... اصل الاسرة اللى اتبنته بعد ما ناهد سابته فى الاتوبوس خلفوا فخلاص بقى ايمن مبقالوش اى لزوم ... انهى هرش دماغ ده .. طيب ما يخلوه يسيئ لهم البلاط واهو ينفع .... طبعا ايمن بعد ما بقى طفل شوارع مخضرم ... فى سرعة البرق اصبحت صحبته اللى برضه طفلاية شوارع حامل والعجيب ان البنت عمال تقوله كمان يا ايمن كمان انت بقيت جامد اوى يا ايمن .... أحيييييه يا ايمن .. وده كان تعليق واحده قاعده وراية انا حسيت انى قاعده فى مكان احم احم لاسمح الله يعنى ... بس ركزت اوى فى الوجوه اللى جنبى لاقيت نفسى عارفه الناس دى كويس .. الفيلم كله على بعضه حاسه انه فضيحة من سكان عشوائيات لاطفال شوارع لا ارهابيين ... بس بصراحة اللى عجبنى فى الليلة دى كلها عمرو عبدالجليل .. اصله كان دايما عامل احلى دماغ .. والدنيا تضرب تقلب مش مهم
خرجنا من الفيلم وعدنا ادراجنا واحنا راجعين باركنا قدام كافى فى بلبيس ونزلنا جبنا شاى بس انا طلبت معايا ايس كريم ... انتى يا ماما مش بتحسى الجو تلج وشايفة المطر قدامك وتقولى ايس كريم ... ملكوش دعوة ... طيب اشربى الشاى وامرنا لله دخلنا الزقازيق وجبنا ايس كريم ... ورجعت بيتنا ..

اليـــــــــوم التانــــــــــى
واللى كان الجمعه يعنى امبارح .... بجد كان يوم مليان بالمفاجعات بالنسبة لى ... من أول اليوم لحد ما رجعت بيتنا ... أول حاجه عملتها إنى قابلت إنسان غالى عندى اوى اوى وأول ما وصلت المعرض أتصلت على آآبى قولت لها انا فى المعرض قالت لى انا هلبس وجايه لك ... طبعا انا كنت لفيت فى المعرض اليوم اللى قبل كدا وماليش مزاج الف تانى فرحنا قعدنا فى المقهى الثقافى لحد ما آآبى توصل ... وشربنااااااااااا لاء مش شيشة نسكافية ... طبعا احنا سرحنا فى الكلام وموبيالى عمال بيرن وانا مش سامعه حاجه خالص مش علشان الحوار شيق لاء خالص شوية و قولنا نقوم نتمشى ولما خرجنا سمعت الموبايل والاقى 9 مكالمات لم يرد عليها كلها آآبى يا لهوووووووووى احنا لازم نشوفها فين ونلحقها .. قالى طيب اتصلى بيها ونعرف مكانها ونروح لها فى وسط المفاوضات آآبى اتصلت تانى وعرفنا مكانها قدام دار الشروق .. ورحنا لها .. واييييييييييه دهههه ... إشطة ... كل المدونين حباينا واللى متخانقين معاهم واللى مش متوقعين اساسا نشوفهم ... هما كانوا مبيتين عندك يا بنتى ولا ايه ... طبعا من المدونين العسل كانت أيمى ... وكمان المفاجأة بنت خيخية وأى كلام واللى تشوفها تحس انها عندها 16 سنة يعنى طالبة فى تانية ثانوى كدا ولا حاجه .... وبرضه اللى متوقعتهاش خالص خالص مروة الزارع بس طلعت بنوتة هادية ولذيذه .... لاء وكمان مييييييييين ... خالوا أحمد .. .. احمد الصباغ شكولاتية المدونين ... ولسه مفوقتش من المفاجأة الأولى وألاقى آآبى بتقولى المفاجأة التانية واللى هى ان لماضة وصورصاره هنااااااا ... أيه يا ماما اليوم العالمى ده ... توجهنا ليهم ورحنا سلمنا عليهم ومتخيلة بقى انى حلاقى لماضة .. لماضة يعنى ... طلعت اد بنتى الصغيرة ... حاجة صغنونة اوى كدا وزى القمر وطبعا صورصاره اللى اتشرفت جدا جدا بيها وبمقابلتها .... واثناء سلامى وألاقى شخص كل المدونين بيحترموه وبيقدروه مش انا بس طبعا مهندس مصرى بيقولى ازيك يا حنان .. سلمت عليه وانا متنحة ... طبعا ... بصراحة يا جماعه أجمل مفاجعة حصلت لى من كم المفاجعات اللى شوفته فى اليوم ده انى قابلتكو حان وقت التصاوير واللى انا فعلا ماليش فى التصوير ده نهائى فعلشان خاطرى يا لماضة ما تزعليش انتى ومروة وصورصاره بس اهو بدل الصور شوفتونى بقى على الطبيعة وبدون اى مواعيد مسبقة ... والله فرحت اوى بيكوا كلكوا بعد ما انسحبت من موضوع التصاوير سلمت على المدونات القمرات و اضطريت انسحب بقى لاننا بجد بجد كنا مرتبطين بمواعيد مهمة جدا ... يارب دايما كدا كل المدونين متجمعين على خير ...
... بس الحاجة اللى لسه محيرانى مين اللى قلب الكتاب اللى برايد موقعه عليه لاحمد الصبااغ اللى يعرف يبعت الاجابة على 0900