كوكتيل القهر

على غير عادتى يوم الجمعه استيقظت مبكرا بكل نشاط وحيوية فاليوم مختلف .. مختلف ازاى مش لازم تفاصيل بس المهم انه يوم مختلف .. ركبت الميكروباص وتوجهت إلى وجهتى المنشودة سواق الميكروباص من الواضح انه كان هو كمان صاحى بدرى وبمعنى ادق صاحى مجبر أكل العيش بقى .. تحرك الباص وتحركت معه يد السائق لتشعل الكاسيت .. أول أغنية كانت
La Sortera
قولت الله ايه سواق الميكروباص الكووول ده .. اتاريه كوكتيل وتقريبا هو كمان بيسمعه قهر ومش عارف محتواه ايه .. يتبع باغنية لتامر عاشور .. ماشاء الله كدا تامر بيه عاشور بيوصف حاله لحبيبته بعد ما افترقوا وبيقولها ياريتنى قبل ما قولتها انا كنت موت فى وقتها .. يعنى من الاخر الراجل زعلان جدا انه طلب منها الفراق وبيلوم فى نفسه والايام عليه صعبه كتير لدرجة انه قاعد يدعى على نفسه الهى كانت روحى طلعت يارب كنت موت قبل ما اقول لك نفترق انا خلاص فى بعادك عنى بودع الحياة .. ايه الاغنية الغريبة دى طيب لما انت متقطع اوى كدا قولت لها ليه روحى حلى عنى .. فكرنى بموضة 2007-2008اللى كل واحد تعجبه واحدة يروح يقولها بحبك مش طايق الحياة من غيرك هموت لو مش حبتينى والنبى حبينى ربنا يبارك لك فى الاولاد إكسبى فيا ثواب وحبينى .. وبعد ما يزهق او يلاقى واحدة تانية .. يروح يقولها معلشى انا اسف مش عايز اظلمك معايا انا مش استاهلك خلينا اخوات احسن .. اسبوع تانى لما يحس فى حياته بفراغ ويروح يقولها مش قدرت ابعد عنك ارجعى حبينى تانى ويقعد يبكت فى نفسه زى الكابتن تامر عاشور كدا فى الأغنية .. يعنى هو اللى انا نفسى افهمه ازاى البنى آدم بيحرك قلبه بايده ومخليه طواعيه ليه .. يعنى قعد مع نفسه شوية داس على الزرار يقرر يبعد عنها حس بفراغ فى حياته يدوس على الزرار تانى يقرر يرجع لها طيب وهى بتصدق وبترجع ؟؟؟ لما قولت السؤال ده لاصحابى بعد ما وصلت عندهم تبرعت لقاء بالرد وقالت لى اه فى بنات عبط كدا يقولها روحى تروح يقولها ارجعى ترجع ... انتهى تامر عاشور من وصلة الندم واللوم والدعا على نفسه أنتقل بقدرة قادر لمطرب الجيل اللى البنات بتشوفه تغمن عليها تامر حسنى .. ومن تامر لتامر يا قلبى ما تحزن .. اصل تقريبا نفس وصلة الندم واللوم بس ده مش بيدعى على نفسه هو بس بيترجى فيها وبيقولها امانة عليكى يا حاجه وحياة ربنا ترجعى لى افتكرى لى بس اى مصيبة عملتها لك .. افتكرى بس اى داهيه روحنا فيها سوا .. والشوية اللى سمعتهم من الاغنية قاعد ينوح يقولها افتكرى لى اى حاجه كانت حلوة منى طيب وحشه ارجوكى ارجعى لى ... قعدت ابص .. والتفت اشوف نفسى قاعده فى ضريح من اضرحة اولياء الله الصالحين وكل واحد جاى ينوح ويعترف باللى عمله وبيحلف الشيخ الصالح الجليل ان اللى هجرته وسابته ترضى عليه او اللى طلب منها يفترقوا تحن عليه .. ابداً لاقيت نفسى قاعده فى ميكروباص وفيه ناس وكل واحد بيفكر فى اللى شاغله بقى ايا كان .. وهنا ضربت بكوكتيل القهر والعذاب اللى مشغله السواق عرض الحائط وعملت رحلة بحث عن الهاند فرى داخل حقيبتى المتواضعه وخالفت المثل القائل ما يجى من الغرب حاجه تسر القلب .. لأنه مثل كداب وبيوقع الدول العربية والغربية فى بعضها وقضيت الدقائق المتبقية مع يانى وزامفير وكينجى .. ومع كل مقطوعة موسيقية تصلنى عبر الهاند فرى ارسل اطيب تمنياتى وتحياتى للى اخترع الموبايل والميمورى واخترع اى حاجه تبعدنا عن اغانى الاعترافات الليلية .. المعروف انه لا حساب على القلوب .. لكن فى حالة تامر آند تامر حقاً لا حساب على العقول

Comments

ههههه دة حظك حلو انك مركبتيش ميكروباظ مشغل طول الطريق بعرور او العبد و الشيطانجوجوجو وتروحي في ميكروباظ تسمعي اليثي و جورج واصوف
او تركبي في تاكسي مشغل شرايط ل شيوخ ياها من كترها نسيت اساميهم الي كلها برق و رعد و نازلين تكفير و لعن في امريكا
مبارك علي اول تعليق

انا كمان احب اتوجه بالشكر للسيد المسئوم عن اختراع الموباين وربنا يخليه لنا

هو صحيح الهاند فري الاصلي بكام دلوقتي؟!!ه
مية مسة والله
طبيعى مادام انت فى مصر
مع تمنياتى لكى بمزيد من التوفق والنجاخ فى حياتك الصحفيه
dr.lecter said…
والله صعبان عليا الجيل الجديد مابيسمعوش اغاني بجد
الفئه من 14 ل 20 ومافوق بتسمع خبط ورزع واصوات اشبه كاصوات الحمير

وكلام في الهجايص وكلام مالوش معني ولغه سوقيه زي الاخ تيمور حسني مابيعمل وملعلع كده اكرم الله مثواه عن قريب



بس بيني وبينك بدات اخد علي الاغاني الجديده المكتسحه بتاعه العبد والشيطان وقوليلي يامرايتي ايه اخره حكايتي

اعمل ايه غصب عني وماقدرش اقول لا للسواقين
أعتقد يا قطقوطة أن العالم يدوزن أغنية واحدة يفرضها على العالم
فمن منا يحل شيفرتها أو نوتتها الغريبة
مودتي على ايقاع سمفونية الحياة
newborn said…
طيب نفهم من كده انك معاكى موبايل فيه كارت ميمورى وعليه اغانى ولا انتى بتحبى تسمعى غربى
Sherif said…
انت فعلا كما قال مواطن مصرى أسعد حالا من الرصة التى ساقها

الحمدلله ان الواحد يستطيع ان يعزل نفسه ويعيش فى عالم يحبه
Thnx to technology

أعاد الله عليك السنة الجديدة وانت بخير
Anonymous said…
هو انتى مفيش اى مكان تروحيه او حاجه تحصل غير لما تعلقى عليها كدا
انتى كان المفروض تشتغلى ناقدة والله مستقبلك كان هيبقى باهر
انتى بتشتغلى صحفية صح
Desert cat said…
مواطن مصري
الميروباصات اللى بلاقى فيها الشيوخ المرتزقة اللى بيكفروا البشرية كلها بنزل منها
لكن الاغانى الهابطة من عينة زعرور والعبد والشيطان بحط قطن فى وادنى
:)
Desert cat said…
تايه في وسط البلد
الف الف مبروك عليك تانى تعليق
ههههههههههههه
انا بصراحة مش عارفه الهاند فرى الاصلى بكام اصل الهاند فري والموباين كانوا جايين لى هدية
Desert cat said…
مسلم ..فى البطاقة فقط
يا مساء الفل
تقريبا مصر طمعت فى جميع السلبيات المتوفرة فى العالم واخدتها لنفسها علشان كدا بنردد كتير يبقى انت اكيد فى مصر بعد اى حاجه سيئة
تحياتى
Desert cat said…
فارس بلا جواد
ميرسى جدا يا استاذ فارس
Desert cat said…
dr.lecter
طيب تصدق بقى يا دكتور انى اكتشفت ان فى ناس كبيرة فوق العشرين برضه بتحب تسمع الحاجات دى زى العبد والشيطان .. ماهم السواقين ناس كبيرة مش صغيرين بس مزاجهم كدا بقى
Desert cat said…
نبراس العتمة
دائما ردك يلخص البوست فى جملة واحدة
مودتى واحترامى
Desert cat said…
newborn
هههههههههههههه
لاء يا سيدى انا بحب اسمع فيروز وبحب اوى ميوزك عمر خيرت
ولما بسمع ملوثات بقلب على غربى بدون ادنى شعور
:)
Desert cat said…
Sherif
الحمد لله الذى لا يحمد على مكروه سواه
اشكرك جدا يا عزيزى
وكل سنة وانت بالف خير
عام جديد سعيد
Desert cat said…
Anonymous
اعمل ايه بقى فى حياة المصريين اللى كلها مواقف غريبة
اما بالنسبة لشغلى فانا اتخرجت من تخصص واشتغلت فى تخصص تانى وهوايتى حاجه تالته
فهمت حاجه ؟؟
أيووون هو كدا بالظبط
ريماس said…
تعرفى انك عرضتى مشكلة مهمة ومفيش حد من الاخوة المعلقين تم لفت نظرة ليها
واللى هى ان كل واحد يروح يلف مع واحدة شوية
ويرجع تانى يقولها خلينا اخوات احسن مش عايز اظلمك معايا
والبنت تفضل عاملة زى المراجيح رايحة جاية
انا اللى بيغظنى قوى النوع ده من البنات والولاد
عرضتى الموضوع بطريقة ساخرة ومختلفة وتحمل بين سطورها رسالة هامة
احييكى
Desert cat said…
ريماس
على فكرة بقى انتى قوية الملاحظة جدا
وانا قصدت اثير النقطة دى فى الحوار
لمعرفة ردود الافعال
لكن الواضح ان مفيش حد خالص مر بيها
اشكرك جدا ريماس
شرفتينى
انا حرة said…
ضحكتينى و فكرتينى بموضوع شبيه كتبته من فترة على التلوث السمعى اللى بيسموه اغانى ده

بس فى نقطة مهمة..هم مش بيجيبوا الكلام ده من بيتهم..ما هو ده انعكاس لثقافة الناس..كل بنت ما طلعتش من البيضة عايزة تتمشى على الكورنيش فى ايد عيل ملزق شعره و موقع بنطلونه..طبيعى انهم يتأثروا باغانى من نوعية هستر عليكى و مش هفضحك للفلتة تيمو بيه..

حتى لو كان هو بيضحك عليها بكام اغنية من نوعية ما تسيبينيش ابوس رجلك ولا هى اللى بتضحك عليه بهموت من غيرك و حياتى بعدك عذاب
على راى الفيلسوف اللى مش عارفة اسمه ايه لما قال كله بيضحك على كله

مجتمع كل القيم فيه بقت مشوهة و الاغانى بتعبر عن التشوه ده..نص الناس بتسمع تيمو و النص التانى مركز على التعبان الاقرع و الحية ام جرس و الحمد لله على نعمة العربية و فيروز
Desert cat said…
انا حرة
العجيب واللى يضحك بقى انك تلاقى البنات والولاد الصغيرين قاعدين يتنهدوا ووكان الكلمات تحاكى احاسيسهم اما متعهديم شرايط الثعبان الاقرع يا اما يغير الشريط يا اما انزل من الميكروباص وذنبه على جنبه بقى
انونومس 2 said…
نبوءه
سيداتنا المغرمات بتقليد نساء الخليج لا تقران هذه القصه من قناة العربيه السعوديه
والا اكيد ستقلدونهن
اكيد سنرى هذا قريبا
القصه الخبريه كما يلى
من غرائب موسم الحج: حاجات آسيويات بذقون طويلة أقرب للرجال
لا يمانعن في التصوير والحديث للإعلاميين
التفاصيل
بس بدون ضحك
شهد موسم الحج العام الحالي ظهور نساء كبيرات في السن، قدمن للحج من دول أسيوية مثل باكستان، بذقون طويلة تدفع

للاعتقاد بأنهن من الرجال، نقلا عن تقرير لجريدة "الوطن" السعودية الجمعة 12-12-2008، للصحافي محمد الزايد.

وكان المثال الأشد غرابة هو الحاجة الباكستانية، حزن طاهر مهان، والبالغة من العمر 60 عاماً التي أبهرت كل المارين

بجانبها على طول ممر المشاة المظلل وهي في طريقها لرمي الجمرات، وبجوارها ابنها عبد الجليل خان.

الحاجة "حزن" ظهرت بذقنها الطويل الذي شد انتباه من شاهدها، ولكن التدقيق في ملامح الوجه والقوام كان ينتهي للتيقن من

كونها امرأة وليست رجلا
محتاجه بوست مستقل اليس كذلك والصور موجوده على العربيه نت
Desert cat said…
انونومس 2
قريت الموضوع بالأمس على موقع العربية
وميرسى جدا لذكره فى المدونة
ولربما يكون هو موضوع البوست القادم
:)
ميرسى جدا مرة تانية
مودتى
An Egyptian said…
انا عندي ده ارحم مايشغل شريط قران ولا شيخ من خريجي العباسية اياهم
Desert cat said…
An Egyptian
انا لما بلاقى الشيوخ خريجى العباسية دول ياما السواق يخرسه خالص ياما انزل مش بحب الوث ودانى
ههههههههههههه
بالتوفيق يارب
ربنا يهدي
بس جد طريقة كتابتك للموضوع مميزة
تحيــــأتي

Popular posts from this blog

قميص دهشور

كل تحرش وانتوا طيبين