الله لا يقطع لك كابل

فى ظل الثورة المعلوماتية والتطور الطبيعى للحاجه الساقعه وجميع دول العالم تسارع الزمن .. الطبيعى والبديهى والجدير بالذكر ايضا ان اى شخص فى حياته حاجه مهمة بيكون عنده بديل ليها علشان فى حالة التلف متقفش .. حتى اللى عنده جيرل فريند بيكون عنده برضه احتياطى علشان لو قالت له باى جالى عريس غنى هروح اتجوزه معطلكش بيروح للبديل مباشرة علشان مش يقعد يبكى على الاطلال كتير .. اما بقى بلدنا الحبيب بلدنا العزيز بلدنا اللى مفيش زيه على مستوى الكورة الارضية ليس لديه من الضمانات الا الستر .. حصلت الازمة المالية قالوا اللى ليه حاجه يجى ياخدها اتقطع كابل فى البحر المتوسط العام الماضى من المفترض اننا كنا نتعلم من الازمة علشان المليارات اللى بتخسرها الشركات المعتمدة إعتماد كلى على النت والبنوك مش تحصل تانى لكن فى اقل من عام عادت الازمة وتمر مصر هذه الايام بحالة شلل تام بل تنعزل انعزال كلى عن العالم .. تعدد الاسباب والعطل واحد .. هناك من يقول ان مصر مدفعتش فلوس وصلة النت اللى هى واخدها من النت كافيه اللى فى جزيرة صقلية .. وفى قول آخر ان مصر واخده النت ده اعانة وان عدد المشتركين فى مصر زاد بشكل رهيب صعيب فشيخ وان النت اللى جاى مصر مجرد اعانة يعنى بندفع 35% فقط من التكلفة ويكفى لعدد محدود من الناس علشان مش يعمل بينج ويهنج فى سيرفرات الدول المانحة كفرنسا او خطوط سى بون او فلاج والناس فى مصر متقدمين جدا وبيحبوا التكنولوجيا لدرجة بشعه علشان كدا العدد زاد قوم ايه بقى الباكبون بتاع الشركات الاجنبية هنج قوموا هما عملوا اللى عليهم وبعتوا للمسؤلين بتوعنا علشان يزودوا الباندويدث .. مسؤلينا طبعا مش فاضيين للكلام الفاضى ده ولا لت وعجن الفرنسويين ولا الايطاليين راحوا مكبرين دماغهم ولا ردوا عليهم .. الناس الافاضل عملوا اللى عليهم ولما مسؤلينا مش عبروهم عملوا فينا العملة المهببة دى ... اما اخر الاقوال وهى ان سمكة القرش جاعت فلما حبت تستمد غذائها مش فكرت فى اكل كابل لاء دول 3 فى وش العدو .. سؤالى ليه مش يكون فيه كابل باك اب ؟؟؟ وليه مش تتحول خدمة الانترنت فى مصر للستالايت ؟؟؟ ولحد امتا هنفضل معتمدين على كابلات غيرنا ؟؟؟؟

Comments

السبب الاول اول مره اسمعه
وممكن فعلا يكون ده اللي حصل
اما السبب التاني بتاع سمكة القرش
فده معتقدش انه حصل خالص
لان ده معناه انها سمكه فاهمه وواعيه اوي
لانها قطعت 6 كابلات في توقيت واحد
وبعضهم بيبعد عن بعضه مئات الكيلو مترات
يبقى لازم السمكه دي يتعملها تمثال
ولازم يكون في نص البحر
عشان كل لما سفينه تعدي تخبطها


تحياتي
MEDUS said…
اول تعليق !! من زمان ما علقتش عندك بس متابع والله كل كلامك صحيح والغريب فعلا ان سمكة القرش المؤذية دى سابت كل السمك اللى فى البحر والناس اللى بتغرق واكلت الكابلات وعجبى تحياتى لك
An Egyptian said…
فشيخ؟ هاها يخرب عقلك ياقطقوطة
انا قريت فى الدستور ان الموضوع فيه رشاوي
ماهو طول مالتمانين مليون عبارة عن تمانين مليون قرطاس لازم يحصل كده و اكتر كمان
Anonymous said…
كلنا نعرف هؤلاء النسوه وهؤلاء الموظفين

سيدات ليس لهن أية حقوق.. علي الإطلاق.. وكتب الله عليهن النضال من اللحظة التي كن فيها «نطفة» في أرحام أمهاتهن.. وحتي انتقالهن إلي العالم الآخر.

سيدات من ملايين السيدات المصريات.. اللاتي لا يعرفن الابتسام.. وعندما يقع ما يضطرهن للضحك.. فإن الدموع تنساب من عيونهن.. لسبب لا أعرفه.. ويلفت نظري منذ سنوات بعيدة.. وإذا اقتربت هذه المواطنة البائسة.. من عابر سبيل تسأله عن الطريق.. بادرها بكلمة «الله يسهل لك يا ست»!.

هي ليست متسولة.. ولكن تبدو علي وجهها لافتة.. توحي بأنها من فصيلة الشحاتين «المناضلين».

هي ليست جميلة.. وليست قبيحة.. ولا هي ساخنة.. ولا هي باردة.

هي فاترة.

شيء فاتر.. يتحرك علي الأرض.

ومطلوب من هذا الشيء الفاتر أن يتقدم بطلب للسيد المحافظ للحصول علي مائة جنيه لشراء لحوم العيد.

والوصول لسيادة المحافظ ليس سهلا.. علاوة علي أن الوصول لا يعني بالضرورة الحصول علي الموافقة التي تمر.. علي سلسلة طويلة من الموظفين.. التقاة الذين يذكرون الله قياما.. وقعودا.. وعلي جنوبهم.. وفي مقدمة رأس كل منهم «زبيبة

من مقال لمحمد فهمى
dr.lecter said…
هاعلق بس علي اخر حاجه

هنفضل متعلقين بحاجه غيرنا لغايه امتي؟

ازاي بقه ده كلام برده ياشيخه؟
ده احنا حياتنا كلها متعلقه بحاجه الناس التانيين من اول امريكا لعقود الاعارات بتاعه الخليج والقمر الصناعي اللي عملته لنا فرنسا وكل حاجه


النت ياريت بجد يبقي ستاالايت بس هيبقي غالي وقتها والحكومه الالكترونيه من مقر القريه الذكيه هتروقنا ساعتها


سمكه قرش ايه بس؟

دي اكيد سمكه من بتاع فيلم jaws

اللي كنا بنتفرج عليه زمان واحنا صغننين


دي لا مؤاخذه مش سمكه ده حوت بقي


وممكن يكون من زحمه الغواصات راحه غواصه معديه شبكت في الكابل نزلوا قطعوه


او بقي زي بتوع احباب نظريه المؤامره

اسرائيل عملت كده علشان تدمر مصر والامن القومي بتاعها


ويمكن يطلع بكره واحد يقول بيان انه تبع جماعه من اياهم يعلن مسئوليته عن العمليه


ولا ممكن يكون الكابلات دي تكون بتاعه السويدي للكابلات الطاقه والامان؟

ولا الحديد اللي حولها بتاع عز؟


انا حاسس الحكومه عارفه السبب الحقيقي بس بتستعبط علينا
assafo anaroze said…
سيدتي الاشكال الاساسي ان كل دولنا العربية تعتمد على في كل شيئ ليس لاننا لا نتوفر على خبراء او علماء لا بل لان من يحكموننا مترسخة فيهم عقدة الاجنبي و التبعية في كل شيئ و الدليل ان بلدان الغرب بتشتغل فيها ادمغة عربة من جميع البلدان العربية ومن مختلف التخصصات ليه ما يستفدش منها بلدانها سؤال لا يحتاج الى جواب وكل يوم و مصر و البلدان العربية ينقطع فيها كابل بخير
ريماس said…
احنا بلد مبتتعلمش من اخطائها يا قطتى ده احنا ناقص نستورد الهواء اللى بنتنفسه
حتى النت بعد ما رجعوه يجنن وكل شوة الوزير طالع بتصريح والسرعه تعود تدريجيا
طيب تصدقى بالله انا من نص ساعه قاعده بكتب الرد ده وانا بكلم خطيبى النت رايح جاى وشوية الكلام ميوصلش لما حاجه تزهق
المهم انتى عاملة ايه فى السرعه المطينة بطين دى
Anonymous said…
حلوة الله لا يقطع لك كابل دى
شوفت العنوان افتكرتك طالبة اعانة
طلعتى بتتريقى كالعادة
معلشى يا قطة سؤال وياريت تجاوبى عليه بصراحة
هو انتى عايشه ازاى
مبهزرش والله
يعنى كل حاجه مش عجباكى وليكى عليها تعليقات غريبة وكل حاجه بتستفزك حتى الناس اللى مش على مزاجك ياى رعاع وجرابيع وانت كنتى ناسية افكرك بردود ليكى على الرعاع والجرابيع
انا تعبان لك يا بنتى
تحياتى
رائد منيب
Desert cat said…
مذكرات مشاغب
احنا دلوقتى متحول مسارنا عن طريق السويس بدلا من الاسكندرية
وده ممكن يرجح قطع كابلات بس دول لحد النهارده 6 كابلات والنت اللى واصل يععع خالص
ربنا يعدى الازمة دى على خير
تحياتى
Desert cat said…
MEDUS
انا كمان بشقر عليك من وقت للتانى وفى كل مرة مش بلاقى غير اعتذار عن التاخير
امتا بقى اروح هناك الاقى بوست جديد حلو كدا زى ما عودتنا
بالنسبة لسمكة القرش المفترية
ربنا يبعدها عننا انا بفتح الصفحة واروح اشرب شاى لحد ما تحمل
:)
تحياتى
Desert cat said…
An Egyptian
ههههههههههه
اى خدمة
لكن رشاوى
رشااااوى لمين ومن مين اوعى يكون لسمكة القرش علشان تبعد عننا
وتسيب الكابلات فى حالها بقى
Desert cat said…
Anonymous
ما اكثر هذه الصورة المتكررة فى مصر
سيدات فاترات على ملامحهن يرتسم البؤس والشقاء
Anonymous said…
واضح ان معلوماتك حلوة فى النت باندويدث وباكبون هو انتى بتشتغلى ايه
Desert cat said…
dr.lecter
انا اللى بيضحكنى اكتر بتوع نظرية المؤامرة دول اى مصيبة تحصل فى مصر او اى حاجه يقولوا اسرائيل ودول الغرب عايزين يدمرونا ده على اساس اننا متقدمين اووووى
لو النت اتعمل ستالايت هو هيبقى غالى شوية بس مش هنبقى تحت رحمة كابلات الفيبر ولا سمك القرش
تحياتى
Desert cat said…
assafo anaroze
احنا اتعودنا ناخد منهم ناتج ابحاثهم وتطوراتهم بعد ما يكونوا استفادوا طبعا وبعد ما ناخدها منهم اى حاجه تحصل فى بلادنا العربية نقول هما الغرب الكافر بيحقدوا علينا ههههههههه
تحياتى ليك
Desert cat said…
ريماس
اه انا متابعه تصريحات السيد وزير الاتصالات المبجل على مصراوى من يوم ما النت فصل
وبعدين هو اكيد خطيبك فاهم يعنى ان النت فى مصر مطين بطين على رايك
انا شايفه انك تخلصى نفسك بقى وترحلى على اسبانيا يا ماما مش ينفع كدا على الاقل لا تحتاجوا نت ولا بتاع
انا عامله بقى كتير بامانة فى ظل النت المنكوب ده
نورتينى يا قمر
انا مستني القطه ترد عليا ...بس يبدو ان الكابل المقطوع مازال مقطوعا...وربنا يقطع قلب الي قطع الكلب...الكابل.
Desert cat said…
Anonymous
يا استاذ رائد انا مش لسه سايباك باين فى الفيسبوك ههههههههههه
سلامة حضرتك من التعب الف سلامة يا فندم
بس احب اطمنك انى عايشة مبسوطة ومرتاحة والحمد لله
وميرسى جدا جدا على شعورك الطيب
ممكن نروح نكمل خناق هناك بقى
:)
Desert cat said…
Anonymous
انا اشتغل سواقه
هع هع هع هع
Desert cat said…
هــو..مش ..نـو
ربنا يسمع منك قادر يا كريم
والله النت زقت
انا بجاهد
وهكمل جهاد لحد مدونتك
يلا روح جهز لى قهوة مظبوط وانا فى الطريق اليك
السلام عليكم ورحمه الله وبركاته
لا اجد ما اصفك به ..من كلامك اختنا في الانسانيه ....
احترم جدا الحديث المنطقي ...
وسيكون حديثي ردا علي الكلمه بالكلمه...او زي ما بنقول ...نقله بنقله ...او نقطه نقطه.
1- هايل العم فشكول له وجهه نظره المحترمه ...والي انا متفق ضمنا معاه فيها ..( لاحظي ...مش هو ده الكلام )
ولكن انا لا اعيره بعجزنا كلنا في اننا لا نستطيع فعل شيئ ...حضرتك جرحتيني بتعليقك...
2- نكتفي أخوتنا في الانسانيه دون الحديث عن النوع او الجنس او الدين او البلد او اي مصنفات أخري....
هل من الانسانيه ان تدخلي بيتي المتواضع أو اللي علي قدي وتقولي ...يأي أيه الحفره الي انت سامن فيها دي ...طبعا الانسانيه تفرض علي التعاطف مع ساكني القبور..
3- لك حريه الاعتقاد كما تحبين ...ولكن علينا ان نحترم اماكن وأفكار الآخرين ...دخلتي عندي وتركتي تعليقا ...لا اعلم ماذا تقصدين ...ولكن الأساءه واضحه فيه لصاحب الفكره و المكان ...شكرا لك ...اختي في الانسانيه ...احترم العجز العربي لانه واقع نعترف به ....واحترم علاقتك بربك ولا اتدخل فيه ويارب ربك يستجيب لك ويحقق لك كل امانيكي ...حتي لو بتدعي عليا بالهلاك ....اشكرك ...ولك كل الود
M.Sameer said…
Internet via satellite'd be a bit slow with high latency because every packet has to travel the distance to the satellite twice which takes time even for the speed of light.
Desert cat said…
هــو..مش ..نـو
عليكم السلام ورحمة الله وبركاته
طالما تتفق مع وجهة نظر العم فاشكول اذن ما وجه الخلاف ؟؟؟؟
حضرتك بتقول دخلت بيتك وجرحتك
هو انا لما اقولك الدين علاقة بحتة بين الانسان وربه يبقى كدا بجرحك ؟؟
لما اقولك لا يهم اى شخص اللون او النوع ويكفي انه انسان يبقى كدا بجرحك يا استاذ هو اعتقد ان تبادل الردود ما بينا حتى الآن هو تبادل وجهات نظر اى ليس فيه ما يجرح
والا كان من الاجدر بى ان ازعل من بوست حضرتك ولكنى اعتبرته ايضا مجرد عر لوجهه نظرك لذلك تم ردى على النقاط التى كنت تريد الاجابة عليها من وجهة نظرى
اشكرك جدا
تحياتى
Desert cat said…
M.Sameer
I think he is a substitute for the cables that will work continuously without any breakdowns or fiber cable despite good speed, but many faults and then repeated what the solution
tamer.sala7 said…
بصي يل طنط
بالنسبة لموضوع الكابل الباك اب ده ح يتعمل بس ح ياخد شوية وقت

بالنسبة ان النت ده اعانة الاجابة ايوة يا ستي اعانة واحنا فعلا مش بندفع القيمة كاملة

بس مش هو ده السبب الحقيقي لقطع الكابلات ومش عارفين ايه هو السبب لأن الوزير مش عايز يقول تقريبا كدة سر حربي وخايفين عليه من الانتشار

بالنسبة للمليارات اللي بتخسرها الشركات متعتبرش مشكلة اوي

المشكلة في الموظفين اللي بيطلع تيت ابوهم بدون مقابل في حالة الكوارث اللي زي دي
tamer.sala7 said…
نسيت ارد عليكي في موضوع الستلايت

ليه مصر مش شغالة بالانترنت الستالايت ؟؟
لكذا سبب اولا غالي جداا
ثانيا الكفائة بتاعته اقل من كفائة الكابلات
ثالثا القدرة علي نقل البيانات عن طريق الاقمار الصناعية تقل كثيرا عن قدرة الكابلات

رابعا مهو ممكن برده سفينة فضاء تقطع الكابلات الفضائية زب ما السفن قطعت الكابلات البحرية
:)) :D :))
Zika said…
انا سمعت حاجات كتير
منها القرش الشرير ده
او غواصه حربيه
او مشاكل بين امريكا وايران فعشان كده بيقطعوا عنهم النت
علي اساس ان ايران دي واخده وصله من الروتر اللي عند امريكا
او علي اساس ان امريكا ده سيبر مثلا
انونومس2 said…
قصة نجاح معجز
منذ 30 سنه
كان الصينى يحلم بامتلاك راديو وساعة يد
ودراجه وماكينة خياطه
اليوم وبعد 30 سنه يحلم بسياره مرسيدس
الصين من الفقر الشديد
الى الثراء فى 30 سنه
معجزه اقتصاديه مبهره
منذ 30 سنه كان الناس يسالون
الصين الى اين
واجاب زعيمها دينج هساو بنج بان اعلن رؤيته لصين جديده ليلة 18 ديسمبر 1979
وتحقق حلمه
هل نترك كل ما بايدينا ونفكر ماذا حققنا فى نفس هذه السنوات؟
عزيزتى حنان
فى مدونتنا نطرح موضوع انقطاع النت
ونعد عدة حلقات من البرنامج عن الموضوع
http://netonradio.blogspot.com
وطبعا كالعاده نرحب بكل الآراء
لنكون اول برنامج أذاعى يشارك فى اعداده الناس بالفعل
اجمل تحيه
Anonymous said…
كلمات لمدونه ذكيه مستنيره تحاول ان تواجهكم بالخقيقة المره ربما تستيقظون فى صحوه حقيقيه تقول
أين نحن من العالم..ومن كل القيم التي تبني الأمم وتسمو بالانسان والحضارة..؟

مازال يضحكني ذلك التصور الساذج الذي لم نفتأ نردده يوما بعد يوم من أننا خير شعوب الأرض.. مستندين إلى الآية

الكريمة ( كنتم خير أمة أخرجت للناس تأمرون بالمعروف وتنهون عن المنكر وتؤمنون بالله ) أخذنا الفقرة الأولى من الآية

فقط ولم نعمل بباقى الآية وإن عملنا حصرنا الأمر بالمعروف والنهى عن المنكر فى العبادات فقط وبعض الشكليات .. فهل

يقبل الله عز وجل ان يُفضِّل أمة عربية هذا حالها ويختارها دون غيرها من الأمم وهي تعيش بين رجولة هشة وفتونة

مزيفة..؟أمة مازالت تحيا على تجارب القدامى و على الكتب التاريخية البالية ..لم تأخذ منها سوى الغلاف والفهرسة كمن

يسترق السمع من ثقب الباب.. وكأن ما يدور حولها حاليا من اضطرابات وحروب وتكنولوجيا وتصنيع لا يدخل في دائرة

اهتماماتها الخاوية.
Desert cat said…
tamer.sala7
بصيت يا ابيه تامر
الكابل الباك اب ده هيتعمل امتا ومين اللى هيعمله اذا كانت مصر مش عندها اى كابلات خاصة بيها اصلا والسيد الوزير صرح قال انه هيتعمل لها 3 كابلات خاصة اول كابل بدؤا فيه فعلا وهينتهى بعد 9 شهور يبقى تفتكر الكاب اب ممكن يتعمل امتا بعد 9 سنين
:)
اما الموظفين فانا شيفاهم قاعدين يرغوا على الجايكو المفروض يشدو حيلهم شوية علشان النت يرجع لطبيعته
دى رساله موجهه للمديرين بتوعكو بحب اهدى النفوس انا هههههههههه
Desert cat said…
tamer.sala7
اه محمد سمير قال نفس المعلومة دى بس الستالايت ممكن يبقى بطيئ وغالى بس مش هيقطع
لكن الكابلات الفيبر بالرغم من انها اثبتت جودة فى الاداء لكن سمكة القرش كل لما تجوع تروح ناكلها نعمل احنا ايه بقى
:))
Desert cat said…
Zika
طيب واحنا بقى نظامنا ايه فى الليلة دى
الملطشة اللى فى النص
اصحاب الموقع الاستراتيجى بين صاحب السيبر اللى فى امريكا وصاحب السيبر اللى واخد منهم وصله فى ايران
:)
Desert cat said…
انونومس2
الصينى حلم وحقق حلمه
احنا اللى بيحلم فينا بيطلعوا له وافدين البترودولارات يحطموا حلمه ويقضوا عليه
Desert cat said…
انت تسال والكمبيوتر يجيب
يالف اهلا وسهلا بحضرتك
كالعادة دائما تعرضون اهم القضايا يشرفنى زيارة مدونتكم المتألقة
مودتى واحترامى
Desert cat said…
Anonymous
ابهرنى حقيقى منطقها فى الحديث
والملاحظ والجميل حقا ان الغمة بدأت تنزاح وعدد المستنيرين يتزايد

Popular posts from this blog

قميص دهشور

كل تحرش وانتوا طيبين